TATA IBADAH NATAL SEKSI WANITA GKPS Tahun 2017

DOWNLOAD DISINI =>TATA IBADAH NATAL SEKSI WANITA 2017

TATA IBADAH NATAL SEKSI  WANITA GKPS

Tahun 2017

Thema:

Ibohali Manghobaskon Horja Namadear (2 Timoteus 3:17)

Sub Thema:

Ajari ma Kuria in gabe sipangidangi ibagas hapentaron, haporsayaon ampa bulus ni uhur ase lambin torsa kuria in na mampangkorhon hadoharon pakon hadearon i tongah-tongah ni Gareja, Masyarakat ampa Negara.

(2 Petrus 1:5; Efpesus 4:13-15)

1. Persiapan : Sipartugas
   1. Mandoding : Hal.No. 316:1-2 Sai Puji ma Tuhanta in
   2. Sai puji ma Tuhanta in, ai tubuh Jesus in.

Sai jalo ma Rajanta in, pasirsir ma uhurmu in

Mandoding puji ma, mandoding puji ma, mandoding puji Tuhan in

2. Megah ganup dunia on, marsangap Tuhan in.

Ganup mamuji Tuhan in, pakon ganup tinompa Nin

Mandoding puji ma, mandoding puji ma, mandoding puji Tuhan in.

1. Pagara Lilin :
   1. Parambilan
   2. Pengantar Jemaat
   3. Ketua Seksi Bapa
   4. Ketua Seksi Wanita
   5. Ketua Seksi Pemuda
   6. Ketua Seksi S.Minggu
   7. Mewakili Anggota Seksi Bapa
   8. Mewakili Anggota Seksi Wanita

 

• Kebaktian
  1. Votum – Intoitus – Tonggo

P       Pangurupion banta pitah ibagas Goran Ni Naibata Bapa, pakon Tuhan Jesus Kristus ampa Tonduy Napansing sitompa langit pakon tanoh on.

J        Amen

P       Dob ai, mandarat ma sada tunas humbani tutuho ni si Isai, anjaha marbuah sada tumbor na roh humbani uratni.

J        Sogopma hubani Tonduy-Ni Jahowa, Tonduy hauhuron ampa pangarusion, Tonduy panuturion ampa hagogohon, Tonduy habotohon ampa biar bani Jahowa.

P     :  Halani ai, masuki nasiam ma horbanganNi marhitei hatarimakasihon, sonai alaman-Ni marhitei puji-pujian. Martarimakasih ma nasiam huBani, puji nasiam ma goranNi.

J      :  Pagijangma ulunima ale sagala horbangan, tarangkat ma hanima ale labah na basaia, ase masuk Raja ni Hamuliaon in.

P+J    Jadi dapotan idop ni uhur ma sagala na masombuh, jumpahan apoh-apoh na pusokan uhur, gabe maluah ma na tartutup. Marpangidah na  mapitung,  maluah na hona odoh-odoh, marmalas ni uhur na paima-imahon Mesias, Sipaluah in.

 

P       Martonggo ma hita !

Ham Tuhan Naibata Bapanami na i nagori atas. Puji-pujian hasangapon pakon tarimakasih ma isombahkon hanami huBamu. mardingat na dob isuruh Ham Anak-Mu Jesus Kristus hu bannami jolma. Gabe madoyuk anjaha sombuh do Ia, tubuh i huta Betlehem bani harang ni pinahan ase gabe bayak hanami. Ia do sondang hubennami gabe lang mardalan be hanami bani hagolapan in. Ipaluah Ham do hanami. Bamu ma puji-pujian nami on Tuhan na ipadas hanami marhitei Perayaan Natal Seksi Wanita i kuria-Mu panorang on. Kuasa ni Tonduy-Mu ma na manramotkon ronsi na patorsahon in ganupan, ase ibagas malas ni uhur isombahkon hanami janah bahen hamuliaon, hasangapon ni goranMu. Tarima kasih ma bamu Ham Tuhan Naibata marhitei Jesus Kristus Sipaluah in. Amen.

