PARMAHAN NA MADEAR 1 DESEMBER
BINTANG BUHA SIANG
“Ahu, Jesus, marsuruh malekat-Hu bani nasiam, manaksihon on bani kuria in. Ahu do urat
pakon marga ni si Daud, bintang buha siang na marsinalsal in.”
Pangungkabon 22:16
Anggo isobut Jesus diri-Ni ijon Bintang Buha Siang na marsinalsal ai ma sada tanda
banta paboa dunia pakon tanoh iananta nuan na ibagas hagolapan ope. Halani bintang
marsinalsal pakon borngin na sadalan do ai. Itatap Tuhanta hun Nagori Atas dompak dunia on
hagolapan ope manrungkup dunia on.
Tapi Jesus na boi manondangi in, sedo pitah sanggah borngin dihut do panorang buha
siang (sogod). Ia do boi pasalpuhon borngin na golap in. Ia do na boi pasiangkon uhurta na
golap in, na mambahen sejarah na baru ibagas dirinta marsada-sada. Panorang Advent ma
nuan sidompakkononta. Panorang manjalo parroh ni Jesus na paliharhon uhurta. Pitah Ia do
na boi pasalpuhon kuasa ni hagolapan ai ibagas dirinta. Atap sonaha pe hagolapan na manrajai
dunia on, boi do on ipalihar Tuhan Jesus ai ganup. Jesus sandiri do na patugahkon ai banta,
patut jaloonta ai. Bagei do na pagolpahon pardomuanta pakon Naibata, sonai homa na
pagolpahon mata ni i partonduyonta ase ulang ididah hita na binahen ni Tuhan in banta, tapi
gogohan ope Jesus na marsinalsal in.
Jongjong do hita bani panorang on ibagas bonani tahun kuria na baru. Golap do
pambotohta pasal ari na laho roh, tapi age pe sonai lang pala mabiar hita, ai domma taridah
sinondang ni Tuhanta Jesus, sinondang ni Bintang Buha Siang na marsinalsal. Mardalan ma
hita ibagas haliharon na humbani Tuhanta, lao mangalo-alo ari Pesta Partubuh ni Tuhanta, lao
manjalo bagah-bagah-Ni, lao manjalo hata hagoluhan na humbani Tuhanta. Lang ra miloh
sinondang ni Bintang na dob poltak in, janah sonai do homa haliharon na das hubanta, sai
totap do.
Patut ijalo hita ai, ai dihut age uhurta boi ipasiang, sonai pakon langkahta pe.
Marhasomankon sondang haliharon ni Bintang Buha Siang ari, boi hita mardalan ibagas uhur
na lihar. Golap hinan uhurta nin homa pambotohta, tapi dob manjalo Bintang Buha Siang, ai
ma Jesus Tuhanta in lihar ma haganupan.
Tonggo: Ham Tuhan Jesus, Ham do hansa na boi paliharhon uhurnami na golap in, halani
ai roh ma Ham bannami manondangi uhurnami. Amen.
HALELUYA NO. 27:1+3
1. Patahar ma horbangan in, 3. Martuah do nagori in,
ai domma roh Rajanta in. dob ijalohon Raja in;
Sigomgom raja haganup, Uhurta pe sai sonang do
sitobus jolma haganup. dob masuk Raja in na roh
Siboan hatuahon in Lihar tumang uhurta in,
Paulak hasonangan in. dob roh panondang in hujin
In pe na puji ma In pe na puji ma
Tuhanta Naibata. Tuhanta Naibata
PARMAHAN NA MADEAR 2 DESEMBER
AMEN! HALELUYA!
“Napuji ma Jahowa, Naibata ni Israel, humbani sadokah ni dokahni, ronsi sadokah ni dokahni,
anjaha haganup ma bangsa mangkatahon: Amen! Haleluya!”
Psalmen 106:48
Lang adong boi hatahononta lang mamuji Tuhan Jahowa hita bani sada panorang na
pondok atap tongkin gelah, halani ganup panorang do marisi idop ni uhur ni Jahowa. Humbani
detik parmulaan das hu detik parpudi ni goluhta totap do ibagas idop ni uhur ni Jahowa.
Apalagi anggo ibilangi hita ganup dousanta dompak Naibata, hape lang mintor ipadalan
Naibata uhuman banta, ai lang idop ni uhur ni Naibata na tarlobih ai do mambaen lang magou
hita? Sonai do idingati bangsa ni Naibata sagala pambahenan ni sidea na dob in, panlanggaron
ni ronsi hajahaton ni na lobei ni sidea, gabe iakuhon ma halani idop ni uhur ni Tuhan mando
ase, maluah sidea. Roh ma use pangakuan ni sidea lao mamuji Naibata!
Anggo domma itanda hita idop ni uhur ni Naibata na mangidopi hita, ai lang patut ma
pujionta tongtong Tuhanta? Mamuji Tuhan marhiteihon ni kebaktianta, pambahenanta ronsi
goluhta tene! Artini ai, sedo pitah ari Minggu hansa hita mamuji Tuhanta, seng pitah ari pesta
atap panorang Pesta Natal tapi humbani sonari nari ronsi sadokah ni dokahni goluhta janah
ronsi sadokah ni dokahni do. Haganupan bangsa do boi mamuji Tuhan in, mangkatahon:
Amen! Haleluya! Ibagas Jesus Kristus do saud on. Ulang das hatadingan hita, lang boi dihut
mamuji Tuhanta. Nuan do pasomal somalonta mamuji Tuhan in. Anggo domma holi das bani
panorang paruhuman ai, tontu lang tarhatahon halak na so ongga mamuji Tuhan in be hata
puji-pujian: “Amen, Haleluya,” halani seng marurat hata ai bani uhurni.
Anggo lang dihut hita mamuji Tuhanta sadokah ibagas goluhta on, tontu magira pe lang
dihut hita mamuji Tuhanta. Amen, nai ma tongon; Haleluya, puji ma Jahowa! Sonai ma
pangakuanta age sadari on, tarlobih lao mangalo alo Jesus Sipaluah in ibagas panorang Advent
on!
Tonggo: Ham Tuhan Naibata, pitah Ham do sipujionnami sadari on, patar pe, ronsi
sadokah ni dokahni. Padihut Ham ma hanami magira rap pakon hasomannami
na porsaya in i lobei-Mu mangkatahon: Amen! Haleluya! Amen.
HALELUYA NO. 403:1-2
1. Sai puji ma Tuhanta tongon, 2. Seng dong songon-Si i tanoh on,
na marmuduhon goluhta on. na mangurupi hita tongtong.
Dodingkon ma goran-Ni tongtong lhopkop do ganup hita on,
na manobus hita pardousa on seng adong na tading humbanta
Amen, haleluya, sai puji Amen, haleluya, sai puji
Tuhan Naibatanta na sangap in. Tuhan Naibatanta na sangap in.
PARMAHAN NA MADEAR 3 DESEMBER
GALANGAN
“Mandalankon na madear ampa marsibere-bere, ulang ma halupahon nasiam ai, ai galangan
na sonai do iharosuhkon Naibata.”
Heber 13:16
Marhitei na mambotoh harosuh ni Naibata, na botoh ma homa sonaha sikapta i lobei ni
Naibata. Hotop do ihorjahon hita sada horja, hape lang nabotoh atap na mardomu ai atap lang
bani Naibata, dobni hita pe sangsi do manghorjahon ai. Sipata na madear ma ninuhur sada
horja i tongah-tongah ni kuria in, hape apala na marlawanan do ai bani paraturan na marlaku.
Ra do homa laho mangurupi hasoman ninuhur, hape ai do na use paboratkonsi. Ase ulang
masa sisonai ai dompak hasoman tarlobih dompak Tuhanta, porlu lobei botohon naha do
harosuh-Ni.
Na hinarosuhkon ni Naibata ai ma galangan, galangan puji-pujian, na ginoran homa
galangan buah ni bibir. In ma na sinobut: Galangan kebaktian. Galangan sisonon seng singgan i
parmingguan hansa marlaku atap sanggah i partonggoan, tapi dihut do age marhitei goluh
pakon horjanta siganup ari. Artini, galangan puji-pujian maningon do homa marpambahenan
na taridah. Anjaha seng tarsirang na dua pahara on. Ase lang boi hape hatahononta sonon:
Marminggu gelah dihut diri domma sungkup, anggo na mambangun Gareja atap mambayar hu
kas idop ni uhur lang pala. Sonai do homa age sebalikni lang boi hatahononta: “Anggo dong na
porlu sibangunon i Garejanta, atap guguan aha pe ai, ulang lupa nasiam managih ai
humbangku, tapi anggo marminggu ulang pala loja nasiam mangarahkon ahu, nasiam ma ijin!”
Horja na madear do na mambere, sonai age na markebaktian, tapi ulang sada hansa na
horjahon, tapi haduasi do ai! Ai do galangan na hinarosuhkon ni Tuhanta. Anggo sada do
hansa nahorjahon, usih hubani na mambere duit na so laku do ai, na so margambar timbal
balik, huja pe lang tarpadalan, gariada gabe sisangsionkon use anggo dong halak na manjolom
sisonai ai. Galangkon hita ma na hinarosuhkon ni Naibata.
Tonggo: Jalo Ham ma galangannami marhitei partonggoan pakon kebaktian nami,
marhasoman pambahenannami na otik in, ale Tuhan. Ia manggalang pe hanami,
na hum Bamu do ijalo hanami ai. Amen.
HALELUYA NO. 29:1-2
1. Hanima na porsaya in, 2. Marmegah-megah uhur ma,
sai alo-alo Jesus in, sagala na bujur homa,
pahinsah uhur nima. lao mangirikkon Jesus.
Dohor ma ari pesta ni In pe rombang patidak ma,
ganupan kuria-Ni in, megahmu bani Naibata,
bai ari partubuh-Ni. pasaud ma harosuh-Ni.
In pe, laho ma hanima Puji, puji Jesus Kristus
baen adatni manjalohon, na manobus tonduynima,
na marayak hajolmaon Humbai hamagouannima.
PARMAHAN NA MADEAR 4 DESEMBER
OLOB-OLOB, HATUAHON PAKON HAMONANGAN
“Sora olob-olob pakon hatuahon do maraloling bani lampo-lampo ni halak parpintor. Siamun
ni Jahowa do sibahen hamonangan.”
Psalmen 118:15
Bagei janah buei do sora na boi ibogei hita. Dong na nanget, dong na gomos. Ganup na
manggoluh boi do pabogeihon sorani. Dong sora na mambahen ngernger pinggol, dong homa
sora na sodap tangaron mambahen hurang-hurangan diri manangar.
Bani Psalm 118: 15 on isobut do samasam sora na maraloling, ai ma sora olob-olob.
Sumber ni sora ai, in ma halak parpintor, sihabiari Jahowa na dob manjalo janah mangakui na
ronsi sadokah ni dokahni do idop ni uhur-Ni.
Dihut do hatuahon boi maraloling, lang hape pitah sora na kaluar humbani pamangan.
Gomosan tene sora ni hatuahon ai. Ai ma homa mambahen akuonta na gomosan do ambilan
marhitei pambahenan marimbang marhitei sora atap hata-hata.
Aha do isi ni sora ni parpintor in? Ai ma sada hasaksian na mangakuhon: “Siamun ni
Jahowa do sibahen hamonangan.” Pangakuan atap hasaksian on, in ma pengalaman ni parPsalmen
118. Age bani sejarah ni Bangsa Israel torang do munsuh ni Bangsa Israel. Maruntol
do sidea bani sejarah ni goluhni. Bahat do hal-hal na sihol padaohkon sidea humbani Naibata.
Hotop hurang sipanganon, ipardakdak Bangsa Filistin, Amalek pakon na legan. Ge pe sonai
maluah janah monang do sidea. Ganup ai lang halani gogohni, tapi halani gogoh pakon kuasa
na humbani Naibata do.
Masuk ma hita bani panorang Advent. Artini managam bani Tuhanta na dob roh janah
na laho roh use. Marhitei ambilan na pondok on iulgapi use uhurta ase lambin marolob-olob
hita halani hatuahon pakon hamonangan na dob ipasirsir Naibata marhitei pambahenan bani
goluh on, age marhitei partonggoan, parmingguan, mambasa hata ni Naibata pakon horjahorja
pangidangion na legan.
