PENDIDIKAN MORAL DI TENGAH-TENGAH KELUARGA KRISTEN DI ERA DIGITAL

PARLOBEINI

Ganup do orangtua marsura-sura ase niombahni bujur, tercapai sura-sura, anjaha bani masa depan boi gabe niombah na marguna bani keluarga, gereja ampa masyarakat. Bani panorang sonari on bahat tumang tantangan na idompakhon orangtua bani na mandidik niombah ikeluarga. Dear do ipasikolahkon orangtua niombahni bani pendidikan mulai TK, SD, SMP, SMA, das hu Perguruan Tinggi. Domu hubani pencapaian ilmu pakon pengetahuan. Tapi boi sahali domu hubani goluh partonduyon ampa goluh hubani karakter ampa moral lang jumpah humbani parsikolahan formal in. Halani ai ma porlu tumang ipadas orangtua pendidikan moral na ipadas itongah-tongahni keluarga.

ISI

Bani zaman modern sonari on, perilaku moral pakon kepribadian masyarakat memprihatinkon halani adong bagei kasus asusila pakon amoral na ihorjahon halak na matoras, remaja pakon niombah aima songon na mamunuh, manganiaya, manangko pakon nalegan. Mancermati kondisi na adong, pendidikan moral aima marupahon kunci utama ibagas na mambentuk pargoluhon ni manisia hu arah paradaban pakon kepribadian na lobih dear.

Domu hubani pangarusion moral bani Kamus Besar Bahasa Indonesia (KBBI) aima ajaran pasal baik buruk yang diterima umum mengenai perbuatan, sikap, kewajiban; akhlak; budi pekerti; susila.

Adong piga-piga contoh moral na adong itongah-tongahni masyarakat:

• Hasintongan

Manjaga hasintongan ibagas sagala situasi, bahkan panorang na mahol, aima contoh moral na penting. On malibathon marsahap sintong, parlahou na dos parsahap pakon pambahenan, pakon mampartahankon haporsayaon.

• Holong ni uhur

Adong parlahou na sari pakon holong dompak hasoman aima nilai moral na toguh. On tarmasuk mangurupi hasoman na ibagas hasusahan pakon pataridahkon uhur na bulus dompak haporluan ni hasoman.

• Sikap hormat

Manghormati halak na legan tanpa mangidah latar belakang, budaya, atap status sosial aima contoh moral na porlu. Sikap hormat manciptahon lingkungan na inklusif pakon harmonis.

• Bulusni uhur pakon hasabaron.

Pataridahkon bulus ni uhur pakon hasabaron ibagas mandompakhon tantangan pakon konflik aima contoh moral na bagas. On malibathon kemampuan ase totap tenang pakon terfokus bani jalan keluar, bahkan ibagas situasi na mahol.

Moralitas mamberehon onjolan na toguh bani parsaoranni manisia pakon membentuk onjolan bani masyarakat ase berfungsi ibagas na dear. Nilai-nilai moral na ijalo secara luas mangurupi patureihon lingkungan na lobih dear bani ganup jolma.

Alasan utama mase pendidikan moral agama Kristen porlu ibagas keluarga aima halani hita aima keluarga Kristen, porlu tumang laho mamparlajari pakon patubuhkon haporsayaonni sasahalak, habujuron hubani hasoman na legan ibagas rumah. Iharaphon do hita boi manggoluh sadalan hubani hatani Tuhan, mandalankon aha na iajarhon Hatani Tuhan ampa gabe panondang ampa garam dunia itongah-tongahni halak na lang mananda Kristus. Artini, haporsayaon, ibadah, pakon parlahou siganup ari maningon sadalan pakon hatani Naibata.

Ibagas na mambentuk haporsayaonni niombah, na manjolom peran kunci aima keluarga. Ganup anggota keluarga, tarmasuk orangtua pakon saudara kandung, aima guru na parlobeini niombah na boi mangajarhon laho mandalani pargoluhon ibagas haporsayaon pakon pangarapan. Marhitei mampraktekhon haporsayaon secara aktif, keluarga padashon porluni mambahen bastu Tuhan ibagas pargoluhanni sidea sehingga bani ujungni, keluarga gabe lingkungan na aman bani niombah laho mangeksplorasi age pe mambahas haporsayaon riap pakon keluarga.

Domma iarusi hita orangtua porluni manuanhon pendidikan moral Kristen ibagas keluarga. Laho mambobai hita patubuhkon haporsayaonni niombah i rumah, adong piga-piga cara praktis na boi idalankon orangtua. Adong 7 (pitu) cara na praktis bani orangtua ibagas na mambangun haporsayaon ni niombah i rumah atap keluarga. 

• Pasirsirhon panorang laho mandalankon renungan atap saat teduh

Panorang Renungan atap saat teduh na imaksudhon ijon boi idalankon bani bagei cara songon mambasa Bibel, martonggo, atappe riap mardiskusi pasal Hatani Naibata na ibasa.

• Riap martonggo paima mangan

Mangajarhon niombah martonggo paima mangan mungkin manurut hita aima cara na sederhana. Tapi pambahenan na sederhana on bermakna tumang laho membentuk sikap bersyukur atap martarimakasih ni sidea ibagas pargoluhan siganup ari.  Hata ni Tuhan bani 1 Tessalonika 5:18 paingathon hita:  “martarima kasih pasal haganup, ai in do na pinindo ni Naibata humbani nasiam marhitei Kristus Jesus.” Marhitei pasomalhon martonggo paima mangan, niombah marlajar laho manghatarimakasihkon ganup pasu-pasu na iberehon Tuhan hubani sidea.

