Renungan Mingguan Seksi Bapa GKPS, Minggu 06 Juli 2025 (3 Set. Trinitatis)
Nas : 2 Tawarikh 26:1-23
Usul Doding : Haleluya No. 124:1-3
Tema : Godaan Kesuksesan
Tujuan : Agar kaum bapa menjauhkan diri dari sikap sombong.
“Sukses, Totap Toruh Maruhur”
Bapa na hinaholongan ibagas Kristus,
Haganup do jolma sihol sukses, iakui hita do bahasa haganup do hita marosuh ‘naik daun’, ihargai i pangkorjanan, ihormati i lingkunganta, anjaha isegani i rumah. Tontu malas do uhur anggo hormat halak na legan dompak hita halani pencapaianta: anak marhasil, usaha lancar, anjaha goranta pe jenges. Tapi, ongga do irenungkon hita, aha ma na masa dob “naik daun” hita? Adong pepatah kuno na mangkatahon “Ketinggian membuat orang lebih mudah terpeleset” janah on lang sekedar hata ni namatua, bani Bibelta pe masa do sisonai ai, aima bani si Usia raja ni halak Juda.
Ia si Usia aima sahalak raja na pinabangkit sanggah ibagas haposoon ope ia, marumur 16 tahun. Ipabangkit bangsa Juda ia gabe raja manggantihkon bapani na margoran si Amasia na dob matei tarbunuh. Raja Usia on aima sahalak pemimpin na luar biasa age pe ibagas haposoon ope, inovatif, rohani, janah isegani. Hatahonon, talup ma ia masuk hubani “Forbes 30 Under 30” aima majalah internasional na manseleksi janah menampilhon daftar ni halak na maposo (marumur 29 tahun hu toruh) na marprestasi humbani berbagai bidang, prestasini Raja Usia aima sebagai pemimpin na isegani bani bidang militer pakon teknologi. Humbani haganupan keberhasilan pakon kesuksesan ni Raja Usia, adong sada hal na lang isadarini, aima: daoh do boratan ujian bani kesuksesan marimbang ujian bani kegagalan. Raja Usia lang gagal atap talu halani musuh atap halani korupsi besar-besaran pakon na legan, tapi madabuh do ia halani gijang ni uhur na tubuh ibalik ni prestasi ni na hebat ai, anjaha na tang siboritan aima gabe terisolasi/ipadaoh/ipasiding do ia humbani Tuhan pakon humbani halak na legan. Lang boi be ia masuk hu rumah ni Jahowa ronsi ujung ni goluhni.
Sonaha hita bapa, sebagai sahalak bapa na porsaya, naha do hita marespon keberhasilan bani goluhta? Totap do hita ibagas toruh ni uhur sanggah mulai ma isobut-sobut hasoman goranta? Totap do hita marsigantung hubani Tuhan age pe songon na lancar do idahon pardalanan ni goluh on? Riap ma hita marlajar humbani pengalaman ni goluh ni Raja Usia, lang pitah pasal keberhasilanni, tapi marlajar ma homa hita humbani pardabuhni atap kegagalanni. Halani gabe singat-singat na maharga do on hubanta bapa na sihol sukses tapi totap tong ibagas rosuh ni Naibata. Ai pasu-pasu do ai anggo roh ma kesuksesan banta, tapi boi do ai homa gabe siding anggo lang ijaga hita ai marhitei toruh ni uhur.