Tonggo: Pargogohi Ham ma hanami Tuhan, ase lambin maraloling olob-olob
pamujionnami Bamu, hinorhon ni hamonangan na dob ibere Ham bennami.
Amen.
HALELUYA NO. 4:1+5
1. Puji Jahowa na sangap 5. Puji Jahowa, tonduyhu,
anjaha mardohar. pasangap goran-Ni
Hita ganup na ringgas Pakon ganup na marhosah
na megah maruhur. mamuji hu Bani.
Martumpu rup, Ai do talup,
marolob-olob ganup, baenon ni hita ganup,
haganupan manisia. dodingkon hita ma amen.
PARMAHAN NA MADEAR 5 DESEMBER
PASIRSIR DALAN
“Pasirsir dalan ni Jahowa i halimisan, bahen pintor dalan na bolon bani Naibatanta i tanoh
dorging-dorging.”
Jesaya 40:3
Sanggah peresmian Tugu Pahlawan Revolusi Jenderal D.I. Panjaitan i Balige Tapanuli
Utara, roh do hujai Bapak Presiden RI. Soeharto. Hinorhon ni parrohni ai, ibahen Pamarentah
pakon masyarakat Sumatera Utara do persiapan penyambutan bani. Hun lapangan Terbang
Polonia nari das hu Balige ipadear do sagala dalan na maseda. Na marlubang-lubang itimbun
janah iaspal. Pekarangan rumah na i topi ni dalan maningon borsih janah ihondor. Bandera
Merah Putih ikibarhon janah tarlobih babuy lang boi maluah. Anggo maluah itembak. Ganup
on ibahen dalam rangka menyambut parroh ni Presiden Soeharto.
Anggo sonai ma ibahen jolma penyambutan mangalo-alo sada pembesar, maningon
lobih hunjai mangalo-alo parroh ni Anak ni Naibata Sipaluah hu dunia on. Ai ma marhitei
pasirsir dalan Bani. Na porlu sedo ase marompot hita bekerja bakti. Lobih hunjai. Ai ma ase
pasirsir hita diri pakon hauhuronta laho manjumpahkon-Si. Manjumpahkon Jesus Kristus na
dob roh hu dunia on, janah na laho roh use. Piga piga minggu nari pestahononta do use Hari
Natal. I Sumatera Utara ma sibahatanni jolma mamestahon marulak-ulak Hari Natal. Rado
dong sada-sada halak sapuluh hali ia mar-Natal ibagas na satahun. Ibagas na mamestahon
Natal, na porlu sedo ase ibahen hita pesta-pesta duniawi janah persiapan hujai marbois gogoh
hita ibagas dana, panorang pakon pingkiran. Hadirion pakon hauhuronta do na porlu sirsir,
dear, borsih laho mangalo-alo-Si. Hataridahanni ai ma marhitei na paubah uhur mardalan
ibagas damei, holong, hasintongan pangarapan.
Humbani Padan Nabasaia nari das bani sadarion metode atap cara pangalo-alo bani
Tuhan Naibata, na hinarosuhkon-Ni ai ma marhitei pasirsirhon hauhuron pakon diri. Ase saud
Ia tubuh janah hundul i luluan i tongah-tongah ni rumah tangga, gereja ronsi masyarakat pe.
Anggo sonai ibahen hita saud ma maluah janah martuah hita bani parroh-Ni.
Tonggo: Ham Tonduy Napansing, roh ma Ham bannami, mangajari hanami, ase sintong
hanami mangalo-alo janah manjalo Anak ni Naibata, Jesus Kristus Tuhannami.
Amen.
HALELUYA NO. 28:1+3
1. Naha ma panjalongku, 3. Ai seng be dong na hurang
Bamu, o Tuhankin? Pinasirsir-Mu on
Naha panjumpahkonku, Mambaen hubangku suang
Bamu, o Rajangkin? damei ni uhurhon.
Sondangi Ham uhurhu, Marhoru pe uhurhu,
na golap, na bodoh. binaen ni dousangkin
Ai sihol bahenonku Roh do Ham Sipagoluh
do hamegahon-Mu. Pamalum uhurhin
PARMAHAN NA MADEAR 6 DESEMBER
MAMBAHEN NA MADEAR
“Marmalas ni uhur do Ahu mambahen na madear bani sidea, anjaha suanon-Ku do sidea
tongon-tongon i tanoh on, humbani gok ni uhur pakon gok ni tonduy-Hu.”
Jeremia 32:41
Sada horja ni Naibata na adong humbani mungkahni das bani panorang sadari on ai ma
mambahen na madear. Ia do bah tubuh hadearon janah paruhur na madear (Lukas 18: 18). Na
madear ai ihorjahon ibagas malas ni uhur, lang ibagas gila atap paksa. Ibahen sonai ge pe
domma madabuh jolma in hubani dousa, songon na masa bani panorang ni Nabi Jeremia.
Maksud ni Naibata sonai, sonaha ase maluah, manggoluh janah marhasonangan jolma in.
Bani Jeremia 32:41 nongkan ihatahon na isuankon do sidea hu tanoh on humbani gok
ni uhur pakon humbani gok ni tonduy-Ni. Mararti na marsangaja do Naibata manempatkon
halak na dob pinilih-Ni i dunia on, ase itoruskon sidea harosuh ni Naibata.
Anggo ipardiateihon hita jolma inggot iananta bani panorang on, hurang do
iharosuhkon mambahen na madear on. Marsisuli-sulian do halak manlahoi. Anggo lang adong
‘masukni’ ninggan ni hata sonari, lang ra halak mangkorjahon. Umpamani paborsihkon parit,
ge pe na marguna bani do ai. Tapi anggo dong do ‘masukni’ ia horja aha pe ai, sagala cara do
ibahen halak.
Sebagai halak Kristen maningon marahu-ahu do hita mambahen na madear. Lang pitah
bani hasoman atap famili na terdekat, tarlobih ma bani halak na so porsaya bani Jesus Kristus.
Marhitei na sonai do hita siboan Ambilan Na Madear bani sidea.
Horja sibahenon ai lang pitah bani horja na banggal-banggal tapi tarlobih bani horja na
etek-etek na hotop lang sai tarjai uhurta. Umpamani: Ra tias, marpanisei na suman,
panlangkah na porman, pakon buei tindakan na legan.
Ganup horja ai ibahen hita halani Jesus Kristus na dob mambahen na madear banta,
iporsan do silang-Ni das bani na matei Ia, laho manghopkop hita.
Tonggo: Ham Tonduy Napansing sirsir do hanami ipadear Ham ibagas goluhnami ari-ari.
Ase marhiteihonni ai lambin iharinggashon hanami mambahen na madear,
romban hubani harosuh ni uhur-Mu. Amen.
HALELUYA NO. 145:1+3
1. Ringgas hita rup. 3. Horjahon bujur
manogu ganup, Hata-Ni ganup,
na pag manendel sai monang jojor
na hengkeng hobal, baenon-Ni ganup.
bai hata ni Tuhan, Ai Ia do Raja
na sangap tongtong na monang tongtong,
rosuh-Ni ma bahen patitir pe bala
i dunia on manginsurut tong.
PARMAHAN NA MADEAR 7 DESEMBER
BANGSA NA PINARMAHAN NI JAHOWA
“Tapi anggo hanami, bangsa-Mu ampa biri-biri na pinarmahan-Mu, sai Ham do pujionnami
sadokah ni dokahni, anjaha baritahononnami do puji-pujian Bamu, marsundut-sundut.”
Psalmen 79:13
Ganup na tinompa in Naibata do simada pakon na marmahani. Gok bani Naibata do
langit ampa tanoh on ampa haganup isini. (Psalm 24: 1) Ididah hita, mardalan do torsa ganup
binatang na i parlangitan, sonai age dunia on ampa ganup isini. Naibata do tongon na
marmahani, ase ganupan in totap mardalan bani na torsa. Ninta sipata, pardalanni ai ganup
manurut alam. Sasintongni mardalan ganup ai halani parmahanion ni Naibata do.
Das hubani ganup goluh ni jolma pe, Naibata do na marmahani. Tapi age pe sonai, dong
do jolma atap bangsa na so mangakui, na so mangkaporsayai parmahanion ni Naibata bani
goluhni. Tapi par-Psalmen ai, ihaporsayai anjaha iakui das hubani na isaksihon homa, Naibata
do na marmahanisi. Anjaha dihut mambaritahon puji-pujian bani Jahowa.
Naha nani hita, iakui hita do Naibata na marmahani hita? Ra do hita on marsada-sada
iparmahani Naibata? Anggo ra do, sai tong sitangihon hata ni Naibata ma hita, sidalankon
Hata-Ni. Ai Hata ni Naibata do na langsung marmahani hita bani panorang on.
Ase anggo tongon do ihaporsayai hita parmahanion ni Naibata banta, hinorhon ni ai ma
mamuji Naibata tongtong goluhta, anjaha marusaha tongtong hita mambaritahon pujipujianni.
Ase anggiat hinorhon ni ai roh halak na legan gabe dihut mangakui anjaha
mangihutkon parmahanion ni Naibata.
Ise na ra iparmahani Naibata ai do na saud monang anjaha sonang das hubani ujungni.
Tonggo: Ham Tuhan Naibata Bapanami, Ham do tongon na marmahani hanami. Sai ra ma
hanami iparmahani Ham bani ganup goluhnami, janah pargogohi Ham ma
hanami mambaritahon puji-pujian Bamu. Amen.
HALELUYA NO. 245:1+7
1. Na marmahani hita 7. Sihol pasonangon-Ni
parholong atei in. ganupan hita on;
In ma Jesus Tuhanta, Sihol arahkonon-Ni
sibere tuah in, hu Surga hita on,
sibere tuah in. hu Surga hita on.
PARMAHAN NA MADEAR 8 DESEMBER
PALUAHKON DO SURA-SURA NI NAIBATA
“Ai seng isuruh Naibata Anak-Ni in hu dunia on, laho manguhumi dunia on, tapi ase maluah do
dunia on marhiteihon-Si.”
Johannes 3:17
Panorang on domma imasuki hita musim atap pe Minggu Advent. Na mararti do ai,
tarsapuluh pitu ari nari das ma hita hubani Pesta Natal, aima pesta pardingatan partubuh ni
Tuhanta Jesus Kristus, Sipaluah in.
Anggo ipardiateihon hita tahun hu tahun setiap bulan Desember, lambin semarak do
acara perayaan Pesta Natal in. Jadi, lang be pitah bani tanggal 25-26 Desember tumang
irayahon, tapi humbani awal Desember bani Minggu Advent I pe domma adong na marpesta
Natal bani piga-piga ianan atap daerah. Bahkan das hubani akhir Desember pe sai adong ope
na mambahen acara Natal.
Bani zaman modern on, marbagei model acara Natal na boi iidah hita anjaha iananni pe
lang pitah i Gereja atap i daratan on, tapi i udara pakon i dasar laut pe domma adong na
manlaksanahon perayaan Pesta Natal. Hansi pe 1001 masam rumang ni acara Natal in, tapi
anggo motivasi pakon tujuanni totap do maronjolan hubani, realisasi ni rencana/sura-sura ni
Naibata aima: “Haluahon, marhitei na marsuruh Anak-Ni hu dunia on.”
Jesus Kristus Anak sasada ni Naibata, domma roh hu dunia on. Ia na dob tubuh, matei
anjaha mulak manggoluh laho mamparjuangkon haluahon ni dunia on. Dunia na dob madabuh
hubani tinompa na legan na dob mardousa, gabe maluah humbani uhuman ni Naibata. Hal on
aima halani banggal ni holong pakon idop ni uhurni Naibata do bani dunia on. (Joh 3: 16a)
Sabonar ai do sura-sura ni Naibata humbani mungkahni das hubani ujungni, humbani na dob
in, sonari ronsi sadokah ni dokahni. Porsaya do ham na dob dihut ipaluah?
Hita na dob porsaya, sonaha janah aha ma na talup bahenonta maradopkon Tuhanta
Sipaluah in? Tontu tene, lang sungkup pitah mangadongkon upacara-upacara seremonial
Pesta Natal songon na masa bani zaman komputer sonari on.
Tonggo: Hasangapon pakon puji-pujian ma sombahnami Bamu, Ham Naibata, Tuhan
Sipaluah. Sai iajari anjaha ipargogohi Tonduy-Mu ma hanami laho
mangkagoluhkon haluahon nabinoanni Anak-Mu, Jesus Kristus. Amen.
