Minggu : 9 April 2023 ( Paskah I )
Nas Ambilan : Lukas 24:1-12
Usul doding : Haleluya No. 73 :1-3
Tema : Puho Jesus Bani Ari Patoluhon
Tujuan : Ase ganup bapa mardingat bahasa Jesus tongon domma
puho humbani hamateian.
DOMMA PUHO JESUS
Kuria ni Tuhan,
Tontu ibagas na pusokan uhur do hita anggo salah sada orangtua, anggota keluarga na ihaholongi uhurta marujung goluh atappe matei ia. Halani lang boi be adong parjumpahanta, magouan ma hita. Tapi Jesus anak-Ni Naibata age pe domma matei Ia i hayu parsilang, i dolog Golgata. Dob honsi matei Ia i hayu parsilang, ipaturun ma bangkei ni Jesus anjaha imasukkon hu tanoman. Sonaha do paruhuran ni naboru-naboru pakon susianni Jesus panorang ai? Ibagas na pusok do uhur ni sidea anjaha mabiar sidea pe dihut itangkap janah ibunuh tentara Romawi. Halani biar janah gobirni, sidea pe marponop. Janah bani ari parlobei dob Sabat laho do naboru-naboru ai hu tanoman ni Jesus. Laho mangidah bangkei ni Tuhan Jesus i tanoman ai. Hunjin boi iidah hita bahasa parohkon pusok ni uhur pakon gobir do hamateian ni Jesus ai. Tapi maronjolan hubani nas PA minggu on aima Lukas 24 on itulishon do bahasa marhitei parpuhoon-Ni Jesus domma italuhon TUHAN in kuasa ni dousa ampa hamateian. Adong tolu pahara na boi iparlajari hita humbani bagian on.
Naparlobei, naboru-naboru na roh hu tanoman bani ari parlobei dob Sabat na mamboan rium-riuman na sihol ipadas sidea bani bangkei ni Jesus; tapi ternyata batu panutup ni tanoman ai domma gulang anjaha lang adong be iidah sidea bangkei ni Tuhan Jesus. Tarsonggot janah jut do uhurni sidea. Tapi adong do roh dua Halak malekat (ayat 4) roh marsahap hubani sidea: “mase ipindahi nasiam na manggoluh bani iananni na matei? Seng ijon be Ia domma puho. Ijin iidah hita adong parsahapan antara naboru-naboru ai pakon dua halak malekat ai. Ipadas malekat ai do homa hata-Ni Tuhan na ongga ipadas bani sidea sanggah i Galilea sidea hinan rapkon Jesus. Anjaha bani ayat 8 itulishon do bahasa idingat naboru-naboru ai do Hatani Tuhan in. Anjaha isaksihon naboru-naboru ai do bahasa na dob puho Jesus humbani na matei.
Hita bapa na hinaholonganni Tuhan,
Sonai do age hubanta sonari on. Buei do hita bapa na ihaholongi Tuhan. Age marhitei holongni Tuhan ibere hasoman saparangguan na sirsir padashon hata-Ni hubani bapa sinrumahni bei. Na gabe sungkun-sungkun hubani hita bapa, Porsaya do hita hubani Hatani Tuhan, tarlobih bani parpuhoon-Ni Tuhan Jesus? Malas uhur bani pangakuanta, porsaya do hita na dob puho do Jesus, italuhon do kuasa-Ni dousa marhitei parpuhoon-Ni.
Anggo sanggah idompakhon hita paruntolon, naborit pakon na legan anggo lang mangidah Tuhan na dob puho ai hita, totap ma hita ibagas pusok ni uhur. Tapi marhitei na mangkawah hita bani Tuhan Jesus na dob puho ai, lang adong be pusok uhurta tapi malas uhur mando halani parpuhoonni aima tandani Tuhanta Jesus ai aima na manggoluh.
Na paduahon, porsaya age pe lang iidah. Susianni Tuhan Jesus bani na manangar barita na ipadas 3 halak naboru na mulak hun tanoman na patugahkon bahasa domma puho Jesus, lang porsaya lobei si Petrus. Anjaha marlintun do ia laho hu tanoman ai laho mangidah sintong atap lang hasaksianni Maria Magdalena, Johana ampa Maria inang ni Jakobus, ai hira turi-turian do ianggap susian pakon apostel ai. Tapi marhitei pangurupionni Tonduy Napansing in gabe porsaya do susianni Tuhan Jesus na dob puho do Jesus humbani hamateian janah dihut do sidea mambaritahon pasal Jesus na dob puho in hubani hasoman na legan. Sonai do homa hubanta ganupan marhitei gogoh-Ni Tonduy Napansing age pe lang iidah hita Tuhan Jesus na dob puho ai secara pardagingon tapi porsaya hita na dob puho Jesus.
Hita haganupan,
Na patoluhon, tanoman na lumei aima tanda ni Jesus domma puho humbani na matei. Parpuhoonni Tuhan Jesus pataridahkon bahasa tongon do Jesus ai Tuhan. Anjaha maningon parohkon komitmen na baru bani ganup na porsaya Bani ase lang be ibagas hagobiron ampa pusok ni uhur, halani Tuhan aima Raja iatasni sagala raja. Isuruh do susian ai sonai hita ase manggoluh ibagas komitmen na gok. Halani marhitei perayaan Paskah mararti domma monang Tuhan Jesus mantaluhon hamateian. Lang be mabiar hita bani hamateian, isi hita ma goluh na ibere Tuhan hubanta bei marhitei horja na madear. Tanda ni na manggoluh do Tuhan na isombah hita anjaha Tuhan na ibaritahon hita aima Tuhan na manggoluh. Halani ai Kristus Tuhan na ihaporsayai hita ai domma mambere hagoluhan na sadokah ni dokahni hubani ganup na porsaya Bani. Sadihari do jumpah hita ai? Dob honsi matei do hita? Lang atene. Tapi jumpah sonari marhitei na pataridahkon pargoluhon na marpangajaman bani TUHAN ibagas parsaoranta pakon Tuhan sonai age pakon hasoman jolma ibagas hasintonganni Tuhan. Secara khusus bani pargoluhonta bapa. Lang sangkut bani halilian na so marguna bani diri sandiri sonai hubani keluarga ampa kuria. Tapi goluh na adong tujuan na sintong.
Ase marhitei ambilan bahan PA ni hita sadari on marhitei parpuhoon ni Jesus humbani na matei. Ibagas semangat pakon komitmen na baru ma pargoluhonta tarlobih bapa GKPS. Ase goluhta lang pitah untuk hita sandiri tapi dihut ma bermakna hubani TUHAN, hubani keluarga sonai hubani hasoman na legan. Tuhan mampargogohi hita gabe saksi-saksi pasal parpuhoon-Ni. Selamat paskah. Tuhan Jesus mamasu-masu. Amen.
