PARMAHAN NA MADEAR 1 SEPTEMBER
IDOP NI UHUR NI NAIBATA
“Seng hutulak idop ni uhur ni Naibata, ai ambit adong hapintoron marhitei Titah, soya ma
parmatei ni Kristus.”
Galatia 2:21
Ari Selasa tanggal 1 September 1903 i tongah dalan ma rombongan ni Pdt. Agust Theis
laho manuju Pamatang Raya, topatni lang nibotoh tangkas atap sanggah i tao ope mardalan
nahei ma antara ni Tiga Ras pakon Pamatang Raya. Tujuan ni sidea ai ma mamboan na tartulis
bani Bibel termasuk ma homa ayatta sadari on. Iahapkon Apostel Paulus do buei ni idop ni
uhur ni Naibata na bani sandiri, nab oi pasonang paruhuronni. Halani ai lang itulak, harugian
banggal iahapkon anggo itulak idop ni uhur ni Naibata. Suang sonai do homa pangahap Pdt.
Agust Theis, domma ijalo hinajenges ni idop ni uhur ni Naibata, halani ai lang itulak homa, tapi
mintor ihagoluhkon, janah bertekad ia padashon secara langsung bani halak Simalungun.
Bani haganup jolma na ra manjalo idop ni uhur ni Naibata, lang ipaksahon, hatorangan
do ibere, dob ai terserah hubanta, jaloonta atap lang. Sasintongni haganup jolma domma
manjalo idop ni uhur Naibata secara umum misalni: manggoluh ia, marianan ia bani ianan na
tinompa ni Naibata.
Na nimaksud ni Apostel Paulus arti ni idop ni uhur ni Naibata na bani ayat on ai ma
Anak Jesus Kristus na isuruh-Ni hu dunia on. Lang itulak tapi ijalo do janah iihutkon ajaran-Ni,
halani ai ma hapintoron na sasintongni. Anggo iparbandingkon hapintoran ni idop ni uhur ni
Naibata (Jesus Kristus) lang adong hapintoron marhiteihon ni Titah. Ibere Naibata Titah ai ma
sebagai hondor atap sormin, bani halak Israel na ijia. Sampai sonari dong do guna ni Titah on
banta jolma, ai ma songon alat kontrol mamareksa diri sandiri. Hotop hita mardousa, anggo
roh hita manrogop manolsoli dousanta hulobei ni Naibata marhitei tonggonta, boi hita
ipapintor idop ni uhur ni Naibata.
Bani kenyataanni buei jolma on na so memanfaatkon idop ni uhur ni Naibata, pas
songon buei niombah na so ra memanfaatkon panghopkopon ni orang tuani. Marbatas do
panorang panjaloon idop ni uhur on, halani ai jalo hita ma sonari lape tarlambat. Dob ijalo hita
mamahkon hita bani niombahta pakon bani hasomanta jolma, ulang imonopoli hita ase rap
marulih hita bani idop ni uhur on age sanggah i tanoh on sonai age magira i hasonangan na
sadokah ni dokahni.
Tonggo: Ham Tuhan, hotop hanami lang sadar bahasa na tongtong do hape idop ni uhur Mu
bannami. On pe Tuhan, patubuh Ham ma hubagas paruhuronnami
pangarusion pasal hinabanggal ni idop ni uhur-Mu in ase hot hanami
manggoluh ibagas panghopkopon ni Anak-Mu Jesus Tuhannami. Amen.
HALELUYA NO. 188:1
1. Idop ni uhur ni Tuhan Jesus Kristus
holong ni atei ni Naibata
pakon parsaoran ni Tonduy
mangkasomani hita haganupan.
PARMAHAN NA MADEAR 2 SEPTEMBER
PAMILIHON NI NAIBATA
“Ai ipilih do hita ibagas la, sanggah lape itombei dunia on ase pansing hita anjaha lang
panurakon i lobei-Ni, ibagas holong ni uhur.”
Epesus 1:4
Ari Rabu tanggal 2 September 1903 panorangni lang binotoh tangkas atap na jam piga,
das ma rombongan ni Pdt. August Theis i Pematang Raya. Dobkonsi martomu mata ni ihan
pakon mata ni doton, artini dear panriahan ni Pdt. Agust Theis pakon ni Raja Raya, jadi hot ma
Pandita on marianan i Pamatang Raya. Domma ididah Pdt. August Theis on, panorangni ma
maningon das Hata ni Naibata bani halak Simalungun, lang itunda tunda be. Ayat na parlobei
humbani Buku Bibel na ibasahon Pandita on bani halak Simalungun ai ma Johanes 4:35.
Halani ai tarpaksa ma kerja keras siboban hata ni Naibata, halani domma panorangni, tongka
ma sabion, janah bolag do sisabion, hape otik do siparhorja. Mardingat sejarah on, gabe
marolob-olob ma halak Simalungun, tarlobih tiap bulan September, halani pamilihon ni
Naibata ibagas Kristus.
Rencanan ni Naibata bani pamilihon-Ni on, termasuk halak Simalungun ai do na
nirealisasihon ni Pdt. August Theis bani panorang ijia. Dob honsi ipilih Naibata halak
Simalungun ibagas Jesus Kristus, menyusul ma tugas pakon tanggung jawab sebagai na dob
pinilih. Songon sada-sada halak na dob terpilih misalni: Pemimpin-pemimpin negara atap
gereja maningon partanggungjawabkononni do arti ni pamilihon na bani ai i lobei -lobei ni na
mamilihsi.
Sonai do homa hita, maningon partanggungjawabkononta do pamilihon na banta i
lobei-lobei ni na mamilih hita ai ma Naibata. Lang tarbahen lang hotop hita homa lang
pansing, halani ai porlu hita marulang hali homa papansingkon dirinta hu lobei -lobei ni
Naibata marhiteihonni tonggonta hupartonggoan-partonggoan, parmingguan tarlobih
marhorja Banggal Napansing. Sai sayur ma boi hita konsekuen mampartahankon pamilihon ni
Naibata na banta.
Tonggo: Ham Tuhan, ipuji ipasangap hanami goran-Mu Napansing in, halani dear ni
layak-Mu, na dob parsimada hanami bani pamilihon-Mu. Na mangelek ma
hanami hu Bamu ase pargogohi Ham ma hanami marhitei Tonduy-Mu gendo boi
ipartanggungjawabkon hanami ronsi ujung ni goluhnami hot, tong ibagas
pamilihan-Mu. Amen.
HALELUYA NO. 223:1
1. Domma das bai hita on hata hagoluhan;
Na pasonang sai tongtong uhur pardousa on.
Anggo jinaloni in gabe na porsaya.
Bai Tuhanta Jesus in na mangusir dousa.
PARMAHAN NA MADEAR 3 SEPTEMBER
ANAK AMPA HASOMAN
“Ai anggo anak hita, dihut ma panean, panean bani Naibata, hasoman panean ni Kristus. Anggo
hasoman-Ni hita manaron gabe hasoman-Ni ma homa hita ibagas hasangapon.”
Roma 8:17
“Anak” on ma jaminan atap syarat na gabe panean bani Naibata janah hasoman panean
ni Kristus. Tontu anggo isobut anak, sedo na asal anak maksudni. Buei do na boi tangaron
pasal anak. Bani surat ni Apostel Paulus hubani kuria Galatia, isobut do sonon: “Dua do anak ni
si Abaraham, sada humbani jabolonni naboru anjaha na sada nari humbani boru merdeka ai .”
Anjaha humbani boru mardeka on, tubuh ma anak bagah-bagah, nini “tapi nasiam sanina,
anak bagah-bagah do nasiam …”
Ibagas Bibel sandiri pe domma isobut paboa dong dua masam haanakon; na parlobei in
ma anak bagah-bagah (humbani boru merdeka), tubuh mangihutkon Tonduy, anjaha na
paduahon anak ni jabolon, tubuh mangihutkon daging. (Galatia 5: 29)
Hita nani anak na sonaha do? “Anak ni Naibata do hita nuan!” 1 Johanes 3:1: Na dob
tubuh marhitei Pandidion Napansing. Anggo sonai do hape, domma gabe dihut hita panean
bani Naibata. Anak na mangkarosuhkon horja na madear ni Naibata, na ra mangihutkon hataNi.
Sidingatonta in ma: Ai age pe domma anak ni Naibata hita, lang mararti tanpa
sitaronon. Halani hasoman anjaha sanina ni Kristus hita, gabe boi do manaron. Hansa
manaron sedo halani dunia on, tapi halani Kristus do. Janah pori pe masa sisonai ai lang pala
habiaran. Ai hasoman ni Kristus do hita sonari das hu hasangapon-Ni.
Tonggo: Ham Bapa, na roh do anak-Mu on hu Bamu! Jalo ham ma hanami ase boi dihut
rap panean pakon Jesus Kristus Tuhannami. Amen.
HALELUYA NO. 241:2-3
2. Malas do tong uhurhon 3. Malas do tong uhurhon
bani Jesus na bujur. ai parrupei au tongon.
Pasirsirhon hagoluhan Bani arta na maharga
bangku na i hamagouan; pinarbagah ni Tuhanta;
Haganupan dousangkin, Bagai ganup na bujur in,
sai isasap Jesuskin mangirikkon Jesus in.
PARMAHAN NA MADEAR 4 SEPTEMBER
MANGAMBILANKON JESUS KRISTUS
“Ai sedo dirinami iambilankon hanami, tapi Kristus Jesus, Tuhan in do, ia hanami juak-juak
nasiam do halani Jesus.”
2 Korint 4:5
Domma ipilih Tuhan in, ase dihut hita gabe parambilan na laho padashon barita malas
ni uhur na humbani Naibata hubani samah hita jolma. Itontuhon do homa ronsi isini barita na
sihol sipatugahkon, in ma: Pasal Kristus Jesus Tuhan in. Hape gati do legan panangkap ni na
manangihon, sonai homa age pangabei ni siparambilan.
Songon na ongga masa i kuria Korintus, sompat dong parbolah-bolahan bani kuria,
anjaha akibatni dong ma homa tuduhan-tuduhan na bernada negatip. Bani keadaan na sonon
barani do si Paulus mangkatahon: Sedo dirini i ambilankon, tapi Tuhan Jesus do. Marhitei na
pararatkon ambilan na madear ijai ma ia pasangapkon Jesus anjaha mambere malas ni uhur
na gok hubani hasoman jolma na porsaya.
Juak-juak do ia bani hasomanni atap kuria in, tapi sedo juak-juak na mangindahi
hasangaponni sandiri. Ia, ai ma juak-juak na porsaya. Pangkorhon ni haporsayaonni gabe lang
dong tarsahapkon pasal dirini sobali ni Jesus Kristus
Halani ai talup do gabe siusihan na dear in age hubanta. Dalan laho padaohkon
hasedaon humbanta age i kuria in pe, ibagas na pasangapkon Tuhan Jesus, in ma anggo sirsir
hita martoruh ni uhur. Ai anggo bani na porsaya, anjaha siambilankon Jesus Kristus,
hasangapon do anggo boi ia mangidangi atap juak-juak ni hasomanni.
Tonggo : Ham Tuhan Jesus Kristus, ajari janah pargogohi Ham ma hanami ase boi
mangihutkon usihan na binahen-Mu. Ase ra hanami mangidangi hasomannami,
anjaha atap aha pe ibahen hanami sihol ma pitah halani Ham. Amen.
HALELUYA NO. 490:1-2
1. Sonang rapkon Jesus in, 2. Sai ambilankon ma in,
rapkon Jesus tongtong, ambilankon ma in,
rapkon Jesus tongtong, ambilankon ma in,
Ia Panondang bai na golap in, Hasintongan-Ni sahapkon ma in
rap Jesus daoh biar ijin. rap Jesus daoh biar ijin.
:,: Baritahon Jesus in, :;: Ambilankon Jesus in
pakon hasintongan-Nin, pakon ganup Hata-Nin,
janah ulang mabiar ham ijin. janah ulang mabiar ham ijin.
PARMAHAN NA MADEAR 5 SEPTEMBER
SADIHA DOKAH NARI?
“Sadiha dokah nari, Ham Jahowa, halupahonon-Mu ahu lalab? Sadiha dokah nari ponopkonon-
Mu bohi-Mu humbangku?”
Psalmen 13:2
Anggo na ihut-ihut hata ni par-Psalmen on pas do sahira na ra Naibata mangkalupahon
jolma on, sonai homa pakon pamonopkon bohi-Ni humbanta. Tapi sasintongni lang ra Naibata
mambahen na sonai ai. Ai porini iponopkon Naibata bohi-Ni sangkidop mata gelah domma
lang tahan be hita. Iluarhon par-Psalmen on pe hata na sonai, halani borat pakon borit ni
pangahapni do ai. On ma manggambarhon sitaronon na nialamanni.
