Minggu, 18 Juni 2023 (II Dob Trinitatis)
Nats : Lukas 21 : 34-36
Doding : Haleluya No. 184:1-2
Tema : Berjaga-jagalah sebab hari Tuhan datang tiba-tiba!
Tujuan : Agar kaum bapa semakin berjaga dengan mengisi kebaikan dalam hidupnya
JAGA MA NASIAM JANAH MARTONGGO MA!!!
Bagei do carani Tuhan Jesus laho padaskon podah pakon pangajarionNi dompak haganup susianNi sonai age bani ganup halak na mangihutkonSi. Salah sada cara na gati ibahen Tuhan Jesus aima marhitei padaskon limbaga. Anggo ibasa hita haganupan Lukas 21 on jumpah hita do 6 limbaga ni Tuhan Jesus, na ija haganupan ai in ma na laho patorangkon pasal Harajaon ni Naibata.
Anggo bani 1 Tes 5:2, isobut do paboa songon panangko borngin do parroh ni Ari ni Tuhan in, na mararti seng adong age sahalak jolma pe na mambotoh pasal ai, antigan panorangni atap sonaha parjadini ai. Sasintongni, parroh ni Ari ni Tuhan in boi do gabe tirangkap bani jolma na so boi jaga bani dirini (34). Bani Ambilan on, Jesus paingatkon sidea domu bani kenyamanan ampa haduniaonni sidea, halani haganupan ai mambaen seng matang sidea bani parroh ni Ari ni Tuhan in. Tontu adong do alasanni Tuhan Jesus mangkatahon sisonai ai dompak susianNi ijia. Salah sada tujuanni aima ase totap pansing sidea bani parrohni Ari ni Tuhan in.
Bani parsahapan pasal panorang parpudi on ipaingat Tuhan Jesus do ase haganup halak paubahkon uhurni halani dohor ma Ari ni Tuhan in (32). Jaga ma dirimu on ma sada parentah na iberehon Tuhan dompak susianNi ijia, mardingat bueini hisap-hisapni daging na ijumpahkon sidea itanoh on. Ai age pe susian sidea, boi do homa sidea madabuh hubagas parlajouan anggo taruyun sidea bani horja-horjani dunia on (Luk. 22:46). Tontu das ma singat-singat on hubanta Bapa nuan on. Buei do ijumpahkon hita rosuh-rosuh ni dunia on na manjanjihon hasonangan ampa hamegahon banta, mambahen malas uhurta hansipe gabe itadingkon hita Tuhan in. Nikmat do tongon pesta pora janah sodap do inum-inumon tapi haganupan ai boi pamagouhon kesadaranta, jadi lambin lang terkendali be hita on. Layur hita i kodei pakon humpulan na mamburai halak boi mambahen lupa hita bani hasadaonta pakon keluarga, halani rosuhan do hita i luar daripada ibagas rumah. Dobni, hubunganta pakon inang sinrumah sonai age niombah pe gabe renggang. Haganup Bapa do tujuanni podah on; aima selaku malim itongah-tongahni keluarga. Das ulang rosuhan hita mansuhuni hisap-hisap ni daging marimbangkon mandalankon harosuhni Naibata, halani sasintongni domma magou hita ijai anggo pala rosuhan hita pabutakkon goranni Tuhan in.
Seng adong i dunia on na boi manjamin haluahon ampa hagoluhonta. Gariada dunia on sihol pakahouhon hita gabe mandaoh janah manadingkon Naibata. Adong do istilah sedia payung sebelum hujan na mararti bahasa bahen hita ma antisipasi paima roh paruntolon atappe parmasalahon. Ase, tingki roh pe ai boi mintor podas iatasi hita janah ijumpahkon hita solusini ai ma marhitei na marguru bani hatani Tuhanta. Antar sisongon ai ma na ipodahkon Tuhan Jesus banta marhitei teks ni Ambilan on. Halani parrohni Tuhan in berlaku hubani haganup jolma (35), ase jaga ma hita paima roh Ari ni Tuhan in. Sonaha carani? Marhitei na padaohkon diri humbani hisap-hisap ni daging ampa horja hagolapan ampa habutakonni dunia on. Sai padaoh hita ma pargoluhon na lang pansing hun tongah ni partumpuanta on, halani bani halak na mardousa parrohni Tuhan doskon tirangkap do bani.
Anggo roh ma tondong ta hu rumah, mittor sibuk do hita mangojur parrumahta laho mamparsirsirhon sipanganon na mantin sonai homa paborsihkon rumah ase nyaman holi tondong ai hundul, janah megah do uhurta manlahoi ai halani ninta anggo roh ma tondong mararti roh ma Naibata na ididah mamboan pasu-pasu. Tapi, sonaha do hasirsironta bani na mangalo-alo parrohni Tuhan hubagas goluh ampa uhurta? Adong do ibahen hita na tang sidearan lobih humbani pambahenanta dompak tondong ta ai? Megah do uhurta nani paima-imahon Tuhan in? Rimangi hita ma!
Nuan, domma ipabotohkon banta bahasa sintong do parrohni Tuhan in, ase ulang adong be holi hita na tarsonggot anggo masa ai. Jaga bani goluh on lang mangojur hita ase mamilangi piga ari nari roh ni ari ai, tapi jaga bani goluh on mamarentahkon hita ase totap porsaya bani hatani Tuhan, totap marpangarapan janah pansing ilobeini Naibata. Jaga bani goluh on maningon iisi hita marhitei golgol bani tonggo halani in do bohal ni hagogohanta laho manimbili sagala na sihol roh ai janah totap margogoh ilobeini Tuhanta in.
Bani na martonggo ai hita, ai ma patugahkon hagalekonta ilobeini Tuhan. Anggo seng halani pangurupionni Naibata tontu lang tarbahen hita manjaga goluhta on totap daulat paima parrohni Anak ni Jolma in. Janah bani tonggonta ai, in ma na laho mangondoskon pargoluhonta hubani Tuhan janah porsaya hita IA do na manggoki haporluonta sadokah na paima-imahon hita on. Ambah ni ai, tonggonta do na mangajari hita totap mangajamkon Tuhan in bani haganup langkahta selaku susianNi hita.
Diskusi
- Na ija do na gatinan ihorjahon hita, mangkorjahon parentah ampa rosuhni Tuhan atap papuas na ibagas uhurta on, age pe itadingkon hita Tuhan in?
- Marosuh do ham martonggo, mangondoskon pargoluhon on hubani Tuhan janah porsaya IA do na manramotkon ham?
- Iojur ham do hasomanmu sarumah ase jaga janah golgol bani tonggo bani na paima-imahon Tuhan in?
Ketulusan Dan Keiklasan Mendorong Perahu Iman Bergerak Menuju Kemenangan
~ NN ~
