Silhouette of a man at the Cross
Renungan Mingguan/PA Bapa GKPS, Minggu, 5 Mei 2024 (Rogate)
Nas : Mazmur 104: 31-35
Usul Doding : Haleluya No. 1:1-2
Tema : Kemuliaan Tuhan tetap selamanya
Tujuan : Agar Kaum Bapa tetap memuji dan muliakan Tuhan
Puji Ma Tuhan, Naibata Jahowa Halani Pambahenan-Ni
Syalom ma hubanta Seksi Bapa i Kuria on…
Adong do kata bijak namanghatahon sonon: Kenikmatan hidup yang terbesar adalah saat kita mampu bersyukur atas semua hal yang terjadi. Humbani kata bijak on, sihol patugahkon totap ma hita martarima kasih pasal haganupan, bnd. 1 Tesalonika 5:18. Martarima kasih pasal haganup, aido naiarapkon Jesus bani diri ni halak na porsaya/namangirikkonSi.
Hubanta haganupan….
Bagei do cara naibahen jolma in laho padaskon aha na ibagas uhurni. Bani situasi na sonaha pe na idompakkon jolma in, ipadas do ai marhitei sahap, tonggo sonai homa marhitei doding pamujion. Bani haganupan aha pe na masa bani diri ni jolma in, totap do iarapkon ase totap martarima kasih hubani Naibata, halani Naibata do na mambotoh pasal haganupan janah Ia do homa simada goluhta/ Sang pemilik kehidupan. Ia do na manompa janah Ia do simada kuasa Bani haganupan tinompa-Ni.
Bapa nahinaholongan, bani teks ni ambilan on, pemazmur ijon padaskon aha na ibagas uhurni marhitei sada doding atap Mazmur, ber Mazmur memuji Tuhan. Pemazmur ijon aima Raja Daud, namangidah sonaha pambahenan ni Naibata na buei janah banggal tumang do pambahenan ni Naibata. Bani teks on, pambahenan ni Naibata aima halani tinompani Naibata bani ganup dunia on, sonin ma jenges ni haganupan tinompa-Ni in. Mangkawah dompak datas, mangkawah hu siamun, manatap hu siambilou, age das na mangidah hu toruh. Bani ganup ianan do majagiah tumang haganupan jadi-jadian ni Naibata. Bahkan ParPsalmen pe gati do mengungkapkon pasal kekaguman ni Bani haganupan tinompaNi. Dolok na maratah, talun namajenges, suan-suanan na ramos i juma, pakon haganupan na majenges na itompa Naibata. Hubanta Bapa, sonaha do hita mangidah janah sonaha ma hita merespon haganupan ai. Tubuh do nani pamujionta hubani Naibata mangidah haganup jadi-jadianNi. Tontu halak na ra mamuji Tuhan, aido na ra manghargahon pambahenan ni Naibata bani goluhni.
Bapa na hinaholongan,
Tinompa ni Naibata do haganupan na adong i dunia on. Naibata manompa humbani na lang adong gabe adong, creatio ex nihilo. Dunia na itompa Naibata, bani mungkahni kosong aha pe lang adong. Seng marrumang anjaha lumei do tanoh on; hagolapan do manrungkob luhung ai (1 Musa 1;2). Naibata mangidah janah manompa isi ni dunia on. Jenges do haganupan tinompa ni Naibata janah ijadihon do haganupan bani kuasa ni, atap bahasa na legan markuasa do Naibata bani haganupan tinompani. Marsahap ma Naibata, jadi ma ho na lihar (1 Musa 1:3). Artini kuasa ni Naibata bani sahap anjaha jadi ma haganupan (Manompa bani ari 1-6). Kuasa ni Hata ni Naibata on do homa na boi iidah hita janah iahapkon hita, na mempengaruhi segala aspek kehidupanta.
Hita jolma pe aima tinompa Naibata na paling sempurna. Mase ihatahon paling sempurna? Halani ibere do bani jolma in hosah hagoluhan sonai homa akal pikiran. Naibata manompa jolma in aima bani ari na paonomkon atap ari naparpudi Naibata manompa. Artini ai, majagiah tumang do hape janah haganupan do ipasirsir Naibata bani jolma in. Dob ipasirsir haganupan ibere do kuasa bani jolma in na laho manramotkon haganupan tinompaNi in. Janah bani teks ni ambilan on, aima pasal sonaha jolma in manramotkon.
