Bahan Renungan Mingguan/P.A. Seksi Bapa GKPS, 21 Juli 2024 (VIII Set. Trinitatis)
Nats :Matius 25:1-13
Tema :Orang Bijak Mempersiapkan Masa Depan
Tujuan :Agar Kaum Bapak Mengelola Berkat Tuhan Demi Masa Depan Yang Lebih Baik
Usul Doding : Haleluya 142:1-2+4 “Buei Ope Na Siat In”
TAGAM MA BANI PANROHNI KRISTUS
Tim Penulis
Hita haganupan nahinargani Tuhan!
Adong do pepatah mangkatahon “Sedia Payung Sebelum Hujan” namarlapatan do ai tagam bani sagala namasa nasihol roh, barang ahape namasa ai, pusok ni uhur, malasni uhur, jenges atap masambor pe naroh ai, tapi hita sebagai jolma ningon mampu do tong tagam bani haganup namasa ai, ase ulang tarsonggot anjaha ase ulang lupa diri barang ahape na roh mandorab hita. Hata “Tagam” namarlapatan do ai bani bahasa Indonesia siap sedia mengantisipasi berbagai na masa na roh. Humbani hata “tagam” on muncul ma kata kerja “Managam” na marlapatan “persiapan atappe mengantisipasi” na masa na roh mandapotkon. (Kamus Bahasa Simalungun Indonesia: 2015, hlm. 402)
Bani teks ni ambilanta sadari on, marlajar do hita pasal sonaha halak naporsaya managam ari harorohNi Kristus (Parousia). Songon na ihatahon si Matius bahasa harorohni Kristus aima sada rusia ni Naibata, seng nabotoh atap attigan panorangni, anjaha seng nabotoh atap sadihari Ia roh use. Hansipe memang bani buku Matius on ipatorang do tanda-tanda bani ari parpudi ai (Mat 24:3-35), tapi ipatorang do use bahasa seng adong na mambotoh sobali Bapa in sandiri do namambotoh peristiwa parousia ai. Seng nabotoh atap ari aha, seng nabotoh atap tahun sadiha namasa ai, na pasti na laho roh ma panorangni ai. Buku Matius mangkatahon “Halani ai tagam ma hanima, ai na laho roh ma Anak Ni Jolma in bani panorang na so ni agak hanima” (Mat 25:13;Mat 24:44). Halani na seng nabotoh panorang ni harorohNi Kristus ai, porlu tumang do halak Kristen ai ase “tagam” bani haganup namasa, tarlobih ibagas napaimahon harorohNi Kristus (Susan Heylen, 2017:15 Juni 2024)
Porlu tumang do ibotoh hita, bahasa kuria Kristen bani panorang ai sanggah mandompangkon berbagai parhara na borat do ijumpahkon sidea bani pargoluhanni, panorang ai baru marsirang ma tumpuan Kristen na parlobei ai hun sinagoge ni halak Jahudi, anjaha gati do imusuhi halak Jahudi sonai age halak Romawi sidea. Itambah use harorohNi Kristus na seng binotoh atap attigan ope panorangni gabe dobni aima haganup nambahen mulai galek haporsayaaon ni sidea hubani Kristus, gabe tubuh sebahagian uhurni sidea laho manadingkon haporsayaon hubani Kristus, itongah-tongah ni berbagai tangtangan na mahol on ma roh panurat ni buku Mateus laho pasingatkon sidea ase tagam sidea mangantisipasi, mamparsiapkon diri sanggah na laho rohma Kristus use hu dunia on. Limbaga on mangajarhon ase haganup halak na mangihutkon Kristus ase tongtong tagam bani masa-masa sulit na ijumpahkon sidea anjaha mangojur sidea ase mampu bertahan das hubani panorang ari parpudi ai (24:13)
Haganupan pangajaran pasal ari parpudi (eskatologi) iajarhon Jesus do hubani haganup susian sanggah rap hundul sidea ampakon Jesus i dolok Zaitun (24:3) Bani buku Zakharia 14:1-21 ihatahon do bahasa na roh ma panorangni i dolok Zaitun sandiri ma roh Tuhan mamarentah gabe raja i atas tanoh on, harorohNi aima sada hal na pasti, anjaha bani limbaga pasal anak boru nasapuluh ai iumpamahon ma harorohNi ai songon harorohni siparunjuk (mempelai laki-laki). Ipungkah do umpama on marhiteihon hata “tarpausih do harajaon nagori atas ai hubani sapuluh anak boru, nabingkat marsiboan suluhni mangalo-alo harorohni siparunjuk. (Ay.1) Manurut tradisi Jahudi pesta malasniuhur marhajabuan somalni iadonghon pitu ari marturut turut, anjaha somalni iadonghon do ai bani borngin ni ari, halani ai porlu tumang do suluh na gabe panondang bani sidea laho mangalo-alo harorohni Siparunjuk. Siparunjuk (atap mempelai laki-laki) aima gambaran ni Naibata namangadongkon pesta malasni uhur, anjaha sapuluh (10) naboru ai aima gambaranni halak naporsaya na memang manragam do masamni, anjaha bani limbaga on ibahen do dua masam ragamni halak na porsaya ibagas na mangalo-alo harorohni siparunjuk.
