Renungan Mingguan Seksi Bapa GKPS, Minggu 22 Juni 2025 (1 Set. Trinitatis)
Nas : Kejadian 44:1-17
Usul Doding : Haleluya No. 102:1-2
Tema : Kasih Karunia Menuntun kepada Pertobatan
Tujuan : Agar kaum bapa mengerti bahwa kasih karunia Tuhan telah menuntun kita kepada pertobatan.
“Idop ni Uhur na Paubahkon”
Bapa na hinaholongan ibagas Kristus,
Bani hagoluhanta selaku bapa, gati do hita idompakkon hubani bagei tanggung jawab, mansari, mambobai keluarga, gabe siusihan ibagas haporsayaon hubani inang sinrumah sonai homa niombah, ronsi manguhurhon sonaha ase terjaga keharmonisan ni rumah tangga. Tapi, itongah-tongah ni buei ni sihorjahonon, pangindoan ampakon tekanan ni goluh ai, ra do sipata targoda hita laho manadingkon tanggung jawab ai, manorihi jalan pintas, bahkan ra homa das hubani na lepas tangan bani masalah na terjadi.
Panorang on ibobai do hita marruji-ruji pasal goluhta marhitei kisah ni si Josep pakon sanina-saninani. Sada momen na dramatis bani kisah on aima sanggah si Josep manguji sanina-saninani marhitei na mannahkon panginuman perakni hu babah ni sumpit ni si Benjamin saninani sianggian ai. Situasi ai mambahen sidea tartuduh manangko, na mambahen tarancam hosah ni si Benjamin anjaha mambahen tarsonggot janah tartonduy sidea. Tapi bani situasi na parngit ai, tampil do si Juda, sedo laho mambela dirini tapi laho mambuat tanggung jawab. On ma homa sirenungkononta bani panorang on, sonaha sahalak bapa lang lintun humbani tanggung jawab, tapi sirsir markorban domu hubani keselamatan pakon kesejahteraan ni na hinaholonganni. Ibagas dirini si Juda, ididah hita do transformasini humbani sahalak na tega manjual si Josep saninani ai, gabe sahalak na sirsir markorban manggantihkon si Benjamin halani mardingat si Jakob bapani ai.
Ididah hita do homa bani kisah na dramatis on sonaha Tuhan Naibata marhorja laho padearhon hubungan ni keluarga na dob maseda ibahen penghianatan halani uhur na simburu/uhur subil dompak anggota keluarga na legan. Tapi pemulihan ai lang terjadi secara instan, ipakei Tuhan do panorang-panorang na borat laho manjamah uhur na koras. Anjaha ibagas ai, marhorja do idop ni uhur, nanget-nanget tapi dai tumang. Halani ai buhai hita ma uhurta laho marlajar pasal sonaha idop ni uhur ni Tuhan in marhorja marhiteihon goluh ni hita bapa, ase hita pe ibobai tongtong hubani hamubahon ni uhur na sintong.
Hita haganupan,
I lobei ni perikop on, isuratkon do paboa domma pajumpah si Josep na dob gabe raja paidua i Tanoh Masir ai pakon sanina-saninani. Tapi lape ibotoh anjaha itanda sidea ia si Josep. Sihol do ididah si Josep atap na songon sapari ai do ope sidea, na tega manjualhon saninani sandiri halani mamingkirhon kenyamanan pakon kesejahteraan ni sidea sandiri. Iparentahkon si Josep ma hubani siramotkon rumahni, nini ma: “Nahi ma sumpit ni halak on pakon gandum, sadiha na tarboban sidea, anjaha bahen ma duit ni sidea bei, hu babah ni sumpit ni sidea. Nahkon ma panginumanku, panginuman perak in hu babah ni sumpit ni sianggian ai, ampa duit boli ni gandum ai.” (ay.1-2) Aha do maksud ni si Josep ijon? Ibahen do skenario na mambahen si Benjamin, anggini, hasomanni sainang ai seolah-olah manangko panginuman perak (panginuman ni raja). Ihorjahon pe sonai dompak saninani ai sedo halani na kejam si Josep, tapi sihol idahonni do atap na domma marhamubahon uhur ni sidea. Ijualhon sidea do saninani ai (si Benjamin) songon na binahen ni sidea sapari dompak si Josep atap marjuang do sidea laho mampartahankonsi.
