Jl. Pdt. J. Wismar Saragih Pematangsiantar
+62622 23676
info@gkps.or.id

TATA IBADAH PARNAIK NI TUHAN JESUS

GEREJA KRISTEN PROTESTAN SIMALUNGUN

TATA IBADAH PARNAIK NI TUHAN JESUS

Tata Ibadah Parnaik ni Tuhan Jesus 2020 final-1

 

Tema:

Ibohali Manghobaskon Horja na Madear. (2 Timoteus 3:17)

Sub Tema:

“Pasirsir ma Kuria in ase gabe Sipambobai na Toruh Maruhur, Sihabiari Naibata, Sibalosi Ajar, ibagas Biak na Madear, ase lambin Tarbarita Goran ni Kristus.”

.” (Matius 5:18-19; Markus 9:35)

 

  1. Votum-Introitus-Tonggo
  2. Ibagas goran ni Naibata Bapa pakon Tuhan Jesus Kristus ampa Tonduy Napansing sitompa langit pakon tanoh on. Amen. “ Jahowa do Raja, marpaheian hamuliaon do Ia. Marpaheian anjaha margonditkon hagogohon do Jahowa. Tongon, ipajonam do dunia on, seng anjai dugur. Totap do paratas-Mu humbani nabasaia, humbani mula ni mulani domma dong Ham” Hu Bani do galangkononnami goluhnami, hubani Naibata na talup sombahon pakon pujion ronsi sadokah ni dokahni. Haleluya,Haleluya,Haleluya.

P+K     (Mandodingkon) Haleluya,Haleluya,Haleluya

  1. Martonggo ma hita. Ham Tuhan Naibata Parkuasa ibagas Jesus Kristus na dob naik hu nagori atas. Pujionnami do Ham na markuasa janah na marhotak i harajaon-Mu. Ham do Naibata Jahowa na marmulia janah pintor, Raja ni sagala raja na markuasa bani sagala na adong. Roh do nuan hanami marsombah hu Bamu. Martarimakasih do hanami halani holong pakon hasintongan-Mu na totap talar i tongah-tongah ni dunia on. Ham Tuhan Sitompa sagala na dob adong pakon na adong nuan sonai na sihol adong ope, pujionnami do Ham janah padaskon tonggo hatarimakasihonnami bani sagala na dob ilayakkon Ham hubannami. Jalo Ham ma tonggo ampa parsombahonnami Ham Tuhan Naibata Alpa pakon Omega, Naibata na Pansing janah totap ronsi sadokah ni dokahni. Amen.

 

  1. Mandoding No. 79:1-3

Jesus Kristus in do Raja, ipabangkit Naibatanta
Manggomgomi hajojor, manggomgomi hajojor,
Janah ganup hajolmaon, ningon Bani do mar Tuhan
Iakuhon in botul, iakuhon in botul

Haganupan Malekat-Ni manlioti paratas-Ni.
Pasangapkon Raja in, Pasangapkon Raja in.
Na humbabou markuasa harajaon i tanohta.
Mangirikkon titah-Nin, mangirikkon titah-Nin

Naibatanta sahalak-Si, Jesus hansa usihan-Ni.
Anak pakon Bapa in, Anak pakon Bapa in.
Seng be morot paratas-Ni, seng marsibar be goluh-Ni.
Tong do gomgoman-Ni in, tong do gomgoman-Ni in.

 

  1. Hasasapan ni Dousa
  2. Bani na ipestahon hita nuan pardingatan Parnaik ni Tuhan Jesus Kristus, isadari hita do paboa pardalanan ni goluhta hotop do pataridahkon na hurang porsaya hita bani kuasa-Ni ibagas na mandompakkon dunia on. Halani ai dear ma haganupan hita mangaku janah mansopotkon dousanta i lobei ni Tuhanta pasal haporsayaonta na gati lang sadalan pakon pargoluhanta. Martonggo ma hita.

