MANGGOLUH LAHO MANGIDANGI TUHAN

Lahoan ni Apostel 20:21-31

Parlobeini

Ambilan on aima hasaksian, podah pakon singat-singat ni apostel Paulus hubani sintua-sintua na hun Epesus. I Miletus do ipadas hatani on bani pardalananni manuju Jerusalem sanggah pardalanan sendingni na patolu halihon. Isuruh do na mardilo sidea ase roh hu Miletus marjumpah pakonsi. Ibahen apostel Paulus sonai, halani domma ipabotohkon Tuhan in hubani marhitei TonduyNi na seng ulakanni be roh manohu sidea. Ase, sekaligus hata partadingan do on laho patotaphon uhur ni parhorja ai bani horja pangidangion ni sidea. Ipatorang apostel ai do bani sidea sonaha panghalojahonni laho padashon ambilan na madear in bani sidea na i Epesus. Sadalan hujai ipodahi do sidea, sonaha sidea patut manghorjahon pakon manghargahon horja i kuria ni Tuhan in. Isadarhon sidea paboa lang na urah horja in, halani Naibata do simada kuria in. Buei do munsuh na sihol parseda kuria in, na roh hun darat age na ibagas pe. Anggo ibasa hita bindu-bindu satorusni, tongon do masa aha na nilumbahon ni apostel ai pasal dirini, ai itangkap do ia i Jerusalem janah iboan das hu Rom selaku tahanan.  Pasal keadaan ni kuria Epesus pe ipudian ni ari sintong do lumba-lumba ni apostel ai, ai dong do panghurangi ni uhur ni Tuhan in bani kuria ai (Pangungkabon 2:4-5).

 

Hatorangan

  1. Bulat pakon pongkut ni uhur ni apostel ai mandalankon horja pangidangionni. Taridah do ai marhitei na hinatahonni: “Tongtong do husaksihon bani halak Jahudi age bani halak Gorik hamubahon ni uhur bani Naibata ampa haporsayaon bani Tuhanta Jesus Kristus.” Sedo na laho pagijang dirini ia manluarhon hatani ai, tapi sihol manokanhon paboa tongon-tongon do apostel Paulus padashon inti ni ambilan na madear aima pasal idop ni uhur ni Naibata ibagas Kristus. Age halak Jahudi, age halak Gorik maningon do paubah uhur. Halak Jahudi na gomos marsijoloman bani titah anjaha seng manghaporsayai Jesus maningon do paubah uhur. Halak Gorik pe, na lang mananda Naibata, na pongkut bani filsafat, na manggalang bani naibata gana-gana pakon naibata naso tinanda (Lahoan 17:16,23), maningon do homa paubah uhur. Age pe na dua bangsa in do hansa isobut ijon, tontu in ma mewakili age bangsa-bangsa na legan. Halak Jahudi na dob mananda Naibata, tapi seng porsaya bani Jesus, halak Gorik pakon bangsa-bangsa na legan na lang mananda Naibata pakon Tuhan Jesus, haganup ningon paubah uhur janah manghaporsayai Sipaluah in. Seng marpilihan, hubani haganup do ipadas apostel ai ambilan na madear in. Sadalan do in hubani sura-sura ni Jesus na  mandilosi gabe suruhanNi (Lahoan  9:15).
  2. Totap do uhur ni Paulus age pe mandapot parlawanan bani pangidangionni. Roh do parlawanan humbani deba halak Jahudi sonai homa humbani naso Jahudi. Iayak-ayak (13:50), ipargijig (14:19), ilonsingi janah idabuh hu tutupan (16:23), aima deba na ni dagei ni apostel ai bani huta-huta ija ia padashon ambilan na madear in. I Epesus pe dapot parlawanan do ia. Sonai pe haganupan ai, seng surut semangat ni Paulus, janah totap do uhurni manghatahon hubani sintua-sintua na hun Epesus ai: “Tapi seng pala harga huhira hosahku, asal ma boi hupaujung langkahku ampa horja na dob hujalo humbani Tuhan Jesus, aima na manaksihon ambilan na madear pasal idop ni uhur ni Naibata.” Pakon pondok hatahonon, sirsir do Paulus matei halani parambilanonni. Anjaha halani gok do idalankon apostel ai horja na ondos bani, mambahen seng marutang pangahapni age dompak halak Epesus. Pala do tolu tahun ia ijai pagolpahon sidea marhasoman iluh.
  3. Paulus, parambilan na berwawasan masa depan. Tangkas do isadari apostel Paulus tantangan, hamaholon sidompakhonon ni kuria i Epesus. Tong ope ijai sisombahon Artemis na tarbarita ai. Tantangan hun darat ma ai. Tapi seng olat ni ai. Tantangan humbagas pe ra do homa roh. Tapi sonaha pe, atap hunja pe roh ni tantangan anggo toguh do partahanan, seng anjai boi ai parsedahon. Halani aima ase ipagolpa janah ipatoguh Paulus uhur ni sintua-sintua na hun Epesus. Isadarhon janah ipaingat sidea pasal tanggungjawab ni sidea: “Halani ai jaga nasiam ma dirinasiam ampa haganup hulanan in, ai na dob ipabangkit Tonduy Napansing do nasiam mardimata in, ase iparmahani nasiam kuria ni Tuhan in, na tinobusNi marhitei darohNi sandiri”. Na parlobei itokanhon aima  manjaga, mardiatei diri sandiri ase mawas diri selaku parhorja, selaku pambobai, siihuthonon pakon sitiruon. Paduahon, manjaga pakon mardiateihon hulanan in, in ma kuria in. Kuria igambarhon songon hulanan ni biri-biri na urah merap atap kahou janah na torus ionggopi begu panoroh. Manjaga hulanan na sonin ma parhorja ipabangkit Tonduy Napansing. Kuria ni Naibata do kuria in, na harga Bani, nansa harga ni daroh ni AnakNi, Jesus Kristus. Mardimata pakon marmahani kuria na tinobusNi in ma tanggungjawab ni parhorja.