 

2. Mandoding haleluya No, 399: 1-2 Tubuhan Poyon-poyon
3. Tubuhan poyon–poyon i tongah juma in

Manggargar manuk manuk bai parasarannin

Marbagei pakon ihan i bagas laut in

Ge tinompa na legan seng targorani in

Ganupan iparmudu Tuhanta Naibata

Lobihan iparmudu ganupan hita da

Sonai ge halayakon ibere do homa

Talup hatahononta diatei tupa ma

2. Ibere do panondang mataniari in

Bulan ampakon bintang panondang borngin in

Udan logou ni ari pagantih soluk in

Sonin ma ganup tingki pajagar tanoh in

Ganupan iparmudu Tuhanta Naibata

Lobihan iparmudu ganupan hita da

Sonai ge halayakon ibere do homa

Talup hatahononta diatei tupa ma

 

3. Liturgi I : LITURGI I PASAL PANOMPAON

Prolog :

Ia do na manjadihon langit, tanoh, laut pakon haganupan isini Itompa do haganupan in bahen hadearon ni haganupan jolma. Ia do na manjadihon daging ampa tonduyta; ase iondoskon hita tongtong dirinta hu-Bani. Ia do sibere hatuahon pakon pasu-pasu hubanta haganupan; Ase marhasonangon tongtong jolma in ibagas goluhni.

 

1. Naibata lang pitah panompa tapi ronsi sonari totap do Ia manramotkon na tinompa-Ni. Arian pakon borngin torus margantih soluk, sonai homa age musim. Haganupan in patubuh tenger ni uhurta bahasa Tuhan Naibata lang marnasoh mangatur pargoluhanni jolma i dunia on.
2. Jengesni in tene ganup jadi-jadianni Naibata, lang adong hurangni, sirsir do haganup. Itompa do panondang arian, janah itompa do panondang bani borngin. Haganupan ai, aima hataridahan ni holong ni Jahowa. Naibata marhorja marmudu-mudu goluhta. Porini pe buei hamaholon na idompakkon hita bani goluh on, tapi jorgit janah horas-horas do hita halani iparmudu-mudu Naibata.
3. Sintong do hatamu ai. Seng ongga soh Naibata mangatur ampa marmuduhon haganup na tinompaNi. Sonai homa manramotkon haganupan ai. Au sandiri pe domma mangahapkon, songon paruhuran ni inang dompak niombahni do pangahapku, Naibata maradaphon au.
4. Sintong tumangma HataMu ai. Anggo huidah hinajenges ni jadi-jadian ni Naibata, sintong tumang do holong ni uhur-Ni bani jolma na tinompa- Domma sirsir sipanganon, si inumon, pakon ianan. Tonggor ham ge jenges ni pohon Eden on na iondoskon hubani jolma.
5. Memang anggo na bilang-bilangi, buei do tongon na madear na dob binahen-Ni Naibata banta sadokah ni on. Sungkup do haganup ibahen Naibata. Ibere do suan-suanan na gabe sipanganon, ibere bah na gabe siinumon, ibere panondang, mataniari, bulan pakon bintang. Jengesni in tinompaMu in Tuhan, tarimakasih ma bamu.
6. Nini Naibata do: Tompa hita ma jolma songon rupanta pakon songon parlahouta, ase irajai sidea dengke na i laut, manuk-manuk na i awang-awang, pinahan pakon ganup tanoh on, ampa sagala binatang na manjulur i atas tanoh on.
7. Dearni in haganupan ibahen Naibata. Haganup do langit mamaritahon hamuliaon ni Naibata, anjaha hajang-kajang mangambilankon pambahenan ni tangan-Ni. Anggo jumpah ma bot ni ari, marombus ma logou anget-anget sonang ma pangahap. Bai borngin ni ari, naidah ma bittang i langit pakon bulan na marsinondang, ombun in pe mardalani huja rosuhni, sipata gabe pansing do idahon langit in songon bah na i laut, tapi ra do homa sompong golap paima roh udan. Marayak siang ni ari tarbogei do sora ni manuk-manuk ampa masam ni tinompa na legan. Haganupan in pataridahkon hamuliaon ni Jahowa.
8. Idilo do jolma na parlobei in laho manramotkon haganupan hinajenges ni tinompa-Ni in. Maningon ramotkonon ni sidea do suan-suanan, manuk-manuk na iawang-awang, ikan na ibagas bah ampa sagala na manggulmit i atas tanoh on. In do homa ondos-ondos hubanta ronsi sadarion pakon hu lobeian on pe, manramotkon haganupan tinompa ni Naibata marhitei haganupan hapentaran na adong banta.
9. Idilo do jolma in laho manaramotkon bah. Laut na bolag aima harohan ni ikan na marmasam-masam na porlu hubani jolma. Idilo do homa jolma laho manramotkon tanoh. Ase boi dear tubuh suan-suanan. Idilo do homa jolma laho manramotkon udara ase boi dear jolma in marhosah. Ipasirsir do haganupan na porlu bani jolma. Ase ramotkon hita ma in ibagas na
10. Aima ase hita wanita pe dihut do sijaga tinompa ni Naibata. Aima marhitei na manjaga kelestarian lingkungan, mangorui manggunahon plastik pnl. Ai boi do gabe taman Eden hubanta lingkungan sekitarta marhitei na ijaga hita keseimbangan ekologi.

