RENUNGAN MINGGUAN BAPA GKPS, MINGGU, 26 MEI 2024 (Trinitatis)
Nas : Mateus 28:16-20
Usul doding : Haleluya No. 349:1-2
Tema : Yesus Berkuasa di Surga Bumi
Tujuan : Agar Kaum Bapak Mempercayai Yesus yang Berkuasa Baik di Surga maupun di Bumi
Horas ma hubani nasiam kuria ni Tuhan na hinaholongan ibagas goran ni Tuhan Jesus Kristus Raja ni Kuria in. Bani panorang on das ma hita hubani minggu Trinitatis na mararti Naibata sitolu sada. Bani minggu on nas renungan PA Bapa GKPS aima pasal parentah zending ni Jesus bani susian-Ni. Zending aima horja mambaritahon ambilan na madear, aima horja na maningon ihorjahon haganup halak na porsaya bani Jesus Kristus janah tarmasuk ma ai seksi Bapa GKPS. Horja ni susian ni Jesus do mambaritahon Ambilan Na Madear in, janah ise ma na tarmasuk gabe susian ni Tuhan Jesus? Aima na porsaya janah tardilo janah anggo porsaya do Ham hubani Jesus Kristus bahasa Ia do sipaluah hita humbani utang ni dousanta, mararti ma ai bahasa dihut do hubamu iampeihon horja zending ai.
Kuria ni Tuhan, sasintongni ise do simada horja on? Aima Jesus Kristus. Bani panorang ai, sisampuluh sada susian ai laho do hu Galilea hu sada dolok janah ijai ididah sidea do Jesus janah marsombah do sidea hu-Bani. Humbani sidea adong ope na sangsi (16-17). Mungkin lape tarjalo sidea haganup na masa ai, na seng ongga masa ope, na ija adong na mulak manggoluh. Guru ni sidea na ipaihut-ihut sidea na sain dokah, itangkap, isiksa janah iparsilangkon, dob ai matei. Anggo isuba hita memposisikan diri hubani na masa ai, mungkin ra do mangarusi do hita bani kebingungan ni sidea. Dob ai, lang singgan jai peristiwa na sangat menguras energi ni sidea ai, beredar ma barita bahasa fitnah bahasa susian ni Tuhan Jesus manangko bangkei ni Jesus hun tanoman ai (28:13). Boi hatahonon bingung do sidea bani panorang ai. Halani ai anggo adong pe sidea na sangsi tontu boi do hita maklum pasal ai. Tapi ipatoguh Jesus do sidea marhitei na manghatahon: “Domma ondos Bangku sagala kuasa na i nagori atas ampa na i tanoh on” (18). Jesus domma pasaloseihon haganup horja ni ibagas na gok (sempurna), janah domma ondos Bani kuasa lang pitah i tanoh on tapi dihut do pakon na i nagori atas. Hata ni Tuhan Jesus on tontu mambere jaminan hubani sidea bahasa na jumpah sidea ai aima simada kuasa na lang marbatas na das ronsi hu nagori atas, aima Tuhan na markuasa janah na lang tarlanglangi age ise pe horja-Ni, halani ai lang pala be sangsi susian ai. Jesus manghatahon hubani sidea janah pasti ma age hubanta nuan on, bahasa Jesus na isombah hita ai, aima Jesus Tuhan simada kuasa na gok hagogohon. Ulang be sangsi hita mangirikkon-Si, mantapkon hita ma uhurta gabe susian-Ni. Halani Jesus do na mandilo bapa GKPS gabe susianni Jesus, tontu lang adong be na manulak ai, halani simada kuasa do Jesus ta ai.
Dob honsi ipatoguh Jesus uhurni susian ai, ibere ma hubani sidea parentah laho mambaritahon ambilan na madear: “Laho ma hanima, podahi hanima ma sagala bangsa, ase gabe susian-Ku sidea, anjaha didi hanima ma sidea hubagas goranni Bapa, Anak ampa Tonduy Na Pansing. Ajari hanima ma sidea manghorjahon sagala na dob Hutitahkon bennima. Tonggor ma, sai na hasomanan-Ku do hanima ganup ari, ronsi das ujung ni dunia on.” (19-20). Iparentahkon do susian ai ase mamodahi sagala bangsa ase gabe susianni Jesus. Banta nuan on ase boi hita mambahen hasoman na legan gabe susianni Tuhan Jesus, tontu maningon hita do naparlobei gabe susian ni Tuhan Jesus. Pasal on adong piga-piga pahara: Na parlobei aima: Mamutushon gabe susianni Jesus, na paduahon: Mardingat aha na hinatahonni Jesus, na patoluhon: Marlajar cara ni Jesus mangidangi aima marhitei na maniru (mengimitasi) karakter ni Jesus, na paompathon: mangarahkon/manjadihon hasoman gabe susianni Jesus. Hanya murid Yesus yang bisa memuridkan. Horja zending sedo songon agen ni bus na mangarahkon buei halak ase naik hubagas sada bus, tapi ia lang dihut berangkat, tapi maningon parlobei do ham gabe susianni Tuhan Jesus ase parsahapmu, pangabakmu, haporsayaonmu menginspirasi sidea ase tertarik mangirikkon Jesus.
Kuria ni Tuhan, selaku sahalak bapa domma gabe susianni Tuhan Jesus ham? Anggo lape, putushon ma ma sonari laho mangirikkon Jesus. Anggo domma gabe susianni Jesus ham, sonaha, domma ihorjahon ham parentah zending ni Jesus on? “Podahi hanima ma sagala bangsa” nini do bani nas on, naha do ham manghorjahon pemuridan ibagas rumah tangga mu sandiri? Sonaha do ham manghorjahon pemuridan hubani inang, niombah pakon pahompu selaku kepala rumah tangga ham ibagas rumahmu? Na mangihut use nini do homa bani nas on: “Ajari hanima ma ma sidea mangkorjahon sagala na dob Hutitahkon bennima”. Na parlobei janah paling utama martanggungjawab gabe pangajari hubani niombah aima orang tua dalam hal on bapa. Nasiam bapa do guru na parlobei janah na paling utama martanggungjawab mambahen niombah gabe susianni Tuhan Jesus. Memang on aima tanggungjawab na banggal janah borat, tapi harga do homa. Dob ai, halani Jesusta ai aima simada kuasa i tanoh on age i nagori atas, jadi ibere do kuasa-Ni ai hubani haganup bapa laho manghorjahon tugas pemuridan on. Janah malas uhurta, halani nini Jesus do: “Tonggor ma, sai na hasomanan-Ku do hanima ganup ari, ronsi das ujung ni dunia on”. Amen.