Hita haganupan,
Kunci utama kesuksesan ni Raja Usia mamarentah bani haposoonni, na parlobei aima dukungan komunitas, ganup bangsa Juda do na mangkarosuhkon ampa na pabangkitkon ia gabe raja bani sidea. Na paduahon aima pendamping rohani, marhitei Sakaria, iporluhon si Usia do mangindahi Jahowa halani iajari si Sakaria do ia marhabiaran hubani Naibata. Sadokah ipindahini Jahowa, itumpaki Naibata do ia. Taridah do ai bani keberhasilanni bani bidang militer pakon politik, mantaluhon halak Palistim, Arab pakon Maoni janah tarambilan do gorannni das hu Masir. Bani bidang ekonomi pakon teknologi, marhasil do ia mambangun menara i Jerusalem pakon i halimisan anjaha ihurak buei parigi, mamajuhon pertanian, ai rosuh do uhurni marjuma-juma. Dob ai bani bidang inovasi pakon sains, marhasil do ia merancang ‘ketapel’ na manembakkon panah ampa batu bolon i Jerusalem. Tarambilan goran ni Raja Usia aima halani dapotan pangurupion na tarsulur ia, artini lang pitah halani kecerdasan atap hapandeianni sandiri na mambahen ia marhasil anjaha gabe markuasa tumang, tapi halani “dapotan pangurupion na tarsulur” (Indo: “ditolong dengan ajaib”) na menegaskon bahasa tangan ni Naibata do na gabe penggerak utama ijai, sedo pitah hapendeian ni jolma.
Tapi dob markuasa Raja Usia, gijang ma uhurni, anjaha ai ma gabe hamagouanni, halani mardousa ia dompak Jahowa, jadi masa ma bani Raja Usia songon nidokan: “kekuatan eksternal memompa ego internal”. Imasuki do Rumah ni Jahowa laho manutung dahupa i atas ni anjap-anjap pardahupaan. Raja Usia menerobos zona terlarang ibagas rumah panumbahan, sihol mangkorjahon sandiri tugas eksklusifni sahalak malim, laho manutung dahupa, naija tugas on pitah boi ihorjahon malim ginompar ni si Aron na dob niuras hubani horja ai, lang bulih halak na legan (4 Musa 17:5) tarmasuk ma homa age Raja Usia.
Bani tindakan ni Raja Usia na manlanggar aturan ai, ipinsang anjaha ilanglangi Malim Asarya pakon 80 malim ni Jahowa na markuasa do ia. Tapi dob ai manggila ma raja ai, ipagara apuy ni pardahupaan ai do apuy bani uhurni. Dob ni ilonsing Naibata ma ia, tubuh ma gadam bani pardompakanni, on ma lambang kekotoran rohani na taridah secara fisik. Ironis tumang, sahalak raja na tarambilan halani kesuksesan paulihon menara laho manjaga kota tapi sonari gabe hurung i rumah pengasingan, gabe tarsirang humbani rumah ni Jahowa na sihol ikuasaini pakon humbani hasoman. Secara formal, ihormati rakyatni do ope ia, tapi itutup Naibata ma catatan pasal kisah ni goluhni marhitei panutup na paet, raja na ikenang/idingat halani siningni sebagai “na gadamon” sedo halani prestasini.
Hita haganupan,
Bani buku Padan Na Basaia, somalni kemenangan militer atap kemakmuran agraris, pamarentahan na tarmurmur, pasti do ikaitkon hubani padan ni Naibata (5 Musa 28). Sebagai bapa na porsaya, porlu do tongtong ipajonam bani keluarga pasal: haganup na madear, silayak-layak na gokan dear, aima na roh hun datas (Jak.1:17). Jadi anggo seng halani Jahowa, lang anjai ondos banta haganup na madear in, halani ai dingat ma tongtong laho mangkatarimakasihkon pakon mamuji Naibata bani haganup na binahen-Ni ai. Sedo justru mamuji diri, atap pagijangkon diri, manganggap haganupan ai halani hapandeian atap halani gogohta sandiri.