 

4. Koor:
5. Mandoding Haleluya No. 313: 1-3 Humbai Pulou ge Banua
6. Humbai pulou ge banua sai tarbogei do torus

Doding na mamuji Tuhan Sipanobus jolma in

Gloria, puji ma Tuhanta, Gloria, puji ma Tuhanta

2. Haganupan na isurga pasangapkon Naibata

Rap mandoding do sidea  i lobei ni Naibata

Gloria, puji ma Tuhanta, Gloria puji ma Tuhanta

3. Soridadu ni Tuhanta hormat bani Naibata

Haganup puji-pujian ondos bani Naibata

Gloria, puji ma Tuhanta, Gloria, puji ma Tuhanta

 

6. LITURGI II: PARDABUH NI JOLMA IN HUBAGAS DOUSA

Prolog:

Peristiwa pohon Eden, aima mungkah ni sagala hajahaton ampa bagei ni sitaronon ni jolma. In ma marhalanihon sihol ni uhur ase dos pakon Naibata. On ma bentuk parlawanan ni jolma dompak Naibata, anjaha sekaligus homa patuduhkon sonaha keangkuhan pakon keserakahan ni jolma.

1. Sonang ni jolma in tene, dob honsi sirsir haganup haporluan bani pargoluhonni, dob ai pe ase itompa jolma. Iondoskon ma haganupan ai, ase jolma in na Ibere hubani kuasa ase jolma in manramotkon haganup jadi-jadian ai. Sonang ni in jolma naparlobei in. Ibere do i pohon Eden ianan sidearan bani mungkahni ai, lang dong gangguan, suasana na botul-botul tenang janah sonang. Nini sada uppama: “jajat na hurang do tong”. In ma mambahen gati iuhurhon jolma in ase dos songon Naibata. Lupa do jolma in paboa na tinompa do ia anjaha na maningon unduk bani aturan na tinotapkon ni Naibata. Dobni madabuh ma jolma in hubagas dousa.
2. Ase ibotoh nasiam, sonai do homa gati goluhta, Halani sibere-bere gabe lupa bani na Ra do sibere-bere gabe pangambati laho martarimakasih hubani na mambere. Ai lang sonai do jolma na parlobei ai? Ibere ianan na jenges, iparsirsir haganup na porlu bani goluhni. Hape sada do Titahni Naibata na maningon dingatonni sidea, tapi lupa do sidea bani Naibata halani rayuan gombal ni sibolis hubani naboru ai.
3. Nini Naibata hubani naboru ai, “Pabueionku ma sitarononmu, sanggah boratan rumah ho. Boritma ahapkononmu manubuhkon niombahmu. Paramangonmu ma hasiholanmu na manrajai ho.” Anjaha hubani si Adam ihatahon do, “Halani na binalosanmu hata ni parinangonmu, anjaha ipangan ho buah ni hayu na Hutitahkon in bam “ulang pangan hunjai” hona papa ma tanoh on halani ho. Ngalutan ma ho mansarihon sipanganonmu sadokah manggoluh ho”.
4. Nasiam hasoman, gati do isalahkon hita Tuhan ibagas goluh on. Mungut-ungut hita hu-Bani, gabe moru pamujionta hu-Bani. Hape gati do halani ulahta do ase manaron hita. Halani ulanhta do ase maseda tinompa na Halani ulahta do ase roh bagei-bagei bencana alam, halani ulahta do ase lambin roh daohni hita humbani Tuhan.
5. Ai lang ai do na masana ase roh bah na sumbang? Dob salpu piga-piga generasi, iidah Naibata lambin martambah-tambah ma hajahaton ni jolma, gabe iripaskon Naibata do haganup pardousa. Ipataridahkon Naibata do rimas ni uhur-Ni marhitei bencana bah na sumbang. Iulakhon jolma in do homa mardosa, manlawan Naibata, marhitei sihol ni uhurni ase das jolma in hu langit, ase das bani ianan na gijang, songon gijang ni ianan ni Naibata. Ipauli sidea do manara aima na margoran manara Babel.
6. Peristiwa Sodom pakon Gomora pe aima peristiwa na boi paingatkon hita pasal goluh na igoki hisap-hisap ni daging, anjaha na lang parduli hubani golpa-golpa ni Naibata na ipadas marhitei maleikat-Ni, sonai homa marhitei hata-Ni. Peristiwa Sodom pakon Gomora ai, paingatkon hita sonaha jangin ni uhum na binahen ni Naibata hubani halak pardosa.