HALELUYA NO. 29:1-2
1. Hanima na porsaya in, 2. Marmegah-megah uhur ma,
sai alo-alo Jesus in, sagala na bujur homa,
pahinsah uhurnima. lao mangirikkon Jesus.
Dohor ma ari pesta ni In pe rombang patidak ma,
ganupan kuria-Ni in, megahmu bani Naibata,
bai ari partubuh-Ni. pasaud ma harosuh-Ni.
In pe laho ma hanima Puji-puji Jesus Kristus
baen adatni manjalohon na manobus tonduynima,
na marayak hajolmaon humbai hamagouannima.
PARMAHAN NA MADEAR 9 DESEMBER
ANAK HAHOLONGAN
“Lanjar nini sada sora na hun Nagori Atas: On do Anak, haholongan ni uhur-Hu, marosuh do
uhur-Hu mangidah-Si.”
Mateus 3:17
Bani na isobut anak haholongan ni uhur bani ayat on, sedo sora na roh hun dunia on
atap pe sora ni jolma. Tapi sora on na roh hun Nagori Atas aima humbani Naibata Bapa na
itujuhon hubani anak-Ni Jesus Kristus. Halani bani dirini Jesus Kristus jumpah harosuhni Bapa
in aima ibagas na sirsir martoruh ni uhur songon na isobut Paulus bani Pilippi 2:5-8. Hal on
memang jelas anjaha nyata do; dob ididi si Johannes Tuhan Jesus Kristus i Bah Jordan gabe
tarbogei ma sora songon teks ni ambilan na i atas in. Jesus na tongon-tongon patoruhkon diriNi
anjaha sipambalosi, sirsir do Ia ididi si Johannes. Lang homa mulai hunjon pambalosion
Tuhan Jesus, tapi humbani tubuh i harang ni pinahan das hubani matei tarsilang. Halani ai
patut do sobuton ni Naibata hubani Tuhan Jesus Kristus in: Anak haholonganni uhur-Ni
anjaha harosuh ni uhur-Ni.
Hubani hita haganupan na martumpu das bai panorang on aha na boi sobuton ni
Naibata bani dirinta? Anggo itonggor humbani hajongjonganta sora bura-bura pakon bursikbursik
mando jaloonta humbani Naibata, ai gok dousa uhur pakon pingkiran.
Tapi tarimakasih mahatahononta hubani Tuhan Naibata halani Anak haholongan-Ni in domma iangkat
martabatta gabe ipaanak hita bani Naibata ai ma marhiteihon pandidion in ibagas
haporsayaon. Bahkan Paulus manokankon use domma anak ni Naibata hita haganup anggo
porsaya hita bani Kristus Jesus songon na bani Galatia 3: 26.
Jadi marhiteihonni Jesus in do gabe ibere hubanta mandat anak in bani Naibata, halani
ai sirsir ma hita mewarisi pargoluhonni Tuhan Jesus in ma goluh ibagas gok holong,
hasabaron, damei, lamlam maruhur pakon malas ni uhur bani na menghadapi ari-ari ni goluh
on marhiteihon pangurupion ni Tuhan in.
Halani ai anggo sirsir hita mewarisi pargoluhan ni Tuhan Jesus Kristus in bani goluh on
dihut ma homa hita mewarisi sora ni Naibata na hinatahon-Ni bani Anak-Ni in ai ma Anak
haholongan-Ni pakon harosuh-Ni. Ra do ham/hita jadi anak haholongan pakon harosuhni
Naibata? Anggo ra do, irikkon hita ma Tuhan Jesus.
Tonggo: Ham Tuhan Naibata, tarima kasih ma Bamu, anjaha Ham Tuhan Jesus togu Ham
ma hanami ase gabe anak hanami bani Bapa in, pakon Ham Tonduy Napansing
ajari Ham hanami mangirikkon Jesus Kristus. Amen.
HALELUYA NO. 107:1-2
1. Irikkon nasiam ma Au, 2. Au do palihar dalanmin,
sonai nini Tuhanta. na dompak hagoluhan;
Sai parnalang ma dirimu, Ai seng be kahou langkahmin,
Hatang-Ku malah harga. daoh pakon hamagouan.
Sai mambur bahenlah ganup, Au parhiteian na bujur,
parlahoumin na so talup. bai hasonangan na botul.
PARMAHAN NA MADEAR 10 DESEMBER
GORAN JESUS DO
“Tubuhan anak ma ia, anjaha bahen ma goran-Ni Jesus, ai paluahon-Ni do bangsa-Ni humbani
dousa ni sidea.”
Mateus 1:21
Anggo dong sada anak boru boratan rumah lang sai iharosuhkon hita jolma. Maria
boratan rumah iharosuhkon jolma janah iharosuhkon Naibata, halani humbani Tonduy
Napansing. Maria sirsir mambere dirini pakon mandalankon rencana pakon harosuh ni
Naibata. Ibagas hasirsiron ni ai buei de jolma lang dihut mangurupi Maria laho pasaudkon
harosuh ni Naibata, marhitei na lang sirsir manjalo Maria pakon Josep i rumahni. Ganup
rumah na i rohi mangkatahon lang dong ianan bani sidea. Harang ni pinahan gabe ianan
partubuh ni Tuhan Jesus. Gati do hal na sonai tarjadi bani goluhta on. Na patut gabe pangurupi
bani rencana ni Naibata, lang marhasirsiron. Sihol ma namin hita na dob manjalo hatani
Naibata pasirsirhon diri, na dong banta ronsi rumahta laho pasaudkon rosuh-Ni tarlobih ianan
partubuh Jesus.
Goranni na tubuh ai, ai ma Jesus, tangkas do ipatugah horja-Ni laho paluahkon bangsaNi
atap pe hita humbani dousanta. Bani panorang on iulakkon use patugahkon ai hu tongahtongahta
bani Pesta Pardingatan partubuh-Ni. Bani Johannes 9: 5 Jesus do panondang ni dunia on, panondang bani hagolapan.
Sonai ma Jesus gabe panondang ibagas uhur pakon goluhta na golap.
Na golap aima lambang ni bageini horjanta na lang iharosuhkon Naibata, sitaronon
pakon bagei paruntolonta. Hita na dob manjalo haluahon nabinoban ni Jesus isuruh do gabe
panondang i dunia on (Mat 5: 14). Janah na bertanggungjawab do laho padashon ambilan
malas ni uhur in humbani hasomanta na lape pakon na hurang manjalo haluahon pakon
panondang na humbani Jesus.
Ase bani panorang on iarahkon do hita pataridahkon haluahon na dob ijalo hita bani
horja pakon parsaoranta tarlobih mansondangkon panondang na humbani Jesus hubani
ganup jolma.
Tonggo: Tarimakasih ma bamu Tuhan halani ibere Ham haluahon hubannami marhitei
Jesus Kristus, domma homa ondos bannami na sinuruh-Mu laho padashon
rosuh-Mu pakon hata-Mu. Janah bani panorang on ibagas na dob ijalo hanami
haluahon in, gabe siparambilan ma tongon hanami sadokah ni goluh nami.
Amen.
HALELUYA NO. 349:1-2
1. Goran Jesus sai marsora, 2. Goran Jesus marsinondang
bai ganup dunia on. bani laut ‘ge tanoh in.
Goran Jesus pasonangkon, Marmalas ni uhur hita
ganup na marhoru in. pasangapkon goran-Niin.
Goran in marpasu-pasu, Magou ma pusok ni uhur,
bai ganup pardousa in. halani goran-Ni in.
Goran Jesus sijengesan, Anggo porsaya bai Jesus
lao paborsih uhurhin. Jesus talu do na jahat in.
Haganupan do idilo, Goran Jesus sijengesan,
bani gomgoman-Ni in. lao paborsih uhurhin.
Martarima kasih ahu, Martarima kasih ahu
ibaen na itobus au. ibaen na itobus au.
PARMAHAN NA MADEAR 11 DESEMBER
TOTAP TAGAM
“Sai margondit ma binongeinima anjaha gara ma lampunima. Anjaha usih ma hanima bani
jolma na paima-imahon tuanni, sadihari ia roh hun parunjukan, ase mintor iungkab ia
rohkonsi ia mangkartuki.”
Lukas 12:35-36
Bani tahun 1963 i Binjei, husungguli do sahalak ABRI hasomanku, ningku sonon: Mase
lang roh ham bani padan na dob tinontuhonta? Ngolngolan diri paima-imahon. Roh balosni
sonon: Yah… Tiba konsyinyering hanami dahkam. Aha konsyinyering ningku? Roh balosni
sonon konsyinyering ai ma parentah ni komandan, ase siap siaga haganup kesatuan tentara
janah lang boi manadingkon pos. Siap siaga artini use, ai ma: Berpakaian lengkap songon na
siap tempur janah totap marjaga-jaga bani pos ni bei.
Usih hujai do ambilanta on. Iumpamahon Tuhan Jesus do bani lumba-lumba-Ni ase sai
margondit binongeita anjaha gara lampunta. Atap ase totap hita konsyinyering bani goluhta
on. Margondit binongei mararti do ai, totap bergairah, bersemangat, janah ibagas malas ni
uhur, ulang lolei.
Bani ayatta on domma jelas ibotoh sipangalo-alo on, bahasa na positip do, resmi do
tuanni ai laho roh. Hansi panorang sadihari, jam piga, lang ibotoh halani ai maningon totap ia
tagam.
Jadi apala na penting sonari ai ma, sonaha dalanni ase boi ilaksanahon hita bani
goluhta ari-ari na totap tagam on?
1. Ulang tanggal gondit hubanta, totap pakei. Maksudni ai ma, ulang marnaholang hita
mamuji pakon pasangapkon Tuhanta, manangihon Hata ni Naibata, mandoding pakon
martonggo.
2. Ulang mirlop-iriop lampunta atap miloh, maksudni: Ulang marsipata-sipata sompat
ibahen hita martonggo on dompak Naibata atap ulang mintor total lang ihaporluhon
uhurta na pasangapkon pakon na mamuji Tuhanta.
3. Sabonar ulang ma adong tubuh ibagas uhurta, holi pe, bani tuani goluhku ma, anggo
sonari sanggah poso ope angkula. Ulang sonai.
Tapi ingat hita ma: Martuah ma halak na totap haporsayaonni, ai rohkonsi panorangni
marturiak pakon Tuhanta jumpahsi ma malas ni uhur sisadokah ni dokahni.
Tonggo: Ham Tuhan Naibata na marianan i Nagori Atas, suruh Ham ma Tonduy-Mu
Napansing in marianan ibagas uhurnami ganup ari, ase Tonduy-Mu in
mamparuhuri pakon mampargogohi hanami, ase boi hanami totap ibagas na
tagam, na bergairah, na bersemangat bani goluhnami on. Amen.
HALELUYA NO. 184:1-2
1. Manjaga ma hanima 2. Pasirsir suluhnima,
na bujur uhur in; gok minak bahen in.
Nahiti suluhnima Managam Tuhannima
ai roh ma borngin in. siboban Tuah in!
Na roh ma Siparunjuk Ai na marjaga Sion
bai tunangan-Ni in. do na mandilo Ham;
Na tong mangkasiholi Dohor ma hatuahon,
Parunjukan-Ni in. roh ma Rajamu bam.
PARMAHAN NA MADEAR 12 DESEMBER
DILO MA JAHOWA IBAGAS HASINTONGAN
“Dohor do Jahowa bani sagala na mandilo-Si, bani haganup na mandilo-Si ibagas hasintongan.”
Psalm. 145:18
Anggo rap mardalan orangtua pakon niombahni na danak ope, iusahahon niombah ai
do ase orod, dohor, rapat ia tong pakon orangtuani. Mabiar do niombah ai padaoh-daoh pakon
orangtuani ai, mase? Ai ma halani pitah hubani orangtuani ai do hansa pos ni uhurni. Lang
adong iahap habiar anggo dohor ia tong bani orangtuani. Janah porini dong na mangganggusi
mintor do idilo orangtuani ai.
Sonaha hita dompak Naibata Jahowa? Iusahahon hita do ase tong dohor hita Bani?
