TATA IBADAH PARTONGGOAN KAMIS PUTIH

download disini==>Tata Ibadah Partonggoan Kamis Putih 9 April 2020

TATA IBADAH PARTONGGOAN KAMIS PUTIH

Kamis, 9 April 2020

Tema:

Diperlengkapi untuk melakukan perbuatan baik. (2 Timoteus 3:17)

Sub Tema:

“Persiapkan Jemaat menjadi Pemimpin yang Rendah hati, Takut akan Tuhan, Taat kepada Ajaran, Berperilaku Baik, agar Nama Kristus semakin Dimasyhurkan.” (Matius 5:18-19; Markus 9:35)

 

1. Hata Pamungkah
2. Kamis Putih aima ari pardingatan pasal panaronon ni Tuhan Jesus Kristus bani borngin na parpudi paima iparsilangkon Ia. Riap mangan Paska do Ia pakon susian-Ni borngin ni ai bani sada kamar pardatas i Jerusalem. Bani panorang ai ma homa Jesus mamurihi nahei ni susian-Ni janah padaskon titah na baru ase marsihaholongan ganup susian-Ni songon sonaha Ia mangkaholongi sidea (Joh.13:34). On ma tonah ni Jesus na parpudi bani horja-Ni i tanoh on laho paluahkon pardousa janah lang piga dokah nari talar ma sonaha banggal ni holong-Ni bani dunia on marhitei na igalangkon diri-Ni bani hayu parsilang i Golgata. Paunduk hita ma uhurta panorang on mardingat pangkopkopon ni Tuhanta Jesus Kristus mangkopkop hita.

P+J.  (Mandodingkon) : Melayani

Melayani, melayani lebih sungguh

Melayani, melayani lebih sungguh

Tuhan lebih dulu melayani kepadaku

Melayani, melayani lebih sungguh

Mengasihi, mengasihi lebih sungguh

Mengasihi, mengasihi lebih sungguh

Tuhan lebih dulu mengasihi kepadaku

Mengasihi, mengasihi lebih sungguh

 

2. Votum-Introitus-Tonggo

 

1. Ibagas goran ni Naibata Bapa pakon Tuhan Jesus Kristus ampa Tonduy Napansing sitompa langit pakon tanoh on.

P+J.  Amen

1. Titah na baru do Hubere bannima, ai ma, ase marsihaholongan hanima samah hanima. Songon holong ni uhurHu bannima, sonai ma marsihaholongan hanima.

Martuah ma hita na tardilo ibagas goran ni Jesus, na martumpu borngin on mardingat panaronon ni Jesus mangkopkop hita. Sirsir do hita roh marsombah hubani Jesus na dob manggalangkon diri-Ni hubanta ?

1. Marhitei idop-Ni, sirsir do hanami.
2. Ra do hita totap puho martonggo songon Jesus ijia i Getsemane janah humbani bulat ni uhur pakon bois ni gogohta mambalosi pangindoan-Ni ?
3. Marhitei idop ni uhur-Ni margogoh do hanami
4. Anggo sonai, puji janah sombah hita ma Tuhanta age bani panorang borngin na gok hagolapan on. Haleluya, martonggo ma hita!

Ham Tuhan Naibata paridop ni uhur ampa parholong ni atei na tarsulur, tarpuji janah marsangap ma goran-Mu i sab dunia on. Ungkab Ham ma uhurnami marhitei Tonduy Napansing mardingat sitaronon ni Tuhan Jesus Kristus bani borngin sanggah na hona partahian Ia. Suratkon Ham ma ibagas uhurnami titah-Ni ase marsihaholongan hanami songon Ia na mangkaholongi hanami janah sirsir hanami mangidangi hasoman songon Jesus na sirsir gabe juakjuak bani haganup. Ibagas Jesus Kristus Sipaluah janah Tuhannami jalo Ham ma parsombahonnami. Amen.

 

3. Mandoding Haleluya No. 307:1-2

 

Bani na martonggo ahu hu Bamu O Tuhankin.
Ajar Ham ma au manjalo ganup na binere-Mu.
Mangakuhon songon Jesus bani sitaranon-Niin.
Seng rosuhku pasaudonku pitah rosuh-Mu Tuhan.

Atap aha husurahon na dear bai goluhkon.
Bahen Ham au pambalosi bani ganup rosuh-Mu.
Mangauhon ‘pa porsaya ‘ge galek pe uhurhon.
Seng rosuhku pasaudonku pitah rosuh-Mu Tuhan.

