PARMAHAN NA MADEAR 1 JULI
MALAS NI UHUR
“Tapi seng pitah ai, megah do homa hita ibagas Naibata, marhitei Tuhanta Jesus Kristus, ai
marhiteihon-Si do ijalo hita nuan pardameian in.”
Rom 5:11
Aha na iharapkon buei jolma bani goluhni? Marsihaporsayaon, holong, damei,
pangarapan, nasib, jaminan. Marlegan-legan do sininta ni uhur ni jolma tapi tujuanni dos ai ma:
dapotan hasonangan. Ijon ipatugah Apostel Paulus hubanta, lobih ni na ipindahi hita i dunia on
do iparsirsir Naibata banta. Haporsayaon bani panghopkopon ni Jesus Kristus lobih do
marimbang ganup jaringan, asuransi hidup na i dunia on. Marhitei haporsayaon bani Naibata
ibagas Jesus Kristus gabe ipintori Naibata hita. Pitah ibagas Jesus do jumpah hita holong na gok,
damei, malas ni uhur, pangarapan pakon jaminan ni goluhta. On do gogoh pakon malas ni uhur
ni halak Kristen:
1. Salosei do panorang na salpu. Isaloseihon Jesus do dousanta gabe mardamei hita
pakon Naibata.
2. Nuan jongjong hita ibagas pardomuan rap pakon Tuhan, halani idop ni uhur-Ni.
3. Anjaha panorang na laho roh ibagas tangan ni Tuhan do.
Haporsayaon bani Jesus dong do pangkorhonni ibagas goluhta, aima mardamei pakon
Naibata ampa hasoman jolma, ibere malas ni uhur pakon gogoh banta ganup ari. Haporsayaon
bani Jesus seng mambahen sangsi hita, age roh sitaronon na marbagei -bagei banta.
Haporsayaon bani Jesus mararti; hubotoh, Tuhanku mangkaholongi, mangurupi pakon
mansarihon ahu. On do onjolan ni malas ni uhurta.
Tonggo: Ham Tuhan Naibata Bapanami, mardamei do Ham pakon hanami marhitei Jesus
Kristus Tuhannami. Banggal do holong-Mu bannami pardousa on. Urupi Ham
hanami ase goluhnami gabe sada puji-pujian pakon hatarimakasihon hu Bamu.
Amen.
HALELUYA NO. 430:1
1. Marmalas uhur, na mangirikkon Jesus Tuhanta,
ai puho Jesus, mulak manggoluh humbai na matei,
ai domma mungkab ijin tanoman.
O, hamateian, ija do nuan sorodmu in?
Puho do Jesus, humbai na matei,
Nagori toruh, ija do hamonanganmu in?
Maluah do Jesus, humbani gari.
PARMAHAN NA MADEAR 2 JULI
BANGGALAN DO NAIBATA
“Sanggah na manosal uhurta ibagas: Banggalan do Naibata humbani uhurta anjaha ibotoh
haganupan.”
1 Johannes 3:20
Ulang ma hatanta pakon dilahta mangkaholongi, tapi marhitei pambahenan ma
ampa hasintongan, sonai do ihatahon Apostel bani ayat 18.
Tapi ganup hita mambotoh: tongtong parutang do hita ibagas praktekni ari-ari. Ai
lang targoki hita Titah pasal holong dompak Naibata ampa hasoman jolma. Halani ai gati
unduk uhurta anjaha rusak hita ibagas dirinta. Uhurta pakon panggora ni uhurta
manuntut hita. Huja hita laho?
Seng tarponopkon hita dirinta ilobei-lobei ni Tuhanta. Itandai do hita lobih
humbani hita manandai dirinta. Ibotoh Tuhan do pasal ganup halaseion, panlanggaron,
age hurang ni tanggungjawabta. Dong do sada dalan haluahon, arapkon ma Naibata!
Banggalan do Naibata marimbang uhurta, na manuntut hita. Ihaholongi do hita anjaha
isasap do dousanta. Marhitei daroh ni Anak-Ni Jesus Kristus isaloseihon do ganup
utangta.
Goluh ni hita jolma doshon songon sada rekening na harga. Seng tarbahen hita
manlunasi ai. Tapi domma ilunasi Jesus haganup utangta, banggalan do holong-Ni pakon
hasasapan ni dousa marimbang hauhuronta. Marhitei holong-Ni tarbahen hita
mangkaholongi-Si age hasoman jolma.
Anggo Naibata tong hasomanta seng pala mabiar hita. Age ilajou sibolis hita,
gogohan do Tuhanta marimbang ganup na idunia on.
Tonggo: Ham Bapanami na i Nagori Atas, tarima kasih ma Bamu, banggalan hape
holong-Mu pakon hasasapan ni dousanami marimbang hauhuronnami.
Ipindo uhurnami Bamu, sai hasomani Ham hanami ganup ari marhitei
holong pakon pangurupion na hum Bamu. Amen.
HALELUYA NO. 296:3+5
3. Undukmin, ale tonduyhu
mase pala rusak ho?
Hatengerhon Naibatamu,
ai paluahon-Ni do.
Ho na marhoru nuan,
malas uhurmin baen;
Ase tong pasangaponmu
Goranni partuahonmu.
5. Iparbagah Naibatangku,
Idop ni uhur-Ni in;
Jadi malas ma uhurhu,
Anggo sai hudingat in;
Borngin, ‘ge arian in
hudodingkon do ijin;
Dear layak ni Jahowa
mangurupi kuria-Ni.
PARMAHAN NA MADEAR 3 JULI
HASINTONGAN
“Ai seng adong gogoh nami mangimbangi hasintongan in, tapi manghopkop hasintongan
in do.”
2 Korint 13:8
Ra do gambaran na jenges ipingkiri uhurta anggo idingat hita goluh ni kuria-kuria
na parlobei in. Tapi sebalikni do jumpah jumpah hita ibagas surat ni Apostel Paulus bani
halak Korint. Buei parlajouan jumpah i kuria na poso ai. Tarbahen kuria ai do tongontongon
gabe garam, panondang, saksi. Domma lambin tambah bilangan ni anggota ni
kuria ampa buei na margoran Kristen lang manggoluh ganup ari rap pakon Kristus. Dos
songon goluhni sapari tingki parbegu ope sidea. Ihatahon sidea do na porsaya sidea, tapi
buah ni haporsayaon lang taridah.
Torang ipatugah si Paulus paringoran, parsimburon, ringis, uhur haut, hata tundal,
parinsaon, uhur hagijangon, hageoron, habutakon, parriah-riahon ampa hasumsamon
seng dong pardomuanni be bani na dob gabe pangihut ni Kristus. Idop ni uhur ni Naibata
ibagas Jesus Kristus banggal do tapi lang ase torus hita mardousa. Idop ni uhur sedo
songon sada bayoh na porlu ioperasi, dob ai iperban hansa. Gabe torus ipaseda sel-sel na
legan. Idop ni uhur ai ma hasintongan. Halani ai lang ipaturut Apostel ai ha-Kristenan na
so marpambalosion na toguh pakon tenger ni uhur na sintong.
Halak Kristen ningon manggoluh ibagas haliharon pakon hasintongan. Tuhan
Jesus manonggohon hita bani Johannes 17:17. Papansing Ham ma sidea ibagas
hasintongan; hata-Mu do hasintongan.
Tonggo: Ham Tuhan Jesus Tuhannami. Ibotoh Ham do situasi ni kuria-Mu pakon
ganupan pagorini. Gati itadingkon hanami dalan pakon harosuh-Mu.
Pabayu Ham ma hanami pakon palihar Ham uhurnami laho pasangapkon
goran-Mu marhitei hata pakon pambahenannami. Amen.
HALELUYA NO. 220:3-4
3. Hasangapon pamujion
bai Tuhanta, pardomuan,
ni ganup Kuria in;
I Utara, I dangsina,
I pastima pakon purba,
ipadomu Tonduy in.
4. Halaniin sai na horjahon,
uhur marsihaholongan,
bai ganup hasoman in.
Hapintoron, hasintongan,
Haliharon, hadameion.
in ma tong padanta in.
PARMAHAN NA MADEAR 4 JULI
D A M E I
“Ai seng iharosuhkon Naibata na geor, tapi damei do. Songon bani haganup kuria ni halak
na mapansing in.”
1 Korint 14:33
Domma tangkas iidah Apostel Paulus sonaha pargoluhan ni kuria ni Korintus
paima itulis surat on hubani kuria ai. Jumpah si Paulus do parbolah-bolahon ijai, na
marsibaen-baenni na mangkorhon hageoron. On do na gabe singkam mabarbarni ase roh
hata ni Apostel Paulus hu kuria ai mangkatahon. “Ai seng iharosuhkon Naibata na geor,
tapi damei do.”