7. Nuan on, hamajuon ni tehnologi pe buei do mamboan hasedaon bani tinompa ni Naibata. Misalni marhitei timus ni pabrik, harangan na matutung, timusni kenderaan bermotor, penggunaan pestisida ampa ragamni na menghasilkon nitrogen oksida (NO2), pakon oksida sulfur (SO2) karbondioksida. Haganupan in mambahen bocor lapisan ozon. On ma na mambahen keseimbangan ekosistemgabe targanggu akibat efek rumah kaca. Dobni terjadi cuaca ekstrim itongah-tongah ni dunia on; roh ma banjir, longsor, angin putting beliung, bahkan suhu bumi lambin milas. Haganupan in terjadi halani keserakahan ni jolma laho mengeksploitasi na tinompa ni Naibata in.
8. I tongah-tongah ni keluarga-keluarga masa do konflik antara bapa pakon inang, antara orang tua dompak niombah, parumaen, na marsanina, pnl. Buei ope masa Kekerasan Dalam Rumah Tangga  (KDRT). Akibatni lambin buei do keluarga na mangharosuhkon parsirangan. Somal mando tangaron perselingkuhan sonai age parsirangan. Songon na so maharga mando pasu-pasu partongahjabuan na jinalo humbani Naibata. Kosekwensini, buei ma niombah na hurangan holong humbani namatorasni, hurang perhatian pakon pansarihonon. Urah-urah ma madabuh bani narkoba, minuman keras, sex bebas, parjudian pakon bagei-bagei ni hajahaton, habadoron sonai age hasedaon na legan.
9. Seng dong na maruhur, seng dong na pindah-pindah bani Naibata. Haganup do manlembang, rap na so margagan do sidea; seng dong sihorjahon na madear, sahalak pe lang. Tanoman na ngangang do tolonan ni sidea, dilah ni sidea mansahapkon ladung; bisa ni ulog darih do itoruh ni bibir ni sidea. Gok do babah ni sidea bani bura-bura ampa hata podou. Hinsah do nahei ni sidea manduruskon daroh. Hamagouan ampa hamarsikon do ibagas dalan ni sidea, ia dalan hadameion in, seng ibotoh. Seng dong biar dompak Naibata ibagas pangidah ni sidea.
10. Agepe domma mardousa jolma in, anggo ra do mulak janah manolsoli dousani, mulak ratah do use holong ni Jahowa. Halani tujuan ni Naibata manompa jolma in, ase gabe sipambalosi do hu Bani. Lang marosuh uhur-Ni bani hamatean ni parjahat. Ai tarsurat do; Ai sonon do holong ni uhur ni Naibata bani dunia on, pala do Anakni na sasada in iberehon, ase ulang magou ganup na porsaya Bani, tapi ase hagoluhan na sadokah ni dokahni bani.
    7. Mandoding : Hal.No.44 : 2-3+10 44. Pamalas Uhurta
    8. Ai buei do dosa, parlajouan pe

manunsahi hita ronsi matei pe

manunsahi hita ronsi matei pe

3. Maparah tumang do hamagouan in

Anggo lang roh Jesus Sipaluah in

Anggo lang roh Jesus Sipaluah in

10. Holsohmin ganupan iahapkon do,

sai pasonangon-Ni na niain-Ni in,

sai pasonangon-Ni na niain-Ni in.

 

8. LITURGI III: BAGAH – BAGAH PASAL SIPALUAH

Prolog :

Sursar, maseda, gok habutakon ma dunia on pangkorhon ni dousani jolma in. Domma gabe alat ni si bolis jolma in laho mangkorjahon hajahaton, hagedukon ampa pemberontakan; mambahen lang dong be jolma in talup i lobei-lobei ni Naibata. Uhum mando na gabe rupeini. Tapi agepe sonai, Naibata paridop ni uhur natarsulur, totap do marpangulaki uhur-Ni mangidah jolma in. Seng marosuh Ia mangidah hamateian ni parjahat in, tapi ase mulak do parjahat in manadingkon dalanni, ase manggoluh ia. Halani ai ibagahkon do Sipaluah, aima Mesias.

