Ari, tanggal : Minggu 4 Setelah Trinitatis (Tanggal 2 Juli 2023)
Nas : Psalmen 105:1-5
Usul Doding : Haleluya No. 132:1-3
Tema : Martarima kasih hubani Naibata
Tujuan : Ase parbapaon mardingat pambahenan ni Naibata bani ganup goluhni anjaha martarima kasih
MARTARIMA KASIH HUBANI NAIBATA
Horas ma hubanta haganupan.
Bani sada panorang, adong ma tolu halak bapa na sihol padaskon hatarimakasihonni hubani Tuhan. Tapi bingung do sidea, sadiha bahat do tanda tarima kasih ni sidea ai hubani Tuhan. Dob ai, lang ibotoh sidea sonaha carani laho padaskon hatarimakasihonni ai. Dob honsi marpingkir saborngin, dapot sidea bei ma cara laho padaskon tarima kasih ai hubani Tuhan. Bapa na parlobei kaluar hun rumahni sambil mamboan sagala arta na dong bani. Das honsi i alaman ni rumahni, ibuatni ma hayu, ibaen ni ma garis lurus bani tanoh kira-kira 1 meter. Dob ai jongjong ma ia hampit siamun ni garis ai. Isampakkonni ma ganup artani hu atas. Haganup artani na madabuh hampit siambilou ni garis ai, ai ma ondoskononni hubani Tuhan na gabe tanda ni tarima kasihni. Tapi na madabuh hampit siamun ni garis ai, mulak hubani ma ai.
Anggo bapa na paduahon, kaluar ma ia hun rumahni sambil mamboan haganup artani. Das honsi i alamanni rumahni, ibuatni ma hayu, anjaha ibaenni ma lingkaran i atas tanoh. Jongjong ma ia ibagas ni lingkaran ai. Isampakkonni ma ganup artani hu atas. Sagala na madabuh i darat ni lingkaran ai, ai ma na gabe hatarimakasihonni hubani Tuhan. Tapi na madabuh ibagas lingkaran, mulak hu bani ma ai. Sonai ma ibaenni.
Na parpudi aima bapa na patoluhon. Kaluar ma ia hun rumahni sambil mamboan haganup artani. Marsahap ma ia, “Tuhan, au laho padaskon hata tarima kasihku bani haganup pasu-pasumu hubangku. Ham kan i atas in do. Tokin nari husampakkon ma ganup artangku on hu atas. Buat Ham sadiha na sihol Bamu tene, Tuhan. Ase na madabuh use hu toruh on, ai ma na mulak hu bangku.” Salosei ia marsahap, isampakkonni ma ganup artani hu atas. Domma boi ibayangkon hita, haganup artani ai madabuh hu toruh do. Jadi nini ma, “Bah. Tarima kasih tene, Tuhan. Seng hape porlu ope bamu artangku on. Ganup do ipaulak Ham hu bangku.”
Hita haganupan na hinarga ni Tuhanta,
Porlu tumang do hita martarima kasih, tarlobih hubani Tuhan. Adong ompat kata penting na somal isahapkon hita i tanoh on, aima: maaf, tolong, permisi, pakon terima kasih. Bani partumpuanta sadarion, na sihol ijalo hita marhitei ambilan on aima pasal hata tarima kasih do. Hata tarima kasih on aima salah sada hata na somal ipadas hita, age dompak hasoman jolma, tarlobih hubani Tuhan Naibata. Penting do hita martarima kasih, halani pataridahkon toruh ni uhurta pakon manghargahon pangurupion ni halak banta. Anggo idingat hita, mulai dakdanak nari pe hita domma iajari pasal na martarima kasih on. Na ihatarimakasihkon hita somalni aima pasal pambahenan atap pe sibere-bereni halak hubanta.
Sebagai halak na porsaya hubani Tuhan, hasomalanta na martarima kasih ai lang bertolak belakang pakon harosuhni Tuhan. Gariada sadalan do ai pakon harosuhni Tuhan. Marosuh do Tuhan anggo ipadas hita hata tarima kasihta hu Bani. Halani anggo martarima kasih hita hu Bani, mararti do ai idingat hita pambahenanNi hubanta. Halani ai, sonon ma caranta martarima kasih hubani Tuhan, aima marhitei na tarsurat bani hata ni Tuhan na dob ibasa hita nokan. Parlobei, marhitei mamuji ampakon mandilo goranNi (ayat 1). On ma caranta na parlobei martarima kasih hubani Tuhan. Antigan ma hita mandilo pakon mamuji goranNi? Balosni aima sanggah martonggo. Jadi, martonggo aima caranta martarima kasih hubani Tuhan.
Na paduahon aima marhitei mandodingkon pakon mansahapkon ganup horja halonganganNi (ayat 2). Halak na mandoding aima halak na padaskon aha na ibagas uhurni. Talup do marmalas ni uhur hita sanggah manjalo horja halongangan na binahenni Tuhan banta. Tanda ni malas ni uhurta ai ipadas hita marhitei mandodingkon goranNi. Na patoluhon aima marhitei na mamindahi Jahowa pakon hagogohonNi (ayat 4). Bani halak Israel ijia, Naibata marianan bani rumahNi. Ase mamindahi Naibata mararti manrohi rumahNi Naibata, aima rumah panumbahan in i Jerusalem. Jadi caranta na mangihut laho martarima kasih hubani Tuhan aima marhitei na ringgas hita roh hu gareja, riap pakon hasoman sakuria manjalo HataNi na margogoh in.
Na parpudi aima marhitei na mardingat sagala tanda halonganganNi (ayat 5). Buei do na boi idingati hita ibagas goluhta on. Hita do na mamilih anjaha manontuhon, na ija do na sihol idingati hita. Pasti ongga bei do hita mangahapkon haluahon na humbani Tuhan. Na tarsosak hinan hita, hape boi maluah halani pambahenanni Tuhan. Anggo on na idingati hita, hotop ma hita martarima kasih hubani Tuhan. Tapi anggo pambahenan ni hasoman na mambaen borit uhurta do lalap na idingati hita, mahol tumang ma hita martarima kasih hubani Tuhan.
Hita bapa na hinargani Tuhan,
orui hita ma ungut-ungut humbagas dirinta. Halani ai do na gati mangolati hita martarima kasih hubani Tuhan. Pabahat hita ma mardingati ganup pasu-pasu pakon pangkasomanion ni Tuhan hubanta pakon hubani keluarganta, halani ai do na mambaen hita boi mamuji Tuhan pakon martarima kasih hu Bani. Amen.
