Menu
Categories
JAGA MA,  ULANG IPAKAHOU
12/09/2019 AMBILAN

15 Desember 2019; Advent III; Mateus 24 : 3 – 8; Haleluya No. 29 : 1-2

Parlobeini

Parsahapan pasal ari parpudi (akhir jaman) torus do gabe tema na menarik bani halak Kristen, anjaha lang otik homa na masuk hubani pangarusion na lepak. Evangelium Mateus, na dohor tumang konteksni hubani halak Jahudi pe buei do patorangkon pasal topik on. Age das hubanta bani panorang on pe, sai buei do tong sungkun-sungkun pasal aha, sonaha do holi bani ari parpudi ai. Ibagas ambilan on ipatorang do sonaha sungkun-sungkun ai muncul marhitei susian ni Tuhan Jesus. Songon susian ai, ra do age hita jolma na manggoluh bani panorang on pe,  marosuh do ra hita anggo ibotoh hita homa “antigan” ma masa ai. Songon na istimewa do ra pangahap anggo dihut hita bani odoran ni na ‘mambotoh’ rusia ai. Sonaha do tongon pangarusion pasa akhir zaman ai? Anjaha sonaha do patut hita manggoluh laho mangalo-alo ari ai?

 

Hatorangan

  1. Ambilan on masa sanggah Jesus pakon susianNi dob luar hun rumah panumbahan na i Jerusalem. Susian ai patuduhkon lobih dohor pasal rumah panumbahan ai hubani Jesus mamungkah humbani alaman das hubani bagian-bagian bangunanni ampa kemegahanni. Mase pala ipatuduh? Sasintongni in marbona humbani hata ni Tuhan Jesus bani Mateus 23:38 “Tonggor ma, maningon tarulang ma rumah nasiam”. Ihatahon Jesus sonai aima dalam rangka mengkritik bangsa Israel na iwakili Parisei ampa Sibotoh surat na mengklaim Jerusalem ampa rumah panumbahan gabe ianan ni Naibata. Jerusalem na sasintongni maningon manjalo Anak in, tapi hunjai do roh sibunuh nabi-nabi ampa sipargijik na sinuruh  ni Naibata. Sonaha do rumah panumbahan na sonin “jagiah”ni boi gabe tarulang? Menurut hasaksian ni sejarahwan Jahudi na margoran Josepus, luar biasa do rumah panumbahan ai halani batu-batu na ipakei pajongjongkon rumah panumbahan ai, ganjangni 15 asta, gijangni 12 asta, bolagni 8 asta (1 asta = 45 cm) anjaha boratni lobih humbani 100 ton. Bayangkon hita ma sonaha batu-batu na sonin boratni boi isusun, luar biasa tene. Bani proses pembangunan in, Herodes Agung mamakei 10 ribu halak parhorja sadokah 8 tahun. Dob ai buei ope penambahan-penambahan bangunan, ai do ase ihatahon bani Johannes 2:20 paboa panorang pajongjongkon rumah panumbahan ai 46 tahun ma dokahni ase salosei. Tapi boi do tarulang (sunyi senyap) in bani sada panorang. Jerusalem ai boi hona papa, sedo halani batu-batu na borat ai, tapi halani halak na mangiankon ai domma manggoluh ibagas hadosaon, marisi hasipakulah-kulahon, bahkan songon ulog darih ( i darat jenges, hape ibagas marbisa). Na mangiankon lang be pataridahkon sura-sura ni Naibata, na manurut sidea “marianan” i rumah panumbahan Jerusalem.
  2. Antigan do parroh ni Tuhan in? Sanggah hundul Jesus i atas dolog Jetun, roh ma deba humbani susianNi laho marsahap hubani Jesus “Patugah Ham ma bennami, antigan ma masa ai, anjaha aha ma tanda ni parohMu ampa ajal ni dunia on?” (ay.3). Sidea na roh ai, aima Petrus, Jakobus, Johanes, pakon Andreas (Mark.13:3). Sasintongni isi ni sungkun-sungkun on aima sadihari anjaha aha ma tanda parroh ni Jesus ampa ampa tanda akhir jaman. Age pe susian ai totap ope mangkaporsayai paboa maningon jongjong do torus rumah panumbahan das hubani ujungni panorang, tapi i pihak na legan ididah sidea do hata ni Tuhan Jesus na gok Sai na saud do ganupan na hinatahon ni Naibata. Penasaran do susian ai irik laho mambahen langkah (antisipasi) paboa das saud songon na hinatahon ni Jesus ai, ase dong tagam-tagam. Adong porlu ni uhur laho mambotoh “antigan” do masa songon na hinatahon ni Jesus ai : “Sintong do na huhatahon on bennima: Seng paturuton ijai dua batu patindih na so rosakkononkon”. (ayat 2). Isuba sidea do masuk hubani “ranah” ni Naibata. Memang sodap ma anggo nabotoh “antigan” panorang ni ai, boi ma adong periapan-persiapan anjaha boi ma iatur antigan mamparsiapkon diri. Boi ma tenang tongon pangahap anggo domma binotoh tanggalni. Memang mangihutkon hata ni Tuhan Jesus paima ambilan on, ipatugah do pasal na maningon mareong do rumah panumbahan (ayat 2). Artini, ihubungkon Jesus do parreong ni rumah panumbahan ai pakon parroh ni Jesus paduahalihon. Ase domu hujon boi do iarusi hita use sungkun-sungkun ni susian ai : Sadihari ma ireongkon rumah panumbahan ai? Anggo maningon roh do use Ia bani akhir jaman, aha ma tanda na boi idahon?