Sada siusihan humbani na binahen ai, ai ma totap ia marondos bani Jahowa, seng
mintor ipindahi hatengeran ni uhurni na legan. Ibotoh ope torang pitah Jahowa do na boi
mangurupisi. Marhitei na sonai ai do gabe lihar panonggorni dompak Naibata, ijai ma use
ibotoh, na idompakkon Naibata do tongtong bangsa-Ni porini seng ididah hita pangurupion ni
Naibata dompak hita, sasintongni sedo halani na ihalupahon Naibata, atap na so idompakhon
Naibata hita, tapi hita do na so mandompakhon-Si janah idompakhon hita na legan.
Bani panorang on, musim ni pesta olob-olob do banta. Paima roh ambilan na madear
hu tongah-tongahta, niuhurta Naibata do na so mangkawahkon hita, hape hita do na so
mangkawahkon Naibata, ai sisumbah-sumbahan do idompakhon hita. Domma pe i tongahtongah
ni bangsanta sapari siboban ambilan na madear in, lang mintor ijalo homa ai, pala do
hira-hira dob onom tahun ase mamungkah dong na ra tardidi.
Patut ma tarimakasih janah marolob-olob hita dompak Naibata, ai seng ihalupahon hita
janah lang iponopkon bohi-Ni dompak hita. Ipaluah janah jurupi do hita ganup panorang.
Tonggo: Hotop hape Tuhan lang ididah hanami pangurupion-Mu pakon bohi-Mu, gabe
ninuhur nami seng idingat Ham hanami. Tarimakasih ma Tuhan, ai marhitei
Jesus Kristus ipaluah Ham do hanami. Amen.
HALELUYA NO. 436:1-2
1. Sadiha dokah nari Ham Naibatangku, 2. Sadiha dokah nari Ham Naibatangku
layur manipat ari sunsah do au. munsuh pagijang diri mangodoh au.
Sadiha dokah nari paimaonku, Sai ihatahon bangku hagogohan ni,
Pangkawah-Mu hubangku siholan au. sol bondutonni ahu ninuhur niin.
Ganup munsuhkin manidingi au, Idop uhur-Mu pangajamankin,
ai seng adong na mangurupi au. ai pitah Ham do haporusankin.
Kawahkon Ham ma ahu Ham Naibatangku, Urupi Ham ma ahu Ham Naibatangku,
ulang tarpunjung ahu hun lambung-Mu. Ase ganup munsuhku tunduk Bamu.
PARMAHAN NA MADEAR 6 SEPTEMBER
GANTAR HAPORSAYAON
“Ambah ni ganupan in, jalo nasiam ma gantar haporsayaon in, ai tarintopi nasiam do marhitei
in haganup panah apuy ni parjahat in.”
Epesus 6:16
Igorani sada negara gabe negara na maju dihut iukur marhitei kelengkapan sinjata ni
sidea. Ase domu hujin ganup do negara age das hubani panorang on totap mangusahahon
penemuan-penemuan sinjata na lobih mutakhir. Iporluhon kelengkapan sinjata tontu ihorhon
kesadaran bahasa na adong munsuh.
Ise do nani munsuh ni haporsayaonta?
Tontu ganup na mangojur ronsi mangajari hita mangkorjahon horja na so harosuhni
Tuhan, goranon ma ai munsuhni haporsayaonta. Munsuh ni haporsayaon lang daoh ai
humbanta dihut do ia bani ganup langkah nai ge pingkiranta. Mawat-mawat anjaha pindahpindah
do ia arian age borngin laho mangindahi mangsa sibondutonni. Munsuh iman selalu
mengintai hita. Aha do sinjata banta laho mandompakhon ganupan munsuh na roh
manjumpahkon hita?
Bani Epesus 6 lengkap do ipaingkat Tuhanta hita marhitei sinjata partonduyon. Khusus
marhitei ayat ombas on ibere balos bahasa sinjata sipakeionta aima gantar haporsayaon atap
perisai iman. Gantar haporsayaon on sedo gorgaan ni jolma. Gantar haporsayaon justru
sibere-bere ni Naibata. Pakon hata na legan Naibata do hape pangajamanta. Ia do pangurupi
banta. Ambit lang iondoshon gantar haporsayaon ai banta, lalap ma hita gabe halak sitalu-talu.
Mamparujahon gantar haporsayaon na humbani Naibata, gabe boi hita mangintopi sura-sura
pakon sora ni parjahat. Ase pakei hita ma gantar haporsayaon na dob iondoshon Tuhan banta,
ai in do sinjata na boi pakeionta laho mamorangi ganup munsuh ni haporsayaon bani
pardalananni goluhta siganup ari.
Tonggo: Domma iondoshon Ham gantar haporsayaon bannami Tuhan, pakeion nami ma
in laho manlawan munsuh ronsi sura-surani sibolis i tongah-tongahni goluh
nami. Amen.
HALELUYA NO. 380:1-2
1. Marhasoman Jesus, 2. Anggo Tuhan Jesus
marhasoman Jesus, Anggo Tuhan Jesus
sai monang hita on hasomankin tongtong
Marhasoman Jesus, Ningon do maporus
marhasoman Jesus, Ningon do maporus
talu sibolis in. Sibolis munsuh in
Marhasoman Tuhan Jesus, Tuhan Jesus hasomanta
hita monang do tongtong. lao mangimbangi dousa in
Marhasoman Tuhan Jesus, Ase saud sonang hita,
sai monang hita on. ronsi sadokahnin.
PARMAHAN NA MADEAR 7 SEPTEMBER
IPINTORI HALANI HAPORSAYAON
“Songon si Abraham: Porsaya do ia bani Naibata, jadi ai do ihira bani gabe hapintoranni.”
Galatia 3:6
Jumpah Apostel Paulus do pangarusion na salah pasal haluahon bani kuria Galatia
panorang ai na mangkatahon: Haluahon atap hapintoron boi dapot jolma in marhitei na
manghorjahon Titah. Halani ai ipagolpa Paulus do kuria ai bahasa idopni uhur ni Naibata do
hansa na boi paluahkon jolma, janah haluahon atap hapintoron ai ijalo marhitei haporsayaon.
lulgapkon Paulus do bahasa si Abraham pe ipintori Naibata halani haporsayaon do.
Bani panorang hatuaonni si Abraham ibagahkon Naibata do sada anak bani marhitei
parinangon si Sara. Secara usaha ni jolma atau medis mahol do manjalo ai halani domma
matua sidea. Tapi pori ni pe lang tarjalo secara logika, Abraham yakin janah porsaya do bani
idop ni uhur Naibata pakon bagah-bagah ia. Halani ai ipintori janah ipasu-pasu Naibata do si
Abraham sedo halani gogoh atap horjani tapi halani haporsayaonni. I idopi Naibata do si
Abraham marhitei partubuh ni si Ishak anakni ai. (1 Musa 15:6)
Keteladanan ni Abraham on ma na iojur Paulus gabe pedoman pakon sitiruon das age
hubanta panorang on bahasa:
1. Lang boi pintor hita ilobei ni Naibata anggo marhitei gogoh atap pambahenanta. Tapi
domma ipintori Kristus hita janah ipasirsir haluahonta asal ma porsaya hita hu Bani. Lang
talup be maralasan hita halani hurang ni gogoh, bagei ni situasi na ihadapi mambahen
tarolat hita marhaporsayaon bani Naibata.
2. Halani domma ibere hubanta arta na maharga aima haluahonta na lang tarbayar hita
anggo marhitei gogohta sandiri, patut ma marringgas ni uhur hita mangkorjahon harosuh
ni Naibata.
3. Pangkaporsayaonta bani hatani Naibata do homa gogoh pakon senjata banta mandalani
ari-ari ni goluhta. Paluahkon haporsayaon bani menghadapi bagei ni na masa, sarupa ma ai
songon na mangintopkon suluh bani dalan na golap sehingga targompang ujungni.
4. Marhitei situasi zaman pakon dunia logika, boi do suhar bani pingkiranta mambalosi
pakon mangkaporsayai hatani Naibata. Tapi justru ijon do ningon ipataridahkon hita
haporsayaon na tahan uji. Tenger ma uhurta lang tarbador halak na marhaporsayaon bani
Naibata.
Ase akuhon hita ma: Arta siharganan banta aima marhaporsayaon bani Naibata, ai
marhitei haporsayaon do hansa jumpah gogoh pakon haluahonta.
Tonggo: Tarimakasih ma bamu Tuhan na dob paluahkon hanami, ajari Ham ma hanami
ase totap marhaporsayaon hu Bamu. Amen.
HALELUYA NO. 343:1+4
1. Banggal tumang do holong-Mu, 4. Hujolom padan na toguh,
pabayu goluhkon in ma Hata-Ni in,
na doyuk kahou magou au, ai Tuhan in do gogohkin,
hape maluah do. na hot sadokah niin.
PARMAHAN NA MADEAR 8 SEPTEMBER
KUASA
“Holong do uhur ni Bapa in bani Anak in, anjaha haganup do iondoshon hubagas tangan-Ni.”
Johannes 3:35
Sanggah tardidi Jesus i Bah Jordan, tarbogei do sora hun langit na mangkatahon: “Ho do
Anak haholongan-Ku, marosuh do uhur-Hu Bam” (Luk 4:22b). Memang, mahol tumang do
jolma in mangarusi sonaha do hubunganni Naibata na i Nagori Atas pakon Jesus na i dunia on.
Ai do ase pala roh sungkun-sungkunni Jesus hubani susian-Ni “Ia Ahu, ise do Ahu nini halak
simbuei?” Marbagei-bagei do balosni pangurusionni jolma simbuei in. Tapi anggo si Petrus
isaksihon do: “Kristus ni Naibata do Ham.”
Halak Jahudi mahol do mangarusi holongni Naibata bani Jesus. Marhiteihonni
pangarapan tradisi Agama Jahudi pasal Mesias na ipaima-ima, aima Mesias na gogoh anjaha na
lang tartaluhon dunia on. Pengharapan Mesias ni Jahudi aima ibagas sura-sura na laho
mandompakkon kuasa Kekaisaran Romawi, na boi mambahen harajaon duniawi Israel gabe
harajaon na banggal na so boi tartaluhon. Iarapkon parrohni Mesias bani perjuangan politik ni
Bangsa Israel secara monarkhi. Bangsa Jahudi mangidah Jesus na hun Huta Nazaret, justru
ibagas hagalekon, lang songon “Puanglima” na mamboan hu parporangan. Halak Jahudi
mangidah Jesus lang ibagas kuasa pakon hagogohon, halani ternyata Jesus saud itangkap
anjaha iparsilangkon. Halak Jahudi lang mangarusi sonaha kedudukan ni Jesus ilobeini
Naibata, sonaha holong ni Naibata hubani Jesus. Mahol do Jahudi porsaya bani aha na
hinatahon ni Jesus. “….sagala na dong Bangku na dong Bamu do in, anjaha na dong Bamu na
dong Bangku do in.” Age pe Ia matei tarsilang, sedo halani na lang holong uhurni Bapa in
mangidah-Si, sedo halani hagalekon-Ni mandompakkon gogohni dunia on. Nini Jesus do
hubani susian-Ni: “Tenger ma uhurnima, domma Hutaluhon dunia on.”
Halak na porsaya mangkaholongi Tuhan Jesus. Halani ai marmalas ni uhur do na
porsaya in mandalankon ajaranni Jesus, sedo halani na terpaksa, sedo halani peraturan atap
pe hawajiban. Holong do na mangatasi sagala peraturan pakon hawajiban. Halak na porsaya
lang mungkin be madabuh hubani sikap marungut ungut atap pe manuntut hubani Jesus.
Gati do halak Kristen kecewa bani goluhni. Mungkin halani kegagalan-kegagalan,
naborit, hamiskinon materi pakon na legan. Porini pe hita kecewa bani goluh on, lang homa
gabe kecewa mangidah Tuhan Jesus. Ibagas na kegagalan ni goluh on, ijai do homa hita
mangkaholongi Jesus. Ibagas marhahurangan hita mangkaholongi Jesus. Dob ni Jesus
mambere pasu-pasu hubanta halani domma haganup iondoshon Bapa in kuasa bani Anak in.
