Jl. Pdt. J. Wismar Saragih Pematangsiantar
+62622 23676
info@gkps.or.id

TATA IBADAH JUMAT AGUNG Jumat, 10 April 2020

GEREJA KRISTEN PROTESTAN SIMALUNGUN

TATA IBADAH JUMAT AGUNG Jumat, 10 April 2020

download disini==>Tata Ibadah Jumat Agung 10 April 2020 ok

TATA IBADAH JUMAT AGUNG

Jumat, 10 April 2020

Tema:

Diperlengkapi untuk melakukan perbuatan baik. (2 Timoteus 3:17)

Sub Tema:

“Persiapkan Jemaat menjadi Pemimpin yang Rendah hati, Takut akan Tuhan, Taat kepada Ajaran, Berperilaku Baik, agar Nama Kristus semakin Dimasyhurkan.” (Matius 5:18-19; Markus 9:35)


  1. 1. Dilo-dilo laho marhasadaon
  2. P. Nasiam hasoman sahaporsayaon, martumpu do hita sonari i rumah on, marhasadaon marhitei kebaktian pardingatan Parmatei ni Tuhan Jesus.
  3. J. Tongon do ganup naboritta itaron, janah ganup hasunsahanta iporsan Tuhanta.
  4. P. Halani panlaosionta do Ia hona pantom, binahen ni hajahatonta do Ia ugahan, ampei hu Bani do pinsang-pinsang ase jumpahan hasonangan hita, janah binahen ni ugah-Ni malum iahap hita.
  5. J. Idah hita ma bona ni haporsayaonta in, na manaron haparngiton ampa hasunsahan pakon pandorunon halani hita.
  6. P. Namin hita do na maningon hona uhum humbani titah in, tapi haganup uhum in domma ampei bani abara ni Tuhanta Jesus, Anak ni Naibata, paridop ni uhur na so tarimbang in. Halani ai sombah ampa puji hita ma Ia, manowod ma hita i lobei ni Sihopkop hita in. Padas hita ma puji-pujian marhitei sora na lurlur:

Mandoding Haleluya No. 65:1-2 “Ambit Iuhir Bai Uhurhu”

  1. Ambit iuhir bai uhurhu bohi-Mu laho matei Ham
    Ambit hudingat, o Tuhanku, pangkopkop-Mu bangku naman
    Ai Ham do paluahkon ahu, dousangku do pinorsan-Mu
    Ham manambari naboritku, martuah au halanin
  2. Sai jalo Ham ma au Tuhanku , baen upah na tinaron-Mu
    Sihol ingaton ni uhurhu ganupan nabinahen-Mu
    Mangkopkop au pardosa banggal, ibaen holong ni atei-Mu
    Halani in tarbaen au sonang lao marayakkon huta-Mu

 

  1. 2. Votum-Introitus-Tonggo
  2. P. Ibagas goran ni Naibata Bapa, pakon Tuhan Jesus Kristus ampa Tonduy Napansing Sitompa langit pakon tanoh on. Amen.

Sintua ni Malim na sonin do patut banta, na pansing, na so ongga marsalah, na so martikas, sirang humbani pardousa, na dob gabe gijangan humbani nagori atas, na so pala songon Sintua ni Malim na legan, padaskon ganup ari parlobei galangan halani dousa ni sandiri, dob ai pe halani dousa ni bangsa ai, ai sahali do ihorjahon in, sanggah ginalangkon-Ni ai diri-Ni. Ai ipabangkit titah in do jolma na galek gabe Sintua ni Malim, tapi bija, na pudinan humbani titah in do na pabangkitkon Anak in, na dob gabe gokan dear ronsi sadokah ni dokahni. Haleluya, Haleluya, Haleluya.