  3. Laho mangarusi arti ni sungkun-sungkuni susian ai, porlu do iparditei hita arti ni piga-piga kata kunci. Na parlobei aima hata ‘tanda” (gorik : sēmeíon) martudu-tudu hubani sada kejadian khusus atap na supranatural. Bani arti na legan boi do homa “tanda” ai patugahkon hubani objek na boi ididah atap itanda (band. Mat.26:48), sunat pe isobut do tanda (Rom 4:11). Bani tradisi ni Padan Nabasaia “tanda’ aima sada hal na ihubungkon hubani halongangan na binahen ni Naibata bani bangsa Israel (2 Musa 4:8,17,28,30). Na paduahon, aima “parrohMu” atap kedatanganMu (gorik : parousia) na mararti “kedatangan kembali”, patuduhkon pasal parroh ni Kristus na paduahalihon na roh marhitei buei tahapan sedo bani sada peristiwa atap tahapan tumang. Bani Mateus 23:39 – 25:46 marulak-ulak do isobut pasal parroh ni Jesus paduahalihon. Siporlunan botohonta aima proses parroh-Ni ai do, sedo soal ija ia roh atap ija use holi ia tading dob parroh-Ni ai. Na patoluhon, aima hata “ajalni dunia on” atap kesudahan dunia (gorik : sunteleías). Hata on martudu-tudu hubani sada na masa bani panorang tertentu na pitah Naibata do hansa mambotoh panorangni. Anggo roh ma panorang ai, aima ajal ni dunia on. Hata on homa boi do mararti “penyempurnaan tujuan-Nya”, na ija na masa ai ma na manggoki atap na manutup sejarah. Jadi boi ididah hita pikiran ni susian na manukkun ai mangindohon ase ibotoh sidea namin panorang parroh ni Jesus ai secara sempurna, ase boi tenang sidea anjaha ibotoh sidea attigan ma panorang pasirsirhon diri.
  4. Balos ni Jesus : Jaga ma, ulang ipakahou. Bani ayat 4-8 taridah do sonaha balos ni Jesus na patugahkon dua hal, aima pasal parreong ni rumah panumbahan na i Jerusalem ampa tanda-tanda ajal ni dunia on na domma ipungkah marhitei tanda-tanda das hubani parroh ni Jesus na paduahalihon ai. Jesus lang mambobai sidea hubani soal antigan masa parrohNi ai, tapi justru lobih manokanhon sonaha sikap na patut mandompakkon panorang ai do. Sedo patar, tapi mamungkah humbani “sonari” do. Pesan na parlobei humbani Jesus aima : “Jaga ma, ulang ma ipakahou halak hanima!” (ayat 4). Anggo isobut Jesus ‘jaga ma” atap “waspadalah” (gorik : blepete), sasintongni sifatni aima imperatif (perintah). Artini aima “hati-hatilah kamu”, “awaslah” atap “lihatlah”. Perintah ai manokanhon ase ipakei jolma in indera penglihatan (mata) ibagas na paimahon parrohNi ai. Sada peringatan ni Jesus hubani susianNi paboa i dunia on buei na pakahouhon. Na ipatugah Jesus sedo ari parrohNi ai (ai seng dong na mambotoh ai sobali Bapa), tapi tanda-tandani do na ipatorang. Lambin bueini ma jolma na mangkatahon dirini “ahu do Kristus”, atap na mengklaim dirini gabe mesias atap s Mase? Songon halak Jahudi na ijia mangarapkon mesias duniawi na jagar, marhuda porang anjaha boi mantaluhon musuh. Ronsi sonari pe sai buei do jolma mangarap ase ha-mesiason ni Jesus ai talar marhitei  “kesuksesan” na iharapkon jolma in. Marsuba laho memasuki aha na gabe ranah atap bagian ni Naibata. Adong do na mengklaim soal tanggal, bulan ampa tahun parroh ni Kristus na paduahalihon, tapi ronsi sonari na ija pe lang saud, halani memang lang urusan ni hita jolma anggo soal panorang. Memang boi do jolma in gabe ‘ipakahou’ halani sai adong do homa na marosuh bani kepastian-kepastian pasal panorang. Tapi na pasti, lang ongga dong padan ni Naibata na manotapkon pasal panorang ari parpudi ai. Nini do “Tapi anggo pasal arini ampa panorangni, seng dong na mambotohsi, age malekat na i nagori atas, age Anak in; pitah Bapa in do”. (Mat.24:36). Pesan na paduahon aima : “jaga, ulang tarsonggot hanima” bani ganup na domma masa (porang, lohei, lalou) halani na maningon masa ope torus in. In ma tanda na boi ididah anjaha ibasa halak na porsaya paboa na dob ipungkah masuk hubani “panorang” ai.
  5. Bani ayat 8 isobut “tapi haganupan ai mungkah ni pangarouan ai ope”. Aha na isobut Jesus ijon aima na masa bani ayat 6-7 ai “mungkahni” pangarouan ai ope. Adong ope  peristiwa na paling hebat aima “pangarouon”. Pangarouon (penderitaan) bani hata gorik isobut “odínon”, na mararti ‘suatu penderitaan yang menyakitkan seperti sakit melahirkan’. Na sihol ipatugah ijon aima adong sitaronon (mangarou)  paima jumpah ari na pinaima, na lambin marbanggal torus. Jadi paima das hubani parrohNi na paduahalihon ai, ‘makin hebat’ do torus sitaronon atap na maningon iarou jolma i dunia on. Jadi anggo adong kristus-kristus palsu, porang, lohei, lalou sedo tahap akhir ai, tapi mungkahni pangarouon ai ope tene. Ulang kahou anjaha ulang tarsonggot.