Tonggo: Tuhan, ajari Ham ma hanami ase ibagas hagalekon pakon na marhahurangan,
sirsir hanami mangkaholongi Ham. Amen.
Haleluya No. 350: 1.
1. Holong na humbani Tuhan, na roh humbai Jesus in.
Sai totap do marsinondang, holong ni Tuhanta in.
Sai sondangkon ma holong-Ni das bai hagolapan in
Ase haganup pardousa ipaluah Naibata.
PARMAHAN NA MADEAR 9 SEPTEMBER
SURA-SURA
“On do malas ni uhurhu sibanggalan, ai ma, anggo hubogei marparlahou anakku ibagas
hasintongan.”
Ganup do jolma dong bei sura-sura ni uhurni. Anjaha sura-sura dua do ragamni, ai ma:
Sura-sura na matei ampa sura-sura na manggoluh. Goranon do ai sura-sura na matei anggo:
a. Lang ihorjahon, hansi pe mungkin do boi namin.
b. Lang tardungdung, mungkin hinorhon ni: 1. Hurang habotohon, 2. Hurang pangabeihon
(modal), 3. Hurang kesehatan, atap hatahonon ma, lang saimbang sura-sura ai hubani
simada sura-sura ai sandiri.
Napaduahon, goranon ma ai sura-sura na manggoluh anggo sura-sura ai sandiri taridah
bani pargoluhon ni simada sura-sura ai sandiri. Sura-sura ni uhur ni jolma sedo na roh
humbani sibolis, tapi sibere-bere ni Naibata do ai bani jolma in. Halani ai marpala-pala do
sibolis mandohori jolma in marhitei sura-surani. Sedo na laho pamateihon sura-sura ai
maksud ni sibolis, gariada papodashon sura-sura ai marbanggal, tapi sedo tubuh hubani
hadearon, hu hasamboron do domu hubani rencana ni sibolis, dobni gabe hamagouan ni jolma
in sandiri.
Halani haganup jolma dong bei do sura-surani, halani ai ningon pangkei, ase sura-sura
ai ulang gabe alat/ perkakas ni sibolis. Bani ayat na i atas in jumpah do sura-sura na hinatahon
ni si Johannes, ai ma sura-sura, sihol ni uhur sibanggalan atap malas ni uhur na gok.
Boi do malas ni uhur na manongtong harta, pangkat, sangap? Balosni, lang. Ganupan in
pitah parsatongkinan tumang do. Anggo sonai aha do maksud ni Johannes bani ayat on, surasura
ni uhurni sihol ibagas malas ni uhur sibanggalan? Ai ma anggo anakni marparlahou
ibagas hasintongan.
Mangihutkon Johannes 14:6, hasintongan in ma Jesus Kristus sandiri. Na mararti do ai,
manggoluh ibagas hasintongan in ma manggoluh ibagas Jesus Kristus. Manggoluh ibagas Jesus
Kristus berarti manggoluh sadokah ni dokahni.
Sedo sura-sura na matei sura-sura ni si Johannes on, tapi sura-sura na manggoluh do,
halani ai marpambahenan, marhorja, marhoih-hoih do ia hinorhon ni na manggoluh sura-sura
ai bani dirini. Halani ai hape, sura-sura na manggoluh ningon marantup malas ni uhur ampa
paruntolon. Anggo lang sonai, goranon ma ai angan-angan.
Tonggo: Marhitei hata-Mu, gabe ibotoh hanami tongtong marparlahou na sintong
hanami, sonai ganup dakdanaknami, janah sadar homa dakdanaknami
margoluh na sintong, ai in do hape malas ni uhur sibanggalan. Amen.
HALELUYA NO. 58:1
1. Sada do hansa sura-surangku Sihol sai ingaton ni uhurhu
bai ganup dunia on. na binaen ni Jesus bai tonduyhu
Seng anjai lang malas do uhurhu sanggah pinorsan-Ni in
anggo jumpah au ma on. haganupan dousangkin.
3 Johannes 1:4
PARMAHAN NA MADEAR 10 SEPTEMBER
SAI PORSAYA MA!
“Ai lang domma Huhatahon bam, idahonmu do hasangapon ni Naibata, anggo porsaya ho?”
Johannes 11:40
Habotohon do mangkorhon haporsayaon atap haporsayaon mangkorhon habotohon?
Sungkun-sungkun na mangkorhon parsahapan do on, tarlobih bani jaman teknologi modern
on. Buei do jolma na marpandirian, parlobei ibotoh ase ihaporsayai. Jadi manungkun ma lobei
hita bani dirinta, parlobei botohanta do lobei tangkas ganup atap aha pe na laho
sihorjahononta ase ilahoi hita? Anggo secara jujur hita marbalos pasti hatahononta ma,
haporsayaon do bona ni gerak ni goluh na ilengkapi habotohan na dong bani jolma in. Contoh:
Ahli-ahli roket angkasa luar, parlobei porsaya do sidea bani perhitungan-perhitungan na
irumushon sidea ase berani sidea mambahen persoalan age pe biayani bajan tumang.
Jesus mangkatahon bani si Maria, ase ibuka kuburan ni si Lasarus. Aha balos ni si
Maria? Ase ulang pala ibuka halani domma ompat ari si Lasarus ikubur. Domma pala busuk
janah marbau. Aha do dasar ni si Maria marbalos dompak Jesus, ai ma ibagas na mambalosi
Jesus. Ipakei si Maria habotohon sedo haporsayaon. Secara perhitungan ni jolma, memang aha
ma gunani bukaon kuburan ai, ai domma busuk bangkei ni si Lasarus.
Lupa si Maria, ise na jongjong ilobeini, anjaha ise na mambere parentah ai bani. Na
songon kopala barisan do si Maria on bani goluh ni hita jolma, ai gati jolma marbalos songon
balos ni si Maria on, berdasarkon paretonganni ibagas na mambalosi Jesus porlunan ma horja
on ase na hu Gereja in, ai anggo lang dong holi berehonon tong do lang mardalan horja horja i
kuria in. Buei balos na sonon jumpah i tongah-tongah ni kuria in.
Tapi sonaha balos ni Jesus? Lang domma Huhatahon bam, idahonmu ma hasangapon ni
Naibata anggo porsaya ho? Na palobeihon paretongan ni jolma marsampang bani Jesus, maila.
Sonai iahapkon si Maria ijia, sonai do age sonari pakon ahapkonon ni jolma na roh. Tapi hape
saguru bani Jesus do haganup.
Pingkiran na adong bani jolma, in pe sibere-bere ni Naibata do. Maksudni ase ipakei
jolma in pingkiran na binere ni Naibata laho pasaudkon harosuh-Ni. Halani ai ningon
pataridahkon janah pasaud hita parentah-Ni. Anggo sonai partibal ni pingkiran na dong bani
jolma in ipargunahon, idahonni ma hasangapon ni Naibata bani haganup horjani.
Tonggo: Naibata Bapanami, Ham ma gogoh nami ase ibagas haporsayaon hanami
manjalo ampa manghagoluhkon hata-Mu. Amen.
HALELUYA NO. 142:4
4. Haporsayai ma Hata in, Age gok dousa uhurmin,
ai in do haluahon. maluah do bahenon-Niin.
Arapkon Tuhan Jesus in, Tongon, tongon,
Daroh-Ni in ma jolom. maluah baenon-Niin.
PARMAHAN NA MADEAR 11 SEPTEMBER
GOLUH SIIRIKKON JESUS
“Tapi anggo ho, torang ma uhurmu pasal haganup, tahan ibagas hasunsahan, dalankon horj a
parambilanon anjaha gok dalankon tugasmu.”
2 Timoteus 4:5
Marhitei ayat on, Apostel Paulus manuntut tolu hal pokok na maningon dong bani si
Timoteus sonai age bani ganup jolma na mangirikkon Jesus. Ai ma ase torang uhur pasal
haganup. Seng tarbahen lang, buei tumang permasalahan na golap ibagas uhur ni jolma.
Tarlobih bani jaman sonari on, buei tumang tuntutan kebutuhan ni dakdanak marhitei
sikolahni na meningkat. Kebutuhan sehari-hari pe meningkat. Bagei cara ampa usaha na
binahen, ganup hasilni lang mamuashon, golap uhur pasal haganup.
Sonaha do ase boi torang uhur pasal haganup, sonai ma partibalni na masa ai? Porsaya
do hita anjaha tenger do uhurta, ampa yakin botul hita bahasa tugas pokok bani hita jolma
ibagas na manlahoi ganup horjanta, ai ma ibagas na mangkorjahon hata ni Naibata? Lang
ihatahon Naibata do bani jolma in ase ikuasai haganup sagala tinompani? Lang hal ani ai do ase
marlahouan hita? Ihatahon do homa hasomanan-Ni hita ganup ari. Sonaha, tenger do uhurmu
ijai?
Dakdanak ombahan, lang pala karingat dingin age pe ulog baganding montas ilobeini,
halani iombah orangtuani do ia. Lang lobih sonai do hita pakon Tuhan in? Antong,
marhasoman Tuhan in, torang do haganup uhur ni na mangirikkon-Si. Halani marhasoman
Tuhan in, haganup na mangirikkon ibagas lahoanni bei, pasti sogam tumang uhur ni dunia on
atap raja ni hagolapan in. Bagei do cara ibahen laho manirang jolma in humbani Tuhanni, na
mambahen buei tumang paruntolon ni siirikkon Tuhan Jesus. Hansi pe sonai, seng na boi talu
jolma in sadokah hot ia pakon Tuhan in. Seng na sanggup hagolapan in mantaluhon Jesus, ai
do ase ihatahon Apostel Paulus, tahan bani hamarsikon.
Tahan bani hasunsahan artini ulang sirang humbani Jesus age pe sonaha koras ni
hasunsahan mandorap goluh ni jolma in.
Tonggo: Ningon rup pakon hanami ma tongtong Ham ale Jesus, ase torang uhurnami
pasal haganup, tahan bani hasunsahan anjaha gabe ambilan haganup
goluhnami. Amen.
HALELUYA NO. 249:1+5
1. Seng tadingkononku Ham, 5. Seng be ra maimpol au,
ale Jesus, Sipagoluh. bai ganup na laho salpu;
Sai irikkononku Ham, Sai hu babou mando lao,
sadokahni au manggoluh. tonduyhin marolob-olob;
Ham do hagoluhankin, Jesus, Ham do rupeihin,
seng tadingkononku in. sadokah-dokahni in.
PARMAHAN NA MADEAR 12 SEPTEMBER
GOLUH ARI-ARI
“Bere Ham ma bennami sadari on hagoluhan ari-ari.”
Mateus 6:11
Somal do hita loja ronsi maruntol laho mamingkirhon age na laho mansarihon goluh
ari-ari on. Sipata maseda do parkawanon age kekeluargaan halani mansarihon ai. Mase ma
pala sonai keadaanni? Tontu na hurang tangkas do banta aha na isobut goluh ari -ari
Goluh ari-ari sedo pitah sipanganon barang sinumon na jinalonta ganup ari, tapi
termasuk do ijai sonaha caranta laho mansarihon goluh ari-ari on. Atap na gabe maseda do
parkawanan, keluarga ibahen ham? Lang adong holong, hasintongan pakon na legan. Hape
sonaha ma hita manjalo sipanganon, siinumon ai anggo lang torsa, lang mardamei?
Pasal sipanganon, siinumon sedo pitah soal boras, bah ai, tapi dihut do ijai keadaan ni
juma, age harangan mambahen dong bah tubuh. Ase anggo isobut goluh ari -ari domma bahat
hinamkamni, ai ma: Hunja sumberni, ise mangadongkon, ise na manramotkon ai pakon na
usih hujai.
Ase ibagas na martonggo hita, ai ma na iajarhon Tuhan Jesus bani susian-Ni, porlu
ibagas na sintong iarusi hita aha na pinindonta ai. Ulang ma namim idugot hita mangindo,
hape seng na botoh aha do sasintongni pinindonta ai, janah hubani ise hita mangindo.
Domu hujai ma ase ipagolpa sirsir mambere haganup na porlu bani goluhta ganup ari.
Ase patut Bani ma padas hita pangindoanta.
Tonggo: Tuhan ajari Ham ma hanami mangindo hu Bamu ronsi mamakei ganup idop ni
uhur-Mu. Ase sintong hanami martenger ni uhur hu Bamu bani ari-ari ni
goluhnami on. Amen.
HALELUYA NO. 457:1-2
1. Marhitei lima ruti, dua dengke, 2. Usih sonin do hita tinobus-Ni,
i tamu Jesus do ganupan na roh in. na dob porsaya bani Tuhan Jesus in.
