MARSIPAGOLPAAN LAHO MARHASADAON
Heber 10:25
“Anjaha ulang ma tadingkon hita partumpuanta, songon na dob somal bani
deba halak, tapi lambin marsipagolpaan ma hita, halani na lambin dohor
ma ari ai iidah nasiam.”
Selaku jolma na itompa Naibata usih hubani rupa-Ni, itubuhkon Naibata do
bani dirinta porlu ni uhur laho marparsaoran janah ahap sihol tarhira bani hasoman. Sada
penelitian patugahkon paboa parbuei ni jolma na putus asa, mandalankon kekerasan
dompak niombah, mangkorjahon hajahaton, lambin taridah do ijin na lang jumpah be
hasadaon pakon sihol ni uhur marparsaoran pakon hasoman. Sahalak panurat mangkatahon,
“Pamunjungon aima munsuh ni hajorgiton parangkulaon ampa paruhuran”.
Bibelta buei manobut pasal hinaporlu ni na marparsaoran. Ihatahon Naibata
do humbani mula ni mulani paboa “Seng dear jolma in punjung” (1 Mus. 2:18). Paulus
mangkatahon, “Nasiam do badan ni Kristus in, anjaha pagori do nasiam samah nasiam” (1
Kor. 12:27). Seng boi hatahonon ni sada pagori hubani pagori na legan, “seng benahangku
ho” (1 Kor. 12:21). Halani ai hita itompa sedo laho manggoluh ibagas hapunjungon tapi laho
marsaor janah bani parsaoran ai do boi tarsuhuni sihol ni uhur gabe tarhira bani hasoman
janah gabe sada pagori ibagas hasadaon.
Halani ai ayat bulanan on mangojur hita ase mangkaporluhon partumpuan pakon
parsaoran na marnunut janah tupa, riap pakon hasoman sahaporsayaon. Pahara on lang
pitah sada siparayakon atap sura-sura na laingan tumang, tapi adong do halani mase porlu
ihorjahon horja na sisongon on. Marhitei na marsaor pakon hasoman sahaporsayaon do
boi lambin marbanggal janah ipauli-uli homa haporsayaonta. Parsaoran pakon hasoman
sahaporsayaon boi do homa mambere gogoh pakon hinsah ni uhur banta mandalani goluh
na igoki hamaholon pakon sitaronon on. Ibagas parsaoran pakon partumpuan na dear do
homa boi ipataridahkon hita sonaha hita mamorluhon hasomanta janah hasomanta pe
mamorluhon hita. Parsaoran pakon hasadaon parohkon malas ni uhur pakon pasu-pasu do
bani kuria ni Naibata.
Domma ipasirsir Naibata dalan banta laho manggoki sihol ni uhurta laho
marparsaoran marhitei hasadaon pakon na marsipagolpaan. Halani ai toruskon hita ma
mambere dirinta dihut bani dalan ampa kesempatan na madear ai. Amen.
