TONAH PIMPINAN PUSAT GKPS BANI PESTA/MINGGU WANITA TAHUN 2014

 

 

 

 

No.      :  79/03-PP/2014                                                                              Pematangsiantar, 09 Maret 2014

Lamp   :  –

Hal      :  TONAH PIMPINAN PUSAT GKPS BANI PESTA/MINGGU WANITA TAHUN 2014

 

Nahinormat

Haganup Kuria GKPS

Bani iananni bei.

 

Salam Tahun kesetia kawanan  tahun 2014 ma banta haganupan.

Puji-pujian ampa tarimakasihma sombahkononta hubani Tuhanta Jesus Kristus, Rajani Kuria in, na tongtong manramotkon, marmudu-mudu janah mamasu-masu goluhta tiap ari.

Bani panorang on, riap marmalas ni uhur do hita haganup pagori ni GKPS mamestahon Ulang Tahun ni Wanita GKPS na pa 56 tahunkon.

Domu hubani Pesta Ulang Tahun Wanita GKPS na pa 56 tahunkon on, piga-piga hal padasonnami hubanta haganup, na gabe ruji-ruji ampa ojur-ojur banta bani na mandalankon pandiloon ampa suruhan ni Tuhan in hubanta:

1. Humbani sisi panorangni, hataonkon domma matoras Seksi Wanita GKPS. Bani pardalanan ni Seksi on humbani mungkah, ra domma buei homa na binahen ni Seksi on mangurupi horja i tongah-tongah ni Kuria in. Hansi pe sonai, halani boi hataonkon Seksi Wanita marrupahon penggerak utama bani hampir haganup kegiatan i Kuria in, totap ma ipingkirhon homa sonaha ase boi lobih maksimal homa age pangidangion ni Seksi on.

2. Tahun Kesetiakawanan do goran ni tahun 2014 on banta i GKPS. Marhiteihon ni Tahun Kesetiakawanan on iojur do haganup pagori GKPS, khususni Seksi Wanita ase pataridahkon kesetiakwanan ai marhitei kegiatanni. Nini Apostel Paulus: “Marmalas ni uhurma nasiam pakon na marmalas ni uhur, tangis pako na tangis” (Roma 12:15). Artini ai, lang pitah sapangahapan hita pakon hasomanta na marmalas ni uhur, tapi dihut do homa pakon sidea na marpusok ni uhur hinorhon ni bagei-bagei paruntolon atap sitaronon na idompakkon sidea ibagas goluhni.

3. Humbani na ijia pe buei do naboru atap inang na berperan penting bani Harajaon ni Naibata, songon Miriam, Ruth, Debora, Esther, Maria, Lydia pakon na legan ope. Sonai do homa age i GKPS, domma buei na boru gabe Pandita, Penginjil, Sintua pakon Syamas. Artini ai, dihut do naboru berperan penting bani pardalanan Sejarah ni Gereja humbani mungkahni das bani sadari on, ronsi bani panorang na laho roh pe. Tontu GKPS pe mangahapkon peran penting na sonai ai marhitei aksi nyata na binahen ni Seksi Wanita on i tongah-tongah ni Kuria in.

4. Sonai homa do age i tongah-tongah ni keluarga pakon  masyarakat, peran ni Wanita atap kaum perempuan pe manontuhon botul laho menciptahon keluarga pakon masyarakat na sejahtera. Sadalan hujai, tahun 2014 isobut do Tahun Politik i negaranta, halani pamasaonma Pemilihan untuk Lembaga Kenegaraan, songon DPR, hun tingkat II das hu Pusat, sonai ronsi na mamilih Presiden pakon Wakil Presiden. Iojur hanami ase bijaksana homa age na si inangta laho manontuhon ise-ise sipilihonni.

Sonaima ipadas hanami hubani nasiam Seksi Wanita GKPS na marulang tahun pa 56 tahunkon panorang on. Sai totapma hita mangondoskon goluhta hubani Tuhan, janah totap homa mambahen sidearan bani Kuria-Ni ronsi hubani hasoman samah jolma pe. Tuhan Naibatama mangkasomani janah mamasu-masu hita haganupan.

 

Salam pakon tonggo,

Pimpinan Pusat GKPS

              Pdt. Jaharianson Saragih STh,MSc.PhD                                        Pdt. El Imanson Sumbayak, MTh

E p h o r u s                                                                                    Sekretaris Jenderal

cc.    -Pdt/Peng. Resort GKPS

-Praeses GKPS Distrik I-VII

-Biro keuangan

-file