TATA IBADAH
MINGGU SAHABAT KHUSUS GKPS 2023
(NA MABALU, NA MATUA, NA TADING MAETEK
PAKON DIFABEL)
Tema:
“Hasadaon pakon Pangidangion na Marbuah”
(Kolosse 1:10)
Sub Tema:
“Marmalas ni Uhur ma Hita Pataridahkon Buah ni Haluahonta
anjaha Gabe Pasu-pasu i Tongah-tongah ni Gareja, Masyarakat
ampa Negara Tandani na dob Matoras Haporsayaonta”
(1 Tessalonika 5:16-18; Jesaya 9:2; Psalmen 118:24)
Minggu XI Dob Trinitatis,
20 Agustus 2023
- PERSIAPAN
- Persiapan Petugas Ibadah
- Penjelasan Tata Ibadah
- PRAELUDIUM
Mandoding Haleluya No. 412:1-2 “Marodor na Porsaya”
Marodor na porsaya ganupan, na laho misir hu parmingguan,
damei do tongtong. Tunggung jagiah do idahon,
minar do bohini ganupan, damei do tongtong.
Talup janah pantun marpahean, songon na laho hu parpestaan,
damei do tongtong. Rosuh tumang uhur maniru,
halani dear ni parlahou, damei do tongtong.
- KEBAKTIAN
- VOTUM-INTROITUS-TONGGO
P Ibagas goran ni Naibata Bapa, pakon Tuhan Jesus Kristus ampa Tonduy Napansing, Sitompa langit pakon tanoh on. Amen.
Jadi nini ma hu bangku, “Sungkup do idop ni uhur-Hu bam, ai ibagas hagalekon do gabe gok hagogohon.”
K Ase dearan ma hupuji diringku halani hagalekon, ase sogop bangku hagogohon ni Kristus.
P Halani ai sonang do uhurhu ibagas hagalekon, hahirion, hasunsahan, parburuon ampa hasosakan halani Kristus,
K ai sanggah galek ahu, ijai do ahu margogoh.
P Haleluya, Haleluya, Haleluya.
K (mandodingkon) Haleluya….. Haleluya….. Haleluya…..
P Martonggo ma hita!
Ham Tuhan Naibata, Sitolusada, Naibata Bapa, Tuhan Jesus Kristus ampa Tonduy Napansing. Tarima kasih ma Bamu halani itompa, ipaluah janah ipapansing Ham do hanami marhitei idop ni uhur pakon holong ni atei-Mu na banggal in. Ipatotap Ham do hajongjongan ni ganup jolma na i tanoh on laho patangkashon hamuliaon-Mu. Ham o Tuhan, Ham do simada goluhnami janah harga tumang do Bamu halak na madoyuk janah isarihon Ham do halak na galek. Ipataridahkon Ham do holong na mardapot-dapot hubani na mabalu, na matua, na tading maetek pakon difabel. Patotap Ham ma holong na mardapot-dapot in tongtong hubennami, ase lambin sirsir janah sari hanami hubani haganup halak. Ibagas Kristus Jesus ondos hu Bamu ma kebaktian nami on. Amen.
(hundul kuria)
- DODING: HALELUYA NO. 1:1+6 “Jahowa Sihol Pujionku”
Jahowa sihol pujionku, ai Ham do Naibata sitompa au.
Sai suruh Tonduy-Mu hu bangku, mangajar au mamuji Goran-Mu.
Marhitei–hitei Jesus Anak–Mu, ase dear dodingku hu Bamu.
Sonin ma au marolob-olob, marhamegahon malas uhurhin.
Ai ra do Ham mamparuhurhon, na husuhutkon hu Bamu ijin.
Pasu-pasu-Mu sai sirnip do in, lobih hun bani panagamankin.
- GANTIH NI TITAH NA SAPULUH
P Tangihon hita ma gantih ni Titah na sapuluh in, ai ma na tarsurat bani Kolosse 3:12-14, “Ai pe, nasiam na dob pinilih ni Naibata, na mapansing anjaha na hinaholongan, pakei nasiam ma biak paridopniuhuran, habasaron, toruh ni uhur, halamlamon, ampa lumbang ni uhur, marsianju-anjuan anjaha marsisasapan dousa, anggo marpangkurangi uhur ni na sada dompak hasomanni; songon na dob isasap Kristus dousa nasiam, sonai ma homa nasiam marsisasapan. I atas ni ganupan ai dalankon nasiam ma holong, ai in do rahut-rahut ni sagala hadearon.”
