PARMAHAN NA MADEAR 1 AGUSTUS
MONANG DO HITA
“Tapi ibagas haganupan ai monang do hita halani na mangkaholongi hita ai.”
Rom 8:37
Monang ai ma sura-sura na madear. Sonaha do ase jumpah hamonangan? Marusaha do
na marsikolah ase monang ia ujian, ai ma marhitei na rajin marlajar ase pandai ia bani
parlajaran ni. Torik janah borat do usaha ai. Ase na lang maringgas marlajar talu do bani ujian.
Bani ganup perjuangan maningon ipatuhi do aturan permainan. Ase hamonangan ai do na gabe
tujuan ni parjuangan.
Usih hunjai do goluh ha-Kristenonta berjuang manlawan hagogohon ni sibolis pakon
hamateian. Hubani sagala bidang do munsuhta ai menyerang janah bani ganup panorang do ia
marbois gogoh laho mangagou hita humbani holong ni Kristus. Halak na talu ibahen sibolis
pakon dousa, huhamateian ma ujung ni goluhni lang dihut marsimada bani haluahon na
pinasirsir ni Tuhanta parholong in.
Seng na boi italuhon hita munsuh ai marhitei gogoh, hapandeionta, pingkiranta, halani
hita jolma domma madabuh hubagas dousa. Anggo humbani hadirionta aha pe lang na
tarpangajamkon hita laho mandapotkon hamonangan. Ai na talu janah hu hamateian hinan
mando jolma in. Tapi halani holongni Naibata Bapa na marsuruh Anak-Ni sisada-sada in
hudunia on manghopkop hita, na manaluhon dousa, pakon hamateian, boi hita gabe monang. Ai
seng do na boi manaluhon dousa pakon hamateian, sobalikkon ni Kristus. Jadi pitah kuasa ni
Kristus do hansa na pamonang hita. Hamonanganta atap haluahonta sedo halani jasa atap aha
na binahenta, tapi halani holong ni Kristus tumang do.
Totap ma hita marhaporsayaon bani holong ni Tuhan parmonang in ase monang hita.
Tonggo: Tarima kasih ma bamu Tuhan, ai Ham do siparholong bennami, Ham do na
pamonangkon hanami. Pargogohi Ham ma hanami sadokah goluhnami ase
tongtong martenger ni uhur Bamu. Amen.
HALELUYA NO. 114:1+3
1.Gopas parugas nima
ganupan balani,
Tuhanta Jesus Kristus
Hu parmusuhan in.
Ai seng tarbahen lang monang
manlawan ma lah ho;
ai munsuhni Tuhanta
maningon talu do
3.Seng dong tarpangajamkon
pargogoh diri da.
Ai seng dong in margagan
anggo bai Naibata
Ai sihol bereon-Ni
do bam sinjata-Niin;
Ai seng tarbahen lang talu
munsuhmu bahenon-Niin.
PARMAHAN NA MADEAR 2 AGUSTUS
NA LAHO SALPU
“Anjaha na laho salpu do dunia on ampa rosuh-rosuhni. Tapi sihorjahonon rosuhni
Naibata totap do ronsi sadokahni-dokahni.”
1 Johannes 1:27
Dunia on ampakon isini haganupan na laho salpu do. Seng adong na totap i tanoh
in. Dunia ampa rosuh-rosuh parsatongkinan do in. Ganup na ihinarosuhkan daging, mata
sonai na mangejengkon haadongan ai ma na roh humbani dunia on, na laho salpu do,
halani sedo na humbani Naibata Bapa in ai.
Aha do na so ra salpu? Teks ni ambilan on mangkatahon si horjahon rosuhni
Naibata totap do ronsi sadokah ni dokah ni. Hata in paingatkon hita ase ulang hita
holongan bani dunia on, age bani na ibagas dunia on. Halani bani halak na mangkaholongi
dunia on seng dong bani holong ni uhur ni Bapa in. Hata on mangindohon hubanta ase
ulang hita irajai na laho salpu in. Tapi ningon hita do manrajai. Itompa Naibata jolma dob
ai ibere do tugas hubani manrajai na dong in. Sedo na ulang ipakei janah ihaporluhon hita
na dong itanoh on, tapi ulang ma impolan atap gap bani na i dunia on hansa hita. Ai halak
na holongan bani dunia on gabe sirang do ia humbani holong ni uhur ni Bapa in. Patut ma
na ibabou ai paruhuron hita, na rotap ronsi sadokah ni dokahni, ulang ma na idunia on
tumang. Gabe sihorjahon hata in ma hita ai do rosuh ni uhur ni Naibata, ai ma marhitei na
mambahen na madear atap na marsibere-bere. Margoluh na totap ibagas haporsayaon,
pangarapan ampa haholongan.
Ibagas na mangkorjahon harosuhni Naibata hita ijai do margoluh na sonang,
mangahapkon pasu-pasu ni Tuhan bani goluhta, ia Tuhan in sandiri do sumber
hagoluhanta. Sai marsijoloman bani hata pakon harosuh ni Naibata ma hita ase totap ma
hita ronsi sadokah ni dokahni.
Tonggo: Ham Tuhan Naibata Bapanami, pasorap Ham ma hata pakon harosuh-Mu
hu bannami marhitei Tonduy Napansing. Ase ulang na i dunia on hansa na
iparuhurhon hanami, tapi ase sihorjahon harosuh-Mu ma hanami. Amen.
HALELUYA NO. 108:7+12
7.Ulang sai kawah-kawahkon
arta na i tanoh on;
Jaga uhurmin, tamparhon
uhur na itanoh on.
12.Dirimin do munsuhnima,
pakon sipangagou in.
Anggo hagoluhannima,
in ma Tuhan Jesus in.
PARMAHAN NA MADEAR 3 AGUSTUS
IPARGOGOHI TUHAN
“Haganup do tarhorjahon ahu marhiteihon Ia na margogohi ahu.”
Pilippi 4:13
Gati do jolma marpandapot bani kesuksesanni ai ma halani na binahenni sandiri,
halani gogohni, halani pandeini, hinoriskon ni hadogasni. Anjaha dong na deba
marpandapot ai ma halani nasib atap suratan ni tanganni, pakon na legan.
Sonaha do pingkiranta bani ganup na tarhorjahon hita? Pardiateihon hita ma lobei
pangakuan ni Apostel Paulus bani goluhni. Anggo si Paulus bani parbalanjaan ari-ari ai
ma mangkamalashon na adong. Sipata ai marhahurangan, sipata marlobih-lobih. Ibagas
na loheian ronsi mangarou sitaronon. Tapi age sonai ia lang pala gobir, lang ra mandolei
atap putus asa. Domma iguruhon manaron ibagas panaronon. Goluh ibagas balanja na
hurang atap na marlobih-lobih domma ialami. Sanggah na marhahurangan pe ai, anggo
horjani totap do idalankon mambahen harosuhni Tuhan ai ma pararatkon Ambilan na
Madear in. Sura-sura ni Apostel Paulus ase bahat jolma maluah janah mananda
hasintongan na humbani Naibata. Ganup na hinahorjahonni na sukses ai iahapkon sedo
marhitei hadirionni sandiri atap halani suratan ni tanganni. Tapi tarhorjahonsi pe ai
halani na ipargogohi Tuhan do ia. Pasu-pasu ni Tuhan do haganupan ai. Kristus do
manggoluh ibagas hadirionni
Goluh ni si Paulus on ma na gabe sitiruon banta, ase tahan hita mangkorjahon
horja harosuh ni Tuhan. Tuhan do sipangunsagahkon. Ai hum Bani do hagogohan ronsi
goluhta. Horjanta pakon na dong banta sedo hasil ni usahanta tumang ai, tapi marhitei na
ipargogohi Tuhan do hita ase dapot janah adong ai.
Tonggo: Pargogohi Ham ma hanami Tuhan ibagas horjanami, ai Ham do sibere
goluhnami. Sai ulang ma hanami mangunsanggah bani hadironnami. Amen.
HALELUYA NO. 160:1+4
1. Rapkon Tuhan Jesus in
pungkah lahoanmu.
Ningon bani Tuhan in
tong parguruanmu.
Jesus baen hasomanmin,
puho ampa modom,
dogei ma bokas-Ni in,
Tuhanmin panalom.
4. Huondoshon ma tongon
haganup langkahku,
bai Tuhanku, na tongtong
ibagas uhurhu.
Atap aha pe hubaen
Ham huunsagahkon.
Saud ma hubahen Ham Tuhan
haganupan. Amen!
PARMAHAN NA MADEAR 4 AGUSTUS
PORSAYA DO HAM?
“Seng siuhumon na porsaya Bani, tapi na so porsaya domma hona uhum, halani lang
porsaya ia bani goran ni Anak sasada ni Naibata.”
Johannes 3:18
Haporsayaon ai ma tenger ni uhur bani siarapkonon, anjaha na mambahen torang
pasal na so niidah. Haporsayaon bani Tuhan ai ma na roh humbani Tuhan marhitei na
mambogei hata-Ni.
Na porsaya tenger do uhurni bani Naibata, marpangarapan bani Naibata, na gok
holong mambere hagoluhan bani jolma.
Si Nikodemus pangintuai ni Jahudi ai lang porsaya bani hata ni Jesus na
mangkatahon: Anggo seng tubuh halak paduahalihon, seng tarbahensi mangindah
Harajaon ni Naibata. Tubuh Paduahalihon ai ma: Tardidi hubagas goran ni Naibata
Sitolusada. Masuk hubagas parmatei ni Tuhan Jesus janah manggoluh marhitei parpuhoNi.
Dousa do na so porsaya bani Naibata na dob roh hu dunia on ibagas Jesus Kristus.
Na manulak Anak sasada ni Naibata, ai ma na so ra maluah tapi lalab totap bani uhuman.
Na so porsaya lang manjalo hata ni Tuhan, manulak tangan ni Naibata, manulak silayaklayak
na sihol bereon ni Naibata. Na so porsaya mararti manulak haluahon na pinasirsir
ni Naibata ibagas Jesus Kristus, tapi totap ibagas hagolapan na marujung hubani uhuman.
Ase halani na so porsaya, seng tarbahen harosuh ia bani Naibata, ai na so mambalosi anak
in, seng idahon ni ai hagoluhan, tapi ringis ni Naibata do totap bani.
Ayat na iatas in mangkatahon “Seng siuhumon na porsaya, tapi na so porsaya hona
uhum.” Sungkun-sungkun sonari: Porsaya do ham? Marhitei haporsayaon do hita maluah
ronsi das hubani hagoluhan na manongtong in. Haporsayaonta do na paluahkon juta.
Tonggo: Patotap Ham ma uhur pakon pingkirannami Tuhan marhaporsayaon hu
Bamu, ase ulang hona uhum hanami. Amen.
HALELUYA NO. 124:4-5
4. Haporsayai ma Hata in,
ai in do haluahon.
Arapkon Tuhan Jesus in,
Daroh-Ni in ma jolom.
Age gok dousa uhurmin,
maluah do bahenon-Niin.
Tongon, tongon,
maluah baen-Ni in.
5. Sonaha uhurmu ijin?
Sai rap ma masuk hita.
Bai pesta parunjukon in,
bai na sonang magira.
Na puji ma Tuhanta in
na marholong ni atei in.
Tongtong, tongtong.
holong atei-Ni in.
PARMAHAN NA MADEAR 5 AGUSTUS
HALUHAON NA DOB SIRSIR
“Iramotkon do hita hinorhonni gogoh ni Naibata, marhitei haporsayaon, ase das hita hu
haluahon na dob sirsir sipatalaron bani panorang parpudi.”
1 Petrus 1:5
Haluahon na dob sirsir ai do siteanonta, na so ra maseda, na so martikkas na so ra
melus na sinimpan banta i Nagori Atas. Silayak-layak ni Naibata do haluahon ai bani na
porsaya. Ase das hita hu haluahon ai, tong do homani marhitei panramotion ni Naibata,
hagogohon ni Tuhan do hansa na boi manramotkon hita. Goluhni halak Kristen in sadokah
i tanoh on gok paruntolon, parlajouan laho pasedahon haporsayaonta. Bani ganup na
masa, na roh mandorap hita iramoti Naibata do hita ase ulang hatadingan, kahou i tongah
dalan, tapi ase totap dompak tujuan siparayakonta ai. Haluahon ai lape talar bani
panorang on, tapi patalaron ni Tuhan do ai bani panorang parpudi ai ma bani parroh ni
Tuhan Jesus na paduahalihon. Haporsayaonta do na gabe jaminan ni ai banta na boi
mambahen hot tenger ni uhurta bani bagah-bagah ni Tuhan in.
