
Renungan Mingguan Seksi Bapa GKPS, 9 Februari 2025 (5 Set. Ephipanias)
Nas : 1 Petrus 3:8-12
Doding : Haleluya No. 250:1-4
Tema : Menjauhi yang jahat dan melakukan yang baik
Tujuan :Agar kaum Bapak menjalankan tugasnya dengan menjauhi yang jahat dan melakukan yang baik
SIMBILI NA JAHAT JANAH HORJAHON NA MADEAR
Horas ma hubani nasiam seksi Bapa GKPS!
Kuria ni Tuhan na hinaholongan ibagas goranni Tuhan Jesus Kristus Raja Gareja, pargoluhan Kristen sedo pitah teori tumang tapi dihut do pakon pakkorjahononni. Halani ai Apostel Petrus marhitei renungan mingguan on patorangkon podah hubani halak Kristen pasal sonaha do marpambahenan i tongah-tongah ni pargoluhan ibagas parsaoran i tongah-tongah ni masyarakat, bani ianan pakkorjaan pakon ibagas keluarga. Ase boi manghagoluhkon pargoluhan ni halak Kristen na lang pitah teori tumang, ihaporluhon tumang do kesadaran pasal pandiloon salaku halak na porsaya. Humbani nas on iojur do hita laho manghorjahon pandiloonta aima manghorjahon na madear janah manimbili hajahaton. Ase sonari idah hita ma lobei pahara na dua on:
Bapa GKPS na sauhur, sapangahapan, parholong, paridop ni uhur, partoruh ni uhur
Sauhur aima pasal otoritas. Sauhur mararti hita marsada-sada mangondoskon pingkiran, emosi pakon naluri ta hubani sipambobaita. Sipambobainta aima Tuhan sandiri. Haganupan pagori ni kuria age anggota keluarga maningon memiliki otoritas tunggal aima Tuhan. Maningon hapintoron ni Tuhan do na gabe hapintoron banta sedo hapintoronta sandiri. Na ianggap hita pintor ra do salah. Biak hadousaonta ra do mambahen hita marsiboan pingkiran pakon hasintonganta sandiri. Ase lang boi standart ni jolma ipakei hita. Anggo masing-masing hita mangihutkon sistem buatanta sandiri laho menilai aha na sintong lang mungkin boi sauhur hita. Ase sauhur aima uhurta marsada-sada mangihutkon uhur ni Naibata. Hata ni Naibata ma standart ta bani pemahamanta pasal hasintongan. Haganupan hita patoruh uhur ase boi ibobai hata ni Naibata.
Irik hujai sauhur isertai pakon sapangahapan. Sapangahapan mararti bersimpati pakon berempati. Pasal on Apostel Paulus mambere tanda na sapangahapan aima na ihatahon bani Rom 12:15: “Marmalas ni uhur ma nasiam rap pakon na marmalasni uhur, tangis ma pakon na tangis”. On mararti porlu tumang uhurta bani hadearon ni pargoluhan ni hasoman. Adong reaksi malas ni uhur na spontan dompak malas ni uhur ni hasoman, sonai pakon sebalikni, adong reaksi pusok ni uhur na spontan bani pusok ni uhur ni hasoman. Malas uhur mangidah hasoman na marmalas ni uhur, pusok uhur diri mangidah hasoman na marpusok ni uhur. Sedo songon istilah na gati itangar hita SMS aima senang melihat orang susah, susah melihat orang senang. Paruhuran na sapangahapan daoh do humbani SMS. Dob ai, aima pasal parholong ni uhur. Holong ni uhur maningon gabe identitas utama ni halak na porsaya. Gareja marbeda pakon organisasi-organisasi na legan. Holong na adong ibagas gareja bagasan marimbang holong na dong bani partai politik, Serikat Tolong Menolong (STM), tumpuan marga atap parsahutaon pakon na legan. Anggo bani organisasi-organisasi na legan idasarhon bani kepentinga, anggo Gareja idasarhon bani holong ni Kristus. Holong na humbani Kristus mambahen hita palobeihon haporluan ni hasoman marimbang haporluan ni dirinta sandiri. Holong ai taridah do homa bani sikap paridop ni uhur. Paridop ni uhur gabe hataridahan ni na domma ijalo hita do idop ni uhur na humbani Tuhan. Idop ni uhur aima na jinalonta humbani Tuhan hansi pe lang talup hita manjalo ai. Kesadaran bahasa hita pe na iidopi do mampargogohi hita ase ra homa mambere anjaha marpambahenan hubani hasoman agepe lape ongga manjalo humbani atap lang marbalos idop ni uhurta ai. Sikap paridop ni uhur on tarhorjahon anggo hita partoruh ni uhur. Anggo ianggap hita pasti sintong do hita menurut pingkiranta sandiri, sigijang uhur do hita ijai. Bani tumpuan ni halak na porsaya, toruh ni uhur maningon torus ipataridahkon halani ai do na mambobai hita laho marsijaloan pakon marsianjuan bani na hurang. Sonai do homa seksi bapa, martoruh ni uhur ma, agepe status ni sebagai kepala keluarga, tapi maningon mengaplikasihon sikap toruh ni uhur.
