Minggu: 23 Juli 2023 (7 Set. Trinitatis)
Nas : Podah 15:15-24
Doding: Hal. No. 264:1-2
Tema : Takut akan Tuhan
Tujuan : Agar kaum Bapa senantiasa hidup takut akan Tuhan dan setia mendengar pengajaran Firman Tuhan
DAMEI AMPA MALAS NI UHUR DO
RUPEI NI HALAK NA MARHABIARAN BANI NAIBATA
(Pdt. Edi Jasin Saragih)
Hita haganupan na hinarga ni Naibata.
Halak na marhabiaran bani Naibata aima halak na manjaga parsahapni, pangabakni totap ibagas hapansingon. Seng panurakan goluhni. Tapi hormat hubani Naibata, mabiar mangkorjahon dousa halani ibotohni do talar do haganup i lobei ni Naibata. Marhabiaran bani Naibata mararti do homa ai aima halak na longang atappe kagum mangidah jadi-jadianni Naibata. Longang bani pardalanan ni goluhni na mangahapkon banggal ni kuasa ni Naibata.
Tapi halak na so marhabiaran bani Naibata aima halak na manganggap enteng hubani Naibata, na mangidah Naibata ai ‘etek’ hansa. Ia mangunsagah bani gogohni, pambatohni pakon sinadongan ni. Halani ai lang mabiar ia mangkorjahon dousa. Lang mabiar bani ari paruhuman ni Naibata.
Bapa na hinaholongan ni Tuhanta.
Haganup do jolma sihol marmalas ni uhur ia bani goluhni. Bagei do ibahen jolma laho pamalas uhur. Adong na misir mardalani hujai hujon mangindahi hajengeson ni dunia on. Misir mangindahi sipanganon na mantin-mantin, bolanja barang-barang na hinarosuhkon, pnl. Tapi haganupan ai malas ni uhur parsatongkinan do hansa. Dob salosei haganupan ai, mulak ma hu rumah, loja janah magou ma malas ni uhur ai. Sonai ma pargoluhan ni jolma na mangindahi malas ni uhur na i tanoh on. Sonang tapi lang damei.
Age buei artanta, lang ai gabe jaminan boi hita marmalas ni uhur. Boi do buei arta ni sasada halak tapi marhasunsahan do uhurni. Tapi malas ni uhur ai tergantung do bani paruhuranta. Sikapta mangkamalashon aha na dong banta. Cara pandangta, manontuhon do ai homa bani malas ni uhur. “Halak na marhoru sambor do bani haganup panorang, tapi bani halak siparmalas uhur hira ari pesta do tong”. Jadi sonaha cara berpikirta, aido homa manontuhon malas ni uhurta.
Cara berpikir on, tergantung do ai bani pambotohta. Pambotohta ai rohni humbani Hata ni Naibata. Hata ni Naibata do mambahen ase pentar hita bani goluh on. Biar mangidah Jahowa do parmulaan ni habotohon (Podah 1:7).
Hapentaron ni Naibata ibere do hubanta marhitei hapongkutanta manrimang-rimangi hata ni Naibata arian pakon borngin. Marhitei hata ai do hita Bapa pentar mamodahi, mangajari, mambobai keluarganta hubani dalan na sintong. Janah pangajarion bani niombah pasal hata ni Naibata tontu aido mangkorhon malas ni uhur bani orang tua. Aima anggo pentar niombah ai janah sibalosi ajar. Tapi halak na oto do ai anggo mapas bani pangajarion.
Hita haganup na hinarga ni Naibata.
Sonari on, buei ma halak na lang mardalan bani dalan na sintong. Bagei do dalan-dalan na i dunia on. Dalan-dalan na manawarhon bagei-bagei hajengeson pakon kenikmatan dunia. Ase anggo lang pentar hita mangidah ganupan in, ra ma kahou hita. Halak na pantas maruhur, pintor do bani dalanni. Bagei do sora ni dunia on mambahen lang pintor sasahalak bani dalanni. Narkoba, pornografi, amoral, manangko, mamunuh songon na somal mando ai natangar bani media sosial, pakon berita-berita na legan. Tontu haganupan ai aima halani na hurang podah, janah lang martujuan arah ni goluh ni. Lang marhabiaran bani Naibata, lang dong damei ibagas uhur. Na iparlelei aima malas ni uhur ni dunia on do hansa.
Buei do pasu-pasu ni Naibata bani halak na marhabiaran hu-Bani. Malas ni uhur na gok bani haganup panorang (ay. 15); mangkamalaskon aha na dong (ay. 17); parsabar (ay. 18); pamalas uhur ni orang tua (ay. 20); dalan hagoluhan do na tinuju (ay. 24). Buei ope pasu-pasu na legan ibere Naibata asal ma marhabiaran hita hu-Bani. Halani Naibata do simada damei ampa malas ni uhur.
Sonaha do ase marulih bani damei ampa malas ni uhur na sintong in? Balosni aima totap ma hita bani Hata ni Naibata. Raja Daud bani na laho marujung goluhni, ipodahkon do hubani si Salomo anak ni pasal rusia ase marhauntungan bani goluh on. Nini do: “Na laho mando ahu marayak dalan ni haganup jolma na i atas tanoh on. Tenger ma uhurmu anjaha margogoh ma ho, anjaha jolom ma paraturan ni Jahowa Naibatamu, mardalan ma ho bani dalan-Ni, ramotkon titah-Ni, uhum-Ni pakon hasaksian-Ni songon na tarsurat bani titah ni si Musa, ase maruntung ho bani ganup silahouanmu pakon bani ganup sidalananmu” (1 Raja 2:2-3).
Sonaha ase boi totap mardalan ibagas dalan na pintor? Sintong do ai, bagei do tantangan na idompakkon hita anggo sihol mardalan hita bani dalan na sintong. Husip-husip ni sibolis in gati mangganggu jolma anggo sihol ia orod bani Naibata. Tapi ulang lupa hita, domma ibere banta Tonduy Napansing. In ma na mangajari, manogu-nogu, bani dalan na sintong. Halani ai maningon tangi do hita bani sora ni Tonduy Napansing marimbang sora ni dunia on. Marhasoman kuasa ni Tonduy Napansing talu do ganup kuasa ni sibolis in. Sai ulang ma ra hita ipaoto-oto dunia on marhitei hisap-hisapni. Ase, ambukkon hita ma hasomalan-hasomalan na lang sintong, sogam ni uhur, domdom, latei, gijang ni uhur ambukkonon do in ase damei ni Naibata na mangatasi haganup paruhuronta.
Hita Bapa, lang tarbahen hita akal, pingkiranta, barang gogohta laho mambuat, mangalop damei in hubagas paruhuranta. Tapi maningon ibere hita do uhurta irajai Naibata. Ungkab hita paruhuranta, akui hita hagalekon, haotoon, haetekon ta i lobei-lobei ni Naibata. Marhitei sikap na sonin do gabe parsimada hita bani damei ampa malas ni uhur na humbani Naibata. Amen.