Naibata do na mamilih hita gabe bangsaNi na laho manjalo haluahon ai. Ia do homa
na manjamin kuriaNi idunia on ase tahan das hu ujung janah totap marhadason marsaksi
pakon mangidangi. Iramothon hagogohon ni Tuhanta in do hita pagorini pataridahkon
haluahon ai, ase hagoluhkon hita ma paboa hita na dob maluah humbani sonari ronsi
sadokahni dokahni.
Payah ai tungkis tumang do dalan ai, tapi porsaya ma hita ipargogohi Tuhan do
hita mamontas hunjai ase das ganup hubani haluahon na dob sirsir ibahen Tuhanta.
Tonggo: Ramoti anjaha pargogohi Ham ma hanami Tuhan marhitei haporsayaon,
ase das hanami bani haluahon na pinasirsir-Mu in. Amen.
HALELUYA NO. 177:6-7
6. Halani ai jagai Ham
au das bani paruhuman,
sai Ham ma paluahkon au
ampakon ni Hasoman!
Ham ma pujian nami bei,
dob das hujin hanami bei,
i surga hasonangan.
7. O Jesus dokahniin hape
Ari-Mu paimaon;
Mabiar hanai on ope
ibahen sitaronon.
Sai roh ma Ham, sai roh tongon,
paluah Ham hanai on
humbai ganup pangagou!
PARMAHAN NA MADEAR 6 AGUSTUS
HOLONG BANI NAIBATA
“Ai on do holong ni uhur bai Naibata, anggo idalankon hita Titah-Ni, anjaha seng borat
Titah-Ni in.”
1 Johannes 5:3
Holong ai ma salah sada humbani inti pokok utama pangajaran 1 Johannes on.
Hata holong in dong do 18 hali muncul bani na 5 bindu buku in. Johannes mangidah titik
tolak utama holong in, ai ma na marsumber atap na inyatahon Naibata ibagas Jesus
Kristus bani na manghopkop, mangkaholongi jolma pardousa laho paluahkon hita
humbani munsuh pakon gomgoman ni sibolis in. Domu hunjai do ambilan on
mangindohon hubanta, ase hita pe patut marholong dompak Naibata.
Sasintongni boi do irumushon holongta bani Naibata, ai ma anggo maronjolan, taat
ibagas Hata pakon Titah-Ni. Bani ayat on ipatorang do lobih tangkas, bahasa hita
manggoluh, marholong dompak Naibata anggo idalankon, ihorjahon hita Titah-Ni.
Namararti do holong in na maningon pataridahkon do marhitei parlahou,
pambahenan ronsi pangkorjahon. Hunjin do tandaon na dob ihaholongi hita Ia. Ase porini
dong hita na mangkatahon, huhalongi anjaha porsaya do ahu bani Naibata, tapi anggo
lang ihorjahon Titah-Ni, parladung do ia ai, anjaha lang dong hasintongan ibagas ia. Tapi
na manramotkon Hata-Ni, na dob tongon ma na gok holong ni Naibata ibagas dirini.
Hunjin ma tandaonta na dob ibagas Ia hita atap marholong ni uhur bani Naibata.
Ase, holong ai do homa na gabe penggerak, pangikat laho mambobanhon
ketaatanta bani na mandalankon rosuh-Ni gabe lang borat Titah-Ni. Songon sada halak
dompak na hinaholonganni idalankon anjaha ihorjahon age pe sonaha si dompakkon ni
laho mambahen malas ni uhur ni nahinaholonganni ai. Naibata in sandiri marhitei
holong-Ni do ibagas Jesus Kristus laho mangkophop hita jolma pardousa, ronsi
mandompakkon sagala parsalisihan pakon sagala kuasa-kuasa ni dousa.
Halani ai horjahon janah dalankon hita ma rosuh-Ni atap Titah-Ni tanda ni
holongta dompak Naibata, marhitei goluh na sonai ai do inikmati hita sonaha hinamantin
ni pasu pasu pakon haluahon na pinasirsir ni Tuhanta banta.
Ai lang ipaporsanhon Naibata hubanta lobih humbani gogohta. Ihasomani anjaha
ipargogohi do hita tongtong janah domma ondos hu Bani sagala na borat in, ase
manggoluh ampa marholong ma ibagas Ia.
Tonggo: Ham Tuhan Jesus Kristus, puji-pujian pakon tarimakasih do isombahkon
hanami hu Bamu. Sai holong pakon Titah-Mu ma na gabe hagoluhan nami.
Pargogohi janah hasomani Ham ma hanami laho mangkorjahon in marhitei
Tonduy Napansing. Amen.
HALELUYA NO. 343:1+4
1.Banggal tumang do holong-Mu,
Pabayu goluhkon
na doyuk kahou magou au,
hape maluah do.
4.Hujolom padan na toguh,
in ma Hata-Niin,
ai Tuhan in do gogohkin
na hot sadokahniin.
PARMAHAN NA MADEAR 7 AGUSTUS
GINOMPARNI SI ABRAHAM
“Tapi anggo Kristus simada nasiam, Ginopparni si Abraham do nasiam, anjaha panean
mangihutkon bagah-bagah in.”
Galatia 3:29
Dong do tolu pahara na sihol parimbashononta ibagas ayat sadarion na
marpardomuan na sada na legan.
Ai ma: 1. Kristus simada nasiam
2.Ginoppar ni si Abraham
3.Panean mangihutkon bagah-bagah.
Pungkahonta mamareksa na tolu on mulai humbani bagian na parpudi. Ase boi
hita gabe panean mangihutkon bagah-bagah, ai ma haluahon na dob pinasirsir ni Tuhanta,
maningon do gabe ginomparni si Abraham. Aha do artini hata on? “Ginomparni si
Abraham” dos do artini pakon “na porsaya.” Sedo partuturan mangihutkon pardagingon.
Haporsayaon do na gabe ukuranni atap na dob tarmasuk hita bani ginompar ni si
Abraham atap lape. Torang do isobut Apostel Paulus ai i lobei ni ayat ayat on: “…. halak na
porsaya, ai do anak ni si Abraham.” (Ayat 7)
Artini haporsayaon ijon ai ma anggo domma “Kristus simada hita.” Taridah do ai
marhitei na dob tardidi hita hubagas Kristus. Ia do na dob manobus hita humbani
parjabolonan ni dousa, na dob manghopkop hita marhitei silang-Ni. Halani ai do ase boi
dihut gabe panean bani haluahon, hatuahon pakon hagoluhan sisadokahni-dokahni.
Ase seng tarsirang hita na tolu pahara nongkan ai.
Anggo lang Kristus simada hita, tontu lang be homa goranon hita ginomparni si
Abraham janah pasti homa lang be dihut hita gabe panean ibagas Harajaon ni Naibata.
Tontu lang marosuh hita lang dihut manean bagah-bagah ni Tuhanta. Halani ai totap ma
hita ibagas haporsayaon janah Kristus na tongtong simada hita. Ulang be dong
huntongah-tongahta na ra itogu-togu na legan manadingkon Kristus Tuhanta in.
Tonggo: Tarimakasih ma bamu Jesus Kristus, simada hanami, halani marhiteihon ni
panghopkopon-Mu boi dihut hanami gabe panean bani bagah-bagah-Mu ai
ma haluahon pakon Harajaon-Mu. Amen.
HALELUYA NO. 102:1-2
1.Ham tongtong ihutkononku
Jesus sipagoluh ahu.
Seng anjai tadingkononku
Ham na paluahkon ahu.
Humbai haganup dousangku
pakon humbai uhum in
na tongtong habiaronku
ibaen pardousaonkin.
2.Ai ija ma jumpah ahu
sada Tuhan songon Ham.
Na manogu-nogu ahu
bai na sonang songon Ham.
Na manaron hamateian
lao manghopkop tonduy hin
Ase masuk au manean
ugas sisurungan in.
PARMAHAN NA MADEAR 8 AGUSTUS
DILO DILO HU HASONANGAN
“Roh ma nasiam hu Bangku, nasiam na loja anjaha na boratan, ase Hupasonang nasiam.”
Mateus 11:28
Bahat tumang do parsaranan na pinadear ni jolma martujuan hubani haporluan ni
jolma anjaha marhiteihon ni ai boi ma marhasonangan jolma in, atap pahosahkon. Bani
masyarakat na i huta buei do goran-goran na itempat na tertentu na gabe parsaranan
anjaha bani masyarakat na ikota jongjong do bunglow, pasanggarahan.
Tuhan Jesus pe ididah do haporluan ni hita jolma. Ibotoh do sonaha hita jolma
ibagas pardalananni goluhta na gatian loja pakon boratan, anjaha iarusi do na so mungkin
do usaha-usaha ni hita jolma laho pasonangkan dirinta. Ai dos do hasonangan na
binerehon ni hita jolma songon poyon poyon na ra melus atap sada bangunan na jenges
hape hadobanni buruk atap maseda. Holong do uhurni Tuhan Jesus mangidah hita jolma,
mambahen turun tangan Ia, idilo hita jolma hubani parsaranan na gok hasonangan
Tuhan Jesus do parsaranan ai, anjaha cara mangayaki parsaranan ai ibagas diri-Ni
ai ma marhitei haporsayaon, marondos, mangaku, jadi parsaranan na pinasirsirni Tuhan
in marbeda tumang do na humbani itanoh on. Mangayaki anjaha marsaran bani Jesus
mararti mambongkar dousa na palojahon pakon na paboratkon anjaha na mangisi goluh
na baru na pasonangkon. Marsaran humbani Tuhan Jesus aktif do ai janah aktifitas na
jenges songon na binahen ni Tuhan, in ma hasonangan banta.
Roh dilo-dilo ni Tuhanta ase masuk hita hubani hasonangan na dob dong Bani. Iberehon
ari parsaranan banta ipodahi do hita mangihutkon na masa na roh hubanta, anjaha sir-sir
do Ia manjalo pakon pasonangkon sagala halak na roh hu Bani. Ase anggo loja anjaha
ngayotan hita, hubani Tuhan Jesus ma roh ai pasonangon-Ni do hita, Tuhan Jesus do
parsaranan na gok hasonangan.
Tonggo: Tarimakasih ma bamu Ham Tuhan Jesus, halani idilo Ham hanami hubani
na sonang. Holong-Mu mangidah hanami do in ase ra Ham pasirsirhon
ianan bennami age lape sangkan panandaion nami hu Bamu. Halani ai togu
Ham ma tonduynami marhitei Tonduy-Mu, ase saud sura-sura-Mu anjaha
marsaran hanami bani hasonangan na gok na hum Bamu. Amen.
HALELUYA NO. 495:1+3
1.Roh ma ham na loja na ngayotan,
na mamorsa silang in.
Jalo ma Tonduy Sipangurupi,
ulih si pasung gogoh in.
Tonduy Napansing mambere
gogoh, lao mangkorjahon hatani
Tuhan in. Ulang magang, ulang
sangsi, jolom ma poltik ulihta in.
3.Roh ma na loja na ngayotan,
binahen horja in.
Jalo ma Tuhanta Siparmonang,
ase ipasonang Ham ijin.
Ipasirsir do haluahonta,
na dob itobus hita humbai dousa in.
Ulang magang ulang sangsi,
jolom ma poltik ulihta in.
PARMAHAN NA MADEAR 9 AGUSTUS
JESUS DO HATENGERAN NI UHUR
“Halani ai, na marsitaronon halani rosuhni Naibata, iondoshon ma tonduyni hubani
Sipanompa hatengeran in, marhitei na mangkorjahon na madear.”