  1. J. (Mandodingkon): Haleluya, Haleluya, Haleluya.
  2. P. Martonggo ma hita!

Ale Tuhan Jesus, na matei tarsilang do Ham mangkopkop hanami pardousa on, halani idop ni uhurMu na banggal in magidah hanami. Ajari Ham ma hanami mardingat huBamu, na targantung bani hayu parsilang in manghopkop hanami. Ai Ham do haporusannami anggo ipadompak hanami hubani ringis ni Naibata, sonai ampa bani titah na gati ilaosi hanami. Sai sasap janah umpat Ham ma ganup urat ni dousa na adong bani hadirionnami bei. Urupi Ham ma hanami marhitei TonduyMu Napansing in, janah pargogohi Ham ma hanami maralohon hisap-hisap ni pardagingon. Urupi Ham ma hanami ase tarihutkon hanami Ham bani ganup pardalanan ni goluhnami sadokah hanami i tanoh on. Ibagas Kristus Jesus hanami martonggo. Amen.

  1. 3. Mandoding Haleluya N 64:1-2 “Laho do Biri-biri In”
    1. Laho do Biri-biri in mamorsan ganup dousa,
      ni haganupan jolma in ase maluah hita.
      Iporsan naboritta in, ibere do diri-Ni in,
      Hu tangan ni pamunuh,
      itaron do na sahit in, das bai na rotap hosah-Niin
      nini “Sai porsanon-Ku”
    2. Ai anggo Biri-biri in, in ma huan-huanku,
      Na paluahkon tonduyhin, isuruh Naibataku.
      Ai nini dompak Anak-Nin: ”Parayak ma pardousa in
      Na dob pinapaanku, banggal do ringiskin,
      Tapi tarbaen mahombun in pangkorhon ni daroh-Mu”

 4. Mansopotkon Dousa

Sopotkon hita ma dousanta hubani Naibata janah pangindo hita hasasapan ni dousa ibagas goran ni Tuhan Jesus Kristus.

Martonggo ma hita!  Ale Bapanami janah Naibatanami na marhabangsa i nagori atas, Pargogoh na so tarimbang, Pardear layak janah ronsi sadokah ni dokah ni do idop ni uhur-Mu. Sai marpangulaki ma uhurMu dompak hajahatonnami, janah ulang ma padingat-dingat Ham dousanami, ai gati do hanami mardousa dompak Ham janah gati do parlahounami paroh ringisMu, marhitei panlaosionnami bani hataMu. Ham Tuhan Naibata, holong ma Ham bannami, urupi Ham ma hanami janah sasap ham ma dousanami, halani AnakMu, Tuhan Jesus Kristus, Tuhannami. Amen.

  1. J. (Mandodingkon) Haleluya No. 322:1 “Durus Darohni Jesus in”

Durus darohni Jesus in i dolog Golgata,
Na paubahkon uhurmin, isasap dousamin
Isasap dousamin, isasap dousamin
Napaubahkon uhurmin , isasap dousamin.

  1. P. Ale Tuhan Jesus, ipatuduh Ham do idop ampa holong ni ateiMu marhitei na tarsilang Ham bani hayu pinarsilang in. Marhitei silang in itobus Ham do hanami humbani papa ampa uhum ni dousa. Marhitei silang in roh do Ham mangkopkop hanami. Marhitei silang in do hamateian iubah Ham gabe hagoluhan. Marhitei silang in tangkas ma holong ni Naibata hubani dunia on. Tapi gati do hanami gabe si panrisai songon halak na montas sanggah na tarsilang in Ham irik manghatahon: “Ham na padear rumah ni Naibata janah na pajongjongkonsi ibagas na tolu ari paluah ma dirimu janah turun ma ham hun hayu parsilang in. Songon Sintua ni Malim ampa Sibotoh Surat na mangkatahon: Na legan ipaluah ham, ia dirimu seng tarpaluah ham. Ham Kristus Raja ni Israel! Turun ma ham hun hayu parsilang in ase ididah hanami janah porsaya hanami.

 

  1. J. (Mandodingkon) Haleluya No. 322:2 “Durus Daroh ni Jesus in”

Parjahat na i lambungNin, maluah do homa,
Ge au pardousa banggal in,iuras daroh-Nin,
Iuras daroh-Nin, iuras daroh-Nin
Ge au pardousa banggal in, iuras daroh-Nin.