Naporlobei aima Lima naboru na oto on manurut laporan Mateus aima halak na mamboban suluhni, tapi seng iboban minakni (Ay 3). Sidea on aima gambaran ni halak na porsaya na manangar hata pakon pangajaran ni Jesus tapi seng ihorjahonni ibagas goluhni (Mat 7:26), pitah gabe sipanangi-nangi do sidea ibagas goluhni, gati do dilo-dilo hubani Tuhan, songon na suman do sidea on halak na saleh secara rohani tapi seng ra mangkorjahon otikpe titah pakon pangajaronNi Kristus in ibagas goluhni. (25:3; 25:11) Sidea on ma holi na seng itanda Naibata, agepe dilo-dilo hubani Tuhan laho mambuka pintu (Ay 11), tapi seng itanda Naibata sidea, halani ihatahon buku Mateus on do “Seng namandilo dilo goranKu namasuk hubani harajaon Surga, tapi namakorjahon rosuhNi Bapa Ku na isurga do” (Matius 7:21) anjaha suluh ampakon minak bani limbaga on mangingatkon hita bani hataNi Jesus namangkatahon “Sonai ma marsinalsal panondangnima i lobei ni halak, ase iidah horjanima na dear in, ase ipuji sidea Bapanima na inagori atas ai (Matius 5:16). Sidea on aima halak Kristen na egois, porini pe ihorjahon sidea namadear, tujuan ni ase ididah halak do sidea nabujur, motif ni sidea on aima motif na dangkal, murni halani motif hajolmaon tumang seng das hubani mangkorjahon na madear halani ai memang dear, anjaha goluhni sidea on aima, goluhna sipakulah-kulah.
Napaduahon, aima lima naboru namaruhur. Lima naboru namaruhur on aima gambaran ni halak naporsaya na manangar hata pakon pangajaran ni Jesus anjaha sirsir do homa sidea on gabe sihorjahon hata Ni Jesus ibagas pargoluhanni (Mat 7:24). Jadi hunjon ididah hita bahasa sikap managam harorohni Kristus ai aima sikap na aktif, seng pasif, seng tarlolei, tapi sigap dan tanggap, songon nabinahenni naboru namaruhur ai ipasirsir sidea do naporlu ibagas mangalo-alo harorohni siparunjuk marhitei iboan do minak ampakon suluhni sidea (Ay 4) Sikap managam harorohni Kristus maningon taridah do ai marhiteihonni namangkorjahon tugas na domma iondoskon Kristus hubanta, manaksihon harajaon ni Naibata ibagas Jesus Kristus, mangkaholongi hasomanta, manjalo hasoman namarbeda humbanta, marsibere-bere hubani hasoman na loheian, naboritan anjaha natartutup (Mat 25:31-46). (Carla Works, 2011: Diakses 2024, 21:40) Tindakan horja namadear ai murni ma ai halani holong hubani Naibata, holong hubani hasoman, anjaha mambahen namadear seng ase ididah hasoman jolma, mandapot pujian hubani hasoman, tapi ibagas haporsayaon namanggoluh hubani Kristus gabe sirsir ma hita mangkorjahon horja namadear, halani anggo haporsayaaon in seng taridah humbani pambahenanni, namatei do ai nini Apostel Jakobus (Jak 2:17).
Hita haganupan!
Ahama sirenungkononta humbani teksni ambilan on?