1 Petrus 4:19
Bani halak na so porsaya bani Tuhan Jesus, anggo igoranni ma pasal sitaronon atap
pusok ni uhur mintor jangin do pangahapni. Mintor lang adong be gunani iahapkon na
manggoluh on. Hotop mintor putus asa, anjaha mambuat sada haputusan na negatif.
Tapi bani halak Kristen anggo roh sitaronon, sedo hape sihabiaron, tapi na
maningon si jaloon ibagas na martenger ni uhur dompak Naibata. Apalagi sitaronon
halani na pararatkon Harajaon ni Naibata patut do homa sihamalashonon ni uhur.
Bani panorang on buei tumang sitaronon banta na laho mangkorjahon harosuhni
Tuhan i tongah-tongah ni dunia on. Gati songon na bimbang hita bani sagala sitaronon.
Tapi tong ma hita marondos dompak Naibata, sedo ibagas malas ni uhur tumang, tapi
dihut do age i bagas sitaronon.
Ulang pala sangsi hita bani sitaronon anggo na laho mangkorjahon rosuh ni uhur
ni Tuhanta do. Ai domma idokdok hita humbani sitaronon na borat, ai ma marhitei na
gantung Ia i Dolog Golgata bani hayu parsilang laho paluahkon hita humbani hamateian.
Halani ai patut do ganup jolma in, gabe sada halak na marsaksi ibagas tenger ni uhur
dompak Naibata. Memang anggo adong tenger ni uhur, lang pala mabiar be aga aha na
laho mandorab diri.
Ibagas na martenger ni uhur dompak Naibata, na maningon taridah do buahni ai
ma mangkorjahon na madear, marhiteihon goluhta si ganup ari.
Tonggo: Urupi Ham hanami Tuhan ase tongtong hanami martenger ni uhur hu
Bamu, age aha pe namasa na lago mandorab hanami. Amen.
HALELUYA NO. 72:1+4
1.Jesus hatengerankin,
Ham do Tuhan na manggoluh.
In hubotoh halanin,
hupasabou ma uhurhu.
‘Ge tarsosak uhurhin,
mangkirahon ajalhin.
4.Daging ahu! Halanin
ningon gabe orbuk ahu.
Hansi pe hubotoh in,
seng be pala rusak ahu.
Ningon suang hosahkin
ipaulak Jesus in.
PARMAHAN NA MADEAR 10 AGUSTUS
JESUS DO PANONDANG
“Na marsinondang do panondang in ibagas na golap, tapi seng ijalo na golap in.”
Johannes 1:5
Anggo golap ma ari mintor tarolos do hita laho pagarahon palita ase siang
irumahta sandiri. Ipasang honsi palita ai mintor lihar do pangonggor age paruhuronta pe.
Sonai do age laho mardalan hita bani golap ni ari, porlu do banta panondang. Anggo
domma dong panondang ai, lang pala haru atap dadap-dadap hita bani pardalananta.
Dob honsi itompa Naibata jolma na parlobei in, inahkon ma ia i Pohon Eden, ibagas
haliharon. Halani godaan ni dunia on gabe madabuh ma ia hubagas dousa ai ma lombang
hagolapan. Lang adong be pardomuanni jolma pakon Naibata. Sonai ma hotop goluhta
mardalan ibagas na golap. Jesus patugahkon: Ahu do panondang dunia on, na laho
manondangi sagala hagolapan. Ase ulang jolma in manggoluh ibagas na golap tapi ase
manggoluh ibagas na lihar. Tapi buei do jolma lang manjalo panondang in, anjaha hotop
ma age hita, panggoda ni dunia on na mambahen hita lupa bani Tuhanta. Anjaha
marhiteihon ni ai gati ma hita mardalan ibagas na golap, age mangkadabuh janah tartolsu
hita lang sadar ope.
Jesus manokanhon ijon ase hita ibagas Ia, paliharhon hita ilobei -lobeini Bapa na i
Nagori Atas ai. Goluhta on bahen hita ma na gabe panondang ni dunia on. Ase marhiteihon
ni goluhta, gabe lihar age paruhuran ni hasoman na legan.
Jalo hita ma Ia ibagas goluhta siganup ari, baik marhorja i juma, i kantor, atap ija
pe. Jesus ma bahen hita rigapan, ase ulang tartolsu hita, ase tongtong hita manggoluh
ibagas harosuh ni Tuhanta.
Tonggo: Ham Tuhan Naibata, bahen Ham ma goluhnami on gabe panondang i dunia
on, na laho manondangkon sinondang na hum Bamu, ase rap marolob-olob
hanami jolma na i dunia on hu Bamu. Amen.
HALELUYA NO. 17:2-3
2. Golap uhurnami on,
nin homa pambotohnami,
Anggo seng Tonduy-Mu in,
paliharhon uhurnami.
Ningon Ham do patureihon
dalan sidogeionnami.
3. Sondang humbai Naibata,
haliharon roh hun datas;
Baen torsa, sondangi
ma uhurnami. ase megah.
Lao manjalo hagoluhan,
Pinasirsir-Mu o Tuhan.
PARMAHAN NA MADEAR 11 AGUSTUS
MARPARLAHOU IBAGAS NA LIHAR PAKON HASINTONGAN
“Anggo ihatahon hita, domma saor hita hu Bani, hape mardalan hita ibagas na golap,
parladung do hita ai, anjaha seng ihorjahon hita hasintongan in.”
1 Johannes 1:6
Ayat on patugahkon ia Naibata na marmulia in sihol pataridahkon hubani dunia
on, na gok hagolapan ia Naibata ai ma Panondang na sintong anjaha na singkap. Domu
bani hasintongan ni Naibata, ajaran-Ni pakon parentah-Ni maningon sonai do homa.
Anjaha malas ni uhur na gok ni Naibata tarbahen sirang humbani hapansingon-Ni, halani
ai malas ni uhur na binere-Ni banta pe lang boi sirang humbani hapansingon na binereNi
hubanta. Domma iberehon Naibata Anak-Ni Jesus Kristus laho papansingkon hita
humbani dousanta marhitei parmatei-Ni i Dolog Golgata.
Pitah marhitei parmateini Tuhan do ibahen Naibata na gabe papansingkon jolma
pardousa. Lang adong dalan na legan, halani ai ma age parsaoranta pakon-Si lang adong
marhitei dalan na legan atap pe carana legan iluarni ajaran ni Naibata. Tertentu do sikapta
bani parsaoranta dompak Naibata, lang tarbahen marhitei garis-garis kebijaksanaan, lang
tarponopkon hita dousanta bani na mamasuki rumah ni Naibata.
Panondang anjaha na lihar do Naibata, halani ai lang adong na boi golapkonon i
lobei-Ni. Ipasirsir Naibata do dunia on gabe ianan patuduhkon parsaoranta pakon-Si.
Ianan na golap pakon na lihar ope dunia on, paima roh ari parpudi. Parlahounta do
pataridahkon ianan na dompak ja parsaoranta. Parlahouta na ibagas haliharon pakon
hasintongan do hansa paboa na marsaor hita pakon Naibata, na manuju hu hagoluhan si
sadokahni-dokahni.
Tonggo: Ham Tuhan Naibata! Marhiteihon ni hasintongan-Mu ampakon ni
hapansingon-Mu itotapkon Ham do parsaorannami hu Bamu. Halani ai
togu-togu Ham ma hanami marhitei Tonduy Napansing ase pitah ibagas
haliharon hanami marparlahou na gabe tandani na sintong parsaoran nami
hu Bamu. Amen.
HALELUYA NO. 449:4-5
4.Porluhon hita ma hapormanon,
in do goluh na marhaliharon.
Ase malas uhurta
tong bani goluh on,
rap kon Tuhanta i tanoh on.
5. Porluhon hita hadaulaton,
in do buah ni haporsayaon.
Ase malas uhurta
tong bani goluh on,
rapkon Tuhanta, i tanoh on
PARMAHAN NA MADEAR 12 AGUSTUS
PANANDAION BANI HOLONG NI KRISTUS
“Anjaha mananda holong ni uhur ni Kristus, na mangatasi segala pangurusion, ase das ma
bani nasiam haganup hagogok ni Naibata.”
Epesus 3:19
Pasu-pasu partonduyon do pasu-pasu sijengesan bani ganup na mangirikkon
Tuhan Jesus Kristus. Hagogohan na humbani Tonduy ni Naibata, ai ma hagogohan ni
haporsayaon mambalosi Naibata ampakon hagogohon mandalankon tugasta. Anggo
tarsurat ibagas uhurta Titah-Ni, ija marianan Tonduy-Ni, ijai do homa Ia marianan, anjaha
holong-Ni usei ijai.
Holong-Ni ipatuduh do bani ganup bangsa. Marudut do holong-Ni humbani sundut
hu sundut (humbani generasi hubani generasi) anjaha sonai do homa bagas ni holong-Ni,
laho paluahkon pardousa na dob tarbonom bani dousa sibagasan, sonai homa laho
mangangkat halak hubani ianan sigijangan ai ma laho hu surga, ianan ni malas ni uhur na
gok pakon hasangapon na gok.
Haganupan in sedo halani dear ni gabei ni jolma atap na nialop ni tuah, tapi holong
ni atei ni Tuhan Jesus Kristus do. Holong ni Jesus sedo marhiteihon ni omas barang pirak
tapi marhiteihon ni daroh-Ni sandiri do. Das hubani tetesan daroh penghabisan do
panghopkopon ni Jesus laho paluahkon jolma na dob munob ibagas dousa anjaha iangkat
hubani malas ni uhur sigijangan ai ma surga. On ma na ihatahon ni si Paulus na mangatasi
sagala pangarusion, ija taridah hagogok ni Naibata.
Pitah sada do Anak-Ni, tapi ai pe iberehon do laho mangkaholongi na tinompa-Ni.
Hape ia hita, pori pe adong pitu anakta lape tontu sirsir hita mamberehon sada sidea laho
gantih ni hinaholonganta hu hamateian, porini sonaha pe holong ni uhurta hubani.
Pardas ni pangarusion sisonin do na gabe pintu gerbang dalan hamasukon ni
Naibata pakon Tonduy-Ni hubagas dirinta ase gabe rumah ni Naibata hita, anjaha marhitei
hagogok ni Naibata ibagas dirinta gabe dapotan pasu-pasu sijengesan hita.
Tonggo: Ham Tuhan Naibata, togu-togu Ham ma hanami marhiteihon Tonduy-Mu
ase das hanami mananda holong ni Anak-Mu Jesus Kristus Tuhannami, na
gabe dalan laho mamberehon pasu-pasu bennami. Amen.
HALELUYA NO. 248:5-6
5. Tarima kasih ma uhurhu,
Bamu na manondangi au;
Hupuji Ham, ale Tuhanku,
itodoh Ham, hape au;
Megah ma tonduyhin nuan.
dob hutandai Ham.
6. Parorot Ham tongtong langkahku
bai ganup dalan na botul;
Patoguh Ham tongtong uhurhu,
lao mandalankon Hata-Mu,
O sondang na hun surga in,
sondangi uhurhin.
PARMAHAN NA MADEAR 13 AGUSTUS
KRISTUS DO SIBARITAHONONTA
“Ia do ibaritahon hanami, ipaingat anjaha iajari hanami do sagala jolma pasal sagala
hapentaron, laho pajongjongkon ganup jolma gokan dear ibagas Kristus.”
Kolosse 1:28
Tangkas do ibotoh hita paboa miduk ni jolma dapotan hasurungan humbani
Naibata ai ma na berbentuk atap pe habisukon na marbeda-beda. Halani ai marbeda-beda
do jurusan ni jolma i dunia on. Lape dong sada guru na boi sukses mangajarhon talentani
hubani sada pelajar na so adong bakatni dompak talentani guruni. Pori adong sada maha
guru na berbakat manortor lape tarajarhonsi bakatni ase ganup halak berbakat manortor,
halani lang tarbahen ganup jolma gabe ahli bani sagala bidang, halani lang dong na boi
sukses mangajarhon bakatni bani na legan. Cukup do kemampuan ni sada guru
mangajarhon ilmu na adong, bani muridni tapi halani lang cukup daya tangkapni ni murid
gabe lang tarpadipar guru on ganup na adong bani hubani na manangihonsi. Buei tumang
do jenis ni sibere-bere ipasirsir Naibata tapi setiap jolma boi manjalo ai halani marbedabeda
do daya tangkapni.