Manramotkon tinompa ni Naibata sada bentuk na menghargai karya ni si Panompa. Dos do ai, pori iboli hita sada benda/barang hatahon hita ma Sepeda Motor/kereta. Domma jenges ibahen sipanompa janah hita pitah mamakei janah manramotkon. Tapi bani praktek na iidah hita, buei do jolma in, domma pe jenges ibahen tapi hurang jenges pe pangahapni, marhitei na membongkar ulang atap menambahi bahan nalegan. Domma namin 100 persen jenges ibahen sipanompa sepeda motor ai, tapi biak ni jolma do mambahen pengurangan atap penambahan, artini jolma in merasa lebih mampu humbani na mambahen sepeda motor ai, atap boi hatahonon hurang puas humbani na domma ibahen halak nalegan. Ulang ma namin sonai hita bapa on mangidah haganupan tinompaNi in. Hargahon hita janah ramotkon hita ma haganupan ai.
Hita Haganupan, manghargahon, manramotkon, aima hataridahan ni na porsaya bani horja ni si Panompa. Sonai ma igambarhon par psalmen bani teks ni ambilan on. Ipungkah marhitei ayat 31: Ronsi sadokah-ni dokahni do hamuliaon ni. Artini, Naibata do simada hamuliaon. Naibata do na manjadihon haganupan, bani ma hasangapon pakon hamuliaon-Ni. Malas do uhurni Jahowa mangidah jadi-jadian-Ni. Sonin ma jenges ni haganupan jadi-jadian-Ni. Markuasa do ia bani haganupan tinompa-Ni. Mangkawah ia bani tanoh on, gabe dugur ma, ijamah dolog gabe martimus ma. On ma hataridahan ni kuasa ni Naibata na ipadas par Psalmen. Sihol patugahkon, seng dong kuasa nalegan na lobih markuasa marimbang kuasaNi. Janah par Psalmen ijon mangidah haganupan ai. Janah ia pe domma mangahapkon kuasa ni Naibata ai, ai do ase ia pe mambahen pengakuan dompak Naibata siPanompa in. Mampu do hita Bapa padaskon pamujion hubani Naibata songon Parpsalmen ijon? Atap ra do hita songon ilustrasi na menambahi atap mengurangi aha na domma adong?
Bapa na hinaholongan,
Par Psalmen ijon mangarahkon jolma na porsaya in ase mandoding mamuji Tuhan janah mandoding on sadokah goluhni. Artini, mandoding ijon lang persoalan jenges ni sora atap jenges ni hata bani doding ai, tapi lobih hubani sonaha mangidah haganupan ai marhitei napasangapkon Naibata marhitei goluh pakon na manramotkon haganupan tinompa Ni Naibata. Lirik doding namanghatahon sonon:
O, Naibata nasangap namapansing
Sitompa langit pakon tanoh on
Anggo huidah ganup jadianMu
Sai isarihon ham do in tongtong
Marolob-olob au mamuji Ham
O Naibata sangap do Ham
Marolob-olob au mamuji Ham
O Naibata sangap do Ham
Doding on patugahkon pasal sonaha mamuji Naibata halani pambahenanNi. Naibata do simada hasangapon in. Ia do na patut si pujian halani ia do namanjadihon haganupan. Seng dong alasan banta hape lang boi/ra mandodingkon pamujion hubani Naibata, halani Ia do na manompa janah napasirsirhon haganupan. Janah haganupan do hita mambotoh janah mangahapkon pambahenanNi. Selayakni ma hita mandodingkon doding pamujian hubani Naibata sadokah goluhta. Doding na imaksud ijon tontu marhitei na pasangapkon Naibatta marhitei goluhta. Halani marosuh tumang do Naibata mangidah na mandoding huBani. Marosuh tumang do Naibata bani horjanta na pasangapkon Ia. Marosuh tumang do Naibata mangidah goluh ni Bapa na totap Gabe Bapa