EPESUS 6:10-20 MARGOGOH IBAGAS TUHAN

MARGOGOH IBAGAS TUHAN

Epesus 6:10-20


Parlobeini Nuan on bagei do pertunjukan na jumpah hita bani televisi. Salah sada programni aima kompetisi atap parlumbaan laho mandapotkon hadiah baik berupa barang sonai homa age sejumlah duit. Misalni parlumbaan mandoding songon Indonesian Idol, atap parlumbaan tari, ketangkasan bani bidang sport pakon na legan. Ase boi gabe pemenang, pesertani lang sungkup pitah sekedar baik atap bagus tapi maningon do ia lobih dear atap memiliki kelebihan marimbang pesaingni. Ibutuhkon do kekuatan, pangarusion, ketangkasan ampa keahlian ase boi sasahalak menjadi pemenang atap juara. Artini maningon do dong faktor kelebihan atap nilai plus ni sasahalak marimbang kompetitorni ase boi layak gabe pemenang.

Hatorangan

Teks ni ambilan on aima hata parpudi ni Paulus hubani kuria Epesus na pasingatkon sidea pasal munsuh ni sidea sibanggalan anjaha patugahkon pasal pertahanan na paling baik maradopkon munsuh ai. Paulus pausihkon goluh ni halak Kristen hubani sada kompetisi atap perjuangan tapi lang manlawan hasoman jolma. Perjuangan atap parporangan ai aima manlawan sibolis do pakon kuasa-kuasa hajahatonni. Halani ai songon na lang mungkin do hita jolma boi monang manlawan kuasa na banggal sisonai ai. Tapi dong do banta Jesus Kristus Sipaluah hita janah simada kuasa na mangatasi sagala kuasa na dong i nagori atas, i tanoh on sonai age ronsi i nagori toruh. Halani ai hata-Ni marhitei Apostel-Ni Paulus bani ambilan on sihol mangkatahon hubanta :

Lambin margogoh ma ibagas Tuhan

  1. Tanda ma ise do munsuhmu.

Apostel Paulus pagolpahon hita ase pangkei hita dompak akal –akal ni sibolis.  Sibolis licik do bani akal-akalni mambahen buei jolma lang menyadari domma hona siding ni sibolis ai ia. Ia sihol do mangagouhon jolma na porsaya ase gabe kahou janah magou. Marhasomansi dong do pasukan jahat na totap siap sedia janah pongkut laho menggoda ampa parohkon masalah banta. Halani ai ibagas ancaman ampa bahaya banggal do hajongjonganta selaku siirikkon Kristus. Sibolis ai boi do mamakei jolma gabe alatni laho menyerang janah mangagouhon na porsaya. Boi do ai berupa ancaman terorisme dompak gareja atap mempersulit halak na porsaya laho meraih posisi atap jabatan kecuali ra ia manandingkon Kristus. Halani ai maningon lobih pangkei do hita dompak sibolis ampa akal-akalni na boi mamakei jolma, sesuatu na menarik pakon godaan-godaan na legan ronsi hisap-hisap pardagingonta laho parsedahon haporsayaonta.

Ihatahon Paulus do :” Ai seng maruntol hita manlawan daroh pakon daging, tapi dompak sipanrajai do, siparkuasa, sigomgomi dunia hagolapan on, tonduy hajahaton na i awang-awang ai”(ay.12). On ma sada peperangan na so seimbang atap adil. Seng adong age sada pe kekuatan fisik i tanoh on na boi parontihon kuasa atap serangan ni sibolis parjahat in. Sibolis ampa akal-akalni domma mamboban hajahaton hu dunia on humbani mungkahni mardousa jolma. Sibolis pakon pasukanni lang ongga marnaloja laho menyerang hita dengan tujuan ase madabuh hita janah rap pakon sidea i neraka. Halani ai ulang ma sompat talu hita dompak akal-akal ni sibolis in. Hotop do sibolis memperdaya hita marhitei ajaran hakahouon. Ihatahon Paulus do : “Ai ipapitung naibata ni dunia on do pingkiran ni na so porsaya, ase ulang iidah sidea sondang ni ambilan na madear pasal hasangapon ni Kristus” (2 Kor. 4:4). Sibolis totap do mencoba laho menyerang hasintongan ni hata ni Naibata pasal bagei-bagei ni parhara misalni soal na tinompa, dousa, dalan hu haluahon pakon soal hagoluhan dob hamateian pakon na legan. Ipakei sibolis do sagala dalan laho papeolhon hasintongan. Sanggah tarlajou Jesus pe, ipapeol sibolis do Bibel laho mandabuhkon Jesus.

