TATA IBADAH PARTONGGOAN JUBILEUM 120 KELUARGA GKPS TAHUN 2023 (Bahasa Simalungun)

 

Tata Ibadah J-120 Keluarga (Bahasa Simalungun)

TATA IBADAH PARTONGGOAN

JUBILEUM 120 KELUARGA GKPS

 

Sabtu, 2 September 2023

 

Tema:

“Hasadaon pakon Pangidangion na Marbuah”

(Kolosse 1:10)

 

Sub Tema:

“Marmalas ni Uhur ma Hita Pataridahkon Buah ni Haluahonta anjaha Gabe Pasu-pasu i Tongah-tongah ni Gareja, Masyarakat ampa Negara Tandani na dob Matoras Haporsayaonta“

(1 Tessalonika 5:16-18; Jesaya 9:2; Psalmen 118:24)

 

 

1. DODING PAMUNGKAH: HALELUYA No. 407:1-2 “Puji ma Jahowa”

       Puji ma Jahowa Tuhan Naibata, ai marjumbalang do Goran-Ni in.

       Haganupan jolma sai marsombah ma, sai hagoluhkon Hata-Ni in.

       Holsoh haganupan mambur, tubuh ma malasni uhur.

       Gok bai pangarapan holong na totap, rap mangolobkon Goran-Ni in.

 

       Ningon do marsombah bani Naibata, puji ma Ia pargogoh do in.

       Ulang marnaloja sai irikkon ma, rap mambalosi Hata-Ni in.

       Holsoh haganupan mambur, tubuh ma malasni uhur.

       Gok bai pangarapan holong na totap, rap mandodingkon: Haleluya!

 

1. IBADAH
2. VOTUM – INTROITUS – TONGGO

P                Ibagas goran ni Naibata Bapa pakon Tuhan Jesus Kristus ampa Tonduy Napansing sitompa langit pakon tanoh on.

P+K Amen.

P    Ia haporsayaon, ai ma tenger ni uhur bani siarapkononkon,

K    ampa na mambahen torang pasal na so nididah.

P    Marhitei haporsayaon ai do dapotan hasaksian na madear ompung-ompungta hinan.

K    Marhitei haporsayaon do tararusi hita, paboa marhitei Hata ni Naibata do ijadihon dunia on, gabe manjadi na taridah on humbani na so taridah.

P    Haleluya.

Martonggo ma hita!

Diatei tupa ma ipadas hanami hu-Bamu Tuhan, bani haganup pasu–pasu pakon dearni layak-Mu marhitei na dob 120 tahun pardas ni Ambilan na Madear i tanoh Simalungun. Gabe bona ni malas ni uhur do in bannami haganup warga GKPS, sonai homa hanami na satangga on. Gabe pangarapan na toguh ma tongon Hata-Mu bennami haganupan, ase totap idalankon hanami pandiloon-Mu ibagas goluhnami. Ibagas Kristus Jesus, Sipaluah in, ipadas hanami tonggo nami on. Amen.

 

2. DODING: HALELUYA NO. 446:1-2 “Sisada Angkula”

Sisada angkula do hita ganupan, ragam ni pagori do hita tongon.

Na sombuh, bayak dos do in bani Tuhan, seng dong ilioi isarihon do tong.

Tuhanta do na gabe Hayu Anggur, rantingNi do hita on hajojor.

Jolom ma Jesus ulang ham pandur, ase tabun marbuah na ramos.

 

 

Tanda ni sisada angkula do hita, rap marpangarapan bani goluh in.

Nai do bani horja rap marsiurupan, ulang dong na marsidalian ijin.

Tuhanta do na gabe Hayu Anggur, ranting-Ni do hita on hajojor.

Jolom ma Jesus ulang ham pandur, ase tabun marbuah na ramos.

 

3. HATARIMAKASIHON HALANI GOGOH PAKON KUASANI AMBILAN NA MADEAR

P    Tangar anjaha hagoluhkon hita ma gogoh pakon kuasa ni Ambilan na Madear na na tarsurat bani 2 Timoteus 1:6-14.

