Renungan Mingguan Seksi Bapa GKPS, Minggu 08 Desember 2024 (Advent II)
Nas : Yesaya 63:15-19
Usul Doding : Haleluya No. 436:1-2
Tema : Tuhan mampu mengubah pergumulan menjadi kebaikan
Tujuan : Agar kaum bapak senantiasa memohon pertolongan Tuhan atas penderitaan dan pergumulan yang dialami
Mangkawah Dompak Idop ni Uhur ni Naibata
Tim Penulis
Nasiam Bapa na hinaholongan ibagas Kristus, anggo irimang-rimangi hita pardalanan ni goluhta sebagai bapa, pasti do buei momen na ija iahapkon hita songon na borat tanggungjawabta, loja halani tantangan, atap bahkan songon na daoh humbani Tuhan halani dousa ampa hagalekonta. Bani hagoluhanta na buei tekanan sondahan on, boi do urah hita kahou bani kesibukan anjaha lupa bani bonani hagogohonta, aima Tuhanta na setia ai.
Bahan renunganta minggu on, aima tonggo ni Nabi Jesaya, na mewakili bangsa Israel na bani panorang ai iahapkon sidea bahasa domma daoh sidea humbani Tuhan halani dousa-dousa ni sidea. Ielekkon Nabi Jesaya do hubani Tuhan ase mulak uhur-Ni mangidah bangsa ai. Tonggo on sedo pitah pangakuan bani hagalekon ni jolma tapi dihut do pataridahkon pangakuan bahasa Tuhan aima Bapa na gok holong anjaha na setia, na lang ongga manadingkon anak-anak-Ni.
Sebagai bapa, ipaingat do hita marhiteihon nas renunganta on bahasa Tuhan aima Bapanta, na tongtong masihol uhur-Ni laho padearhon hubungan-Ni pakon hita. Renungan on mangontang hita laho: na parlobei, mangakui dengan jujur sonaha ma situasi ni goluh partonduyonta i lobei ni Tuhan.Na paduahon, mardingat hubani holong ampa idop ni uhur ni Tuhan na lang ongga marpunsa. Na patoluhon, mulak anjaha marbalik dompak Tuhan ibagas uhur na marosak, mangindo pemulihan ampa hagogohon humBani.
Bani panorang-panorang na borat bani goluhta on, ra do sipata roh sungkun-sungkun bani uhurta, Sintong do nani parduli Tuhan hubangku? Ija do tanda ni na ihasomani Tuhan ahu, mase ipaturut do ahu kahou janah manaron? Sungkun-sungkun on do homa na gabe inti ni tonggo ni Nabi Jesaya na bani renunganta on. Itongah-tongah ni keterpurukan ni bangsa ai, roh do Nabi Jesaya hubani Tuhan mangakuhon haganupan dousa-dousa ni sidea, ai do na mambahen songon na daoh Tuhan in humbani sidea. Pori pe sonai, lang magouan pangarapan ia, anjaha iakuhon do bahasa Tuhan ai aima Bapa na setia. Aido ase ielekkon ase mulak ma naming uhur-Ni mangidah bangsa ai. Ai Tuhan Naibata do bonani holong ampa idop ni uhur na sintong.
Sebagai umat Tuhan, gati anjaha urah do hita lupa bani idop ni uhur-Ni itongah-tongah ni hamaholon ni goluh. Fakta dunia na masa sondahan on, pandemi global, krisis ekonomi, konflik geopolitik, domma mambahen buei jolma magouan pangarapan. Misalni, laporang PBB baru-baru on pataridahkon bahasa angka kemiskinan global gabe martambah halani krisis ekonomi pasca-pandemi. Buei keluarga na magouan pansarian, anjaha pasti do homa buei bapa na maruntol bahkan merasa gagal laho manggoki haporluan ni keluarga.
Tapi bani situasi on, idilo do hita mardingat ise Tuhan in, aima Bapa na lang ongga manadingkon hita. Songon pangkauan ampa haporsayaon ni Nabi Jesaya bahasa idopni uhur-Ni seng ongga marnamubah, marhiteihon ai porsaya ma homa hita bahasa Tuhanta ai aima Bapa na sari hubanta, bahkan age itongah-tongah ni krisis na borat, atap halani buei ni bencana na masa bani panorang parpudi on. On ma na patoguhkon ampa na pagoluhkon pangarapanta tongtong.
Bani pangakuan ai, tangkas do iahatahon Nabi Jesaya bahasa na mambahen gabe daoh Naibata humbani bangsa-Ni aima halani dousa ni bangsa ai. Halani dousa ni sidea do ase ipahengkeng Naibata uhur ni sidea, anjaha ipaturut. Ai sanggah ipahengken jolma uhurni, ijai ma homa magou ahap biar dompak Jahowa anjaha ujungni gabe kahou humbani dalan-Ni na sintong in. Bani panorang sondahan on pe, dousa do na mambahen daoh hita humbani Tuhan. Idah hita ma buei na masa sonari, ketidakadilan social, korupsi, keserakahan ampa kemerosotan moral, hajahaton na lambin meningkat. Sebagai bapa, idah hita ma dirinta, ra lang sipardihut hita bani na sinobut i atas in, tapi dingat bahasa kemarahan na lang terkendali, keserakahan, hurangni panarihonon dompak keluarga, on pe boi do pahengkeng uhur, gabe mahol hita boi manangar sora ni Tuhan ampa mardalan bani dalan-Ni na pintor in.