Serangan ni sibolis na legan aima manggoda hita ase mangkorjahon dousa atap meyakinhon hita ase ulang mabiar mangkorjahon dousa dengan tujuan laho mangagouhon haporsayaonta. Haganup do hita pardousa. Tapi selaku na porsaya , idilo Naibata do hita ase paubahkon uhurta janah tongtong mangindahi hasasapan ni dousanta hubani Jesus. Tapi sibolis totap do sihol mandabuhkon hita hubagas dousa ase dousa ai na manrajai ampa mengendalihon hita songon raja Daud sanggah magkorjahon parbangkison, dob ai aima mandorongsi laho mangkorjahon pamunuhon halani domma ikuasai dousa ai ia.  Pangkorhonni ai gabe magou do haporsayaonni hampir satahun das hubani ujungni gabe bertobat ia. Halani ai maningon do pangkei hita halani dousa boi do maranakkon dousa na legan ronsi marpahompuhon dousa na legan use misalni halani isuba hita mangoto-otoi, curang pakon bentuk dousa na legan na parsedahon haporsayaonta. Manggoluh tanpa pertobatan usih do ai songon na mardalan i topi ni jurang na bagas irik mangkatahon :” Lang anjai madabuh ahu” Porlu do hita marlajar humbani Daud atap si Petrus na menyangkal Jesus pasal sonaha boi do sasahalak madabuh hubani dousa binahen ni sibolis. Manggoluh ibagas dousa mararti do ai mambere kesempatan hubani sibolis laho manjullakkon hita hu bibir ni jurang na boi parsedahon haporsayaonta. Ipagolpa Bibel do hita :”  Halani ai, halak na mangagan jongjong ia, pangkei ma, ase ulang tompas ia” (1 Kor. 10:12).

  1. Pakei sinjata na humbani Naibata

Mamungkah humbani ayat 14, ipakei Paulus do gambaran ni pakeian ni sahalak tentara ni Romawi na gabe pakeian laho marporang laho manggambarhon perlindungan pakon hagogohon ni Naibata hubanta. “Ase, jongjong ma nasiam, margondit hasintongan bani binongeinasiam, marbaju bosi hapintoran”  (ay.14). Sibolis aima bapa ni sagala kebohongan atap penipuan. Hotop do sibolis menyerang hita marhitei na padaskon hasintongan na satongah-satongah atap kebohongan. Halani ai maningon do hasintongan ni Naibata na humbani hata-Ni totap manlioti hita songon sada gondit na memperkuat pertahananta riap laho manlawan sibolis. Perlindungan na legan aima “baju bosi hapintoran” (ay 14) Panorang sibolis menggoda hita laho mangkorjahon dousa, hita roh hubani Kristus na mamorsan ganup dousa-dousanta. Pitah idop ni uhur ni Kristus do na mambere banta sada ianan i harajaon-Ni. Sibolis totap do mencoba meyakinhon hita paboa lang anjai ongga boi hita masuk hu surga halani dousa-dousanta. Tapi hasintongan aima paboa Jesus , Sipaluah hita lang ongga gagal mangkorjahon harosuh ni Naibata Bapa. Goluh-Ni na gokan dear,  ai ma na gabe dalan haluahon banta asal ma porsaya hita hu Bani. On ma na maningon totap gabe bajunta paboa hita domma ipintori Kristus marhitei haporsayaonta hu Bani na mambahen hita parsimada bani hagoluhan sisadokah ni dokahni. Dong do homa banta :”  nahei na marsipatu ringgas ni uhur, laho mangambilankon ambilan na madear, pardameian in” (ay.15). Sipatu bani sahalak tentara aima na boi mangurupi ase jongjong toguh bani tanoh. Jadi, ambilan na madear pasal pardameian, ai do na boi mambahen hita sirsir janah siap untuk segala sesuatu. Damei sedo soal aha na iahapkon hita tapi aima soal sonaha hita i lobei ni panonggor ni Naibata nuan selaku halak na dob iampuni Kristus janah ilayakkon banta pardameian na humBani. Bani panorang na dos, maningon do ibotoh hita paboa memiliki damei na humbani Naibata sekaligus do mambahen hita ibagas posisi konflik pakon sibolis. Pakeian perang selanjutni aima :” gantar haporsayaon in, na boi mangintopi haganup panah apuy ni parjahat in. pakon tangkuluk bosi haluahon” (ay.16-17). “Haporsayaon” ipakei ijon laho manggambarhon aha na iyakini hita, aima ajaran pasal hata ni Naibata. Hata ni Naibata boi do ipakei hita gabe partahanan na toguh songon na binahen ni Jesus sanggah ilajou sibolis Ia. Martin Luther manuratkon  bani dodingni na jumpah hita bani Haleluya No. 138 : Jahowa Naibatanta do tarbaen batar-batarta” salah sada ayatni mangkatahon “ age sada hata pe hata ni Naibata kuh do manaluhon sibolis in” Sonai do panorang tentara Romawi jongjong marbaris rapat mamakei gantar pakon baju bosini bei, gabe songon benteng do ai mandompakkon munsuh. Halani ai hita pe anggo beribadah hita riap, ijai do hita saling menguatkon marhasoman hata ni Naibata ampa tonggo. Songon ungkapan “Bersatu kita teguh”  Tangkuluk bosi haluahon paingatkon hita bahasa marhitei na mambotoh ampa mananda  hata haluahon na humbani Naibata lang anjai boi pakahouon ni sibolis pingkiran ampa hauhuronta. Ipasirsir Naibata do homa banta “podang ni tonduy, ai ma hata ni Naibata “(17).  Panorang ihaporsayao hita hata ni Naibata, ijai ma hita mantaluhon akal-akal ni sibolis.  Ambilan na madear aima hagogohon ni Naibata  paluahkon sagala na porsaya” (Rom 1:16). Adong do sada nari dalan na mambahen sinjata na humbani Naibata marhorja. Isuratkon Paulus : “Martonggo ma nasiam barang sadihari pe ibagas Tonduy in, ibagas tonggo ampa elek-elek, anjaha puho ampa golgol manonggohon haganup halak na susi in” (ay.18) Panorang martonggo hita marhitei tonggo Ham Bapanami, “ulang hanami bobai Ham hu parlajouan” ijai ma hita manonggohon panramotion ni Naibata hubani haganup halak Kristen ase jumpahan hamonangan. Orangtua manonggohon niombah janah niombah manonggohon orangtua. Haganup hita manonggohon  keluarga, hasoman, sipangajari ampa murid, Pandita, Penginjil, Sintua, Syamas, parsikolahan Kristen sonai homa age na lape mananda Naibata ase boi gabe porsaya. Paulus sandiri mangindohon ase itonggohon ia bani na hona rantei ia i penjara paimahon tuntutan ampa vonis humbani kesar Rom ase Naibata mambere hubani keberanian marsahap.