Idop ni uhur ni Tuhan ai sipata roh marhiteihon ujian. Sedo laho manguhum, tapi laho mambongkar hauhuron. Sipata ra do inahkon Tuhan “panginuman perak ai hubagas sumpit” ni hita bapa on, ujian ai roh ibagas keluarga, pangkorjanan, parhasomanon bahkan pangidangion. Sedo halani magigi Tuhan ai mangidah hita, tapi ase idompakkon hita use dompak masa lalunta, hasaparionta (manusia lama) anjaha dob isaloseihon ai marhamubahon ni uhur hita ibagas na sintong (bertobat secara utuh).
Sanggah na ituduh suruhan ni si Josep saninani ai manangko panginuman perak ai, tontu iparnalang sidea do tuduhan ai, halani memang lang adong sidea mambuat atap manangko panginuman perak ai, janah ihatahon sidea do: “Bani ise hun bennami jabolonmu on jumpah panginuman ai, maningon matei ma ia; hanami pe homa gabe jabolon ni tuanta ai ma.” (ay.9) Porsaya tumang do sidea bahasa sidea lang marsalah. Tapi ijin jumpah panginuman perak ai bani sumpit ni si Benjamin, tarsonggot anjaha tartonduy ma sidea, lang tarbahen sidea be marsahap age sangkababah hata pe. Anjaha lang homa manggila sidea hubani si Benjamin, atap marsisalahan samah sidea. Tapi iparrigat sidea ma hiouni tanda ni pusok ni uhur ampa uhur na marosak halani na masa ai.
Humbani na masa ai, adong na marbeda humbani sikap ni sidea sapari sanggah manjualhon si Josep. Sapari sidea songon jolma na lang maruhur, lang marholong ni atei anjaha lang homa merasa bersalah dompak si Josep. Tapi sonari, iparjuangkon sidea do anggi ni sidea, riap manaron do sidea anjaha lang ipaturut sidea si Benjamin mananggung ai sahalaksi, riap do sidea pakonsi mulak use hu kota, laho manjumpahkon konsekuensi na maningon jaloon ni sidea. Ijon ma hita mangidah adong perubahan karakter. Pertobatan lang singgan das hubani merasa bersalah tumang, tapi das hubani perubahan sikap pakon uhur. Sahalak bapa na sintong/pria sejati lang lintun humbani tanggung jawab, pori borit atap borot pe ia pambahen ni ai.
Tokoh na paling isorot bani kisah on aima si Juda. Sapari, bani masa lalu, ia do na mangusulhon ase ijualhon si Josep, tapi sonari jongjong do ia laho mangapiti anggini. Ihatahon do hubani si Josep: “Tapi ahu, jabolonmu on, na manjamin dakdanak in hubani bapani, ningku do, ‘anggo lang hupaulak ia hubamu, ahu ma mardousa hubani bapa sadokah manggoluh ahu.’ On pe, ahu jabolonmu on ma na tading ijon gabe jabolon ni tuannami gantih ni dakdanak in. Janah paturut ma ia mulak rap pakon sanina-saninani.” (ay.32-33). Tariluh halani malasni uhur, tarsonai ma pangahapta mangidah kisah on. Si Juda, na sapari mamanfaatkon saninani, sonari manawarkon dirini gabe panggantih ni saninai manjalohon uhuman. On ma buah ni pertobatan na sintong ai, rela berkorban demi halak na legan.