  1. P. Ale Tuhan Jesus, Tuhan janah Naibatanami! Iondoskon Ham do diri-Mu hu hamateian gabe galangan na manggoluh laho paluahkon hanami. Urasi ham ma uhur, pingkiran ampa goluhnami ase marmalas ni uhur hanami paimahon parroh-Mu. Sasap Ham dousanami ase ulang mabiar hanami mangidah hamateian. Bere Ham ma bannami pangarapan na manggoluh, ase marhasiholan hanami bani hagoluhan na totap ronsi sadokah ni dokah ni. Idop ma Ham bannami palopas ham ma hanami parsimada bani parbagianan na hun surga hasonangan in, ase riap hanami manggoluh pakon haganup suruh-suruhan-Mu.
  2. J. (Mandodingkon) Haleluya No. 322:3 “Durus Daroh ni Jesus in”

Daroh-Ni na madurus in, margogoh do tongon
Gabe maluah bangsa-Mu, pansing homa tongtong
Pansing homa tongtong, pansing homa tongtong
Gabe maluah bangsa-Mu, pansing homa tongtong

  1. P. Tangar anjaha haporsayai hita ma hata ni Naibata bagah-bagah ni Naibata pasal hasasapan ni dosaunta:

“Ai seng dong ubahni, sabonar haganup do sidea mardousa, anjaha seng dong sipujion ilobei ni Naibata. Gabe ipintori do sidea marhitei silayak-layak halani idop ni uhur-Ni, hinorhon ni panobusion na ibagas Kristus Jesus”  Hasangapon ma bani Naibata na ibabou!

  1. Amen
  2. 5. Mandoding Haleluya No. 211:1-2 “Silang na Mapansing in”

Silang na mapansing in ham tongtong baen gantarhin
Lao manlawan dousa in pakon pandoleian in
Bani sitaronon in Ham tongtong baen gantarhin

Haganupan horjangkin, seng boi sonang aui ijin
’Ge porlu pe uhurhin, pala roh do iluhkin
Pitah holong-Mu tumang pangurupi, Ham Tuhan

 

  1. 6. Ruji-ruji Pasal Silang
  2. P. Sanggah harajaon Rom manggomgom bangsa Jahudi ampa bangsa na legan, silang aima uhuman hubani parjahat Uhuman silang aima uhuman na majangin, janah dorun. Halak na iparsilangkon ihira do halak na hona papa janah tarbuang. Hajahaton na mabajan do in, janah seng taringaton be in i tongah-tongah ni simbuei ampa bani humpulan na banggal. Mangkatahon in pe ningon marsantabi do halak  halani lang talup sobuton be, janah na marobu do in. Tapi age pe sonai  isobut Paulus do bani 1 Korint 1:23,
  3. J. Tapi anggo hanami, Kristus na tarsilang in do iambilankon hanami; parsangsian do in bani Jahudi anjaha haotoon bani halak sipajuh begu-begu.
  4. P. Hata “silang” na hinagigihon ni jolma bani panorang ni Jesus, gabe hata ijengesan ampa sidearan do ai bani halak Kristen. Hinan silang aima bagian ni parjahat salian janah na mintor ilupahon jolma pasalsi. Mintor itutung ampa itadingkon do hayu parsilang ni parjahat somalni. Hape silang ni Jesus aima na marianan ibagas uhur ni halak na porsaya, gabe simbol ni hapansingon, hogohon ampa pangurupion. Markuasa do hape Jesus manggantih arti ampa makna ni sada hata ai, aima ‘silang’ in. . Hinan hata na pantang do ai, marayoh do halak manobut in, hape dob roh Jesus janah tarsilang, gabe hata sijengesan pakon sidearan do hata in bani na porsaya. Domma gabe simbol hapansingon hata “silang” bani hauhuron ni siirikkon Kristus. Patut do ihatahon Apostel Paulus bani 1Korint 1:18,
  5. J. Ai haotoon do hata pasal silang in bani halak na laho magou, tapi hagogohon ni Naibata do in banta, na jumpahan haluahon.
  6. P. I lobei atap bani palas-palas ni gareja, sai ipatikkon do silang sonai homa bani tanoman atap kuburan ni halak Kristen. Lang be tanda ni hamateian ampa hataluon arti ni silang ai, tapi sebalikni do aima tanda ni hamonangan. Ai Tuhan Siparmonang do Tuhanta Marhitei hamateian-Ni bani hayu pinarsilang in. domma ipamatei sorod ni hamateian ase ulang matei sadokahni dokahni ganup jolma na porsaya na ningon matei hinan. Tongon, lang tarbilangi buei ni halak Kristen na maruntol marhitei hasunsahan  ampa situasi na idompakkon, tapi totap do boi mangarap bani pangurupion ampa apoh-apoh  marhitei na mangkawah hubani silang ni Kristus in.  Ganup do halak na porsaya mangarusi aha  makna ni silang in bani bahasa ni sidea bei. Lambin boi do iahapkon na porsaya sonaha  holong ampa panobuson ni Kristus marhitei na  mardingat  parmatei-Ni i hayu silang.
  7. J. (Mandodingkon) Haleluya No.321:1