Situasi na sonon gati jumpah hita bani partumpuanta, partonggoan ronsi itongahtongah
ni kuria, keluarga, rumah tangganta ampa bani goluhta. Siparahanni dong use
halak na mangkatahon, ai ma nini tanda-tanda ni tumpuan in na manggoluh, tanda-tanda
ni kuria na maju anjaha berkembang, tanda-tanda ni rumah tangga na bahagia anggo
jumpah ma ijai hageoron ampa partinggilan. Sonaha, sintong do niuhurmu pandapot na
sonon on? Jaga ma hita, ulang gabe salah ibahen hita fungsi ni Tuhan Jesus roh hutongahtongahta,
hutongah-tongahni haganup jolma. Anggo Jesus do ibahen hita ondolan ni
partumpuanta, kurianta ampa rumah tangganta domma jelas sedo hageoron partinggilan
na gabe tanda-tanda ni tumpuan ai manggoluh, kuria in berkembang, rumah tangga
bahagia. Tapi tanda na sintong ai ma anggo gok ibagas damei partumpuan, kuria ampa
rumah tangga in. Ai damei do na binoan ampa na sinuankon ni Jesus bani dunia on ampa
pangisini, bani parroh-Ni ai. Ingat hita ma doding ni Malekat ni Naibata bani partubuh ni
Jesus hu tanoh on, ai nini do: “Hasangapon ma bani Naibata na ibabou, damei ma i tanoh
on bani jolma hinarosuhkon-Ni in.” (Lukas 2:14)
Anggo sonai aha ma sibahenonta bani goluhta sonai ronsi i tongah-tongah ni kuria
ni Tuhanta! Pungkah hita ma sonari nari mangkagoluhkon damei na humbani Tuhan in, i
tongah-tongah kuria ampa i tongah-tongah ni haganup jolma. Damei anjaha mardamei,
on do na ituntut Naibata humbani goluhta. Sedo mambahen na geor ampa habadoron.
Sonai do ronsi itongah-tongah ni keluarganta, rumah tangganta ihasiholhon Naibata do
ase damei na jumpah ijai, ai rumah tangga in pe gabe kuria na etek-etek do in i lobei-lobeiNi.
Ase anggo damei ai na manggoki goluhta, hita do jolma ampa kuria na hinarosuhkon
ni Naibata, songon na jumpah bani kuria ni halak na mapansing in.
Tonggo: Tarima kasih ma bamu Tuhan, na dob manuankon damei i tanoh on, ase boi
tongon damei na hum Bamu mangojur hanami mardamei bani goluhnami,
ampa mangkagoluhkon damei in. Amen.
HALELUYA NO. 449: 2
2. Porluhon damei o, hasoman,
in do tanda ni hita susian.
Ase malas uhurta tong bani goluh on,
Rapkon Tuhanta, i tanoh on.
PARMAHAN NA MADEAR 5 JULI
ASE HAGANUP JOLMA MALUAH
“Dear do in, anjaha harosuh ni Sipaluah hita, ai ma Naibata, na mangkarosuhkon, ase
haganup jolma maluah anjaha das mananda hasintongan in.”
1 Timoteus 2:3–4
Ise do na boi maluah, anjaha huja ia ipaluah? Sasintongni ganup jolma tarsangkut
do bani rahut-rahut ni sibolis. Ganup jolma domma mardousa marhitei horja na
mansuhuni hisap-hisap ni parangkulaon, marhitei na mambalosi husip-husip ni sibolis.
Domma tarrobung, mandabuh hubagas dousa lang dong na terkecuali. Lang boi be jolma
in maluah anggo marhitei gogohni sandiri. Hamateian mando ujung ni goluhni, ai ma upah
ni dousa ai.
Tapi halani iharosuhkon Naibata do ase haganup jolma maluah songon na
hinatahon ni teksta on, gabe maidop do uhur-Ni mangidah jolma in, ipatalar do holongNi
marhitei na ibere Naibata panandaion ase ibotoh anjaha itanda jolma in dalan
haluahon na sintong. Pitah idop ni uhur-Ni do hansa na mambere dalan ai, sedo halani
dear gabei ni jolma, lang. Dalan na sintong ai ipatalar do hubani haganup jolma ai marhitei
na marsuruh Anak-Ni na sasada ai roh hutongah-tongahni hajolmaon, marhitei na
marrumang jolma. Ase itanda jolma in Ia anjaha iirikkon. Ai ibagas diri-Ni do hita ipintori
anjaha marhiteihon-Si do hita maluah, ipaanak bani Naibata. Marhitei Jesus do harosuh
ni Naibata boi terlaksana.
Haluahon na sintong na ibere hubani jolma in marhitei Anak-Ni ai, lang haluahon
na terbatas. Tapi hubani haganup jolma do, halani dos haganup jolma in i lobei -lobei ni
Naibata. Halani ai lang adong gunani jolma in paborsih-borsihkon diri, mamintori dirini i
lobei-lobei ni Naibata marhitei na mansalahkon hasoman na legan. Halani mangkorhon
gijang ni uhur do use na sonai ai. Tapi pataridahkon hita ma marhitei parsahapta,
horjanta, parsaoranta, pangabakta hubani haganup jolma bahasa hita na dob manjalo
haluahon na binoban ni Jesus. Ase dihut halak na legan ambil bagian bani haluahon ai.
Marhitei anjaha na sonai ai do ase boi das jolma in mananda hasintongan ni Naiabata
anjaha hagoluhan si dokah ni dokahni ujung ni goluhta on.
Tonggo: Tarimakasih ma bamu Tuhan, bani na binere-Mu haluahon bannami jolma
pardousa on, mambahen dihut mananda hasintongan-Mu. Amen.
HALELUYA NO. 205:3+5
3.Domma iparsirsir
idop ni uhur-Ni,
‘ge layak-Ni rup.
Domma matei Kristus,
domma dob itobus
hita haganup,
Sangap ma bai Naibata
na porsaya bai hata-Ni
in pagoluhon-Ni.
5. Roh ham na marhoru,
ia dob mangaku
uhurmu nuan.
Roh ham bai Jahowa
pasasapkon dousa
hu bai daroh-Niin.
Jesus in, Anak-Ni in,
in do gabe haluahon
humbani ganup utang.
PARMAHAN NA MADEAR 6 JULI
HARAJAON NI NAIBATA
“Ai sedo ibagas hata harajaon ni Naibata, tapi ibagas hagogohon do.”
1 Korint 4:20
Ija do sasintongni harajaon ni Naibata?
Apostel Paulus mangkatahon hubanta marhitei ayat renungan on, “Sedo ibagas
hata harajaon ni Naibata, tapi ibagas hagogohon do.” Humbani hata on boi tangkas aruson
na seng hape bani hata ampa sahap harajaon ni Naibata. Ase age sonaha pe maloni sadasada
halak marsahap bani sada-sada tumpuan, jenges hatani bani na marambilan i gareja, i partonggoan ronsi bani tumpuan-tumpuan na manarsingati hata ni Naibata, anggo lang adong pangkorjahononni ia sandiri pe lang dapotan upah bani na hinatahonni ai.
Ase anggo sonai, uhur ampa pambahenan maningon sintong. Ai do sintuhunni ai
ningon romban do anjaha sadalan hata pakon parlahou. Maronjolan humbani na sonin in
do ase pag Apostel Paulus mangkatahon “Usihi nasiam ma ahu.” Hombar anjaha sadalan
do hatani, hubani pangabakni. Lang ongga ihatahon hata na so tongon. On do mambahen
marhagogohon ia mangkorjahon sagala horja age pe iparburu, iayak-ayak munsuhni ia.
Hata atap sahap na i luarhon na sadalan hubani parlahou, pangabak ampa
pangkorjahononkon do hata na sintong, marjumbalang ampa na marhidorat. Ijai do
jumpah harajaon ni Naibata. Ase pitah ibagas dirini Jesus Kristus do jumpah sahap, hata
na dos pakon pangkorjahononni. Anggo Tuhan Jesus sagala na sinahapkon-Ni ai na
hinahorjahon-Ni, anjaha na hinahorjahon-Ni ai do iambilankon. Ipatalar do hubani jolma
in holong-Ni marhitei panghopkopon-Ni. Sedo pitah ibagas hata hansa ai ipataridahkon.
Tapi na tongon-tongon do iberehon, igalangkon diri-Ni i Golgata bani hayu parsilang ai
ase parsimada jolma in bani harajaon-Ni.
Jalo ampa hagoluhkon hita ma hagogohon ni Tonduy ni Naibata, na boi mambahen
marhagogohon hatanta, margogoh ampa hita laho mansahapkon na madear, na sintongsintong
sadalan hubani na hinahorjahonta.
Tonggo: Suruh Ham ma Tonduy-Mu in mangajari hanami mansahapkon na madear
na sintong hombar hubani pangabak ampa parlahounami. Ase margogoh
hatanami, na mangkorhon pasu-pasu bani haganup na mananggar. Amen.
HALELUYA NO. 115:5+8
5. Sai tiru Tuhan Jesus in
na roh manghopkop ho.
Pambaen-Ni ‘ge Hata-Ni in
hagoluhanmu do.
8. Halani ai sai ringgas bei
mangimbang dousa in.
Ganup na hagoluhkon bei
na humbani Tuhan in.
PARMAHAN NA MADEAR 7 JULI
PARULIHANNI GANUP BANGSA
“Ase dob ibogei sidea ai, sip ma sidea, ipuji sidea ma Naibata, nini ma: Ase dihut do hape
bani sipajuh begu-begu ibere Naibata hamubahon ni uhur, ase manggoluh.”
Lahoan ni Apostel 11: 8
Lang sai irestui jolma horja na manlembang humbani peraturan age pe hasil ni
horja ai jenges. Hotop do lang sadar jolma na so otomatis paraturan na dear boi
patubuhkon horja na dear. Ai do homa na ialami ni Apostel Petrus i Huta Kesarea. Na
niojur ni Tonduy ni Naibata do ia manlahoi horja ai hubani sipelebegu. Sirsir do ia bobaon
ni Tonduy ni Tuhan, ujungni sirsir age sipalabegu ai tardidi.