Pitas sada hansa na boi bani ganup jolma ai ma Kristus Jesus
On ma na iputushon si Paulus sipadasonni, sibaritahononni hubani ganup jolma.
Sedo pitah hubani Jahudi dihut do bani na iluar ni Jahudi ase ganup gokan dear ibagas
Kristus Jesus. Tugasta do mambahen gokan dear setiap jolma. Boi do gokan dear sada
halak anggo boi ipadas hita hubani talenta atap habisukon na binerehkonni Tuhan Jesus
in hubanta. Tapi domma tangkas taridah lang tarpadas hita anjaha lang tarjalosi. Pitah
ilmu atap habotohon pasal Jesus do na boi padasonta anjaha na boi jaloon ni sidea na gabe
alat laho mambahen gokan dear setiap jolma. Halani ai, domu halani domma dapotan hita
pasal Kristus in, padipar hita ma homa Tuhanta hubani hasoman na so manjalo ope.
Tonggo: Ham Tuhan Naibata, halani domma das bennami Kristus in, pargogohi,
parbisuki Ham ma homa hanami gabe pandiparan nii Kristus hubani na
legan. Amen.
HALELUYA NO. 16:1+3
1.Tangar ma ambilan in,
nasiam na pusok uhur,
Domma sasap utangmin,
dousa pe ganupan mambur.
Halani Holong-Ni in,
Anak ni Naibata in.
3.Tangar nasiam ganup,
ganupan na pusok uhur;
seng anjai tarbuang be,
halak na martenger uhur.
Bai Tuhanta Jesus in,
na manghopkop haganup.
PARMAHAN NA MADEAR 14 AGUSTUS
TOLU PAHARA HATARIDAHAN NI HAPORSAYAON
“Ingat nasiam ma, nasiam sanina na hinaholongan: Ganup halak, ringgas ma ia mananginangi,
asok marsahap anjaha lambat manringis.”
Jakobus 1:19
Tarbarita do Surat Jakobus na mangondolhon pambahenan atap parhorjahon. Bani
Jakobus 2:17 ihatahon: “Haporsayaon ni pe sonai do. Anggo seng dong horjani, na dob
matei do ai ibagas dirini.”
Humbani Jakobus 1:19 nongkan dong tolu parhara na ipindohon bani halak na
porsaya, ai ma:
a. Ringgas manangi-nangi
b. Asok marsahap
c. Lambat manringis.
Anggo lang tulimat hita mambasa na tolu pahara on, ra ihatahon hita songon na
bertentangan do on pakon Surat Jakobus na mangondolhon pambahenan atap
parhorjahon. Tapi lang sonai.
a. Ringgas ma manangi-nangi maksudni ase pangkei hita bai buei ni hata na
binogeita. Marhitei na ringgas manangihon buei dapot parlajaran na maharga,
pangarusion ampa pambotoh. Humbani na manangihon do tambah
haporsayaon bani Tuhan Naibata. Ase maningon secara aktip do maksudni
ijon.
b. Asok marsahap na mararti ulang urah tu hita manluarhon hata. Na dilat lobei
bibir nini umpamanta. Ulang sai maningon sahapta na tarbogei. Na porlu saud
mardalan ranggian, romban bani harosuhni Naibata.
c. Lambat manringis na berarti ulang urah tu marah. Atap pakon hata na legan
maningon dong do banta panrajaion diri, ai do tanda na marbuah haporsayaon.
Marhitei mandalankon atap sihorjahon hatani Naibata hita. Domma gabe
sidalankon atap sihorjahon hata ni Naibata hita. Domma gabe dihut hita siparambilan,
sipararat Harajaon ni Naibata, hataridahan ni haporsayaon na marpambahenan.
Tonggo: Urupi Ham ma hanami Tuhan ase ipataridahkon hanami buah ni
haporsayaon marhitei na ringgas manangi-nangi, asok marsahap janah
lambat manringis. Amen.
HALELUYA NO. 257:1-2
1. Sai martuah do marnunut,
halak na porsaya in.
In ma halak na dob surut,
humbai pardousaon in.
Na sora be mangirikkon,
tahi ni parjahat in.
Na so ra be sahundulan
ampa pangapasi in.
2. Sai marosuh do uhurni,
bani pangajaran in
Na binere ni Tuhan in
gabe sibalosan-niin;
Songon hayu na madear,
na ilambung bah hape.
Sai tabun ramos do ia,
na so bulih, melus be.
PARMAHAN NA MADEAR 15 AGUSTUS
JESUS DO PASOMBUH HORAH
“Dob ai bani ari parpudi ni pesta ai, bani matani ai jongjong ma Jesus ijai, ipagogoh ma
sora-Ni mangkatahon: Barang ise na horahan, hu Bangku ma roh ia minum.”
Johannes 7:37
Bani halak Jahudi masa do pesta lampo-lampo sahali satahun ualuh ari dokah. Bani
perta ai bagei do hujai sigalangkonon ni Kuria ai, tarmasuk ma ai galangan situtungon,
galangan sisayatan, bani ari paualuhkon anjaha ai ma na parpudi jongjong ma Jesus bani
parpestaan ai, ipagomos ma sora-Ni mangkatahon: “Barang ise horahan hu Bangku ma ia
roh minum.” Sedo horahan ni tolonan na imaksud ni Tuhan Jesus ijon, tapi horah
niparuhuran do. Halani anggo horah ni pamangan do domma ipasirsir Naibata, siinumon
ai ma bah. Tapi horah ni uhur Tonduy lang ra sombuh anggo bah do iinum.
Anggo sonai, ai aha do horah ni Tonduy? Halani buei do hisap-hisap ni jolma gabe
madabuh hubagas gomgoman ni dousa. Tapi sipata lang be na botoh si dousa, halani porlu
ni uhur laho manladeni hisap-hisap na roh hundunia on. Ai jajat do na hurang halani ai
horah-horahan ma paruhuron, ai sihol ma an, sihol homa na legan an. Dong do deba
iporluhon ase seng patut ai bani namin. Tapi anggo roh hita mambalosi tugah-tugah
pakon undangan ni Jesus, boi do ipasombuh horahni paruhuronta ai, sonai homa surasura
ai pe boi iampogi hita, lang ra be hita mangindahi na so talup banta, lang be ra hita
mamorluhon haporluanta sandiri tumang, anjaha lang be ipindahi hita pasombuh horah
bani na legan-legan in. Bah na manggoluh do mabaor humbani Jesus na boi pasombuh
horah ni paruhuran ai, ai ma na boi manasap dousa, na ra mangajari hita humbani dalan
na pintor, ase boi sonang hita manggoluh, ai lang dong be uhur biar ibagas uhur, tapi
marmalas ni uhur ma tongtong.
Gabe boi ma use mambere bah na manggoluh bani hasoman tanda ni na dob
ipasombuh Jesus horahni ai. Halani ai roh ma hita bani Jesus manjalo bah tubuh
hagoluhan ase boi hita marmalas ni uhur, ase boi homa mandipar hubanta goluh na baru
ai hubani hasomanta, age bani panorang on.
Tonggo: Ham Tuhan Jesus sumber ni malas ni uhur ampa hasonangan, ungkap Ham
ma uhurnami laho mambalosi hata-Mu ase ra hanami roh hu Bamu manjalo
bah hagoluhan na hum Bamu tarlobih bani panorang on. Amen.
HALELUYA NO. 151:1-2
1. Dong do bah tubuh dear in,
bai na mardousa in;
Jenges tumang bah tubuh in.
pasonang uhurhin.
2. Bah tubuh na mapansing in,
in ma Jesus ta in;
Isasap do siningta in,
ibuat horungkin.
PARMAHAN NA MADEAR 16 AGUSTUS
LAMBIN MARBANGGAL IBAGAS KRISTUS
“Tapi lambin marbanggal ma nasiam ibagas idop ni uhur ampa panandaion bani Tuhan
Jesus Kristus, Sipaluah in. Bani ma hasangapon sonari age sadokahni dokahni.”
2 Petrus 3:18
Sada pangindoan na mungkin anjaha na wajar do on humbani kuria. Halani ai ha-
Kristenon songon sada suan-suanan atap benda hidup do na boi makin berkembang. Lang
ibatasi olat ni jumpah perkembangani ai. Tapi saluas-luasni do. On boi tarjadi halani
onjolan ni harajaon na toguh ai ma Kristus. Sintong do hatani umpama na mangkatahon:
Menara na ginjang mamorluhon tonah na bolag, haporluan urat-urat na ganjang-ganjang
homa.
Sejarah ni Harajaon ni Naibata atap ha-Kristenonta pe sonai do. Otik do bai
mungkahni tapi tambah ari tambah do bilangni sonai homa age daerah na idung-dung
ranting-ranting bani sab dunia on. Ibagas perkembangan on pe homa jumpah do hata na
mangkatahon: Hayu na ginjang do na bahat hona logou. Gabe pangkorhon ni
perkembangan on do hona parbaru kuria in. Buei do hambatan-hambatan, tapi lambin
ihambat lambin roh bolagni, lambin roh bahatni bilanganni, tambah homa age mutuni.
Halak na dob hona uji, janah monang usih songon Tuhan Jesus Rajani kuria in. Semangat
na sonon mangojur uhurni na porsaya in laho marsuruh parambilan hu bani sab dunia
on. GKPS sandiri pe domma adong hira-hira 227.608 na gabe halak Kristen janah marunut
ope na roh. Tambah do homa parhorja pakon bagei-bagei kegiatan, halongangan do in
haganup. Haganupan on boi tarjadi halani onjolan na toguh ai do, sedo halani haSimalungunon.
Tapi halani kesadaran pakon panandaion bani idop ni uhur Tuhanta do.
Halani ai sijagaonta do ase ulang berkembang egosime. Sai lambin martambah ma roh hu
parmingguan, partonggoan, Horja Banggal Napansing, sermon pakon tumpuan-tumpuan
na iadongkon ni kuria in. Ai tanda ni na manggoluh, ai ma anggo dong taridah proses
perkembanganni. Urupan-Ni do hita asal ma hita totap maronjolan bani idop ni uhur-Ni
use lambin roh banggalni age panandaionta hubani Tuhanta.
Tonggo: Ham Tuhan Jesus Raja anjaha onjolan ni Kuria. Urupi Ham ma hanami ase
lambin marbanggal panandaion pangidangion pakon idop ni uhur bani
Bamu. Amen.
HALELUYA NO. 109:1+4
1. Batu gingging Ham tongon,
Huondoshon tonduyhon.
Burihan ni daroh-Mu,
na roh humbai lambung-Mu.
Ai paluah au do in,
humbai pardosaonkin.
4. Ai sadokah au ijon,
barang rotap hosahkon.
Lao dohor pe ajalhin;
bani paruhuman in;
Batu gingging Ham tongon,
Sai Bamu ma tonduyhon.
PARMAHAN NA MADEAR 17 AGUSTUS
TOTAP IBAGAS HOLONG NI TUHAN
“Anjaha domma ibotoh anjaha ihaporsayai hita pasal holong ni uhur Naibata banta.
Naibata do haholongan in, anjaha halak na totap ibagas holong, ai do na totap ibagas
Naibata, anjaha Naibata ibagas ia.”
1 Johannes 4:18
Nini parilmu alam: Bosi-bosi na dob hona imbas ni bosi barani, otomatis do marisi
magnet homa. Usih hujai do age halak Kriten na dob ibagas Naibata. Domma homa hona
imbas ni Naibata. Sifat-sifat na adong bani Naibata, dong ma ai homa dapot bani jolma na
dob hona imbas ni Naibata. Ia Naibata parholong do. Halani ai sinar ningon memancarhon
sinar do homa. Usih songon si Musa na dob manjalo sinar humbani Naibata gabe
memancarhon sinar ai humbani. (2 Musa 1:26) Gabe dong ma persamaan ni Naibata bani
si Musa taridah, ai ma sinar ai. Sonai do age hita halak Kristen pe. halani na dob hona
imbas ni Naibata parholong in hita, ningon jumpah do homa holong ai banta, ai ma holong
na ijalo hita humbani Naibata.