 

4. Hasasapan ni Dousa

 

1. Hita haganupan na martumpu bani borngin on. Domma ipataridahkon Jesus holong-Ni hubanta marhitei na sirsir Ia manggalangkon diri-Ni janah sirsir gabe juak-juak ibagas toruh ni uhur. Ibagas unduk ni uhur roh ma hita hu lobei ni Tuhanta mansopotkon dousanta ibagas hasintongan ni Tonduy Napansing.
2. (Mandodingkon) Haleluya No. 384:1

Anggo sai tong hupingkiri, pambahenankin
Simbei do tong ganup tingki, seng margagan in
Holongmu, Tuhan pangajamankin
Sai marpangulaki, Ham mangidah in
Holongmu, Tuhan pangarapankin
Seng dong parsuhutan, pitah Ham do in

1. Ham Tuhan Naibata paridop ni uhur banggal. Mangaku do hanami paboa gati do hanami lang manggoluh ampa marparlahou songon Kristus. Lang ihaholongi hanami hasomannami songon pangkaholongi ni Kristus bannami. Marhitei pamangannami iluarhon hanami do hasirsironnami mangirikkon-Si,tapi lang piga dokah hotop do itahihon, itadingkon janah iparnalang hanami Ia bani pardalanan ni goluhnami. Ham Tuhan idop ma uhur-Mu bannami.
2. (Mandodingkon) Haleluya No. 384:2

Gijang uhur ampa latei, seng maronti in
Uhur domdom ganup ari, sai na roh do in
Holongmu, Tuhan pangajamankin
Sai marpangulaki, Ham mangidah in
Holongmu, Tuhan pangajamankin
Seng dong parsuhutan, pitah Ham do in

1. Jalo anjaha haporsayai hita ma hata ni Naibata bagah-bagah pasal hasasapan ni dousanta: “ Pamalumonku do parbalikon ni sidea. Sihol do Ahu mangkaholongi sidea, tongon, domma surut ringisku humbani sidea.(Hosea 14:4) Hasangapon ma bani Naibata i babou!

P+J.  Amen

 

5. Mandoding Haleluya No. 322:1+3

 

         Durus darohni Jesus in i dolog Golgata,
Na paubahkon uhurmin, isasap dousamin
Isasap dousamin, isasap dousamin
Napaubahkon uhurmin , isasap dousamin.

Daroh-Ni na madurus in, margogoh do tongon
Gabe maluah bangsa-Mu, pansing homa tongtong
Pansing homa tongtong, pansing homa tongtong
Gabe maluah bangsa-Mu, pansing homa tongtong

 

6. Refleksi Kamis Putih

(Saat Teduh)

1. Ibotoh Ham do Tuhan na roh ma panorang-Mu. Ibotoh Ham do na roh ma na sihol mantahihon Ham. Itanda Ham do na mamunsuhi Ham. Ibotoh Ham do sora ni na mabuei na sihol bueinan lang hampit Ham, tapi age pe sonai totap do holong-Mu sadokah ni dokahni.
2. Diatei tupa ma bani holong-Mu hubannami ronsi na matei Ham bani parsilang. Ajari Ham ma hanami mangkaholongi songon Ham, mangkaholongi hasomannami sonai age munsuhnami songon Ham na mangkaholongi hanami
3. Sirsir do Ham gabe jabolon mamurihi nahei ni ganup susian-Mu. Ipatalar Ham do usihan ni na martoruh ni uhur pakon hajuakjuakon.
4. Tarimakasih ma Bamu na dob mangidangi hanami. Ajari Ham ma hanami ase sirsir gabe pangidangi ibagas bulus ni uhur, totap martoruh ni uhur, janah lang mangindahi hasangapon diri sandiri. Paingat Ham ma hanami anggo lolei hanami mardingat Ham.
5. Bani borngin na mapansing sanggah na hona partahian Ham, iinggoti hasoman-Mu do Ham sonai age halak na mangkagigihon Ham, halak na porsaya sonai homa halak na sihol mamunuh Ham.
6. Urupi Ham ma hanami ase mangusihi Ham bani na mandompakkon hasomanami sonai age na mangkagigihon hanami.
7. Ibere Ham do Titah na Baru na talup sihagoluhkononnami bani ganup panorang, bani ganup goluh i rumah tangga, kuria sonai masyarakat ronsi i sab dunia on.
8. Bani borngin na mapansing on, martumpu do hanami mardingat holong-Mu na banggal in hubannami. Domma iboan Ham hanami hubani sondang haliharon-Mu. Marhitei pangkopkopon-Mu domma ibere Ham goluh na baru, goluh sisadokah ni dokahni bannami