Riap ma hita mangindo:
P+K Ham Tuhan Naibata, pargogohi Ham ma ahu mangkorjahon Hata-Mu ai. Amen.
- DODING: HALELUYA NO. 497:1-2 “Holong Ni Jesus Manggomgom”
Holong ni Jesus manggomgom ganup Kuria,
na patotapkon hasadaonta in.
Damei-Ni in ma manrahut paruhuranta,
idop uhur-Ni batar-batarta in.
Damei-Ni in ma manrahut paruhuranta,
idop uhur-Ni batar-batarta in.
Riap ma hita sauhur martangkap tangan,
ibagas damei na humbai Tuhan in.
Marpangarapan tongtong bai horja ni Tuhan,
hataridahan ni hasintongan-Nin.
Marpangarapan tongtong bai horja ni Tuhan,
hataridahan ni hasintongan-Nin.
- HASASAPAN NI DOUSA
P Riap ma hita jongjong!
Martonggo ma hita, sopotkon hita ma dousanta hubani Tuhan Naibata.
Ham Tuhan Naibata, ihatahon Ham do hubannami songon na tarsurat bani Jakobus 1:27, “On do parugamaon na borsih anjaha na so dong sihataon bani uhur ni Naibata, Bapa in, ai ma manorih na tading maetek ampa na mabalu ibagas hamarsikonni, anjaha manjagai diri ulang butak marhitei dunia on.” Nuan mangaku do hanami, lape idalankon hanami Hata-Mu in marhitei na hurang sirsir hanami mambere pelayanan na terbaik hubani na tading maetek pakon hubani na mabalu. Ham Tuhan, roh do hanami marhasoman toruh ni uhur mansopotkon dousanami hu Bamu.
K (mandodingkon) reff. ♪♪♪… Haleluya No. 364
Sai manrogop au, roh manombah Ham.
Sai papansing Ham ma au, marhitei daroh-Mu.
P Idingat hanami do homa Hata-Mu bani Psalmen 92:15, “marbuah do sidea age dob matua, tongtong tabun anjaha maratah.” Hape anggo idingati hanami pangabak pakon hauhuron nami dompak na matua pakon na lanjut usia, hotop ope hanami manlupahon podah pakon buei ni in buah na madear na boi ibahen sidea na gabe pasu-pasu ampa na marpangkorhon hubani buei halak. Ale Tuhan Naibata, gok dousa do hanami i lobei-lobei-Mu. Paluah Ham ma hanami.
K (mandodingkon) reff. ♪♪♪… Haleluya No. 364
Sai manrogop au, roh manombah Ham.
Sai papansing Ham ma au, marhitei daroh-Mu.
P Sonai do homa hubani Hata-Mu na pagolpahon hanami ase totap mamardiatei hasoman nami na difabel songon Hata-Mu bani Johannes 9:3, “Ibalosi Jesus ma, “Sedo halani dousani atap halani dousa ni namatorasni, tapi ase ipatalar bani horja ni Naibata.” Hape anggo isadari hanami, gati ope ibahen hanami hasoman nami na difabel, pitah na porlu siidopan tumang. Lape ibahen hanami pelayanan na terbaik ase tongon lambin talar kuasaMu ampa horja-Mu marhitei sidea. Halani ai, roh do hanami hu lobei-Mu. Maidop ma uhur-Mu, pabayu Ham ma hanami.
K (mandodingkon) reff. ♪♪♪… Haleluya No. 364
Sai manrogop au, roh manombah Ham.
Sai papansing Ham ma au, marhitei daroh-Mu.
P Sonari, iboban hanami do haganup dousa nami na buei in hu lobei-Mu, irik mangakuhon, na sirsir do hanami pabayuon-Mu, ase boi hanami mandalankon Hata-Mu, janah bere Ham ma Tonduy-Mu laho mambobai hanami bani goluh nami. Ham Tuhan, idop ma uhur-Mu bennami. Amen.
Tangar anjaha haporsayai hita ma Hata ni Naibata bagah-bagah pasal hasasapan ni dousanta:
“Ai mosor pe sagala dolog, anjaha dugur sagala buntu-buntu, tapi idop ni uhur-Hu seng anjai mosor humbam, anjaha padan pardameian na hun Bangku seng anjai morod, nini Jahowa, na maridop ni uhur bam.” (Jesaya 54:10).
Ibagas holong ni Naibata, domma isasap haganup dousanta. Halai ai, pataridahkon hita ma tanda-tanda ni pargoluhan na bayu.
Hasangapon ma bani Naibata i babou.