Dob itonggohon ipartopik use, Jumpahan goluh na marlobih-lobih,
lanjar ibagihon bai sidea in. asal ma tongtong hita bujur ijin.
Bosur mangan lima ribu halak, Roh ma hita! Irikkon Tuhanta,
anjaha dong ope sulei ni. la ma tong sibalosanta.
Dob ipatumpu ganup teba-teba, Seng ipaturut hita on gayuran,
dong ope sapuluh dua bantei in. tong do iparorot ase sai sonang.
PA RMAHAN NA MADEAR 13 SEPTEMBER
AMBILANKON MA HATA IN!
“Ambilankon ma hata in, haringgashon ma bani panorang na dear atap na lang dear pe,
pinsang, paingat, padahi marhitei lumbang ni uhur banggal pangajarion.”
2 Timoteus 4:2
Sondahan on hotop do na tangar istilah mangihutkon situasi pakon kondisi. Domu
hubani situasi pakon kondisi ma ipahona sagala pembahenan. Tapi anggo na pardiateihon
ayatta sadari on hira lang marlaku botul istilah nongkan ai. Lang ihatahon Apostel Paulus bani
si Timoteus: “Ambilankon ma hata in, pareksa situasi pakon kondisi setempat”, tapi torang do
ihatahon ase iambilankon hata ni Naibata age panorang na dear atap na lang dear pe. Artini:
Bani ganup panorang do gabe panorang parambilankononkon, janah marhasoman
haringgason.
Hunjai taridah seng dong abat-abat na boi mangolat hata ni Naibata, atap situasi pakon
kondisi na sonaha pe ai lang boi manundati ambilan na madear in. Hata ni Naibata boi
mangatasi sagala situasi ni jaman.
Marubah-ubah pe keadaan ni dunia on, totap do hata ni Naibata. Domma martukar
siparambilan, margantih homa na niambilanan, tapi anggo hata ni Naibata totap do. Halani ai
sanggah ibere Tuhanta ope panorang banta mangambilankon pakon manangar hata ni Naibata
haringgashon hita ma ai.
Seng dong hape harugianta mangambilankon hata ni Naibata ai marguna do ai age
banta sandiri. Sonai do homa age bani na manjalo hata ni Naibata, ai hagoluhan sisadokah ni
dokahni do tujuanni janah marisi podah, sipaingat pakon pinsang-pinsang na madear do homa
ai.
Siparambilan ulang marnaloja janah porlu homa marhasoman lumbang ni uhur. Porlu
dingatonta bani na padashon ambilan na madear in, paboa suruhan ni Naibata do hita. Hata ni
Naibata do na sihol patugahonta. Ulang halani na hurang lumbang uhurta gabe itulak na
manangar hata in. Partonahan na hinaporsayaan ni Tuhanta ma hita tongtong.
Bani hita na manangar ambilan pe, porlu dingatonta paboa sedo hata ni siparambilan ai
hansa na tinangarta sanggah dong na marambilan, tapi Hata ni Naibata do. Na manulak hata ni
Naibata na sintong iambilankon siparambilan sahira na manulak Tuhanta do hita ijai. Halani ai
ambilankon hita ma hata in anjaha dihut ma hita homa gabe sijalo hata in.
Tonggo: Ham Tuhan Naibata, pargogohi Ham ma hanami dihut gabe siambilankon hata-
Mu, janah hanami pe sirsir do homa tongtong manjalo hata-Mu na gabe
haluahonnami. Tarimakasih ma hatahononnami bamu Tuhan halani ipaturut
Ham ope hata-Mu marianan i tongah-tongahnami. Amen.
HALELUYA NO. 143:2+4
2. Andohar apuy-Mu ma gara, 4. Antong buei baen Ham suruhan,
marlintun bani bangsa haganup! sai na tongtong igoki Tonduy-Mu,
Jahowa, Ham paingkat halak Janah na ringgas marambilan
na bujur mangkatahon Hata-Mu. manogu halak hu gomgoman-Mu.
Kawahkon Ham bolag sabion in, Taluhon Ham sibolis in tongtong
Jabolon-Mu seng piga ope in. ramoti Hata-Mu i tanoh on.
PARMAHAN NA MADEAR 14 SEPTEMBER
HADAULATON
“Pansarian banggal do tongon hadaulaton in, anggo marhasoman uhur na sonang.”
Dong halak na mangidah hadaulaton ni hun segi ekonomi hansa. Halak sisonai ai
igolongkon si Paulus do bani halak na magouan hasintongan. Boi do hiraonta pansarian
banggal hadaulaton in asal ma dong banta syarat songon na hinatahon ni ayat on, ai ma
marhasoman uhur na sonang.
Aha do artini “marhasoman uhur na sonang?” Dapot do balos nion bani ayat ayat na
mangihut bani ambilanta on, isini ai ma: Mangkasonangkon na adong banta. Sedo jajat na
hurang. Bani halak na boi mambahen batas sisonai ai bani goluhni do hadaulaton in gabe
pansarian banggal.
Halani ai porlu do pareksaonta lobei dirinta, atap sonaha ma tongon pangahapta bani
na dong banta. Sedo na mangkatahon ase na miskin ma na boi sonon, lang. Bani ayat 8 torang
do isobut dong do banta sipanganon ampa parhiouon, sedo na marhahurangan, seng homa
loheian. Na porlu bani goluh ari-ari on sungkup do, tongon lang marlobih-lobih, seng homa
loheian. Anggo na botoh ma mangkatahon tarimakasih pasal ai, anjaha malas uhur homa
manjalo pakon mamakei ai, ai ma na tongon mangkasonangkon ai.
Na mambotoh sungkup do ibere Naibata bani haporluan siganup ari on, bani do
hadaulaton in gabe pansarian banggal, halani seng be madabuh ia hubagas parlajouan ampa
siding ni isibolis in, tapi maluah do ia humbani hamagouan pakon hasedaon anjaha seng be
kahou ia humbani haporsayaon in. Lobih humbani pansarian banggal do use hiraon ai, anggo
maluah ma diri humbani hamagouan, siding ni sibolis, tarlobih humbani hakahouan ni
haporsayaon. Hunjai boi ma homa torang iarusi hita artini hadaulaton pakon ise do na ginoran
na daulat.
Porlu homa ingatonta paboa seng na ilarang hata ni Naibata halak na daulat gabe
bayak. Boi do bayak, tapi seng habayakonta ai be manrajai uhurta, tapi hadaulaton ai do
gariada manrajai artanta pakon goluhta. Seng hape gabe harugian pala banta na maragama
pakon na marhadaulaton, tapi sebalikni do, ai ma gabe pansarian banggal na marguna bani
goluhta sonari pakon simagira, halani seng kahou be hita ibagas haporsayaonta.
Tonggo: Ham Jesus Kristus, urupi Ham ma hanami ase tongtong goluhnami
marhadaulaton ibagas Ham. Ibotoh hanami pansarian banggal do tongon
hadaulaton in bannami sandiri. Amen.
HALELUYA NO. 251:2-3
2. Age ilioti sibolis pe au, 3. Iporsan Tuhanku ganup dousangkin
sol agouhononni ganup, bai silang-Ni in do ibaen;
Dob matei Tuhanku manggoluh ma au, Ge sada na so jujuron-Ni be in,
utangkin dob sahei haganup. Na martuah tonduyhu ibaen.
Sonang do, sonang do, Sonang do, sonang do,
ipasonang tongtong uhurhon. ipasonang tongtong uhurhon.
1 Timoteus 6:6
PARMAHAN NA MADEAR 15 SEPTEMBER
IDOP NI UHUR NI JESUS KRISTUS
“Ai ibotoh nasiam do idop ni uhur ni Tuhan Jesus Kristus, na bayak hinan, gabe miskin halani
nasiam, ase bayak nasiam halani sombuh-Ni ai.”
2 Korint 8:9
Haganup do halak Kristen mambotoh pasal idop ni uhur ni Tuhanta Jesus Kristus ai ma
na susur Ia hun Nagori Atas manadingkon “hamuliaon-Ni” laho manghopkop jolma on.
Mambotoh, irik do ai pakon pangarusion. Atap hataonkon ma bahasa lape gok pambotoh
anggo lape torang iarusi hita. Halani boi do sada halak mangkatahon domma tongon ibotoh
tapi anggo mangarusi hurang ope. Ase hata na i atas on irik do on bani ayat 8, nini: “Sedo
songon parentah hatangkon tapi laho manguji sintong ni uhur nasiam do marimbang
habujuron ni halak na legan.” Jadi lang pitah mambotoh pasal idop ni uhur ai tumang hansa
tapi dihut do pangarusion, janah ibagas pangarusion ai ma taridah bani pangabakta sandiri
bahasa sintong do hita na dob manjalo idop ni uhur ai. Taridah ma ai bani hasomanta na legan.
Hataridahon ni idop ni uhur ni Tuhan Jesus ai, ni ngon arusanta do aí bani na ra Ia
mamberehon diri-Ni bahen haluahon ni jolma. Itaron do na marsik na sahira ampei bani
abaranta. Ijai ma idop ni uhur ni Tuhan Jesus na so tardadap bagasni, janah pasal ai ma homa
na porlu taridah bani goluhta. Domu hubani haluahonta tumang do ase manaron na marsik
Tuhanta. Anggo ipingkiri hita ai aha ma untungni bani Tuhan Jesus manaron na marsik?
Paruntungan banta do hansa ijai. Porini dong sada halak na bujur uhurni, sanggah marutang
hita, mintor igalar utangta ai na so ibagas botohta, ai paruntungan do ai banta, janah patut
marmalas ni uhur. Janah malas ni uhur ai patut sahali do patidakonta marhitei panlangkahta
sonai age pangabak. Hatahononta ma na so ingkat hubotoh mintor igalar sada halak utangku
halani ai malas do uhurhu. Dob salosei ham mangkatahon ai roh ma use hasomanmu
mangkatahon usih songon hatamu ai: “Au pe dahkam dong do homa manggalar utangku lang
pala huhatahon.” Anggo sonai ma bahat mangkatahon, tontu roh ma sada sungkun-sungkun,
ise do nani na manggalar ai? Balosta tontu, dong ma da sada halak hansi pe tongon lang
tarbaen sada parbandingan antara parpambaenan jolma pakon parpambaenan ni Tuhanta,
tapi lang lobih lang hurang Ia do na manggalar utang ni dousanta. Ia do pasaloseihon ganup
utangta lang pala hita mangindohon pitah idop ni uhur-Ni do hansa janah holong atei-Ni
mangidah hita. Ase patut ma hita marmalas ni uhur halani paruntungan banta. Talup m hita
mangkatahon humbani bulat ni uhur hata tarimakasih.
Tonggo: Humbani gok ni uhur do hanami mansombahkon malas ni uhur bamu Tuhan,
sonai age tarimakasih nami halani idop pakon holong ni uhur-Mu. Amen.
HALELUYA NO. 132:1+3
1. Ai ambit lang do Ham, 3. Andohar ma holong ateihu
parholong atei Ham sai tongtong bujur Bamu.
huja ma au? Halani holong-Mu Age huja pe au
ampakon layak-Mu, hu surga au. sai hasomani au, sonang tumang.
PA RMAHAN NA MADEAR 16 SEPTEMBER
ABBA, BAPA!
“Tapi halani anak nasiam, isuruh Naibata do hubagas uhurta Tonduy ni Anak-Ni in, na
mandilohon: Abba, Bapa!”
Galatia 4:6
Lang sungkup bapa atap inang pagodang-godangkon niombahni tumang. Maningon
dihut do mammamahkon hauhuron pakon pangarusion marhitei na mammamahkon
pangabak, adat, panlangkah na madear i tongah-tongah ni hajolmaon. Irik hujai do ase adong
ahap na manggoluh ibagas hadirion ni dakdanak na songon panggora ni uhur. Mamodahkon
pangarusion na tongon- tongon humbani bapa pakon inangni sandiri. Ase anggo lang adong na
imamahkon bapa atap inang bani dakdanakni, goranan do sada halak na marbapa atap
marinang, tapi anggo manjalo hata podah na manggoluh lang ongga. Jadi boi ma hatahonon,
hurang tanggung jawab ni orangtua bani niombahni. Gariada podas do hita mangkatahon, si
anu ai dakdanakta, hape anggo na sasintongni lang dong hubungan na erat tumang. Pasal on
porlu jaga hita bani ganup panorang. Ulang das lepak hita mandalankon pangarusion bani
hadirion ni dakdanakta. Ai anggo imamahkon hita rusia ni hauhuron bani ganup panorang,
manggoluh do ai bani hadirion ni na manjalo ai.
