PA Bapa, Minggu 30 Juli 2023 (VIII Dob Trinitatis)
Lukas 12: 13-21
Usul doding/lagu: Haleluya No. 372: 1-3
Tema : Kaya di dalam Tuhan
Tujuan : Agar kaum bapa tetap mencari kekayaan rohani di dalam Tuhan yang senantiasa mencukupkan hidup kita dengan kehadirannya
Bayak i lobei ni Tuhan
Parlobeini
Salah sada topik na paling iharosuhkon buei halak marhitei seminar motivasional aima sonaha ase bayak (bagaimana menjadi kaya). Mase iharosuhkon buei halak pasal topik on, aima memang halani na tang isurahon jolma bani goluhni sihol bayak. Gabe sahalak na bayak tontu boi mansuhuni atap aha pe na iharosuhkonni; rumah na jenges, mobil, pakon na legan. Haganupan ai boi jumpahan marhitei sinadongan atappe habayakon na adong bani. Hansa, tongon do bahasa haganup boi jumpahan marhitei habayakon ai? Tontu lang tene.
Hatoranganni
Limbaga na iturihon Jesus aima singat-singat bani sasahalak na sihol dapotan tean-teanan. Ia ibagas na lang mardear (konflik) pakon saninani anjaha mangindohon ase Jesus gabe panguhum barang sibagi tean-teanan. Aha do na lang talup bani sahalak na bayak bani limbaga ni Jesus on? Ai lang namin rencana strategis do na ibahenni ai anjaha visioner, paulihon tuangan na lobih banggal laho patumpuhon gogoh ni jumani na buei ai. Tontu na jenges do na isurahonni ai. Na lepak aima halani ia patumpu-tumpu arta bani dirini anjaha porsaya ibagas uhurni bahasa malas ni uhurni aima bani arta ai. Ia patumpu-tumpu arta bahen haporluanni sandiri anjaha lupa bani halak na mamorluhon pangurupion. Isobut Jesus do sahalak na bayak ai na oto sedo halani bayak ia atap halani na adong rencanani atappe halani na marinvestasi ia. Ihatahon ia oto halani pangahapni bahasa goluhni margantung bani sinadonganni. Ihatahon ia oto halani iahapni bahasa malas ni uhurni aima bani habayakonni. Ihatahon ia oto halani ia bayak i lobei ni jolma, tapi lang gabe bayak i lobei ni Naibata. Ihatahon ia oto halani uhurni domma irahut bani habayakonni. Ihatahon ia oto halani tading do haganupan habayakonni ai anggo buaton hosahni hun bani (marujung goluhni).
Sahalak pemimpin spiritual pakon politikus na hun India na margoran Mahatma Gandi bani sada panorang manghatahon, “Bumi menyediakan cukup untuk memenuhi kebutuhan setiap orang, namun tak cukup untuk keserakahan setiap orang.” Uhur haut berpotensi do mambaen sasahalak gabe buas anjaha jahat. Uhur haut mambaen sasahalak gabe egois atappe pitah mamingkirhon dirini sandiri. Anggo jumpah ma na songon on bani pargoluhanta mangkorhon hasedaon do hadobanni. Ase porlu tumang totap idingat hita bahasa sinadongan atappe habayakon na adong banta panorang on aima na humbani Naibata.
Sikap na ipataridahkon sahalak na bayak bani limbaga ni Jesus hinaotikni pataridahkon gambaranni buei halak. Mase boi sonai? Anggo ipardiatei hita, gati do hita jolma mambaen malas ni uhurta halani sinadonganta. Jesus paingatkon susian age na mabuei na manangihon bani panorang ijia ase jaga dompak sagala uhur haut halani seng humbani arta ai goluhta. Ase tujuan ni goluhta sedo sinadongan ai. Bayak i lobei ni Naibata lobih mararti marimbang bayak bani dunia on hansa. Nini Tuhan Jesus bani limbaga on sahalak na bayak na oto ai memang bayak do i dunia on, tapi lang bayak bani Naibata. Sahalak na bayak i lobei ni Naibata sedo maningon na buei arta dunia on bani, tapi na unjah marsibere-bere dompak hasoman janah sari. Sahalak na bayak i lobei ni Naibata mambotoh janah mangauhon bahasa habayakon na adong bani aima na humbani Naibata anjaha pakeihononni do ai domu hubani harosuhni Naibata. Ase sahalak na bayak i lobei ni Naibata totap do ibagas na martoruh ni uhur.
Hahonaanni
Hata ni Naibata marhitei limbaga na ipadas Jesus manghatahon hu tongah-tongahta bani panorang on ase ulang hita marpangarapan bani sada pahara na lang pasti. Tapi maningon ibaen hita do pangarapanta bani Naibata ibagas habayakon-Ni na mambere haganupan ai banta. Tontu sayang tumang do anggo adong marsinadongan sasahalak jolma, tapi lang ibere panorang bani laho mandaihon sinadonganni ai. Hata ni Naibata banta panorang on marhitei limbaga na ipabotohkon Jesus dompak susian-Ni pakon na mabuei ai mamboai hita laho mangidah pasal habayakon na sasintongni. Anggo sihol hita bayak aima marhitei na bayak i lobei ni Naibata. Sonaha do ase boi hita bayak i lobei ni Naibata? Bani ambilan ni Jesus i atas dolog ihatahon do: “Ulang ma patumpu-tumpu hanima arta bennima i tanoh on, bani ianan na targagat tasik ampa ngitngit, bani ianan na tarhurak anjaha tartangko panangko! Tapi patumpu-tumpu hanima ma arta bannima i nagori atas, bani ianan na so targagat tasik ampa ngitngit, bani ianan na so tarhurak anjaha tartangko panangko (Mat. 6: 19-20). Habayakon na i dunia on lang manontong, tapi anggo ipakei hita habayakonta bani pahara na mararti atappe marguna dompak hasomanta, aima habayakon na sasintongni.