Anggo Jahowa dohor do tong bani sagala na mandilo-Si, bani sagala na mamorluhon-Si, bani
sagala na marusaha rapat tong hu Bani. Janah sebalikni daoh do Naibata Jahowa bani sagala na
so mandilo-Si, bani sagala na tidak mau tau hu Bani. Sonaha dong do idilo hita Naibata Jahowa
bani goluhta siganup ari? Ise do idilo hita bani panorang malas ni uhurta atap bani panorang
pusok ni uhurta? Mandilo Jahowa mararti do ai berhubungan, berkomunikasi, marsaor tong
pakon Naibata Jahowa janah manurut hata na somal bani ha-Kristenon ai ma martonggo tong
dompak Jahowa, ipuji janah ipasangap Jahowa do ia martonggo mangindo pangurupion. Tapi
porlu botohonta homa, ia na mandilo Jahowa lang asal dilo-dilo, martonggo bani Jahowa lang
asal tonggo-tonggo, tapi pandilo ai, tonggo ai maningon ibagas hasintongan do.
Ambilanta on ai ma Doding Puji-pujian ni Raja Daud dompak Jahowa sanggah goluhni.
Iahapkon Raja Daud do sonang ni na mandilo Jahowa bani goluhni, aha pe lang hurangni
iahap, hansi pe Raja Daud hotop maruntol, hotop madabuh hubani dousa sehingga manaron
ia. Sai Jahowa ma dilo hita bani goluhta ari-ari ai sirsir do Ia tong manangihon, mambalosi
pakon mambere na porlu banta romban bani harosuh ni uhur-Ni. Anggo sonai dapot hita ma
malas ni uhur bani goluh on janah sanggup ma hita manantang sagala liku-liku ni goluh ari-ari.
Tonggo: Ham Tuhan, ajari Ham hanami mandilo goran-Mu ibagas hasintongan, balosi
Ham dilo-dilonami, balosi Ham tonggo pangindoannami romban bani harosuh
ni uhur-Mu. Amen.
HALELUYA NO. 451:1+3
1. Sihol do uhurhu, 3. Ham do patorsahon,
patimbulhon Ham Jahowa, pardalanan ni goluhku,
na pagoluhkon au pardousa. ase ulang ahu tarbador.
Sanggah na hudilo, Ham do parlingodan,
Goran-Mu lao mangurupi, dolok batu baen gantarhu,
sirsir do Ham roh mambalosi ase boi au marmalas uhur.
Itogu Ham do, Itogu Ham do,
au humbai lombang bagas, au humbai lombang bagas,
In ma ianan hagolapan. in ma ianan hagolapan.
Sai boban Ham ma au hu Nagori Atas, Sai boban Ham ma au hu Nagori Atas,
ase tongtong marhasonangan. Ase tongtong marhasonangan.
PARMAHAN NA MADEAR 13 DESEMBER
PINGKIRAN NI NAIBATA
“Tapi tarbahen-Si do lobih humbani na pinindonta barang na piningkiranta, domu hubani
hagogohon na marhorja ibagas hita.”
Epesus 3:20
Buei do halak na marmalas ni uhur halani dapotsi songon na pinindoni, songon na
piningkiranni sesuai hubani rencanani sonai age waktu na binuhulni pe topat. Dear do ai, dear
do bangga positip hita. Tapi sada sidingatonta bahasa buei homa do na so tercapai
pangindoanni pakon pingkiranni lang dapot sesuai hubani programni. Malah deba hotop
homa suhar humbani na pinindoni pakon pingkiranni na tarjadi. On ma buktini na terbatas do
pingkiran ni hita jolma janah na mambuktihon homa bahasa na adong do sintong Naibata ai
ma na marhagogohon i luar ni hagogohan ni jolma. Anggo Apostel Paulus pakon halak Kristen
na sintong tubuh ma pangakuanni pakon haporsayaonni bahasa on ma pingkiran/hagogohan
ni Naibata. Jadi halak Kristen anggo mambahen sura-sura pakon perencanaan ia,
ipangindohon do bani tonggoni ase jorei mardalan programni ai romban hubani harosuh ni
uhur ni Tuhanta, janah ipangindohon ase gagal rencana ai anggo lang romban bani harosuh ni
Tuhan.
Porini roh sungkun-sungkun hubanta sonon: Halani buei ni jenis ni hagogohon,
hagogohon aha do na marhorja ibagas uhurta? Anggo hagogohon na hun dunia tumang do,
atap pe hagogohanmu tumang do dob ni manjurus hu bani na so harosuh ni Naibata do na
mangakibatkon pusok ni uhur atap patubuhkon pandoleion.
Ibotoh hita do sonaha pusok ni uhur ni si Jakob halani peristiwa na terjadi bani anak
kasihanni si Josep. Hape dob dokah ibotoh ma bahasa na maningon melalui proses na sonai
hape mardalan pingkiran ni Naibata ase jadi Raja si Josep i Tanoh Masir pakon ase gabe
penyelamat si Josep bani saninani sanggah musim lohei maningting. Bagas do artini falsapah
ni Simalungun na mangkatahon sonon: Na matobu ulang mintor ni bondut, janah na mapaet
ulang mintor ni utahkon. Buei do janah bagei do sura-suranta, na piningkiranta, rencananta
atap pe ai pangindoan ni niombahta, horjanta sonai age tahun na roh on, dear tumang anggo
iondoshon hita ai haganup hulobei-lobei ni Naibata pajoreihon romban hubani harosuh ni
uhur-Ni.
Tonggo: Tuhan tarbatas do jangkauan ni pingkirannami pakon gogohnami, tapi anggo
Ham tarbahen Ham do haganup. Halani ai hu Bamu do hanami marondos bani
haganup goluhnami ari-ari sonai pakon pingkirannami, rencananami ase
mardalan romban hubani harosuh ni uhur-Mu. Amen.
HALELUYA NO. 126:1-2
1. Dear ni in panogu-Mu, Jahowa, 2. Ai mintor ra Tonduy-Mu mangirikkon,
bani ganup na pinarmahan-Mu. bai titah na binaen ni jolma in?
Seng anjai roh baenon-Mu na dorsa, Ham na tongtong tarlobih in maruhur,
seng tarponopkon Ham be bujur-Mu. sai sura-sura-Mu do saud in.
Gati suhar do pambahenan-Mu, Sai talu do na pag mangimbang Ham,
bai uhur ni na so mananda Ham, age ganup marbois gogoh in;
hape halani in marrohan bei, Ai Ham do na so halompouan in;
bai hatorangan na tinobus-Mu. maningon saud do sura-sura-Mu.
PARMAHAN NA MADEAR 14 DESEMBER
JOLOM HAM MA SORTALIMU
“Barah ma Ahu roh! Jolom ham ma na dong bamu, ulang dong na mambuat sortalimu.”
Pangungkabon 3:11
Ibere Jesus do diri-Ni gabe haluahonta. Iajari ronsi ipodahi do hita ase tong mardalan
ibagas harosuhni Tuhanta. Ambah ni ai ope ibere do pangarapan banta, bahasa marhitei
haporsayaonta hubani Jesus Kristus mangkorhon haluahonta.
Ibagas na mangkajongjonghon haporsayaon ma hita gati maruntol halani bagei ni
tantangan ihadapi. Sonai do homa keadaan ni Kuria Filadelfia, ianan huja ikirim si Johannes
pangungkabon on. Bani panorang na paima-imahon, loja do pangahapta. Bani panorang ai do
homa bagei ni paruntolon na ihadapi hita. Gabe ra marsungkun-sungkun hita hubani goluhta
age hubani hata ni Tuhanta na dob ihaporsayai hita.
Lang ipaturut Jesus hape hita ngolngolan, marsahap do Ia marhitei Hata-Ni, bahasa
barah ma panorangni roh ma Jesus hu tongah-tongahta. Ase jolom hita ma na dong banta,
ulang ipaluah hita ase ulang magou barang lang dong sortalinta. Ai hagoluhan sisadokah ni
dokahni do ilayak-layakhon hubanta asal ma totap ijolom hita sortali hagoluhan ai.
Jesus do na boi mangurupi hita, ase boi tarjolom hita sortali na dob dong banta, ase
ulang magou. Marhitei Jesus do homa ase dapotan hita porini pe roh parlajouan, asal ma poltik
ijamah hita sortali hagoluhan ai pasti do monang hita. Lang porlu be ngayotan barang loja hita
laho paimahon parroh ni Jesus. Ai barah ma Ia roh. Ibaratni apuy ondi ai, domma boi iahapkon
hita parmilasni tanda ni na dob dohor apuy ai hubanta. Age pasal parroh ni Jesus, ulang be
sangsi. Haganup na hinatahon-Ni pasti do terlaksana.
Sonaha nani domma ijalo ham hata ni Tuhanta? Atap hatani orangtua do hansa na dong
bamu, ai pe orangtua na dob parlobei marujung goluhni do? Ase sonari ma panorangni hita
paubahkon uhurta, jolom hita ma Tuhanta marhitei na mangkorjahon Hata-Ni. Porsaya ma
hita, Jesus do Sipaluah hita, janah Ia ma na laho roh ai. Roh ibagas hasangapon, ase manean
hagoluhan hita na porsaya Bani.
Tonggo: Ham Tuhan Jesus pargogohi Ham ma hanami tongtong laho manjolom sortali na
niondoshon-Mu hubennami. Ase halak na porsaya hanami ronsi marpangarapan
bani parroh-Mu in na gabe haluahonami. Amen.
HALELUYA NO. 295:2-3
2. Marolob-olob ma ijin 3. Satongkin nari tangkog rup
ganup na dob tinobus; marhitei-hitei hombun,
Siholan do ganupan in rap pakon Jesus lao ganup
bai Jesus in Partobus hu surga in ituju;
Roh do use Tuhanta in Sai longang bei do in hape,
Ibagas hasangapan in, bai hasonangan in use;
sai roh ma Ham, o Jesus, I surga bai na sonang,
sai roh ma Ham, o Jesus. i surga bai na sonang.
PARMAHAN NA MADEAR 15 DESEMBER
NAIBATA PARIDOP NI UHUR
“Puji-pujian ma bani Naibata, Bapa ni Tuhan Jesus Kristus, Bapa paridop ni uhur ampa
Naibata sipangapoh in.”
2 Korint 1: 3
Porini ibilangi hita haganup na masa bani goluhta, buei ni in tanda halongangan na
tarjadi tene. Bahat na masa in na so panagaman ni uhur. Lang tarpingkiri hita. Age i tongahtongah
ni keluarga, kuria ronsi masyarakat pe, haganup gok tanda halongangan.
Porini pe ihatahon sada halak: “Aha pe lang malas ni uhur nami das hubani na laho
marujung ma use tahun on,” domma iladungi dirini age Naibata. Na hurang tulimat do ia
mamareksa na masa na bani goluhni mambahen sonai panluarni. Hape porini iulakkon use
mamareksa, boi ma dapotsi bahasa haganup in ai ma halani idop ni uhur ni Tuhan Naibata. Ge
manangar hata ni Naibata hita sonari ai pe domma idop ni uhur ai. Ai lang buei do hasoman
sihol uhurni manangar hata ni Naibata hape seng boi be songon na salpu in?
Ase rap ma hita mamuji Tuhanta marhitei goluh na martarimakasih ronsi puji-pujian.
Pasirsir hita hadirionta lao mangalo-alo Pesta Partubuh ni Tuhanta Jesus Kristus. Nuan ai ma
panorang Advent. Panorang pasirsirhon diri laho mangalo-alo Sipaluah in. Ase parlobei ma
tandai hita haganup idop ni uhur-Ni ronsi holong ni atei-Ni, ase gabe halak na sintong hita
mangalo-alo Jesus bani goluhta on.
Ai panorang pangalo-aloon ibagas uhur na martarimakasih ronsi mamuji Naibata do
panorangta sonari on, ase marianan ibagas dirinta. Ase Ia simada hita. Ija do boi hita
marmalas ni uhur, halani seng hita be simada dirinta tapi domma Jesus. Ase patut dingat hita
haganup pambahenan ni Naibata ibagas dirinta marhitei panghopkopon ni Tuhan Jesus.
Ibagas na talar do holong ni atei ni Tuhan hubanta boi hita mamuji Naibata marhitei goluh na
martarimakasih.
Tonggo: Ham Bapanami, tarima kasih pakon pujionnami ma Ham halani haganup idop ni
uhur pakon holong ni atei-Mu na tongtong mangkasomani hanami. Urupi Ham
ma homa hanami ase halak paridop ni uhur ronsi parholong atei hanami hubani
hasomannami hunjon hujanan. Amen.
