TONAH NI PIMPINAN SINODE GKPS BANI PENTAKOSTA/PESTA SEKOLAH MINGGU GKPS 2022

 

TONAH NI PIMPINAN SINODE GKPS BANI PENTAKOSTA/PESTA SEKOLAH MINGGU GKPS 2022

Marhasoman semangat ampa hagogohon ni Tonduy Napansing hatahononnami ma: “Selamat Pentakosta” pakon “Selamat Pesta Sikolah Minggu GKPS ” hubani nasiam haganupan hasoman sahaporsayaon i Kuria on. Bani panorang malas ni uhur banggal on, sihol do hanami manisei nasiam marhitei na padaskon piga-piga panotap:

  1. Pos do uhur bahasa tongtong do hita mambere perhatian na gok dompak dakdanak Sikolah Minggu selaku pagori na lang terpisahkon humbani Gereja ampa na gabe salah sada hataridahan ni horja ni Tonduy Napansing. Domu hujin, talup do hita mangkatarimakasihkon pakon mangkamalaskon pardalanan ni Seksi Sekolah Minggu GKPS na dob jongjong gabe sada seksi kategorial i GKPS mamungkah humbani tahun 1968.
  2. Malas do homa uhur mangidah perhatianta na lambin banggal dompak Seksi Sikolah Minggu, tarlobih bani panorang parpudi on. Lambin martambah do bilangan ni kurianta na marusaha pasirsirhon na porlu bani Seksi Sekolah Minggu, songon gedung Sekolah Minggu sonai age sarana pendukung na legan bahen peningkatan ni pangidangion dompak sidea.
  3. Ihaporsayai hita do paboa dakdanak ai ma silayak-layak ni Naibata na iondoskon hubanta. Halani ai, pagodangkon sidea lang sungkup pitah pasirsirhon sipanganon, parhiouon ampa haporluanni siganup ari, tapi dihut do mangajari pakon manogu-nogu sidea ase lambin marbanggal ibagas panandaion hubani Tuhan. Padihutkon dakdanak Sikolah Minggu bani bagei ni horja i tongah-tongah ni Kuria anjaha lang mangolati keterlibatan ni sidea, ai do gabe dalan banta laho mambohali sidea ase gabe sipardihut ampa sipartanggungjawab bani pardalanan ampa pargoluhon ni Kuria sonari ampa panorang na sihol roh.
  4. Hubani nasiam haganup dakdanak Sikolah Minggu GKPS i Kuria on, iojur hanami ma ase: a) Pakei ma goluhmu laho mangkorjahon horja na madear ampa na marguna laho mangayaki sura-sura na madear marhasoman hagogohon na humbani Tuhan; b) Pargunahon ma panorang na ibere Tuhan laho marlajar ampa melatih diri ase dapotan hapentaron ampa habotohon na humbani Tuhan; c) Haporluhon ma parsaoran pakon Tuhan marhitei na pongkut marsikolah Minggu laho manangihon Hata ni Tuhan; d) Gabe dakdanak na bujur ma nasiam, sibalosi podah ni orang tua sonai guru ampa sipangajari, ase boi gabe jolma na marguna anjaha gabe pasu-pasu i lobei ni Tuhan sonai age hasoman jolma.

Tonduy Napansing ma na tongtong manramotkon pakon mampargogohi sonai pahinsahkon uhur nasiam mandalani pargoluhan ampa haganup na masa. Horas.

 

Pimpinan Sinode GKPS

 

Pdt. Dr. Deddy Fajar Purba
Ephorus

Pdt. Dr. Paul Ulrich Munthe
Sekretaris Jenderal

 

Updated: 5 Juni 2022 — 04:37