Gijang ni uhur, sedo pitah rasa bangga dompak diri sandiri tapi mambuat/menempati posisi ni Naibata bani goluhta. Raja Usia lang puas pitah gabe raja tapi ihasiholhon do homa fungsi ni malim, dob ni gabe tarjadi ma ‘kudeta spiritual’. Anggo sahalak bapa mangukur nilai ni dirini marhitei jabatan, saldo bank, atap popularitas, sasintongni ia secara halus sihol mangkatahon: “Tak perlu Tuhan, aku mampu sendiri”. Maningon ma pangkei hita bani pahara na sinonon on. Ulang das targoda hita laho mangukurhon nilai ni dirinta bani pencapaian bani aha na adong i dunia on. Nilai ni dirinta aima sebagai tinompa na bayu na humbani Naibata, na porsaya hubani Jesus Kristus na pataridahkon buah-buah ni Tonduy bani goluhni ari-ari, tarmasuk ma ai toruh ni uhur.
Singat-singat na humbani Naibata, sifat ni aima restoratif. Gadam bani Raja Usia, sedo uhuman fana semata; tapi tindakan pencegahan do homa ai humbani Naibata ase ulang roh bolagni anjaha roh banggalni hajahaton ai. Bani Heber 12:6 isobut: “ai iajar Tuhan in do na hinaholongan ni uhur-Ni, anjaha ilonsing do anak niain-Ni.” Hubanta bapa, setiap singat-singat, lonsing-lonsing na roh hubanta, misalni marhitei teguran humbani inang sinrumah, kegagalan proyek, kritik humbani hasoman, boi do ai gabe ‘alarm anugerah’ banta.
Hita haganupan,
Aha ma na porlu sibahenonta laho manjaga dirinta lang madabuh hubani gijang ni uhur songon Raja Usia ai? Marlatih ma hita laho lambin manandai dirinta, bidang na ija ma hita paling marhasil, misalni finansial, karir, pangidangion, pakon na legan, dingat hita ma bahasa ijai ma potensi kejatuhan terbesar, ase pangkei ma hita. Pauli hita ma banta pagar komunitas, songon 80 malim dompak Raja Usia, marhitei inang sinrumah, hasoman, pakon sindohor. Bere hita ruang bani sidea laho berbicara jujur dompak hita termasuk laho pasingatkon hita ase ulang sompat tubuh ‘gadam’ ai bani dirinta. Latih hita ma dirinta ase totap disiplin martoruh ni uhur, boi do marhitei mangkorjahon tugas-tugas na ianggap etek, contoh ni manunsi piring i rumah, jadi relawan parkir i gareja, parlobei manisei anggo pajumpah pakon halak na legan, mangkatarimakasihkon haganup pasu-pasu na roh banta tiap ari, pakon na legan.
Hasomalhon hita ma orod bani Tuhan in, marhitei na mambasa Bibel, rajin hu parmingguan, partonggoan, partumpuan pakon saat teduh secara pribadi. Wariskon hita ma homa toruh ni uhur ai hubani niombahta, ceritahon ma hubani sidea kegagalanta, ulang pitah keberhasilanta, bobai sidea laho mangidah sonaha Naibata torus mangurupi age ibagas kegagalan. Ase iarusi sidea homa bahasa “orang hebat bukan yang tak pernah jatuh, melainkan yang terus bergantung pada kasih karunia Allah”.
Ujungni, teladan sigijangan sedo Raja Usia, tapi Jesus Kristus do, Raja na sintong na mamilih dalan hamalimon na sirsir palumei diri-Ni mamakei rupa ni jabolon gabe usih bani jolma, na patoruh diri-Ni gabe pambalosi ronsi matei tarsilang. Silang ai mambuktihon banta bahasa toruh ni uhur lang mangambati hasangapon; tapi justru ai do dalan hubani parpuhoon ampa Goran i atas ni sagala goran. Halani ai hubanta haganup bapa, paunduk hita ma dirinta i lobei ni silang in, ijai ma gantungkon hita sortalinta. Bahen hita kesuksesanta kesempatan laho patunggungkon idop ni uhur, sedo ego. Tonduy Na Pansing ma manogu-nogu hita sukses tapi lang lupa bani bonani hasukseson ai, mangajari hita ase lang manggila halani pinsang-pinsang, anjaha mangurupi hita laho mewariskon toruhni uhur hubani keluarga. Amen.