P+J.    Amen

 

7. Mandoding Haleluya No. 107:1+4

 

Irikkon nasiam ma Au, sonai nini Tuhanta
Sai parnalang ma dirimu, hatangku malah harga
Sai mambur bahenlah ganup, parlahoumin na so talup

Na toruh uhur do Au on, sai tong holong atei-Hu,
Lamlam uhur-Hu, ai tongtong lamlam homa hatang-Ku,
Tongtong hutatap Naibata, ai pe Au on ihutkon ma.

8. Ambilan : 1 Korintus 11:23-32

 

Hita haganupan na hinarga ni Tuhan Jesus,

Teks Ambilan banta, bani partonggon Kamis Putih bani ari Kamis, 9 April 2020 sadarion aima na tarsurat bani:

1 Korint 11:23-32.

Hubasahon ma teks ni hubanta:

 

11:23 Ai na hujalo humbani Tuhan, ai do hupadas bani nasiam: Ia Tuhan Jesus, bani borngin sanggah hona partahian Ia, ibuat ma ruti,

11:24 ihatahon ma tarima kasih, ipartopik, anjaha ihatahon ma: Dagingku do on, na mangkopkop nasiam. Bahen nasiam ma sonin, gabe pardingatan Bangku!

11:25 Lanjar sonai do homa panginuman ai dob salpu na mangan ai, nini: Ia panginuman on, padan na baru ma on ibagas darohku. Bahen nasiam ma sonin, gabe pardingatan Bangku, ganup hali iinum nasiam in.

11:26 Ai ganup hali ipangan nasiam ruti na sonin, anjaha iinum nasiam humbani panginuman in, parmatei ni Tuhan in do iambilankon nasiam, ronsi roh Ia.

11:27 Ase anggo adong na mangankon ruti in, anjaha na minum humbani panginuman ni Tuhan in ibagas na so talup, parsalah do ia bani badan ampa daroh ni Tuhan in.

11:28 Tapi ipareksa jolma in ma dirini, dob ai pe ase ipangan ruti in, anjaha iinum humbani panginuman in.

11:29 Ai barang ise na mangankon anjaha na manginum in, uhum bani dirini do na pinangan anjaha na niinumni ijin, anggo seng itimbangi daging in.

11:30 Halani in do ase buei na galek anjaha na boritan bani nasiam, anjaha hundong ma na dob modom.

11:31 Tapi anggo iuhumi hita dirinta, seng siuhumon be hita.

11:32 Tapi hita na niuhuman ni Tuhan in, hona ajar do hita marhitei ai, ase ulang hona uhum hita rap pakon dunia on.

________________________________________________________________

AMBILAN:

1. Bapa, inang, hita haganupan na hinaholongan ni Tuhan.

Tarsonggot janah kecewa do apostel Paulus manangar barita pasal kuria Korintus na mengalami parbolah-bolahan. Situasi parbolah-bolahan na dob masa bani kuria in taridah marhitei munculni kelompok-kelompok atap golongan-golongan na maronjolan hubani “tokoh idola” ni sidea. Adong ma ijai kelompok/golongan na mengklaim dirini susian ni si Paulus, susian ni si Kepas, susian ni si Apollos ampa susian ni Kristus (bdk. 3:4). Haganupan on terjadi halani tiap kelompok merasa dirini lebih hebat dan lebih benar dari kelompok lain.

 

2. Keterpecahan na terjadi i tongah-tongah ni pargoluhan ni kuria in, seng pitah taridah marhitei perbedaan ajaran atap tokoh idola tumang, tapi pola kehidupan “kaya-miskin” taridah do homa marhitei praktik diskriminasi sosial. Tangkas tumang ma ai bani praktik PERJAMUAN TUHAN atap Perjamuan Malam na ibahen sidea sanggah martumpu sidea laho mangankon parpadan ni Tuhan in atap na isobut hita Horja Banggal Napansing (HBN).

Mangihutkon ajaran ni apostel Paulus, mangankon parpadanan ni Tuhan in bani “Perjamuan Malam” in, aima laho mardingat pangkopkopon ni Tuhan Jesus, marhitei na riap mandaihon atap mangankon ruti pakon anggur na gabe simbol daging pakon daroh ni Tuhan Jesus, songon na tinonahkon-Ni bani susian-Ni, nini: “Daging-Ku do on, na mangkopkop nasiam.”, anjaha “Ia panginuman on, padan na baru ma on ibagas daroh-Ku. Bahen nasiam ma sonin, gabe pardingatan Bangku” (ayat 24-25).

