Renungan PA Bapa, tanggal 28 Mei 2023 (Pentakosata I)
Nas : Rom 8:10-15
Usul doding : Haleluya no. 80:1+4
Tema : Hidup berdasarkan pimpinan Roh Kudus
Tujuan : Agar kaum bapa hidup Hidup berdasarkan pimpinan Roh Kudus
“Goluh na Ipimpin Tonduy Napansing”
Nasiam hasoman, haganupan bapa na hinargani Tuhanta Jesus Kristus!
Aha do na mambedahon jolma na porsaya pakon na lang porsaya mangihutkon pargoluhanni hajolmaoan sondahan on? On ma sungkun-sungkun reflektif banta laho mangidah posisini halak na porsaya bani Tuhan i tongah-tongahni dunia on. Apostel Paulus mangidah janah mengembangkon sada doktrin pasal hidup baru – goluh na bayu, ibagas Tonduy pakon goluh na ibagas pardagingon. Bani pasal 8 surat Rom on, Paulus manobut andil ni Tonduy na mangurupi hita ibagas pangarapan bahkan homa na mangurupi hita laho martonggo. Artini aima, jolma na baru ijon aima jolma na manggoluh ibagas Tonduyni Tuhan in. Laho mambalosi sungkun-sungkun i atas, Apostel Paulus mambere balos aima marhiteihon cara hidup na ibagas Tonduy (bani Galatia 5:22-23, isobut ijai buahni Tonduy aima: Holong, malas ni uhur, damei, lumbang ni uhur, habasaron, halayakon, haporsayaon, halamlamon, ampa panrajaion diri). Hunjon domma boi ibedahon hita kriteria jolma na porsaya pakon na lang porsaya ai.
Hita haganupan na hinargani Tuhan Jesus Kristus!
Apostel Paulus bani perikopta on manobut bahasa dong dua macam tabiatni hajolmaon na marbeda tumang aima:
- Goluhni jolma na ikuasai dousa. Goluh na igoki unsur pardagingon, hawa nafsu, kesombongan pakon bagei horja parduniaon pitah.
- Goluhni jolma na igoki janah ikuasai Tonduyni Naibata. Jolma na songon on, aima na tongon igoki Kristus alam sadar, uhur – pingkiran pakon parlahouni. Ia ikendalihon Tonduyni Tuhan in. berpusat bani Kristus do goluhni.
Mangihutkon Apostel Paulus, hita seng be ibagas daging, tapi ibagas Tonduy do. Ase Kristus do simada hita. Ase hita seng marguru bani daging be parlahounta, age pe memang hisap-hisapni daging gogoh tumang laho mandilo hita ase manggoluh ijai, misalni mabuk, marjudi, marbangkis pakon na legan, tapi selaku jolma na baru, na manggoluh ibagas Tonduyni Tuhan in, tontu mampu do hita laho manrajai dirinta ibagas kuasani Tonduy in. dong do konsekuensini pilihanni goluhta ai tene, porini manggoluh janah marguru ibagas daging parlahounta, maningon matei do hita. Matei ijon seng pitah soal matei secara fisik tapi matei ibagas haporsayaon. Anggo ipameti hita horjani daging marhitei Tonduy , manggoluh ma hita. Artini manggoluh ijon aima bani hagoluhan na sisadokahni-dokahni.
Anggo sonai, aha ma sipilihonta bani goluhta on?
Ayat 14 manobut: Ai sagala na binobahon ni Tonduy ni Naibata, ai ma anak ni Naibata. Apostel Paulus mendorong hita ase mamilih status gabe anak ni Naibata. Status na bayu on maningon itandai marhitei ra ibobahon Tonduy ni Naibata. Anak ni Naibata aima sada status ni hajolmaon na domma mamilih manggoluh ibagas kuasani Tonduyni Tuhan. Janah pilihan on ma na mamboan ganupan halak na porsaya jumpahan hagoluhan na humbani Tuhan in.
Hita haganupan na hinargani Tuhanta Jesus Kristus!
Ambilanta on tontu mamboan hita hubani sada pangarusion sonai homa pemaknaan ni pargoluhan na ipimpin Tonduy Napansing in. cara hidup aima pilihan sikap na itontuhon kualitasni haporsayaonni janah kualitasni partonduyon homa. Halani ai, dong piga-piga hal na boi gabe ambilan banta ijon aima:
Na parlobei: jolma na manggoluh ibagas dousa maningon matei. Ibotoh hita Ai upah halani dousa, ai ma hamatean, tapi silayak-layak ni Naibata do hagoluhan na sadokah ni dokahni marhitei Kristus Jesus Tuhanta in.(Rm. 6:23). Jadi tangkas, dousa aima hamateian. Arta, sinadongan, pangkat sonai jabatan seng boi ai paluahkon hita humbani hamateian, anggo ibagas dousa in do parlahouta.
Na paduahon aima: jolma na manggoluh ibagas Kristus ibere do hagoluhan. Tonduy Napansing mambare hagoluhan ibagas hapintoron. Hagoluhan na imaksud ijon aima hagoluhan na rup pakon Tuhan Naibata na ijalo hita magira ibagas rupa na baru (1 Kor. 15).
Na patoluhon aima: statusta sonari aima Anak ni Naibata. Anggo ginoran ma Anak ni Naibata, horja pakon parlahouta maningon ma patandahon status ni Naibata ma homa. Taridah ma ai bani buah-buahni horjanta bei na patandahon buahni Tonduy in. amen.
