Renungan PA BAPA Minggu 16 April 2023 Quasimodogeniti
Nas Ambilan : Psalmen 46:9-12
Usul doding : Haleluya No. 138 : 1-3
Tema : Aman bani panramotion-Ni Tuhan
Tujuan : Ase kaum Bapa ibagas mandalani pargoluhonni lambin
Mambangun Parsaoran na orod pakon Tuhan.
Judul Tulisan :
PARGOLUHON NA TOTAP OROD PAKON TUHAN
Kuria na ihaholongi Tuhan,
Bani bagei-bagei haporluan pargoluhon ni jolma, salah sada na porlu tumang aima adong rasa aman. Aman bani goluh parrumahtanggaon, perekonomian, parsaoran baik na i huta sonai age na i kota. Bani hata na legan aman bani mandalankon keagamaan, sosial, ekonomi, budaya, politik dan hukum. Marhiteihon na adong pahara-pahara na sonin pasti age pikiran pakon paruhuran pe tenang ma homa. Tapi agepe sonai, lang mintor boi secara otomatis terjadi na sonin bani goluh ni halak na porsaya bani Tuhan. Bani kenyataan na idompakhon hita sehari-hari, bagei-bagei do bahaya pakon hasosakan sonai age hamarsikon. Sadalan hubani nats bahan PA ta on, ipatangkas hubanta bani zaman ni Parpsalmen on, bangsa-Ni domma homa mandompakhon bahaya, hasosakan halani adong parporangan. Tapi boi do aman goluhni sidea lang gobir anjaha maluah do sidea humbani bahaya pakon hasosakan ai.
Psalmen 46 on isuratkon ginompar ni si Korah. Ginompar ni si Korah aima kelompok halak Levi na martugas gabe pandoding pakon panjaga pintu rumah panumbahan i Jerusalem bani zamanni Raja Daud pakon Raja Salomo. Gambaran na sihol ipadas marhitei Psalmen on aima pasal hagogohon pakon panramotionni Tuhan hubani halak na mandompakhon hasosakan. Haganup hamaholon pakon tantangan na sedang pakon na sihol idompakhon ai songon laut na marhasak, ”ribut pakon marguboh bahni”. Bani panorang na basaia, laut na marhasak manlambangkon kuasa hajahaton na mangganggu pakon parsedahon manisia. Kuasa hajahaton ipausih pakon dewa penguasa laut, na markuasa mambahen hasedaon hubani manisia. Tapi riap pakon Parpsalmen hita ibobai ase patoguhkon haporsayaonta hubani Tuhan. Tuhan mangendalihon haganup kejadian na i atas tanoh on.
Iojur parpsalmen do hita ase mangidah horja ni Jahowa na parohkon songgot-songgot i atas tanoh on, na pasohkon parmunsuhan das hu ujung ni tanoh on, na mambahen marponggolan sior, maropuk tanja, na manutungi gareta porang ibagas apuy. Anggo marosuh Tuhan pasohkon parmunsuhan na adong antara sada bangsa hu bangsa na legan, boi do ibahen-Ni anjaha marhitei ai gabe adong ma damei. Anjaha parmunsuhan ai ipasoh das hu ujungni tanoh on, sipata halani holong-Ni hubani bangsa-bangsa ase boi sidea marhosah. Dob honsi bois hosahni sidea halani marporang sada hubani na legan. Kedua belah pihak mungkin domma loja , anjaha sihol pasohkon parporangan ai. Dalan mardamei idarami bani kedua belah pihak.marhitei na ipasoh Tuhan parporangan ai mambahen gabe aman ma bangsa-Ni. On pe pataridahkon keamanan pakon jaminan damei hubani kuria, mambahen sior marponggolan, tanja maropuk, gareta porang pe itutung ibagas apuy. Ai haganupan aima horjani Tuhan, na maningon iidah hita janah ihatarimakasihkon hita bani pambahenan-Ni na gok halongangan in. Bani na dob ipasoh Tuhan parporangan ai na mambahen gabe dear parsaoran iojur do homa ase itanda hita Naibata na timbul i tongah-tongah ni bangsa-bangsa, timbul i tanoh on. Anjaha Jahowa Zebaot do hasomanta anjaha batar-batarta. Hita na mambahen Tuhan gabe batar-batar lang mabiar hita, Tuhan do na mangkasomani ampa na manramotkon hita.
Sadalan hubani goranni Minggunta aima Quasimodogeniti – minggu dob honsi Paskah – na artini aima ”songon dakdanak na baru tubuh”. Ipaingat do hita maningon songon dakdanak na baru tubuh horahan bani tadah, hita maningon horahan bani Hata ni Tuhan, pakon mamparimbagaskon ai, ase haporsayaonta lambin marurat, marbulung pakon marbuah.
Hita haganupan bapa na ihaholongi Tuhan,
Adong piga-piga pangajaran na boi ijalo hita marhitei nats bapa sadari on. Na parlobei aima ase haporsayai hitama Tuhan ampa marpangajaman hubani Tuhan ma hita ibagas sagala situasi ni pargoluhonta. Napaduahon, lobei ma hita martonggo pakon mangindo hapentaran na humbani Tuhan ibagas na laho mambahen haputusan hita. Na patoluhon, ringgas ma hita mambasa Bibel pakon martonggo ampa mamparimbagashon Hatani Tuhan bani ganup ari. Marhitei cara na sonin in haporsayaonta hubani Tuhan lambin toguh pakon lambin orod ma parsaoranta pakon Tuhan in. Na paompathon, situasi boi do manjadi lambin parah pakon mambahen gobir, tapi sadokah Tuhan do na gabe batar-batar, ulang mabiar hita.
Tuhan simada tanoh on, na markuasa iatas ni sagala kuasa mangkasomani hita. Na mararti do ai haganup tanoh on pakon isini sir-sir do mambalosi parentah-Ni, pakon mamakei sidea sadalan hubani harosuh-Ni, na gabe alatni bani tindakan pengadilan-Ni atappe tindakan holong ni atei-Ni. Tuhan ai i tongah-tongahta, marhorja riap pakon hita, pakon domma marjanji Ia lang ongga itadingkon-Ni hita. Haganup tanoh on pakon isini boi manlawan hita, tapi hita lang porlu mabiar hubani sidea halani Tuhan simada tanoh on pakon isini totap do rap pakon hita. Tuhan Jesus mamasu-masu hita haganupan. Amen.