HALELUYA NO. 302:1+3
1. Puji hita Naibatanta 3. Haleluya isombahkon,
puji hita Anak-Nin. na porsaya hu Bamu
Puji hita ‘ge Tonduy-Ni, Bai arian pakon borngin,
Sitolu sada do in. idodingkon hu Bamu
Haleluya, Haleluya, Haleluya, Haleluya,
Sitolu sada do in. idodingkon hu Bamu
PARMAHAN NA MADEAR 16 DESEMBER
DAMEI MARHITEI KRISTUS
“Marsitabian ma nasiam marhitei summah holong ni uhur. Damei ma bani nasiam haganup na
ibagas Kristus.”
1 Petrus 5:14
Mase ibahen Bapa-Bapa ni Kuria na parlobei in goran-goran ni Minggu? Balosni on do:
Ase marhitei goran ni Minggu ai boi homa hitei ni Ambilan Na Madear in laho patorsahon
haporsayaon ni halak Kristen, ase marhiteihon ni ai ibotoh ma pasirsirhon diri domu bani
goran ni Minggu ai. Tapi na marpardomuan do hubani simada ari ai, ai ma Tuhanta Jesus
Kristus.
Bani panorang Advent on aha do na ipangindo Minggu on humbanta? Domu hubani
podah ni Apostel Petrus on, sai ra ma hita marsitabian ibagas holong. Halani parlobei do hita
manjalo holong humbani Tuhanta, halani ai patut do hita marsihaholongan samah hita ibagas
goran ni Tuhan Jesus sihopkop hita. Anggo lang hita manggoluh ibagas holong ni Kristus, lang
sanggup hita mangkaholongi hasoman.
Gogoh anjaha sorta do holong na humbani Tuhanta, ai ibagas holong-Ni buei do
tarrungkub dousanta. Buei do damei. Dong do damei idarat, tapi ibagas tong do ringis, ai ma
na igoran sapari: domdom. Halani aha do ai? Ai ma halani lang damei na ibagas Kristus
marianan banta. Ase marhitei damei ni humbani Jesus do boi botul-botul hita mardamei atap
marsisasapan dousa pakon hasomanta. Jadi boi ma ai mamboan hita gabe harosuh ni Tuhan
Jesus.
Balosi hita ma pangindoan ni Minggu Advent on. Pataridahkon hita ma hasabaronta
bani haganup jolma halani Tuhan in. Sonai homa holong ni uhurta, tanda ni na sirsir hita
manasap hahurangan ni hasomanta, tanda ni na dob marianan banta damei na humbani Jesus
Kristus.
Tonggo: Ham Jesus Tuhannami, pargogohi Ham ma hanami ase tarhorjahon hanami
parsaoran na madear i tongah-tongah ni kuria-Mu, age ibagas keluarga, bahen
hasangapon ni goran-Mu. Amen.
HALELUYA NO. 412:1+3
1. Marodor na porsaya ganupan, 3. Porini pe adong lobih hurang,
na laho misir hu parmingguan, pongkut do manangihon ambilan,
damei do tongtong. damei do tongtong.
Tunggung jagiah do idahon, Tanda do ganup na dob monang,
minar do bohi ni ganupan, tinobus ni Jesus parholong,
damei do tongtong. damei do tongtong.
PARMAHAN NA MADEAR 17 DESEMBER
HAGANUP DO IPATUNDUK
“Haganup do ipatunduk hu toruh ni nahei-Ni, anjaha ipabangkit do Ia kopala ni haganup, bani
kuria in.”
Epesus 1:22
Biasa do ididah hita dunia on, na marsipatuduhkon hajagoanni, sonai age bani
pambotoh, sonai age bani gogohni. Maksudni ase ia sijagoan, sibotohan ampa ase ia sigogohan.
Tapi sonai pe lape tarpatunduksi haganup. Bani sada persoalan do hansa ia boi juara.
Apostel Paulus masuk na jago ma ia iahap bani parugamaon sanggah lape idilo Jesus ia.
Tapi dob iparsahapkon Jesus ia i Huta Damaskus, gabe tunduk ma ia bani parentah ni Tuhan
Jesus, anjaha bani ayat na i atas in isaksihon si Paulus ma: Haganup do ipatunduk hu toruh ni
nahei-Ni. Anggo igoran haganup, lang dong be na so dihut, anjaha dihut ma ijai hamateian.
Malas tumang do uhurta anggo Jesus gabe sipaluah, anjaha podas tumang do iakui hita
ai. Halani bahat do sihol bereon-Ni hubanta, ai ma: Hasasapan ni dousa, pasu-pasu, pakon na
legan. Tapi anggo iakui hita Ia gabe Sipaluah maningon homa iakui hita paboa Ia pe Raja do.
Aha ma artini ai anggo iakui hita gabe Raja? Artini maningon tunduk hita hu Bani,
mandalankon harosuh-Ni, hata-Ni pakon parentah-Ni. Ai anggo lang hita tunduk hu Bani, ai
ma tandani lang ope Ia gabe Raja banta atap siparkuasa banta. Janah anggo Ia ma Rajanta, boi
ma hita bebas humbani gomgoman ni dousa, halani dihut do dousa ai ipatunduk. Halani ai boi
ma hita marmalas ni uhur laho mangalo-alo paroh-Ni.
Ulang ipalambat hita partubuh ni Jesus ibagas uhurta, ase Ia simada haganup na adong
in, ase boi malas uhur bani goluh on, janah lambin rarat Harajaon-Ni i dunia on marhiteihon ni
na porsaya hita Bani, sonai homa marhitei kuria.
Tonggo: Ham Jesus Tuhan Sihopkop hanami, Ham na gabe Rajanami, rajai Ham ma
uhurnami. Patunduk Ham ma uhurnami marhitei Tonduy Napansing, ase
margoluh na pinapansing Mu hanami. Amen.
HALELUYA NO. 141:1-2
1. Jesus, Raja ni Kuria, 2. Tonduy Napansing ma bere,
na pansing janah porsaya, roh bai uhur ni Kuria
pasu-pasu Ham au on. bai ganup dunia on.
Sai papuho Ham uhurhu, Ase tong sada uhurni,
mangirikkon Ham Rajangku, gembit, merap pe halakni.
Pargogohi Ham au tong, Pasangapkon Ham tongtong,
pargogohi Ham au tong. pasangapkon Ham tongtong.
PARMAHAN NA MADEAR 18 DESEMBER
SOLA FIDE
“Tapi torang do, paboa seng adong na pintor i lobel ni Naibata bahenon ni Titah in, ai
parpintor humbani haporsayaon do manggoluh.”
Galatia 3:11
Sola fide artini “Pitah halani haporsayaon do,” on do na tinokanhon ni Martin Luther
bani horja laho papitahkon kuria in, ibuat humbani hata ni Naibata, tarlobih na tarsurat ibagas
surat Galatia pakon Rom. Seng dong na ginoran parpintor anggo halani na mangkorjahon
Titah do, ai sai dong do tong hurangni. Pitah halak na porsaya bani Jesus do boi gabe pintor,
halani na ipintori Jesus.
Hunjon ma taridah paboa pamintorion na humbani Jesus sedo halani usahanta hape ai,
tapi idop ni uhur ni Tuhanta do dompak hita. Pangkorhonni haporsayaonta dompak Jesus
gabe manggoluh hita, ai ma goluh na manongtong, na so tarlanglangi hamateian. Patut ma
jaloonta janah ihaporsayai uhurta Jesus na roh mamintori hita.
Lang homa mangkatahon na so marguna Titah in bani na porsaya, marguna do, tapi
pitah songon hondor mando, sedo gabe alat laho mamintori hita. Seng halani na ihorjahon
niombah paraturan-paraturan na binahen ni orang-tua ase margoran niombah ai niombah,
tapi niombah na mangkahalongi orang tua ni idalankon do harosuh ni orang tuani.
Patut do malas tumang uhurta mangalo-alo Tuhanta Jesus bani panorang Advent on,
halani ai do na mamintori hita, Ia do sihaporsayaonta, na mangkorhon hagoluhan sisadokah ni
dokahni banta. Na so mungkin hinan ipintori hape halani parroh ni Kristus gabe boi hita
pintor janah maluah humbani gomgomanni dousa pakon Titah na so boi mamintori in.
Tonggo: Ham Jesus Tuhannami! Tarimakasih ma hatahonon nami Bamu, halani Ham do
hapintorannami pakon hagoluhannami. Pargogohi Ham ma hanami
marhaporsayaon dompak Ham, ase dihut hanami manggoluh i lobei-Mu. Amen.
HALELUYA NO. 26:1+3
1. Malas ma uhurnima, 3. Ganupan hita jolma
na pintor uhur in. tangihon Raja on.
Domma roh Rajanima, Ai baen hagoluhanta
mamboba tuah in. do Ia ase roh
Seng marpanrantam in ai hita na lansei
anggo bani parroh-Ni; na manlawan bai Hata-Ni,
Nai pe tuk do gogoh-Ni, Roh do holi gila-Ni
padaoh dorunta in. manguhum hita bei.
PARMAHAN NA MADEAR 19 DESEMBER
BUAH
“Parbuahkon nasiam ma buah, tanda ni na dob mubah uhur!”
Lukas 3:8
Age pe ipuji-puji hita hinajenges ni sada hayu, janah mangarap hita mambuat buah na
hunjai, hape lang dapot hita buahni, malas uhurta mangidah hayu ai. Sebalikni do use na roh,
gabe hiranan use hita.
Buah hamubahon ni uhur ipindo Tuhanta humbani ganup hita, seng pitah terdaftar
goranta ibagas kuria, seng pitah tardidi hansa, atap hataonkon ma tene seng pitah asal goranta
Kristen, tapi marbuah ma. Hamubahon ni uhur ibagas kuria in seng ipindo pitah humbani
parhorja kuria, tapi dihut do age humbani anggota ni kuria, seng pitah na maposo hansa porlu
paubah uhurni ibagas zaman modern on, tapi dihut age orang tua pe.
Buah hamubahon ni uhur ai ma na taridah ibagas goluhta marsada-sada secara total,
artini: Anggo panangko janah partinggil hinan bangkonta, seng pitah na manangko ai
paubahon gabe lang manangko be, hape torus partinggil. Lang! Ganup do buah na so
hinarosuhkon ni Bapanta na i Nagori Atas ai paubahonta gabe buah na hinarosuhkon ni
Tuhanta.
Lang marlaku hape ibagas ha-Kristenonta hata na mangkatahon “Parlahouni na sada ai
ma na so tarpaubahsi.” Umpamani domma mubah sada halak humbani piga-piga parlahouni
na so madear, tapi anggo na mamorsou ai lang tarpasohsi. Anggo sonai ope jumpah banta
marsada-sada, ai ma tandani lape iparbuahkon hita buah hamubahon ni uhur ai.
Banggal do bahaya ni na mubah tanggung-tanggung. Anggo dong sada horja na so patut
ibagas ha-Kristenon na so ipaubah hita, hape domma igoran halak hita parhorja ni kuria, lang
piga halak be na ra mangambilani hita pasal ai, halani parhorja hita, dobni torus ma hita
ibagas hajahatonta na sada ai. Ai ma use mambahen seda buah na legan na madear ai.
Ipindo ambilan ni si Johannes Pandidi on do banta sonari, tarlobih lao mangalo-alo
Tuhanta ibagas panorang Advent on, ase ipaubah hita uhurta pakon sintong, lang boi alangalang.
Ulang be dong dousa hasian banta bei.
Tonggo: Tuhan, Hata-Mu do na boi gabe gogohnami ase boi hanami marbuahkon buah,
tandani na sintong mubah uhurnami. Urupi Ham ma hanami Tuhan, ase saud
hanami marbuah na hinarosuhkon-Mu. Amen.
HALELUYA NO. 300:3
3. Paubah hita uhurta, ale
na sombah ma Tuhanta!
Harga hita itobus, ale,
Sai ulang namin soya.
Abakkon, abakkon na mapansing, ale
galangan bai Tuhanta.
PARMAHAN NA MADEAR 20 DESEMBER
ADVENT, MARHASOMAN MALAS NI UHUR AMPA OLOB-OLOB
“Ai ipamalas Ham do uhurhu, Ham Jahowa marhitei pambahenan-Mu, marolob-olob do ahu
mangidah jadi-jadian ni tangan-Mu.”
