Renungan Mingguan Seksi Bapa GKPS, Minggu 13 Juli 2025 (4 Set. Trinitatis)
Nas : Ibrani 11:32-12:11
Usul Doding : Haleluya No. 299:1-2
Tema : Membangun Hubungan yang Kuat antara Bapa dan Anak
Tujuan : Agar kaum bapa tetap terlibat aktif dalam proses membesarkan, mendorong perkembangan dan pertumbuhan yang positif bagi anak-anak.
“Mangajar Niombah Mangusihi Pangajaran ni Naibata”
Bapa na hinaholongan ibagas Kristus,
Bani dunia na lambin kompleks janah podas marubah on, gati do lambin simou peran ni sahalak bapa. Buei bapa nuan on na sibukan mansari, mengejar karir ajaha mangahap bahasa tugas mandidik niombah aima tugas utama ni inang. Hape Bibelta pe mangajarhon do hubanta bahasa peran ni sahalak bapa penting tumang anjaha lang targantihkon ibagas pertumbuhan ni haporsayaon, karakter pakon masa depan ni niombah. Bani renunganta panorang on, ipaondos do banta dua hal, na parlobei, usihan pasal haporsayaon humbani ompung ni halak na porsaya marhitei na manggoluh ibagas hadaulaton pakon habaranion. Na paduahon, pangajarion atap didikan ni Naibata sebagai Bapa na mansorminhon holong-Ni na sintong in. Na dua on porlu irimang-rimangi hita ibagas na paulihon hubungan na orod antara bapa pakon niombah, aima hubungan na lang pitah biologis tapi dihut do homa secara emosional, rohani, pakon spiritual.
Hita Haganupan,
Panurat ni Heber manobut goran-goran, aima si Gideon, si Barak, si Jepta, si Daud, si Samuel pakon nabi-nabi na legan ai. Sidea on sedo jolma na sempurna, gariada buei do humbani sidea on mangahapkon kegagalan na banggal, tapi na isuratkon ijon aima pasal haporsayaon ni sidea. Sidea on aima halak-halak na barani, tangguh, janah mamberehon diri ni sidea dompak rosuh ni Naibata. Sungkun-sungkun banta sonari aima, aha ma na iwariskon hita hubani niombahta panorang on? Warisan materi do? Atap warisan haporsayaon?
Haganup bapa do idilo gabe pahlawan iman ibagas keluargani. Sedo artini maningon gabe sempurna, tapi sirsir marbanggal anjaha gabe usihan pasal hapongkuton ibagas na martonggo, ketaatan dompak hata ni Naibata, pakon gabe usihan bani integritas ibagas hagoluhan ari-ari. Urahan do niombah maniru aha nanididahni marimbang na itangarni. Sahalak bapa na totap setia mambasa hata ni Tuhan, marhorja ibagas na pintor atap jujur, tulus mangkaholongi inang sinrumahni pakon niombah, ijai ma sahalak bapa manuanhon warisan iman na lang tarnilai argani.
Naibata sebagai Bapa, gabe teladan/usihan ibagas na mandidik atap mangajari pakon mandisiplinkon. Heber 12 mambobai hita laho mangkawah dompak Jesus, anjaha mangarusi cara ni Naibata mangajari hita. Bani ayat 5-6 isuratkon do: “Ale anakku, ulang ma hampung uhurmu bani pangajarion ni Tuhan in, anjaha ulang ma mandolei anggo ipinsang, ai iajar Tuhan in do na hinaholongan ni uhur-Ni, anjaha ilonsing do anak na niain-Ni.” Ijon iajarhon do hubanta bahasa holong na sintong humbani tongtong do marhasoman pangajarion pakon disiplin. Tapi sipata, buei do bapa panorang on na pitah gabe ‘penegak disiplin’ tapi lang manghadirkon holong ampa relasi. Na legan use, adong do homa bapa na pitah sihol gabe ‘teman bermain’ janah manlembangi konflik, na mangkorhon niombah ai marbanggal tanpa batasan moral pakon spiritual na tangkas.