Lobih hunjai ope hita ilobei-lobei ni Naibata. Ibere do banta sada halak ai ma na gabe
anak hita ganupan ilobei-Ni. Ihasomani janah iramotkon do hita tongtong. Ase manggoluh
panramotion-Ni ai, ibere do bani dirinta Tonduy Napansing. Ia do na mambere gogoh hubanta
laho mandilo goran ni Naibata. Ase anggo mandilo goran ni Naibata hita, horja ni Tonduy
Napansing do ai. Sahali pe lang margogoh hita mandilo goran ni Naibata anggo humbani
hadirionta, tapi pitah horja ni Tonduy do ai. Ase marsurak-surak pe hita on mamuji,
pasangapkon Tuhanta, anggo lang ihasomani Tonduy, aha pe lang artini ai. Tapi porini pe sip
hita, anggo ibagas uhurta Tonduy Napansing marhorja, gabe mararti ma ai.
Jadi ningon do ibagas ganup panorang hita mangahapkon anak do hita ilobei ni
Tuhanta, marhiteihon ni ai tontu hu Bani do hita mardilo. Hu Bani do hita mansuhutkon sonai
age marondos, halani ibotoh na porlu banta. Ase sirsir ma hita tong mardilo-Si, halani domma
ibere banta pangarusion pakon ahap na manggoluh bahasa Ia do tongon na dob marhorja
ibagas dirinta, hita on pitah mandilo tumang do.
Tonggo: Ale Tuhan, parhioui Ham ma hanami marhitei Tonduy-Mu in, ase margogoh
janah sintong hanami mandilo goran-Mu, Ham Bapa paridop ni uhur na tarsulur
janah parholong ni atei banggal. Amen.
HALELUYA NO. 132:2+4
2. Tarima kasih ma 4. Isuruh Anak-Mu
Bamu, o Naibata hubangku Tonduy-Mu
parlayak Ham! na hum Bamu,
Sibahen dalan in manogu tonduyhin
marhitei Jesus in hu surga in. hu hasonangan in, na puji Ham.
PARMAHAN NA MADEAR 17 SEPTEMBER
HASADAON NI JESUS PAΚΟΝ ΝΑΙΒΑΤΑ
“Na mangidah Ahu, mangidah na marsuruh Ahu do.”
Johannes 12:45
Iluarhon Tuhan Jesus hata on ai ma na gabe sada balos domu hubani sungkun-sungkun
ni halak Jahudi, na sihol mangidah torang bani panonggor ni sidea sonaha tongon rupa ni
Naibata, ase porsaya sidea. Hansi pe sanggah marhorja Tuhan Jesus i Tanoh Palestina,
tongtong do mangambilankon pasal hadirion-Ni, hasadaon-Ni pakon Naibata. Tapi lang ope
sidea porsaya anggo lape iidah rupa ni Naibata. Lang sungkup pitah Jesus tapi maningon dihut
do Naibata sihol tandaon ni sidea. Padahal anggo domma marsahap Tuhan Jesus, sahap ni
Naibata sendiri do ai, halani dos hadirion-Ni pakon Naibata janah Hata ni Naibata do Hata-Ni.
Sintong do anggo na pingkiri, dong sada suruhan na mamboan tonah atap na gabe
utusan, sihol do homa botohon atap ise na marsuruh sipamboan tonah ai. Ija hutani, aha
horjani pakon na legan sihol do tongon ai bahasa dos do ai pakon na marsuruhsi, janah hatani
ai pe dos songon hata ni na marsuruhsi, aha ma gunani porlu banta atap ise na marsuruh ai?
Na porlu banta on do; ljalo hita atap lang hata ni tonah ai, ihaporsayai hita do atap lang anggo
domma ihatahon na mamboan tonah ai bahasa dos ia pakon na marsuruhsi?
Ase ibagas na mangarusi artini hata ni Naibata marhitei sungkun-sungkun sonaha do ai
tongon? Tapi marhitei haporsayaon do. Ai anggo lalab do hita sungkun-sungkun lang
marhaporsayaon, sadokah ai ma lalab lang marhatontuan hita. Suba hita ge marsungkun bani
dirinta sada-sada masalah. Ra dapot do balos tapi sungkun hita use, mase sonai? Dob dapot
balos na baru, sungkun hita use, mase sonai? Jadi lalab ma lang dong ujung ni parsahapan,
halani domma namin dapot balos, tapi lalab do hita sungkun-sungkun, lang ongga porsaya.
Anggo sonai ma hita marsungkun pasal hasadaon ni Jesus pakon Naibata, simbei ma
haporsayaonta, halani tongtong pe Jesus mambere haluahon, sisoya-soya do ai anggo lang
dong haporsayaon banta. Anggo sonai sonaha do? Mambalosi sonai ai age mangarusi hata ni
Jesus na banta on, ningon dong do haporsayaon. Manjalo ibagas bulus pakon putih ni uhur
bahasa na roh do Naibata manohu jolma ibagas hadirion ni Jesus. Sonaha pardongni ai? Torih
ham Jesus, haporsayai ham Ia, halani ganup hata-Ni na humbani Naibata do ai. Anggo domma
ihaporsayai hita janah lang sangsi hita dapot hita ma arti hasadaon ai.
Tonggo: Ham Naibata, pabotohkon Ham ma hubannami tongtong ibagas haporsayaon na
manggoluh, paboa na sintong do Ham sada pakon Anak-Mu Tuhan Jesus Kristus,
na dob isuruh Ham roh hutongah-tongah nami. Amen.
HALELUYA NO. 91:1
1. Naibata do na margoran humbai hagoluhan in
Bapa, Anak, Tonduy in. na tagang i surga in.
Siilohkon paringoran Na dob sasap do dausangku.
na manirang tonduyhin ibaen holong-Mu hubangku.
PARMAHAN NA MADEAR 18 SEPTEMBER
MARHORJA MA HITA!
“Anjaha haporluhon nasiam ma ase parsip nasiam marsiurus urusanni bei anjaha marhorja
ma tangan nasiam, songon na dob iparentahkon hanami bani nasiam.”
1 Tessalonika 4:11
Bani na manjalo Hata ni Naibata hita porlu do dong pangarusion. Jadi lang sungkup
pitah manjalo tumang hansa. Porini asal ijalo hita hansa hata na iatas in, ra ma tubuh ibagas
uhurta ase sip ma lah hita bani haganup, dugot hita horjanta lang pala porlu hasoman na
legan.
Tongon do sonai ihatahon si Paulus na ijia bani halak Tessalonika ase parsip sidea
janah marhorja. Tapi porlu do botohonta bahasa na dong do halani ase ihatahon si Paulus
sonai. Gati sidea bahattu sahap. Gab mangurusi horja ni halak gabe lupa ia bani horjani. Seng
pitah ai, dihut do homa manrisai hasoman, tapi anggo manranai dirini lang ongga. Hahurangan
ni halak do use isahapi gabe lupa ia mamingkirhon na porlu bani sandiri.
Ambah ni ai gati do porlunan mansahapkon haporsayaon ni hasoman na legan ase
marimbang haporsayaonni sandiri. Jarang ma ai adong sungkun-sungkun bani diri ni sidea
sandiri, sonaha ma tongon haporsayaon ronsi horjangku sadokah ni ari on.
Ase hita, ulang be porlunan banta mamareksa horja ni halak ase horjanta sandiri. On
ma sada dalan laho mananda dirinta. Tapi sonai pe porlu do hita marsaor. Ulang halani
ihatahon ijon parsip janah marsiurus urusanni bei, gabe ise pe lang na porlu banta. Janah
ihatahon hita homa, sonai do nini hata ni Tuhan! Marsiurus urusanni bei ma lah, pingkirhon
ham na bamu hupingkirhon na bangku! Lang sonai.
Songon na dob tangkas iarusi hita, age pe iojur hita ase parsip janah marsiurus
urusanni bei, sedo na lang porlu hasomanta na legan! Porlu do parsaoran ai tongtong. Hansa
bani parsaoran ai ulang hita lepak mandalankon, halani gati jumpah bani partumpuan,
parjumpahan piga piga halak, sedo anggo soal hamajuon isahapi, tapi manranai halak do use.
Manorih sambor ni halak, sedo anggo samborni sandiri.
Tapi tongtong ma hita marhorja, ai ma na gabe hitei pasu-pasu ni Tuhan janah marsaor
ma hita tongtong, ulang saor ibagas manguhur-uhuri halak ampa manranai.
Tonggo: Tuhan, patotap Ham ma uhurnami ase ulang lupa hanami bani horjanami halani
manguhuri hasomannami, janah pabotohkon Ham bannami na madear, domu
hubani Titah-Mu. Amen.
HALELUYA NO. 411:1-2
1. Diatei tupa ma Bamu Ham Naibata, 2. Ipardimata Ham do tong hanai Tuhan
mambaen tupa humpulan nami on. ai sorap do Tonduy-Mu in tongtong.
Igomgom Ham do horja nami on torsa, Ase torsa mardalan horja ganupan,
gok malas uhur do hanai ijon. Kuasa-Mu do in mambaen sintong.
Ibere Ham do damei na tarsulur, Porini dong rundur ni paruhuran,
sanggah manranggi horja haganup. sirsir do Ham manohu hanai on.
Nuan hanami rap marmalas uhur, Ai Hata-Mu do tong na pagolpahon,
mardingat haganup pambaenan-Mu. mambaen tapang nuan ganup ijon.
PARMAHAN NA MADEAR 19 SEPTEMBER
MANGKATAHON TARIMA KASIH
“Halani ai mangkatahon tarimakasih do hanami tongtong bani Naibata, ai ijalo nasiam do hata
ni Naibata, na binogei nasiam humbannami, ijalo nasiam do in, sedo songon hata ni jolma, tapi
songon hata ni Naibata do, ai in do tongon, gabe marpangkorhon ibagas uhur nasiam na
porsaya.”
1 Tessalonika 2:13
Apostel Paulus pataridahkon horjani marhitei na gok tanggung jawab hu tongah-
tongah ni kuria pakon ilobei ni Naibata. Horja ni Naibata na dob ondos bani ai ma
mangambilankon ambilan na madear, ihorjahon marhitei gok malas ni uhur.
Malas ni uhur ni Apostel in ai ma halani sirsir kuria na i Tessalonika manjalo pakon
mangkagoluhkon ambilan na madear sedo songon hata ni jolma, tapi Hata ni Naibata do.
Botul-botul do Hata ni Naibata marhorja ibagas parambilanon ai, ronsi na paahapkon ai bani
kuria in. Panjaloon ni kuria in bani ambilan na madear na pinadas ni siparambilan, gati do lang
marpangkorhon. Atap hatahonon ma lang sahira hata ni Naibata ai. Tapi gati inilai ambilan ai
humbani sudut hajolmaon hansa, na mambahen tongtong bani Naibata, on ma sada hal na
porlu banta halak Kristen, songon na dob binahen ni Apostel in sandiri. Keberhasilan ni Paulus
bani horjani ai ma halani tongtong iahapkon na ipargogohi Naibata do ia mangkorjahon
horjani. Janah pitah hubani Naibata do ia mangkatahon tarimakasih sedo hubani jolma atap
hubani dirini. Gati do na idah itongah-tongahta, gatinan martarimakasih bani samah-samah
hita, janah lupa martarimakasih bani Naibata. Gariada tene, kesuksesanta bani horjanta gati
mamboan hagijangan ni pribadi atap kesombongan.
Goluh na martarimakasih bani Naibata ai ma goluh na tongtong mangahapkon Naibata
do simadasi. Sihol ma bani ganup horjanta pakon aktifitas ni goluhta bei pataridahkon
habanggalon ni Naibata, janah na tongtong martarimakasih. Bani keberhasilan atap
kegagalanta bani horjanta siganup ari ningon do tongtong hita martarimakasih, hape sanggah
sunsah lang. Ase tongtong ma hita martarimakasih hu Bani, bani ganup goluhta.
Tonggo: Tarimakasih ma bamu Ham Naibata, na tongtong mansarihon goluhnami. Amen.
HALELUYA NO. 248:5-6
5. Tarima kasih ma uhurhu, 6. Parorot tongtong langkahku
Bamu na manondangi au; bai ganup dalan na botul;
Hupuji Ham, ale Tuhanku, Patoguh Ham tongtong uhurhu,
itodoh Ham, hapeni au; lao mandalankon hata-Mu;
Megah ma tonduyhin nuan, O sondang na hun surga in,
dob hutandai Ham. sondangi uhurhin.