sipandoding mamuji Naibata marhitei goluhni. Haganupan ma mandoding hubani Naibata. Anggo domma haganupan mandoding mamuji Naibata, Bois ma sagala pardousa hun tanoh on janah lang dong be par jahat. Pori ibahen hita survey bani kehidupan ni Bapa i Kuria in, sonaha do aktifitas ni Bapa bani pamujion ni hubani Naibata. Buei do itongah-tongah ni Seksi Bapa, namanghatahon hurang aktif do Bapa i Kuria on, Bapa taridah bani minggu seksi Bapa, Bapa maningon adong partumpuan/Makan bersama baru pe muncul Bapa, pakon buei ope alasan nalegan na boi iahapkon hita, hurang ni keaktifan ni Bapa i Kuria on. Tapi adong do homa, i Kuria ini taridah keaktifan ni seksi Bapa marhitei na totap mambahen PA/ Partonggoan, latihan koor, sonai homa bani kegiatan nalegan i gareja. Bani Susukkara, bahan PA ni Bapa setiap minggu do tene, lang sahali sabulan atap sahali 3 bukan, atap sahali setahun. Sonaha sahali seminggu ai ma namin ipedomani hita ase lambin aktif kegiatan ni seksi Bapa itongah-tongahni kuria. Halani ai, ase berehkon hita ma dirinta laho mamuji Naibata. Bani Galatia 6: 9 ihatahon: Ulang ma marnaloja mambahen namadear, bani bahasa Indonesia isobut: Biasakanlah dirimu melakukan kebaikan supaya mendarah daging dalam diri kita. Memuji Tuhan adalah perbuatan Kebaikan, hasomalhon hita ma ai bani goluhta janah Gabe Style/Gaya hidup ni Bapa ma namin mamuji Tuhan bani goluhta. Lambin gati hita manghorjahon namadear, lambin dear do goluhta. Janah seng dong harugian manghorjahon namadear, boi hatahonon na menabung do hita i dunia on mambahen namadear na Gabe bohalta holi bani goluhta simagira.
Nasiam Bapa nahinaholongan,
Sonaha do Bapa mangidah haganupan tinompa ni Naibata janah sonaha do Bapa manramotkon haganupan naTinompa ni in. Ulang ma hita marosuh pasedahon na domma dear. Istilah ni Bapa: Bahat Pambotoh, ase pakei hita ma Pambotoh ai bahen hadearanta. Ulang songon naisobut pasedahon na dob dear, songon sepeda motor, na domma dear hape ipaseda use halani bahat ni Pambotoh. Bahat ni Pambotoh ai ase pake hita ma songon na isobut par Psalmen laho mandoding mamuji Naibata. Tiada hari tanpa memuji Tuhan. Idop ni uhurni Jahowa do na so ra marpunsa, seng marnarotap holong ni ateini. Mulak ratah do ai siap sogod, banggal do habonaranMu (Tangis-Tangis 3:22-23). Puji hita ma Naibata bani goluhta. Sadiha dokah do ibere hita panorangta laho mamuji Tuhan? Sadia dokah do hita ra martumpu mamuji Tuhan. Sadia dokah do hita ra manangar hatani Naibata.
Bapa nahinaholongan, Mangidah kehidupan ni Bapa, buaenan do marosuh bani kode tuak, buenan do marosuh marsahap-sahap na lang sai porlu, buenan do gabe Bapa na maningon sahapni sitangionkon. Bani ambilan on, buenan ma pakei hita laho mamuji Tuhan marhitei sikap pakon pambahenan ni goluhta. Bapa Gabe sipandoding mamuji Naibata. Bani haganupan pardalanan ni goluhta, ase totap mamuji Naibata. Halani marosuh tumang do Naibata mangidah pamujionta. Gabe Bapa na mamuji Naibata. Bere hita ma dirinta, panorangta, uhurta bani na laho mamuji pasangapkon Naibata. Totap ma hita mamuji pakon pasangapkon Tuhan. Ase hatahon hita ma Puji ma Jahowa, ale Tonduyhu, Haleluya. Amin.