1. Age gati jolma lang manggoluh ibagas Hata ni Naibata, tapi lang marosuh Ia, jolma in ibagas sitaronon janah matei ronsi sadokah ni dokahni. Halani ai ibagahkon Naibata do Sipaluah na laho paluahkon Jolma in humbani gomgoman ni dosa ampa hamateian.
2. Jongjong ma, marsinondang ma ho! Ai domma roh panondangmu, anjaha hamuliaon ni Jahowa domma poltak ibaboumu. Ai tonggor ma na lotir do manrungkub tanoh on, anjaha hagolapan ni sagala bangsa. Tapi ibaboumu do poltak Jahowa anjaha hamuliaonNi taridah i
3. Ai sonon do holong ni uhur ni Naibata bani dunia on, pala do Anak Ni na sasada in iberehon ase ulang magou ganup na porsaya Bani tapi ase hagoluhan na sadokah ni dokahni bani.
4. Ai lang Jesus do Mesias na isobut Sipaluah, Raja na mamboban damei banta jolma pardousa in? Tapi anggo na idah na masa sonari on tambah ari tambah sursar do dunia on, seng dong damei be. Sintong dope nani hata bagah-bagah in paboa na sihol roh do Mesias mamboban hadameion?
5. Anggo hupingkir-pingkiri goluh on, sipata songon na gobir janah sangsi do diri mangidah na masa panorang on. Ija ma lang, alat canggih na iciptahon jolma in gabe ai do homa ipakei jolma laho parsedahon dunia on. Ai talup ope maluah jolma na sonin in?
6. Ulang ham sangsi inang, ulang ham gobir, tonggor ma na roh ma panorang ni hasasaud ni bagah-bagah in. Ubahon-Ni ma tangista gabe tortor, tanggalon-Ni ma pusok ni uhur anjaha gondithonon-Ni do hubanta malas ni uhur.
7. Ihatahon do homa, pindahan-Ku do na magou, paulakon-Ku do magou in anjaha baluton-Ku na ugahan. Na galek pargogohon-Ku, tapi na mombur anjaha na gogoh pardiateihonon- Ibagas hasintongan do parmahanon-Ku sidea.
8. Paridop ni uhur anjaha pardear layak do Jahowa, nanget manringis anjaha paridop ni uhur banggal, seng ibalaskon hubanta romban hubani dousanta, anjaha seng ibalaskon hubanta romban hubani hajahatonta. Songon idop ni uhur ni bapa bani niombahni sonai do idopni uhur ni Jahowa bani sagala na mangkabiari-Si.
9. Pagijang ma ulunima ale sagala horbangan, tarangkat ma hanima ale labah nabasaia, ase masuk Raja Hamuliaon in. Pasirsir dalan bani Raja na sihol roh, palumbang dalan in, padaoh batu-batu, pajongjong ma mandera, ai roh ma haluahonmu.
10. Marolob-olob anjaha marmalas ni uhurma, ai tonggorma na roh ma Naibata marianan i tongah-tongahta.
11. Anggo sonai hape, hasangapon, jabatan, habayakon, lang ai gabe ukuran pakon persyaratan ase saut bagah-bagah pasal parroh ni Mesias Sipaluah in. Pitah halani holong ni uhur ni Naibata tumang do hansa, marhitei holong sisadokah ni dokahni.
12. O… hasoman, bogei ma anjaha tonggor ma, tagam anjaha sirsir ma hita, ai sompong do parroh ni Tuhan in. Songon panangko borngin, seng marpanrantam Ia roh. Bogei ma ale hasoman.
13. Pangkorhon ni dousa gabe manaron ma jolma i tongah-tongah ni dunia on. Tarjadi ma parporangan, ketidakadilan, pangodoh-odohon, lohei, kesenjangan ekonomi, banjir, bahkan i tongah-tongahta sandiri do na sonin. Tapi Naibata parholong lang paturutkon jolma in lalab ibagas dou Naibata lang mambalaskon domu hubani hajahaton ni jolma. Halani holong-Ni iberehon do Anak-Ni tubuh hu dunia on, gabe daging ma Hata in anjaha marianan i tongah-tongahta.
14. Bereon-Ku do bannina uhur na bayu, anjaha tonduy na bayu do nahkonon-Ku hu bagas angkulanima. Anjaha uhur na marpangarapan do berehono-Ku bennima. Tonduy-Hu do nahkonon-Ku hu bagas dirinima, anjaha bahenon-Ku do ase marparlahou hanima ibagas Titah-Ku, anjaha bujur idalankon hanima aturan-
15. Marmalas ni uhur tumang ma ho, ale boru Sion. Marolob-olob ma ho ale boru Jerusalem! Tonggorma, na roh do Rajamin marayak ho, Parpintor anjaha Parmonang do Ia. Toruh do uhurNi anjaha mangajak halode, anak ni halode boru-boru.
    9. – Puisi