Paraturan ni Jahudi lang manghadearkon na sonai ai, age pe horja na sonai ai ma
tonah ni Tuhuh Jesus bani na laho naik Ia hu Nagori Atas. Halani tangian Apostel Petrus
bani tonah ni Jesus ase peraturan ni Jahudi, ibagas malas ni uhur iambilankon ma ambilan
na madear ai bani sipelebegu. Marhitei ambilan na madear in do hansa boi paubahkon
uhurni jolma, ai do taridah homa bani sipelebegu ai.
Sora ni na mabuei lape tontu ai sora ni Naibata. Ipindo sidea do use
ipartanggungjawabkon Apostel ai horjani ilobei-lobei ni rapot. Lang iharosuhkon sidea
tindakan ni apostel on, aima tuntutan bani. Age pe buei hinan sidea lang satuju bani horja
ni Apostel ai, marhitei hatani Naibata na nionjolhon ni Apostel on laho manlahoi horjani
ai, dobni gabe mubah ma uhur ni sidea.
Hatani Naibata do na boi paubahkon uhurni jolma, age na dob Kristen ia, tarlobih
na ibagas hagolapon ope. Rusia ni Naibata na ibagas ambilan ni namadear in, ai do
manjamin hamubahon haubahon ni uhur ronsi pasaudkon ganup bangsa na itanoh on.
Porlu tumang ganup na porsaya bani Jesus pabogeihon hata ai bani ganup halak, ai
paulihan ni ganup bangsa do Ia. Na pabogeihon hatani Tuhan mararti do use ai
patawarhon hamubahon ni uhur ronsi hasadaon halani sonai ma na porlu ni uhur ni
Tuhan Jesus, gabe parulihanni ganup bangsa hata-Ni, mambahen itonahkon ai bani na
laho naik Ia hu Nagori Atas. Hasirsironta do ipakei Tuhan Jesus padashon parulihon ai,
ase ganupan bangsa dapotan ulih na madear i dunia on tar lobih bani parroh-Ni use.
Tonggo: Ham Tuhan Jesus suankon Ham ma ringgas pakon porlu ni uhur bannami
mangambilankon hata-Mu, ase marulih ganup hasomannami jolma. Amen.
HALELUYA NO. 145:1+3
1. Ringgas hita rup, manogu ganup,
Na pag manendel na hengkang hobal,
bani hatani Tuhan na sangap tongtong
Rosuh-Ni ma bahen i dunia on.
3. Horjahon bujur hata-Ni ganup,
Sai monang jojor bahenon-Ni ganup
Ai Ia do raja na monang tongtong.
patir-tir pe bala manginsurut tong.
PARMAHAN NA MADEAR 8 JULI
SIDEA PE DIHUT DO ARAHKONONKU
“Adong ope biri-biring-Ku na legan na so humbani harang on, sidea pe dihut do
arahkonon-Ku, anjaha tangihonon ni sidea do sorang-Ku, gabe sada hulanan ma ia anjaha
sada parmahan.”
Johannes 10:16
Jesus hu dunia laho paluahkon jolma. Halani ai ia manghasiholhon ganup jolma
parsimada bai hagoluhan ampa haluahon ampa hagoluhan na binoban-Ni. Ai do ase ganup
jolma idilo janah iarahkon masuk humbani hulanan-Ni. Hulanan ai ma halak na
mambalosi janah na manghaporsayai Jesus na gabe sipaluahni. Anjaha Jesus Kristus
sandiri do na gabe parmahan ijai, Jesus sandiri do na mambere ampa na pasirsirhon
haluahon ampa na manramoti hulanan ai.
Tapi sonari domma nani ganup jolma masuk humbani hulanan ai? Balosni tontu
lape. Buei ope biri-birini Tuhan in na idarat ni hulanan ai. Sidea ai ma na lape mananda
holong ampa idop ni uhur ni Tuhan in. Sonai age halak na targoran Kristen tapi na lang be
mambahen Jesus sibalosan ampa siirikkononi. Sidea on aima na iparjabolon dousa ampa
hisap-hisap ni dunia on. Tapi age pe sonai, sidea pe igoran Jesus do biri-biri Ni. Halani ai
porlu do uhurni Jesus ase masuk hubani hulanan-Ni. Holong do uhur-Ni mangidah ganup
biri-biri.
Ise do pangkeion ni Tuhan mangarahkon pakon mandilo sagala biri -biri-Ni na
idarat ai? Gereja, ai ma hita selaku halak na porsaya, ai do idilo janah isuruh Tuhan in laho
mangarahkon sagala halak na lape mananda ampa mangkagoluhkon holong ampa idop ni
uhur ni Tuhan Jesus. Horja ai ma na maningon do sidalanankononta, domu hujai do tujuan
pandiloon banta ai ma mambaritahon Ambilan na Madear, na igoran hita ma ai horja
zending. Na martujuan ase ganup jolma tariluh bani holongni Tuhan Jesus na mambere
haluahon amapa hagoluhon di sadokahni dokahni Ase patut ma perhatian na banggal
banta ai. Na berarti pelayananta lang dear pitah sibuk mangurusi na dob ibagas hulana n
in tumang, na maningon do bereonta, perhatian ampa pelayanan na banggal dompak biribiri
ni Tuhan na idarat ope. Ingat hita, ganup do halak homa sasaran ni Pelayan ampa
Kesaksianta marhitei na mandalankon holong ni Tuhan in bani goluhta si ganup ari
itongah-tongah ni keluarga, gereja, masyarakat pakon bani ganup jolma.
Tonggo: Ham Tuhan Jesus, ojur Ham ma hanami ase tong-tong mambalosi
Ham.Janah marharinggason mandalankon suruhan-Mu manaksihon hata
hagoluhan na Hum Bamu in. Ham ma tong na marmahani hanami. Amen.
HALELUYA NO. 118:3
3. Baen suruhan-Mu ma ahu,
ai seng soya Hata-Mu.
janah Ham homa manogu,
ganup jolma roh Bamu,
ganup jolma roh Bamu;
Holong atei-Mu sai togu
Ganup jolma roh Bamu
PARMAHAN NA MADEAR 9 JULI
ISE DO HITA?
“Barang ise na humbani Naibata tangihonon ni ai do hatani Naibata. Halani na so humbani
Naibata do nasiam mambahen lang itangihon nasiam Ahu.”
Johannes 8:47
“Lang daoh tubis humbani bonani.” “Humbani buah ni do tandaon hayu ni.” Sintong
do na hinahatahon ni umpama in. Sadalan hujin do na sihol hatahonon ni Jesus hubanta
panorang on. Identitas lang itonggor humbani rupanta atap ciri-ciri lahiriah tapi humbani
pargoluhanta do. Humbani tabiatni do tandaon sahalak ampa humbani parlahou ni ronsi
humbani sikap hidupni.
Na patandahon dirinta na tongon humbani Naibata lang pitah tanda-tanda
lahiriah; Misalni rajin hu gareja, ahli mangulas hata, tardaftar gabe pagori ni kuria pakon
na legan na usih hujai, tapi na utama na gabe penentu aima manangihon Hata ni Naibata
atap Hata ni Jesus Kristus. Maningon mararti do ai mambalosi anjaha mandalankon. Lang
songon na manangihon ambilan i gereja hansa, tapi mambalosi anjaha mandalankon
tongon hita.
Sahalak Teolog na margoran West Scott mangkatahon: “Pargoluhonta do na
patandahon na humbani Naibata atap lang.” Ase anggo na tongon do hita humbani
Naibata tontu lang daoh hita hubani Naibata tontu lang daoh hita humbani hata atap
harosuh-Ni Naibata. Buah ni pargoluhan do na patandahon humbani ise hita atap hunja
hita marbona. Anggo taridah do buah ni Hatani Naibata bani goluhta, tanda ma na
humbani Naibata do tongon hita.
Ase na humbani ise do hita? Anggo tongon do na humbani Naibata pasti do
itangihon hita hata ni Tuhan Jesus bani goluhta.
Pataridahkon hita ma na tongon-tongon do hita na humbani Naibata na tongtong
ibalosi anjaha idalankon hita ma Hata-Ni bani ganup goluhta.
Tonggo: Ham Tuhan Jesus, totap ma Ham marianan marhitei Tonduy-Mu ibagas
hadirion nami, ase talar marhitei goluhnami na hum Bamu do tongon
hanami. Amen.
HALELUYA NO. 310:2
1. Tuhan ulang au paturut manontuhon langkahkin.
Pitah Ham ma hutangihon bai ganupan goluh on.
Bai ganup hahuranganku pakon pardousaonkin.
Togu-togu Ham ma ahu das hubani ujungnin.
PARMAHAN NA MADEAR 10 JULI
DEAR DO GANUP IBAHEN
“Jadi longang tumang ma sidea, nini ma: Dear do haganup ibahen. Gabe marpambogei do
na nengel anjaha marsahap ia na longah.”