Holong ni Naibata hubani dunia on ipataridahkon bani Tuhan Jesus. Tuhan Jesus
pataridahkon holong ai hubani hita jolma. Halani ai, ise-ise na dob mangidah Tuhan Jesus
domma mangidah Naibata. Holong on ma na gabe ciri khas ni haKristenonta. Sedo idarat
hansa songon na marbodak atap songon merek (cap ni pabrik) tapi ibagas parlahou do.
Ingat hita Lukas 10:30-37, na marmerek Malim pakon Lepi hape lang jumpah bani sidea
songon isi ni merek na bani sidea ai. Anggo marholong hita hubani hasomanta, sedo ase
dapotan pahala hita, tapi na gabe balosta do in halani na dob manjalo holong do. Anggo
dapotan idop ni uhur atap ihaholongi halak hita, in ma patut mamuhoi uhurta bani holong
na ni ateini Naibata sandiri, anjaha on ma homa mangojur hita ase marholong hubani
humbani hasomanta. Banggal do untung anggo marholong hita, ai gabe lintun atap magou
do biar ni uhur mangidah Naibata lang be songon hakim atap raja na tongtong manuntut
Naibata roh hubanta.
Halani ai totap ma hita ibagas holong ni Naibata, ase ipaluah humbani biar, ai ise
ise so manjalo Tuhan Jesus gabe sipaluahni ningon hadapanni do Tuhan Jesus gabe hakim
panuntut.
Tonggo: Ham Tuhan Jesus parholong ni atei na tarsulur. Urupi Ham ma hanami ase
totap hanami ibagas holong-Mu anjaha gabe parholong songon Ham na dob
mangkaholongi hanami. Amen.
HALELUYA NO. 250:1-2
1. Haholongan na mapansing,
humbani Jesus Tuhankin;
sai sogopi; sai masuki
uhur ampa tonduyhin.
2. Malas ni uhur na sonang
i Nagori Atas in;
Sai palamlam. sai pasonang
siholhin, Jesus Tuhankin.
PARMAHAN NA MADEAR 18 AGUSTUS
SONANG IPAROROT
“Ai pe, aha ma hatahononta pasal ai? Anggo Naibata hasomanta, ise ma imbangta?”
Rom 8:31
Ia goluh na maruntol mandompakhon lawan na gogoh, ai ma begu panoroh na tong
tong orod laho mangindahi siboluronni. Anggo talu hita gabe ipatunduk anjaha
iparjabolon ma hita laho pasaudkon sura-surani parbahat pasukanni laho manlawan
harajaon ni Naibata. Halani ai do ase tong hita mangindahi hasoman na lobih gogoh ase
boi hita iurupi anjaha maluah.
Bani ayat on ipatugah do hubanta, pitah Naibata par-Nagori Atas ai do hansa na
boi mantaluhon munsuhta, janah Ia do hansa na boi mantaluhon munsuhta, janah Ia do
boi pamonangkon. Ise ise na dob ipihak ni Naibata domma aman ilindungi atap sonang
iparorot. Dong dua hagogohon na dapot idaratni diringta sandiri, ai ma Naibata na tang
sigogohan pakon sibolis na laho parsedahon jolma ase manlawan Harajaon ni Naibata.
Ganup gogoh ni do ibahen laho parsedahon jolma in. Halani ai bani goluhta on torus do
hita bani dua pilihan, mamihak hubani Naibata atap mamihak bani sibolis. Tapi halak na
mamihak hubani Naibata, iurupi Tuhanta do. Halak na dob ipihakni Naibata lang tarkahua
hagogohon na legan be, ai totap do ihasomani janah ipardiateihon.
Boi do malum naborit anggo ijalo hita tambar, ai ma anggo marhorja ope tambar
ai janah marhorja ope darohta mamboan tambar ai hubani daerah ni naborit ai. Tawaran
ni Tuhanta ope ronsi sonari on lang ope kadaluarsa. Sirsir ope Tuhanta mangkasomani
hita. Halani ai, seng adong salah ni Naibata anggo dong halak na tongtong bulinsah. Lang
tarsolsoli hita Tuhanta anggo talu hita, halani na so idilo hita Ia. Halani ai sadokah dong
ope panorang banta, sadokah buka ope paridop ni uhur in hubanta marsada-sada, roh ma
hita masuki hita ma daerah na dob aman pinasirsir-Ni ase sonang hita.
Tonggo: Ham Tuhan, gati hanami salah pilih, halani saran saran ni munsuhnami
gabe itadingkon hanami Ham. Gati bosan hanami marhasoman Ham, gabe
ipilih hanami hasoman nami na domu hubani seleranami, gabe bulinsah,
loja anjaha boratan hanami. Urupi Ham ma hanami ase totap hanami
marpangarapan janah martenger ni uhur hu Bamu. Amen.
HALELUYA NO. 459:2-3
2 O, Tuhan tiap jam,
sai hasomani au.
Ai anggo rapkon Ham,
sibolis in pe lao.
Bai haganup ianan,
Ham do hupindahi.
Na roh do au sonari,
holong ma Ham.
3 O, Tuhan tiap jam,
Bamu ma goluhkin.
anggo daoh do Ham,
soya do ganup in.
bai haganupp ianan,
Ham do hupindahi.
Na roh do au sonari,
holong ma Ham.
PARMAHAN NA MADEAR 19 AGUSTUS
PAHLAWAN PENGENDALI NAFSU
“Tapi halak na ginomgoman ni Kristus Jesus, iparsilangkon do dagingni, hisap-hisapni
ampa rosuhni.”
Galatia 4:24
Kaisar Lodewyk Napoleon Bonaparte panakluk Eropah na tarbarita mangkatahon:
“Boi do hupatunduk Eropa marhitei kekuatan na adong bangku, tapi anggo hawa nafsuku
seng boi hupatunduk atap hurajai.”
Hunjon taridah do, ia nafsu atap rosuh-rosuh ni daging na marhagogohan do, lobih
humbani maribu-ribu tentara hape. Anggo huhuta atap manraja, anggo bangkit ma hawa
nafsu ai, gabe lang berdaya hita laho mandalankon rosuh ni Naibata. Sadokah nafsu dunia
mengendalikan atap manjolom res ni goluhni jolma in, gabe paruhur daging ma ia janah
lambin-lambin miloh ma sura-surani Naibata. Dobni gabe matei ma. Halani ai gabe surasura
ni daging ma mangatur, mamarentah uhur ni jolma.
Tapi anggo Kristus manggomgom, mangandalihon, manjolom res ni goluhta gabe
sura-sura ni Naibata ma saud mardalan, dapot ma goluh na baru, tading ma na lama.
Porini pe puho hisap ni daging ai, tapi boi ma itekan, ipamatei goluh na baru ai. Sedo
ipapodom atap ibius untuk piga-piga dokah hansa, tapi iparsilangkon, imateihon do.
Dalan laho hujon ai ma ipasomal-somal mardisiplin ase lupa botul, dob ni gabe magigi ma.
Ibarat ni na manginsop ondi gabe boi ma ilupahon, dob ni gari manganggoh timus ni
timbahou pe magigi ma ia. Lang pala tertarik be ia manginsop age dong halak iidah
manginsop. Lang pala rugi, lang pala maimpol ia matei bani, berarti domma iparsilangkon
keinginan marokok ai. Lang boi be ipargunahon si bolis ai be rokok ai laho manggodasi,
ai domma iparsilangkon botul-botul.
Halani ai iojur hata Ni Naibata do hita, ase hita sandiri gabe panguasa pakon
pengendali hidupta. Boi do hape patudukonta sura-sura, hisap hisap ni dagingta na
sambor in. Hita domma igomgomi Kristus, berarti na sirsir do Tuhanta mangurupi hita
ase monang hita.
Tonggo: Ham Tuhan na dob manobus hanami. Gati-gati lupa hanami bani gogoh na
binere-Mu bennami. Gati hanami iatur, irajai ikendalihon munsuhnami
anjaha lupa hanami mangindo partolongan-Mu. Urupi Ham ma hanami ase
monang hanami. Amen.
HALELUYA NO. 373:1-2
1. Ulang ham marsidalian
jalo podas rupeimin
Seng dapot ham hasonangan,
anggo buei abatmin.
Ai pe rotapkon ganupan,
pangagou bai uhurmin.
Arta buei pakon sangap, na laho salpu do in.
Ulang ham marsidalian jalo podas rupeimin.
Seng dapot ham hasonangan, anggo buei abat
min.
2. Ulang tarlalap idalan,
tuju podas surga in.
Domma sirsir iananta, ibahen Tuhanta ijin.
Ulang be ganggu uhurta, jolom poltik Tuhan in.
Sai toguon-Ni do hita.
Hu lambung ni Bapa in.
Ulang tarlalap idalan, tuju podas surga in,
domma sirsir iananta, ibahen Tuhanta ijin.
PARMAHAN NA MADEAR 20 AGUSTUS
GORAN PAKON TITAH PANGURUPI
“Sai manggoluh ma tonduyhu anjaha Ham ma ipuji, Titah-Mu ma na mangurupi ahu.”
Psalmen 119:175
Sada tonggo pangindoan do on hubani Tuhan halani domma ibahen koreksi atap
evaluasi bani dirini, ija bani evaluasi ai domma ibotoh na banggalan mando utang ase
idou. Bararti na laho matei nari mando ia. Tapi mintor mulgap do use harapan bani,
mardingat undang undang atap atap Titah ni Naibata na boi ope ia manggoluh. Mabiar
ope ia anggo mintor matei. Ihargahon ope tonduy ni. Dong ope kesadaran bani songon
anak na magou ai (Lukas 15). Idopni uhur Bapani mando harapannni. Halani ai do ase
hubani Tuhanta ia mangindo partolongan. Pag do ia, itanda do sifat ni Bapani ai, halani na
hunjai janah parjai hinan do ia. Pangarapan “idop ni uhur” on mando modal bani ase pag
ia mangindo partolongan. Idingat orang dekat hinan do ia. Menyerah bulat-bulat do ia
hubani bapani ai do na ilanggarni. Usih do ia songon dakdanak na ibalbal inangni sandiri
halani ilaosi hata atap titah ni inangni ai. Tapi hatani inang ni ai pakon sifat ni inangni ai
do na gabe modal bani laho mangindo pertolongan. Goran inang pakon titel “inang” ai do
na pasonang uhurni. On ma patuduhkon hasangkanonni bani inangni ai. Ibotoh tangkas
na holong do uhurni inangni hubani, halani anak do ia bani inangni ai.
Sonai do age halak Kristen. Domma ia in Naibata homa gabe anak Harajaon-Ni.
Domma gabe orang dekat ni Naibata hita halani panghopkopon ni Tuhan Jesus Kristus.
Tapi age pe sonai gati-gati do lang marosuh, gabe ipilih hita dalan na sesuai hubani
seleranta, gabe ujungni manuju hamateian. Tapi mardingat hasangkanonta, halani orang
dalam do hita, halani hauhuranni na tangkas, itandai hita ai ma na lobih humbani holong
ni atei ni Bapanta. Lang itulak, lang ipabador Tuhanta pangarapan na sonai ai. Roh ma
hita hubani Naibata ase ipaluah hita.
Tonggo: Ham Tuhan gati do tarboan-boan uhurnami hanami gabe ganggang hanami
hum Bamu. Gati-gati homa sadar hanami bani dousanami, gabe roh hanami
hu Bamu mangindo partolongan-Mu. Sai urupi Ham ma hanami ase
manggoluh hanami hu Bamu. Amen.
HALELUYA NO. 234:1-2
1.Tandai Ham ma au,
pareksa Ham pakon uhurhu!
Uji Ham au,
papangkei Ham pakon dalanku!
Itandai Ham do au on. O Tuhan.
2.Holong atei-Mu,
mangidah ganup parlahouhu;
Ai ma tongon,
hotop do sai kahou langkahku.
Sai sasap Ham dousangkin, o Tuhan.
PARMAHAN NA MADEAR 21 AGUSTUS
PAULI-ULI DIRI ATAS NI HAPORSAYAON
“Tapi, nasiam na hinaholongan, pauli-uli nasiam ma diri nasiam i atas ni haporsayaon
nasiam na pansing sahalian in, anjaha martonggo ma nasiam ibagas Tonduy Napansing.”