Bani pangakuan ni Nabi Jesaya na mewakili bangsa Israel halani mangakuhon dousa ni sidea i lobei ni Naibata, tongtong do adong pangarapan bani. Porsaya do ia bahasa Bapa ni sidea ai do Sitobus sidea humbani sapari. Holong-Ni seng ongga mubah, anjaha tongtong do sihol uhur ni laho padearhon hubungan-Ni pakon bangsa-Ni ai. Pangarapan na sisonai ai tersedia do homa banta sebagai bapa. Lang gabe masalah, age sonaha daohni hita kahou, sirsir do Tuhan in paherbang tangan-Ni laho manjalo hita mulak ampa mardear pakon hita. Bani goluh on, gati do ididah anjaha isaksihon hita sonaha pangarapan ai boi mamboban perubahan na luar biasa.
Salah sada tokoh inspiratif na boi gabe usihan bani renunganta on aima sahalak bapa na margoran George Müller, sahalak pemimpin Kristen abad ke-19 na targoran halani haporsayaonni ampa pangidangionni hubani ribuan anak yatim piatu i Inggris. Bani mungkahni sedo halak na bujur on, bani panoragn haposoonni, manggoluh ibagas dousa do ia. Gati do ia manangko duitni bapani, mangoto-otoi, anjaha madabuh hubagas gaya hidup bebas. Songon halak Israel na bani nas renunganta on, hengkeng do uhurni, anjaha lang adong uhur biar mangidah Jahowa bani goluhni.
Tapi bani umur ni na paduapuluhkon, marubah ma goluhni sanggah roh ia bani sada partonggoan irumah ni hasomanni. Ijai, itangar ma hata ni Tuhan anjaha isadari ma pasal banggal ni holong ni Tuhan. Hunjai nari ma ia martobat, mubah ma uhurni anjaha ibere ma dirini hubani Tuhan, anjaha ihatahon do, ai pe ongga ia mangahapkon na damei (damai sejahtera) halani manjalo pengampunan na humbani Tuhan.
Dob honsi pertobatanni ai, tardilo do ia mangidangi halak na miskin, terutama anak-anak yatim piatu. Bani panorang ai, sanggah mandompakkon krisis do negarani aima Inggris pangkorhonni Revolusi Industri, na mambahen buei dakdanak magouan orangtua anjaha mampar-apar i dalan lang adong pangarapan ni goluh ni sidea. Ijon ma Müller merasa tardilo laho pataridahkon idopni uhur ni Tuhan hubani sidea, tapi tantangan na banggal na ro hubani aima, lang adong dana ampa dukungan hubani.
Songon Jesaya na dilo-dilo hubani Tuhan, sonai do homa Müller on marpangunsandeian bani Tuhan. Martonggo do ia hubani Tuhan, anjaha pabotohkon hubani Tuhan aha na iporluhonni. Porsaya do ia bahasa Tuhan ai aima Bapa na setia anjaha pasirsirhon haganup na porlu domu hubani rosuh ni uhur-Ni. Halani ai lang ongga isuba laho mangindo-indo atap patumpuhon sumbangan humbani halak na legan.
Bani sada panorang, on gabe sada cerita na terkenal humbani kisah ni George Müller, hundul ma haganup dakdanak ai i ruang makan ni panti asuhan, tapi lang adong sipanganon i lobei ni sidea. Martonggo ma ia ibagas haporsayaon na sederhana manobut sonon: “Tuhan, martarimakasih do hanami bani sipanganon na sihol berehonon-Mu.” Lang piga dokah, adong ma manuktuk labah. Sahalak tukang roti roh mamboan roti na baru ope masak, irik mangkatahon, iojur do ahu laho mamberehon roti on hu panti asuhan on. Dob honsi adong ma sada na mangkorja manaruhkon susu, maseda ma karetani dohorhon gerbang ni panti asuhan ai, dob ni iaruhom ma susu na iboanni ai hubani sidea halani rugi pangapni anggo susu ai tarbuang halani lang saud itaruhkon hu alamatni. Gati do masa na sisonai ai bani goluh ni Müller. Tongtong do ipasirsir Tuhan aha na porlu bani sidea bani panorang na topat. Das bani ujung ni goluhni, domma ipajongjong George Müller on 5 panti asuhan na mangidangi bahkan lobih humbani 10.000 anak yatim piatu.
Bani goluh i dunia nan a gok ibagas ketidakpastian, gok tantangan ampa tekanan on, kisah on mamboban hita tongtong mardingat bahasa totap do Tuhan markuasa anjaha setia. Ia aima Bapa na setia na lang ongga manadingkon hita. Kisah on gabe contoh nyata banta sonaha holong ni Tuhan padearhon goluhta ampa patubuhkon pangarapan. Songon Nabi Jesaya na dilo-dilo hubani Tuhan, sonai ma homa hita tardilo laho mamboban haganup paruntolon ampa horu ni uhurta hubani Tuhan marhitei haporsayaon. Riap ma hita marlajar laho tongtong mangkawah anjaha marpangunsandeian bani Tuhan bani ganup gulmit ni pargoluhanta—porsaya bahasa Ia aima Bapa na setia anjaha na gok holong. Porsaya ma sai urupan-Ni do hita anjaha pasaudon ni do sagala na madear bani goluhta. Ase marhiteihon ai ipakei Tuhan ma tongtong hita gabe parugas-Ni laho pataridahkon holong-Ni hubani keluarganta ampa hubani halak na legan i sekitarta. Amen.