PARMAHAN NA MADEAR 20 SEPTEMBER
ANAK NI NA LIHAR
“Ai haganup do nasiam anak ni na lihar anjaha anak arian, seng borngin atap na golap simada
hita.”
1 Tessalonika 5:5
Bani tahun parpudi on, ididah hita do hamajuan na pesat tarlobih ma bani bidang
kedokteran. Songon na boi iudut goluh, marhitei na manukar jantung ni sada-sada halak na
dob maseda jantungni, gabe boi manggoluh piga-piga dokah nari. Tapi age pe sonin hamajuan
ni teknologi bani panorang on, anggo secara total angkulanta boi ope irombak.
Goluh na baru mangihutkon Bibel sedo penggantian sebagian hansa, tapi penggantian
secara total. Biak sisapari atap biak na golap ipadaoh, janah isalukhon goluh na baru atap biak
na baru. Biak na baru ai ma marhitei na dob manjalo Kristus goluhni. Ase Kristus do na
marparbaharui. Sedo humbanta roh ni ai. Marhitei Pandidion domma gabe anak na lihar hita,
domma iuseihon hubanta Tonduy Napansing paliharhon hadirionta, domma gabe anak ni
Naibata hita. Anak na lihar tontu mardalan bani na lihar seng be mardalan bani na golap.
Kristus sandiri do mambere haanak-anakon ai banta. la sandiri Anak ni Naibata na mambere
haliharon. la do panondang ni dunia on, janah ise na mangihutkon-Si seng anjai mardalan bani
na golap. (Johannes 8:12) Jelas hape hubanta, halak na mangihutkon-Si, ai do goranon anak ni
Naibata. Sedo asal Kristen, tapi botul-botul pataridahkon ibagas goluhni siihutkon Kristus ai.
Halak na dob gabe anak na lihar ai ma halak na tongtong pataridahkon horja haliharon, pakon
na tongtong marpangarapan bani Naibata, sonai pakon pangarapan bani goluh na
paduahalihon ai. Halak na lihar berarti puho bani horja na madear, mardalan bani dalan na
pinatuduhkon ni Tuhan. Ise do boi mardalan bani dalan in, ai ma na porsaya janah na
mambahen Jesus gabe panondangni.
Tuhanta do na palihar dalanta bani hasintongan. Janah seng ra kahou halak na
mambaen Jesus arihanni. Sihol ma pangabakta, parlahouta pakon haganup panggulmiton ni
goluhta pataridahkon horja haliharon ai.
Tonggo: Ham Tuhan Naibata, tarimakasih ma hatahononnami Bamu, halani domma
itodoh Ham hanami gabe anak-Mu, ase sihol ma hanami manggoluh domu
hubani harosuh-Mu. Amen.
HALELUYA NO. 17:2-3
2. Golap uhurnami on, 3. Sondang humbai Naibata,
nin homa pambotohnami. haliharon roh hun datas.
Anggo seng Tonduy-Mu in, Baen torsa, sondangi ma
paliharhon uhurnami. uhurnami, ase megah.
Ningon Ham do patureihon Lao manjalo hagoluhan,
dalan sidogeionnami. Pinasirsir-Mu o Tuhan
PARMAHAN NA MADEAR 21 SEPTEMBER
UDAN PASU-PASU
“Songon udan na madabuh bani poyon-poyon ma ia, songon udan neinei na mangarbahi
tanoh.”
Psalmen 72:6
Udan ai ma sada gambaran pasu-pasu pakon hadameion. Songon udan na
pamomburhon suan-suanan, sonai ma sikap ni sagala sipambobai mambangun goluh ni
bangsani. Suan-suanan na domma dokah lang iarbahi udan, perkembanganni lambat bahkan
melus janah mungkin gabe matei, halani sumber ni goluhni ai ma bah atap udan na madabuh
hu tanoh. Janah tanoh ai sandiri mambere sipanganon bani suan-suanan sonai pakon poyonpoyon
boi mombur anggo cukup hona udan atap zat cair. Usih do poyon-poyon in songon
goluh ni jolma atap usih songon angkulanta na mamorluhon zat air lebih satongah ni
kebutuhan ni angkulanta.
Sonai ma martumbor hapintoron itongah-tongah ni goluhta, tarlobih ma ai ibagas
siparkuasa dompak bawahanni. Hapintoron pakon hadameion ai memang mahol do roh,
anggo sadokah lang ope Naibata mamberehon. Naibata do sabotulni sumber bah tubuh pakon
hapintoron ai. Boi sada halak mangkorjahon hapintoron pakon hadameion ai ma anggo
domma ipargogohi Tuhan Naibata ia. Naibata do na marhorja ibagas dirinta gabe boi
mamparbuahkon buah na madear, janah mangkorhon bani hasoman. Goluhta cukup berguna
bani hasoman anggo mabaor humbanta bah tubuh hagoluhan na humbani Naibata. Gati do
goluhta, parlahouta lang boi mambaen perkembangan bani hasoman, songon sada suansuanan
na lang dapotan bah. Gariada tene, gati do goluh ni halak Kristen songon udan sira-sira na
parsedahon suan-suanan. Hansi pe iakui hita bahasa udan ai ma na porlu bani poyonpoyon,
tapi gati do homa udan mamboan bencana atap banjir use. Tontu marhitei tonggo ni
Par-Psalmen on lang anggo udan na marhaba-haba atap sira-sira maksudni. Tapi udan na boi
mambaen dear poyon-poyon.
Sikap ni halak Kristen ai ma sikap na boi mangarbahi uhur ni halak na madoyuk pakon
bani na horahan. Pambahenanta sihol ma tongtong marhasoman pakon mamboan pasu-pasu i
tongah-tongah ni masyarakat. Ase boi marpasu-pasu goluhta bani hasoman ai ma anggo
domma tongon-tongon ijalo hita pasu-pasu na humbani Naibata.
Tonggo: Pargogohi Ham ma hanami Tuhan mangkorjahon hapintoron i tongahtongahnami,
janah boi goluhnami marpasu-pasu bani hasoman. Amen.
HALELUYA NO. 122:4
4. Barang ise na horahan
bani hapintoron in,
na martuah do sidea,
ai tongon do jumpah in.
Sai na sonang uhur ni
na marhapintoron in.
PARMAHAN NA MADEAR 22 SEPTEMBER
HAJONGJONGANTA
“Nasiam sanina, hu paingat ma nasiam pasal ambilan na madear, na dob huambilankon bani
nasiam, na dob jinalo nasiam, na gabe hajongjongan nasiam.”
1 Korint 15:1
Hajongjongan ai ma mangatur partibal pakon keadaan ni sada-sada halak. Anggo
hajongjongan ni sada halak tutur boru i tongah-tongah ni rumah ni tondongni, tontu
hatibalanni ijai, ai ma siparugas atap siparhobas. Hajongjonganni ai do manontuhon aha
horjani. Gati do lang ibotoh sada halak sonaha hajongjonganni mambahen lang homa ibotoh
aha horjani.
Jemaat na i Korintus ipaingat Paulus ase ulang lupa sidea bani bani hajongjonganni
pasal ambilan na madear. Sipaingat ni si Paulus on ma marlaku homa do age bani goluh ni
halak Kristen sonari, ija domma buei na manlembang hajongjonganni na sasintongni ai. Hansi
pe domma iakuhon bani na masuk gabe halak Kristen na maningon tongtong ia
mangkaporsayai Naibata Bapa, Anak pakon Tonduy Napansing, tapi hataridahonni lang sonai.
Bani ganup acara kebaktian Minggu ihatahon hita do: “Ahu porsaya bani Naibata Bapa, Tuhan
Jesus, Tonduy Napansing,” hape bani hataridahanni ibagas ari-ari ni goluhta legan do use.
Hata ni Naibata ai ma ambilan na madear na dob jinalonta, sihol ma botul -botul gabe
hajongjonganta. Hata-Ni ai do onjolan bani goluhta. Anggo malembang hita hunjai, tontu
domma magou hita. Halak na lari humbani onjolan ni goluhni na sasintongni usih ma ai
songon sada kapal torbang na mandarat lang tiba landasan, dobni maseda ma kapal torbang
ai. Buei halak na dob magou marhitei na lang sintong-sintong pangkaporsayaonni bani hata na
dob jinaloni. Hatani Naibata ai do sabotulni goluhta pakon artanta. Hata-Ni ai do na
pademeihon jolma. Ase halak na manjalo ambilan na madear, hape lang ihagoluhkon sisoyasoya
do ai. Tapi halak na manjalo atap manangar Hata ni Naibata pakon marimbagashonsi, ai
do na martuah.
Halak na manjolom poltik hata ni Naibata ai do na maluah. Maningon songon na
mandokdok ria-ria, poltik panjolomta bani hata ni Naibata. Lang boi ganggang darngos. Hita
halak Kristen sihol ma tongtong barani mangkajongjongkon haporsayaonta, ai ma Naibata
Bapa, Anak pakon Tonduy Napansing.
Tonggo: Ham Tuhan Naibata pargogohi Ham ma hanami ase ulang lepak hanami
humbani hajongjongannami, ai ma Hata-Mu in, ase ulang magou hanami. Amen.
HALELUYA NO. 18:1-2
1. Hata-Mu ale Tuhanku, 2. Ale Jesus, sai kawahkon,
arta siharganan ai. sai parorot Ham au on.
Sai palongkot bai uhurhu, ‘Se totap haporsayaon
ulang lang hujolom ai. mangiankon uhurhon;
Anggo seng be sijoloman Sai paringgas Ham uhurhu,
Hata na madear in, Manangihon Hata ai;
aha ma na baen onjolan Sai horahan bai podah-Mu,
ni haporsayaonkin. songon si Maria ai.
PARMAHAN NA MADEAR 23 SEPTEMBER
ULANG MABIAR, MAROLOB-OLOB MA!
“Ulang mabiar ho ale tanoh, marolob-olob anjaha marmalas ni uhur ma ho, ai banggal do
pambahenan ni Jahowa.”
Joel 2:21
Songon idop ni uhur ni Bapa mangidah niombahni sonai ma idop ni uhur ni Naibata
mangidah bangsa-Ni. Marpangulaki do uhur ni Jahowa dompak bangsa-Ni. Bangsa ni Naibata
na dob mananda hahuranganni, anjaha isolsoli dirini janah na ra mulak hubani Naibata, sirsir
do Naibata manjalosi. Idop ni uhur ni Naibata bani bangsa-Ni ai, ai ma na patuduhkon
pambaenan-Ni na sonin bueini. Keadaan ni sidea sanggah ibagas parlajouan ai domma
ipasuang Naibata marhitei na mambere sagala na porlu bani sidea. Ipadaoh serangan ni
munsuh, ibere sipanganon, pinahan, hapentaran anjaha seng be roh habadoron. Haganupan
sibere-bere ipakei atap ijalo marhitei malas ni uhur.
Buei do halak na mabiar bani goluh on, mabiar anggo seng dong pansarian, anggo lang
adong habotohon pakon na legan. Tapi marhitei hata on, iojur haganup hita ase ulang mabiar,
tapi marmalas ni uhur pakon marolob-olob. Lang dong be habiaran banta baik mamingkiri
goluh siganup ari sonai pakon mamingkiri goluh partonduyon. Halani domma sirsir Naibata
mambere sagala na porlu banta tarmasuk homa mamberehon goluh sisadokah ni dokahni ai.
Marolob-olob ibagas Naibata. Marolob-olob, martarimakasih dompak Naibata.
Siolobkononta, ai ma pambahenan ni Naibata banta. Anggo ipareksa hita haganup
pambahenan ni Naibata banta maningon talup do tongon hita marolob-olob bani goluh on.
Bulan September ai ma bulan na bersejarah bani GKPS, ijai ipatuduhkon Naibata
holong-Ni bani halak Simalungun gabe das ambilan na madear hu tongah-tongahni. Ambilan
na madear ai, mamboan gok pasu-pasu pakon perubahan baní halak Simalungun khususni
pakon bani dunia on. Mardingat pardas ni ambilan na madear hu Simalungun, ibahen hita
puji-pujian pakon parolob-olobon bani Naibata. Porlu homa sungkun hita dirinta atap dihut do
hita marolob-olob! Atap ninta do ibagas uhurta: “Nasiam ma marolob-olob, tapi anggo au lang
pala.” Naibata mangindohon hubanta, ase ganup hita marolob-olob mamuji Naibata, halani
ganup do hita ipaluah. Ase ulang pala mabiar be hita bani goluhta, ai sirsir do Naibata
mangkasomani hita pakon mamberehon na porlu banta.