Bani hata na pondok, makna Perjamuan Kudus, aima merayakan Kristus, na dob mangkopkop hita halak na porsaya huBani. Perjamuan Tuhan adalah perjamuan persaudaraan, aima partumpuan ni halak na porsaya na dob ipamonang, ihopkop janah ipaluah Naibata ibagas Kristus.

Semua orang yang hadir dalam perjamuan adalah orang-orang yang telah diselamatkan. Semua orang harus merayakan keselamatannya. Semoga orang harus bersukacita bersama. Semua orang adalah setara dalam keselamatan surgawi ini.

 

3. Bapa pakon Inang, hape na terjadi bani partumpuan ni halak Korint aima: sedo pertemuan ilahi, tapi pertemuan duniawi; sedo jamuan persaudaraan, tapi jamuan pembeda-bedaan.

Mase?

Karena mereka bukan makan bersama, tapi makan suka-suka. Kritik ni apostel Paulus:  “Ai sanggah na mangan nasiam, mintor marsipangan panganonni bei do nasiam” (ayat 21).

Mereka makan sendiri-sendiri. Marsipangan tugo ni bei. Marsipangan nabinoan ni bei. Tontu aggo na bayak bana, enak janah mantin ma sipanganon pakon siinumonni, bahkan dong na sampai mabuk, ai gabe pesta foya-foya do “perjamuan malam” itu.

Sebalikni, yang miskin, akan tetap makan “apa adanya”, seperti kalau ia makan di rumah. Sidea pitah gabe panonton bani SANTAPAN MALAM orang kaya. Pitah milong-ilong ma sidea, tapi seng hadaian bani sipangonon ni na bayak in.

 

4. Hita haganupan na hinarga ni Tuhan.

Nini Paulus bani kuria Korint ijia, “ Seng hupuji nasiam, tapi lambin samborni do anggo martumpu nasiam” (ayat 17, 22).

Seharusni, perjamuan malam aima panorang “mangambilankon parmatei ni Tuhan Jesus ronsi roh Ia” (ayat 26). Hape na binahen ni sidea aima: mangambilankon atap patugahkon habayakonni, sinadonganni, sipanganonnni na lebih mewah, bahat janah mantin. Itu kekejian bagi Tuhan dan sesama.

 

Seharusni, perjamuan malam adalah perjamuan bersama dalam kerendahan hati, ibagas uhur na so talup janah siparsalah i lobei ni Tuhan in (ayat 27). Hape na binahen ni sidea aima: roh marhasomankon gijang ni uhur, merasa benar dan hebat. Itu adalah kekejian bagi Tuhan, janah patut hona uhuman ni Naibata.

 

5. Hita haganupan warga GKPS nahinaholongan ni Tuhan Jesus;

perenungan sekaligus refleksi na boi irimpunhon hita marhiteihon ni ambilan on aima:

1. Ambilan on paingatkon banta, poboa Jesus do na dob mangkopkop hita, manobus dousanta marhitei na mandagei sitaronon-Ni das bani na matei iparsilangkon IA. Daging pakon daroh-Ni, aima bayaran mahal untuk menyelamatkan kita. Ia do ruti na hun surga, songon pangakuan-Ni, “Ahu do ruti na manggoluh, na susur hun nagori atas. Barang ise na mangan ruti on, manggoluh do ia sadokah ni dokahni. Ia ruti sibereon-Kai bahen hagoluhan ni dunia on, in ma dagingku” (Joh. 6:51).
2. Ambilan on paingatkon hita, bani na dihut hita bani horja banggal ni Naibata, aima Horja Banggal Napansing in, aima laho mangambilankon Tuhan Jesus na dob mangkopkop hita marhitei na mangankon ruti pakon anggur. Ase, ulang iunsagahkon hita dirinta, tapi manowod ma hita i lobei ni Naibata mansopotkon dousa, janah marmalas ni uhur, halani ipadihut hita bani “Perjamuan Kasih” ni Naibata ai.
3. Bani na iadongkon kuria in “perjamuan makan bersama”, atap “marurup mangan” pe goranni, ningon gabe sada “perjamuan persaudaraan ma ai; setara dan sederajat, sebagai orang-orang yang telah diselamatkan, bukan oleh karena sinadongan atap hagabeianta, tapi halani idop ni uhur ni Naibata tumang (sola gratia). Ase ganup halak na roh, roh ibagas malas ni uhur, ibagas holong parsaninaon na humbani Tuhan Jesus.
4. Ambilan on ipangingatkon hita homa pasal hinaporluni kepedulian bagi sesama. Halak na dob siidopan, maningon ma homa mangidopi. Berbagi kasih. Ulang sai lalap fokus bani diri sandiri atap bani istilah na legan isobut: egoisme, egosentrisme, pakon egofilia. Sebalikni, ningon ma: “ibagas toruh ni uhur hira nasiam ma hasoman nasiam lobihan humbani nasiam sandiri. Ulang ma na porlu bani nasiam paruhurhon nasiam, tapi dihut ma na bani hasoman” (Pilippi 2:3b-4).
5. Bani masa-masa pergumulan mandompakkon wabah covid-19 on hita, bahat ma na mangahapkon dampak negatif hinorhonni terbatasnya ruang gerak, lingkup kerja ampakon kegiatan sosial na legan. Mungkin, adong na dob melemah kekuatan ekonomi rumah tanggani halani terputusnya pekerjaan untuk mencari nafkah; tingkat stress yang semakin meninggi hinorhonni ketidakmampuan mengolah kenyataan na idompakkon: naborit, ketiadaan kerja pakon aktivitas na legan, atap maningon marhorja halani panggilan tugas songon hasomanta paramedis bani situasi genting sisonari on. Bani situasi sisonon ma gereja semakin diingatkan untuk “membuka tangan bagi orang lain; mamardiateihon janah mangurupi na mamorluhon bantuan. Gereja dan warga GKPS maningon terbuka (inklusif), jangan menyembunyikan diri dan berdiam-tertutup (eksklusif). Mungkin tidak cukup hanya dengan ibadah live-streaming, harus ditindaklanjuti dengan live-action yang benar-benar mewujudnyatakan kasih persaudaraan dengan memberi pertolongan dan bantuan. Perhatianta warga GKPS seng pitah hubani na terpapar virus corona, tapi juga hubani sidea na mungkin homa domma terkapar hinorhonni gejolak sosial akibat bencana non alam, covid-19 on.

 

6. Akhirni, holong na humbani Tuhan Jesus ma manrahut hasadaonta. Jesus na dob pataridahkon idop pakon holong ni atei-Ni, aima na gabe pemicu dan pemacu banta laho membangun persaudaraan yang baik bani ganup gulmit ni pargoluhanta, sonaiage i tongah-tongah ni kurianta.

Selamat mar-kamis Putih, selamat mangkagoluhkon pangkopkopon ni Tuhan Jesus hubanta. Amen.

                                                     (Pdt. Albert H. Purba, MTh – Kadep. Kesaksian)

 

 

9. Mandoding Haleluya No. 246:1-2+6

 

Sai dingat Jesus Tuhanmin na roh hubanta jolma
Na manadingkon surga in na pala gabe jolma
Sai ulang lupa ham ijin, ai in do hagoluhanmin
Sai puji ma lah Ia

Sai dingat Jesus Tuhanmin, sitaron na madorsa
Bai hayu na marsilang in, mangkopkop ham pardousa
Ai ham talup manaron in, na mangonai bai Jesus in

Sai puji ma lah Ia

O Jesus tatap Ham au on, sondangi Ham uhurhu
Sai togu Ham ma au tongtong, marayak Ham Tuhanku
Uhirhon ham bai uhurhin, Goran-Mu na mapansing in
’se masuk au hu surga

 

10. Tonggo Pangapition

 

1. Idilo Jesus do hita ase marsihaholongan. Halani ai martonggo ma hita manonggohon kuria ni Tuhan, dunia on pakon haganup na masa.