Roh do hanami nuan manrogop janah marsombah i lobei-Mu Ham Tuhan Naibata paridop ni uhur bani ari na marsangap on, mangakakuhon pakon mansopotkon dousa hurangni haporsayaonnami hu Bamu. Tongtong do idodingkon hanami pasal hagogohon ni kuasa-Mu bani ganup na tinompa-Mu, tapi  pandalankononnami hotop do pataridahkon hira na so adong kuasa-Mu dompak na masa na idompakkon hanami  khususni bencana pandemic Covid-19 nuan on. Ham Tuhan, urupi Ham ma hanami ase totap porsaya janah martenger ni uhur bani kuasa ampa hagogohon-Mu mangatasi sagala na masa janah ase totap hanami marpangarapan dompak hagoluhan na totap na dob ipasirsir Ham bannami. Amen.

Tangar anjaha haporsayai hita ma Hata ni Naibata, bagah-bagah pasal hasasapan ni dousa.

“Ia do pardearan pasaloseihon sagala dousanta, tapi seng pitah dousanta, tapi dihut do dousa ni haganup dunia on.”(1 Joh.2:2). Ibagas holong ni Naibata, domma isasap haganup dousanta. Halani ai, pataridahkon hita ma tanda-tanda ni pargoluhon na bayu. Hasangaponma bani Naibata i babou.

P+K     Amen

 

 

  1. Doding Haleluya No. 451:1-3

 

Sihol do uhurhu patimbulhon Ham Jahowa,
na pagoluhkon au pardousa
Sanggah na hudilo, goran-Mu lao mangurupi,
sirsir do Ham roh mambalosi
Itogu Ham do, au humbai lombang bagas,
in ma ianan hagolapan
Sai boban Ham ma au hu nagoriatas,
ase tongtong marhasonangan

Ganupan musuhku, seng ilopas Ham marmegah,
manangkut au baen jabolonni
Ipatudu Ham do, au bai dalan na gok tuah,
tongtong do Ham mangkasomani.
Itogu Ham do, au humbai lombang bagas,
in ma ianan hagolapan
Sai boban Ham ma au hu nagori atas,
ase tongtong marhasonangan.

Ham do patorsahon, pardalanan ni goluhku,
ase ulang ahu tarbador
Ham do parlingodan, dolog batu baen gantarhu,
ase boi au marmalas uhur
Itogu Ham do, au humbai lombang bagas,
in ma ianan hagolapan
Sai boban Ham ma au hu nagori atas,
ase tongtong marhasonangan

 

  1. Hata Haporsayaon

P          Saksihon hita ma haporsayaonta in, songon na sinaksihon ni haganup halak na porsaya bani sab tanoh on!

P+K    Ahu  porsaya  bani  Naibata  Bapa,  Pargogoh  na  so  tarimbang,  na manompa langit pakon tanoh on. Ahu porsaya bani Jesus Kristus, Anak ni Naibata na sasada in, in do Tuhanta, na tinubuhkon ni si Maria sanggah nape haliaban, marhitei Tonduy Na Pansing. Na manaron na parngit, bani panorang ni si Pontius Latus, iparsilangkon, matei anjaha itanom, turun hu nagori toruh. Mulak manggoluh humbani na matei bani ari patoluhon. Naik hu surga anjaha hundul i siamun ni Naibata Bapa, Pargogoh na so tarimbang in. Hunjai ma Ia mulak magira laho manguhumi halak na manggoluh pakon na dob matei. Ahu porsaya bani Tonduy Na Pansing, bani Kuria parsadaan na mapansing in, parsaoran ni sagala na mapansing in, bani hasasapan ni dousa, bani parpuhoon ni angkula, pakon bani hagoluhan na sadokah ni dokahni. Amen.

 

  1. Doding Haleluya No. 381:1-2+4

 Ringgas au pararatkon Hata-Ni Tuhan in,
ronsi hasangapon-Ni, ge holong uhurNiin.
Ambilan siharganan, Hata ni Tuhan in,
pasonang paruhuran ampakon Tonduy in.
Tongtong do marmulia barita ni Tuhanta,
sai lambin tarambilan Goranni Tuhan in.

Ringgas au mangkatahon Hata ni Tuhan in,
buei do halonganan humbani na hinan
Dihut ma au marulih bai hasonangan in,
janah huhaporluhon mangambilankon in.
Tongtong do marmulia barita ni Tuhanta,
sai lambin tarambilan Goranni Tuhan in.