Judas 1:20
Horja na pauli-ulihon, on ma sada horja na mahol iahapkon jolma. Halani horja on
na marpardomuan hubani horja na padearhon. Maruntol do jolma in laho pauli-ulihon
dirini sandiri ronsi niombahni, sonaha ase jumpahsi na sinurahon ni uhurni ai, ai ma
pangabak na madear atap pe gabe halak Kristen na sintong maronjolan hubani
haporsayaon. Iusahahon jolma do marhiteihonni gogoh, pingkiran, parbinotohan pakon
pangalaman na adong bani laho pauli-ulihon haganupan ai, ase urah ipengaruhi na adong
i dunia on, ulang urah taruyun hubani parpodah na legan, tapi hotop do gagal.
Aha do mambahen ase hotop hita gagal humbani horja na pauli-ulihon on?
Memang anggo gogoh, pingkiran, parbinotohan ibahen hita dasarta ase dear hita, dear
niombahta, porsaya hubani Tuhan, anjaha lang ipengaruhi parpodah na kahou, seng anjai
jumpah na tinuju ni uhurta ai. Tapi marhiteihon ni ayatta sadari on, iajari do hita sonaha
caranta laho pauli ulihon dirinta, anjaha sonaha bahenonta laho mangatasi parpodah na
kahou ai. Pauli-ulihon dirinta iatas ni haporsayaon mararti do ai, mangkagoluhkon Hata
ni Naibata ibagas na marhaporsayaon. Manramotkon dirini ibagas holong ni uhurni
Naibata. Sirsir paimahon idop ni uhur ni Jesus Kristus. Ra maridop ni uhur hubani halak
na ganggu maruhur. Totap martonggo ibagas Tonduy Napansing. Anggo domma dong
ibagas dirinta, boi ma hita pauli-uli diri anjaha boi mangatasi marpodah na kahou.
Sonaha pe gogoh ni parpodah na kahou ai anggo totap do hita manggoluh ibagas
haporsayaonta na sintong dompak Tuhan, anjaha martonggo ibagas Tonduy Napansing,
seng anjai taruyun hita hujai, tapi boi hita monang anjaha parrupei bani hagoluhan si
sadokahni dokahni.
Tonggo: Ham Tuhan Naibata, pargogohi Ham ma hanami pauli-uli diri ibagas
haporsayaon dompak Ham, ase monang hanami manlawan munsuh nami
anjaha parrupei bani hagoluhan sisadokahni dokahni. Amen.
HALELUYA NO. 260:2+4
2.Tonggor ma haganup suruhan
ni sibolis roh.
Ai buei do italuhon
sai puho ma ho.
Naibata do hasomanta!
In ma dilo bei;
Gotong hagoluhan
in do jaloonta bei.
4.Bujur bei ma nini Jesus
“Barah ma Au roh.”
uhurnami ase Jesus,
gok Bamu ma tong!
Naibata do hasomanta!
In ma dilo bei;
Gotong hagoluhan
in do jaloonta bei.
PARMAHAN NA MADEAR 22 AGUSTUS
HAPENTARAN PAKON GOGOH NI NAIBATA
“Ai haotoon ni Naibata, pentaran do ai ase jolma in, anjaha hagalekon ni Naibata, gogohon
do ai ase jolma in.”
1 Korint 1:25
Anggo na pareksa hapentaran-hapentaran ronsi hagogohan na adong i dunia on
tangkas do na idah semakin meningkat janah berkembang torus. Sipata longang do uhur
mambogei hapentaran-hapentaran na adong bani jolma in atap pe bani bangsa na legan,
umpamani: Bangsa Israel na boi paulihon bom atom atap pe bani bangsa na legan,
umpamani: Bangsa Israel na ianggap munsuhni, anjaha na deba nari dong halak na dob
das hu bulan. On ma hapentaran na adong bani jolma in. Pori pe domma das hujai
habotohan na legan, das hubani panorang on marusaha ope tong jolma manambahi
parnabinotohan, sonaha ase ulang ketinggalan jaman. Lang pala parduli bani arta, age
bois asal tambah habotohon. Ase luar biasa mando parbinotohon ni jolma panorang on,
mambahen gijang uhurni anjaha gabe mangunsangah bani hapentaranni use ia. Gabe lang
mananda idop ni uhur ni Naibata, anjaha lang parduli hubani hatani Naibata.
Jolma na mangutamahon hal-hal na luar biasa marhiteihon otakni, hotop
mansedai dirini pakon haporsayaonta hubani Tuhan. Apostel Paulus mangkatahon:
Kristus sandiri do pakon haporsayaonni hubani Tuhan. Apostel Paulus mangkatahon
Kristus sandiri do hapentaran na humbani Naibata. Ia do na mangatasi hapentaran na
idunia on. Ase na penting sedo mangidah sangap, habotohan na luar biasa; tapi na tang
porlu, porsaya hubani Tuhan, martoruh ni uhur songon Kristus, mangkaporsayai silang
ni Kristus, na ianggap dunia on habodohon.
Ase anggo dong hapentaran ai banta bahen hita ma ai laho pasangapkon Tuhan,
ulang gabe gijang ni uhur. Anjaha ulang ibahen hita ai laho mangalo Naibata. Ai haotoon
ni Naibata, pentaran do Ia humbani habotohonta, anjaha hagalekonni Naibata gogohan
do ai humbani hagogohonta. Halani ai unsagahkon hita ma pambahenan pakon idop ni
uhur ni Tuhanta.
Tonggo: Ham Tuhan Jesus Tuhannami, patau Ham ma hanami mamuji goran-Mu
marhitei hapentaran na binere-Mu, ase ulang gijang uhurnami, tapi ra
martoruh ni uhur songon Ham. Amen.
HALELUYA NO. 194:2+3
2. Sai sihol usihanku,
Ham Tuhan Jesus Tuhankin,
ganupan ningon saud
Titahni Bapa in.
Sonaha bahenonku
lao mandalankon in.
Ai anggo lang Tuhanku
manolong au ijin.
3. Sonaha bahenanku
maniru Tuhankin?
Gok dousa do uhurhu
age angkulangkin,
Urupi au, o Jesus
sai sasap dousangkin
Suankon bai uhurhu
holong ni atei-Mu.
PARMAHAN NA MADEAR 23 AGUSTUS
MARSIPADEAR-DEARAN
“Marsianju-anjuan anjaha marsisasapan dousa, anggo marpangkurangi uhur ni na sada
dompak hasomanni; Songon na dob isasap Kristus dousa nasiam, sonai ma homa nasiam
marsisasapan.”
Kolosse 3:13
Anggo tangkas ma ibotoh hita untung ni na marsianju-anjuan ibagas kekeluargaan
age ibagas na mardiha-diha, iojur ai do hita, marosuh mandalankon. Tapi ijai lingod ai
humbagas uhurta, pingkal ma pasu-pasu, marhusip ma ibagas uhur: nai mando
panokohni mintor aha ra deba panaga-nagaonkonni? Hansi otik do namin parsoalan ai
hinan, gabe na pabanggal ma ai ase sungkup boratan hita use.
Apostel Paulus paingatkon halak Kristen na i Kolose, ase marpangabak
hapansingon anjaha ipadaoh ma uhur parbolat-bolaton humbani na sada (Gorik) hubani
na sada (Jahudi). Halani domma sada daging ibagas Kristus anjaha sada haholongan
Seng tarbahen lang dong bei hasurungan ni na sada humbani sada, anjaha
sebalikni pe, dong do hahurangan na sada humbani na sada. Ase ija hasurungan ai hansa
menonjol anjaha hahuranganni lang iidah, ijai ma panorang gijang ni uhur ai markuasa,
pangenjengon ai markaok-kaok, na mambahen borit uhur gatian bani hasoman anjaha
marsipuji nilabarni.
Lao padaohkon parhuran sisonai, ipaingat Apostel Paulus do kuria i Kolose songon
na dob isasap Kristus dousa nasiam, sonai ma nasiam marsisasapan. Ai ma boning arang
ni paruhuronta, mangkawahkon Jesus Kristus sisasap dousanta in. Songon Kristus na so
masuk janahi hinan Ia, pasal panlanggaron/dousanta dompak marhalahon ni ai, gabe ra
Ia bani diri-Ni ihonahon uhum na sahira hubanta ai, ase maluah hita humbani uhuman ai.
Domma … Domma ibahen pardameian bani na tarsilang ai Ia i Golgata anajaha itaurhon
do “Domma Salosei.”
Ulang namin ihatahon banta songon na hubani parutang sapuluh ribu talenta ai
holi: Ho juak-juak na jahat! Hubalihon do utangmu, halani ielek-elek ho ahu ai lang patut
maridop ni uhur ge ho hubani hasomanmu juak-juak songon ahu, na dob maridop uhur
ge ho utangmu, halani ielek-elek ho ahu ai maridop ni uhur bam?
Tonggo: Urupi Ham ma hanami Tuhan mandalankon uhur na marsianju-anjuan,
dompak hasomannami, halani na dob sinasap-Mu dousanami. Amen.
HALELUYA NO. 194:1+3
1.Sai sihol usihanku,
Ham Jesus Tuhankin,
Bai toruhni uhur-Mu
lamlam ni Hata-Mu,
sonaha bahenonku,
lao mandalankon in
Sai Ham ma alo Tuhan,
manolong au ijin
3.Sonaha bahenanku
maniru Tuhankin?
Gok do uhurhu
age angkulangkin,
Urupi au, o Jesus
sai sasap dousangkin
Suankon bai uhurhu
holong ni atei-Mu
PARMAHAN NA MADEAR 24 AGUSTUS
TULAK MATAH
“Ase marianan Kristus marhitei haporsayaon ibagas uhur nasiam, gabe totap nasiam
marurat anjaha maronjolan bani holong.”
Epesus 3:17
Aha do na manjuljul uhurni Apostel Paulus mambahen ibagas holong ia
paingatkon Kuria Epesus ai. Bani na manongos surat on ia lang hurang parngitni
pangahapni, ai igarihon i Huta Roma. Mase gogohan uhurni patorsahon kuria ai, ase
mangindahi dalan dalan ase boi ai maluah huntutupan ai?
Sadokah goluhni Tuhan Jesus i dunia on, haganup do goluh-Ni martujuan laho
paluahkon jolma, ase parrupei hita bani hagoluhan so sadokahni dokahni. Torus do
goluhni Jesus ibagas pambalosion bani Naibata age das hubani na tarsilang. Sonai do
pargoluhan ni Apostel Paulus, na dob marianan Tonduy ni Kristus ibagas dirini marsurasura
paluahkon ibagas na pambalosion bani Naibata. Seng dong be hasangapon sidearan
bani sobali mambalosi Naibata, ai ma ase ipaingat do si Timoteus, ulang tarjai uhurni,
nini: Ai seng dong iboan hita hutanoh on anjaha aha pe lang tarboan hita laho misir (1
Timoteus 6:7). Tading do haganup artanta in, anggo mulak ma hita. Tapi tugas na dob
ondos bam, partanggung jawabkon ma sadear-dearni. Ai ma ase iojur Apostel Paulus age
hita, ase marurat janah maronjolan ibagas holong ma hita, ase gabe alatni holong ma
pargunahon hita artana binerehon-Ni ai hubanta, laho mangurupi halak na
marhahurangan, manumpaki horja i kuria. Mase pag hita marporang bani tudung
parmaluan, hansi hubani gijang ni uhur doai roh. Dearan ma pag hita manlayak-layakkon
artanta, na nijuljul ni holong, ase lambin marbanggal malas ni uhur na marondolan bani
Kristus bani paruhuronta.
Ase ra domma boi balosanta ibagas uhurta, ase sonai holong ni Apostel Paulus
dompak kuria ai, lang tarnilai bani duit, lang tarukur bani habotohon, halani haganup
dirini, pingkiran ronsi gogoh ampa hosahni iberehon tulak matah bani Jesus. Tonduy do
manggogohi ijai. Ase age hita pe tardalankon hita do buah-buah ni holong, domu bani
panggora/pangajari ni Tonduy in na marianan ibagas hita bahen galanganta bani Naibata.