– Koor

 

10. Mandoding Haleluya No. 39:1-3. Sonang ni Borngin ni in
11. Sonangni, borngin ni in, sanggah roh Jesus in

Sonang modom do halak ganup dua mando na puho in rup

Mangoromi AnakNi Jesus Tuhanta in

2. Dear ni borngin ni in sanggah roh Jesus in

Bai parmahan i Betlehem in, ipatugah na hun surga in

Domma roh Sipagoluh, Jesus Tuhanta in

3. Buei ni tuah ijin, sanggah roh Jesus in

Tor maluah pardousa use, humbai hamagouanNi hape

Ben na roh Sipagoluh, Jesus Tuhanta in.

 

11. LITURGI IV PARTUBUHNI SI PALUAH

Prolog:

Sonaima dokahni jolma in paima-imahon parroh ni Sipaluah in. Seng tararusi jolma in dalan ni Jahowa, Tapi totap di Ia marhorja. Ipasaud do padan-Ni.

1. Malekat Gabriel do isuruh Naibata marayak sada anak boru na margoran si Maria, tunangan ni sada dalahi namargoran si Josep. Tarsonggot do si Maria bani tugah-tugah ni malekat hubani, na mangkatahon: “Ulang ma mabiar ham Maria, ai dapotan idop ni uhur do ham humbani Naibata, boratan rumah ma ham anjaha tubuhan anak, bahen ma goranni Jesus”.
2. Ipasirsir si Maria do dirini, laho pasaudkon sura-sura ni Naibata. Marmalas ni uhur do ia janah mangaku : “Jabolonni Tuhan in do ahu, sai saud ma hubangku songon na nihatahonMu ai.”
3. Ipasirsir si Josep do homa uhurni laho mangalop si Maria gabe parinangonni. Idalankon do songon na hinatahon ni malekat ai bani.
4. Gok puji-pujian do si Josep ampa si Maria manlangkahkon langkah ni sidea. Age pe maningon daoh sidalanni, payah anjaha susah laho mangindahi parbornginan, lang adong rumah na ungkab manjalo parroh ni sidea. Tapi bani panorang na dear honsi, ipersiapkon Naibata do ianan ni sidea, ianan hatubuhan ni Sipaluah in.
5. Banggal ni in tene idop ni uhur ni Naibata anggo ibere Tuhan tanggung jawab hubani jolma in, irik do homa Ia pasirsirhon aha na porlu, pandei do Tuhan mangatur haporluan ni jabolonNi.
6. Ambah ni si Josep pakon si Maria, partubuhni Jesus gabe ambilan malas ni uhur banggal do ai, bani parmahan na marborngin i Age pe lang tarpingkiri sidea tugah-tugah ni malekat na roh manjumpahkon sidea, mintor podas do sidea misir manjumpahi dakdanak na baru tubuh ai. Anjaha jumpah sidea do songon na hinatahon ni malekat ai hubani sidea. Ase mulak pe sidea, gok ibagas puji-pujian do sidea bani Naibata. Ase malas ni uhur do hape ulih ni na pajumpah pakon Tuhan Jesus.
7. Partubuhni Jesus mambere sinalsal bani halak paruhur na hun Hapoltakan. Bintang do na gabe tuduh-tuduh bani sidea laho mamboan hu ianan ni Jesus, anjaha ibagas uhur na unduk irik isombah sidea do Jesus.
8. Agepe mamboan haluahon do partubuh ni Jesus hu dunia on, tapi lang haganup hape jolma sirsir mambalosi. Tarsonggot janah mabiar do Herodes manangar tugah-tugah ni paruhur na hun Hapoltakan. Ipapangkei do barita ai bani Sintuani Malim ampa Sibotoh Surat. Pandei do si Herodes mamonopkon aha isi ni uhurni. Sipakulah-kulah do ia sihol manombah hubani Jesus, hape uhur ni ibagas sihol mambunuh Jesus do.
9. Sonai do age Parisei ampa Sadukei, na marusaha tongtong laho mangambati horja ni Jesus. Ianggap do Jesus songon saingan. Sangap na i dunia on do ipindahi sidea, lang sangap na humbani Naibata. Halani aima ase lang tarjalo sidea Jesus. Porlunan do sidea bani kuasa pakon jabatan na i tanoh on, ase haluahon na binoban ni Jesus.