P+K Amen. (hundul kuria)
- DODING: HALELUYA NO. 108:1+8+11 “Sanggah Holong Tong Tuhanta”
Sanggah holong tong Tuhanta, na mangidah hita on.
Imbang hita ma dirinta tanda jora hita on.
Hisapmin tongtong ampogi, sai taluhon dagingmin;
Ase ulang irajai hadousaon uhurmin.
Haganup na bujur uhur mangihutkon Jesus in,
Sai ilawan na masambor ronsi rotap hosahniin.
- RUJI – RUJI BANI MINGGU SAHABAT KHUSUS
P Hita haganupan kuria ni Tuhanta, marhitei Minggu Sahabat Khusus GKPS, ipagolpa do hita ase kuria in pakon haganup warga Jemaat aima na marhuan-huan anjaha hasadaonta aima hasadaon na inklusi. Halani ai, lambin pabagas hita pangarusionta marhitei Hata ni Naibata pasal kuria na inklusi na tarsurat bani 1 Korint 12:4-11+18. Bagei do sibere-bere partonduyon, tapi sada do Tonduy.
K Bagei do horja pangidangion, tapi sada do Tuhan.
P Bagei do hagogohon, tapi sada do Naibata, na mangkorhon haganupan ai ibagas haganup.
K Bani ganup do ibere partalar ni Tonduy in bahen hadearon ni ganup.
P Bani na sada ibere marhitei Tonduy in hata hapentaran, bani na sada nari hata habotohon romban hubani Tonduy na sasada in.
K Bani na legan use haporsayaon marhitei Tonduy na sada in, bani na legan sibere-bere pamalumkon marhitei Tonduy na sada in.
P Bani na legan hagogohon mambahen halongangan, bani na legan panjahaion,
K bani na legan panimbangion pasal bagei ni tonduy, bani na legan marsahap ibagas hata na legan, anjaha bani na legan use patorangkon sahap ai.
P Tapi haganupan ai ihorjahon Tonduy na sada in, palegan-legan ibagihon bani ganup romban bani rosuh ni uhur-Ni.
K Tapi iatur Naibata do pagori in, ganup bani iananni bei bani badan, domu hubani rosuh ni uhur-Ni.
P Ase hubani haganup do adong sibere-bere partonduyon; hubani na tading maetek, hubani na mabalu, lansia, na difabel, sonai homa hubanta haganupan. Lang adong in marsibanggalan barang marsietekan, halani ibagihon romban hubani rosuh ni uhur-Ni Naibata. Ase riap ma hita manghargahon ampa mansarihon in hubani haganup halak. Ase marhiteihon ni in lambin talar kuasa pakon harosuhni Tuhan marhitei hita haganupan.
K Amen.
- DODING: “Bujur Do Tuhan In”
Bai rumangni pargoluhan on, Tuhan do na mambobai hita.
Lang tarsuhati ganup holong-Ni in.
Tikki ham lungunan, Ia do na mangapohi ham.
Tikki ham tartolsu, itogu-togu ham.
Bujur do Tuhan in, pasari-sari goluhmu.
Ai iarusi do na masa bani goluhmu.
Lang bahenon-Ni da, hita on tarbador.
Ai hita do anak haholongan-Ni in.
- MANAKSIHON HAPORSAYAON
P Riap ma hita jongjong.
Saksihon hita ma haporsayaonta in, songon na sinaksihon ni haganup halak na porsaya bani sab tanoh on!
P+K Ahu porsaya bani Naibata Bapa, pargogoh na so tarimbang, ….. Amen.
(hundul kuria)
ACARA KHUSUS
-
- Mambasa/Manaksihon Tonah ni Pimpinan Sinode GKPS
- Persembahan Pujian humbani Na Tading Maetek, Na Mabalu, Lansia pakon Difabel
- Aksi Kasih (sesuai hubani na ipasirsir kuria)
- Persembahan Pujian
- Tingting Kuria
- Tonggo Pangapition
- DODING: HALELUYA NO. 496:1+3 “Idilo Tuhan Naibatanta”
Idilo Tuhan Naibatanta, haganup Kuria-Ni in.
Ase manjalo haluahon, nabinoban ni Kristus in.
Tangihon ma dilo-dilo-Ni, pateleng ham ma pinggolmu.
Ulang manosal holi dob ni, bai ujung ni panorangmu.
Jumpahan ulih do ganupan, na sirsir manangihon in.
Na seng ongga marsidalian, mambalosi Tuhanta in.
Tangihon ma dilo-dilo-Ni, pateleng ham ma pinggolmu.
