TONAH NI PIMPINAN PUSAT GKPS BANI PESTA MINGGU WANITA GKPS / HARI PEREMPUAN INTERNASIONAL TAHUN 2020

 

Nahinormat :

Haganup Kuria GKPS

Bani iananni bei.

 

Salam ibagas goranni Tuhan Jesus Kristus.

Malas ni uhur na banggal tumang do banta sadari on boi hita marhasadaon sa-kuria on mamestahon Pesta Minggu Wanita GKPS sekaligus Hari Perempuan Internasional sadalan hubani program pakon jadwal kegiatan GKPS. Pesta malas ni uhur on ipestahon hita do i tongah-tongah ni kurianta GKPS na sanggah mandalani Tahun Kepemimpinan yang Berkarakter. Domu hujin sihol padasonnami do hubani nasiam piga-piga tonah irik gabe parhiteiannami manisei nasiam kuria na hinaholongan ni Tuhan:

 

  1. Mamungkah humbani tahun 1958, GKPS selaku kuria ni Tuhan domma pasirsirhon sada wadah hubani inang i tongah-tongah ni GKPS laho mandalankon horja pandiloon na humbani Tuhan, na igoran Seksi Wanita GKPS. Ase domma 62 tahun nuan hajongjongan ni Seksi Wanita GKPS. Talup do hita mangkatarimakasihkon bagei ni horja na dob ihorjahon inang i GKPS. Lang tarparnalang, iahapkon hita do sonaha kurianta domma lambin ipabayak marhitei kehadiran pakon pangidangion ni haganup inang. Bani haganupan ai ibotoh hita do bahasa Naibata do na marhorja ibagas idop ni uhur-Ni mandilo haganup inang bahen hadearon ni kuria-Ni. Pos do uhurta, sadokah idalankon hita ranggian ni Naibata, ijai do lambin marsangap Ia janah hita kuria-Ni pe gabe jumpahan malas ni uhur ampa hatuahon.
  2. Naibata ibagas Jesus Kristus sonai age kuria-Ni GKPS lang ongga mambeda-bedahon hatunggungon ni dalahi pakon naboru songon na jumpah i tongah-tongah ni pargoluhon i dunia on. Mangihutkon Bibel, lang dong imbarni janah haganup do parsimada bani haluahon na humbani Kristus (Gal. 3:28) ampa manjalo sibere-bere ni Tonduy Napansing (Lah. 2:17; 1 Kor. 12:4-6, 12, 13; 1 Pet. 4:10, 11). Humbani mungkah ni pardong ni GKPS das hubani sonari, inang totap do dihut janah parsimada bani haganup horja laho pasangapkon Naibata ibagas bagei-bagei ni horja pangidangion. Hata ni Naibata tangkas do pataridahkon ampa manokanhon pasal hatunggungngon na dos bani haganup jolma selaku Angkula ni Kristus, janah sadalan hujin do homa GKPS bani na mandalankon horja pandiloonni. Halani ai totap do ungkab dalan bani haganup inang laho mambere dirini bani haganup horja na marbagei-bagei i tongah-tongah ni kuria in domu hubani talenta ampa karakter ni bei.
  3. Sadari on sekaligus do ipestahon hita pardingatan Hari Perempuan Internasional na iperingati i sab dunia on bani tanggal 8 Maret setiap tahun, ai ma dalam rangka mardingat keberhasilan ni kaum perempuan i bidang ekonomi, politik pakon sosial. Halani ai, pesta malas ni uhur na ipestahon hita sadari on, na maronjolan hubani dua hari bersejarah, iarap uhur boi dihut homa mamuhoi semangat ni haganup inang i kuria on ase lambin pongkut bani haganup horja na madear bahen hasangapon ni Tuhan.
  4. Haganup do hita idilo gabe Saksi ni Kristus, halani ai totap ma hita sirsir mambere diri ibagas toruh ni uhur, marhabiaran bani Naibata, pambalosi bani ajar janah ibagas biak na madear ase lambin tarbarita goran ni Kristus (Sub Tema GKPS Tahun 2020).

 

“Selamat Pesta Minggu Wanita GKPS sekaligus Selamat Hari Perempuan Internasional”

Tuhanta ma mamasu-masu nasiam haganupan.

 

Salam pakon tonggo,

Pimpinan Pusat GKPS

    Pdt. Martin Rumanja Purba                                 Pdt. Dr. Paul Ulrich Munthe

        E p h o r u s                                                      Sekretaris Jenderal