Markus 7:37
Na nengel ampa na longah ai ma na sabagian humbani buei bani hahurangan
barang ketidaksempurnaan ni jolma. Ketidaksempurnaan ai mambatasi malas ni uhurni
jolma ai sandiri. Bahkan dihut homa mempengaruhi bani na mangkobashon goluh si
ganup ari on. Tapi marhitei ambilan on domma tangkas ibotoh hita paboa boi do
ipamalum Jesus na sonai ai. Anjaha lang pitah sapari hansa marlaku kuasa-Ni ai tapi das
do homa age panorang sondahan on, janah lobih ope hunjai, ai sura-sura ni Naibata lang
pitah pamalumkon naborit ni pardagingon hansa, tapi keberadaan ni jolma secara
menyeluruh do. Termasuk naborit dousa. Naborit dousa on do siparahan. On do na
mambatasi goluh ni jolma mambahen lang sempurna goluhta ilobei -lobei ni Naibata.
Dousa ai do na manirang parsaoranta pakon Naibata, anjaha aima na sihol tambaran,
patorsaon padearon ni Tuhan Jesus.
Sasintongni anggo na ginoran halak Kristen ai ma jolma na dob tinambaran,
pinadear ni Jesus. Domma iharhari sangkut sangkut ampa i dokdok sagala na hurang na
dong bani jolma, aima marhitei daroh-Ni sandiri. Sehingga talup anjaha dear jolma in
lobei lobei ni Naibata. Sadokahni on longah do dilahta pasal sahap na madear anjaha
nengel pinggolta bani hata ni Naibata, tapi nuan domma itambari ai. Domma malum hita
humbani naborit na sonai ai, ai domma isempurnahon hita humbani hahurangan na sonai
ai. Gabe talup, dear, sempurna hita i lobei-lobei ni Naibata. Lang martikas anjaha lang
marsining be hita, ai domma gabe tinompa na baru hita ibagas Jesus in.
Tugasta sonari aima gabe jolma na sirsir padearhon bagei -bagei na hurang dear
na i dunia on. Boi do tarjadi, ra hita padearhon hasomanta tapi hita sandiri lang sirsir
ipadear barang mardear. Anggo jumpah na sonai i tongah-tongah ni halak Kristen, tontu
lang suman be ai. Ase jolma na dob pinadear ni Tuhan Jesus, aima ma mamakei dilah
mamuji Naibata anjaha na mambere pinggolni manangihon hata ni Naibata anjaha na
manaksihon bani dunia on paboa na madear do haganup na binahen ni Tuhan Jesus. Aima
hasaksianni, aima goluhni anjaha aima homa age onjolan ni ganup kegiatan ni goluhni.
Ase, panggulmitonni pe totap do manaksihon paboa haganupan na binahen ni Jesus dear
do haganupan anjaha surdungni pe hubani na madear pakon napadearhon ma.
Tonggo: Domma tongon ipadear Ham hanami Tuhan. Halani ai urupi Ham ma
hanami ase gabe jolma pardilah ampa parpinggol na pasangapkon Ham ma
hanami manaksihon paboa na madear do haganupan na binahen-Mu.
Amen.
HALELUYA NO. 340:2+4
2. Huondoskon bani Jesus
haganup goluhkon.
Hutadingkon ganup dousa,
huihutkon Tuhan In.
Huondoskon ma, huondoskon ma,
bani Jesus Sipaluah huondoskon ma.
4. Huondoskon bani Jesus
haganupan gogohkin.
Holong pakon kuasa-Ni,
in ma manramotkon au.
Huondoskon ma, huondoskon ma
Bani Jesus Sipaluah huondoskon
ma.
PARMAHAN NA MADEAR 11 JULI
MARLOBIH-LOBIH IBAGAS TUHAN
“Domma hujalo haganup, anjaha marlobih-lobih do ahu. Marlobih-lobih tumang do ahu
nuan, dob hujalo tinongos nasiam marhitei ai Epaproditus, aima uap na misbou, galangan
hinamalashon ampa hinarosuhkon ni Naibata.”
Pilippi 4:18
“Mambere, manjalo, iurupi, mangurupi, itumpaki, manumpaki, aima hubungan
timbal balik na jenges tumang.”
Hinajengesan ni haganup ai semakin sempurna anggo idasari hubani holong na
tulus, songon Kristus na mangkaholongi Kuria, tanpa pamrih mambere haganup na adong
Bani, bahen haluahon ampa hasasapanni dousanta.
Keterkaitan bathin, hubungan emosional na dear antara Apostel Paulus pakon
kuria Pilippi pataridahkon hal on. Apostel Paulus mamorluhon pangurupion. Kuria ai
merasa terpanggil laho padashon pangurupionni. Hal on taridah bani ungkapanni Apostel
Paulus “Sanggah i Tesalonika pe ahu domma perhatianni Kuria Pilippi hubani Apostel
Paulus, terbukti hubani lang na sahali dua hali be i tongos sidea pangurupion hubani.”
Haganupan on marbona hubani ahap ni ni Kuria ai, na dob marhabayuon do sidea
ibagas hasintonganni Tuhanta Jesus kristus, ija na itongoshon sidea do galangan malas ni
uhur ni sidea do galangan malas ni uhur ni sidea hubani Apostel ai.
Isobut Apostel Paulus do galangan malasni uhur ni sidea ai: “Uap na misbou
galangan hinarosuhkonni Naibata.” Ungkapan on patugahkon: “Tumpak hubani Harajaon
ni Naibata usih do ai songon uap na misbou.” Anggo bani 2 Musa 29:18 isobut do: “Tutung
ma biri-biri tunggal iatas anjab-anjab, galangan situtungan ma ai bani Jahowa, uap na
misbou.” (Hesekiel 20:41) Ase galangan na misbou, marium, jenges na gabe persembahan
ni kuria ai hubani Tuhan Naibata, bahen haporluan ni Naibata do ai.
Ibere hita perpuluhan/persembahan bulananta marhitei kuria, bahen na porlu
bani Tuhan in do in. Ipadashon hita galanganta marhitei kuria, tong do na porlu bani
Tuhan in. Anggo Apostel Paulus mangkatahon: “Marlobih-lobih do ahu manjalo tongosan
nasiam marhitei si Epaproditus.” Tontu do sonai homa hita (Kuria) in na manongoshon
na porlu bani kuria ni Tuhan, ase marlobih-lobih homa hita bani pasu-pasu na humbani
Naibata.
Tonggo: Ham Tuhan pargogohi Ham ma hanami mamakei pasu-pasu na hum Bamu,
ase i botoh hanami homa manongoshon na patut hubani Kuria-Mu. Amen.
HALELUYA NO. 383:1-2
1. Marhitei diatei tupa
roh do au Tuhan,
mamboban buahni horja
na binere-Mu,
Jesus, Jesus, jalo Ham ma au,
bai hurangni panurdukku,
anju Ham ma au.
2. Ge buei na dob hujalo
pasu-pasu-Mu,
tapi hurang do hubahen,
malas uhur-Mu,
Jesus, Jesus, jalo Ham ma au,
bai hurangni panurdukhu,
anju Ham ma au.
PARMAHAN NA MADEAR 12 JULI
PUHO MA HAM
“Puho ma ham, anjaha pargogohi ham ma hasomanmu na tading in, na laho matei in; ai
seng dong jumpah Ahu horjamu na gokan dear ilobeini Naibatangku.”
Pangungkabon 3:2
Hubani na tarpodom do hatahonon; puho ma ham! Tapi anggo hubani halak na
dob matei, seng adong jolma mangkatahon puho ma ham.
Kuria Sardes igoran Tuhan do na dob matei, halani haKristenonni lang ibagas na
sasintongni be, domma marsipakulah-pakulah. Ase goran mando sidea manggoluh, anggo
sasintong domma matei. Artini, bentuk ni mando Kristen anggo isini domma kosong.
Tapi adong ope otik nari lang targolong hubani na dob matei. Tapi on pe, anggo
pori naborit ondi, domma parah tumang, hujon ma ihatahon Tuhan puho, bertobat anjaha
mulak hu hasintongan.
Dihut do hita ipuhoi Tuhanta marhitei ayat sadari on, halani ai puho ma hita
humbani pardousanta janah tadingkon hita ma ai. Puho ma hita laho mangkorjahon
tanggungjawab na binere ni Tuhanta, ai ma mampargogohi hasomanta. Ai do horja na
hinarosuhkon ni Tuhanta. Anggo sonai pingkiri ham ma sadari on, Kristen na ijahanin do
ham!
Kristen na manggoluh do ham?
Kristen na tarpodom do?
Kristen na laho matei do? Boi ope ipagoluh?
Tapi anggo Kristen na dob matei do, gijighonon-Ku ma hubani apuy na so ra
mintop. Halani sadokah ibagas dousa hita marianan, lang mungkin be jumpah Tuhanta
horjanta na gokan dear. Halani ai puho ma hita humbani hadousaonta anjaha tadi ngkon
hita ma ai.
Tonggo: Sai Kristen na ra puho ma hanami Tuhan, ase ulang tarsonggot hanami bani
uhum-Mu, sai pargogohi Ham ma hanami, ase manggoluh hanami ibagas
Hata-Mu. Amen.
HALELUYA NO. 262:2-3
2. Puho ho na modom in,
na ibagas dousa;
Ase ulang halaniin
ho marutang hosah;
Ai sompong, Tor julnong,
roh ma parlajouan bai na so marjaga.
3. Puho, ai na so tarbaen
Tonduy ni Jahowa
manorangi ho, mambaen
sirang humbai dousa?