Sai tong marhagogohon, Hata ni Tuhan in,
totap do in manggoluh humbani na hinan
Ai in manogu ahu hubani Bapa in,
ijin ma da igoki malas ni uhurhin
Tongtong do marmulia barita ni Tuhanta,
sai lambin tarambilan Goranni Tuhan in.

 

  1. Ambilan : Markus 16:15-20 (Ephorus GKPS)
  • Martonggo
  • Mambasa Teks

Horja na iparentahkon Jesus hubanta aima pajongjongkon Harajaon ni Naibata marhitei na mangambilankon Ambilan Namadear, aima barita malas ni uhur pasal rekonsiliasi atap pardameian ni jolma pakon Naibata marhitei Jesus Kristus. Ambilan Namadear ai aima sada proklamasi na marisihon hamonangan. Ai ma hinorhon ni parpuhoon ni Kristus na dob monang humbani hamateian na gabe inti ni barita malas ni uhur atap Ambilan Namadear.

Adong do piga-piga parhara na porlu iparimbagaskon hita marrhitei ambilan on:

  • Hubani ise do sidea maningon mangambilankon Ambilan Namadear. Bani panorang ai, na iarusi sidea aima paboa sidea iutus pitah hubani biribiri na magou humbani keluarga Israel, anjaha lang ilopas sidea misir hubani halak parbegu atap hubani halak  Tapi sonari, horja ni sidea domma lambin ipabolag. Ibere do hubani sidea wewenang laho misir hu sab dunia on mangambilankon Ambilan Namadear pasal  Kristus hubani  haganup  makhluk pakon hubani sagala bangsa.

Sidea pakon susian-susian na legan na bueini pitu puluh halak, sonai pakon sidea na hunjai nari itambahi janah lambin itambahkon use. Haganup do tardilo laho mangambilankon ambilan malas ni uhur ai hu sab dunia on ibagas hapongkuton. Ambilan malas ni uhur ai lang pitah gabe  hiburan semata, tapi aima sada tonah banggal humbani Tuhan hubani jolma. Ambilan Namadear na dob ijalo, ipangindohon do  ase ipabotohkon use hubani halak na legan. Ai ma na igoran misi universal, na halani ai maningon manjalo sambutan universal homa.

  • Aha do isi ni Ambilan Namadear na maningon iambilankon sidea? Sidea maningon patugahkon paboa jolma marianan do ibagas keadaan sengsara pakon bahaya halani iparjabolon munsuh-munsuh ni sidea. Tapi anggo porsaya sidea bani Ambilan Namadearl, janah mangondoskon diri ni sidea gabe susian ni Kristus, jumpahan haluahon do sidea humbani panlanggaron ampa dousani. Bani ayat 16 isobut paboa pandidion aima tanda bani halak na dob gabe milik ni   Tapi dong do homa na porlu ipardiatei hita bani ayat 16 on, aima paboa age pe sasahalak domma ididi tapi anggo seng porsaya, lang jumpahan haluahon. Pakon hata na legan boi irimpunhon paboa pitah marhitei haporsayaon do sasahalak boi sintong-sintong parsimada bani haluahon.
  • Hagogohon atap kuasa na sonaha do na maningon imiliki sidea laho pajongjongkon Harajaon ni Naibata? Lang mararti paboa ganup halak boi manjalo hagogohon, tapi piga-piga do hansa, aima pitah halak na porsaya tumang do. Ambah ni ai, margogoh do sidea pataridahkon tanda hagogohon pakon kuasa ampa halongangan ibagas goran ni Jesus, goran na gabe onjolan ni pandidion ni sidea. Piga –piga humbani sidea  memiliki sibere-bere na  khusus: mangusir  setan, marsahap bani sahap na baru, pakon manjolom ulog – songon na dob igoki ibagas diri ni  Paulus, na so pala mahua age pe manjolom ulog na marbisa i tanganni (Lahoan ni Apostel 28:5-6). Buei do nuan jolma na mangarapkon tanda, tapi sidea lang ra mangambilankon Ambilan Namadear. Bani Bibel, ibere Jesus do usihan paboa parlobei do Ia mambaritahon Ambilan Namadear, anjaha hata na dob binaritahon-Ni haporsayaon ai ma na parohkon kuasa ni Naibata turun hubani jolma. Artini haganup Siparambilan na mangambilankon Ambilan Namadear janah marhaporsayaon, jumpahan hagogohon do laho mambahen na madear dompak halak na legan anjaha manjalo sagala hadearon humbani Tuhan.

