Bahan PA Bapa, XIV DOB TRINITATIS, Minggu, 10 September 2023
Nas : Lahoan Ni Apostel 9:32-42
Usul Doding : Haleluya No. 349: 1-2
Tema : Setia Melakukan Kebaikan
Tujuan : Agar kaum bapa tetap setia melakukan kebaikan, sebab Tuhan senantiasa mengingat setiap perbuatan baik kita.
Kuasa Ni Jesus Na Pamalumhon
Horas bani nasiam bapa na hinaholonganni Tuhan Jesus Kristus. Tarpuji ma Tuhan na mambere banta panorang na jenges markebaktian janah secara khusus manjalo hatani Tuhan bani panorang on. Hata ni Tuhan na sihol jaloonta bani panorang on aima pasal kuasa ni Jesus Kristus na pamalumhon. Malas tumang uhur, bahasa Jesus na isombah hita ai, aima Tuhan na markuasa laho pamalumhon na boritan bahkan pagoluhkon na domma matei. Haganup na masa ai aima na sihol ijalo hita gabe ambilan banta panorang on. Haporsayaonta, hamaluman in pe ijalo hita bani panorang on marhitei haporsayaon na sintong hubaNi pakon kuasa ni Jesus Kristus. Amen??? Halani sonai do na ijalo si Eneas pakon si Tabita marhitei kehadiran ni si Petrus na mangadongkon hamaluman ibagas kuasa ni Jesus Kristus.
Halongangan ai tarjadi sanggah bani pardalanan ni Petrus mangidangi bani piga-piga ianan, dob ai laho ia
marayak halak namapansing na i Lidda. Bani huta ai adong na margoran si Eneas na oyangon anjaha na tibal-tibal bani podomanni ualuh tahun dokahni. Jadi nini si Petrus ma hu bani, “Ale Eneas, ipamalum Jesus Kristus ma ho! Jongjong ma ho, anjaha patorsa ma podomanmu!”.
Na luar biasani, mintor boi jongjong do si Eneas. Tontu ra tarsonggot ganup halak na mangidah ai. Artini, sadokah ualuh tahun ai ia tibal-tibal bani podoman, na ongga mengalami bosan, bahkan bisa jadi lang dong be pangarapan bani pasal hamaluman na boi ijalooni. Hape nyatani bani panorang ai, malum do naborit ni, boi ia jongjong. Tarjadi suasana na berubah. Lang tarbayangkon sonaha malas ni uhurni si Eneas pakon keluargani. Akhirni, viral do barita ai, das bani parhuta na i Lidda ai. Halani ganup parhuta ai pe domma mambotoh parah janah lang mungkin be boi malum si
Eneas ai. Tapi bani hamaluman na ijalo si Eneas, dihut do pangisi ni Lidda ai gabe marmalas ni uhur marhitei kuasa ni Jesus Kristus na domma pamalumhon si Eneas. Lang pitah malas ni uhur na iahapkon bani na masa na tarjadi bani si Eneas, tapi lambin manggoluh haporsayaon ni parhuta ai age pakon huta na dohor huta ni sidea, aima Tanoh Saron. Lambin manggoluh ibagas Tuhan sidea ganup. Sungkun-sungkun na menarik sonari, mase lang si Petrus ibahen sidea gabe tuhan, mardingat ia do na langsung taridah marsahap pakon pamalumhon si Eneas? Atap, boi do homa iangkat sidea si Petrus gabe pahlawan i huta ai? Anggo ibayangkon bani zamanta sonari, boi do si Petrus on gabe tuhan, sisombah-sombahon ni jolma, lang Jesus Kristus? Mase tene?
Anggo tulimat hita bani hata na ipadas si Petrus sanggah marsahap bani si Eneas, isobut do ijai, bahasa, “Ale Eneas, ipamalum Jesus Kristus ma ho!, pst…”. Memang Petrus do na taridah langsung na marsahap bani si Eneas, tapi seng tarbahen si Petrus mambahen hamaluman in anggo lang ibagas goran ampa kuasa ni Jesus Kristus. Jadi, Petrus pe isadarini do bahasa parhiteian do ia, lang simada kuasa in, tapi Jesus Kristus in do. Janah, Petrus pe lang homa ipataridahkonni bahasa ia do na luar biasa ai, tapi totap do Tuhan in na ipasangapni. Ase, humbani hata in do ganup sidea, aima si Aneas, pangisi ni Lidda age na das hu Tanoh Saron, paboa Tuhan in do na markuasa na domma pataridahkon halongangan i tongah-tongah hutani sidea. Halani ai, lambin manggoluh ibagas Tuhan in do sidea.
