Minggu: 17 Desember 2023 (Advent III)
Nas: Jesaya 12:2-6
Usul Doding: Haleluya No. 28:1-2
Tema: Siapkan Hatimu (Pasirsir ma Uhurmu)
Tujuan: Agar Kaum Bapa bersiap dan mawas diri menanti kedatangan Tuhan.
NAIBATA DO HALUAHON BANGKU
Salam advent ma hubanta haganupan……
Marhitei hamajuan ni zaman pakon teknologi sondahan on, boi do ibahen “penampilan ni halak na dob marumur 70 tahun, gabe songon marumur 30 tahun”. Bohi na domma mulai manroyut halani umur pakon keadaan, marhitei bageini aplikasi boi do taridah mulus pakon “glowing”, minar anjaha gok ibagas tawa. Memang nuan on idompakhon hita ma fenomena rekayasa digital. Rekayasa digital on, boi do menghibur anjaha pamalas uhur. Marhitei teknik AI (Artifical-Intelligence), humbani modifikasi “video rewrite” pakon “trek audio” na marbeda na dob ikembangkon humbani tahun1997, das hubani program “face to face” yang na boi “me-rekayasa foto pakon video” marhitei “kecerdasan buatan” na itandai hita marhitei “Deep-fake” humbani tahun 2016. Dob ai hadir homa aplikasi mobile na gabe “trend-topic” aima “face-app” aima na ibahen Yaroslav-Goncharov na ipungkah marhitei na sihol ia “menghibur” hasomanni ase ulang “marpirungut” bohi ni, anjaha ibahen ma gambar ni na sengeh. Haganupan in pataridahkon paboa bohi, sora, tampilan, haganupan boi “irekayasa” halani tujuani pitah mambere “hiburan” pakon parohkon pitah “rasa sesaat”. Hansi pe sai na adong do gunani pakon manfaat ni banta, tapi haganupan in pitah “temporer” hansi pe tujuanni aima “hiburan”.
Bani teks panorang Minggu advent on ipagolpa do hita marhitei doding puji-pujian ni halak na dob maluah. Doding on lang parsatongkinan tapi pataridahkon doding puji-pujian na manongtong. Isi ni doding on aima mangulaki na masa bani halak Israel sanggah luar hun tanoh Masir (Bdk. 2 Musa 15:22-24). Aima bani panorang na maluah sidea humbani parjabolonan i Masir, anjaha nuan sidea domma manlopusi laut sigerger na pataridahkon malas ni uhur na marisi hamonangan pakon haluahon. Isobut do bani panorang ijia paboa martahan do ibagas tolu (3) ari doding ni sidea ai. Anjaha dob honsi salosei 3 ari gabe roh ma use ungut-ungut pakon uhur na hengkeng dompak Naibata. Halani ai do marhitei teks on ipagolpa Jesaya do sidea ase ulang mulak sidea songon na dob ihorjahon ompung ni sidea i halimisan ai. Isuratkon do bani ayat 1: …… ai dob igilai ham ahu, surut do ringis-Mu…. On aima hataridahanni padan ni Naibata bani Jesaya 10:24-25, paboa sihol marbalik do ringis ni Naibata hubani bangsa na mangodoh-odoh bangsa Israel. Ipataridahkon Jesaya do hubani bangsa ai, paboa hona uhum ni Naibata do sidea halani na mangengkar sidea bani padan ni Naibata. Rahanan do Israel ai marsombah hubani Baal, aima gana-gana na lang margogoh, anjaha rahanan do sidea marhasoman pakon Masir laho manlawan Assyur, marimbang mangajamkon padan pakon gogoh ni Naibata. Anjaha ujungni gabe tarbuang ma sidea gabe bangsa na talu anjaha gabe jabolon bani Bangsa Assyur.