Ulang manosal holi dob ni, bai ujung ni panorangmu.
- AMBILAN: ROM 11:1-2A; 29-32
- PATUMPU GALANGAN
Parambilan Paima iondoskon hita galanganta, tangar hita ma lobei Hata ni Naibata na gabe onjolan banta laho manggalang, aima na tarsurat bani Psalmen 96:8,“Bere nasiam ma bani Jahowa hamuliaon ni goran-Ni, boan nasiam ma galangan, masuk ma nasiam bani alaman-Ni!”
Sonari, ondoskon hita ma galanganta!
Singers (mandodingkon) “Ijon Adong Huboban Tuhan”
Ijon adong huboban Tuhan,
galangan ni goluhku na dob binere-Mu.
Sadiha ma hargani Tuhan,
marimbang pasu-pasu na dob binere-Mu.
Jalo ma Tuhan, sai jalo ma Tuhan.
Di sini aku bawa Tuhan persembahan hidupku semoga berkenan.
Berapalah nilainya Tuhan dibandingkan berkat-Mu
yang t’lah Kau limpahkan.
T’rimalah Tuhan, o t’rimalah Tuhan.
- TONGGO PANUTUP- TONGGO GALANGAN – TONGGO RIAP – PASU-PASU
Parambilan Riap ma hita jongjong
Martonggo ma hita mangondoskon galanganta hubani Tuhan Naibata!
Ham Tuhan Naibata, Bapanami marhitei Tuhan Jesus na marholong ni atei bennami. Tarima kasih ma isombahkon hanami hu Bamu, halani na dob ondos Hata-Mu in bennami, gabe itandai hanami Ham janah masuk hanami hubagas harajaon-Mu, anjaha marulih bani hagoluhan na pinasirsirni Anak-Mu Jesus Kristus Sipaluah hanami. Pasu-pasu Ham ma Hata-Mu na dob ondos bani Kuria-Mu. Pargogohi Ham ma hanami marhitei Tonduy-Mu laho manramotkon anjaha manghagoluhkon pakon pararatkon Hata-Mu in, ase haganup jolma mananda anjaha porsaya hu Bamu. Na so habilangan do buei ni sibere-bereMu in, na dob ijalo hanami mambahen hanami marmalas ni uhur sonari i lobei-Mu. Halani ai, holong ma atei-Mu, jalo janah pasu-pasu Ham ma galangan nami on gabe galangan puji-pujian ampa tarima kasih nami hu Bamu. Ibagas goran ni Anak-Mu Jesus Kristus Tuhan nami. Amen.
K (Mandodingkon) Haleluya No. 340:1
Huondoskon bani Jesus haganupan diringkon.
Ia do pasangaponku sadokah bai goluhkon.
Huondoskon ma, huondoskon ma.
Bani Jesus Sipaluah huondoskon ma.
Parambilan Ham Bapanami na i nagori atas. Sai napapansing ma goran-Mu! Sai roh ma harajaon-Mu. Sai saud ma harosuhni uhur-Mu i nagori tongah on songon na i nagori atas! Bere Ham ma bennami sadarion hagoluhan ari-ari. Sasap Ham ma dousa nami songon panasap nami bani dousa ni hasoman na mardousa dompak hanami! Ulang hanami bobai Ham hu parlajouan! Paluah Ham ma hanami humbani pangagou!
K (Mandodingkon)
Ai Ham do simada harajaon, pakon hagogohon ampa hasangapon sadokah ni dokah ni. Amen.
Parambilan Laho ma nasiam, janah totap ma nasiam, ulang mubah-ubah, anjaha lambin surung ma ibagas horjani Tuhan in, ai ibotoh nasiam, sedo na soya halojaon nasiam ibagas Tuhan in.
Jalo ham (hita) ma pasu-pasu humbani Tuhan Naibatanta!
Ipasu-pasu anjaha iparorot Tuhan Naibata ma ham (hita). Isondangkon Tuhan Naibata ma bohi-Ni hubamu (hubanta) janah maidop ma uhur-Ni mangidah ham (hita). Idompakkon Tuhan Naibata ma bohi-Ni hu bamu (hubanta) janah ipasorap ma damei-Ni bani tonduymu (tonduyta bei). Amen.
K (Mandodingkon) Amen… Amen… Amen.
Selamat Minggu Sahabat Khusus GKPS 2023
“Tapi iatur Naibata do pagori in, ganup bani iananni bei bani badan,
domu hubani rosuh ni uhur-Ni.”
(1 Korint 12:18)