Sai orod bai silangmu Jesus iananku
Bah tubuh mabaor ijin in ma inumonku
Silangni Tuhankin in ma pujionku
Anggo das magira au in dodingkononku

  1. P. Jongjong do silang ni Tuhanta in i Golgata. Rap pakon-Si gantung do homa dua halak parjahat. Dear do iidah hita aha arti ni silang na tolu ai banta halak na porsaya. Na parlobei, silang aima tanda ni hamubahan ni uhur. Taridah do on bani na tarsilang hampit siamun ni Jesus.Bani mungkahni ia lang porsaya hubani Jesus janah sipangambati do ia bani horja ni Jesus, tapi bani ujung ni goluhni paima bois hosah ni mubah do uhurni janah ihaporsayai do Jesus  Anak ni Naibata mambahen boi ia dihut pakon Tuhan Jesus hu Paradeiso, songon na ihatahon Jesus hubani,
  2. J. “Sintong do hatang-Kon bam, sadari on rap pakon Ahu ma ho i Paradeiso!”
  3. P. Gabe barita ampa sipasingat do hata ni Jesus ai hubanta, paboa lang hape sipangambati banggal ni dousanta laho mangindo haluahon pakon idop ni uhur humBani.. Banggalan do idop ni uhur-Ni marimbang dousanta. Janah tangkas ma banta paboa lang adong hata tarlambat laho mulak humbani hajahaton hubani Tuhan in. Ulang ma hatahon hita: “Ah, domma tarlambat, lang ra be Tuhan in manjalo ahu.” Lang adong na malambattu, asal ma sintong-sintong humbagas uhur ampa toruh ni uhur hita roh hubani Jesus.
  4. (Mandodingkon) Haleluya No.321:2

Lao ma au bai silang-Mu in haporusanku
sai idop na uhur-Mu ulang tulak ahu
Silangni Tuhankin in ma pujionku
Anggo das magira au in dodingkononku

  1. P. Na paduahon taridah humbani parjahat na tarsilang i siambilou ni Jesus. Silang bani, aima hamateian pakon hengkeng ni uhur. Sonai ma borit ni sitarononni bani silang ai, tapi lang homa ra ia laho paubah uhurni, hape domma ilambungni Sipaluah in. Boi hinan do ia das hu Paradeiso ambit ra ia mangondoskon dirini hubani Jesus, janah mangindo hasasapan ni dousa. Halani hengkeng ni paruhuranni lang ra  ia mangaku salah ampa dousa, janah lang ra  mangindo hasasapan ni dousa. Seng pitah ai, barani ope ia manrehei Jesus marhitei na mangkatahon, “Ai lang Kristus do Ho? Paluah ma diriMu ampa hanami!” Dohor do namin Sipaluah in hubani tapi daoh do anggo haluahon in humbani. Gabe singat-singat ma silang na i sambilou ni Jesus in hubanta. Boi do horahan halak na itoruh ni sampuran; loheian halak na ilambung ni sipanganon. Boi do magou halak na dohor bani Sipaluh in.  Atap  na ringgas pe sasahalak hu gareja, sonai martonggo ampa marambilan, ningon ma totap martoruh ni uhur janah mangkawah dompak silang in.
  2. J. (Mandodingkon) Haleluya. No. 321:3 “Sai Orod Bai SilangMu”

Domu au bai silang-Mu in ma jolomonku
Ase ulang kahou au Ham ihutkononku
Silangni Tuhankin in ma pujionku
Anggo das magira au in dodingkononku.

