Menu
Categories
KELUARGA NA MARSIJALOAN, MARSIURUPAN JANAH MARSIHAHOLONGAN
24 Juni 2022 ARTIKEL

 

PARLOBEINI

Bagei do paruntolon na ijumpahkon hita bani proses na mandalankon goluh parrumahtanggaon secara Kristen. Tarlobih bani parsaoran i tongah-tongah ni keluarga, aima dalahi (paramangon) pakon naboru (parinangon). Sonaha do nani, lang ra do adong partinggilan jumpah halani hurang ni sidabuhan i tongah-tongahni keluarga? Bani parsaoran i tongah-tongah ni keluarga pe, pasti do jumpah buei persamaan pakon perbedaan, na ra mangkorhon adong partinggilan. Sonaha do upaya sidalankonon ni masing-masing pasangan ase lang pala dokah partinggilan ai tapi gabe boi ibagas na mardamei use?

 

PANOMPAON NI NAIBATA

Bani panompaon ni Naibata maronjolan hubani 1 Musa 1:27, Tuhan manompa dalahi pakon naboru songon rupa-Ni. I tongah-tongah ni keluarga Kristen marhitei domma ijalo sada dalahi pakon naboru pasu-pasu parrumahtanggaon, mararti do ai domma manjalo tugas pakon tanggungjawab na sarupa sebagai bapa/suami pakon inang/istri. Adong janji aima sirsir humbani bulat ni uhur marsihaholongan janah seng anjai marsirang anggo lang sinirang ni hamateian. Ihatahon Tuhanta bani Bibel aima “ase haganup ma paramangon marsihaholongi parinangonni bei songon dirini sendiri, anjaha parinangon pe ihabiari ma paramangonni” (Epesus5:22-23).

 

MARSIHARGAAN PAKON MARSIJALOAN

  • Konsekwensi Paramangon na gabe Ulu

I tongah-tongah ni goluh parrumahtanggaon i dunia on, ihaporluhon do proses  panandaion persamaan pakon perbedaan secara menyeluruh antara pasutri (pasangan suami-istri) ase boi adong tubuh sikap marsihargaan pakon marsijaloan. Tuhan ma na gabe dasar, prinsip pakon hagogohon na mambahen boi hita mandalankon goluh parrumahtanggaonta bei ibagas na dear janah sintong. Bani Bibelta ihatahon Tuhan do paboa Naibata aima ulu ni Kristus, janah Kristus aima ulu ni gareja, janah dalahi aima ulu humbani naboru ampa paramangon aima ulu ni parinangon. Aha do artini ulu ijin?

Dalahi atap paramangon isobut ulu lang ibagas pangarusion kuasa na sewenang-wenang. Sahalak dalahi na gabe ulu i tongah-tongah ni keluarga maningon mangidah tugas na borat tumang, mamikkirhon keamanan pakon kebahayaan, kebahagiaan pakon hamaholon na itanggung ganup keluarga. Lang adong sada keluarga pe na lang mandompakhon hamaholon atap paruntolon. Anjaha domu hubani hajongjongan ni dalahi (suami) sebagai ulu i tongah-tongah ni keluarga adong 3 (tolu) konsekwensini:

Mananggung risiko pakon beban bani keluarga

Anggo sirsir ma dalahi gabe ulu, maningon sirsir minggot (pusing) mananggung sagala risiko pakon beban. Sahalak dalahi atap suami na adong bangko sihol iidangi, ipamanja, egois pakon kaku boi do ai parsedahon keharmonisanni keluarga. Tapi sada halak suami maningon mangkatahon bani dirini sendiri, “Au aima ulu ni keluarga. Maningon berjuang sendiri do au laho mamorsan beban na borat on selaku au ulu ni keluarga.” Jadi dalahi maningon sirsir berjuang seumur hidup untuk keluargani, halani ibere do hak pakon gogoh laho berjuang membahagiakan keluargani.

Berkewajiban manramotkon pakon mangkopkop keluarga

Sahalak dalahi atap suami berkewajiban do homa manramotkon keluargani. Ganup keluarga margantung hubani untuk ibela, ilindungi pakon iramothon. Halani ai secara fisik naboru pakon dalahi marbeda. Adong perbedaan na maningon iakui hita. Dalahi itugashon laho mamorsan beban na borat janah mananggung risiko na borat. Dear ma porsan hita ai ibagas na mangirikhon Tuhan janah lang mabiar bani sagala beban hamaholon pakon risiko na maningon sitanggungonta.