Ningon do puho ho,
ase bereon-Ni dear ni layak-Ni.
PARMAHAN NA MADEAR 13 JULI
ULANG MARNALOJA
“Tapi ulang ma marnaloja hita mambahen na madear, ai na manabi do use hita bani
panorangni, anggo seng gabe galek hita sonari.”
Galatia 6:9
Aha do na sintong horjahonon ibagas panorang on?
Nini ayat na iatas in: Ulang ma marnaloja mangkorjahon na madear. Kalimat na
pondok, na urah antusan, tapi payah tumang mangkorjahon.
Domu hubani jaman sonari on, jaman kemajuan pakon jaman pembangunan, tontu
ituntut hubanta tanggung jawab mangkorjahon na madear. Tapi hotop masa istilah
mangkatahon “Matei-matei na bujur do hansa lalab,” gabe gati do sundat halak
mangkorjahon na madear, atap pe gabe moru semangatni mangkorjahon na madear. Na
deba homa mangkatahon: “Ahu soh ma lobei santorap on, na legan ma mangkorjahon in.”
Ayat on mangondolhon hubanta, ase ulang marnaloja hita mambahen na madear.
Memang maruntol do na porsaya in bani goluhni, sipatah mariluh-iluh laho manaburhon
na madear, sipata tarpunjung ai bani goluhni.
Tapi ingat hita ma na manabi do hita use, bani panorangni, anggo lang gabe galek
hita sonari. Ai anggo gabe galek hita mangimbang alasan-alasan nongkan ai, gabe lang
saud ihorjahon hita na madear, lang saud das bani panabionkon. In ma songon na
manangkih palia gunung mulak hun gutulni tumang, seng saud dapotan hasil.
Halani ai partahankon hita ma mangkorjahon na madear das hubani ujungni, ase
dapotan hita hasilni songon na sininta ni uhurta bei.
Tonggo: Pargogohi Ham ma hanami Tuhan das hu ujungni, mangkorjahon na
madear ase dapot hanami haluahon na hum-Bamu. Amen.
HALELUYA NO. 362:1-2
1.Na loja ho bai goluhmin,
i bahen hasunsahan in.
Sirsir do parsaranan in,
kawahkon Tuhan Jesus in.
Sai sip, ungut-ungutmin pasoh,
sai sip ungut-ungutmin pasoh
sai sip ma ho, kawahkon Jesus in.
2.Tungkis do sidalananmin,
borat tumang do silangmin.
Kawahkon dompak babou in,
Sai na podas do salpu in.
Sai sip, ungut-ungutmin pasoh,
sai sip, ungut-ungutmin pasoh,
sai sip ma ho, kawahkon Jesus in.
PARMAHAN NA MADEAR 14 JULI
HATENGERAN NI UHUR DO IA
“Ia lang pe hatengeran ni uhur hita hatengeran ni uhur do anggo Ia, ai seng tarparnalangsi
diri-Ni.”
2 Timoteus 2:13
Anggo mardalani bapa pakon niombah atap huja, umpamani: piknik, hu juma, hu
harangan janah anggo totap do ijin bapani seng anjai mabiar atap sangsi niombah ni ai.
Halani tenger do uhur ni niombahni anjaha dong pangarapanni seng paturuton ni bapani
anggo dong bahaya na mangacam goluhni, artini seng tarpasoh bapani ia paidah-idah na
masa bani niombahni. Usih hujai do Tuhanta songon hinatahon ni teks na iatas in. Tuhan
na gabe hatengeran ni uhur, seng tarpanalangsi dirini. Anggo sonai ise do na dapotan
pangurupion na humbani Naibata? Ai ma na sirsir martenger ni uhur Bani. Jadi barang ise
na sirsir martenger ni uhur ateini. Igantih do sagalah harugianta paima lape iberehon hita
na sihol sibereonta bani Harajaon ni Naibata. Mardingat do hita bani si Abraham,
iparsirsir Naibata do sada biri-biri na gabe gantih ni si Isak. Lang ongga marutang Naibata
banta. Tapi gati anjaha buei tumang jolma marhatengeran bani na adong bani, na so
mambere jaminan ni goluh. Arta na dong na laho bois in.
Haganupan tenger ni uhur na iatas in, lang mambere malas ni uhur na manontong.
Pitah bani Naibata do hansa sidearan alamat ni tenger ni uhurta, halani totap do Ia
mangurupi, mangkasomani pakon padearhon. Halani ai patut anjaha sihatengerhon do
Naibata bani haganup permasalahan ni goluhta siganup ari.
Tonggo: Ham Tuhan Naibata, gati tumang bani goluhnami on lang martenger ni
uhur hanami Bamu, ai pe maidop ma Ham, anjaha pargogohi Ham ma
hanami, ase tongtong totap onjolan ni tenger ni uhurnami hu Bamu. Amen.
HALELUYA NO. 279:2
2. Sai tenger uhurmu bai Naibata;
boan ma horumu bai Tuhanta da.
Lao magou pe na ijon use,
sonang bahenon-Ni hita on use
Ham o Tuhanku, haposankin,
boan Ham ma ahu hu surga in.
PARMAHAN NA MADEAR 15 JULI
SITARONON NA MANGKORHON MALAS NI UHUR
“Tapi malas ma uhur nasiam, anggo saud nasiam bani sitaronon ni Kristus in, ase bani
partalar ni hasangapon-Ni ai marmalas ni uhur homa nasiam anjaha marolob-olob.”
1 Petrus 4:13
Sanggah pemberontakan i Ziare tahun 1946, itangkap ai do buei bangsa na legan i
negara ai. Sidea ituduh mata-matani Bangsa Amerika pakon Belgia na mendukung
pamarentrah na markuasa bani panorang ai.
Tartangkap do si Al Larson pakon piga-piga hasomanni missionaris i negara ai.
Bani tutupan ianan ai Al Larson on haganup sidea 10 halak tapi pitah 3 halak do Kristen.
Ibagas penjara on sidea isiksa, janah iancam hukuman mati. Age pe isiksa sidea ibahen do
sada haputusan “Aha pe na tarjadi maningon ambilankononku do goran ni Jesus.” Ibagas
penjara on pe sidea martonggo janah marambilan. Pangkorhon gabe porsaya ma haganup
hasoman ni na ipenjara on humbani Jesus. Puji Tuhan iadongkon ma genjatan senjata
inegara on janah haganup tahanan ipaluah.
Sonai homa sanggah panorang perang dunia ke II, adong keluarga Missionaris i
Amerika. Sada do hansa niombahni sidea, ai pe dokah tumang do baru tubuh. Sanggah na
laho sidea hu gareja, terjadi ma kecelakaan i tongah dalan. Maponggol ma nahei niombah
ni on anjaha iamputasi. Dob piga-piga dokah kejadian na masa ai roh ma pangumuman
humbani pamarentah ase ganup anak dalahi maningon wajib dihut perang, kecuali orang
cacat. Dob ni maluah ma niombahni missionaris on.
Goluh ni jolma na manggoluh i tanoh on tong do berhadapan pakon maa-masa
sulit, suram, putus asa pakon na legan. Apostel Paulus mangkatahon: “Mawat-mawat do
imbang nasiam sibolis in…” (1 Petrus 5:8).
Anggo marsitaronon halani goranni Jesus sedo na mararti lang adong malas ni
uhur tapi sitaronon halani Jesus Kristus mangkorhon malas ni uhur. Tapi sitaronon halani
hisap-hisap ni dunia on mangkorhon hamateian. Malas ni uhur halani Jesus kekal,
sadokah no dokahni.
Anda mengalami masa-masa sulit, teraniaya, berada di bawah ancaman bahen
ham sada haputusan “Au totap padashon Ambilan na Madear.” Apa yang kita sebut
kesempitan bagi Allah Adalah kesempatan.
Tonggo: Ham Tuhan Naibata, huBamu ma hanami marhasuhutan, bere Ham ma
humbannami gogoh, ase margogoh hanami padashon Ambilan na Madear,
janah sirsir hanami padashon Ambilan na Madear, janah sir-ir hanami
marsaor bani sitaronon ni Kristus. Tuhan hum Bamu do hansa jumpa
hanami malas ni uhur pakon olob-olob. Amen.
HALELUYA NO. 349:1
1. Goran Jesus sai marsora, bai ganup dunia on.
Goran Jesus pasonangkon, ganup na marhoru in.
Goran in marpasu-pasu, bai ganup pardousa in.
Haganupan do idilo bani gomgoman-Ni in.
Goran Jesus si jengesan, laho paborsih uhurhin.
Martarimakasih ahu, ibahen na itobus ahu.
PARMAHAN NA MADEAR 16 JULI
DODING KRISTEN
“Marsahap ma nasiam samah nasiam marhitei doding Psalm, doding puji-pujian ampa
doding partonduyon, dodingkon anjaha puji nasiam ma Tuhan in ibagas uhur nasiam!”
Epesus 5:19
Marhitei doding boi do papuasonta isi ni uhurta, atap malas pe uhur dong ibagas
atap pusok ni uhur. Haganup jolma pakon bangsa do hataonkon mambotoh mandoding.
Halani ai do ase bagei-bagei ni doding nasional, doding porang, doding ni parjuma, doding
percintaan, doding na marisi hajengeson ni daerah pakon doding tangis-tangis.