  1. P. Tapi na patoluhon janah sibanggalan, aima paboa silang aima tanda ni holong pakon pangkopkopon.Talar do in anggo ikawahkon hita silang ni Tuhanta Jesus. Bani hayu parsilang-Ni talar ma banta sonaha holong ni Naibata pakon pangkopkopon-Ni banta marhitei na manggalangkon Anak-Ni gabe gantihta mamorsan upah ni dousanta ase ulang matei hita tapi ase jumpahan haluahon ampa hagoluhan. Borat janah borit tumang do pangahap ni Jesus mamorsan silang in binahen ni dousa pakon hajahatonta.
  2. J. Ipahiri janah isimbili jolma do Ia pala ipabuni halak bohini mandompakkon-Si
  3. P. Age pe sonai hirini, Ia do sisangapan humbani haganup janah ai do ase ganup suruh-suruhan parnagori atas pe ningon marsombah do hu Bani. Somalni parjahat banggal do iparsilangkon, hape Anak ni Jolma in na so adong salah ampa hajahaton-Ni ipados songgon parjahat bolon halani hita. Lang adong na hinorjahon-Ni na lepak, hape maningon marutang hosah   Gantung bani hayu parsilang i tongah-tongah ni parjahat in; i tongah-tongah ni langit pakon tanoh. Itulak nagori atas pakon itulak tanoh on homa. Gantung do Ia, songon tanggiang na tarpulou. Panorang ai marsora na gogoh ma Jesus nini, “Eli, Eli, lama Sabakhtani?” Artini Ale NaibatangKu, NaibatangKu, mase ma itadingkon Ham Ahu?”. . Halani panlaosionta do hona pantom Ia, halani hajahatonta ampei do bani abara-Ni  pinsang-pinsang, binahen ni ugah ni do malum iahap hita.  Marhitei pardingatan parmatei ni Tuhanta panorang on, idilo do hita ase mangihutkon bokas-Ni ampa maniru paruhuron-Ni, songon na isobut apostel Paulus bani Pilippi 2:5;
  4. J. Songon paruhuron ni Kristus Jesus ma paruhuron nasiam!
  5. P. Age pe ibagas na mogap-ogap hosah-Ni Jesus bani hayu parsilang in, totap do talar holong ni hubani jolma pardousa janah totap do torang paruhuran-Ni padaskon hata na sihol padason-Ni hubani Naibata Bapa-Ni sonai hubani jolma. Ihatahon do “Ham Bapa, marpangulaki ma uhuruMu, ai seng ibotoh sidea na binahenni in!” Hansi pe borit iahapkon, ihopkop do halak na mamunuhSi. Ihopkop ampa iapiti do susianNi, ihopkop do bangsa Israel ampa ganup dunia on. Ihopkop do ganup jolma ronsi na sihol porsaya ope. In ma na patuduhkon banggal ni holong-Ni hubani haganup jolma. Sintong ma silang gabe simbol ni holong. Bani silang in pe ipadas do hasasapan ni dousa bani halak na ra paubah uhurni, songon hubani  parjahat na i siamun-Ni ai ihatahon: “Sintong do hatangkon, sadari on rap pakon Ahu ma ho i Paradeiso”.
  6. J. Ham Jesus banggal ni in holong-Mu hubangku pardousa on
  7. P. Halani domma gonap ganup horja-Ni i tanoh on, iondoskon Tuhan Jesus ma hadirion pakon goluh-Ni hubani Naibata Bapa janah ihatahon ma: “Ham Bapa! Hubagas tanganMu ma Huondoskon TonduyHu.” Janah dob ai bois ma hosah-Ni….