Psalmen 92:5
Pandei do hita anggo mamilangi malas ni uhur atap sibere-bere ni Naibata hubani
hasomanta. Anjaha hotop urahan janah dokahan pardingatta bani pusok ni uhur na ongga
ijalohon hita sandiri. Halani ai do ase isobut na marpambotoh: Ratahan tong na idah suansuanan
i alamanni hasoman, marimbang na ilamanta sandiri. Dobni, tarsuan ma bibit
keputusan ai bani hadirionta.
Par-Psalmen on, boi ia mamilangi tangkas “malas ni uhurni sandiri” hinorhon
pambahenan ni Naibata hubani. Tarbahen sonai, ai ma halani haporsayaonni dompak Tuhanta
in. Porini pe dong hasunsahan bani goluhni, boi ope ihira uhurni bueian do malas ni uhur na
dob binere ni Tuhan hubani. Sugari pe sadari on ia ibagas pusok ni uhur, boi do iahapkon
tangkas bagei ni malas ni uhur na dob ijaloni bani ari-ari na so habilangan na dob nilopusanni.
Anjaha, bani ari-ari na so habilangan, hu lobeian on tubuh do ibagas pangarapanni, jaloonni
ope homa malas ni uhur humbani Naibata. Pangkorhon ni ai, boi do ia mandodingkon:
Ipamalas Ham do uhurhu, Ham Jahowa, marhitei pambahenan-Mu. Dob ai, mangidah jadijadian
in pe, mangkorhon olob-olob do ai bani dirini laho mamuji Naibata. Lang isungkoti na
dong in pamujini hubani Tuhan. Ipakei do na dong in, paingatkonsi laho mandodingkon olobolob
hubani Tuhan in.
Bani panorang advent do hita nuan. Panorang pangalo-aloon bani haluahon ai.
Ihasomani pambahenan pakon jadi-jadian ni tangan ni Naibata na so marnamaronti ai do hita,
laho mangalo-alo ari haluahon in. Halani ai, padaoh hita ma holsoh ni uhur humbani dirinta,
poltik ma jolom hita pangarapan in janah marmalas ni uhur ampa marolob-olob ma hita
paima-imahon ari haluahon ai, mamuji Naibata.
Tonggo: Ipamalas Ham do uhurnami, Ham Jahowa, marhitei pambahenan-Mu, marolob-
olob do hanami mangidah jadi-jadian ni tangan-Mu. Amen.
HALELUYA NO. 28:2+6
2. Ganupan par-Sion-Mu 6. Ganup na pusok uhur
do mangolobkon Ham, halani dousa in,
Sonin homa uhurhu Tangihon hata mungmung
lao mangayaki Ham. na roh hun Surga in;
Na megah do uhurhu Ai roh ma Sipagoluh
mamuji goran-Mu. Isuruh Bapa in
Bujur sura-surangku pasonang uhurnima.
pasaudkon uhur-Mu. mamboan damei in.
PARMAHAN NA MADEAR 21 DESEMBER
ADVENT, MARHASOMAN SINALSAL
“Idop ni uhur ni Naibata do mambahen roh sinalsal hun datas marayak hita.”
Lukas 1:78
Sinalsal do na boi podas mangusir hagolapan. Ase porini sonaha pe lotir ni hagolapan
in, anggo masuk hujai sinalsal, lintun do na golap ai. Binahen ni dousa, dunia on, ge pe sonin
jengesni, iiani hagolapan do. Dousa ai do homa na imaksud hagolapan ai. Dobni, haganup
jolma ge pe dong ai songon na “bujur-bujur” idahon, pardousa do homani.
Akibat-akibat ni hagolapan boi do tangkas iarusi hita. Dong hinan pe na patut i lobei
atap i lambung diri, lang na idah. Mandosdos na mando haganupan. Dob ai, hotop ma hita
kehilangan arah, anggo marianan hita ibagas na golap in. Gok homa habiar janah bagei ope na
legan, pangkorhon ni hagolapan nongkan. Sibanggalan anjaha sijanginan hunjai, anggo
manggoluh hita ibagas hagolapan atap dousa ai, ai ma hamateian sisadokah ni dokahni.
Lingod humbanta hagoluhan na pinasirsir ni Naibata. Buei do namin na boi gabe sumber ni
sinalsal; i tanoh on, tarlobih bani panorang, hamajuan nuan. Tapi sinalsal na i tanoh on,
mangurupi panonggorta do hansa ai mangidah na dong nuan i tanoh on, na patut boi
sitonggoronta. Mangusir hagolapan binahen ni dousa, lang boi pakeion. Ase sinalsal na boi
mangusir hagolapan halani dousa, pitah na roh humbani Naibata do hansa. Ai ma Jesus Kristus
sandiri. Jesus do na boi mangusir hagolapan ni paruhuronta, binahen ni dousa. Marhitei Jesus
homa, tangkas boi iidah hita tujuan ni pardalanan ni goluhta. Boi ididah hita homa haluahon
na sihol sibereon ai hubanta.
Sanggah musim Advent on, sirsir do homa sinalsal ai mangkasomani hita paimaimahon
ari haluahon ai. Laho palihar dalanta janah patuduhkon situjuan ni goluhta.
Marhasoman ma hita pakon sinalsal ai, marhitei parsaoran na jenges.
Tonggo: Hasomani Ham ma hanami Tuhan, bani ari-ari ni goluhnami, ase boi torang
uhur pakon langkahnami, paima-imahon ari parroh-Mu in. Amen.
HALELUYA NO. 27:3-4
3. Martuah do nagori in, 4. O Jesus, roh ma Ham hujon,
dob ijalohon Raja in; domma huungkab uhurhon.
Uhurta pe sai sonang do Patuduh hinaholong-Mu,
dob masuk Raja in na roh. ondoskon hinalayak-Mu.
Lihar tumang uhurta in, Marhitei-hitei Tonduy-Mu,
dob roh Panondang in hujin. bobai ma au hu Surga in.
In pe napuji ma Ase tongtong ijin
Tuhanta Naibata. Hupuji goran-Mu
PARMAHAN NA MADEAR 22 DESEMBER
ADVENT, MARHASOMAN HOLONG, APOH-APOH AMPA PANGARAPAN
“Ase Tuhanta Jesus Kristus pakon Naibata Bapanta, na mangkaholongi hita anjaha na
mambere apoh-apoh na manongtong ampa pangarapan na madear marhitei idop ni uhur.”
2 Tessalonika 2:16
Masombuh tumang ma pangahap ni sada halak, anggo iahapkon lang adong be
hasoman na boi mangkaholongi, mangapoh ronsi na mambere pangarapan pe. Akibat ni
sisonai ai, ra ma tubuh use pandoleian ibagas goluh on. Paulus patugahkon hubanta, hasadaon
ni Tuhan Kristus pakon Naibata Bapa hubani na porsaya in. Manongtong do holong ni uhur-Ni
sonai age apoh-apoh-Ni hubani na porsaya in. Itubuhkon do homa hubanta pangarapan na
madear, marhitei idop ni uhur-Ni. Ase, anggo halak na porsaya, lang anjai tubuh pandoleian
ibagas goluhni. Sonai do pagori ni kuria na i Tesalonika ijia. Porini pe bagei tantangan ijalohon
sidea, halani Kristus, lang mundur sidea.
Ibagas panorang Advent on, ipaima-ima hita do parroh ni Tuhan na paduahalihon ai.
Ibagas panorang na paimahon ai hita, porlu do tangkas hubanta horja ni Tuhanta na sai
tongtong sirsir dihut mangurupi anjaha mangkasomani hita laho mangalo-alo harosuh-Ni. Ase
lang i paturut hape hita lungunan, pori ni pe Ia do na sihol sipaimaon marhitei parroh-Ni ai.
Sedo hape songon pangalo-alo na somal masa banta i tanoh on, ija ipaturut lungunan
sipangalo-alo ai.
Sipaimaonta ai pasti do homa. Holong-Ni, apoh-apoh ronsi pambere-Ni hubanta
pangarapan na madear in, dihut do ai patugahkon hubanta hasasaud ni parroh-Ni ai. Ase lang
boi marduaan ni uhur hita bani ai. Pangkasomani ni Tuhanta hubanta sadokah panorang
Advent on, ijai ma homa talar banta hasintongan ni pangarapan ai. Dihut do Tuhanta
mangurupi hita ase sirsir hita bani na manjalohon ari haluahon ai.
Tonggo: Tarimakasih ma Bamu Tuhan, ai ihasomani Ham do hanami laho paima-imahon
ari parroh-Mu in. Amen.
HALELUYA NO. 30:5+7
5. Hosianna! Saud tarbaen, 7. Hosianna! Anak ni
bagah-bagah ni Jahowa. Naibata na jadi jolma.
‘Ge ponop ope nuan, Tohu ma kuria in,
Hasangapon-Mu bai jolma, ase sai tongtong martuah.
Ganup na porsaya in, Sangap bai goran-Mu in,
manandai gogoh-Mu in. sadokah-dokahni in.
PARMAHAN NA MADEAR 23 DESEMBER
MAGNIFIKAT
“Hagogohon do ihorjahon tangan-Ni, mambur merap do ibahen sigijang maruhur.”
Lukas 1:51
Ayat sadari on banta, ai ma sabagian humbani doding puji-pujian ni si Maria. Ai dob
honsi salpu parsahapan ni si Elisabeth pakon si Maria pasal partubuh ni Sipaluah in, mintor
mandoding do si Maria. Isi ni ai boi do dapot hita bani ayat 46-55. Doding on ai ma na somal
igoran: Magnifikat, artini: “Ipatimbul….” Mangihutkon hata na parlobei ni doding ai (ayat 46).
Tarbagi tolu do isi ni doding on, ai ma:
1. Mamuji idop ni uhur ni Naibata,
2. Mamuji hagogohon ni Naibata,
3. Mamuji hasatiaon ni Naibata dompak bangsa-Ni.
Tarmasuk hubani bagian na patoluhon in ma ayatta sadari on. Domma ididah anjaha
iahapkon si Maria hagogohon ni Naibata, ai seng hape tarlanglangi atap ise pe sura-sura ni
Naibata. Tuk do tangan ni Naibata manaluhon sagala munsuh-Ni. Ia do pargogoh na so
tarimbang, gari sigijang maruhur boi mambur merab ibahen. Halani ai gok puji-pujian do si
Maria dompak Naibata! Marhitei ai ma ipasirsir si Maria homa dirini manjalo parroh ni
Kristus, Sipaluah in.
Bani panorang Advent on pe, anggo domma tongon-tongon ihaporsayai uhurta
hagogohon ni Naibata, tarlobih marhitei partubuh ni Kristus, lang tarbahen lang gok pujipujian
do homa goluhta. Na porlu sonari ai ma mamareksa dirinta sandiri, atap domma dihut
hita marhatongonhon hagogohan ni Naibata.
Dalanta ase das manghaporsayai hagogohon ni Naibata ai ma marhitei manjalo pakon
pahusor-husorhon ibagas uhurta lanjar manghaporsayai hata ni Naibata na pinadas hubanta,
usih songon si Maria na manjalo pakon manghaporsayai tonah ni Naibata na pinadas ni si
Elisabeth ai.
Tonggo: Dihut do hanami Tuhan manghaporsayai hagogohon-Mu in, ai ipaluah Ham do
hanami humbani munsuhnami, marhitei na sinuruh-Mu Jesus Sipaluah hanami.
Jalo Ham ma puji-pujiannami dompak Ham. Amen.
HALELUYA NO. 27:1-2
1. Patahar ma horbangan in, 2. Pintor tumang do uhur-Ni,
ai domma roh Rajanta in. na roh hubani jolma in;
Sigomgom raja haganup, Ai Raja parhidorat do,
sitobus jolma haganup. janah parholong atei do,
Siboan hatuahon in, Usiron-Niin do hajojor,
paulak hasonangan in. na manunsahi hita on.
In pe na puji ma In pe na puji ma
Tuhanta Naibata. Tuhanta Naibata.
PARMAHAN NA MADEAR 24 DESEMBER
NAIBATA ROH HU BANTA
“Gabe daging ma Hata in, anjaha marianan i tongah-tongahta; jadi ididah hanami ma
hasangapon-Ni songon hasangapon ni anak sasada humbani Bapa in, gok idop ni uhur ampa
hasintongan.”