  1. Jongjong toguh bani onjolan

Marhasoman hata ni Naibata laho mangidah hagogohon ni munsuh-munsuhta, anjaha marhasoman hata ni Naibata na gabe sinjatanta, ijai ma hita boi jongjong toguh bani hagogohon ni Kristus. Paulus manobut :”  Lambin margogoh ma nasiam ibagas Tuhan in ampa ibagas gogoh ni kuasaNi in. Pakei nasiam ma pakeian sinjata na humbani Naibata, ase boi tahan nasiam dompak akal-akal ni sibolis in.” (ay.10-11). Naibata marsuruh Anak-Ni na sangap gabe dos songon hita ibagas hagalekon ni hajolmaonta. Jesus berjuang manlawan haganup godaan songon hita. Anjaha Ia totap do monang anjaha lang ongga mardousa. Ia lang ongga mardousa age sanggah tarsilang Ia janah manaron demi hita. Ia matei ibagas hamonangan parsedahon kuasa ni sibolis na mamparjabolon hita ibagas dousa. Naibata domma manlayakkon hubanta Hata-Ni na maharga ase marhitei haporsayaon hita mardomu pakon Anak ni Naibata ampa habayakon ni nagori atas. Totap do ihasomani hita bani pardalanan ni goluhta ibagas dalan-Ni. Ia domma mambere banta hata-Ni na gok kuasa na mambahen sibolis misir marhitei na ipakei hita in ibagas goran ni Jesus. Jesus mamadankon :” Atap aha pe sipindoonnima humbani Bapa in, sai na bereon-Ni do marhitei Goranku.” (Joh 16:23)

Pangujungini

Sinjata na idaftarhon Paulus aima ibagas  bagei dalan, tapi fokusni aima  ase boi ipakei hita Hata ni Naibata secara efektif manlawan hagogohon ni munsuh-munsuhta. Naibata mambere banta hagogohon ijin hita marpangunsandeian hubani Jesus mandompakkon segala sesuatu. Paulus manuratkon sanggah i penjara : “Haganup do tarhorjahon ahu marhiteihon Ia, na margogohi ahu” (Pil.4:13). Parjahat ampa hajahaton na i dunia on lang anjai marnamaronti, tapi marhitei Kristus margogoh do hita manlawan ganupan in. Kristus domma manasap dousa-dousanta anjaha domma monang ampa pamonangkon hita.  Bani ujungni, hatahononta ma selamat tinggal hubani sibolis ampa hajahaton janah masuk hita hu nagori atas anjaha lang marhagogohon be sibolis in ajnaha seng dong na tarbahensi. Malas ni uhur mamonangkon sada kompetisi aima sada hal na menggembirahon tapi lang tarbandingkon ai hubani hamonangan na sihol gabe rupeita i nagori atas. Domma ibere Kristus hagogohon na humBani hubanta. Porsaya ma hita Bani. Marhasoman hata-Ni do boi mambahen monang hita anjaha gabe pemenang. Amen.

Pdt. R.J. Saragih, MTh.LM