          ——————-saat teduh———————

 

  1. Mandoding Haleluya. No.427:1-2

Na gattung bani parsilang, Jesus in i Golgata.
Padomuhon ganup jolma pakon Tuhan Naibata.
Ai hunjin do roh bah tubuh, hagoluhan banta in.
O ale ganup par dousa, tonggor haluahonmin.

In ma holong ni Tuhanta, bai ganup dunia on.
Anak-Nin isuruh banta, paluahkon hita on.
Jesus dalan hasintongan, goluh na totap ijin.
Ra manaron parsahitan, bai hayu parsilang in.

 

  1. Hata Haporsayaon
  2. Saksihon hita ma haporsayaonta in, songon na sinaksihon ni haganup halak na porsaya bani sab tanoh on!

 

P+J.  Ahu porsaya  bani  Naibata  Bapa,  Pargogoh  na  so  tarimbang,  na manompa langit pakon tanoh on.

Ahu porsaya bani Jesus Kristus, Anak ni Naibata na sasada in, in do Tuhanta, na tinubuhkon ni si Maria sanggah nape haliaban, marhitei Tonduy Na Pansing. Na manaron na parngit, bani panorang ni si Pontius Latus, iparsilangkon, matei anjaha itanom, turun hu nagori toruh. Mulak manggoluh humbani na matei bani ari patoluhon. Naik hu surga anjaha hundul i siamun ni Naibata Bapa, Pargogoh na so tarimbang in. Hunjai ma Ia mulak magira laho manguhumi halak na manggoluh pakon na dob matei.

Ahu porsaya bani Tonduy Na Pansing, bani Kuria parsadaan na mapansing in, parsaoran ni sagala na mapansing in, bani hasasapan ni dousa, bani parpuhoon ni angkula, pakon bani hagoluhan na sadokahni dokahni. Amen.

 

 

 

  1. 9. Mandoding Haleluya No. 389:1-2 “HolongNi in”

Holong-Ni in, lao manggoki padan,
Jesus manaron ijin, bani parsilang.
Parngit ni in, ibaen holong-Ni do in,
bai haganup jolma in, na ibagas dousa.

Eli, Eli, Lama Sabachtani,
Jesus mandoruh ijin, sanggah tarsilang,,
Ajal dohor, daroh madurus tong roh,
Pandoruh-Nin lambin soh, paima panorang

 

  1. 10. Ambilan: Mateus 27:4556

Nasiam haganup hasoman sahaporsayaon. Sadari on rup do hita beribadah laho mardingat sitaronon ampa parmatei ni Tuhan Jesus. Agepe lang boi rap hundul hita i gereja tapi sada do uhurta laho mandodingkon doding haporsayaonta ampa manangar hata ni Naibata.

Lungun do pangahap halani na masa on, anjaha sonai do homa na ipataridahkon Injil Mateus on banta: suasana na lungun, na golap mulai tongah ari das hubani pukul tolu sanggah na iparsilangkon ai Tuhan Jesus bani ianan na igoran partangkurakan, Golgata. Suasana paima matei Tuhan Jesus, anggo bani susianni aima suasana na mencekam, halani sidea mangidah Jesus hinaholong ni uhur ai manaron na borit tumang, mambahen tangis parinangon na mangirikkon pardalan ni Jesus mulai hun Galilea nari.

Suasana na sonin lungunni mambahen haganup hasomanni Jesus, pitah jongjong humbani na daoh, lang marsahap, mangidah aha ma na sihol masa use. Tangkas ma ididah sidea Jesus na lang marsalah, na bujur, na sari bani jolma, na mamodahkon na madear, gantung bani hayu parsilang, na lang pantas namin ibahen hubani Jesus. Halani silang aima sitaronon. Silang aima aib bani buei halak. Tapi lang tarbahen sidea marsora atap bertindak halani dong ijai tentara na manjaga, dong ijai halak na mabuei na bani piga-piga panorang parpudi, dihut manghatahon: parsilangkon Ia, parsilangkon Ia.