Tonggo: Pujionnami ma Ham Naibata, halani buei ni idop ni uhur-Mu bannami, jalo Ham
ma hanami marhitei pambahenan-Mu pakon idop ni uhur-Mu. Amen.
HALELUYA NO. 499:1-2
1. Panorang olob-olob, 2. Hata ni Naibatanta,
sai roh ma hita ganupan. do mambaen mangasup hita.
Riap ma mangolobkon, Bani sagala horja,
Ambilan na ondos banta. na dear bani Tuhanta.
Domma lihar nuan ganup Domma lihar nuan ganup
i kehen in, ‘ge i huluan. i kehen in, ge i huluan.
In ma kuasa ni Hata-Ni In ma kuasa ni Hata-Ni
Tuhan in, mandilo hita. Tuhan in, mandilo hita.
PARMAHAN NA MADEAR 24 SEPTEMBER
BATAR-BATAR
“Age pe lambin melus badanku pakon uhurhu, batar-batar bani uhurhu ampa rupeihu, ai ma
Naibata sadokah ni dokahni.”
Psalmen 73:26
Anggo roh sungkun-sungkun hubanta, mase nani parjahat in roh bayakni janah lambin
martumbor, hape parpintor in gati idorap paruntolon atap sitaronon? Sonaha do balosmu?
Bagei do balos boi ibahen jolma mambalosi sungkun-sungkun sisongon on. Parpsalmen ijon ai
ma si Asaf mambere sada hasaksianni na boi mambere hatorangan, balos ni sungkun-sungkun
on.
Humbani ganup na adong in, sada do hansa na totap, ai ma Naibata na sadokah ni
dokahni. Marpunsa do ganup na adong i tanoh on, marbatas do age pingkiran, lambin matua
daging matua do homa pingkiran. Songon poyon-poyon anggo roh milas ni ari melus ma ia,
dobni madabuh hu tanoh. Sonai do homa age jolma on, roh dokahni lambin melus, marpunsa
do hape janah marbatas. Halani ai do ase seng tarpangajamkon na adong i tanoh on bahen
batar-batarta. Seng tarpangunsagahkon hape gogoh atap pe pingkiran janah seng dong age
aha na i tanoh on na boi manjamin goluh on. Martumbor pe parjahat in i tanoh on tapi seng
adong hasonangan bani sidea, bulinsah do pangahapan ni sidea halani pingkiran atap pe
gogohni do ibahen gabe batar-batarni, janah torus do sidea ibagas hakahouan.
Anggo sonai sonaha patut hita manggoluh? Maningon marhasabaron do hape hita
janah tongtong mambahen Naibata na gabe batar-batarta. Legan do sura-sura ni Naibata
pakon sura-sura ni jolma. Ai do ase porlu hita manggoluh mangihutkon sura-sura ni Naibata.
Sura-sura ni Naibata boi iahapkon hita anggo ipataridahkon hita bani goluhta on pambalosion
na gok bani Naibata.
Sintong, anggo Naibata do ibahen gabe batar-batar bani goluh on, seng anjai maimpol
hita mangidah age aha pe na adong i dunia on, janah seng mangapian atap pe taruyun hita
hubani hakahouon ni parjahat in. Halani anggo marosuh Naibata boi do pitah sangkababah
hata tumang na adong in gabe masab, janah na seng dong in gabe adong.
Tonggo: Ham Bapa, sintong ibotoh hanami na laho salpu do ganup na i tanoh on, tapi
anggo Ham totap do ronsi sadokah ni dokahni. Urupi Ham ma hanami ase ulang
maimpol hanami mangidah na adong i dunia on, tapi ase marpangunsandeian
hu-Bamu hanami. Tarimakasih ma Bamu Tuhan. Amen.
HALELUYA NO. 249:2+5
2. Ganup binere-Mu in, 5. Seng be ra maimpol au,
tonduy pakon angkulangku. bai ganup na laho salpu;
Hosah ampa gogohkin Sai hu babou mando lao,
ronsi haganup artangku; tonduyhin marolob-olob;
Huondoskon in Bamu Jesus, Ham do rupeihin,
seng paosoronku in. sadokah-dokahni in.
PARMAHAN NA MADEAR 25 SEPTEMBER
HORJA NI HAPORSAYAON
“Haporsayaon in pe sonai do. Anggo seng dong horjani, na dob matei do ai ibagas dirini.”
Jakobus 2:17
Sahalak ihatahon parholong, ai ma marhitei na ra ia pataridahkon holong ni uhurni
hubani hasomanni jolma. Sahalak ihatahon na jungkat, ai ma marhiteihon na tongtong atap pe
gati ibahen na seng madear hubani hasomanni jolma. Seng sintong sahalak ihatahon parbujur
atap pe na jungkat anggo seng taridah ai humbani pambahenanni atap pe pangabakni. Usih
hujai do homa age haporsayaonta in, maningon adong do horjani na ipataridahkon hita
marhitei pambahenanta. Anggo ihatahon hita, na porsaya do ahu, maningon sungkunonta ope,
hubani ise do porsaya janah haporsayaon na sonaha do haporsayaonta ai? Porsaya do hita
adong Naibata, porsaya do homa hita adong sibolis. Sibolis pe porsaya do adong Naibata
anjaha hitir-hitir, tapi seng ipataridahkon sibolis ai pambalosion hubani Naibata. Halani ai,
haporsayaon in hape ai ma ibagas pambalosian na gok hubani na nihaporsayaonta in.
Hubani ise do hita porsaya? Anggo hubani Naibata do hita porsaya pataridahkon hita
ma pambalosion na gok bani Naibata seng pambalosion hubani setan-setan atap pe dunia on.
Pambalosion ai ma horja ni haporsayaonta ai, ai ma mambalosi atap pe mandalankon na
hinatahon ni Naibata hubanta. songon si Abraham na pataridahkon pambalosion na gok bani
Naibata na laho manggalangkon anakni ai. Pambalosion do anggo sirsir hita pataridahkon hani
ganup goluhta harosuhni Naibata. Pambalosion na gok do anggo ra hita manggalangkon ganup
hawajibanta i tongah-tongah ni kuria age bani masyarakat. Doshon na matei do haporsayaonta
in anggo seng ipataridahkon hita pambalosion na gok bani Naibata. Doshon na seng dong do
ganupan na nihorjahonta in bani goluhta on anggo seng na jinuljul ni pambalosion bani
Naibata.
Tonggo: Tuhan! Ajari Ham ma hanami ase boi ipataridahkon hanami pambalosion na gok
hu Bamu, ai do horja nihaporsayoan in. Juljuli Ham ma uhur sonai age
haporsayaonnami ase sirsir hanami mambalosi parentah-Mu, ase sintong boi
marhaporsayaon na manggoluh hanami. Amen.
HALELUYA NO. 115:2+5
2. Sai songon hayu dear ho 5. Sai tiru Tuhan Jesus in
ramos parbuahniin. na roh mangkopkop ho.
Bulungni pe tabun homa Pambaen-Ni ‘ge Hata-Ni in
usihi ma sonin. hagoluhanmu do.
PARMAHAN NA MADEAR 26 SEPTEMBER
SIDALANKONOΝΤΑ ΒΕΙ
“Ai pe on do sipaingathu parlobei humbani haganup. Sihol ma dalankononkon pangindoan,
partonggoan, pangapition ampa hatarimakasihon manghopkop haganup jolma.”
1 Timoteus 2:1
Sada tonah hubani haganup kuria na maningon padason ni si Timoteus, ai ma ase dihut
tonggohonon ganup jolma, pamarentah, raja, bangsa sipajuh begu-begu sonai age pamarentah
na gati mangayak-ayak halak Kristen na parlobei ai, seng dihut sitonggohonon.
Gati do hita martonggo, tapi ibagas na martonggo hape hita, seng sungkup pitah dirinta
atap pe keluarganta tumang hansa sitonggohonon, tapi haganup jolma do. Jesus roh hu dunia
on ai ma laho manobus haganup jolma, na bayak, na musil, na sangap, na masombuh. Naibata
mangkarosuhkon ase haganupan podas ijlo Ambilan na Madear in. seng dong sada jolma pe i
dunia on na idarat ni holong ni Jesus Kristus. Tapi jolma in sandiri do lalab seng manjalo
holong ni Jesus. Ai do ase porlu homa tonggohonon sidea na seng manjalo ai janah padas hita
homa hatarimakasihonta bani Naibata marhitei tonggonta
Pangapition pe porlu do ibahen hita ibagas goluhta on. Songon Jesus na mangapiti
susian-Ni, sonai homa hita padashon tonggo pangapition bani Naibata, ai ma mangapiti
hasoman jolma na gati marburu halak Kristen atap pe mangambati horja i kuria in, ase ulang
ibaloshon Naibata dousani ai bani sidea. Sasintongni seng dong sada jolma pe i dunia on na
gabe munsuh ni halak Kristen, tapi na seng iarusi sidea do horja ni halak Kristen ai. Ai do
mambahen ase porlu sidea itonggohon, ase iarusi sidea horja ni Naibata i dunia on.
I atas ni ai haganupan, tarimakasih ma hatahononta bani Naibata halani holong pakon
idop ni uhur-Ni banta.
Tonggo: Tarima kasih ma bamu Bapa, halani ibere Ham Anak-Mu roh hu dunia on laho
paluahkon ganup jolma. Halani ai pagolpa Ham ma tongtong hanami, ase
ganupan jolma dihut itonggohon hanami, ase ganupan dihut parsimada Bamu.
Urupi Ham ma hanami laho mandalankon in. Amen.
HALELUYA NO. 145:3-4
3. Horjahon bujur 4. Holong atei-Mu
Hata-Ni ganup, Tuhan Naibata,
sai monang jojor pasaud Hata-Mu
baenon-Ni ganup. tumpaki homa,
Ai Ia do Raja haganupan horja
na monang tongtong, ni jabolon-Mu;
patitir pe bala Martuah homa ma
manginsurut tong. baen Ham jolma on!
PARMAHAN NA MADEAR 27 SEPTEMBER
SONARI MA PANORANGNI
“Ai nini do: Bani panorang idop ni uhur do ho Hutangihon, anjaha bani panorang haluahon do
ho Huurupi. Tonggor ma, sonari ma idop ni uhur, tonggor ma, sonari ma panorang haluahon.”
Nini sada pepatah na mangkatahon: Waktu itu adalah uang. Aha do na imaksudni atap
arti ni ai? Ai ma ase patugahkon arga ni panorang. Domu hujin ma ase pandai laho mamakei
panorang, ulang lansei pasal panorang, halani panosalan i pudi ni ari lang dong guna ni.
Marhiteihon porluni panorang bani jolma na idah do ai kegiatan hidup jolma na i kota sonai
age na i huta, sibuk na laho mamakei panorang na satongkin ai. Ai ma na laho memenuhi ari ari
on.
Sadalan hubani ayat na banta sadari on ihatahon do: Sonari ma panorang idop ni uhur
ai, janah sonari ma panorang haluahon ai. Bani mandalani panorang hita isungkun do hita
homa: Sonaha do nani age hita ibagas goluhta na mamorluhon goluh ni partonduyonta?
Sonaha do kesibukanta mamorluhon haluahon ni tonduyta marhitei parpasirsir ni Tuhanta, ai
ma marhiteihon ni idop pakon holong ni atei hubanta na pala matei Ia halani dousanta? Ibagas
na lansei do hita mamakei panorang binere ni Tuhanta hubanta, atap marlambin-lambin ope
panorang on pakeionta laho mangayaki, manjalo idop ni uhur pakon haluahon na binoan ni
Tuhanta hubanta?
Sonari ma panorangni idop ni uhur ai, janah sonari ma panorang ni haluahon ai.
Domma roh Kristus Anak ni Naibata laho paluahkon hita jolma pardousa on, domma pala
matei Ia halani dousanta, janah domma puho Ia, janah domma naik Ia hu lambung ni Naibata
Bapa in laho pasirsirhon ianan banta. Halani ai roh ma hita marhiteihon panorang na dong
banta sonari, laho manjalohon idop ni uhur pakon haluahon ai. Ulang hita lansei bani
panorang na satongkin hubanta na binerehon ni Tuhanta sadokah ni goluhta on, atap na
ibagas hadakdanakon pe, ibani panorang haposoon, sonai homa age bani panorang hatuaon
pe, pardimatahon hita ma panorang on. Podas ma, pakei ma panorang in laho marayakkon
idop ni uhur ai, pakon haluahon na pinasirsir ni Tuhanta, ai sonari ma panorang ni idop ni
uhur ai, janah sonari ma panorang ni haluahon ai.