Naibata mambere usihan na seimbang marhitei na mangkaholongi pakon manjalo hita gabe anak, dob ai homa mangajar ampa manlonsing hita ase totap pansing songon-Si. Hubanta haganup bapa, artini on banta, porlu do hita terlibat secara aktif bani pargoluhan ni niombahta, lang pitah hadir secara fisik. Dob ai, maningon marlajar do hita laho mangidah kebutuhan emosional pakon rohani ni niombahta, manangihon ampa mandukung sidea. Maningon barani do homa hita mambobai, manogu-nogu, anjaha maminsang sidea anggo porlu. Sahalak niombah na marbanggal ibagas disiplin na gok holong pasti adong rasa aman bani pangahapni sidea, adong identitas pakon arah ni goluh na tangkas anjaha jelas bani sidea.
Keterlibatan aktif ni sahalak bapa, aido na membentuk masa depan ni niombah. Bani buei penelitian psikologis pakon sosiologis, ijumpahkon do bahasa banggal do dampakni bani goluh ni niombah anggo terlibat sahalak bapa bani pargoluhan ni niombahni. Adong do ahap percaya diri pakon harga diri na sehat bani dirini sahalak niombah naboru anggo bapani ai aima sahalak na gok holong ampa terlibat bani pargoluhanni. Sonai do homa bani niombah dalahi, urahan do sidea manjalo otoritas pakon mengembangkon identitas maskulinitas ni sidea anggo ididah sidea bapani gabe pemimpin rohani bani keluargani. Tapi age sonai, parlobei do Bibelta mangajarhon pasal on, bani Podah 22:6 isobut do “Pasomal-somal ma dakdanak mardalan bani dalan sidalanonni, ia dob matua ia, seng manlembang ia hunjai.” Pangajarion atap didikan lang pitah horjani inang, ai aima tanggung jawab utama ni sahalak bapa. Idilo do hita bapa on laho mambentuk karakter ni niombah marhitei na gabe usihan hita bani goluhta, idilo do homa hita pasirsirhon panorang na berkualitas pakon keluarganta, sirsir gabe ‘pendengar yang baik’ anjaha gabe malim ibagas keluarga.
Ra mungkin adong do hita na merasa gagal, mungkin hubungan pakon niombah domma renggang, komunikasi terputus, bahkan ra adong ‘luka batin’ halani masa lalu. Barita malas ni uhur banta: lang adong hata tarlambat ibagas idop ni uhur ni Naibata. Jesus roh hu dunia on laho padearhon relasi antara Bapa pakon hita anak-anak-Ni. Marhitei gogoh ni Tonduy Napansing, tontu hita pe boi do padearhon use hubungan na maseda ibagas keluarganta. Langkah praktis hubanta aima: pungkah ma marhitei tonggo, tonggohon ham ma niombahmu tiap ari, mangindo maaf ma ham anggo iporluhon, bapa na toruh maruhur pasti do ihormati niombahni, pauli ma use komunikasi marhitei na mambere panorang laho marbual-buali, marguro-guro, atap sekedar hundul riap pakon keluarga, dob ai gabe siusihan ma ham, gogohan do sora ni parlahou marimbang hata-hata.
Panurat ni Heber mangkatahon: “ibagas ai mangkawah ma hita dompak Jesus, sipungkah ampa sidobkon haporsayaon in, na manaronkon parsilang ai, gantih ni malas ni uhur na i lobeini, anjaha seng ihira hailaon ai, gabe hundul i siamun ni paratas ni Naibata.” Jesus aima gambaran na sempurna pasal holong ni Bapa. Idilo do hita ase songon-Si, sabar, gok holong, tegas ibagas hasintongan, anjaha setia mendampingi niombah ibagas pardalanan ni goluh ni sidea.
Hita haganupan,
Na gabe panutup anjaha na gabe aplikasi ni renunganta on aima: na parlobei, bapa aima pahlawan iman na parlobei hubani niombahni. Na paduahon, tugas ni bapa sedo pitah mansari, tapi dihut do homa pakon na mambentuk jiwa pakon haporsayaon ni niombah. Na patoluhon, Tuhan do na gabe siusihan na tang sidearan ibagas holong pakon pangajaran. Na paompatkon, idilo do hita laho paulihon hubungan na sehat, hangat, janah mendidik niombahta. Ase hubanta bapa, sirsir ma hita pabayuhon komitmenta untuk hadir, terlibat, manogu-nogu ampa mangkaholongi songon Bapanta na i surga ai. Amen.