Kuria ni Tuhan. Sanggah sonai situasini, marsora na gogoh ma Jesus nini, Eli, Eli, Lamasabakhtani? Naibatangku, Naibatangku, mase itadingkon Ham Ahu? Teriakan ai patugahkon sitaronon na lang tarporsan be, na tang siboratan, na domma bani batas penderitaan na luar biasa. On ma na iporsan Jesus panorang ai. Sitaronon ai idalani Tuhan Jesus lang halani diriNi, lang untuk diriNi, tapi halani hita, halani dousanta, bahen haluahonta.

Bani situasi na sonai ai marbeda-beda do respon ni halak.

  1. Ianggap sidea do Jesus mengigau, gabe ihatahonNi atap aha deba tanpa sadar. Ianggap sidea do asal luar tumang hata ai humbani Tuhan Jesus. Ai do ase dong na mambere inuman na migar hubani ase sadar ulakkon. Sikap si sonon boi do homa terjadi bani panorang sonari, na lang porsaya bani kuasa ni Naibata, na menganggap pitah kata-kata tumang na iluarhon halak parpintor seolah songon kicauan burung tumang. Dilo-dilo ase marhamubahon uhur ianggap songon mungmung tumang. Seruan ase mardear, ase manggoluh ibagas biar bani Naibata, ase orod hubani Tuhan, ai ianggap sebagai seruan moral tumang na lang porlu ipardiatei. Seruan social distancing atap physical distancing pe ianggap sebagai sesuatu na lang serius. Akibat ni gabe fatal, buei ma korban, dob ai manosal ma. Teriakan ni Tuhan Jesus ulang ianggap hita sebagai kicauan tumang, atap mengigau. Teriakan ai justru bagian humbani proses haluahonta do. Dilo-dilo ni Tuhan lang sekedar seruan pengumuman tapi hagoluhan do jumpah ijai.
  2. Deba mangidah rasa frustasi na ialami Jesus ai ra do mambahen Ia mangindo haluahon humbani kuasa na lang mungkin terjadi, aima marhitei na iagan sidea na mandilo si Elias Ia. ‘Naidah ma atap na roh do Elias paluahkonSi’ on ma na ihatahon sidea, na bernada ejekan, bernada mempermainkan. Iagan sidea do songon guro-guro haganupan in. Lang isadari sidea bahasa penyerahan diri ni Tuhan Jesus marhitei sora na gogoh in laho paluahkon buei jolma. Lang untuk diriNi tumang Jesus mandilohon Eli, Eli lamasabakhtani. Teriakan ai lang ase mapaluah Tuhan Jesus humbani silang in, tapi bahen haluahon ni dunia on, na dousani iporsan Jesus bani silang in do.

 

Hita haganupan. Aha na masa bani Jesus i Golgata majangin tumang do iahapkon hita, tapi ulang pitah bani na jangin in tumang hita soh. Maningon das ma hita hubani pangakuan na manghatahon: Tongon do Anak ni Naibata Ia. Pangakuan ai songon na iluarhon kopala tentara ampa sidea na manjagai Jesus. Sidea mangidah bahasa parmatei ni Tuhan Jesus lang songon parmatei na somal. Terjadi do sesuatu na lape ongga masa. Tirei na i rumah panumbahan marigat hun atas hu toruh, dugur tanoh on, mabolah batu, tarbuka tanoman. On ma na masa bani panorang sanggah na matei ai Tuhan in. Halani ai sidea mangidah bahasa Jesus na matei bani hayu parsilang, lang sekedar ‘orang yang tak bersalah’ tapi tongon-tongon do Jesus sebagai halak na sintong, na pintor. Jesus was not only innocent but righteous. Pengakuan ni sidea ai: Tongon do Anak ni Naibata Ia, tontu on mambahen perubahan bani goluh ni sidea.

