Minggu : 16 Juli 2023 (6 Set. Trinitatis)
Nas : Lukas 10:17-20
Doding : Hal. No. 327:1-2
Tema : Bersukacitalah karena namamu terdaftar di sorga
Tujuan : Agar kaum Bapa tetap hidup dalam Kristus dan beroleh jaminan keselamatan dan hidup yang kekal.
MALAS NI UHUR NA GOK AIMA
ANGGO TARSURAT GORANTA I NAGORI ATAS
(Pdt. Edi Jasin Saragih)
Buei do munsuh ni halak na porsaya i tanoh on tapi ulang ma hita mabiar, halani domma ibere hubani halak na porsaya kuasa laho manaluhon haganupan in. Malas do uhurta anggo monang hita manlawan munsuh in. Tapi ulang lupa hita, sedo halani gogohta ai tapi halani kuasa ni Tuhanta do. Malas ni uhur na sintong aima humbani Naibata. Sedo halani kesuksesanta bani sada horja. Jesus pasingatkon susian-Ni anggo keberhasilan ni sidea patunduk setan-setan sedo halani gogohni sidea tapi humbani Jesus do. Tapi malas ma uhurta nini Jesus halani domma tarsurat goranta i nagori atas.
Bani Pangungkabon 20:11-15 aima pasal paruhuman na parpudi isuratkon: paboa bani ari paruhuman parpudi iungkab ma sada buku na ginoran buku hagoluhan anjaha idabuh ma uhuman mangihutkon na tarsurat bani buku-buku ai, romban hubani horja ni bei (Pangk. 20:12). Janah barang ise na so jumpah tarsurat bani buku hagoluhan ai, idabuhkon ma ia hubagas laut apuy ai (ay. 15). Buku hagoluhan aima buku na marisi goran-goran ni halak na porsaya i nagori atas. Aima pustaha na sinuratni Naibata (2 Musa 32:32; Pilippi 4:3). Anjaha ise na mardousa goranni sasapon do humbani pustaha ni Naibata (2 Musa 32:32).
Domu hujin ma Jesus mangkatahon hubani susian-Ni si pitupuluh halak ai sanggah baru mulak sidea mandalankon tugas pangidangion. Ibagas malas ni uhur do sidea mulak, nini sidea do, “Tuhan, tunduk do age setan-setan bannami halani goran-Mu”. Tapi Jesus mangkatahon, “Tapi ulang ma malas uhurnima, halani tunduk setan-setan ai bannima, tapi malas ma uhurnima, halani domma tarsurat gorannima i nagori atas”. Aha do maksud ni Jesus bani hata-Ni on? Sedo artini lang malas uhurta anggo tunduk setan-setan banta. Sedo artini lang malas uhurta anggo sukses hita bani parhorjaan, lang. Tapi Jesus mangkatahon adong malas ni uhur na sasintong ni aima: halani domma tarsurat goranta i nagori atas (Pilippi 4:3; Pangk. 3:5).
Ai seng tarbere dunia on malas ni uhur na sasintongni, tapi parsatongkinan do hansa. Habayakon, hasangapon, hapentaron ni dunia on lang gabe jaminan homa ai paroh malas ni uhur. Ai do ase bani surat Kolose, Paulus manuratkon ase na i nagori atas do siparuhurononkon. “Na i babou aima paruhurhon nasiam, ulang ma na i atas tanoh on” (Kolosse 3:2). Iparuhurhon hita ase totap goranta tarsurat bani buku hagoluhan ai. Sonaha carani? Pangungkabon 3:5 mangkatahon: “Bani na monang in do hiouhononkon pakeian putih, anjaha seng sasapon-Ku goranni humbani buku hagoluhan in. Saksihonon-Ku do goranni i lobei ni Naibata ampa i lobei ni malekat-Ni (Pangungkabon 3:5). Jadi, halak na totap (setia) marhaporsayaon bani Tuhan Jesus hujai do iondoskon hadameion ronsi hagoluhan na sadokah ni dokahni. Porini pe maningon lopusonta bagei-bagei sitaronon, asal ma totap hita marhaporsayaon, gabe marulih do hita bani malas ni uhur na sasintong ni ai.
Jadi malas ni uhur ai aima anggo totap hita manggoluh ibagas Kristus. Sonaha do ciri-ciri ni halak ma manggoluh ibagas Kristus? Naparlobei, totap manjaga hapansingonni. Selaku halak na pinilih, idilo do hita se manggoluh ibagas hapansingon. Sedo pitah pansing bani panorang tertentu hansa, atap bani ianan na tertentu. Marhitei na totap hita manjaga goluh na pansing, ijai do goluhta on berwibawa, maharga i lobei-lobei halak na legan. Jadi anggo sihol Ham ihargai hasoman, jaga hita ma kualitas hakristenonta. Goluh ibagas hapansingon aima goluh na lang sarupa pakon dunia on. Maningon adong do halobihanta pakon dunia on.
Napaduahon: goluh na marhabiaran bani Naibata. “…Marhasoman biar ma nasiam marparlahou sanggah pangisolatan nasiam on” (1 Petrus 1:17). Artini, manggoluh ibagas hapormanon. Lang panurakan. Manjaga parsahap, pangabak ibagas na dear. Anggo porsaya do hita dohor do Naibata ilambungta, aima manjaga hita ase manggoluh ibagas na sintong. Ai naborit ni jolma sonari on aima lang mabiar mangkorjahon dousa. Lang mabiar korupsi, marbangkis, manangko, pnl. Halani aha? Aima halani na lang dohor iahapkonni Naibata. Lang mabiar bani ari paruhuman in. Ai pitah na i dunia on hansa na ipingkiri ni dobni sonai ma, lang martujuan goluhni. Tapi halak na manggoluh ibagas Kristus, pentar do ia bani langkah-langkahni.
Napatoluhon: Goluh ibagas holong parsaninaon. Panandaionta bani Naibata maningon taridah ma homa ai bani parsaoranta. Tarlobih bani saninanta. Lang sintong goranon itanda hita Naibata, hape lang mardear hita pakon saninanta. Lang mardear pakon hasomanta. Domma ipilih janah ipaluah hita marhitei daroh ni Kristus. Hargahon hita ma panobusion ai marhitei horja na madear. Marhorja hita gok ibagas na semangat, integritas, tanggungjawab. Humbani gok ni uhur ma horjahon sagala horja nasiam, songon na bani Tuhan in, sedo hubani jolma (Kolosse 3:23).
Hita haganupan na hinarga ni Tuhanta.
Malas ni uhur na sintong aima anggo rap pakon Tuhan in. Damei ni Naibata ma na mangatasi haganup paruhoran ampa manramotkon uhur ampa pingkiranta anggo porsaya hita bani kuasa ni Tuhanta. Mago ma gobir halani haporsayaon. Tapi malas ni uhur ma manrajai hita porini pe idompakkon hita sitaronon. Halai aha? Halani adong kuasa banta marhitei Tonduy Napansing na marianan ibagas uhurta. Domu hujin jaga hita ma goranta ase totap tarsurat bani buku hagoluhan in. Amen.