Johannes 1:14
On ma sada ayat na luar biasa ibagas Bibel: “Gabe daging ma hata in.” Ipatorang si
Johannes do ise do Hata in, ai nini do: “Bani mungkahni domma adong Hata in, anjaha rap
pakon Naibata do Hata in, anjaha Naibata do Hata in. Rap do Ia pakon Naibata bani
mungkahni.” (Johannes 1:1-2) Naibata do Hata in anjaha gabe dagingma Hata in. Naibata gabe
jolma. Songon na so porsaya diri atene? Legan do Naibata marimbang jolma. Partonduyon do
Naibata seng hajolmaon. Somalni daoh do tumang Naibata, ninuhur ni jolma.
I atas ai do daoh Naibata, i parlangitan ai. Tapi ayat on patugahkon hubanta, paboa
Naibata domma gabe jolma, anjaha marianan bani sada panorang i tongah-tongahta. Marratus
tahun paima masa halongangan banggal on, domma ipalopas Naibata juak-juak-Ni Nabi Jesaya
mangidah na masa on anjaha patugahkon pasal ai, ai ma na sinuratkonni: “Tonggor ma,
boratan rumah ma sada anak boru, anjaha tubuhkononni ma sada anak, anjaha bahenonni ma
goran-Ni: “Immanuel” (Jesaya 7: 14).” Ibotoh hita do ia arti ni Immanuel ai ma: “Naibata rap
pakon hita.” Bani panorangta sonari on, Immanuel, Hata in gabe daging, ai do na margoran:
Jesus Kristus. Sanggah partubuh-Ni i Betlehem, hampir ma 2.000 tahun na salpu. Ipatugah
Malekat do hubani parmahan, nini: “Ulang mabiar hanima! Tonggor ma, ai ambilan malas ni
uhur banggal do huboan bannima, parulihan ni ganup bangsa. Ai domma tubuh bennima
saborngin on i huta ni si Daud, Sipaluah in, in ma Kristus, Tuhan in!” Ibotoh si Johannes do
homa on, seng songon nipi ai, tapi kenyataan do: “Domma ididah hanami hasangapon-Ni
songon hasangapon ni anak sasada na humbani Bapa in, gok idop ni uhur ampa hasintongan.”
Aha do artini ai nuan banta i Indonesia on bani abad pa-20-kon on, Naibata gabe jolma
ibagas Jesus Kristus? Mararti do ai na boi ipestahon hita Hari Natal, sadokah ipaturut Naibata
ope dong dunia on. Anjaha parsimada do homa hita bani malas ni uhur banggal, na
binobanhon ni partubuh ni Kristus hu dunia on. Janah ibotoh hita ma homa, Naibatanta, na so
daoh be humbanta, na mambotoh torang pasal hita, na mangarusi hita, na manramoti hita,
ampa na mangkaholongi hita. Seng dong be na boi mangkaholongi hita songon pangkaholongi
ni Jesus. Halani Jesus, ai ma Hata in na dob gabe daging, janah marianan i tongah-tongahta.
Tonggo: Tarima kasih ma bamu Jesus Tuhannami, halani roh do Ham manohu hanami
janah iarusi Ham do hanami, tarlobih homa halani totap do pangkaholongi-Mu
bennami. Bere Ham ma bennami malas ni uhur ampa damei bani na
pinestahonnami pesta partubuh-Mu. Bahen Ham ma Hari Natal on mangkorhon
pasu-pasu bennami. Amen.
HALELUYA NO. 43:1-2
1. O Jesuskin hupuji Ham, 2. Tibal bai panggagatan in,
halani jadi jolma Ham; do Anak ni Jahowa in;
Roh ma Ham marayak hanai on, Parrupei bai dagingta on,
na sombuh i dunia on. do na pagoluh hita on.
PARMAHAN NA MADEAR 25 DESEMBER
HOLONG NI NAIBATA PAKON BALOSTA
“Hunjon do gabe talar holong ni uhur ni Naibata banta, ai ma humbani na dob sinuruh-Ni
Anak-Ni na sasada in hu dunia on, ase manggoluh hita marhiteihon-Si.”
1 Johannes 4:9
Bagei do dalan laho pataridahkon pakon patandahon holong. Bapa pakon inang
marsihaholongan do. Orang tua pe mangkaholongi niombahni do, sonai niombah dompak
orang tuani. Na mardiha-diha sonai pakon na marhasoman pe marsihaholongan do. Holong
sisonon ai ma holong na somal, ai ma na masa i tongah-tongahta pakon i tongah-tongah ni
sagala jolma age pe carani palegan-legan.
Tapi haganupan holongta sisonai ai lape tarparbandingkon hubani holong ni Naibata
dompak hita marhitei na marsuruh Jesus Kristus hu dunia on, “Hunjon do gabe talar holong ni
uhur ni Naibata banta, ai ma humbani na dob sinuruh-Ni Anak-Ni na sasada in hu dunia on.”
Lang ihaholongi Naibata hajolmaon marhitei holong na somal halani domma mamberontak
hajolmaon dompak Naibata anjaha domma madabuh sidea hubani dousa. Ai lang be niombah
ni Naibata hita, seng be homa diha-diha-Ni, sedo hasoman-Ni. Sabalikni do use ai domma gabe
munsuh-Ni hita. Tapi age sonai totap do pangkaholongi ni Naibata banta. “Naibata, domma
ipatalar holong ni uhur-Ni ai banta, ai ma marhitei na matei Kristus manghopkop hita,
sanggah pardousa ope hita.” (Rom 5:8) On ma halongangan banggal na pinestahonta bani
pesta Natal on, ai age pe munsuh-Ni hita, na maningon matei ma namin, ihaholongi Tuhan
Naibata do hape hita. Ipatuduhkon do holong-Ni ai hubanta marhitei parsusur-Ni bani Jesus
Kristus hubanta hu dunia on. Aha do pangkorhon ni holong ni uhur ni Naibata banta? Na
parlobei, halani roh do Jesus hu dunia on anjaha matei tarsilang i Golgata halani dousanta boi
ma hita sonari manggoluh rap pakon Naibata sadokah ni dokahni marhitei haporsayaonta
dompak Tuhan Jesus. Na paduahon domma dong holong na baru i dunia on. Ai ma holong ni
Naibata na ipataridahkon homa marhitei susian ni Tuhanta. Seng tarbatas ai pitah humbani
famili pakon hasoman hansa. Mardalan do ai das hubani simbalogta, seng pitah halak na
dohor hubanta tapi haganup jolma do, sagala na mangkaporluhon holong pakon
pangurupionta songon na pinataridahkon ni halak Samaria paridop ni uhur ai. Termasuk do
hujai na masombuh, na hona odoh-odoh, na lungunan ronsi munsuhta, halani ai do ase
ihatahon Tuhan Jesus hubani na mangirikkon-Si: “Haholongi ma munsuhmu!”
Maningon do patuduhkononta holongta hubani haganupan atap holong na somal pe ai
banta atap na lang. Sonaha do boi tardalankon hita ai, ai ma marhitei na mardingat holong ni
Naibata dompak hita. Ai ma jiwa ni Hari Natal on, mamestahon holong ni Naibata.
Tonggo: Tarima kasih ma bamu Tuhan Naibata halani holong-Mu na banggal in dompak
hanami, sonai homa halani boi idingat hanami holong-Mu ai marhitei Pesta
Natal on. Urupi Ham ma hanami ase ulang singgan mardingat holong-Mu hansa
hanami, tapi dihut mangkagoluhkon pakon mandalankon ai ganup ari. Amen.
HALELUYA NO. 36:3-4
3. Botoh ma dear ni layak 4. Ai talar holong atei-Ni,
ni Jahowa in na bayak; jolma do ibaen huan-Ni,
Iberehon age Anak masuk bai Harajaon-Ni,
bahen hagoluhanta in. hita arahon-Ni do.
PARMAHAN NA MADEAR 26 DESEMBER
GOLUH NA BARU
“Sonai pe, Titah na baru do na husuratkon bani nasiam, anjaha sintong do in ibagas Kristus
ampa ibagas nasiam, ai na salpu ma hagolapan in, anjaha domma marsinalsal Panondang na
sintong in.”
1 Johannes 2:8
Sada barang dagangan, idarat ituliskon “Minuman terbaik,” nomor satu minumlah demi
kesehatan tubuh anda; hape dob honsi iminum gabe moyak-oyak janah maborit boltok, tontu
sogam do uhurta mangidah simada pengusaha minuman ai, halani seng sesuai pardarat pakon
isini. Sonai do homa age goluh ni ha-Kristenonta maningon do sesuai pardarat pakon isini use
ase ulang gabe partolsuan bani halak na legan.
Marhitei na dob ijalo hita Jesus Kristus, gabe adong ma banta sada merek baru ai ma
“Goluh na Baru” artini goluh ibagas Titah na baru na binobanhon ni Jesus Kristus. Ase, barang
ise ibagas Kristus, na tinompa na baru ma ai. Hunjon ma hape taridah bahasa ganup jolma na
manjalo Kristus ai ma na tinompa na baru pakon manggoluh ibagas goluh na baru. Titah na
baru ai ma Titah na sintong ibagas Kristus ampa ibagas jolma, halani Kristus do na
mamberehon Titah in janah Ia do igoki Titah ai.
Manggoluh ibagas goluh na baru ai ma taridah marhitei goluhta, na seng mardalan bani
na golap. Adong hape tandani ai ma haliharon na marsinondang, lang ponop goluh na baru ai,
taridah do marhitei goluhta Titah na baru ai. Marhiteihon na manggoluh ibagas goluh na baru,
taridah ma lang be manggoluh ibagas hagolapan, tapi manggoluh ibagas haliharon, halani
domma isondangi panondang na sintong in ai ma Tuhan Jesus Kristus. Sonaha domma
manggoluh ibagas haliharon? Domma salpu goluh hagolapan ai humbanta? Kristus do
panondang banta age hita na dob manggoluh ibagas Jesus Kristus gabe panondang ma, ai ma
na paliharhon dalan bani hasoman jolma janah patalarhon Jesus do hagoluhan in. Halani ai
pataridahkon hita ma bani goluhta paboa domma ipakei hita jolma na baru, na tinompa usih
hubani Naibata, ibagas hapintoron ampa hasintongan na botul. (Epesus 4: 24)
Tonggo: Tarima kasih ma Tuhan, bani Titah na baru na binere-Mu in bennami, bere Ham
ma gogoh andohor ihagoluhkon hanami Titah-Mu in marhitei na
marsihaholongan hanami, domma isondangi Ham hanami, sai andohar marhitei
Titah-Mu in dihut hanami marsinalsal. Amen.
HALELUYA NO. 38:3-4
3. Sihol haholonganku 4. Botul ondoshononku
tongtong Ham, Tuhankin Bamu ma uhurhon.
Age pusok uhurhu, Sai holong ma atei-Mu,
sai ganda holongkin. urupi au tongtong!
Nai ma, nai ma, Nai ma, nai ma,
sai ganda holongkin urupi au tongtong.
PARMAHAN NA MADEAR 27 DESEMBER
JESUS DO PARDAMEIAN BANTA
“Ai do pardameian banta, na pasadahon na dua ai, anjaha na parsedahon dingding bolat-bolat
ai, ai ma hamunsuhon ai.”
Epesus 2:14
Bani mungkahni adong do parsaoran na orot antara jolma pakon Naibata, tapi dob
honsi mardousa jolma in gabe tubuh ma parsirangan ni jolma pakon Naibata, sonai homa age
parsirangan ni jolma pakon jolma.
Taridah ma tongon dousa do na mambahen jurang pemisah atap pe dingding bolatbolat
na manirang jolma pakon Naibata ronsi jolma samah jolma. Dousa tangkas taridah
marhiteihon horja-horja ni daging ai ma parriah-riahon, habutakon, goluh na so marrantei,
mar-Naibata na legan, hadatuon, parmusuhon, partinggilan, parsimburuon, ringis, uhur haut,
subil, marpoya-poya pakon na legan. (Galatia 5: 19-21) Apostel Paulus mangkatahon marhitei
ayat na i atas in, Jesus do pardameian banta, Ia do na mambahen dalan ase adong
pardameianta hubani Naibata, janah Ia do manruntashon atap parsedahon dingding bolatbolat
na mambahen parmusuhan in, artini ai ibagas Jesus Kristus do boi hita marpardameian
pakon Naibata, anjaha mardamei samah-samah jolma.