Domma dokah homa doding partonduyon, mamuji Naibata, na ginoranta doding
Kristen. Masuk doding Kristen ma na nisobut ni Apostel Paulus bani ayatta on: Doding
Psalmen, doding puji-pujian pakon doding partonduyon. Doding Psalmen na isobut ijin,
ai ma doding na marhasoman alat musik. Somal ni alat music sigiuton do on, songon
husapi pakon arbab.
Marhitei doding na sisonai ai boi marparsaoran hita samah hita. Tujuanni ai ma
rap mandodingkan puji-pujian bani Tuhanta! Hunjai taridah paboa halak na rap
mandodingkon Tuhanta seng mungkin be maruhur habutakon, tapi domma ibagas
parlahou haliharon. Doshon na marsahap-sahap do homa age anggota koor samah sidea
sanggah na mandodingkon didong puji-pujian pakon doding partonduyon ai, janah isi
parsahapan ai, ai ma mamuji Tuhanta in. Halani ai do ase doding Kristen seng boi
marlawan humbani Naibata, tapi totap do Bibel gabe onjolan pakon ukuran ni doding
Kristen.
Bagian parpudi ni ayat on mangindohon ase ganup hita mandodingkon Tuhanta
marhasoman alat musik humbani gok ni uhurta! Mandoding rap pakon hasomanta
pasangapkon Tuhan in. Dihut ma hita ganupan sidodingkon doding na hinarosuhkon ni
Tuhanta.
Tonggo: Ham Tuhan Naibata, jalo Ham ma doding puji-pujian nami na hurang in.
Parmaloi Ham ma hanami tongtong mandodingkon goran-Mu, tanda ni
hatarimakasihhon nami hu Bamu. Amen.
HALELUYA NO. 395:1-2
1. Pasangap ma Tuhanta
marhasoman arbab pakon doding.
Sombahkon ma pujian
marhiteihon inggou maraloling.
Dear ma riap mandoding haganupan,
malas uhur rap mangolobkon
Porini adong pusok ni paruhuran,
roh do Tuhan laho patorsahon.
2. Dodingkon doding na baru,
marhasoman sora na marlurlur.
Pamaling ma sora mu,
songon parmaling ni taur-taur.
Dear ma riap mandoding haganupan,
malas uhur rap mangolobkon.
Porini adong pusok ni paruhuron,
roh do Tuhan lao patorsahon.
PARMAHAN NA MADEAR 17 JULI
HORJA BANGGAL NA PANSING
“Ai ganup hali ipangan nasiam ruti na sonin, anjaha iinum nasiam humbani panginuman
in, parmatei ni Tuhan in do iambilankon nasiam ronsi roh Ia.”
1 Korint 11:26
Rata-rata dua tolu hali do hansa hita ibagas na sataun mar Horja Banggal
Napansing. Seng ai ope ukuran sitopatan sasintongni pasal bilangan ni na piga hali
mandihuti Horja Banggal. Bani Gareja Lutheran dong do na mambahen Horja Banggal
Namapansing ganup ari Minggu, sanggah panorang kebaktian. Na deba dua hali ibagas
sabulan. Janah bahat do homa na mangadongkon sahali sabulan. Si parayakonta do ase
hun gati hita mar Horja Banggal Napansing. Tongon iadongkon hita dua tolu hali hansa, ai
ma halani hurang ni Pandita anjaha bahat ni kuria ibagas sada Resort.
Marhiteihon ambilan on ipatugahkon do banta sada humbani arti ni Horja Banggal
Napansing, ai ma sahira mangambilankon pasal panghopkopon ni Jesus banta marhitei
parmatei-Ni in. Janah sirsir do homa hita mangambilankon ai ronsi na roh Ia magira.
Tonggo lang patut marayoh hita patugah-tugahkon panghopkopon ni Tuhanta,
anggo domma tongon-tongon iahapkon hita na dihut do hita manjalohon ai. Sada dalan
banta laho mangambilankon ai, ai ma marhitei na dihut hita ringgas mar Horja Banggal
Napansing! Ulang dong be na marsidalian laho mandihuti Horja Banggal Napansing, ai
marhiteihon ni ai domma gabe siparambilan hita ilobei ni dunia on, janah sekaligus homa
manjalo panghopkopon na marhitei Tuhanta.
Tonggo: Ham Tuhan Jesus, dihut do hape hanami doshon na mangambilankon
panghopkopon-Mu in marhitei na ra hanami mandihuti Horja Banggal
Napansing in. Pargogohi Ham ma hanami, ase tongon tongon hanami
manjalo panghopkopon-Mu marhitei parmatei-Mu. Amen.
HALELUYA NO. 433:1+3
1. Tonah ni Jesus do ijia in,
Horja Banggal Namapansing.
Ai dob sirsir i baen i meja in,
Nini do, “Tarima kasih!
Jalo ma ruti na pansing in!
Parhiteian ni daging-Ku.
Nai homa anggur napansing in!
Parhiteian ni daroh-Ku”
3. Madurus do daroh Jesus in,
bahen tobus ni dousanta.
Manobus hita sipardousa in,
ulang magou age sada.
Jalo ma ruti na pansing in!
Parhiteian ni daging-Ni.
Nai homa anggur napansing in!
Parhiteian ni daroh-Ni.
PARMAHAN NA MADEAR 18 JULI
PARUHUR TARIMA KASIH MA HITA
“Mangkatahon tarimakasih do ahu tongtong bani Naibata halani nasiam, mardingat
idopni uhurni Naibata ma binere-Ni bani nasiam ibagas Kristus Jesus.”
1 Korint 1:4
Anggo na hatahon tarimakasih bani hasoman hape seng na botoh aha halani, tontu
hita na martarimakasih ai pe na hurang marsemangat do, janah na manjalo
hatarimakasihon ai pe boi do tubuh sungkun-sungkun ibagas uhurni pasal ai. Gariada ra
do pangahapni songon na mangapasisi hita ijai.
Bani ambilan sadarian torang do taridah hubani ise itujuhon hatarimakasihon ai.
Seng mararti ia gabe lang na hatahon tarimakasih bani hasoman jolma. Mangihutkon
dalanna bei ma ai, atap ise na talup manjalo ai. Ase boi dapot hita atap hubani ise hita
martarimakasih, ipatugah do bani ayat on pasal ai, ai ma halani “mardingat idop ni uhur
ni Naibata.” Halani idop ni uhurni Naibata do ai, tontu bani Naibata do hansa hita
manghatahon tarimakasih. Naibata do na mangidopi, Ia ma homa na puji marhasoman
tarimakasih. Ganup panorang do hape sasintongni maningon martarimakasih hita bani
Naibata anggo idopni uhur-Ni do na gabe dalanta martarimakasih, halani ganup panorang
do ibere hubanta idop ni uhur. Idop ni uhur na marpardomuan humbani goluhta ari-ari,
janah ibagas ai do homa na marpardomuan bani sibere-bere partonduyon.
Martarimakasih si Paulus seng pitah halani idop ni uhur na jinaloni humbani
Naibata, tapi dihut do halani idop ni uhur na binereni Naibata bani Kuria Korint! Boi do
hape hita martarimakasih halani hasomanta. Anggo halani na legan pe martarimakasih
do hita bani Naibata, tontu lobih hunjin ope pertarimakasihta bani Tuhanta halani idop
ni uhurni Naibata na langsung jinalonta. Halani ai bilangi janah dingati hita ma tongtong
idop ni uhurni Naibata na langsung jinalonta. Halani ai bilangi janah dingati hita ma
tongtong idopni uhurni Tuhanta na binere-Ni hubanta, hubani keluarganta, kurianta,
bangsanta ronsi bani hasoman na legan pe, ase boi sintong partarimakasihta bani
Naibata, paridop ni uhur in.
Tonggo: Ta rimakasih ma bamu Tuhan Naibata, ai lang habilangan idopni uhur-Mu
na dob binere-Mu bennami pakon bani hasomannami pe. Ham do na talup
manjalo hatarimakasihon nami halani idopni uhur-Mu na bahat in. Seng
pitah na marpardomuan bani goluh na i dunia on ibere Ham bennami, tapi
dihut sibere-bere partonduyon na marguna das hubani hagoluhan simagira
ai. Ham ma sipujiannami janah jalo Ham ma hatarimakasihon nami. Amen.
HALELUYA NO. 132:1-2
1. Ai ambit lang do Ham,
parholong atei Ham,
huja ma au?
Halani holong-Mu
ampakon layak-Mu
hu surga au.
2. Tarimakasih ma
Bamu O Naibata
parlayak Ham!
Sibahen dalan in
marhitei Jesus in
hu surga in.
PARMAHAN NA MADEAR 19 JULI
SONANG IBAGAS SITARONON
“Patut do sonin uhurhu pasal nasiam haganup, halani ibagas uhurhu do nasiam, ai
parrupei do ganup nasiam bani idopni uhur na humbangku, sanggah na tartutup ai ahu
age sanggah na martahankon ampa na pajonamkon Ambilan na Madear ai.”