Prolog:

Nasiam hasoman, pori sonaha pe usahani sibolis laho mangambati horja ni Jesus, tapi na pasti seng sangkut haluahon ai das hubanta on. Marhitei parroh ni Jesus; mandapot hamalumon do na boritan, mardalan na repat, marpangidah na mapitung, marpanangar do na nengel, marsahap do na bisu, manggoluh do na matei, jumpahan apoh-apoh do na marpusok ni uhur, jumpahan gogoh do na loja anjaha na boratan. Sempurna do horja ni Jesus i dunia on, saud do haganup sura-sura ni Naibata, jumpah do tongon malas ni uhur pakon haluahon anggo domma riap hita pakon Tuhan Jesus.

10. (Haganup parliturgi mandodingkon Haleluya No. 395 : 1)
11. Pasangap ma Tuhanta marhasoman arbab pakon doding

Sombahkon ma pujian marhiteihon inggou maraloling

Dear ma riap mandoding haganupan malas uhur rap mangolobhon

Porini adong pusok ni paruhuron roh do Tuhan lao patorsahon

 

12. Mandoding : Hal.No.316:1-2 Sai Puji ma Tuhanta in
13. Sai puji ma Tuhanta in, ai tubuh Jesus in.

Sai jalo ma Rajanta in, pasirsir ma uhurmu in

Mandoding puji ma, mandoding puji ma, mandoding puji Tuhan in

2. Megah ganup dunia on, marsangap Tuhan in.

Ganup mamuji Tuhan in, pakon ganup tinompa Nin

Mandoding puji ma, mandoding puji ma, mandoding puji Tuhan in.

 

13. Liturgi V (Hasaksian)

Prolog:

Hita haganupan, Tuhan Jesus domma roh hu tongah-tongahta laho mamboan damei ronsi malas ni uhur. Kehadiran ni Jesus dihut do homa mamboan haluahon banta. Anggo sonai, aha ma na talup sibahenonta? Dingat hita ma paruhur na hun Hapoltakan ai, aima jolma na pentar janah bayak homa. Roh janah porsaya do sidea bani Jesus, bahasa Jesus na dob tubuh ai, aima Sipaluah, Parpintor, anjaha Raja Damei. Manrogop do sidea manombah huBani, anjaha igalangkon sidea do arta na maharga bani Jesus.

1. Patut do malas uhurhu manjalo partubuh ni Jesus. Halani ai lang be manggoluh au marhitei pingkiranku atap rosuh-rosuhku, tapi marhitei Jesus ma au manggoluh. Aha pe na dong bangku pakeionku ma in bahen harosuhni Tuhan Jesus.
2. Jenges ni in tongon haluahon na binoban ni Jesus banta. Ipaluah tonduyta sonai homa pardagingonta. Anggo sonai patut ma tongon marhinsah ni uhur ahu laho manghorjahon hata-Ni marhitei na manggalangkon goluhku.
3. Diateitupa ma husombahkon Bamu Jesus Sipaluah, halani Ham do na gabe Dalan, Hasintongan, pakon Hagoluhan. Ajari Ham ma tongtong hanami ase selaku inang boi tongon-tongon hanami memperlengkapi diri ibagas hajengeson bani rupa sonai homa age parlahou.
4. Gabe ianan na sonang do pargoluhon ni sada inang, in do prinsipku sonari on. Anggo tubuh parsalisihan i tongah-tongah keluarganami, hinorhon ni parlahou age ekonomi na hurang, lang anjai maseda keharmonisan ni Marhitei Natal on, lambin tambah do gogoh anggo totap mangajamkon ampa marpangunsandean bani Jesus Sipaluah in.
5. Tongon bani goluh on sai dong do tong sipingkirhonon. Tapi porsaya do ahu, asal marhasoman Jesus pasti do boi hubolus anjaha dapotan hamonangan ahu, halani ai ningku ma : “Ningon Jesus hasomanku, pitah ahu kahou do, rapkon Jesus boi au monang, talu munsuhkin ganup. Seng mabiar au ijin, Jesus do hasomankin. Sai irikkononku Jesus balosanku mando in”.
6. Huakui do tongon, domma bahat hayu na dob irobohi bani panorang on bahkan buei do na masuk tahanan lembaga pemasyarakatan halani illegal logging. Tanggungjawabta do tongon laho melestarihon lingkungan. Halani ai hupelihara ma lingkunganhu marhitei na menjaga kebersihan pakon manuan hayu ase ulang roh be parmaraan. Manramotkon sagala na tinompa ni Tuhan, in ma tanggung jawab na banggal banta selaku tinompa sigijangan. Halani ai, sirsir ma au manramotkon in marhitei na manjaga kebersihan.
7. Ari margantih ari, bulan margantih bulan, das ma sadari on pesta Natal Wanita. Hudingatma bahasa tahun on domma laho salpu, hape dong do tugas ampa tanggung jawabku selaku inang sesuai bani sub tema GKPS tahun 2017 Ajari ma Kuria in gabe sipangidangi ibagas hapentaron, haporsayaon ampa bulus ni uhur ase lambin torsa kuria in na mampangkorhon hadoharon pakon hadearon i tongah-tongah ni Gareja, Masyarakat ampa Negara.
8. Hupakei ma homa hapentaran, pambotoh na dob iberehon Tuhan hubangku. Ase gabe hadearon pakon hadoharon ma in ibagas goluh ari-ari, itongah-tongah ni kuria ronsi i tongah-tongah ni dunia on. Mampargunahon Sumber Daya, in do dalan pataridahkon bahasa na idalankon hita do pandiloon ni Tuhan in hubanta.