• Mambangun komunikasi tarbuka pakon niombah

Mangojur niombah laho marsungkun pasal Tuhan pakon haporsayaon boi do ipungkah marhitei mambere panorang hubani niombah laho padashon pikiran, pangahap, pakon sungkun-sungkun ni sidea pasal haporsayaon sonai pargoluhon partonduyon. Anjaha hita orangtua tontu manangihon sidea ibagas pongkutni uhur.

• Mamberehon siusihan na dear

Lang pala porlu pahara na banggal, boi do ipungkah humbani pahara na etek na idalankon secara konsisten pakon berintegritas. Pahara onma na mambahen haporsayaonni niombah ni hita/nasiam lambin ibangun pakon lambin toguh ibagas Kristus.

• Mandalankon bagei aktifitas maronjolan bani haporsayaon

Mamungkah mangarahkon niombah dihut berpartisipasi bani bagei kegiatan na boi mambangun haporsayaonni sidea. Padihut hita ma niombah bani bagei aktifitas na maronjolan bani haporsayaon songon komunitas gareja, mangidangi, atap kegiatan sosial na boi mangajarhon sidea pasal Tuhan. Pahara on mangurupi niombah laho mangahapkon arti humbani ajaran-ajaran agama ibagas konteks pargoluhan siganup ari.

• Marayahon pencapaian ibagas pertumbuhan iman

Bani pangarusion ampa pandalankononni niombah maronjolan bani hatani Naibata bani pardalanan pertumbuhan iman ni sidea ai, orangtua boi do mambere penghargaan na lang maningon bersifat materi tapi mambere panorang quality time riap pakon keluarga bani akhir pekan. Pahara na sonon on mambere ojur-ojur na positif hubani niombah laho torus bertumbuh pakon berkembang ibagas haporsayaonni sidea.

• Mamakei bagei media laho menumbuhkon iman

Bani era digital sonari on, adong do peran besar ni media ibagas pargoluhon siganup ari-arita, termasuk membentuk haporsayaonni niombah. Marhitei bueini informasi na boi iakses niombah, hita sebagai orangtua lambin porlu mamilah na ija na dear pakon na lang. Media boi gabe alat pangurupi na efektif laho patubuhkon haporsayaonni niombah. Contohni lagu-lagu rohani, film-film atap animasi Kristen. Sonari on pe domma dong applikasi renungan harian pakon materi pembelajaran online na ibahen khusus bani niombah-niombah.

Boi do imaanfatkon ganup orangtua media na dong ai sehingga niombah boi marlajar pasal kisah-kisah Bibel, nilai-nilai parugamaon, pakon prinsip-prinsip moral secara interaktif, pakon pasonangkon. Haporsayaon na marhasil iturunhon hubani niombah jelas gabe hadiah na maharga bani keluarga. Panorang niombah marbanggal ibagas lingkungan na bayak bani nilai-nilai Kristiani pakon idukung praktik-praktik pargoluhon na sadalan hubani ajaran Hatani Tuhan mangkorhon sidea tubuh marbanggal gabe sahalak na marhaporsayaon na toguh.

Anjaha sotorusni adong parsaoran sidea pakon hasoman na legan ibagas na jenges pakon lobih sehat ibagas jangka waktu panjang. Halani haporsayaon na toguh boi gabe sijoloman ibagas mandompakhon bagei tantangan ampa parlajouan pargoluhan, pakon mangajarhon nilai songon holong, pengampunan, ampa penghargaan dompak hasoman na porlu tumang ibagas na mambangun parsaoran na dear ibagas keluarga.

PANGUJUNGINI

Marhasil mandidik niombah ibagas na dear aima sura-sura ni ganup orangtua ibagas on aima bapa pakon inang i rumahtanggani bei. Ganup do orangtua pasti marosuh anggo niombahni boi sukses pakon marmalas ni uhur. Tongon ibagas kenyataanni lang urah laho pasaudkon sura-sura ai. Pendidikan Agama Kristen memiliki peran na porlu tumang ibagas keluarga laho mambentuk moral, spiritual pakon karakter ni niombah. Sadalan hubani pertumbuhanni niombah bani era digital sonari, orangtua totap berperan penting na gabe pembimbing bani perkembangan moral pakon spiritualni niombah.

Ibagas hal ai, orangtua porlu mandalankon piga-piga tugas ibagas keluarga laho mambentuk karakter, pikiran, pakon semangat ni niombah i era digital modern. Naboi idalankon aima:

• Mambere contoh parlahou na dear sadalan hubani keteladanan ni Jesus ibagas parsahap sonai pambahenan.
• Mangajarhon hatani Tuhan pakon Pendidikan Agama Kristen.
• Mambere holong hubani dirini niombah.
• Pasomal-somalhon niombah totap martongo pakon mardingat Tuhan ibagas ganup aktifitas.

Halani ai suksesni orangtua mendidik niombah itiap rumahtangga Kristen sedo halani pandeini orangtua mangajari niombahni, tapi sonaha orangtua: (bapa, inang), boi gabe contoh na terbaik hubani sidea. Anjaha adong sada ungkapan na sederhana untuk iarusi pakon ihorjahon orangtua bani mandidik niombahni aima humbani James Baldwin, na ihatahon sonon: “tongon lang ongga dear niombah bani pahara manangihon orangtua, tapi niombah lang ongga gagal laho meniru orangtua ni sidea.”

Panurat: Pdt. Fraimen Purba (Kabid. Pastoral Kantor Sinode GKPS Pematangsiantar)