—-Saat Teduh—

Ham Tuhan Naibata, itonggohon hanami do kuria-Mu ase tongtong sada ibagas holong-Mu. Padaoh Ham ma tonduy parbolah-bolahan  tapi pasada Ham ma hanami laho mandalankon pandiloon-Mu, ase gabe juakjuak na sirsir mangidangi hanami songon Jesus Kristus. Ibagas idop ni uhur-Mu,

1. Tangihon Ham ma tonggonami Tuhan
2. Itonggohon hanami do dunia tinompa-Mu pakon haganup tinompa ampa jolma na mangiani tanoh on. Ramotkon Ham ma dunia on na mandompakkon Covid-19 bani panorang on na mambahen buei jolma sonai age hanami gabe gobir janah mabiar halani buei ni korban i sab dunia on sonai age i Indonesia. Hu Bamu do hanami marhaporusan. Ham Tuhan patalar Ham ma kuasa-Mu manalpuhon pandemi na idompakkon hanami panorang on. Ibagas idop ni uhur-Mu,
3. Tangihon Ham ma tonggonami Tuhan
4. Itonggohon hanami pemimpin ni negaranami Indonesia na sedang berjuang mangatasi penyebaran ni Covid-19 sonai homa paramedis na patorsa-torsahon buei korban. Pasu-pasu Ham upaya na binahen ni sidea parontihon wabah on marhitei hagogohon ni kuasa-Mu na sumurung in. Ibagas idop ni uhur-Mu,
5. Tangihon Ham ma tonggonami Tuhan.
6. Itonggohon hanami hasoman na marhahurangan pangkorhon ni Covid-19. Sarihon Ham ma sidea haganupan janah pakei Ham ma na masa nuan on gabe panorang bannami pataridahkon hasirsironnami mangkaholongi hasomannami sonai mambotoh hinaharga ni hagoluhan na ilayakkon Ham hubannami. Ibagas idop ni uhur-Mu,
7. Tangihon Ham ma tonggonami Tuhan.
8. Ham Naibata paridop ni uhur, holong ma Ham tangihon Ham ma haganup na dob tinonggohonnami in hu Bamu, ibagas goran ni Anak-Mu na dob manggalangkon diri-Ni hubannami, Jesus Kristus Tuhannami.

P+J.    Amen.

 

 

11. Mandoding Haleluya No. 340 :1+5 (Irik patumpu galangan)

 

Huondoskon bani Jesus haganupan diringkon
Ia do pasangaponku sadokah bai goluhkon
Huondoskon ma, huondoskon ma.
Bani Jesus Sipaluah, huondoskon ma

Huondoskon bani Jesus daging pakon tonduyhon.
Domma ipaluah ahu, pujionku Goran-Mu.
Huondoskon ma, huondoskon ma.
Bani Jesus Sipaluah, huondoskon ma

 

12. Tonggo Galangan-Panutup-Pasu-pasu

 

1. Ondoskon hita ma galanganta hubani Naibata, martonggo ma hita:

Ham Tuhan Naibata Bapanami, domma ihopkop Ham hanami marhitei Jesus Kristus na mamorsan haganup dousanami. On pe, na roh do hanami hu Bamu martarimakasih anjaha mangkamalaskon haluahon ampa hata-Mu na dob ijalo hanami. Jalo Ham ma hanami ampa galangan na niondoskonnami, na gabe hataridahanni hatarimakasihonnami hu Bamu. Pasu-pasu Ham ma galangannami on gabe hadearon ni horja i tongah-tongah ni kuria-Mu. Sai tambahi Ham ma pasupasu-Mu, ase lambin margogoh hanami mangkorjahon horja na madear songon na pinangindo ni Jesus Kristus hubannami. Ibagas goran ni Anak-Mu Jesus Kristus, Tuhan janah Sipaluah jalo ham ma galangan pakon tonggonami. Amen.

Riap ma hita martonggo marhitei tonggo na niajarhon ni Tuhan Jesus hubanta:

 

P+J.     Ham Bapanami na i nagori atas. Sai na papansing ma Goran-Mu. Sai roh ma harajaon-Mu. Sai saud ma harosuh ni uhur-Mu i nagori tongah on songon na i nagori atas. Bere Ham ma bannami sadari on hagoluhan ari-ari. Sasap Ham ma dousanami songon panasapnami bani dousa ni hasoman na mardousa dompak hanami. Ulang hanami bobai Ham hu parlajouan. Paluah Ham ma hanami humbani pangagou. Ai Ham do simada harajaon, pakon hagogohon, ampa hasangapon sadokah ni dokahni. Amen.

1. Jalo hita ma pasu-pasu humbani Tuhan Naibatanta :

Idop ni uhur ni Tuhanta Jesus Kristus, pakon holong ni atei ni Naibata Bapa, ampa parsaoran ni Tonduy Na Pansing ma mangkasomani hita haganupan. Amen

 

P+J.     (Mandodingkon: “Amen”, Es=do )

           5  .   6  . 5     . 6   . 5 . 4 . 3 . . 0  

A – men A – men A –   men.