Bani situasi na tarbuang, hona uhum ampa gabe jabolon sidea, pasti do mahol tumang laho mandoding pakon padaskon pamujion hubani Naibata. Pasti do na manggoki uhur ni sidea aima ase maluah humbani habuangan Babel. Halani ai do ase marhitei bagah-bagah na humbani Naibata, sihol ipasuang Naibata do sidea. Sihol ibere Jahowa do hubani Israel ari na gok ibagas hasonangan pakon malas ni uhur. Ai do ase ihatahon bani ayat 1 ai: anjaha hatahononmu ma bani ari ai……………. Jesaya sihol patangkaskon hubani sidea paboa ibagas Jahowa ningon totap adong pangarapan pakon haluahon. Halani ai na sihol ipangindo Jesaya hubani bangsa ai hansi pe gok ibagas uhur na “galau” sidea ase totap marmalas ni uhur pakon padaskon pamujion pakon doding hubani Naibata. Bani situasi na taruhum anjaha gabe jabolon sidea, totap do maningon adong pangarapan anjaha jumpahan apoh-apoh halani adong do apoh-apoh ampa haluahon na humbani Naibata (ayat 1-3). Lang torus Naibata ai manringis anjaha manguhum, tapi roh do homa ia laho mangapohi pakon mambere haluahon.
Tangkas do ipatugah Jesaya marhitei teks on parhiteian ase mandoding pakon mamuji Tuhan aima na tarsurat bani ayat 3-6 aima:
- Naibata do haluahon bangku
- Jahowa do gogohku pakon dodingku
- Ia do gabe hatuahon bangku
- Marmalas ni uhur ma hita manahui bah humbani bah tubuh haluahon.
- Pambahenan ni i tongah-tongah ni bangsaNi
- Timbul do goran-Ni tongon
- Ai banggal do na binahen-Ni
- Ai banggal do i tongah-tongah nasiam Na Pansing ni Israel.
Humbani parhiteian in gabe taridah ma tongon paboa bona ni pandodingon pakon pamujionta aima na hunbani Naibata sandiri. Panandaion na sintong dompak hajongjongan pakon pambahenan ni Naibata do hape na pahotkon parhiteianta laho mamuji pakon mandoding dompak Naibata. Mangidah pambahenan ni Naibata songon na tarsurat bani Bibel do homa hape na boi ibahen hita gabe dalam ase lambin marlipat ganda pamujian pakon doding ta dompak Naibata. Ningon mangahap do homa hita bani hatuahon na ipasirsir Naibata banta marhitei na dob “iain” hita ase tongon ma hita gabe niombah na martuah halani Bapanta aima Naibata na martuah. Humbani haganup parhiteian na isuratkon Jesaya on, gabe taridah ma tongon hubanta “alasan utama” laho mandoding pakon mamuji Tuhan.
Secara khusus hubani bangsa Israel na bani panorang ai sanggah hona uhum humbani Naibata, ipangindo Jesaya do ase itaurhon sidea paboa Naibata do haluahon. Hansi pe nuan sanggah manaron sidea halani dosa pakon parlahouni sidea, tapi totap do sirsir haluahon humbani Naibata. Halani ai marhitei bahan PA on gabe tangkas ma hubanta na boi do hape halak na marsitaronon, mandompakhon paruntolon na borat sonai homa halak na mandompakhon uhuman pakon tarbuang, maningon do totap padaskon pamujion pakon malas ni uhur hubani Naibata. Bani Jesaya 11:1-6 ipatorang do pasal Raja Damei na sihol roh; anjaha igoki Naibata do parrohni Raja Damei ai marhitei Tuhan Jesus Kristus songon na ipestahon pakon idingat hita marhitei minggu advent. Halani ai pandodingon pakon pamujion hubani Naibata dihut do homa gabe hataridahanni ma mamestahon advent pakon marmalas ni uhur ibagas Kristus. Kristus do tongon haluahon banta. Halani ai pos ma uhurta, sai ipatalar do haluahon in banta anjaha ibagas Kristus. Mandoding ma hita mamuji Tuhan na isuratkon bani Jesaya 40:31: halak na martenger ni uhur bani Jahowa jumpahan gogoh mardapot-dapot, anjaha marhabong ni haluhuy do sidea naik; marlintuni pe sidea tapi seng marnaloja, mardalani pe sidea, tapi seng marnangayotan. Halani Jahowa do haluahon banta, ase dilo hita Jahowa, patugah hita ma pambahenan-Ni i tongah ni bangsa-bangsa. Selamat minggu advent ma hubanta, sai tarbarita ma habanggalon-Ni pambahenan-Ni Jahowa i sab tanoh on. Amen
