Renungan Mingguan Bapa GKPS, Minggu, 17 November 2024 (25 Setelah Trinitatis)
Nas : Wahyu 3:20-22
Usul Doding : Haleluya No. 496:1-3
Tema : Tuhan ada di hati orang percaya
Tujuan : Agar kaum bapak memahami bahwa Allah sedang mengetuk hati manusia untuk bertobat dan dimenangkan.
“Ungkap Ham ma Uhurmu”
Anggo itangar ham adong na manghartuki labah ni rumah atap marsora bel ni rumahmu, aha ma na tubuh bani pingkiranmu? Anggo adong pesanan online ra tarpaima do ham bani pardas ni paketmu ai, janah malas do uhurmu ibagas na paimahon ai. Tapi adong partagih do na roh laho managih utang humbamu naha ma pangahapmu? Tontu boi lang sonang, mabiar, gobir, aha ma sibereon, aha ma sihatahonon pnl. Ai ma na gabe gambaran laho mangarusi na isobut bani ayat on, bani teks on isobut Jesus manghartuki labah ni uhurta. Adong do halak na mabiar laho mambuka labahni uhurni. Jesus roh laho padearhon hauhuronta janah sihol do buei sibahenon ni marhitei paruhuron na tarbuka manjalo parrohni. Ai ma na sihol ipatangkas hita bani panorang on.
Bani Pangungkabon 2-3 on jumpah hita 7 surat humbani Jesus hubani 7 kuria na porsaya. Ganup surat ai sarupa do pola pinadas ni apostel Johannes on, adong pitu bagian bani tiap surat. Ipatorang pasal aha na sinahapkon ni Jesus pasal kuria ai, ipadas do homa pujian pasal kuria-kuria ai. Adong homa teguran ampa podah ase idalankon na sintong. Ipangindo do homa ase kuria manangihon hatani Tuhan Jesus, janah iujungi do bani bagah-bagah ambilan na madear in.
Surat hubani kuria Laodikia aima surat na unik humbani surat na legan na bani kuria na onom nari. Bani surat on lang adong pujian hubani kuria ai. Ra do isobut hita halak na parpudi sedo halani sietekan ai, tapi dos do pakon dob isobut ilobeini. Bani konteks on, kuria Laodikia aima kuria na parpudi isobut. Ijon tangkas iidah hita paboa seng adong na dear na sihol padason ni Jesus hubani kuria ai. Halani surat on aima pangindoan na mendesak ase kuria ai marhamubahan ni uhur, segera bertobat. Janah irik do isobut singat-singat na majangin hubani kuria ai.
Ra boi hata na sarupa ipadas hita hubani sada kuria na mangkorjahon na lang madear, halani ai ipangindo ase podas manadingkon ai janah mandalankon na madear. Hamubahan ni uhur sedo pitah ihorjahon sahali tumang hansa, tapi ningon do torus adong ai bani goluh ni halak na porsaya na sai ra do madabuh hu bagas dosa. Hamubahan ni uhur aima mubah ni pingkiran, humbani ganup pargoluhan na malembang humbani uhum, parentah ampa hata ni Naibata. Ijai ma hita mangidah paboa na bajan do hape ulahta ai, janah sihol do hita mulak hubani Naibata ibagas hapansingon marhitei haporsayaon ampa pangarapan paboa na sirsir do Tuhan manasap dosanta janah manjalo hita, janah ipapansing pargoluhanta. Ai do ase porlu do torus hita on ipabayu ase totap marhamubahan ni uhur bani pargoluhta on.
Naparlobei na ipadas Jesus hubani kuria Laodikia aima pasal dosa-dosani sidea. Hubotoh do ganup parlahoumu, seng borgoh janah seng milas (ay 15) mangarap do ahu ase ipilih nasiam sada humbani na dua ai. Halani na danggol-danggol sisilon do nasiam, lang borgoh janah lang milas huutahkon ma nasiam humbani pamanganKu (16). Kuria Laodikia on sedo gabe songon sipelebegu atau halak na lang porsaya. Pargoluhan ni sidea sedo gabe songon goluh na maradat atap gabe lang dong haporsayaonni. Tapi lang homa gabe garam ampa panondang songon na seharusni. Parsahap ampa parlahou ni sidea doma maragu pakon dosa. Adong do holong bani uhur ni sidea anjaha idalankon tapi lang humbani gok ni uhur. Sidea lang ‘menyala’ mandompakkon Jesus janah seng homa ‘menyala’ laho mangkaholongi hasoman. Sikap ni sidea apatis ampa marayoh secara partonduyon aido ase ihatahon Jesus sihol ma tadingkonon sidea.
Sasintong Jesus seng ongga mangarapkon ase borgoh halak na porsaya ampa galek haporsayaonni. Menurut Jesus ra urahan halak na lang porsaya gabe porsaya huBani marimbang halak na songon kuria Laodikia on. Jadi songon doras do teguranni Jesus on. Halani ai porlu halak Laodikia merenung janah mangidah dirini sidea secara jujur. Adong ope panorang, roh ope Jesus laho manghartuki labah ni hauhuronni sidea ase marhamubahan ni uhur.
Adong ma program ni kuria laho manohu kuria na dob dokah lang ongga roh hu parmingguon ampa partonggoan. Laho ma parhorja manjumpahkon kuria ai, das irumah ai iparsahapkon ma kuria ai, nini keluraga ai malas do uhurni kuria ai itohu, janah marjanji roh ma marminggu. Jumpah ma panorang marminggu, malas ma uhur ni parhorja janah mintor isalam ma kuria ai halani na dob roh ia marminggu. Das hubani na sabulan rajin ma tongon keluarga ai marminggu. Dob ni lang ongga taridah be. Hape sidea roh hu parmingguon pitah piga-piga hali do hansa dob ai mulak ma songon na salpu, seng taridah be. Sonaha ma anggo sonon ma pargoluhanni kurianta?
