Renungan Mingguan Seksi Bapa GKPS, Minggu 22 Desember 2024 (Advent IV)
Nas : Lukas 2:25-32
Usul Doding : Haleluya No. 26 : 1, 3
Tema : Mataku telah melihat kemuliaan Allah
Tujuan : Agar kaum bapak senantiasa melihat kemuliaan Allah melalui kelahiran-Nya
Porsaya anjaha Mangidah Hamuliaon-Ni
Tim Penulis
Nasiam Bapa na hinaholongan ibagas Kristus,
Horja na paimahon aima bagian penting ibagas hagoluhan. Paimahon sanggah i lampu merah, paimahon bani antrian ni layanan pelanggan, paimahon telepon humbani keluarga atap niombah, paimahon bani antrian pembayaran i supermarket, i bank, pakon na legan. Paimahon jumpah ari Natal, paimahon niombah mulak hu rumah hun parsikolahan atap hun parantouan.
Paimahon sedo horja na urah. Domma gabe rahasia umum anggo hita gati paimahon ibagas goluh on. Na gabe sungkun-sungkun banta aima: sonaha do ham paimahon? Sonaha do sikapmu sanggah paimahon ai? Merungut-ungut do atap bahkan menyerobot antrian? Magouan pangarapan atap menyerah? Bosan atap lang sabar? Atap sebalikni, sabar, tenang, janah gok ibagas pangarapan?
Masa Advent mararti do ai harorohan (kedatangan), parroh ni Sipaluah na ilobeii marhitei na paimahon. Masa Advent gabe pardingatan banta pasal parroh-Ni na parlobei anjaha pabagaskon siholni uhurta bani parroh-Ni na paduahalihon. Anggo loja pangahapmu paima-imahon, anjaha dousa na lambin roh bueini, hasedaon na lambin buei masa i tanoh on mambahen hita kewalahan, anggo panahit kronis atap konflik ibagas parhasomanon mambahen hita targoda laho marpikkir bahasa Tuhan terlalu lambat laho manggoki janji-janji-Ni ampa marhorja, idah hita ma sonaha si Simeon ampa pangakuanni bani nas ni renunganta on.
Paimahon aima ciri khas goluh ni si Simeon. Paimahon apoh-apoh hubani Israel. Israel adong halani inisiatif ni Naibata. Naibata mandilo sahalak na margoran Abraham, mamasu-masusi anjaha mambagahkon hubani gabe sada bangsa na bolon. Sanggah ginompar ni si Abraham iparjabolon i Masir, Naibata bertindak laho manobus ampa paluarhon sidea hun parjabolonan ai. Sepanjang sejarah ni Israel, Naibata na pintor anjaha na daulat in torus do marulak-ulak bertindak laho patalarhon diri-Ni hubani bangsa Israel, laho manjagai Israel, laho pasirsirhon na porlu ampa manramotkon Israel.
Tapi bani jaman ni si Simeon, kota Jerusalem domma ikuasai panjajah asing aima halak Rom, na mencampuri urusan parugamaon ni halak Jahudi marhitei na uhur-uhur ni sidea laho pahundulhon ampa mamparontihon malim-malim bolon ni halak Jahudi. Sijalo sohei ni halak Rom torus rangapan sonai age korupsi torus do merajalela, mambahen halak Jahudi gabe tawanan i huta ni sandiri. Lang tarhasonangkon sidea laho menikmati tanoh parpadanan na humbani Naibata ai, halani sidea manggoluh itoruh ni tangan ni penjajah Rom na kejam.
Bani ayat 25 tangkas do isobut bahasa si Simeon paima-imahon Sipangapoh na bani Israel. On ma dunia ianan ni si Simeon tading, dunia na hancur, na ija buei pangarapan ampa sura-sura na lang tarpasaud, dunia na domma dokah mangarapkon ampa paimahon-Si laho padearhon haganup. Jadi, parjumpahan ni si Simeon pakon Jesus on manawarhon pangarapan bani haganup na loja anjaha na paimahon. Sonaha hita, aha na ipaima hita sonari? Sitaronon ampa hajahaton na sonaha ninuhurta maningon marpunsa hun lobeita? Pasu-pasu pasal aha na ipaima hita sihol jaloonta? Doding ni si Simeon ma na maraloling gabe barita malas ni uhur banta: haganupan na pinarsinta ni uhurta jaloonta ma ai marhitei parroh ni Jesus.
Marhitei renunganta on, sihol ma patangkason banta sonaha sikap na patut ibagas na paimahon. Na parlobei, paimahon ibagas gok haporsayaon, na paduahon, paimahon ibagas tonduy, na mangihut paimahon Kristus. Lukas manarik perhatianta hubani si Simeon, marhitei na manggambarhonsi sebagai sahalak na bonar anjaha na daulat. Harapan na sonaha do na adong bani Simeon mambahen ia yakin bahasa Naibata pasti do paluahkon Israel songon na binahen-Ni bani sejarah ni Israel, age pe domma 700 tahun ibagas penindasan ampa kuasa ni bangsa na legan? Mase ma lang targoda ia laho marpingkir songon bueinan halak Kristen bani panorang on, bahasa roh seda ni do torus dunia on?