Halani ai, hupagolpa do ham, ase iparatah-ratah ham sibere-bere ni Naibata na bamu in, marhitei na hutampeihon tanganku bamu.

K    Ai seng tonduy biar ibere Naibata banta, tapi tonduy hagogohon, holong ampa panrajaion diri do.

P    Ai pe, ulang ma ham maila manaksihon Tuhanta, anjaha ulang homa maila ham pasal ahu, na tartutup halani-Si, tapi dihut ma ham tene manaron halani Ambilan Na Madear in ibagas gogoh na humbani Naibata.

K    Ai ipaluah anjaha idilo do hita marhitei pandiloon na mapansing, sedo halani pambahenanta, tapi mangihutkon sura-sura ampa idop ni uhur-Ni do, na binere-Ni banta ibagas Kristus Jesus, humbani mulani nari,

P    sonari nani, ipatidak marhitei partalar ni Sipaluah hita, Kristus Jesus, na parontihon hamatean, anjaha na paulgapkon hagoluhan ampa biak na so ra matei marhitei Ambilan Na Madear in.

K    Hujin do ahu ipabangkit gabe siparambilan, apostel ampa guru,

P    anjaha halani in do ase manaron ahu sonon, tapi seng maila ahu, ai hutanda do Ia, na huhaporsayai, anjaha tenger do uhurhu, margogoh Ia manramotkon na pinasimpankon-Ni in bangku das hubani ari simagira.

K    Marsijoloman ma ham bani hata hasintongan, na binogeimu hun bangku, ai ma tiru marhitei haporsayaon ampa holong bani Kristus Jesus.

P    Ramotkon ma arta na madear, na pinasimpankon in bam marhitei Tonduy Na Pansing, na marianan ibagas hita. Amen.

 

 

 

4. DODING: HALELUYA NO. 472:1-2 “Seng Adong na Dos”

Seng adong na dos, songon Ham o Tuhan, na sai sirsir mangkasomani hanai on.

Pitah Ham tongon, Naibata na sintong, ganup pambaenan-Mu gok halongangan do.

Sagala bangsa do, na jinadihon-Mu marsombah roh hu lobei-Mu.

Pasangapkon Ham, ronsi sadokahniin, timbul janah pansing do Goran-Mu ijin.

 

Sai ajarhon Ham, dalan-Mu bangku on, ase mardalan au bai hasintongan-Mu.

Sai baluti Ham, uhurhon sai tongtong, ase marhabiaran bani Goran-Mu.

Ai pitah Ham Tuhan, na boi haposankin, bai goluh sidalanankin.

Bokas-Mu nuan, siirikononkin, na gabe suluh bani pardalanankin.

 

5. TONGGO PANGAPITION

Sitonggohonon:

• Pargoluhon ni keluarga pakon horja siganup ari ase totap ipasu-pasu Tuhan janah mangkorhon buah na madear.
• Pimpinan Sinode GKPS, haganup Pandita, Penginjil, Vikar, Sintua, Syamas, pengurus Seksi Kategorial pakon haganup unit-unit pelayanan ampa badan pelayanan na adong i GKPS, ase margogoh laho mangkorjahon haganup horja pangidangion bahen hasangapon ni Tuhan.
• Pimpinan Majelis Jemaat, Majelis, Pengurus Resort, Pengurus Seksi Kategorial lingkup Resort pakon jemaat, ronsi haganup warga jemaat na adong i kuria pakon Resort.
• Bangsa ampa Negara, Pemimpin ronsi masyarakat ase totap ihasomani Tuhan tarlobih mandompakkon tahun politik ampa persiapan Pemilu tahun 2024, ase mardalan ibagas na torsa.
• Pakon na legan …

 

6. DODING: HALELUYA NO. 496:1-2 “Idilo Tuhan Naibatanta”

Idilo Tuhan Naibatanta, haganup Kuria-Ni in.