Manganalisa janah mambahen haputusan secara topat

Maningon adong do bani dalahi (paramangon) ketangkasan manganalisa ibagas na tenang pakon mambahen haputusan ibagas na topat. Marpingkir ibagas na tajam pakon dingin. Mambahen haputusan ibagas na topat aima pahara na mahol. Halani ai ihaporluhon sada dalahi aima habaranion, sehingga isteri adong bani keamanan, perlindungan halani suamini mambuat haputusan na sintong. Parinangon lang mambalosi paramangonni na torus modom, marayoh, lang berani ambil risiko, mamparalat parinangonni untuk hasonanganni sendiri. Paramangon na gabe ulu, maningon mandalankon syarat-syarat na iondoshon bani Bibel.

  • Posisi ni Parinangon aima Gabe Sortali ni Paramangon

Bani Bibel iberehon do posisi na lobih jenges bani parinangon aima “parinangon na maruhur aima sortali bani paramangonni.” Anggo adong parinangon na botul-botul sipambalosi bani paramangonni, halak na legan pe lang merasa kasihan magouan hak naboru ai. Halak na mangarusi Bibel mangkatahon: “keluarga itu baik, karena ada isteri yang sangat baik.” Parinangon na baik ai hasangapon bani paramangonni pakon haganup keluargani.

Lang adong sahalak pe na manjalo anggo parinangon bersikap koras hubani paramangonni i lolouan (di hadapan umum). Sonaha pe, Naibata manompa dalahi ibagas bentuk angkula pakon gerak-gerik na lobih topat laho menyatahon sikap otoritas. Tapi anggo sahalak naboru marpambahenan sonai lang topat. Halani Naibata lang manompa naboru bani posisi na sonai ai. Sedangkan naboru na lamlam, lang bahat marsahap, mempunyai keanggunan pakon kesucian, ai adong kuasa luarbiasa banggalni.

Hajengeson pakon keanggunanni sahalak naboru lang terletak bani kehebatanni marsurak-surak, tapi bani kewibawaan na tarsimpan ibagas. Keanggunan na lang ipamerhon, aima sortali ni parinangon. Parinangon na maruhur aima sortali bani paramangonni. On gabe inspirasi na mangojur hita marpingkir lobih bagas ibagas hajengeson ni naboru aima stabil, pambalosi bani Tuhan janah lang boi ia sembarangan iganggu.

 

PANUTUP

Bani na adong iidah hita na dear bani pasanganta urah do cinta ai tubuh subur anjaha manghasilhon pahara-pahara na mambere rasa hormat. Tapi boi do homa jumpah hita pahara-pahara na lang iharosuhkon ibagas dirini. Anjaha ai mambahen hita mandompakhon hamaholon ibagas na mangahapkon, apalagi pataridahkon penghargaanta hubani. Ai lang marpardomuan hubani dousa tapi menyangkut hubani cara berpikir pakon hasomalan (bangko) ni goluh. Hotop do in gabe sumber partinggilan i rumahtangga. Domu hujin ase pardiatei hita bei ma pargoluhonni keluarganta ibagas na dear. Lang mungkin bani pahara na legan beres anggo keluarga pe lang beres, janah pasti lape mancapai hatuahon na sintong. Ase porlu totap cinta ai ipupuk janah ijaga keseimbanganni: paramangon mangkaholongi parinangonni, sonai parinangon pe ase mangkaholongi paramangonni.

Cinta mararti do ai ra marlajar humbani na marbeda pakon au janah manghargai perbedaan. Halani keluarga Kristen aima na ibentuk pakon irencanahon Tuhan, aima laho mandalankon harosuh-Ni: marsihargaan, marsijaloan, pakon saling marsiurupan halani setiap anggota keluarga Kristen adong do hahurangan pakon halobihanni. Salam pakon tonggo.

 

Pdt. Fraimen Purba, M.Th (Kabid. Pastoral Departemen Kesaksian GKPS)

 

Comments are closed
**