Nama Minggu : Advent IV, 24 Desember 2023
Nas : Jesaya 7:10-17
Usul Doding : Haleluya No. 29:1-2
Tema : Allah Beserta Kita
Tujuan : Agar Kaum Bapa Hidup dalam Pengharapan, sebab Allah Bersama Kita.
IMMANUEL: HASOMANTA DO NAIBATA
Salam advent ma hubanta haganupan……
Bani pargoluhan on buei do jumpah hita tanda na laho pasingatkon pakon pagolpahon hita laho mangkorjahon atap managam na sihol masa. Anggo lolei hita bani tanda-tanda ai atap lang iparimbagaskon hita, boi do parohkon na hurang dear atap parohkon harugian hubanta. Misalni: anggo songon borjog ma ari (mendung-berawan) mararti ma ai ase ipasirsir hita payung, halani sihol roh ma udan. Halani ai anggo adong ma taridah tanda-tanda, ningon intei do hita anjaha pasirsirhon diri laho mambalosi atap marjaga-jaga ase ulang parohkon harugian pakon na hurang dear hubanta.
Sonai do homa na sihol ipadas perikop on. Bani Jesaya 7:10-17, ipatugah Jesaya do paboa hata ni Naibata roh hubani Raja Ahas sihol pabotohkon na sihol masa hubani Raja Ahas. Lupa anjaha lang ipardiatei Raja Ahas, tanda na roh humbani Naibata. Domma ihatahon bani Jesaya 7:1-9, ase totap porsaya ia bani pangkasomanion ni Naibata, hansi pe sihol roh munsuh na laho parsedahon sidea. Ihatahon Naibata do homa hubani ase ipangindo tanda humbani Jahowa hun nagori toruh na bagas, atap hun datas humbani ianan na gijang (ayat 11). Tanda na sihol ipadas Naibata aima tanda haluahon na sihol ipamasa Naibata hubani sidea. Tapi Raja Ahas manulak anjaha lang mangindo tanda ai humbani Jahowa. Ihatahon do bani ayat 12: Tapi nini si Ahas ma: “Seng mangindo ahu, anjaha seng ra ahu manlajou Jahowa”. Halani na manulak anjaha lang intei Raja Ahas bani tanda pakon na sihol bahenon ni Naibata, gabe talu ma tongon Israel ibahen Assyur.
Humbani mungkahni pe domma ipagolpa nabi Jesaya Raja Ahas on. Tapi in pe itulak Raja Ahas do homa. Tanda na sihol ibere Tuhan aima: Boratan rumah sada anak boru, tubuhkononni ma sada anak, bahenonni ma goranni: Immanuel, mentega pakon manisan do sipanganonni, paima ibotoh manulak na jahat ampa mamilih na madear. Tanda na ipadas hubani Raja Ahas on aima bagah-bagah ni Naibata pasal Tuhan Jesus na sihol roh songon na isuratkon bani Mateus 1: 23. Bagah-bagah on pataridahkon habujuron ni Naibata na totap padaskon holong-Ni hansi pe bangsa-Ni tarmasuk Raja Ahas on totap ibagas uhur na hengkeng ampa manlawan dompak Naibata. Tanda-tanda on pataridahkon paboa Naibata lang ongga sip anjaha soh bani haganup na masa bani bangsani. Isobut do ai marhitei goranni na sihol roh ai aima: Immanuel; artini Naibata do hasomanta. Anggo sadokah ni on Naibata aima “transenden” aima Naibata na marianan bani ianan na gijang, sonari marhitei bagah-bagah on, gabe Naibata na “imanen” aima Naibata na totap sirsir riap pakon hita pakon adong i tongah-tongahta. Marhitei Naibata na Immanuel, bani perikop on sihol pataridahkon na totap do Naibata ai mampardiatei anjaha manjagai Raja Ahas pakon bangsa Israel. Bani ayat 16 isuratkon do: tongon paima ibotoh manulak na jahat ampa mamilih na madear, tarulang ma nagori ni raja na dua ai, hinabiaranmu sonari.
Isobut Jesaya do homa paboa marhitei Immanuel; sihol ipajongjong pakon ipatotap Naibata do bangsa Israel ai. Marhitei Immanuel, ibere Naibata do tanda pasal pangarapan pakon haluahon. Tanda ai pataridahkon banggal ni holong ni Naibata pakon sihol ni uhur ni Naibata ase bangsa Israel jumpahan pasu-pasu ampa hatuahon. Hape bani teks on ipataridahkon do sikap ni Raja Ahas na manulak haganup tanda tanda ai. Iajamkon Raja Ahas do hagogohon pakon pingkiranni sandiri. Iajamkon do parbinotohan pakon gogoh ni prajurit na dong bani mandompakhon musuh. Ujungni ipakei Naibata ma bangsa Assyur laho manguhum pakon manaluhon Raja Ahas. Lang tarkahua Raja Ahas gogoh ni Assur. Lang tarpangajamkonsi be pingkiran pakon gogoh ampa kuasa na dong bani. Lang intei anjaha parduli ia bani tanda-tanda na humbani Naibata. Hape ibagas tanda-tanda na ibere Naibata hubani, taridah do ijai idop ni uhur pakon holong ni Naibata. Ujungni panosalan ampa sitaronon ma na roh hubani Israel pakon hubani Raja Ahas. Lang hasonangan be na masa, tapi sitaronon ampa gabe halak na talu anjaha tarbador ma.
Hita haganupan na mar pesta advent bani minggu on…….
Patut hita marmalas ni uhur halani domma ipasirsir Naibata banta “Immanuel” aima Tuhan Jesus Kristus. Kristus aima tanda humbani Naibata na mambobai hita hubani pangarapan ampa haluahon na dob igoki Naibata ibagas Kristus. Marhitei na manjalo Kristus pakon pasirsirhon diri mangalo-alo Kristus, gabe jumpah hita ma pangarapan na totap ampa haluahon na sadokah ni dokahni. (Bdk. Johannes 3:16). Marhitei na manjalo hata ni Naibata hita bani Minggu Advent on, gabe tangkas ma hubanta tanda-tanda na humbani Naibata ibagas Kristus Jesus. Domma buei ibere Tuhan Jesus hubanta tanda-tanda; aima tanda-tanda pasal diri-Ni sandiri pakon tanda-tanda pasal goluh simagira. Haganupan in gabe barita malas ni uhur ma hubanta anjaha parohkon pangarapan na manggoluh. Pambalosion na sintong bani tanda-tanda na ipasirsir Naibata ibagas Kristus aima pangabak pakon paruhuranta na tongtong sirsir manramotkon pambahenan pakon paruhuran ase totap tartuju hubani Kristus, sedo hubani na roh hun dunia on. Pos ma uhurta, Immanuel do Naibata hubanta. Pos ma uhurta sirsir do pangkasomanion na humbani Naibata bani haganup na masa bani goluhta. Selamat minggu advent ma hubanta. Sirsir ma hita managam ari ni Naibata anjaha gok ibagas malas ni uhur. Immanuel, hasomanta do Naibata. Amen.