Porsaya do si Simeon bani janji ni Tuhan mambahen tongtong ia mangarap ase Tuhan bertindak laho padearhoh haganupan. Halak Jahudi na setia mampardiateihon marhitei nabi-nabi bahasa na sintong do bahasa lang itadingkon Tuhan bangsa-Ni. Bagah-bagah pasal haluahon na humbani Naibata pasti do ipasaud (Jer. 33:26; 31:31-34). Porsaya do si Simeon bani padan ni Jahowa, anjaha ipaima do parsaud ni padan ai ibagas hapongkuton, halani ai do ase isobut Lukas, ia sahalak na bonar anjaha na daulat. Haporsayaon ni si Simeon on usih songon si Abraham ompung ni bangsa Israel. Holong ni na toguh hubani Tuhan, habujuron ampa kesetiaan ni hubani Tuhan, ampa hapongkuton ni ibagas tonggo ampa peribadahan, on ma ekspresi ni haporsayaon ni si Simeon. Hagoluhan ni si Simeon gabe siusihan ma on banta laho totap ibagas haporsayaon paima-imahon parroh ni Tuhan in.
Sikap na mangihut aima paimahon ibagas tonduy. Lukas mencatat sonaha Tonduy Na Pansing marhorja ibagas diri ni si Simeon, marianan do Tonduy Na Pansing bani, anjaha ipabotohkon Tonduy ai do hubani bahasa na so idahonni hamateian paima ididah Kristus in, anjaha laho do ia hu rumah panumbahan mangidah Jesus marhitei na ijuljul Tonduy ai. Horja ni Tonduy Na Pansing mambobai si Simeon hubani Kristus. On do horja ni Tonduy Na Pansing, marhorja mampersiapkon uhur laho mangidah ampa manjalo Jesus, laho pasangapkon Naibata. Horja na paimahon, ra do sipata songon na mahol banta, tapi anggo ibagas haporsayaon do hita paimahon ai, lang ipaturut hita sahalak hita, Tonduy Na Pansing mambere kuasa banta, mangurupi hita, mangkasomani hita ampa manogu-nogu hita (1 Ptr.5:10).
Na mangihut aima paimahon Kristus. Sanggah ihatahon si Simeon: “ai domma ididah matangku haluahon na hun Bamu”, artini aima Jesus do hagogokni bagah-bagah in, Ia do Sipaluah in. Jesus aima idop ni uhur ni Naibata na taridah, na gabe daging anjaha marianan itongah-tongahta, na nyata, ampa muncul ibagas sejarah ni dunia on (Kol.1:15,19-20). Jesus Kristus sandiri do gabe objek ni haporsayaonta ampa haluahonta. Halani ai paturut hita ma sihol ni uhurta na lape tarpasaud ampa ngayotta ibagas na paimahon on mambobai hita hubani Kristus.
Nasiam bapa na hinaholongan ibagas Kristus,
Mungkin lang adong hita na ongga pajumpah secara fisik pakon Jesus, songon pengalaman ni si Simeon. Tapi renunganta on mambobai hita laho mangidah haluahon in. Jesus na ididah ampa na iabing si Simeon ai, panorang on ipataridahkon hubanta marhitei hata-Ni. Songon na ihatahon si Simeon:“domma ididah matangku haluahon na hun Bamu, na pinasirsir-Mu i lobei ni sagala bangsa”, dos songon si Simeon na mangidah Jesus halani porsaya bani hata ni Naibata, sonai ma homa hita boi mangidah Jesus marhitei na mangkaporsayai hata-Ni panorang on.
Anggo adong i antara hita panorang on na mulai loja porsaya hubani Tuhan in, anjaha paima-imahon ase Ia marhorja ibagas goluhta ampa marhitei hita, mangkawah ma hita dompak Jesus anjaha porsaya ma bahasa lang ongga Ia lambat bertindak. Roh do Ia “dob gok panorangni” (Gal.4:4) anjaha laho roh do Ia use, anjaha “sanggah roh Ia bani ari ai, ase marsangap Ia humbani na mapansing-Ni anjaha longang sagala na porsaya bani” (2 Tes.1:10).
Goluh i dunia on gati do parohkon tantangan na mambahen hita ragu hubani janji ni Tuhan. Tapi marhitei Jesus Kristus, domma adong banta onjolan ni haporsayaon na toguh, onjolan ni goluh i dunia on sonai age bani hagoluhan simagira. Halani ai totap ma setia hubani Tuhan, manggoluh ma ibagas pangkasomanion ni Tonduy Na Pansing, anjaha totap ma porsaya anjaha mangarap. Sebagai bapa, gati do hita mandompakkon hamaholon, ibagas pangkorjanan, i keluarga, sonai age bani hagoluhan secara pribadi, tapi songon si Simeon na torus marsijoloman bani hata ni Tuhan mambahen Ia boi mangidah hamuliaon ni Naibata ibagas diri ni Jesus, porsaya ma hita bahasa totap marsijoloman ampa marpangarapan ibagas Ia pasti do mambobai hita hubani malas ni uhur ampa hadameion na sintong halani mangidah hamuliaon-Ni. Amen.