Bapa GKPS na mambahen pasu-pasu gabe balosni hutuk
Gareja mambahen Ambilan Na Madear tangkas taridah bani dunia on anggo halak Kristen mamasu-masu halak na mamapasi. Sanggah sonai ibahen hita, hita mangusihi Jesus Kristus na mambalaskon hutuk ni dousanta marhitei pasu-pasu aima pengampunan na jinalonta ibagas parmateini Jesus Kristus. Ase, anggo iampuni hita na marsalah banta, janah lobih hunjai ope use, ibahen hita na madear gabe balos ni pambahenan na jahat na binahenni hasoman banta, ijai ma hita pataridahkon horja ni Ambilan Na Madear (Injil) in. Anggo ihaholongi hita na marsogam ni uhur banta, sasintongni ijai ma iakui hita bahasa hita pe pardousa do. Salaku sama-sama jolma, sasintongni maningon tongtong do sirsir hita mangampuni dousa ni halak na marsalah banta, ibagas kesadaran hita pe pardousa do janah na manjalo pengampunan do homa na humbani Naibata.
Gareja marhorja laho padaskon Ambilan Na Madear (Injil) hubani dunia on. Injil aima pengampunan na ibere Tuhan ibagas parmateini Tuhan Jesus Kristus. Parmateini Jesus Kristus aima hataridahan (bukti nyata) pakon sitiruan (contoh) holong ni Tuhan na banggal tumang na roh hun datas. Holong na hun datas ai torang do patuduhkon contoh na luar biasa aima Naibata mambalaskon dousanta marhitei pasu-pasu ibagas pengampunan. Cara ni Tuhan ai do na itiru hita ase tarhorjahon hita aha na sinobut bani ayat 9 on: “Ulang ma balaskon nasiam na jahat imbang ni na jahat, risa-risa imbang ni risa-risa, lambin mamasu-masu ma nasiam, ai sihol teanon nasiam do pasu-pasu, ase tardilo nasiam.” Ase pagori ni kuria gabe contoh nyata ni pemberlakuan “lang mambalaskon na jahat imbang ni na jahat, risa-risa imbang ni risa-risa”. Jadi sonon: sanggah adong halak na manrisai (mencaci maki) pakon mamapai hita, hita pagori ni kuria (dalam hal on warga seksi bapa) maningon gok ibagas holong laho mamasu-masu na manrisai janah na mamapai hita ai, ase dob sonai, risa-risa pakon papa ni sidea lang mangonai banta. Maningon marbois gogoh do hita marusaha ase ididah sidea horja ni Tuhan marhitei peristiwa na ija hita mambalaskon na madear bani na jahat ai. Sonaha nani, boi do tarhorjahon hita on? Boi do ihorjahon hita on anggo hita domma sintong-sintong manjalo janah mangahapkon holong ni Naibata banta, hita pe na iidopi Tuhan do. Sasintong domma parlobei hita manjalo sisonai ai. Hita pe jahat do hubani Tuhan, tapi Tuhan lang mambalaskon hajahatonta ai, tapi iampuni do hita, isasap dousanta, lobih hunjai ope use, ibere do banta sidearan, padahal domma irisai hita Tuhan marhitei dousanta. Domma parlobei Tuhan lang mambalaskon hajahatonta. Ase aha na adong banta ai do na tarbere hita. Mampu hita mangampuni halani domma parlobei hita iampuni. Ase dingat hita ma tong status ta aima “na dob parlobei iampuni” ai, ase kesadaran ai na margogohi hita mengampuni halak na marsalah banta, bahkan lang pitah das ijai, tapi das do hubani mambahen na madear balos ni na jahat.
Sanggah borit uhurmu bani saninamu, ampuni ma, ai Tuhan domma mangampuni ham. Sanggah terluka harga dirimu ibahen parinangonmu, ampuni ma, halani Jesus pe lang sai porlu bani “harga diri” asalma maluah ham. Buei do contoh-contoh kasus na boi ipajojor hita domu hubani peristiwa ni goluh na membutuhkon uhur pengampun ai. Sonari suba dingati ham ma lobei, aha ma deba peristiwa-peristiwa na mambahen mardomdom ham atap hubani ise pe ai, janah pahombar ham ma homa bani parlahoumu, dompak Tuhan age dompak jolma, aha ma deba na domma ihorjahon ham na mambahen halak talup mardomdom bamu janah talup homa ham iuhum Naibata. Ase anggo ipahombar ham parlahoumu pakon parlahou ni jolma bamu, ham pe sasintongni patut do idomdomi. Tapi diatei tupa ma bani Naibata, lang idomdomi Naibata hita, hasoman jolma pe pasti do domma buei na mangampuni hita. Amen.