Ase manjalo haluahon, nabinoban ni Kristus in.

Tangihon ma dilo-dilo-Ni, pateleng ham ma pinggolmu.

Ulang manosal holi dob ni, bai ujung ni panorangmu.

 

Sai jalo ma ganup hata-Ni, sai buhai ham ma uhurmu.

      Sonai homa ge sinondang-Ni, in ma baen gabe suluhmu.

Tangihon ma dilo-dilo-Ni, pateleng ham ma pinggolmu.

Ulang manosal holi dob ni, bai ujung ni panorangmu.

 

7. AMBILAN: PSALMEN 107:21

“Ningon pujion ni sidea do Jahowa, halani idop ni uhur-Ni ampa halongangan na binahen-Ni bani anak ni jolma,”

“Biarlah mereka bersyukur kepada TUHAN karena kasih setia-Nya, karena perbuatan-perbuatan-Nya yang ajaib terhadap anak-anak manusia.”

 

Salam Jubileum 120 ma hubanta haganupan.

Psalmen 107 aima pamujionni halak na dob maluah humbani hamagouan banggal pakon situasi na marbahaya. Ipataridahkon par-psalmen pambalosion ni Naibata bani tonggo ni sidea bani panorang na horahan – loheian (Psalmen 107:4-9), sanggah ibagas parjabolonan (Psalmen 107:10-16), sanggah boritan, marsik anjaha das hu horbangan ni hamateian (Psalmen 107:17-22), sonai homa sanggah mandompakkon haba-haba pakon gilumbang (Psalmen 107:10-16). Haganupan in boi ibolus sidea halani pangkasomanion ni Naibata pakon halani gogohni haporsayaon bani panramotionni Naibata. Halani ai do ase ihatahon bani ambilan on, “Ningon pujion ni sidea Jahowa.”

 

Maningon mamuji Jahowa, ai do homa na gabe hataridahanni gogoh pakon kuasani Naibata ibagas na iolobkon hita pardasni Ambilan na Madear na dob 120 tahun. Maningon mamuji Tuhan do hita halani Ambilan na Madear na dob marhorja banta. Maningon mamuji Tuhan do hita halani panjalo ni orangtuanta pakon ompungta mambahen dihut hita manjalohon pakon mananda haluahon na humbani Tuhan. Maningon mamuji Tuhan do hita marhitei hasadaon na ipatupa Naibata hubanta ibagas hulanan na margoran Gereja Kristen Protestan Simalungun (GKPS). Maningon mamuji Tuhan do hita bani haganup pasu-pasu pakon pangkasomanionni Naibata bani goluhta marsada-sada sonai homa pangkasomanion ni Naibata hubanta na satangga on.

 

Idop ni uhur ni Naibata do homa na iahapkon par-psalmen on mambahen sidea boi manjalo haluahon. Sedo halani gogohni sidea atap halani hebat ni sidea ase maidop uhur-Ni Naibata hubani sidea. Sedo halani bangsa na pinilih sidea ase sonin ma jenges ni Naibata padiparhon sidea hubani ianan na sonang pakon maluah humbani hamateian. Haganupan in pitah halani idop ni uhur pakon halani halongangan na ibahen Naibata. Tontu halani idop ni uhur pakon halongangan na humbani Naibata do homa boi marhorja haganup misionaris pakon buei Pandita, Penginjil ampa siboan Ambilan na Madear na marhorja hu sab ianan i Simalungun, mambahen martambah-tambah bilanganni na manjalo haluahon pakon manjalo Hata ni Naibata. Tontu halani idop ni uhur pakon halongangan na humbani Tuhan do homa mambahen boi hita gabe anak-anak ni Naibata na ipatotap gabe siboan pasu-pasu janah sari.