Buei do tongon hasadaon-hasadaon i dunia on, songon na maronjolan bani
parmargaon, parsahutaon pakon na legan, tapi haganupan ai boi do gabe bolat-bolat bani
halak na legan. Ibagas Jesus ipasada hita, janah hasadaon ai lang dong maronjolan hubani
marga, huta, keadaan goluh siganup ari. Tapi ibagas Jesus do dapot damei na sasintongni.
Idarat ni Jesus, seng dong pardameian, lalab do hasunsahan. Idarat ni Jesus seng dong
hasintongan, hagoluhan, pitah ibagas Jesus do dapot hita pardameian pakon Naibata ai ma
ibagas Jesus Kristus, janah boi ma hita marsaor, marpardameian pakon Naibata ampa hubani
hasoman jolma.
Sai damei na humbani Tuhan na manggoluh ibagas hadirionta.
Tonggo: Tarima kasih Tuhan, Ham tongon pardameian bannami, ibagas Ham boi ma
marpardameian hanami hubani Naibata pakon hubani hasoman jolma, sai
pargogohi Ham ma hanami ase damei na hum Bamu na manggoluh ibagas
hadirionnami marsada-sada. Amen.
HALELUYA NO. 41:3
3. Sombahnami hu Bamu na dob roh on,
Ham siboan damei hu dunia on;
Sai pasorap Ham bai uhurnami on,
Damei-Mu, o Jesus!
Hasangapon bai Naibata,
damei-damei bani jolma.
Megah uhur ni Naibata
hajolmaon use.
PARMAHAN NA MADEAR 28 DESEMBER
BASIKAH RUMAH NI NAIBATA
“Na monang in do behenonku gabe basikah ibagas rumah ni Naibatangku, seng anjai mandarat
be ia hunjai.”
Pangungkabon 3:12
Hamonangan ai ma harosuh ni jolma bani goluhni, marusaha do jolma in ase monang
ia. Hamonangan ai seng roh sandiri, maningon do adong parjuangan na gogoh ase dapot
hamonangan ai, maningon sanggup manaluhon sagala rintangan-rintangan atap penghambat
na roh hubani. Taridah ma na lang boi lang adong persiapan na matang laho manlawan sagala
rintangan ase dapot hamonangan ai. Sonai do homa bani goluh ni haporsayaonta, lang roh
sandiri hamonangan ai tapi maningon marusaha do hita janah maningon monang manlawan
munsuhta ibagas na laho mandapotkon hamonangan hita bani goluh haporsayaonta. Nini ayat
na i atas in, na monang in do bahenonku gabe basikah ibagas rumah ni Naibatangku, hunjon
ma botohonta lang hape sisoya-soya goluh ni jolma na mangkabujurhon haporsayaonni.
Jolma na bujur janah totap marhaporsayaon hubani Tuhan ai ma na gabe basikah
rumah ni Naibata, sonaha do ase boi monang goluhta on? Ai ma marhitei na ijolom hita poltik
hata-Ni Naibata bani goluhta siganup ari. Rumah ni Naibata ai ma kuria banggal in, janah Ia do
simada ai; ibagas sada bangunan rumah, basikah ai ma sada na porlu tumang anjaha na
marpardomuan hubani batu parsuhi, halani anggo lang hot pardomuan ni batu parsuhi pakon
basikah maseda ma bangunan ai. Pangkorhonni ai basikah na longkot marpardomuan hubani
batu parsuhi seng sipakeion be anjaha siambungkonon mando ai.
Jesus do Batu Parsuhi, Ia do na totap janah na sintong ronsi sadokah ni dokahni. Jadi
jolma na totap manjolom hata-Ni Naibata do na boi marpardomuan hubani Batu Parsuhi in ai
ma Jesus Kristus. Hamonangan ibagas goluh haporsayaon ai ma siparayakonta. Ibagas ai ise do
ibahen hita hasoman laho marayak ai? Ise do ibahen hita laho mandapotkon hamonangan bani
goluh ni haporsayaonta? Jesus do na totap, anjaha Ia do siparmonang. Halani ai, sai bahen hita
ma Jesus gabe hasomanta laho mandapotkon hamonangan ai.
Tonggo: Tarima kasih Tuhan, halani domma ipatugah Ham bannami ulihnami anggo
monang hanami ibagas goluh haporsayaon, ai ma goluh na totap ibagas Ham.
Ham Jesus sipamonang hanami, halani ai pamonang Ham ma hanami, maidop
ma uhur-Mu. Amen.
HALELUYA NO. 116:6
6. Na monang in do ningon gabe tiang.
ibagas rumah ni Naibatangkin;
I rumah in tongtong ia marian,
manjujung goran-Ni Jahowa in.
Uhirhonon-Ku hujin goran-Ku,
sijujungonni i Surga in,
sijujungonni i Surga in.
PARMAHAN NA MADEAR 29 DESEMBER
PANONDANG NI HAJOLMAON
“Ibagas Hata in do hagoluhan, anjaha hagoluhan in do panondang ni hajolmaon.”
Johannes 1:4
Ibagas Jesus, Hata na dob gabe daging in do hagoluhan janah Ia do panondang ni
hajolmaon. Paima gabe daging pe Hata in domma marsinondang Ia. Ia do panondang ni
hajolmaon humbani mungkahni das hubani panorang ujungni. Domma marsinondang Ia age
bani panorang ni si Abraham, si Musa, nabi-nabi pe janah marsinondang do age hubanta ronsi
hubani na so mananda-Si ope. Marsinondang do Jesus marhitei Hata-Ni, marhitei
pambahenan-Ni pakon marhitei sitaronon-Ni pe.
Na sinondangan ni Jesus ai do na dapotan hagoluhan na sadokah ni dokahni, pakon na
boi marmalas ni uhur age sanggah goluh parsatongkinan on pe. Seng ra mintor sondang ni
Tuhanta age sadihari pe. Lobih hubani sondang ni mata ni ari do sondang-Ni, ai hagoluhan
sisadokah ni dokahni do homa isini.
Sagala na dob manjalo sondang na humbani Tuhanta, ai do homa na dihut
marsinondang, padashon haliharon na humbani Jesus, ai dihut do hita iangkat Tuhanta gabe
panondang ni dunia on! Artini dihut do hita isuruh Tuhanta padashon pakon manawarkon
hagoluhan na humbani Jesus Kristus hubani hasoman na legan pe. Tontu seng tarpadas hita
haliharon ai anggo hita pe lape manjalo panondang na sintong in. Halani ai jalo hita ma
panondang ni hajolmaon in.
Tonggo: Ham Panondang ni hajolmaon, sondangkon Ham ma haliharon bennami ase boi
hanami manggoluh ibagas malas ni uhur anjaha manjalo hagoluhan sisadokah
ni dokahni homa. Pargogohi Ham ma hanami ase margogoh hanami gabe
“panondang ni dunia” on. Amen.
HALELUYA NO. 456:1-2
1. Siang do sinalsal ni 2. “Ge buei pe
Panondang in, ranting ni hayu in,
Kristus do Panondang. Jesus do bonani.
Ganup isondangi, Hita do ranting-Ni,
ai ipasada do hita tongtong. ai ipasada do hita tongtong.
PARMAHAN NA MADEAR 30 DESEMBER
PANORANG NI NAIBATA
“Ai saribu tahun bani pangidah-Mu doshon ari nantuari na dob salpu do ai, songon sada horin
borngin-borngin.”
Domma boi bilanganta atap na piga jam nari ase salpu tahun on humbanta, podas do
marlopusan ari-ari ni goluhta. Marbatas do homa panorangta i dunia on. Lang na ahapkon
domma hape bahat na marsalpuan. Porini ibere Tuhanta pe goluhta das hubani saribu tahun,
anggo ilobei ni Tuhanta doshon na sadari na dob salpu ope ai, gariada nansai pe lang das, ai
doshon sada horin borngin-borngin do ai, artini; sadari pe lang gok. Hape banta domma
doshon dua puluh sundut jolma ai!
Hunjai taridah na podas salpu do ari-arinta, tapi totap ronsi sadokah ni dokahni do
anggo panorang ni Tuhan Naibata. Seng pitah patugahkon hatongtongan ni Tuhanta ayat on
banta tapi dihut do patugahkon paboa Naibata do hansa na boi haporusanta marsundutsundut.
Age pe salpu na salpu in, marubah-ubah keadaan pakon situasi, totap do anggo
Tuhanta ronsi sadokah ni dokahni. Ia do Tuhan ni sagala jaman, na manrajai sagala panorang
age pe marubah-ubah isi ni panorang in.
Sagala panorang na binontasta, ai ma panorang ni Naibata, halani ai patut
martarimakasih hita bani Tuhanta janah pargunahononta ai sadear-dearni, anjaha pos do
uhurta iparuhuri Tuhanta do hita mamilangi ari-ari na binere ni Tuhanta hubanta, ase
dapotan uhur na pantas hita.
Tonggo: Age pondok tumang do panorang nami martimbangkon panorang-Mu Tuhan,
tapi gok do pasu-pasu na boi jumpah hanami ibagas ai. Tarima kasih ma
hatahonon nami Bamu Bapa, halani ibere Ham do panorang on bennami, na boi
pakeion nami pasangapkon Ham. Amen.
HALELUYA NO. 183:1-2
1. Ari na so maringgan in 2. Ai hadorsaon tanoh on,
sai songon longgur sora ni sai salpu use do tongon
alolingmin hubangku. bai ujung ni ganupan.
Songon tiniham uhurhin Anggo na roh magira in,
bai podang na dob marot in na dong be salpu anggo in
huja ma ahu laho? sadokah ni dokahni.
Sai hitir-hitir uhurhin Na dong maluah be hunjin,
anggo hupingkir parrohmin. na lao hu hamagouan in.
Psalmen 90:4
PARMAHAN NA MADEAR 31 DESEMBER
NA SO RA SALPU
“Langit ampa tanoh salpu do, tapi anggo hatang-Kai seng be anjai salpu.”
Lang pala mahol banta laho mangindahi pakon patuduhkon na ra salpu, halani domma
bahat tumang na dob salpu. Bani goluhta sandiri gelah na pareksa urah do dapot hita ai janah
deba domma na bontas. Ibagas tahun on ma deba humbanta na salpu masa haposoonni halani
tahun on ia mambuat boru. Na deba ibagas tahun on ma salpu parlajaranni parsikolahan,
halani domma tamat ia hunjai. Dong homa na salpu masa jabatanni halani pensiun ma pakon
bahat na legan ope na so tarpajojor hita sada-sada.
Tapi sedo pitah ai na ra salpu, gari langit ampa tanoh pe salpu do, samintolah ma na
marpardomuan bani goluhta on! Age pe marsalpuan haganupan ai tarmasuk ma ari-ari ni
goluhta on. Dong ope na so ra salpu, ai ma hata ni Naibata! Humbani sejarah kuria tumang
gelah na pareksa domma taridah hasintongan ai, iusahahon halak do bani piga-piga ianan ase
bois namin hata ni Naibata na tarsurat ibagas buku Bibel in, pala iparentahkon piga-piga Kesar
Rom ijia ase itutung haganup sagala buku Bibel, tapi hataridahanni pakon dob ni lambin
martambah do. Sondahan on lobih ma use humbani 1500 bahasa ialimhon buku Bibel, janah
buku Bibel ma buku sibahatan tarjual ganup tahun i dunia on!
Patut do tongon igoran hata ni Naibata, hata hagoluhan! Janah na manjalo hata in
pakon na mangkaporsayaisi pe homa seng salpu ronsi sadokah ni dokahni tapi dapotan
hagoluhan na so ra salpu ai do homa. Bani ujung ni tahun on patut martarimakasih hita bani
Tuhanta halani ibere ope Hatani ai hubanta na gabe hagoluhan, na mambahen dihut hita homa
manjalo hagoluhan na so ra salpu simagira ai.
Tonggo: Tarima kasih ma bamu Tuhan, halani ibere Ham ope Hata-Mu in bennami. Age
pe salpu langit pakon tanoh on, totap do Hata-Mu anjaha boi homa na porsaya
bani Hata-Mu totap ronsi sadokah ni dokahni, age pe ibontas hanami lobei na ra
salpu in. Amen.
HALELUYA NO. 209: 3+6
3. Patotap Ham ma Hata-Mu, 6. Sai togu Ham ma hanami on
na mangapohi uhurhon; hu hagoluhan na tongtong.
Tapi pangagou haganup, Totap bai kuria-Mu in,
padaoh Ham ma in tongtong. rupeini na tarsulur in.
Lukas 21:33