Bani peristiwa Golgata ai, Jesus lang sekedar kehilangan nyawa (ibuat hosahni) bani panorang ai, songon pangidah ni buei halak, tapi sebalikni iondoskon Jesus do tonduyNi, goluhNi hubani Naibata. Haganupan ai patugahkon hubanta bahasa Naibata do sumber hagoluhan, halani ai maningon hubani Naibata do hita mangondoskon goluhta on. Jesus marondos hubani Bapa, anjaha porsaya do hita Bapa na i surga in pe mambere hagoluhan hubani Jesus dob ai ibere ma homa hagoluhan in hubani haganup halak na ihopkopNi. Haganupan in terjadi bani Jumat agung janah lang soh ijai haganup on halani roh ma use ari Minggu ari parpuho, ari haluahon na mambahen boi totap hita marpangarapan pasal goluh na bayu na ipasirsir Tuhan in.

Hita ganup. Jumat Agung lang sekedar pardingatan parmatei ni Tuhan Jesus tapi gabe sada panorang do on hubanta laho pataridahkon hajongjonganta, haporsayaonta. Ise do hita i lobei ni Tuhan in?

Jumat Agung banta aima sada panorang laho pataridahkon pangkopkopon ni Tuhan Jesus banta ase totap hita marpangarapan pasal goluh na bayu, na domma ipapansing, mambahen margogoh hita mandompakhon na masa sonari on aima ancaman covid-19. Tarpuji ma Tuhanta. Amen.

             (Pdt. Paul Ulrich Munthe – Sekjend GKPS)

 

  1. 11. Mandoding Haleluya No. 340:1-2 “Huondoskon Bani Jesus”

(Patumpu Galangan)

Huondoskon bani Jesus haganupan diringkon
Ia do pasangaponku sadokah bai goluhkon
Huondoskon ma, huondoskon ma.
Bani Jesus Sipaluah, huondoskon ma

Huondoskon bani Jesus haganupan goluhkon.
Hutadingkon ganup dousa, huihutkon Tuhan in.
Huondoskon ma, huondoskon ma.
Bani Jesus Sipaluah, huondoskon ma

 

  1. 12. Tonggo Galangan – Pasu-pasu
  2. P. Puji ma Jahowa ale tonduyhu, anjaha humbani gok ni uhurhu mamuji goranNi na Pansing in! Puji ma Jahowa, ale tonduyhu, anjaha ulang ma halupahon ganup dear layakNi! Ia do na manasap sagala dousamu, anjaha na pamalumkon sagala naboritmu. Napaluahkon goluhmu humbani hamagouan, na mansortalihon bam dear ampa idop ni uhur.
  3. Seng idalankon banta romban hubani dousata janah seng ibaloskon banta romban hubani hajahatonta. Songon idop ni uhur ni bapa bani niombahni sonai ma idop ni uhur ni Naibata bani sagala na mangkabiariSi.
  4. P. Halani ai domma tangkas ipatuduh Naibata holong ni uhur-Ni hubanta, marhitei na matei Kristus manghopkop ganup hita pardousa. Sonari tangkas ma banta domma maluah hita humbani ringis ni Tuhanta in, halani daroh ni Anak-Ni na dob madurus i hayu parsilang.
  5. J. Ai do ase sihol do pujion ni pamangan ampa uhurhu Tuhan in, humbani sonari nari ronsi sadokah ni dokahni.
  6. Tarimakasih ma Bamu Tuhan. Ibagas malas ni uhurnami, panorang on iondoskon hanami do galangannami huBamu. Pasu-pasu Ham in ase boi ipakei hanami laho pararatkon harajaonMu i dunia on. Sai tambahi Ham ma pasu-pasuMu hubannami haganup marhitei ganup horja ni tangannami. Maidop ma Ham Tuhan, jalo Ham tonggonami on ibagas goran ni AnakMu Jesus Kristus hanami martonggo. Amen

Riap ma hita martonggo marhitei tonggo na niajarkon ni Tuhan Jesus hubani susianNi……

P+J.   Ham Bapanami na i nagori atas…….Amen

  1. Idop ni uhur ni Tuhanta Jesus Kristus, pakon holong ni atei ni Naibata Bapa ampa parsaoran ni Tonduy Napansing ma mangkasomani hita haganupan. Amen.