Sanggah roh parhorja ai hu rumah ni kuria ai, aima laho paingatkon paboa halak na porsaya ningon dear do hubunganta pakon Tuhan Naibata. Ai do ase marsaor hita marhitei ibadahta. Hape bani buei halak na Kristen lang mangkaporluhon ai be. Ra teguran hubani kuria Laodikia, sarupa do hubani kuria na sonai ai. Lang borgoh janah lang milas, terdaftar do hansa gabe anggota ni kuria tapi lang ihagoluhkon pandiloonni.
Sanggah roh Jesus hu labah ni uhurta, sedo pitah mandilo hita laho marhamubahan ni uhur tapi itawarkon do banta hasasapan ni dosa ampa haluahon. Haganup do adong bani Jesus, ganup na iporluhon kuria Laodikia, tapi halani itulak sidea Jesus gabe lang ijalo sidea hasasapan ni dosa ai. Jesus manghasiholkon kuria ai manggoluh ibagas hapansingon, ipabayu ma hauhuron ase boi mangirikkon kuria na onom na legan ai. Jesus aima parmahan na madear na mangharosuhkon ase ulang adong biri-biri humbani hulanan ai na kahou. Seng marosuh Tuhan Jesus pitah onom hansa kuria na maluah, sada hona uhum. Sihol do Jesus ase ganup ma manjalo haluahon na pisirsirNi ai.
Jesus gabe tamu bani hadirionta. Ia sihol masuk hubani hadirionta, marsaor pakon hita, riap mangan ampa minum. Gambaran hubungan na orod, nyaman. Buei na sihol padason ni Jesus hubanta pasal sura-sura na madear bani goluhta ampa pargoluhanta. Parsoaran pakon Jesus gabe hal na porlu tumang bani pargoluhanta selaku halak na porsaya. Bani ganup panorang do iahapkon hita iporluhon hita panuturion ampa pambobaion ni Jesus bani pargoluhanta on. Halani iahapkon hita na so tuk do gogohta ampa pangarusionta bani haganup. Halani ai talup marmalas ni uhur do ma hita halani sirsir do Tuhan roh laho manohu hita. Buka hita ma uhurta, ulang itutup hita, ulang mabiar hita buei ruang bani uhurta on lang lang iharosuhkonNi. Buka hita ma gelah uhurta, ase iidah Jesus anjaha ibotoh aha na porlu sipaborsihon humbani uhur parbagasta ai, ulang iantan hita pambukani tapi paturut hita ma Tuhan in masuk ase bayu tongon hauhuronta janah malas uhurta bani pargoluhanta halani adong do Tuhan na sai sirsir roh hubanta laho mangurupi janah pasintongkon goluhta.
Anggo marosuh do hita bani Tuhan, porsaya hita Bani, tontu anggo roh ia hubanta malas do tumang uhurta. Songon halak na martunangan na marjanji laho roh martandang malam minggu, anggo anak boru ai domma ipasirsir dirini, pangkawahni pe dompak labah mando lalap halani malas ni uhur laho mangalo-alo tunaganni na hinaholongan ni uhurni. Sonai ma hita bani Tuhanta na gok holong ai. Ulang sebalikni, ianggap hita Tuhan ai lang porlu, seng adong hubunganni bani pargoluhanta halani ai seng porlu ia roh bani goluhta, atap hita pe mangahap lang porlu roh hubani Tuhan. Ulang ma namin sonai tene.
Hasirsiron mambuka uhur janah paturut Jesus marhorja bani uhurta marhitei Tonduy Napansing. Halani adong do dampak jangka panjang hubani halak na sirsir mambuka uhur pakon halak na manutup uhurni. Jesus mangkatahon paboa na halak na mambuka uhurni manjalo hasasapan ni dosa janah parsimada bani haluahon na pinasirsirni Tuhan. Sidea aima na targoran halak na monang, monang mantaluhon dosa ampa pangagou na mangambati hita mambuka uhurta dompak Naibata, dosa na mambahen jolma mangahap lang mamorluhon panobusion ampa pangurupion ni Naibata bani goluhni. Na manong manlawan sibolis ampa sipangagou in, ai do sirsir mambuka uhur janah na paturut Jesus marhitei Tonduy Napansing marhorja bani hadirionni. Monang manlawan sibolis i dunia on. Halak na monang on ma iontang Jesus, Anak ni Naibata laho manjalo ianan na dob pinasirsirNi isiamun ni hotakNi, songon Anak in na dob monang janah hundul siamun ni Bapa bani hotakNi. On ma pesta malas ni uhur, na totap ibagas parsaoran na mapansing pakon Anak ni Biri-biri ni in na lang anjai marnasalpu. On ma na itawarkon hubani ganup halak na porsaya. Na manjalo Jesus bani goluhni.
Secara khusus bani seksi bapa, na jongjong do Tuhan Jesus nuan ilobei ni labah ni hauhuranta, manghartuki ai sihol masuk Ia bani pargoluhanta. Ulang ma ipenengel hita pinggolta gabe lang itangar hita na itutuki Tuhan hauhuronta gabe lopus holi panorangni lang tarulaki. Sonaha pe situasinta, ulang ai mambahen hita panengel pinggolta gabe lang marpanangar janah papitung panonggorta laho mangidah pambahenan ni Naibata bani goluhta on. Sirsir do bani Naibata haganup na iporluhon hita i dunia on, sonai ampakon simagira. Buka hita uhur, pingkiranta laho manjalo Tuhan in ase bayu, pansing goluhta, janah talup hita panean ganup pasu-pasu na pinasirsirni Tuhan bani goluhta on. Amen.