Prolog :

Hita haganupan, patalar hita ma bukti na dob manjalo Sipaluah in hita marhitei Naibata panorang on. In ma na gabe dalan banta laho mananda hasintongan pakon hagoluhan in ase dong gogohnta laho pasirsirhon diri manggoluh ibagas habonaron ampa hapintoran na humbani Tuhan.

 

14. Ambilan :
15. Mandoding: No. 315: 1-3 (Manggalang)
16. Sangap, sangap bani Jesus Tuhankin,

Na roh hun surga hun rumah-Mu

Sangap, sangap bani parroh-Mu hu tanoh on

gabe doskon jolma Tuhan parholong in, sangap, sangap

 

2. Haganup parmahan jalo ma tongon

Barita malas uhur hun surga in

Ai saborngin on do tubuh Tuhan Jesus in

ai tibal do Ia bani palangka in, sangap, sangap

3. Ai Ididah Majus do bintang-Ni in

roh sidea manombah Tuhanta in

Mas, hamonan, minak do na isombhakon in

Pasangap Rajanta siboan damei in, sangap, sangap

 

16. Tonggo Galangan-Tonggo Panutup-Pasu Pasu. (Jongjong Kuria)

P       Ham Naibata Bapanami na isurga, Naibata paridop ni uhur banggal, pargogoh na so tarimbang, tarima kasih ma isombahkon hanami halani domma   ipasaud Ham bagah-bagahMu.

J        Ale Ham Tuhannami, isura uhurMu do ase haganup dunia on mandaihon haluahon ampa hagoluhan na hum-Bamu marhitei partubuh ni anakMu Jesus Kristus Sipaluah hanami.  Halani ai ipuji hanami do Ham.

P       Domma tongon iidah hanami janah iahapkon hanami malas ni uhur na  pinarsintaMu in bannami marhitei anakMu Jesus Kristus. Tambahi ham ma gogohnami, ase lambin talar pangidahnami bani kuasaMu  janah  lambin toguh pangarapannami hu-Bamu.

J        Ajari Ham ma hanami ase gabe sitiruon janah siajarhon na madear bani  keluarga janah songon Ham sirsir berkorban bani keluarganami.

P       Tuhan, bere ham ma benami uhur na sirsir manghaholongi, tangan na sirsir mangidangi, laho patubuhkon damei ampa malas ni uhur itongah-tongah ni   rumah tangganami.

J        Ham Tuhan, bani buei ni tantangan ni goluh na idompakkon hanami, Ham ma na manghasomani janah mangurupi hanami laho mamparjuangkon goluh  sidearan songon hinarosuhkon ni uhurMu.

P       Ulang hanima mabiar! Tonggor ma , sai na hasomananKu do hanima ganup ari, ronsi roh ujung ni dunia on. Nini Tuhan Jesus Kristus Sipaluah Hita.

P+J   Amen.

P       Riap ma hita martonggo marhitei tonggo na niajarhon ni Tuhan Jesus hubanta  !

Ham Bapa nami na i nagori atas…………… Amen.

P       Jalo hita ma pasu-pasu na humbani Tuhan Naibata:        Idop ni uhur ni Tuhan Jesus Kristus pakon holong ni atei ni Naibata Bapa ampa parsaoran ni Tonduy Napansing ma manghasomani (ham) hita haganupan. Amen.

P+J    Amen, hupuji Ham Tuhan.   (Mandodingkon)

Amen hupuji Ham Tuhan.

Amen, Amen, Amen, Amen.

Amen hupuji Ham Tuhan.

1. Acara Pesta Natal