Bani halongangan na luar biasa ai, gabe tarsar ma pasal pangidangionni si Petrus na ipakei Tuhan na boi pamalumhon na boritan. Bani huta na legan na lang pala daoh hun Lidda na margoran Joppe, roh ma dua halak marayak si Petrus na laho patugahkon bahasa adong do sada halak susian naboru, margoran si Tabita (artini Balua), na surung mangkorjahon na madear ampa mambahen idop ni uhur. Si Tabita on sebelumni boritan tapi, sonari domma marujung goluhni. Sonai ma kira-kira informasi na iboban dua halak ai hubani si Petrus, na mungkin 
sanggah padaskon aipe domma ibagas na hosah-hosah mardingat maningon sapodas-podasni ia roh marayak sidea halani kedukaan na borat ijalo sidea. Manangar barita ai mintor bingkat do si Petrus mangkasomani sidea hu rumah duka ai. Bani na dob das sidea, iidah ma bangkei ai domma iparidi janah domma i kamar pardatas. Iboan hu kamar pardatas, artini aima ianan sibolakan janah hunjai ma holi langsung iboan bangkei ni si Tabita hupanimbunan. Manangar domma das si Petrus i rumah ai, marrohan ma halak, khususni na mabalu na tangis-tangis. Hape, sanggah goluhni si Tabita on marbakat do ia padearhon baju-baju ampa mantel, na mungkin ipamberei do homa secara garatis. Tontu halak na adong kedekatan ampa pengalaman na jenges secara psikologis, hamagouan ma tongon halani parujung goluhni si Tabita on.
Halani dorak-dorakni na roh bani panorang ai, isuruh si Petrus ma sidea hu darat ase situasi lebih tenang 
halani laho martonggo ia. Idohori Petrus ma bangkei ai, lanjar nini ma, “Ale Tabita, jongjong ma!”. Ipabodak si Tabita ma matani, janah mintor hundul ia. Ibere si Petrus ma tanganni laho pajongjongkon si Tabita mamboan ia juppah pakon inang na mabalu na pusokan uhur ai. Lambin tar sar ma barita halongangan ai i sab Joppe, janah lambin buei ma na porsaya bani kuasa ni Tuhan.
Nasiam bapa na hinaholonganni Tuhan Jesus Kristus. Lambin tambah ma tongon pangarapanta bani pargoluhan on. Tuhan Jesus Kristus na isombah hita ai aima Tuhan na markuasa, janah boi do ipamalumni ganup panahit bahkan pagoluhkon na dob matei pe. Adong do hita dob manjalo hata ni Tuhan, sihol mangahapkon halongangan na humbani Tuhan in halani panahit, sitaronon, pingkiran na borat, age pusok ni uhur na roh banta bani panorang on. Porsaya ma ham bapa, markuasa do Tuhan Jesusta in laho mangurupi pakon paubahkon na idompakkon sonari on. Lang tarbatas kuasaNi, hinan Ia mambahen halongangan, sonari pe boi do, bahkan patar, haduan, ronsi sadokahni-dokahni tarbahenSi do halongangan in. Halani Ia do simada haganup na adong i dunia on.
Bani ambilan on, adong do parhiteian na ibahen Tuhan Jesus Kristus na laho pataridahkon halongangan in, aima si Petrus. Tangkas do ibotoh hita, bahasa kuasani Tuhan Jesus Kristus do ase boi tarjadi ganup halongangan ai. Ai do homa na ipataridahkon si Petrus hubanta panorang on. Artini, ganup hita pe boi do gabe parhitei ni Tuhan laho pataridahkon halongangan in. Na ipangindo ijon aima, maningon ibagas kuasani Tuhan Jesus Kristus do. On ma haporsayaonta, sonaha pe na ijalo hita bani panorang on, anggo iboan hita ai hubani Tuhan janah, ihatahon hita ibagas goran ampa kuasani Jesus Kristus, margogoh janah maluah do hita humbani haganup na mambahen pusok uhurta. Janah, on homa na ipataridahkon hita hubani keluarganta, bahasa haporsayaon ni bapa GKPS, boi do ia gabe parhiteian ni Tuhan laho pataridahkon halonganganNi hubani keluargani na sedang maruntol ampa na marsitaronon, marhitei kuasa ni Jesus Kristus ipatuduhkonni hubani sidea. Amen.