 

Hahonaan

  1. Anggo ibasa hita ambilan on, ra pangahapta songon na marpardomuan hubani parhorja hansa in: apostel pakon sintua-sintua, parambilan-parambilan. Tapi anggo roh hita humbani topik Minggu in: “Manggoluh laho mangidangi Tuhan”, tangkas ma  banta paboa haganup do hita, parhorja sonai homa na lang parhorja ni kuria dapotan tanggungjawab mangidangi Tuhan bani goluhta, halani haganup do hita na dob tinobus marhitei daroh na maharga in, (1Petrus 1:18-19). Goluhta ningon mangidangi Tuhan marhitei na manghorjahon rosuh ni Tuhan, mambere dirinta gabe galangan na manggoluh bani Naibata. Apostel ai do manurathon: “Ai pe hupaingat ma nasiam sanina marhitei idop ni uhur ni Naibata : Ondoskon nasiam ma angkula nasiam gabe galangan na manggoluh,  na susi anjaha na hinarosuhkon ni Naibata, in ma parsombahon nasiam na maruhur!” (Rom 12:1)
  2. Sasintongni, haganup do hita parambilan, haganup do hita saksi, haganup do hita pangidangi. Dong do hata na manghatahon : goluhta do anjap-anjap parambilanon banta. Barang ija pe, sadihari pe, parhorja atap lang parhorja kuria, ningon gabe parambilan, na ipataridahkon marhitei goluhni: hatani, sikapni, sonai age horjani. Lang maningon jongjong i anjap-anjap, i partonggoan atap i partumpuan; lang haganup hita ibere talenta bani ai. Agepe sip hita manghorjahon horjanta, mandalankon tanggungjawabta na romban hubani hata ni Naibata, hira na marambilan, marsaksi janah mangidangi do hita marhitei ai. Ambilan i horjahon, horja
  3. Bagei janah palegan-legan do horja pakon pangidangionta, tapi sihol ma haganupan in bahen hadearon ni haganup. Sada do Tuhan na mambere pakon mamasu-masuhon horja ampa pangidangion in hubanta bei. Sihol ma hita ‘bertumbuh’, mubah hubani na roh dearni ibagas haganupan in. Bulat ni uhur pakon hapongkuton songon na ipataridahkon apostel ai, sonai ma homa bulat ni uhur pakon pamongkuthonta bani horja ampa tanggungjawab na ondos banta, i kuria sonai homa bani  bagei ni bidang pargoluhan ar-ari on. Ase boi saud ai maningon totap do hita marsijoloman bani haporsayaon maronjolan bani hata ni Tuhan in. Pitah marhiteihon ni na sonin do boi monang hita mandompakhon munsuh na roh hun bagas atap hun darat pe. Janah bani ujungni ibagas haporsayaon songon apostel Paulus boi manghatahon: “Domma hudobhon parlawanan na madear in, hupaujung parlumbaonku anjaha ramot hubahen haporsayaon in.”(2 Tim.4:8)

Manggoluh laho mangidangi Tuhan, songon na hinorjahon ni apostel Paulus, sonai do homa ipodahkon age hubanta panorang on.

 

Pdt. SA. Girsang