Tonggo: Ham Tuhan Jesus Kristus Tuhannami, ibere Ham Tonduy-Mu hubagas
uhurnami ase margogoh hanami mandalankon hata-Mu, mandalankon
holong songon pangkaholongi-Mu hubaennami. Amen.
HALELUYA NO. 217:2-3
2.Tonggor idop ni uhur-Ni,
na bagas, na ginjang in;
sai tandai ma holong-Ni,
seng tarsibar ganup in
iparorot Naibatanta,
Bapa na tarsulur in.
Pakon Jesus pe, Tuhanta,
Hita na porsaya in.
3.Sai pasiat ham, o Tuhan
ganup na porsaya in.
Ase marsihaholongan,
domu bani Titah-Mu in
Marhiteihon hasintongan,
in do tong ipangindo Ham
Sai padomu Ham hasoman,
na dob isondangi Ham.
PARMAHAN NA MADEAR 25 AGUSTUS
HAMUBAHON NI UHUR
“Seng i padokah-dokah Tuhan in bagah bagah-Ni songon hinahatahonni na deba; tapi
lumbang do uhur-Ni mangidah nasiam, ai ipangindo uhur-Ni ulang ma magou namin atap
ise pe, tapi das haganup tene hu hamubahon ni uhur.”
2 Petrus 3:9
Pardalanan ni goluhta ai ma pardalanan na gok tantangan ampa bahaya ronsi gok
teka-teki. Hotop masa sada kejutan na lang ongga irencanahon atap na surahon. Kejutan
on boi do manguntungkon hita janah sebalikni boi do manrugihon hita. Na jelas langkah
maningon totap maju manuju masa depan na cerah. Lang targoranni hinabuei idopni uhur
ampa pasu-pasu ni Naibata na dob pakon na sihol nikmatanta humbani ari, bulan ampa
tahun hu tahun. Jesus do na paluahkon hita humbani bagei-bagei ni kemelut ampa
pergumulan, keresahan ampa kekecewaan.
Jesus selaku sipaluah tongtong mampardiateihon hita atap ija pe hita marianan. Ia
do na totap mansarihon biri-biri-Ni ronsi tongtong do Ia mangindahi porini adong
humbani biri-biri in na kahou atap magou. Lobih hunjai iberehkon diri-Ni ronsi na
mateibani hayu parsilang. Haganupan on halani holong ampa idob ni uhur-Ni na banggal
dompak hita jolma. Lang marosuh uhur-Ni sada pe humbani jolma magou tapi halani
lumbang ni uhur-Ni isurahon do ase haganup jolma maluah.
Sonai ma pambahenanni Naibata banta ibagas Jesus Kristus parpintor in halani ai
patut ma goluhta ibagas gok tarimakasih ampa puji-pujian hubani Naibata.
Haporsayaonta maningon totap arahkononta hu Bani. Halani on ma na porlu
ikembangkononta na ija tujuanni ase bani era globalisasi ampa modernisasi on lang
adong hita na tercecer atap na ikut-ikutan. Sebalikni adong banta prinsip goluh
marhapansingon ibagas holong ampa hasintongan ujung ni gabe pelopor itongah-tongah
ni masyarakat. Ase selaku halak na dob ipaluah haganup hita domma manlangkah bani
dalan ketaatan hubani Kristus.
Bani suasana on isuruh hita bersikap kristis, kreatif ampa dinamis. Kritis dalam
hal mambedahon ija na sintong pakon na salah sonai ra manguji diri sandiri secara jujur.
Kreatif bani hal, hita sanggup menjadihon na hurang dear ampa marguna, manjadihon na
lang berfungsi gabe bermanfaat secara positif. Dinamis ibagas arti marhiteihon gogoh ni
Tonduy Napansing adong banta kemampuan ampa kemauan berbuat yang terbaik.
Tonggo: Ipuji anjaha ipasangap hanami do Ham Naibata Bapanami, mangidah
lumbang ni uhur-Mu bannami jolma. Lang hape ipalopas Ham hanami
magou atap ise pe tapi isurahon Ham do ase haganup hanami das hubani
hamubahon ni uhur. Halani ai urupi Ham hanami marhitei Tonduy-Mu
Napansing in. Amen.
HALELUYA NO. 129:3+5
3. Ai holong ni atei do hansa
sipangunsagahonkon in.
Sipujion ku di Jahowa
dob roh na papangkeihon in.
Tongtong malas do uhurhin,
mamuji holong atei in. Mamuji holong atei in.
5. Ai pe, ale Tuhan Jahowa.
Ulang be buat holong-Mu.
Boan ma au alo Naibata.
Dob matei ahu hu lambung-Mu.
Sai malas uhurhin ijin,
mamuji holong atei in. Mamuji holong atei in.
PARMAHAN NA MADEAR 26 AGUSTUS
GABE SIPANGURUPI HASOMAN MA HITA
“Ulang ma na porlu bani nasiam paruhuron nasiam, tapi dihut ma na bani hasoman.”
Pilippi 2:4
Patangkasonta do lobei artini “Na porlu bani nasiam” na hinahatahonni Apostel
Paulus ijon, ai ma na mementingkon kepentingan diri sendiri. Na so mangkirahon
hasoman age mahua, demi kepentinganni. Hulishon laklak asal ulang pahu, age mahua
halak asal ulang ahu. Ai ma na ulang ai marianan ibagas uhurta. Sadokah marianan uhur
sisonai ai bani sada halak, naha pe lang boi marianan holong ibagas uhurni. Sadokah ai
ma lang dong ketenangan bani, hansi pe junjun sinadonganni. Tarpausih ma ai bani halak
na dapotan aili, na so pala parrupei hasomanni. Naha pe mantadi mayom ma guleini ai,
ase tarboishon sidea, gabe na borit use na roh.
Memang horja na mahol do na mamingkirhon pakon mangurupi hasoman, anggo
lang porsaya bani Naibata, anggo lang iarusi na marbona humbani Naibata do na bani ai.
Ai anggo niniuhurni gogohni, hamaloanni do mambahen dong ai. Naha ia mando na malo
ampa na gogoh? Halani oto do hasoman nani ase hurang bani? Lang sonai. Apostel PetrusJohannes
lang dong bani omas, pirak, tapi marhitei goranni Jesus mardalan na repat ai.
Ase ibagas na dong ai banta ipindo hubanta ase ulang lupa hita, bahasa hita na binere do
ase dong banta. Jadi dihut ma homa hita mambere bani hasomanta. Apostel Paulus
mangkatahon: Anggo marsibere-bere hita: ganup na jinuljul ni uhurni, ulang ma humbani
borat ni uhur ampa halani paksa (2 Korint 9:6).
Anggo idingat hita si Abraham, sanggah na ihatahon Naibata igalangkon si Isak
anakni ai, aha parlobei na porlu bani Naibata do iparuhurhon gabe ididah ma use
parpasirsir ni Naibata mambahen haluahon, gantih ni anakni si Ishak ai sada biri-biri
tunggal sigalangkononni bani Naibata. Sonaha do mambahen boi si Abraham das hujai?
Ra si Abraham mambalosi hatani Naibata. Porlu do hita mamingkirhon na porlu bani
hasoman, mangurupi na marhahurangan, mangkawahkon na porlu ikuria, tandani na
ihaholongi Naibata hita ibagas panghopkopon ni Jesus Kristus.
Tonggo: Ham Tuhan Jesus Tuhannami, suanhon Ham ma holong na hum Bamu
hubagas uhurnami ase tardalankon hanami mangkaholongi hasoman nami
tandani susian-Mu hanami. Amen.
HALELUYA NO. 449:1-2
1.Porluhon holong o, hasoman,
in do tonah banta humbai Tuhan.
Ase malas uhurta tong bani goluh on,
Rapkon Tuhanta, i tanoh on.
2.Porluhon damei o, hasoman,
in do tanda ni hita susian.
Ase malas uhurta tong bani goluh on,
rapkon Tuhanta, i tanoh on.
PARMAHAN NA MADEAR 27 AGUSTUS
S A B A R
“Nasiam pe sabar ma, patotap nasiam ma uhur nasiam, ai dohor ma parrohni Tuhan in.”
Jakobus 5:8
Iojur si Jakobus do kuria in ijia ase sabar, totap marparuhuran mangirikkon,
manaksihon Tuhan Jesus ibagas pargoluhan ni sidea. Asal bujur sidea mandalankon ai
pasti marhasil. Dua ilustrasi ipatugah bani sidea laho patengerhon uhurni sidea:
1. Ai pe nasiam, sabar ma nasiam das hubani parrohni Tuhan in. Ai parjuma
ipaima-ima do buah na marharga hun tanoh in, anjaha sabar do ia paimaimahon
udan partidahonkon ampa udan paima pariama (5:7).
2. Iparhatuah hita do halak na sabar. Ibogei nasiam do hasabaran ni si Job, anjaha
ididah nasiam do sonaha dobni ibahen Tuhan in, ai parontou ni uhur banggal
do Tuhan in anjaha paridop ni uhur (5:11).
Marhitei teks on iojur do hita homa ase sabar, totap paruhuronta mangirikkon,
manaksihon Tuhan Jesus. Ase tardalankon hita ai ibagas malas ni uhur realitas ma Tuhan
Jesus banta, ai ma Tuhan Jesus marianan ibagas uhur. Pasal on nini si Jakobus: Tongor ma,
domma jongjong panguhum in bani labah. Jesus sandiri mangkatahon bani
pangungkabon 3:20: Tonggor ma, jongjong do Ahu ilobei ni labah in mangartuki. Atap ise
na mambogei sorang-Ku anjaha iungkab labah ai, masuk ma Ahu hubani, mangan Ahu
pakonsi anjaha ia rap pakon Ahu. Anggo realitas ma Jesus banta marhitei Ia ibagas uhurta,
yakin ma hita na roh do Ia use mangalop hita, mamuhoi hita anggo domma matei, anjaha
paubah angkulanta anggo manggoluh ope hita bani parroh-Ni ai, anjaha olat ni ai rap ma
hita pakon-Si. Anggo sonai do sabar ma hita songon so Job ibagas ganup situasi, kondisi
ni goluhta mangirikkon, manaksihon Tuhanta Jesus.
Tonggo: Ham Jesus, Tuhan nami na dob matei manghopkop hanami. Patalar Ham
ma holong, idop ni uhur-Mu bannami, ase marhitei ai realitas Ham
bennami. Lang turi-turian be, ase sabar, totap ma paruhuronnami
mangirikkon, manaksihon pasangap Ham ibagas goluhnami, sanggah
sonang age sanggah marsitaronon pe. Amen.
HALELUYA NO. 120:2+5
2.Taron ma ho Sion,
taron na masahit in;
Hata-hata parlajaouan,
ulang habiari in.
Tatap rudang hagoluhan!
Bai parroh ni hasunsahan in.
Taron ma, taron ma.
5.Torus baen, torus baen,
Sion torus uhurmu,
Mamingkiri hasonangan
Binahenni Naibata
Sai simbili hamagouan,
Sion sai timbangi dalanmin.
Torus baen, uhurmin.
PARMAHAN NA MADEAR 28 AGUSTUS
ULANG PARSANGSIAN BANI HASOMAN
“Ai pe, atap na mangan atap na minum nasiam, atap aha pe ihorjahon nasiam, baen nasiam
ma ganup ai pasangapkon Naibata.”
1 Korint 10:31
Iojur si Paulus do Kuria Korint ijia, ase asok sidea ibagas goluhni sidea, ai ma pasal
pargoluhni sidea, ulang gabe parsangsian ai bani hasomanni . Tapi na gabe patotapkon
uhur ni hasomanni na porsaya ma, marhaporsayaon bani Naibata. Bani Tuhan Jesus.
Sonon ma argumentasi pasal ai:
1. Anggo iontang na so porsaya nasiam, anjaha marosuh do uhur nasiam laho, pangan
nasiam mahaganup na pinatibal ilobei ni nasiam, ulang pala martimbang-timbang
halani panggora ni uhur in. Tapi anggo adong na mangkatahon bani nasiam: Guleii na
do binagalangkon do on, ulang ma pangan nasiam ai, halani halak na mangkatahon ai,
ampa halani panggora ni uhur in, sedo panggora ni uhurmu na huhatahon ai. Tapi
panggora nii uhur ni halak na legan ai do.