Idop ni uhur ni Tuhan sedo pitah manalpuhon panlanggaron tapi dihut do das hubani na paubahkon. Uhur ni sahalak bapa na sapari koras janah egois boi do ipaubah Tuhan gabe uhur na lamlam janah gok ibagas tanggung jawab. Si Juda aima sada contoh na pataridahkon sonaha idop ni uhur boi padearhon use mulak sada dalahi na maseda/retak gabe pemimpin sejati.
Hita haganupan,
Aha ma na boi iparlajari hita humbani kisah on? Na parlobei, ulang mabiar iuji Tuhan. Sipata ra do ipalopas Tuhan roh panorang atap situasi na borat bani goluhta, boi do ai marhiteihon masalah i keluarga, ekonomi, parhasomanon, sonai homa pangidangion. Boi do ai gabe “panginuman perak ibagas sumpitta”, aima tanda bahasa Tuhan sihol mambobai hita lambin bagas masuk hubagas idop ni uhur ampa hamubahon ni uhur. Ulang manggila janah ulang homa mintor holsohan. Sungkunhon ham ma hubani Tuhan in: “Tuhan, aha na sihol ipaubah ham humbagas uhurhu?” Na paduahon, pertobatan atap hamubahon ni uhur aima tanggung jawab ni sahalak bapa. Si Juda lang mansalahkon si Benjamin, tapi ibuat do ai gabe tanggung jawabni. Iporluhon do bapa na sisonai ai bani goluh on. Ibagas keluarga, i gareja sonai homa i masyarakat pe, iporluhon do parbapaon na barani mangkatahon: “Au ma mananggungjawabi ai, hupadear pe!” On ma tanda ni bapa na sintong/pria sejati na isondangi idop ni uhur. Na patoluhon, idop ni uhur aima laho paubahkon sedo laho memanjakan. Lang iharosuhkon Tuhan anggo bertobat hita halani mabiar hona uhuman, tapi na iharosuhkon anggo bertobat hita halani na isadari hita sonin banggal ni holong ni uhur-Ni. Ididah hita do paboa lang ibalaskon si Josep na binahen ni saninani, tapi iaturni do skenario sonaha ase boi ididah sidea dousa ni sidea ai, dob ai isolsoli anjaha dob ai marhamubahon ni uhur. Lang ilopas idop ni uhur ai hita nyaman ibagas dousa, tapi idop ni uhur ai mambobai hita hubani hamubahon ni uhur na sintong. Na paompatkon, bani goluh on bahen hita ma si Josep pakon si Juda gabe siusihan. Sipata ra do songon si Josep hita bani goluh on, iapasi, ikhianati, iasingkon, atap ijualhon. Tapi pori pe adong kesempatan banta laho mambalas, pilih hita ma dalan laho manalpuhon haganupan ai anjaha mardear. Atap sipata ra songon si Juda hita bani goluh on, sapari mangkorjahon na sambor, anggo sonari ibere kesempatan laho marubah ampa manobus hasalahan ai, pakei hita ma idop ni uhur ai sadear-dearni, ulang iparsoya-soya.
Bapa na hinaholongan ibagas Kristus,
Kisah ni si Josep pakon si Juda aima gambaran ni goluhta haganup. Haganup do hita ongga mardousa, ongga menyakiti, ongga lintun humbani tanggung jawab. Tapi lang itadingkon Tuhan hita ijai. Tapi irancang do skenario parjumpahan, mambere ujian, sedo laho manguhum hita tapi laho paluahkon hita, anjaha idop ni uhur-Ni ai do na mambobai hita mulak hubani goluh na hinarosuhkon-Ni. Halani ai bere hita goluhta songon si Juda na ipaubah halani idop ni uhur. Anjaha bere hita ma homa goluhta songon si Josep na sirsir manalpuhon salah ni saninani anjaha mamboban sidea mulak hubani Tuhan. Ulang mabiar iuji, jalo ma holong ampa idopni uhur ni Tuhan ai ibagas malas ni uhur, halani ibalikni setiap “panginuman perak na inahkon hubagas sumpitta” ai adong do rencana pemulihan na banggal ibagas goluhta. Amen.
