Bani ari Minggu, 21 April 2019 ipamasa do Perayaan Paskah Kuria GKPS Gunung Mulia, Resort Tanjung Beringin, Dairi, na iadongkon i Gereja GKPS Gunung Mulia. Bani perayaan Paskah on adong do ipasirsir Majelis Jemaat piga-piga ranggi ni acara, aima Jalan Salib (Via Dolorossa) pakon Kebaktian Minggu Paskah, janah adong sada na unik bani Perayaan Paskah santorap on, aima haganupan pemeran acara Jalan Salib on aima iperankon Seksi Wanita GKPS Gunung Mulia, Resort Tanjung Beringin. Ipungkah ma parlobei hun Kantor Kepala Desa Tanjung Beringin jam 14.00 WIB das ni holi hu Gereja GKPS Gunung Mulia. Bani Acara Jalan Salib on, buei do masyarakat Tanjung Beringin antusias na manorih janah manaksihon sonaha do parngitni panghopkop-Ni Jesus bani dousa ni jolma in, hona lonsing-lonsing, janah madurus daroh-Ni Jesus in. Bani Perjalanan Salib on haganupan kuria GKPS Gunung Mulia (Seksi Wanita, Seksi Bapa, Seksi Pemuda, pakon Seksi Sekolah Minggu) mangiring-iring para pemeran Jalan Salib. Dob das haganupan pemeran Jalan Salib pakon haganupan kuria na mangihutkon perjalanan salib lanjar ipungkah do kebaktian paskah i Gereja GKPS Gunung Mulia, janah na gabe sipangidangi bani Perayaan Paskah GKPS Gunung Mulia on aima:
Parambilan : Pdt. Rosenila Purba, S.Th
Paragenda : St. Walson Tondang, SE
Siboan Doding : Vik. Pdt. Cerimita Saragih, S.Th
Bani perayaan Paskah GKPS Gunung Mulia on, adong do piga-piga penekanan na i ambilankon Pdt. Rosenila Purba, S.Th, aima ase haganupan halak Kristen na roh bani Perayaan Paskah on, ase lambin memahami sonaha panghopkop-Ni Jesus hubani haganupan jolma na mardousa in, na dob tarsilang do Tuhan Jesus na laho manghopkop haganupan jolma pardousa. Halani Tuhanta Jesus Kristus do ase boi haganupan jolma mangahapkon holong-Ni Tuhan Naibata. Sonaha pe hinabueini dousa bani jolma in, anggo porsaya do hubani Tuhan Jesus Kristus talup ma ia mandapotkon goluh na bayu ibagas goluhni.
Ase andohar ma marhitei Perayaan Paskah GKPS Gunung Mulia, Resort Tanjung Beringin on lambin marbanggal ma haporsayaonni haganupan kuria bani Tuhanta Naibata na domma patuduhkon Holong-Ni hubani haganupan jolma na i tanoh on marhitei Jesus Kristus na tarsilang laho manghopkop haganupan dousa ni jolma i tanoh on anjaha haganupan kuria talup ma patuduhkon goluh na bayu. Totap ma Tuhanta Jesus Kritus bahen hita na gabe batar-batarta bani goluh on. Marmalas ni uhur do haganupan kuriani Tuhan na roh bani perayaan Paskah on. Dob honsi marpunsa acara kebaktian Paskah, ilanjutkon do hubani acara mangan rup. Haganupan ranggi ni acara bani Perayaan Paskah GKPS Gunung Mulia on boi do mardalan ibagas na torsa aima halani idopni uhur pakon holongni atei ni Tuhan na tongtong mangkasomani, manramoti anjaha na ma masu-masu marhitei cuaca na dear. Sai marsangap ma Tuhan Naibata marhitei Perayaan Paskah GKPS Gunung Mulia, Resort Tanjung Beringin on. Tuhan Jesus Kristus na ma masu-masu hita haganupan. Amen.
Enhot Efraim Girsang
Mahasiswa STT Abdi Sabda Medan