Pilippi 1:7
Patut do sonin uhurhu, ase hutaronkon gartutup pakon bagei-bagei ni hasusahan
halani nasiam nini Apostel Paulus hubani Kuria Pilippi. Ai sonaha uhurni ai? Ai ma: Ase
parrupei nasiam ganup bani idop ni uhur na humbangku ai. “Haluahon ibagas Jesus
Kristus ai,” na manghopkop jolma haganup, ase parrupei bani hagoluhan sisadokahni
dokahni. Ase ulang “surga dunia” parsatongkinan on iparleilei sidea, tapi surga
hasonangan si sadokahni dokahni ai ma, na dob ipasirsir bani sagala na porsaya. Hunjai
ibotoh na dob parrupei ia bani hagoluhan ai? Ai ma: Halani hata ai na marhorja ibagas
uhurni mambahen lang parduli ia bani sitaronon na mangonai bani dirini. Pala do
marrugi-rugi ia, nini: Anggo huhira sitaronon sisonari on seng satimbang ope in
marimbang hasangapon, na sihol sipatalaron ope banta.
Ase, anggo hasoman-Ni hita manaron, gabe hasoman-Ni ma homa hita ibagas
hasangapon. Naha nani uhurta manangar hatani apostel Paulus ai? Ra ma hita ibagas
hasangapon. Naha nani uhurta manangar hatani Apostel Paulus ai? Ra ma hita
mamungkah mandalani hasunsahan, harugian, langlang ni panorang martahankon idopni
uhur halani hagoluhan sisadokahni dokahni, na dob ibagahkon sijaloonta? Nini dodingta:
Payah ai tungkis tumang, dalan hu Nagori Atas.
Tapi martuah tumang, halak na ijin mamontas.
Martuah ma goranonta halak anggo rinding-rondong niombahni, anggo
marnadong halak, janah anggo marsangap halak, tapi daoh ope iatas ai hatuahon na
hinhatahon ni Apostel Paulus on. Sagala hatuahon na i dunia on, tading do ganup. Porini
na bahen hinan pe surat wasiat mangkatahon: Mercedes sibaruan an ma iananku matei,
rap pakon motor ai ma au ipamasuk hubagas kuburan na spesial ase muat ninta pori , seng
binere tinadingta sonai. Ihata halak do use tinadingta ai.
Ase surga dunia ope iparleilei na deba, halani na so ididah ope ganup na hinajenges
ni na mandalankon hatani Naibata. Porluhon hita ma ase dihut hita mangidah ai. Martuah
ma halak na borsih uhur ai idahonni do Naibata.
Tonggo: Ham Tuhan Naibata Bapanami, holong ma uhur-Mu, buka Ham ma matani
uhurnami, ase ididah hanami hinajenges-Mu, ase pag ma hanami manaron
halani Ham. Amen.
HALELUYA NO. 240:3-4
3.Seng ongga marna lupa Ham
bai parholong ni uhur.
Bamu, ai sai dapotsi ma,
Na boi mangapoh uhur.
Sonang tumang ibahen Ham,
na sai totap porsaya,
maluah humbani dousa.
4.Usihanmin sai tatap ma,
binaen ni Tuhan Jesus.
Sanggah i Dolog Golgata,
Daroh-Ni in madurus.
Totap ijin uhur-Ni in,
ijolom tong Bapa-Ni,
sai Ia ma usihi.
PARMAHAN NA MADEAR 20 JULI
PASU-PASU
“Pinasu-pasu ma na roh marhitei goranni Jahowa. Ipasu-pasu hanami ma nasiam hun
rumah ni Jahowa.
Psalmen 118:26
Humbani na manangihon hata ai do mandipar haporsayaon hubagas uhurta. Na
marhatongonkon Naibata na manompa sagala na dong. Naibata Bapanta ibagas Anak ni
Jesus Kristus. Ia do Naibata Jahowa anjaha paringis. Marhitei ayat puji-pujian na i atas in
pe halani pangurupion ampa haluahon humbani Jahowa, gabe iluarhon par Psalmen in do
hata: Pinasu-pasu ma na roh marhitei goran ni Jahowa! Seng do marhitei ompungni ondi
atap na ilobei ni sidea ondi ipadalan pasu-pasu ai. Anggo marhitei goran ni ai do, gabe
mutlak maoto do use diri tene. Ija ma lang? Gari sanggah goluhni, lang tarberesi pasupasu
humbani
niombahni
ase hasea namin haganup on. Dob matei gan use na pindo pasupasuni? Ai sitiruonta ma hata pasu-pasu ai hunjon hujanan, ase dihut hita mamasu-masu hasomanta marhitei goranni Tuhanta. Ulang goran na legan be.
Sonari anggo ipadomu hita pasu-pasu na iatas in humbani hatani Tuhan Jesus bani
Mateus 23:39 “Ai Huhatahon ma bennima, seng idahon hatani be Ahu humbani sonari
paima ihatahon nasiam: Pinasu-nasu ma na roh ibagas goran ni Tuhan!” Lambin roh
tangkas ma banta, paboa panandaion na tangkas bani Naibata, na songon Bapa, age
panandaion bani Jesus sipartobus hita, pakon panandaion bani Tonduy Namapansing na
manramotkon hita, ai do na parlobei dong banta; ase ibotoh hita hape padashon,
marluarhon pasu-pasu. Anggo sonai do pareksa hita ma dirinta marsada-sada atap na
sayop ma das hita hujai, anggo idugot-dugot hita ope mandalankon rosuh-rosuhta hansa,
lalab lang rosuhni Naibata iharosuhkon uhurta. Songgot-songgot ma on banta; halani
Naibata, ai ma parholong na tarsulur do, anjaha parringis bani na so ra manangihon hataNi.
Tonggo: Dear ni in pambahenan-Mu Tuhan marmudu-mudu hanami ibagas
partonduyon. Tapi halani hagelekon nami hurang iporluhon uhurnami
mangkatahon tarimakasih hu Bamu, gabe hasangaponnami ibahen hanami
pasu-pasu-Mu ai. Urupi Ham ma hanami mandalankon rosuh-Mu bani
goluhnami on. Amen.
HALELUYA NO. 20:4+6
4. Harosuh-Mu, O TuhanKu
sihol bahenonku tong.
Hupadear parlahouhu
pasangapkon Ham tongtong.
“Hiou hapintoron” in
bere Ham bai tonduyhin.
6. Pasu-pasu ma ambilan
i kuria-Mu ganup.
Sai pasorap bai pandita,
ge parhorja pe ganup.
Tonduy-Mu Napansing in
marhidorat baen ijin.
PARMAHAN NA MADEAR 21 JULI
BUKU BIBEL
“Ai sagala surat in sinahapkon ni Naibata do anjaha marguna mamodahi, maminsang,
pauli-ulihon ampa manogu-nogu hu hapentaron.”
2 Timoteus 3:16
Marguru tumang do hatani Naibata banta. Hata ni Naibata manogu-nogu hita hu
hapintoron ampa mambobai hita ganup hubani dalan na lihar. Hata in do na mamodahi,
maminsang jolma ase ulang ihorjahon na jahat, anggo lang marhitei hata-Ni Naibata na
ipadas hu tongah-tongahta, domma magou hinan itawan ni kuasani sibolis, itawan kuasakuasani
hagoluhan idunia on.
Halani marguna tumang do hata in, anjaha ase totap dong hata in itongah-tongah
ni jolma, gabe isuratkon ma hata in. Hatani Naibata na tarsurat ai ma Buku Bibel. Hata na
sinahapkon ni Naibata do isi ni Buku Bibel. Dob honsi hata ma tarsurat (Buku Bibel), in
ma na gabe sijoloman, na gabe kompas (patuduh dalan) bani pardalanni halak Kristen i
dunia on. Halani sijoloman do hatani Naibata ibagas goluhta, bararti maningon
hagoluhkonon anjaha parlahouhon do ai, lang sungkup pitah iparlajari tumang.
Panorang on itongah-tongah pe domma das hata na tarsura ai, anjaha domma
isuratkon ibagas sahap Simalungun. Sonaha nani, Bibel aima na gabe sijoloman bani goluh
on, hotop do ibasa hita Bibel? Dong do buku Bibel irumahta bei ra dong na mangkatahon:
Lang porlu hanima mambasa Bibel, halani itangar hanami do hatani ai humbani
siparambilan. Tongon gati do itangar hita hatani Naibata marhitei hata na sinahapkon ni
Naibata marhitei na mambasa Bibel, roh bahat ni hatani Naibata na itangar hita, anjaha
marhiteihon ni ai, lambin tambah haporsayaonta, anjaha gabe roh dohor ni hita humbani
Naibata.
Bibel ai do na gabe ukuran ni haporsayaon pakon hagoluhan ni halak Kristen.
Halani ai patut ma homa bahen hita waktunta tiap hari laho mambasa Bibel, ase in ma
mamodahi, maminsang, pauli-ulihon ampa manogu-nogu hita hu hapintoron ibagas
pardalan ni goluhta siganup ari.
Tonggo: Ham Jahowa, urupi anjaha pargogohi Ham ma hanami laho manaluhon
kuasa hagolapon na idunia on, ase dihut hanami marulih bani haluahon na
hum Bamu. Amen.
HALELUYA NO. 387:1-2
1. Ai bibel do pustaha na harga,
panotap bai goluhta.
Na marisihon ganup rusia,
humbai nabasaia.
Totap do ronsi sadokahni
dokahni
margantih pe panorang.
Baen bohal goluh ni ra
mangarusi, sonari ‘ge magira.
2. Ai Bibel do ambilan na harga,
marisi buei arta,
humbani Naibata na isurga,
simada ganup kuasa.
