Silhouette of a man at the Cross

Renungan Mingguan (PA) Seksi Bapa GKPS, 2 Juni 2024 (1 Set. Trinitatis)

Nas                 : Yohanes 7:37-44

Usul Doding   : Haleluya No. 242:1-2

Tema              : Yesus Air Hidup

Tujuan            : Agar Kaum Bapak Mengerti bahwa Yesus adalah Sumber dan Pemilik Kehidupan

 

Horas ma hubani nasiam seksi Bapa GKPS!

Bani na mandalani ari-ari ni goluhta siganup ari, ongga do ra hita mangahapkon pangahapan na mambahen hita merasa gersang, lang margollei janah hurang semangat janah nausahahon do manghorjahon bagei-bagei cara sonaha ase adong kepuasan hidup, tapi lang adong na boi mambahen merasa puas. Ra do sungkup parduiton, tapi hurang do hasehaton, ra do sehat-sehat parangkulaon, tapi hurang harmonis rumah tangga, ra do bayak tapi niombah lang mambalosi ajar ni orang tuani. Sai na dong do tong na hurang tene. Anggo ipaganjang hita pasal na hurang on, ra bahat ope sipajojoronta. Halani ai bani panorang on iarahkon nas on do hita laho mangidah hunja do nani jumpah hita kepuasan hidup.

 

Bani panorang ai, jumpah ma bani sidea na margoran pesta lampo-lampo. Pesta lampo-lampo aima pesta mardingat pasu-pasu ni Jahowa hubani halak Israel na manghasomani sidea luar hun masir, sadokah di pardalanan ronsi das hu tanoh parpadanan irik homa pesta panen. Bani pesta lampo-lampo sidea marmalas ni uhur janah marpesta. Suasana hati bani panorang ai pe tontu suasana hati sanggah pesta do homa. Iadonghon do on sadokah 7 ari tambah sadari janah ibahen sidea ma lampo-lampo, ijai ma sidea tading laho mardingat sanggah i pardalanan ni sidea sanggah luar hun tanoh masir pe sidea tading i lampo-lampo do homa. Ipahata do musik, mandoding janah manortor do sidea. Nas on aima bani ari parpudi pesta lampo-lampo ai. Ijai ibasa sidea do homa buku Psalmen na isini na tarsurat bani Psalmen 113-118 janah na gabe puncak ni aima Psalmen 118:24-29. Puncak humbani pesta lampo-lampo on aima sanggah Malim manguseihon bah janah marsurak ma simbuei ai songon na tarsurat bani Jesaya 12:3-4. Bani panorang ai ma Jesus, bani ari parpudi ni pesta ai patugahkon hubani simbuei ai manghatahon: “Barang ise na horahan, hu Bangku ma ia roh minum. Songon na hinatahonni surat in ‘Bah na manggoluh do na mabaor humbani na porsaya Bangku!’” (ayt.37-37). Ra, boi do iahapkon hita sonaha pengaruh ni hata ni Jesus on i tongah-tongahni simbuei ai janah Jesus manghatahon on ibagas sora na gogoh janah tanpa keraguan. Sahira sonon ma anggo isuba hita mangartihon hata ni Jesus on i tongah-tongah ni kondisi ai: “Pesta on aima pasal Ahu. Bah na dong bani bejana in, martudu-tudu hubangku, bah na madurus in aima symbol-Hu, padan pasal bah tubuh haluahon na bani Jesaya 12:3-4 ai martudu-tudu hu-Bangku. Bah na hubere dearan marimbang bah na roh humbani bah tubuh, dearan humbani udan na mangarbahi tanoh janah mantubuhkon suan-suanan janah dearan humbani na ibuat Malim hun Siloam. Au aima bah tubuh na mambere hagoluhan sisadokah ni dokah ni, na mambere kepuasan ni goluh, na paborsihkon janah na mambere malas ni uhur na manongtong. Minum ma nasiam hum-Bangku.” Kira-kira sonai ma klaim na ihatahon ni Tuhan Jesus ibagas sora na ipagogoh bani humpulan ni halak namabuei ai. Tontu masam do homa keberadaan ni sidea na hadir ai, songon masam ni keberadaanta nuan on. Ise hita na loja anjaha na boratan, na horahan, na mencari makna hidup, na bahat sipingkirhononni, na boritan, na lang dear rumah tangga ni, na terikat bani hal-hal na lang madear songon judi/judi online, narkoba, hajahaton pakon na legan ma tene. Atap, na sedang kesulitan ekonomi, na paimahon ase dapotan tuah, na bergumul pasal parlahou ni niombah atap anggota keluarga na legan, atap sonaha pe sonari keadaanta, hubanta do roh ontangan ni Jesus on ase idinum hita bah na binere ni Jesus on. Jesus lang parduli bani latar belakangta, Ia pitah mangidah sonaha uhurmu sonari, ra do ham roh hu-Bani? Bah na humbani Jesus ai lobih harga humbani atap aha pe na ihargahon hita sadokah on. Na iperjuangkon hita i tanoh on agepe harga, dong do holi panorang ni lang harga be ai, ai marpunsa do ganup, tapi bah na binere ni Jesus on, mambahen sombuh horah ni tonduyta.

