Minggu : Kantate, 07 Mei 2023
Nas : Kisah Para Rasul (Lahoan ni Apostel) 16 : 19 – 34
Usul Doding : Buku Haleluya 307 : 1 – 3
Tema : Nyanyian Pujian yang Mengubahkan Hidup
Tujuan : Agar Kaum Bapa semakin giat memuji Tuhan dalam hidupnya.
Judul : Gogoh ni Pamujion Hubani Naibata
Nasinusunni : Pdt. Liharson Sigiro
- Parlobeini
Anggo adong sasahalak mangkatahon, “Puji Tuhan”! Naha do manurut hita, hajongjongan ni pargoluhan ni ai? Balos pasal on, ra do podas ibalosi hita, bahasa pargoluhan ni sasahalak na boi ia mangkatahon “Puji Tuhan”, aima pargoluhan na marhamonangan. Umpamani monang humbani parsikolahan, monang humbani ujian pakon monang humbani parlajouan. Sonai ma na somal pangidah ni hajolmaon. Tapi na gabe sungkun-sungkun banta, adong do kira-kira halak na mangkatahon “Puji Tuhan”, hape keadaan ni pargoluhannni lang marhamonangan? Suhar humbani na marhamonangan aima pusokan uhur, boritan, lang dapot na pinarsinta pakon na legan.
Bani haduasi hajongjongan na i atas in, age sanggah dapotan pakon lang dapotan atap lape dapotan pasu-pasu bani pargoluhan on, aha do pangkorhonni ai banta? On ma nasihol patangkason bani PA santorap on. Marhitei pengalaman rohani Paulus sanggah na tartangkap ia pakon si Silas. Naha tongon hita bani pargoluhonta on, adong do iahapkon hita mampangkorhon bani dirinta sonai homa age bani halak na legan sanggah goluhta on manggoluh mamuji Tuhan Naibata?
- Pargoluhan ni Halak na Mamuji Naibata : Tarjalosi Do Sonaha Goluh ni Halak Adong(ayat 19 – 24)
Marhitei ayat 20 das hubani ayat 21, Paulus pakon Silas ituduh do mangkorjahon na lepak mambahen hona uhum sidea. Nini sidea, “Halak Jahudi do halak on, na manggeori hutanta on. Ibaritahon sidea do adat na so bulih jaloon barang horjahononnami, ai halak Rom do hanami”. On ma mambahen gabe halak na tartuduh (patut si uhumon) Paulus pakon Silas.
Tapi age pe sonai, anggo itonggor hita bani ayat 25 bani bahan PA-nta on, martonggo, mamuji Naibata do anggo si Paulus pakon Silas bani hajongjongan ni sidea na lang pantas ai hona uhum. On ma mambahen mampangkorhon bani angkula sonai homa age hauhuron ni Paulus pakon Silas. Halani pamujion ni sidea ai bani Tuhan Naibata bani namasa bani pargoluhan ni, age pe itodoh sidea na lepak hape sasintongni lang adong na lepak ibahen sidea, boi do tarjalo sidea sonaha pargoluhan ni halak na marladung ai.
On ma barita malas ni uhur ai banta, age pe hape sonaha pambahenan ni halak dompak hita, anggo goluhta goluh na totap mamuji Tuhan, ai do mambahen marhagogohon goluhta on laho manjalo sonaha hasomanta adong.
- Pargoluhan ni Halak na Mamuji Naibata : Totap do Marondos Hubani Tuhan Bani Masa-masa Krisis (ayat 25)
Satorusni, bani pargoluhan ni halak na tongtong mamuji Tuhan bani hagoluhanni, pangkorhonni hape taridah do ai bani ayat 25 aima totap do pos hauhuronni marondos hubani Tuhan Naibata bani masa krisis. Paulus pakon Silas, ituduh sidea parladung, ilonsingi idabuh hu tutupan parbagas anjaha poltik ma ibayangkon (membelunggu kaki mereka dalam pasungan yang kuat). On gambaran ni paruntolon na borat tumang (masa krisis).
Naha do hita sanggah mandompakkon masa krisis bani goluhta on? Ra do deba adong na mandolei. Adong do ra deba mansalahkon halak na legan, mansalahkon keadaan. Ra do deba mangidah hajongjongan ni ai songon sada keadaan na memang sapatutni masa na sonai ai tarjadi bani (nasib). Tapi anggo si Paulus pakon si Silas, sanggah tarjadi bani sidea paruntolon ni goluh (masa krisis), mertonggo do sidea janah mamuji Tuhan Naibata. On ma tambar na tang sigogohan laho manlawan paruntolon ni goluh. Sobali na i atas on, parsatongkinan do haganupan hasilni. Tapi anggo goluh na mamuji Tuhan on, hasilni manongtong bani pargoluhonta.
- Pargoluhan ni Halak na Mamuji Naibata : Totap do Adong Jalan Keluar humbani Pergumulan (ayat 26)
Pangkorhon ni goluh na mamuji Tuhan Naibata bani pargoluhonta on, taridah do bani ayat 26 bani bahan PA on, aima tongtong do adong jalan keluar humbani peruntolon ni goluh. On ma na iidah hita humbani pengalaman rohani ni Paulus pakon Silas. Jalan keluar na isobut ai, boi do marhiteihon na hun luar ni dirinta, boi do homa humbani dirinta.
Anggo ongga hita manonton film seri “MacGyver” tahun 1985 -1992 boi do on mangurupi hita laho mangarusi ayat 26 on. Lang tarbahen lang, sai na adong be do masalah ni goluh bani pardalalan ni pargoluhonta on. Tapi bani halak na totap mangidah pambahenan ni Tuhan Naibata bani pargoluhonta (mamuji Tuhan), hadobanni, luar do bani hagoluhonta on gogoh laho luar humbani parsoalan ni goluh. Ibere Naibata do pambotoh, hapentaron banta mambahen tubuh buah-buah pingkiran laho mandalani paruntolon ni goloh ai, janah margogoh.
- Pargoluhan ni Halak na Mamuji Naibata : Mambahen Hamubahon ni Uhur Bani na Mamparibanggaskonsi (ayat 27 – 34)
Na parpudi na boi iidah hita pargoluhan ni halak na mamuji Naibata aima bani ayat 27 das hubani 34 ; mambahen hamubahon ni uhur. On boi iidah hita bani bahan PA on, na masa bani Kopala penjara Pilippi. Sanggah iidah Kopala penjara ai, domma buha ganup labah ni tutupan ai, isintak ia ma podangni laho mamunuh dirini sandiri, iagan ia domma maporus ganup na tartutup ai. Tapi ipagogoh Paulus do sorani mandilohon Kopala penjara ai, nina ma, “Ulang bahen ham hasedaon bamu, ai ijon do hanami haganup”.
On ma na boi gabe parlajaran atap pe barita malas ni uhur banta nuan on, bahasa bani halak na manggoluh mamuji Tuhan, boi do hape ai gabe hasaksian ni goluh bani halak na legan, mambahen hamubahon ni uhur bani na mangidah hasaksian ai. Songon hita selaku bapa i tongah-tongah ni keluarga, anggo goluhta on goluh na mamuji Tuhan sanggah pargoluhonta on, boi do ai pataridahkon hasaksian homa age bani niombahta sonai homa bani ganup pargoluhan ni keluarganta.
- Panutup
Halak na domma mangahapkon manggoluh sondang ni Kristus bani, pasti manggoluh do bani goluh na totap mamuji Tuhan, janah ai do mambahen ia margogoh mandalani paruntolon di goluh, sonai homa mambahen hasaksian ai bani haganup halak. Amin.