Hahonaan :

  1. Parentah ni Jesus aima ase jaga bani ajaran na pakahouhon (penyesatan) na roh marhitei modus kerohanian. Sikap na porlu aima ‘jaga’ atap ‘waspada’ bani ajaran-ajaran na pitah mambobai hubani soal-soal mujijat na ihasiholhon jolma. Lambin buei do ibogei hita barita pasal porang, bencana alam, naborit. Ganupan in domma masa, anjaha maningon masa do use torus sadokah dong dunia on. Halani ai tontu hita selaku halak na porsaya lang porlu “tarsonggot” anjaha mabiar, halani na maningon masa do in. Totap ma toguh marhaporsayaon hubani Krsitus Jesus, Anak ni Naibata. Lambin buei do sonari sikap-sikap perlawanan dompak harosuh ni Naibata. Bahkan agama pe sipata domma ipakei laho pasaudkon sura-sura hajolmaon. Bani situasi na sonon ma lambin itantang halak na porsaya in ase lambin “manjaga diri” ase ulang mayub anjaha larut bani sura-sura ni dunia on. Porlu “tagam”  atap siap sedia secara iman, ase antigan pe roh na masa in atap parroh ni Jesus na paduahaihon ai pe, posisinta domma dalam keadaan “siap”.
  2. Masuk ma hita hubani Minggu Advent na patoluhon, sada gambaran na patugahkon bahasa lambin dohor ma panorang parrohNi ai. Tongon anggo mangihutkon kalender gerejawi, olatni 4 do masa advent. Tapi maningon imaknai hita do Advent ai lang pitah mangalo-alo Natal, tapi secara teologis mar ‘Advent’ do hita bani ganup panorang. Ganup jam, menit ampa detik do gabe masa pangalo-aloon banta. Lang homa pesta lahiriah na gabe warna ni pangalo-aloon in, tapi sonaha sikap ni paruhuran do. Anggo ididah hita ma perubahan-perubahan na torus terjadi, in ma gabe sormin banta paboa sonari aima bagian humbani proses parrohNi ai do tene. Panorangni ma torus banta laho paubahkon paruhuranta, ai lambin dohor ma panorangni. Amen
Pdt.Aman Saud Purba
Comments are closed
**