Dob salosei Tuhan Jesus padaskon ganup tonah ai, naik ma Ia hu surga. Porsaya do hita paboa Jesus lang pitah  memiliki kuasa, tapi manjalo pintu na ungkab do homa laho masuk hu harajaon-Ni i surga. Ia ialo-alo marhasoman sora na lurlur humbani bala tentara surga, anjaha hundul i siamun ni Naibata Bapa na pataridahkon sonaha martabat pakon hadaulaton-Ni. Marhitei parnaik ni Jesus hu surga,  gabe marsangap anjaha marmulia ma Ia marhasoman hasangapon pakon hamuliaon-Ni hinan.

Bani ayat parpudi ipatalar do paboa  Kristus isambut janah ijalo i dunia on marhitei susian-susian-Ni  na pongkut marhorja Bani; misir do sidea anjaha marambilan bani ganup ianan, na dohor pakon na daoh. Age pe ambilan na iambilankon sidea maralo pakon harosuh ni dunia pakon ganup hauntungan parduniaon, tapi haganup parambilan na mambaritahon ambilan malas ni uhur ai lang ongga mabiar pakon maila. Pongkut tumang do sidea mambaritahon Ambilan Namadear, na halani ai aloling ni sora ni sidea gabe tarsar janah das do hu ujung ni dunia on (Rom 10:18).

Tugas ni Gereja das hubani panorang on lang marubah. Maningon do totap hita mambaritahon Ambilan Namadear janah tanda-tanda halongangan ai pasti do mangkasomani hita. Gareja nuan on maningon do mamorluhon masa-masa persiapan paima mangambilankon Ambilan Namadear. Lang porlu be ipangindo hita  pencurahan ni  Roh Kudus, halani sasintongni  Roh Kudus domma iuseihon  2000 tahun na salpu bani panorang Pentakosta. Hansa na porlu aima paboa Gereja maningon do manggoluh janah  taat ibagas Hata ni Naibata, laho  mereformasi dunia, menghancurhon penyembahan berhala, ampakon mamboban hamubahon ni uhur bani ganup halak pardousa. Dong do banta Naibata na totap marhorja ibagas gok holong na mambahen haganup horjanta marhasil janah marbuah. Ijai ma hita boi mambahen buei hadearon na lambin buei janah lobih banggal use bahen hamuliaon ni Kristus ampa hadearon ni jolma manisia.

Age pe panorang on tarlanglang hita ibagas ganup aspek binahen ni covid-19, ijalo hita do kenyataan na paet on gabe ujian na pasti sihol do ihamonangkon hita marhasoman pangurupion ni  Tuhan. Covid-19 na dob idompakkon hita hurang lobih tolu bulan on, ninuhur aima sesuatu na laho mamparsiapkon ampa membentuk hauhuronta ase mampu gabe pemberita Firman na setia dan taat. Perayaan Parnaik ni  Tuhan Jesus na ipestahon ganup  Gereja i sab tanoh on panorang on, bani ari Kamis, aima air paompatpuluhkon dob Paskah, aima panorang na igoki kesulitan pakon tantangan akibat ni virus corona na marbahaya. Tapi  bani perayaan ari parnaik ni Tuhan on, ipagolpa do hita paboa hita lang  sendirian. Totap do Tuhan rap pakon hita janah gabe hasomanta. Sadokah hita taat pakon pambalosi, lang porlu hita gobir janah mabiar mandompakkon  hamaholon halani somalni banggalan do  kekhawatiran marimbang kenyataanni. Seng dong na porlu sihabiaran marhasoman Tuhanta na dob monang in. Amen.

  • Martonggo
  1. Galangan

Prb.      Paima iondoskon hita galanganta, tangar hita ma lobei Hata ni Naibata na gabe onjolan banta laho manggalang, aima na tarsurat bani:  Psalmen 50:14: “Galangkon ma banggal ni uhur bani Naibata, anjaha galari ma bagah-bagahmu bani Sitimbulan in”.