Ontangan ni Jesus on ibere do hubani haganup jolma, tarmasuk hubani na marnalang-Si sonai homa hubani na sihol mantahihon-Si age na mambahen fitnah hu-Bani. Ijai do homa sidea bani panorang ai. Sanggah ihatahon Jesus hata ai hubani simbuei ai, ijai do halak Jahudi na sihol manangkap-Si ai, tapi dihut do hubani sidea hata ai. Tontu adong do sidea na horahan janah sadar na horahan do ia, halani sasintongni haganup do jolma horahan bani bah na dong bani Jesus ai. Tapi adong do homa na horahan, tapi lang sadar na horahan do ia. Tontu anggo sonai, marbahaya do kondisi ai anggo lang sadar na horahan. Horahan bani aha do maksud ni Jesus ijon? Horahan bani pengampunan, penyucian, hamalumon pakon makna hidup. Horahan homa bani holong na borsih. Haganup do hita on horahan halani sadar ma hita bani kondisi ai janah manjalo bah na dong bani Jesus ai. Tontu laho manjalo on, sedo pitah keputusan intelektua tumang, tapi aima keputusan hidup na melibatkan haganup aspek ni goluh. Janah na binere ni Jesus on lang marpamboli (Jes. 55:1) alias gratis. Tapi na gratis on lang murahan, tapi maharga tumang, anggo ijalo hita on, domma bagian ta arta siharganan ai, aima Naibata sandiri, Naibata Bapa, Anak pakon Tonduy Napansing. Dob honsi ai ihatahon do homa: “Bah na manggoluh do mabaor ‘humbani’ na porsaya Bangku.” Tontu ai manghatahon humbani halak na domma manginum bah na humbani Jesus ai, humbani halak ai mabaor do bah na manggoluh homa. Aha ma ai? Horja na jenges, hata na jenges, hasaksian na jenges, sitiruon na jenges pakon na legan. Bah na manggoluh na mabaor humbani halak na porsaya in, mambobai na lape porsaya in ase dihut manginum bah na humbani Jesus ai. Janah Tonduy na Pansing do na gabe sipangurupi na mangapiti janah na manghasomani lalap (Joh. 14:16-17). Tonduy mambere hita gogoh ase mampu hita mangalirhon bah na manggoluh hubani hasoman na legan.

Tonduy na Pansing mambere gogoh banta manghorjahon na lang tarhorjahon hita. Ia do manghasomani hita. Dob ai bani nas on ayat 40-44 pasal sonaha sidea manulak Tuhan Jesus. Anggo sonai, ija do posisimu, manjalo atap manulak bah na humbani Jesus ai? Gabe renungan ma ai banta.