- Adong do lagu rohani Simalungun na lyrik ni mangkatahon sonon: jaga ma ham ijin bai pandiloni In, ulang lasei be ham, taruyun, jagama ham ijin bai pandiloni In, ulang tarlalap ham. Doding on sihol pasingatkon hita ase sebagai bapa, nagabe malim irumah tangganta hita ase ulang tarlalap anjaha anjaha ulang lolei hita managam harorohNi Kristus. Seng porlu atap antigan panorangni, seng porlu atap sadihari harorohni Kristus ai use, halani ai naporlu banta aima totap managam, waspada, berjaga-jaga. Ibagas namangam harorohNi Kristus ai, tontu sedo pasif hita sebagai halak naporsaya, tapi sirsir ma hita aktif, mamparsiapkon aha naporlu ibani namagam hita bani ari haroroh-Ni Kristus ai, ibani namanagam Kristus ai hita isi hita ma goluhta on marhitei horja namadear, ulang tarpodom, anjaha torang ma uhurta mangkorjahon parentah ni Jesus Kristus ibagas haporsayaon ampakon holong na humbani Tuhan in. Paulus mangkatahon hita aima anak-anak haliharon, halani ai torang ma uhurta, anjaha pakei hita ma baju bosi haporsayaon ampa haholongan ampa tangkuluk pangarapan bani haluahon ( 1 Tesalonika 5:8) onma sipakeonta ibani namagam harorohNi Kristus hita, atap attigan, atap sadihari pe Ia roh, hita totapma gabe anak-anak haliharon, tagam anjaha sirsir ma hita mamparsiapkon diri marhitei sirsir mangkorjahon hadoharon, hadameion pakon hapintoron sadokah manggoluh hita. Ulang songon podahni Simalungun namangkatahon “Ulang marbau lape matei” podah on pasingatkon hita sadokah manggoluh on hita ulang lalap hita bani horja hagolapan, hajungkaton, pakon partinggilan namambahen mabau goranta ilobei-lobeini Naibata pakon hasoman jolma, tapi gabe songon bunga-bunga in ma hita mambere hajengeson, hamoruman hubani halak namangidah, sonaima hita managam harorohNi Kristus Rajanta namarsangap in.
- Topikta bani Panorang on “orang bijak mempersiapkan masa depan”. Marhitei topik on ipangindo do hubanta ase bani goluh sondahan on ase ulang gabe halak na pasif (tarlolei, tarlalap anjaha tarpodom) hita bani goluh ibagas namangam masa depan, tapi maningon do hita aktif, songon lima naboru maruhur ai, paima roh Siparunjuk domma ipasirsir dob-dob minak ampakon suluh naporlu bani lahou mangalo-alo Siparunjuk ai. (Matius 25:4) Sikap on aima sikap antisipatif, aktif janah partisipatif. Sonai do homa ipodahkon raja Salomo hubanta, namangkatahon: laho ma bani porkis, pardiatei pambahenanni anjaha maruhurma! Age pe lang dong bani sidea pengulu, mandur atap raja, ipasirsir do sipanganonni bani musim logou ni ari, ipatumpu do sipanganonni bani musim sabi on. (Podah 6:6-9) Podah ni raja Salomo on mangkatahon hubanta ase ulangma hita urah rayohan, tarlolei, tarlalap anjaha tarpodom hita bani hisap-hisap ni daging ta, ra do misalni halani bahat ope sinarinta sadarion, atap halani bolak jumanta atap artanta sondahan on gabe rayohan hita mangkorja, mangkorjahon kebiasaan na seng marguna hubanta, sonai age hubani hasoman, tapi marhitei podah on iajari do hita ase pandei hita mangantisipasi masa depan ibagas semangat horja na pongkut, sabar, songon porkis, agepe dugut bani horjani boi do Ia manimpan sipanganon ni, ase sanggah roh holi logou ni ari, seng mangarou be ia, halani domma ibagas napongkut ia ia mangantisipasi masa depan, ai do halak natagam bani masa depan. Songon podah namangkatahon “masa depan adalah hari ini” lakukan yang terbaik dan diatas itu Serahkah sepenuhnya kepada Allah” anggo bani bahasanta nagati ihatahon sonon “tonggohon horjamu, horjahon tonggomu namarlapatan do ai ase bani goluh ulang urah rayohan, tapi totap ma nadugut mangkorjahon horja, sebagai bentuk antisipatif mamparsiapkon masa depan nalobih dear. Amen