 

Idop ni uhur ni Naibata aima gogoh pakon bona ni malas ni uhur hubanta ibagas na mandalani haganupan pargoluhanta. Idop ni uhur ni Naibata aima sijolomanta ase totap marpangarapan hubani Naibata. Pos ma uhurta bani idop ni uhur ni Naibata na torus marhorja pakon manggomgomi hita. Idop ni uhur ni Naibata do totap mangkasomani hita mandompakkon hamajuan ni zaman sondahan on. Anggo dunia on nuan marosuh hubani “kecerdasan buatan” na gabe parhiteian mangurupi buei horja pakon aktivitas, tontu hubanta pe domma ipasirsir Naibata idop ni uhur na manongtong. Nuan dunia on marlumba pataridahkon “sipodasan” pakon “siurahan,” tapi hubanta totap do ipasirsir Naibata na porlu bani panorangni. Halani ai marhitei idop ni uhur pakon kuasani Naibata, lang ongga hatadingan hita bani dunia on. Sipambobai do hita i dunia on, halani hujai do hita idilo pakon ipatotap.

 

Ase marhitei na idingat hita sadarion topat 120 tahun kuasa pakon gogohni Ambilan na Madear marhorja banta, gabe pos ma uhurta, lang marnarotap idop ni uhur pakon  tanda halongangan na humbani Naibata. Sirsir ma hita ibobai idop ni uhur ni Tuhan marhitei na mandalankon haganup Hata-Ni. Selamat mangolobkon kuasa pakon hidorat ni Hata ni Naibata na gok ibagas kuasa pakon halongangan. Bere hita uhur pakon hadirionta lambin ipakei Tuhan ase lambin marhataridahan idop ni uhur ni hubani dunia on. Amen.

 

8. DODING: HALELUYA NO. 499:1-2 “Panorang Olob-olob”

(irik patumpu galangan olob-olob)

Panorang olob-olob, sai roh ma hita ganupan.

Riap ma mangolobkon, Ambilan na ondos banta.

Domma lihar nuan ganup i kehen in, ‘ge i huluan.

In ma kuasa ni Hata-Ni Tuhan in, mandilo hita.

 

Hata ni Naibatanta, do mambaen mangasup hita.

Bani sagala horja, na dear bani Tuhanta.

Domma lihar nuan ganup i kehen in, ‘ge i huluan.

In ma kuasa ni Hata-Ni Tuhan in, mandilo hita.

 

9. TONGGO GALANGAN – TONGGO HAM BAPANAMI – PASU-PASU

P    Martonggo ma hita mangondoskon galanganta hubani Naibata!

Ham Tuhan Naibata na totap mamasu-masu hanami. Gok ibagas malas ni uhur do hanami marhitei na boi hanami riap mangalobkon na dob 120 tahun pardasni Ambilan na Madear i Simalungun bani rumah on. Gabe tanda ma tongon in hubennami ase totap hanami marpangarapan bani idop ni uhur-Mu pakon kuasani Ambilan na Madear. Martarimakasih hanami bani haganupan pasu-pasu-Mu na totap sirsir manggoki haganup tonggo pakon na ihaporluhon hanami i rumah on. Ipaondos hanami ma tarima kasih in marhitei galangan on. Pasu-pasu Ham ma in, ase talup bahen hasangapon pakon hamuliaonni Goran-Mu. Ibagas Jesus Kristus jalo Ham ma tonggo pakon galangan nami on. Amen.

Riap ma hita martonggo marhitei tonggo na niajarhon ni Tuhan Jesus hubanta!

P+K   Ham Bapa nami na i nagori atas, ……………….. Amen.

P       Idop ni uhur ni Tuhan Jesus Kristus, pakon holong ni atei ni Naibata Bapa ampa parsaoran ni Tonduy Napansing ma mangkasomani hita haganupan. Amen.

P+K      (Mandodingkon) Amen, Amen, Amen.

 

Ijon iondoskon hanami galangan olob-olob humbani keluarganami:      Keluarga: _____________________________________      Bueini:        Rp_____________________                  (  ……………………………………………………. )                                                                                                                                     Humbannami,                                                              Na Manjalo,   (                                            )                                     (                                                 )