TONAH PIMPINAN SINODE GKPS BANI PEMILU TAHUN 2024

Pematangsiantar, 31 Januari 2024

No.      : 68/3-PS/2024

Hal      : Tonah Pimpinan Sinode GKPS bani Pemilu 2024

Hubani Nahinormat:

Haganup Warga GKPS

Tiba Pengantar Jemaat

Bani ianan ni bei.

Salam ibagas goran ni Tuhan Jesus Kristus!

Jumpah ma panorang pesta demokrasi sahali lima tahun bani bangsa Indonesia marhitei Pemilu (Pemilihan Umum) tanggal 14 Februari 2024. Gabe Pemilu na strategis do on halani Pemilihan Anggota Legislatif (Pileg) ipadomu pakon Pemilihan Presiden & Wakil Presiden (Pilpres). Halani ai, partisipasi aktif ni haganupan warga GKPS porlu tumang bani haganup proses Pemilu on songon na isobut bani Jeremia 29:7, “Porluhon hanima ma hadoharon ni huta pambuangan-Ku bannima, anjaha apiti hanima ma sidea i lobei ni Jahowa, ai ibagas hadoharon ni sidea ai dihut do hanima mardohar.” Maronjolan hubani semangat perbaikan demokrasi pakon pasaudkon Pemilu na gok ibagas damei ampa hasintongan, ipadas hanami tonah parmahanion on:

1. Pemilu aima parhiteian laho membangun ampa memperkuat demokrasi pakon Negara Kesatuan Republik Indonesia (NKRI), sedo pitah panorang laho mamilih halak na sihol marianan bani jabatan na adong. Halani ai, ramotkon hita ma hasadaon anjaha padaohkon parbolah-bolahan songon na isobut bani 1 Korint 12:25, “ase ulang adong parbolah-bolahan ibagas badan, tapi ase marsiurupan pagori samah pagori.”
2. Mampardiatei ampa marlajar humbani panorang na dob salpu mandompakkon Pemilu, sai hotop ope masa “politik uang” pakon “politik SARA.” Bagei do ibahen pamarentah himbauan pakon dalan ase moru in, tapi bani situasi pakon keadaan bani masyarakat, sai adong ope tarbogei barita na masa ope in. Halani ai, iojur hanami ase haganup warga GKPS padaohkon diri pakon manlawan praktik “politik uang” pakon “politik SARA.” Iojur hata ni Naibata do hita bani 2 Timoteus 2:15, “Haringgaskon ma patuduhkon, paboa na bujur ham i lobei ni Naibata, songon sada parhorja na so tarbador, na padalankon hata hasintongan in pintor-pintor.”
3. Iojur hanami do homa ase haganup warga GKPS pakon haganup warga masyarakat berpartisipasi aktif laho mengawasi proses Pemilu, khususni tahapan pemungutan pakon penghitungan suara, ase proses Pemilu mardalan torsa, jujur, ampa adil. Marhitei partisipasi aktif na sonin gabe jumpah ma tongon hasil ni Pemilu, aima “pilihan murni masyarakat.” Marhitei pengawasan na sonin, ipataridahkon hita ma kehadiran pakon tanggung jawab ni gareja na dihut mambobai demokrasi na lambin roh dearni. Nini Jeremia 9:5, “marsioto-otoan do na marhuan, anjaha sahalak pe lang sihatahon na sintong; ipasomal sidea do dilahni mangkatahon ladung; jahat do sidea, seng ra sidea mubah.” Ase totap ma hita bani hasintongan ibagas na mandihuti haganup proses Pemilu on.
4. Hubani nasiam warga GKPS na dihut gabe calon legislatif (caleg), ase totap ma palobeihon integritas, kapasitas, pakon sihol ni uhur laho padoraskon pembangunan masyarakat, bangsa pakon negara ibagas hadoharon. Pasirsir nasiam ma persiapan na terbaik paboa na talup do nasiam tarpilih pakon iharosuhkon Tuhan, sonai homa gabe sitiruon ampa sipambobai bani keluarga, kuria, masyarakat, bangsa pakon negara. Ulang ma dihut nasiam bani “praktik politik kotor yang manipulatif,” halani totap do hita mardingat na tarsurat bani Lahoan ni Apostel 5:29,“… Maningon balosan do diri bani Naibata ase bani jolma!”
5. Iojur hanami ma homa hubani haganup kuria pakon parhorja ni kuria ase mambere diri ampa sirsir mamakeihon hak bani Pemilu, sonai homa mangojur hasoman ase mamakei hak pakon tanggung jawabni bani Pemilu on ibagas na marhabiaran hubani Naibata. Pakei hita ma kesempatan Pemilu on ase haganup warga GKPS mamilih na talup sipilihon. Pilih hita ma sidea na setia hubani Pancasila, UUD 1945, pakon Ulang ma ipilih hita sidea na mamakei “Politik Uang & Politik SARA.” Ulang ma pilih hita calon na mamakei cara na mambahen parbolah-bolahan ampa na parsedahon hubungan sosial kemasyarakatan. Bobai anjaha ajari hita ma kuria in ase ipakei hak pilihni secara murni, bersih, jujur pakon bertanggung jawab. Ulang ma dihut hita bani siboan barita “hoaks.” Palobei hita ma mamilih songon na tarsurat bani 2 Musa 18:21, “Tapi pindahi ma humbani ganup bangsa in dalahi na pantas maruhur, sihabiari Naibata, dalahi hatengeran ni uhur, na mangkagigihon sisip ….”

Sonai ma tonah parmahanion on ipadas hanami. Satonggo ma hita hubani Tuhan ase Pemilu on saud mardalan ibagas na dear, parohkon hadoharon bani kuria, keluarga, masyarakat ampa bangsa pakon negara, sonai homa pasirsirhon sipambobai na marhabiaran hubani Tuhan. Selamat mandalankon Pemilu. Tuhan Naibata mangkasomani hita haganupan.

Salam pakon tonggo,

Pimpinan Sinode GKPS

Tembusan:

1. Praeses GKPS Distrik I s/d XII
2. Pendeta/Pengurus GKPS Resort
3. Pertinggal.