Tonggo: Ham Tuhan Jesus Kristus Tuhannami, domma tongon roh Ham laho mamboan
idop ni uhur pakon haluahonnami, halani ai Tuhan, ajari janah papangkei Ham
ma hanami na laho mamakei panorang na binere-Mu bannami laho manjalohon
haluahon ni tonduy age dagingnami. Amen.
HALELUYA NO. 130:1+6
1. Ai domma jumpah au ondolan 6. Ondolan on ma iananku,
ni tonduyhin na manogu in; sadokah au i tanoh on.
Daroh ni Jesus do manahan Sai in ma hagoluhononku
sadokah ni dokahni in. paima rotap hosahkon.
Maseda pe dunia on, Tongtong do sipujionkin
tongtong togap ondolan on. Tuhanku, Sipagoluh in.
2 Korint 6:2
PARMAHAN NA MADEAR 28 SEPTEMBER
ITANGIHON DO PANGINDOANTA
“Anjaha, anggo ibotoh hita, itangihon do hita atap aha pe na pinindonta, jadi ibotoh hita ma, na
tongon ma jumpah hita na pinindonta ai hum Bani.”
1 Johannes 5:15
Nini hata na mangkatohon: Anggo mangindo ase huntoruh tangan, artini ai: Anggo laho
marsuhutan atap laho mangindo hita hubani hasoman, na maningon humbani toruh ni uhur
ma. Ulang ma songon na mamaksa hita hubani, tapi marhitei humbani na mangelek ma hita.
Ganup do hita marsura-sura anggo laho marsuhutan hubani hasoman, andohar jumpah
hita na pinindonta. Untuk hal on bagei do cara ibahen hita l aho mangelek ase dapot hita ma
pinindonta ai. Sada contoh ididah hita: Sada anak na laho mangindo hubani bapani, pala
matektek iluh laho marsuhutan ase jumpahsi pinindoni ai.
Naha do nani age hita na laho mangindo hubani Tuhanta anggo sampai tektekan iluh
hita laho marsuhutan hubani Tuhanta? Mangindo humbani bulat ni uhur pakon toruh ni
uhurta dompak Tuhanta? Sadalan hujin anggo maronjolan hita hubani hat a ni Tuhan Jesus
bani Mateus 7:7 ai, ijai ihatahon do: “ Pindo hanima ma sai bereon-Ni do bannima, pindahi
hanima ma sai na jumpahan do hanima, hartuki hanima ma sai na bukaon-Ni do bannima.”
Ayat on gabe sada pangarapan na manggoluh hubanta das bani panorang on janah na
gabe hatengeran ni uhur hubanta anggo sintong hita laho mangkaporsayai -Si, janah roh hita
mangindo hu Bani, sai na balosan-Ni do hita. Lang mintor paulakkon-Ni hita na roh
marsuhutan hu Bani. Ai ihatahon do bani Jakobus 5:16 ai margogoh tumang do pangkorhon ni
tonggo ni halak parpintor anggo ihabujurhon. Marhiteihon ni tonggonta dalan laho mangindo
hu Bani janah ihabujurhon hita marhitei toruh ni uhurta ijai ma hita ibalosi Tuhanta bani na
pinangindonta.
Ase anggo ihatengerhon uhurta, Ia do Tuhan na boi mambere pasu-pasu janah unjah
laho mambere pasu-pasu-Ni hubanta, ijai ma jumpah hita na pinindonta hu Bani. Halani ai roh
ma hita marhasoman bulat ni uhur, janah marhiteihonni haporsayaon ibagas na martoruh ni
uhur, pindo hita ma hubani Tuhanta, tenger ma uhurta sai na jumpahan do hita. Itangihon
Naibata do tonggonta.
Tonggo: Ham Tuhan Naibata Bapanami, na marhabangsa i Nagori Atas, na roh do hanami
hu lobei-lobei-Mu laho mangindo idop ni uhur pakon haluahonnami hu Bamu.
Ibagas toruh ni uhur pakon bulat ni uhurnami do hanami roh hu Bamu, halani ai
urupi janah pargogohi Ham ma hanami. Tarimakasih ma bamu Tuhan. Amen.
HALELUYA NO. 6:8+12
8. O Naibata, Ham do bayak, 12. Sai ihirahon Ham hape
sibere hanai on; bani dunia on;
Ai Ham do na tongtong layak, Bai daging pakon tonduy pe
manumpak jolma on. itongos Ham tongtong.
PARMAHAN NA MADEAR 29 SEPTEMBER
KUASA NI JESUS
“Ase manowod anjaha marsombah ibagas goran ni Jesus sagala na i Nagori Atas pakon na i
atas tanoh on, age na i toruh ni tanoh.”
Pilippi 2:10
Ayat na marpardomuan hubani ayat on ai ma pasal na pataridahkon kuasa ni Naibata,
ai ma na tarsurat bani Mateus 28: 18, ihatahon: Domma ondos Bangku kuasa na i Nagori Atas
pakon na i tanoh on. Hunjai taridah janah boi artihononta: Sagala siparkuasa na adong i
Nagori Atas sonai pakon na adong i tanoh on domma ondos hubani Tuhan Jesus Kristus. Pakon
pondok hatahonon sagala hagogohon na adong i dunia on sonai pakon na i Nagori Atas
domma ipatunduk Tuhan Jesus Kristus marhitei panghopkopon-Ni.
Sonai homa ipadomu hita hubani ayat na iatas ayatta sadari on (7-9), ijai ihatahon do:
Ipalumei do diri-Ni, gabe ipakei rupa jabolon; ilayakkon do Bani sada goran na mangatasi
sagala goran.
Humbani ayat-ayat na iatas in, domma tangkas ipatugah ise do Jesus sasintongni banta.
Domma ipagijang Naibata Ia, marhitei parpuhoon-Ni, naik hu surga janah hundul i siamun ni
Naibata Bapa in, na manggomgomi sagala na adong. Ase marhiteihonni in ihatahon do
hubanta: Ase manowod janah marsombah hu Bani do haganup na i Nagori Atas pakon na i atas
tanoh on ronsi na i toruh ni tanoh. Tangkas hunjin lang adong kesempatan banta, laho
marsombah bani kuasa hagogohon na legan na adong i tanoh on, halani domma ondos
haganupan hubani Tuhanta Jesus. Halani ai patut homa akuhononta, ia hagogohon na i tanoh
on lang sadiha in marimbang hagogohon ni Naibata. Anggo sonai lang adong dalih-dalih banta
atap pe alasan-alasan ase martenger ni uhur hubani na i dunia on hita.
Domu hujin porlu ma homa pareksaonta uhur pakon hadirion bani goluhta ronsi
keyakinan humbani na dob in, atap hubani ise do hita marhatengeran. Tapi hata on paingatkon
hita, lang adong na legan sobalikkon ni Jesus na gabe sisombahon janah sibalosanta sadokah
na mangirikkon-Si. Ai Ia do Raja ni sagala raja janah Tuhan ni sagala tuan. Janah ihatahon do
homa: Ia Jesus Kristus sonai nantuari sonai sadari on, sonai do ronsi sadokah ni dokahni
(Heber 13:8). Halani ai Tuhan in ma na gabe sisombahonta janah sibalosanta, ai Ia do
siparkuasa ronsi simada hagogohon ronsi sadokah ni dokahni.
Tonggo: Ham Tuhan Jesus Kristus Tuhannami, Ham do tongon simada kuasa pakon
hagogohon ronsi sadokah ni dokahni. Halani ai Tuhan, sai pargogohi Ham ma
hanami marhiteihon tonduy-Mu. Ase gok hu Bamu hanami tongtong martenger
ni uhur, janah Ham tongon gabe siunsagahkononnami. Amen.
HALELUYA NO. 79:1+7
1. Jesus Kristus in do Raja, 7. Dihut au sihol marsombah,
ipabangkit Naibatanta. sol marolob bai Tuhanta.
Manggomgomi hajojor, Lao mamuji Jesus in,
Manggomgomi hajojor Lao mamuji Jesus in.
Janah ganup hajolmaon Jesus Kristus in do Raja,
ningon Bani do mar Tuhan. ningon tunduk ganup hita
Iakuhon in botul. Mangirikkon Raja in,
Iakuhon in botul. Mangirikkon Raja in.
PARMAHAN NA MADEAR 30 SEPTEMBER
HUJA DO TUJUAN NI GOLUHMU?
“Nasiam sanina, lape huhira, na dob jumpah ahu ai, tapi on do tene: Huhalupahon do na i
pudingku, huparayak na i lobeihu.”
Pilippi 3:13
Humbani na sempurna i tanoh on, bani goluh pardagingon, lape ai na gabe ukuran na
dear pardomuan i lobei ni Tuhan Naibata na mangirikkon Tuhan Jesus.
Apostel Paulus mangkatahon: Porini pe dong do namin sipangunsagahonkon ibagas
daging, anjaha adong halak na legan na mangagan adong sipangunsagahon ibagas daging, ahu
buenan (Pil. 3:4) janah ayat 7 ai ihatahon: Paruntungan hinan pe bangku harugion do ia
huhira halani Kristus. Artini: Pengalaman, sinadongan, jabatan pakon na legan, aha pe lape ai
anggo bani na mangirikkon Tuhan Jesus. Hatahonon ma tene, aha pe lape haganupan na
hinorjahon na dob in, ase marimbang na sihol sijaloanta bani ujungni, ai ma haluahon pakon
hagoluhan na sadokah ni dokahni. Ase anggo na laho marayakkon Kristus in, atap pe na laho
mangirikkon Tuhan Jesus iparnalang ma dirini. Itadingkon do na i pudini, iparayak na ilobei ni
ai ma hamonangan na humbani Tuhanta Jesus Kristus, haluahon sisadokahni -dokahni.
Sadalan hujai, boi hatahononta, ia goluh ni halak Kristen na mangirikkon Tuhanta
Jesus, tarpausih do ai hubani sada perlombaan na sanggah i tongah dalan na laho marayak
hubani garis finish. Ijai ma jumpah hamonangan na dob pinasirsir hinan. Age goluh ni halak
Kristen mangkaporsayai Tuhan Jesus Kristus, dong siparayakon atap pe tekad bulat na laho
mandapotkon hamonangan ai. Ai ma ianan malas ni uhur i lambung ni Tuhanta. Ase ulang
mintor puas uhurta bani na adong sonari ai, tapi sihol ma parayakonta arta na so ra maseda ai.
Pakon pondok hatahonon ibagas pardalanan ni goluh ni hita halak Kristen dong do sada
situjuan na tertentu, ai ma ase marhasadaon hita ibagas Kristen marhitei holong na hum Bani
sandiri. Atap pe hasangapon, habayakon pakon jabatan na dong sonari ibanta aha pe lape ai
huhira ninta, ase hasangapon na sihol jaloonta hum Bani. Lang boi gap bani hasangapon ai
hita, lang boi gab bani habayakon ai hita, lang gap bani jabatan ai hita, tapi sidearan parayak
hita hasangapon i lambung ni Tuhanta, habayakon bani arta na humbani arta na so ra buruk,
ai do siparayakonta laho mangirikkon Kristus. Ase anggo domma dong sonin ai ma na saud
jumpahan haluahon pakon hagoluhan janah ai ma na saud das hubani garis finish, ai ma i
lambung ni Tuhanta simagira.
Tonggo: Ham Tuhan Naibata Bapanami, sai pargogohi Ham ma hanami bani pardalanan
ni pargoluhannami ari-ari na laho mangirikkon Ham, ase ulang sonto gap bani
na i tanoh on hansa uhurnami. Tapi sihol ma tong ibagas malas ni uhur hanami
laho marayak Ham marhitei na dob binere-Mu hubannami. Amen.
HALELUYA NO. 333:1-2
1. Hu surga do tujuankin 2. Seng sonang au bai goluhkon,
sai tong masihol uhurhin, bai tanoh partangisan on,
bai na roh au hu lobei-Mu, sai dompak Ham do uhurhon,
patenger Ham ma uhurhin. ase boi sonang au tongtong.
O Tuhan togu tonduyhin, O Tuhan togu tonduyhin,
bai na sonang i lambung-Mu, bai na sonang i lambung-Mu,
ai sai masihol uhurhin ai sai masihol uhurhin,
hu surga bai ianan-Mu. hu surga bai ianan-Mu.
