Minggu, 25 Februari 2024 (Reminiscere)
Nas: Yesaya 66:10-13
Usul Doding: Haleluya No. 276:1+4
Tema: Sukacita di dalam Tuhan
MARMALASNI UHUR HALANI APOH-APOH NA HUMBANI NAIBATA
(Tim Penulis)
Hita haganupan, Bapa na hinaholonganni Kristus …
Aha do nani na niarapkon sada halak na berada ibagas tutupan, isiksa, itawan, pakon na manjumpahkon bageini sitaronon na legan? Balosni lang dong na legan aima barita pasal haluahan (Ind. Pembebasan). Halak na ibagas sada panguhuman pasti tarpaima-ima bani barita haluahon hubani dirini atap bani hata na legan “masa hukuman telah berakhir.” On ma homa na dong bani ambilanta on, bagian patoluhon (Trito-Yesaya) humbani Buku Jesaya, na mansahapkon pasal pargoluhanni bangsa Juda/ Israel dob honsi maluah humbani parjabolonan. Isuhuni Naibata do padanni das hubani ginomparni si Abram, mambahen holong ateini laho paluahkon bangsa Israel. Salosei ma masa panguhuman dompak bangsa ai—halani hengkengni uhurni hubani parentahni Naibata—anjaha jumpahan pangapohon ronsi idopni uhur ma sidea humbani Naibata.
Ambilan on boi do homa imaknai hita gabe sada penggalan doding “holong”—Lagu Cinta—na ipadasni Naibata hubani bangsa Israel age das hubanta haganupan ija bei pe hita sadarion marianan: i juma, i rumah, i sekolah, pakon na legan. Songon sahalak na marholong ni uhur banta, boi sobuton orangtua, parinangon, niombah, das hubani keluarga na legan—sonai ma homa Naibata mambahen padan banta bahasa lang tadingkononni hita, lang paturutonni hita. Ase padan na maharga on, in ma na gabe golpa-golpa banta bahasa hita halak na porsaya bani Kristus in, seng anjai hita hurangan, lungunan, bahkan kecewa bani goluh on.
Bani ayat 12 isobut do, “Tonggor ma, Ahu patuduhkon hadoharon bani, songon bah mardalan bueini ampa habayakonni bangsa parbegu, songon binanga na marbanggal; minum ma hanima, abing-abingonni do hanima, anjaha titeng-titengonni.” Sasintongni kalimat bani ambilanta on, secara pribadi sihol mangkatahon bahasa seng anjai tadingkononni Naibata bangsa ai. Tak akan pernah kasih Tuhan lalu dari kehidupan bangsa Israel. On ma holong na abadi, na pinaondosni Naibata hubani umat na manaron ai. Padan holong na abadi humbani Naibata manramoti bangsa Israel ijia.
Anggo itarik hita ambilan on romban humbani goluhta, ris do hita ongga ra mangahapkon pengalaman itadingkon hinaholonganni uhurta bei. Persoalanni: sonaha pangahapta sanggah hita itadingkon ai? Mungkin terpisah bani jarak bani niombah, marjarak panorang, bahkan ‘dunia na legan.’ Halani ai, tongon hadameion aima kebutuhan dasar bani jolma. Rasa aman ai porlu tumang bani goluh on. Ase hinorhonni kebutuhan in, maningon do hape hita jolma on terhubung, lobei ma ai pakon Naibata das hubani hasoman jolma ge tinompa na legan. Anggo hita iabaihon, anggo kehadiranta lang iakui, boi do ai mambahen hita stress, lungun pangahap, bahkan berpotensi pasedahon dirinta sandiri.
Dakdanak porlu tumang pangondingion (Ind. keterhubungan) pakon namatorasni. Orangtuanta na lansia gati dong mambiar “itadingkon” pasanganni, halani dong ope hagobiron: ise holi hasomanku laho manoruskon pardalananni goluh on? Apalagi anggo niombah domma marumahtangga anjaha daoh-daoh hutani bei, pahompu etek-etek ope, diha-diha pe marsipadaoh-daoh, pakon na legan. Bahat tumang halak na manaron, halani sada persoalan na gati lopus humbani pangidahta on—aima pengabaian. On ma naiahapkon bangsa Israel in, sanggah sidea ibagas parjabolonan. Sidea iasingkon ribuan mil daohni humbani hutani sidea, rumahni sidea. Sidea mangahapkon songon na itadingkon Naibata, iabaihon Naibata, halani dousa-dousani sidea.
Hita haganupan, Bapa na hinaholonganni Kristus …
Seng sonai anggo holongni Naibata, lang marnarotap do hape ronsi sadokahni dokahni. Ibahen Jesaya do limbaga holongni Naibata ai usih, “Songon halak na niapohni inangni, sonai do apohon-Ku hanima; maningon apohon do hanima i Jerusalem” (ayat 13). Martuah ma bangsa ai, halani Naibata na mamilih sidea ai, aima Naibata na gok holong. Martuah ma homa hita haganupan, halani Kristus na iirikon hita ai, aima Tuhan na gok ibagas idopni uhur. Porsaya hanami, dong bei do pengalamanta pasal holong-Ni na dob ondos bani goluhta. Ase hubani hita haganupan, na mungkin gok ibagas pangahap, songon na pusok uhurta ibagas na saminggu on. Atap mungkin bahat hamaholon na idompakkon hita bani ari-ari na parpudi on, jolom gomos padanni Naibata on sai “abingon, titengon, ampa apohon-Ni” do hita.
Anggo jujur hita bani goluh on, buei do halongangan ampa pasu-pasu na gokan dear na domma ijalo hita bani goluh on, hataridahanni holongni Tuhan bani goluhta. Hita na hinan manggoluh ibagas parjabolonan dousa, ibagas Kristus ipaluah do hita. Mambotoh barita malasni uhur in, sonari aha ma responta bani haganupan ai? Bani holongni Kristus na banggal in dompak pargoluhanta, ulang ma lupa hita martarimakasih hubani Naibata ibagas Jesus Kristus, halani Ia do na manobus hita. Martarimakasih pasal haganup, ai in do na pinindo ni Naibata humbani hita halak na porsaya marhitei Kristus Jesus ibagas Tonduy in (bnd. 1Tes. 5:18). Hataridahanni hata tarima kasihta hubani Tuhan maningon taridah ma hubani goluh na ra mambahen habayuon (Ind. reformasi). Martuah do siirikon Naibata, anggo ia manghorjahon horja-horja na madear i tanoh on. Ulang be hita gabe jolma na urah mandihuti arus pargoluhan na gok ibagas dousa in, tapi sirsir ma hita manggoluh ibagas hasintongan ampa kuasani Tonduy na humbani Naibata in.
