Renungan Mingguan (PA) Bapa GKPS, 19 Mei 2024 (Pentakosta I)
Nas : Galatia 5:16-18
Usul Doding : Haleluya No. 332:1-3
Tema : Hidup menurut Roh Tuhan
Tujuan : Agar Kaum Bapa memberi diri untuk dipimpin oleh Roh Kudus
GOLUH NA MARHAMONANGAN
Horas janah selamat Pentakosta ma hubani nasiam seksi Bapa GKPS. Bani Minggu Pentakosta (Minggu Panroh ni Tonduy Napansing) on, bahan renunganta ai pasal horja ni Tonduy. Ijia, 2000 tahun na salpu matei do Jesus i hayu parsilang laho manggalar utang ni dousanta, janah marhitei ai, sagala na manghaporsayai Jesus Kristus sipaluah bani, mardeka ma ia humbani parjabolonan ni dousa pakon hamateian. Parmateini Jesus aima laho mambere hamardekaon banta. Hamardekaon on tarmasuk ma ai hamardekaon humbani titah (agepe iarusi hita do ra tene bahasa sedo na laho manghatahon bahasa lang porlu be banta titah), tapi titah aima gabe kasa/cermin banta laho manonggor parlahounta, apakah parlahounta aima parlahou na ibobai Tonduy atap na ibobai hisap-hisap ni dagingta. Mardeka humbani titah artini aima mambahen na madear pe hita sedo halani mabiar bani titah atap mabiar hona uhum, tapi mambahen na madear pe hita aima sebagai tarimakasihta hubani Tuhan na domma paluahkon hita janah sedo marhitei na manghorjahon titah hita ase maluah, tapi halani idop ni uhurni Jesus tumang do.
I babou domma isobut hanami bahasa hita domma imardekahon Jesus humbani titah. Tapi, hamardekaon ai sedo laho paturuthon hita maruhur-uhur bani. Sedo ase rosuh ni dagingta sandiri na ibalosi hita. Ra, ongga do itangar hita, hamardekaon sedo bertindak uhur-uhur tapi hamardekaon aima lopas humbani parjabolonan. Sonai ma homa na sihol hatahonon marhitei renungan on, hamardekaon na binereni Naibata banta sedo laho mambahen hita manggoluh maruhur-uhur bani. Hata ni Naibata on patugahkon hubanta ase marguru bani Tonduy. Anggo bani hata Indonesia manghatahon lebih tegas hiduplah oleh Roh. Sanggah gabe pardousa hita, rosuh ni daging do na mambobai hita, tapi dob gabe halak na porsaya hita, rosuh ni Tonduy do na mambobai/memimpin pargoluhanta. Dob ai tangkas do homa isobut bani nas renungan on bahasa: “Ai na mangimbang Tonduy do sura-sura ni daging, anjaha na mangimbang daging do sura-sura ni Tonduy, na marsilawana do in, ase lang tarpasud nasiam pinindo ni uhur nasiam (ayat. 17)”. Songon na isobut bani Mateus 6:24: “Seng tarbalosi sada halak dua tuan, sai sogam do uhurni bani na sada, haholonganni na sada nari, hombaranni na sada, anjaha mapas uhurni bani na sada nari”. Seng tarbalosi sada halak rosuh ni daging riap pakon Tonduy. Na marsilawanan do ai. Daging pakon Tonduy aima dua hal na marsiimbangan janah marsilawanan (ayat 17). Ibagas ai maningon adong do sura-sura ni hita jolma laho manlawan sura-sura ni daging janah mambalosi sura-sura ni Tonduy (Pil. 2:12). Halani ai halak na porsaya maningon unduk bani pambobaion ni Tonduy. Horja ni Tonduy sedo pitah itambahkon hubani usaha ni jolma, tapi usaha ni jolma ai maningon unduk bani pambobaion ni Tonduy. Irik hujai marhorja ma homa hita laho mambalosi pambobaion/pimpinan ni Tonduy ai. Aha ma hasilni ibobai Tonduy? Lang be ibobai titah. Artini manghorjahon hadearon lang be i toruh ni titah atap bani hata na legan manghorjahon hadearon aima halani mabiar bani hukuman, tapi marhorja do na porsaya in, mambalosi pambobaion ni Tonduy halani idop ni uhur ni Naibata (Rom 6:14-15). Anggo marhorja daging, hasilni aima lang ihorjahon hita rosuh ni Tonduy.
Halak na porsaya lang memiliki otonomi bani dirini sandiri. Ase manggoluh hita ibagas hamonangan, maningon ipaturut hita do marhorja Tonduy ai ibagas dirinta. Tapi, marhadapan pakon fakta, boi do ijamin hita bahasa haganup do jolma, na porsaya age na lang porsaya ongga mardousa. Anggo sonai aha ma beda ni na porsaya pakon na lang porsaya in pasal na manghorjahon dousa? Sanggah madabuh na porsaya in hubagas dousa, marhorja do Tonduy ai laho mampargogohi ase monang mangimbang pangagou in. Sementara na lang porsaya, tading do sidea ibagas dousa ai, aima na binobahon ni hisap-hisap ni daging ai. Anggo na porsaya in boi do sobuton “madabuh” hubagas dousa, tapi na so porsaya in “tading” ibagas dousa. Anggo sonai naha ma cara ni ase marhamonangan hita bani goluh on? Tontu langkah pertama aima, jalo ham ma Jesus Kristus gabe sipaluah bami, dob ai bere ham ma dirimu ibobai/dipimpin Tonduy in, ase Tonduy in marjuang pakon ham manlawan hisap-hisap ni daging. Pitah sada do carani ase monang hita bani goluh mangimbang pangagou, aima paturutkon Tonduy ai marhorja janah berjuang pamonangkon hita.
Nasiam seksi Bapa GKPS, naha do ham mangidah pargoluhanmu? Domma porsaya ham bahasa Jesus do sipaluah bamu? Anggo domma malas tumang uhur, anggo lape, jalo ham ma Jesus Kristus gabe sipaluah bamu. Dob ai, halak na manjalo Jesus pasti do homa mambere dirini ibobai/dipimpin Tonduy in. Sada rumus na pasti do ai. Anggo dong na mangaku porsaya bani Jesus tapi manggoluh ibagas dousa lalap, berarti sipakulah-kulah do pangakuan ni ai. Bere Ham ma dirimu bani Tonduy in, lanjar manggoluh ibagas na marhamonangan ma ham. Amen.