  1. Tonggo Pakon Doding Galangan

Prb.      Ham  Tuhan  Naibata  Bapanami,  paridop  ni uhur,  harohan  ni sagala  pasu-pasu.   Tarima  kasih  ma  isombahkon   uhurnami hu  Bamu  halani  hun  Bamu  do  ijalo  hanami  pasu-pasu  na gokan dear pakon na laingan. Bani panorang on isombahkon hanami do hu Bamu na gabe galangannami, dirinami pakon humbani  hinadongannami  na  dob  binere-Mu  in.  Pasu-pasu Ham ma galangan na sinombahkonnami on, gabe galangan na mapansing, na mambahen harajaon-Mu lambin marhataridahan i  dunia on. Ungkab  Ham ma uhurnami marhitei Tonduy-Mu, ase lambin ididah, ibotoh janah ihamalaskon uhurnami buei ni silayak-layak-Mu, na dob ijalo hanami pakon na sihol bereon-Mu ope hu bannami. Ajari Ham ma hanami laho mangondoskon galangannami na patut galangkononnami  hu Bamu. Jalo Ham ma  galangan  pakon  tonggo  elek-eleknami  on,  ibagas  Jesus Kristus Tuhannami. Amen.

Prb+K (Mandodingkon) Haleluya No. 12:3

Tonduy, daging uhur ampa gogohniin.

Ulang bai na sambor, sai Bamu ma in!

Ningon gok Bamu ma au hinopkop-Mu.

Ase saud martuah au jabolon-Mu.

  1. Tonggo Panutup

Prb.      Ham Tuhan Jesus Kristus, na dob naik hu nagori atas janah hundul i siamun ni Naibata Bapa in. Malas do uhurnami mardingat na dob saud do haganup sura-sura ni Naibata Bapa laho mambere haluahon hubani dunia on aima marhitei na dob saud Ham naik hu nagori atas mulak hubani hasangapon-Mu. Domma ipabangkit Ham gabe Raja ni sagala raja janah gabe Malim Bolon mangapiti sagala na porsaya, ase parrupei bani hagoluhan na sodakah ni dokahni. Pargogohi Ham ma hanami kuria-Mu ase totap mangarap janah marhaporsayaon hu Bamu. Pasu-pasu Ham ma homa sagala horja ni kuria-Mu, ase lambin doras parrarat ni harajaon-Mu.  Maidop ma uhur-Mu, jalo Ham ma tonggonami on, ibagas Jesus Kristus Tuhannami.

  1. Tonggo Ham Bapanami

Prb.      Ham Bapanami na i nagori atas. Sai na papansing ma Goran-Mu. Sai roh ma harajaon-Mu. Sai saud ma harosuh ni uhur-Mu i nagori tongah on songon na i nagori atas. Bere Ham ma bannami sadari on hagoluhan ari-ari. Sasap Ham ma dousanami songon panasapnami bani dousa ni hasoman na mardousa dompak hanami. Ulang hanami bobai Ham hu parlajouan. Paluah Ham ma hanami humbani pangagou

Prb+K (Mandodingkon) Ai Ham do simada harajaon, pakon hagogohon ampa hasangapon sadokah ni dokahni. Amen.

  1. Paingkatkon

Prb.      Laho ma nasiam, janah “papansing nasiam ma Kristus Tuhan in ibagas uhurnasiam, tongtong ma nasiam sirsir patorangkon bani haganup halak na manungkun nasiam pasal onjolan ni pangarapan nasiam”  (1 Petrus 3:15)

  1. Pasu-pasu :

Prb.      Jalo ham (hita) ma pasu-pasu humbani Tuhan Naibatanta:

Ipasu-pasu anjaha iparorot Tuhan Naibata ma ham (hita). Isondangkon Tuhan Naibata ma bohi-Ni hu bamu (hu banta) janah maidop ma uhur-Ni mangidah ham (hita). Idompakkon Tuhan Naibata ma bohi- Ni hu bamu (hu banta) janah ipasorap ma damei-Ni bani tonduymu (tonduyta bei). Amen.

Prb+K (Mandodingkon) Amen…Amen….Amen

Tinggalkan Balasan

Alamat email Anda tidak akan dipublikasikan.