2. Songon ahu pe, hubuat do uhur ni halak bani haganup, ai seng hupindahi na marguna
bangku.na marguna bani na mabuei in do, andohar maluah sidea.
Hita pe, sai ra ma hita marpedoman bani lumba-lumba ni si Paulus ibagas sagala
tindak tandukta ibagas goluhta. Halani ai marhitei parsahapta, parsaoranta ampa
hasoman, horjanta ari-ari, parmangan ampa parminumta irumah atap ija pe,
panontotanta, gambaran-gambaran itumah pe, ampa na legan legan tene, ingat hita ma
huta iatas dolog hita, gabe surat ni Kristus na positip ma hita, ase marsangap Naibata,
Tuhanta Jesus marhitei ai, gabe lambin tarojur uhur ni hasoman mangirikkon Tuhan
Jesus.
Tonggo: Ham Naibata Bapanami marhitei Tuhan Jesus Sitobus hanami. Suruh Ham
Tonduy-Mu marianan ibagas uhurnami, ase Ia ma mambobankon hanami
ibagas goluhnami, gabe marsangap Ham iidah hasomannami jolma
marhitei goluhnami, gabe maluah sidea marhitei hanami, lang be gabe
parsangsian hanami. Amen.
HALELUYA NO. 5:1+6
1.Hupuji holong ni atei-Mu,
o Tuhan Jesus rajangkin.
Bamu huondoshon tonduyhu,
ai do na pinindo-Mu in,
Hu halupahon ma diringku,
mamingkir holong ni ateimu.
6. O Jesus goran-Mu uhirhon,
bagas torang bai uhurhon;
Ase tarsurat ilobei hu
holongni atei-Mu tong-tong;
Hatangku ampa parlahouhu,
ningon hupuji do goran-Mu.
PARMAHAN NA MADEAR 29 AGUSTUS
APOH-APOH
“Ai songon surung ni sitaronon ni Kristus sogop bannami, sonai do homa surung ni
pangapohon bannami marhitei Kristus.”
1 Korint 1:5
Hata ni Tuhanta marhitei ayat on mangojur hita ase ulang mintor segan, mabiar
uhurta mananggapi sitaronon. Si Paulus patugahkon, manaksihon pangalamanni ibagas
sitarononni halani Kristus: songon surung ni sitarononnami halani Kristus, sonai homa
surung ni pangapohon bannami marhitei Kristus.
Adong do sada buku na marjudul “The Cross is Heaven” (silang in, in ma surga), ai
ma sada buku na patugahkon pangalaman ni Sadhu Sundar Singh, sada halak India na
porsaya, na marhorja sebagai sipadas ambilan na madear. Laho do ia marambilan hu
Eropah, Amerika, Australia, laho do ia homa hu Tibet manlopusi pegunungan Himalaya
na tartutup salju ampa padang es, hansi pe ilarang do pasal Jesus patugahkon ijai, ai
Negara Budha na panatik do ai. Sahali iparburu halak Hindu do ia hun huta ni sidea halani
mangambilankon ambilan na madear. Hundul ma ia itoruhni sada hayu ibagas sada
harangan martonggo hubani Tuhan Jesus. Roh ma Jesus manjumpahkonsi marsaor,
marsahap-sahap pakonsi, gabe igoki damei, malas ni uhur ma tonduyni. Seng be ibagas
pangahap ni daging be ia, tapi ibagas tonduy ma. Tarbukti hunjon, do amen pe nini ase
iahapkon na dob iurupi isap do hape angkulani.
Jusuf Roni, ai ma sada halak na manantang ha-Kristenon. Tapi marhitei na
mambasa Bibel, na so ra matutung ibagas gereja na ibakar, bertobat ma ia, lanjur torus
bersaksi pasal Tuhan Jesus. Mandapot tantangan na hebat ma ia humbani keluarga, famili,
agama. Onom tahun ia ipenjarahon, berarti marsitaronon, ialami do songon pangalaman
ni si Paulus. Ialami do songon pangalaman ni Sadhu Sundar Sing na dob sinobut iatas ai
nongkan.
Parimbagashon hita ma goluh, pangalaman ni sisaksihon goran ni Jesus, ase
realitas ma homa hatuahon na binagahkon ni Jesus banta: Martuah na ma pinarburu
nihalak halani hapitoron, ai bani sidea do Harajaon Nagori Atas in (Mateus 5:10).
Tonggo: Ham Jesus Tuhannami, Ham pe halani rela do manaron pasaudkon rosuh ni
Bapa in, ase das Ham hu hasonangan-Mu na manontong in. In ma na
tongtong ipaidahkon Ham bani saksi saksi-Mu bani segala abad. Patorang
Ham ma homa in bannami ibagas na mandalankan tugasnami, na dob
niondoskon-Mu bannami. Amen.
HALELUYA NO. 122:8
8. Pakon halak na binuru ibaen hapintoron in.
Sipujion, ai marguru bai doyukni upahniin.
I Nagori Atas in mulgap ma tuahni in.
PARMAHAN NA MADEAR 30 AGUSTUS
HAGOGOHON NI KRISTUS
“Jadi nini ma Hubangku: Sungkup do idop ni uhur-Hu bam, ai ibagas hagalekon do gabe
gok hagogohon. Ase dearan ma hupuji diringku halani hagalekon, ase sogop bangku
hagogohon ni Kristus.”
1 Korint 12:9
Pambere ni hasoman banta sanggah sungkupan hita, negatif pangkorhonni banta.
Anggo etek ai, ninta ibagas uhurta: Mapasni ai! Anggo tarbanggal ai, ninta “Aha ma nasihol
hauton ni ai?” Tapi sagala pangurupion sanggah tarsosak hita, positip buahni banta,
ipatubuh uhur martarimakasih, itubuhkon parhuan-huanon, uhur holong.
Seng pitah ibagas hubungan dompak jolma marlaku ai, tapi dihut do bani
hubungan sebagai jolma i lobei ni Naibata, i lobei ni Tuhan Jesus. Halani ai do ase si Paulus
pe ipaturut Jesus do marsitaronon angkulani hansi pe domma tolu hali ipangindo hubani
Naibata ase malum naboritni. Nini Naibata bani: Sungkup do idop ni uhur bam. Ai ibagas
hagalekonmu do talar ahapkononmu hagogohon-Ku. Naibata na so ongga margabus,
Jesus, na margoran si Amen, pasadahon songon binagahkon-Ni ai bani si Paulus ibagas
haganup goluhni, horjani pararatkon ambilan na madear. Manurati Epistel (suratni)
hubani kuria kuria ijai. Torang taridah do ai hubani hatani, hasaksianni: ase dearan ma
hupuji diringku halani hagalekon, ase sogop bangku hagogohan Kristus. Halani ai sonang
do uhurhu ibagas hagalekon, hahirion, hasunsahan, parburuon ampa hasosakan halani
Kristus, ai sanggah galek ahu, ijai do ahu margogoh.
Halani ai paruhurhon hita ma pengalaman ni si Paulus ibagas goluhni mangirikkon
Jesus, mandalankon horja pararatkon ambilan na madear in. Anggo sogop sitaronon ulang
mandolei, itorushonlah marhorja, mandalankon tugasta sebagai parhorja atap anggota
pe, halani Jesus Kristus. Idop ni uhur-Ni, holong ni atei-Ni marhitei Tonduy-Ni ma ibahen
mangkasomani, mampargogohi hita.
Tonggo: Ham Jesus, Tuhan sitobus hanami. Realitas do gogoh-Mu, marhitei TonduyMu
bani si Paulus age ibagas hagalekonni. Pasogop Ham ma age ai bannami ibagas na mandalankon tugasnami hanami halani goran-Mu. Ase lambin
tenger uhur nami, haganupan do tongon na sogop bannami ipalopas Ham,
manumpak hubani hadearon. Amen.
HALELUYA NO. 13:3-4
3. Ai anggo hasunsahan, buei do in;
sonai pe pangahapan, sonang do in.
Age golap huidah i tanoh on,
torang do marpangidah bai
uhurhon.
4. Bai jampal-Mu, o Tuhan, i lobei-Mu.
Paturut Ham marsaran jabolon-Mu.
Pitpit hubaen matangku manjolom Ham.
Ai sonang do uhurhu na rongkon Ham.
PARMAHAN NA MADEAR 31 AGUSTUS
MARTARIMA KASIH PASAL HAGANUP
“Martarima kasih pasal haganup, ai in do pinindo ni Naibata humbani nasiam marhitei
Kristus Jesus.”
1 Tessalonika 5:18
Kesaksian ni sada halak na porsaya: Anggo boi ma sada halak Kristen, martarima
kasih bani Naibata humbani uhurni, seng pitah humbani pamanganni domma talup ia
masuk hu Nagori Atas. Ai sahap, doding, parsombahon bani Naibata do ai. Ijai ma tarima
kasih puji-pujian, parsombahon na spontan humbagas uhur halani mardingat, mandai
haluahon na hum Bani, marhitei Tuhan Jesus, songon na tarsurat bani Pangungkabon 7:910:
Dobni salpu ai huidah ma humpulan na banggal, na so boi bilangan ni atap ise,
humbani ganup bangsa, suku, marga atap hata, jongjong i lobei ni paratas ai pakon i
lobeini Anak ni Biri-Biri ai, marhiouhon hiou putih anjaha manjolom bulung ni palem.
Maling do sora ni sidea mandilohon bani na hundul bani paratas in do haluahon ampa
bani Anak ni Biri-Biri (Tuhan Jesus) in.
Sifat ni uhurta lang tarparentah ai, sonai homa lang tarlarang ai. Lang tarparentah
uhurta martarima kasih bani jolma na so ongga mangkaholongi hita. Tapi lang tarlarang
uhurta martarima kasih, unduk bani halak na mangurupi hita, na paluahkon hita humbani
hasosakanta. Pasal ai do na hinatahon ni Jesus homa: Ijin artamu ijai do uhurmu.
Halak na marpingkir halani pambahenanni do ia maluah, lang ijalo Naibata ai,
halani boi do ia margijang ni uhur halani ai, mapas bani pardousa. Ingat hita Parisei na
martonggo i rumah panumbahan, na mapas bani sijalo sohei. Tapi halak bani Naibata,
bani Tuhan Jesus marhitei idop ni uhur-Ni, ai do rela martarima kasih bani Naibata, bani
Tuhan Jesus. Iahap seng be ia simada tonduy, daging, uhurni, tapi Naibata ma. Halani ai
mintor rela do ia manaksihon Tuhan Jesus songon boru Samaria ai. Rela ma ia
mangorbankon age artani songon si Zakeus. Sonai ma biak ni sagala jolma, na dob
pinaluah, pinagoluh ni Tuhan Jesus bani sagala abad.
Halani ai buktini na porsaya hita humbani uhurta bani Tuhan Jesus, saksihon hita
ma Tuhan Jesus ibagas goluhta. Ase totap aha pe horjanta ibagas na manaksihon ai,
lambin buei ma idop ni uhur, holong ni Tuhan Jesus Napansing humbani rela ni uhurta,
sedo halani paksa.
Tonggo: Ham Tuhan Jesus, paluah Ham ma hanami humbani dousanami halani
daroh-Mu. Ham ma marianan marhitei Tonduy-Mu ibagas uhurnami. Ai
Ham do Tonduy in. Ija do haluahon, ase gabe sipartarimakasih ma hanami
Bamu ibagas haganup pargoluhannami. Amen.
HALELUYA NO. 408:2
2. Marmegah gok tarima kasih,
halani ganup pasu-pasu ‘ge layak-Ni.
Hubanta na totap sirsir tong mambalosi.
Tunggung tumang do tong Tuhanta,
Ia do Raja ni ganup sagala raja.
Ningon hu Bani do ganup unduk marsombah.
Sai tarbarita baen Goran-Ni.
Gok halongangan ganup jadi-jadianni, puji Tuhan, Haleluya.