Baen goluhni hita ganup
manisia,
ase malas uhurta. Gok damei
ronsi sadokahni goluhta,
sonari ‘ge magira.
PARMAHAN NA MADEAR 22 JULI
SIMADA KUASA
“Anjaha ibere do Bani kuasa manguhumi, halani Anak ni jolma Ia.”
Johannes 5:27
Sanggah i dunia on ope Tuhan Jesus domma ipataridahkon kuasa-Ni marhitei
horja-Ni na dob manaluhon kuasani sibolis, dousa ampa hamateian. Dob salosei haganup
horja-Ni i dunia on, naik ma Ia hu Nagori Atas anjaha hundul isiamun ni Naibata Bapa.
Panorang on Tuhan Jesus do simada kuasa, halani domma iberehon Naibata Bani kuasa
manguhumi ampa mamarentah Nagori Atas pakon dunia on. (Mateus 28:18) Ai ma
marhitei na ipahundul Naibata Ia isiamun-Ni. Age pe i Nagori Atas Tuhan Jesus, tapi anggo
kuasa-Ni marlaku do i dunia on. Hita termasuk do warga harajaon ni Naibata marhitei na
porsaya hita Bani bahasa Kristus do na markuasa bani goluh ampa hamateian. Marhitei
horja ni Tonduy Napansing do ipadas Tuhan Jesus kuasa-Ni laho mamarentah i tongahtongahni
Harajaon-Ni
ai
Kuria ni Tuhanta i dunia on ai ma na gabe sada tanda bahasa na sintong dong
harajaon ni Naibata i dunia on. Anggo iidah hita dunia on, memang dong ope kuaa-kuasa
na legan humbani kuasani Tuhan Jesus, umpamani: Kuasa ni hagolapan, kuasani alat-alat
modern, kuasa ni pambotoh ni joma (ilmu pengetahuan), pakon kuasa-kuasa na legan.
Tapi haganupan in, kuasa na terbatas do halani anggo simada kuasa pitah Tuhan Jesus do.
Kuasa ni Tuhan Jesus boi iidah hita marhitei haporsayaon. Italuhohon Tuhan Jesus do
haganupan kuasa-kuasa ni i dunia on. Tuhan Jesus do siparmonang humbani si ganup
kuasa.
Age pe bani Jesus do kuasa manguhumi, tapi holong do uhur-Ni, mangidah hita
jolma. Lang anjai uhumon-Ni halak na porsaya Bani. Roh Tuhanta hudunia on sedo na laho
manguhumi, tapi laho paluahkon sagala na porsaya Bani do. Ase pitah hubani kuasa na
humbani Tuhan Jesus ma hita marpangarapan, anjaha puji hita ma Tuhanta, ai tunduk hu
Bani do haganup malekat, kuasa ampa hagogohon. (1 Petrus 3:22)
Tonggo: Ham Tuhan Jesus simada kuasa, anggo marpangarapan hanami bani kuasa
ni dunia on, papintor Ham ma dalanni, anjaha ajari Ham ma hanami ase
lambin itandai kuasa-Mu ibagas goluhnami, ase lang gabe taruyun hanami
bani kuasa-kuasa ni dunia on na tongtong roh mandompakkon goluhnami.
Amen.
HALELUYA NO. 79:1-2
1. Jesus Kristus in do Raja,
ipabangkit Naibatanta.
Manggomgomi hajojor,
manggomgomi hajojor.
Janah ganup hajolmaon
ningon Bani do mar-Tuhan.
iakuhon in botul,
iakuhon in botul.
2. Haganup Malekat-Ni
manlioti paratas-Ni,
Pasangapkon Raja in,
pasangapkon Raja in.
Na humbabou markuasa
harajaon itanohta.
Mangirikkon Titah-Niin,
mangirikkon Titah-Niin
PARMAHAN NA MADEAR 23 JULI
PARMAHAN NA MADEAR
“Parmahan na Madear do Ahu, ibere Parmahan na Madear do hosah-Ni mangkopkop biribiri-Ni.”
Johannes 10:11
Tuhan Jesus do parmahan na madear, anjaha hita do biri-biri-Ni. Biri biri ai ma
pinahan na galek, na so marsinjata (lang martanduk), na so adong pangajamanni na laho
mandapotkon musuh na roh mandorabsi. Songon ai do hita jolma, lang do sinjata ampa
pangajamanta ibagas dirinta ampa gogohta sandiri laho manlawan musuhta ai ma dousa
pakon sibolis. Bahat tumang do musuhta na sihol mandorab hita, halani ai porlu do
tongon hita iparmahani. Artini adong na mansarihon hita, manramotkon ampa marmudumudu
goluhta ase ulang magou anjaha ibondut munsuhta ai hita i dunia on.
Tuhan Jesus patandahkon diri-Ni gabe Parmahan na Madear, na ra mamberehon
hosah-Ni manghopkop hita. Halani do parmahan na madear do Ia, gabe siihutonkon ma
dalan-Ni anjaha sitangihonon ma parentah-Ni. Pakon pondok hatahon, gabe biri-biri na
madear na ra mangihutkon dalan ni parmahanni, lang mambahen dalanni sandiri
mangihutkon rosuh ni uhurni. Anggo domma gabe biri-biri na madear hita ilobei ni
Tuhanta, dong ma banta sada jaminan bahasa Naibata do manghopkop hita. Anjaha anggo
domma dong na manghopkop hita tontu lang mabiar be hita bani musuhni i dunia on,
halani lang sahalak hita be sadalan. Gabe pag ma homa hita marhata songon hata ni parPsalmen
ai (Psalmen 23): “Age pe mardalan ahu bani lombang bagas ni hagolapan, seng
mabiar ahu, ai Jahowa do si parmahan au. Ipatuduh do ahu bani sampalan na mombur
anjaha itogu do ahu hu bah parsaranan.” Sonang hita bani goluhta, anggo totap hita i
tongah-tongah ni hulanan ni biri-biri na ibagas parmahanion ni Tuhan Jesus.
Tuhan Jesus parmahan na madear, lang pitah mardalan Ia ilobeita. Lang pitah itogu
hita hun dalan hamagoun, tapi dihut do hosah-Ni i Golgata manobus hita marhitei na
madurus daroh-Ni. Pengorbanan-Ni ai, ai ma na manggantihkon dirinta, manobus hita
humbani hagolapan ampa kuasa ni sibolis.
Tonggo: Ham Tuhan Jesus, parmahan na madear hubannami, anggo manlembang
hanami humbani hulanan biri-biri-Mu, anggo ibahen hanami dalannami
sandiri, anggo roh munsuh mandorab hanami, sai paulak Ham ma hanami
hubani dalan-Mu anjaha ramotkon Ham ma hanami bani pardalanan ni
goluhnami on. Amen.
HALELUYA NO. 137:2-3
2. Parmahan Jesuskin
biri-biri-Ni au;
Itogu-togu tonduyhin,
seng be marmara au.
3. Sai ipatudu au
bai hasonangan in;
Iiring-iring Jesus au
mardalan lao hujin.
PARMAHAN NA MADEAR 24 JULI
HATAHON NASIAM MA NA SINTONG
“Halani ai ambukkon nasiam ma ladung in anjaha hatahon nasiam ma na sintong,
ganup dompak hasomanni jolma, ai pagori do hita samah hita.”
Epesus 4:25
Hata na i atas on mangkatahon hatahon nasiam ma na sintong artini ulang
marladung. Marladung ai ma mangotootoi, manipu, lang manopati janji, marakal-akal
pakon na legan-legan.
Hita gati do lang barani patuduhkon hadirion na sasintongni ilobei ni jolma sonai
age ilobei ni Naibata. Agepe sonaha hita, tangkas do ibotoh Naibata. Jadi anggo lang barani
hita patuduhkon hadirion na sasintongni parsandiwara do ai, manladungi halak sekal igus
homa marladung bani diri sandiri pakon bani Naibata.
Na sintong pitah Naibata do, seng ongga marladung bani bagah-bagah-Ni.
Umpamani, ibagahkon Naibata si Abraham parhiteian ni buei ginompar i tanoh on,
sintong do saud sonai. Ibagahkon Naibata do Anak-Ni Jesus Kristus roh hu dunia on, saud
do sonai marhitei na itubuhkon si Maria.
Hatahon nasiam ma na sintong dompak haganup hasoman jolma. Tuhan Jesus do
usihan banta pasal na sintong in halani ambilan-Ni do ihorjahon, na ihorjahon do
iambilankon. Ase maningon barani do hita mangkatahon na sintong, in ma Jesus na
hinaporsayaanta in. Rap jolma na tinompa ni Naibata janah na hinopkop ni Tuhan Jesus
Kristus do hita, ulang marsioto-otoan.
Pataridahkon hita ma horja hasintongan ibagas parsaoran, horja siganup ari, janah
ibagas goluh na sonon ma goranon goluhta na dob i pabayu Tuhan Jesus Kri stus.
Tonggo: Ham Tuhan Jesus Kristus, marianan ma Ham ibagas uhurnami, ase sintong
goluh pakon hatanami, lang marladung ilobei ni jolma pakon ilobei -Mu.
Sasap Ham, ma dousanami ibagas holong ampa idop ni uhur-Mu. Amen.
HALELUYA NO. 270:1-2
1.Sai togu Ham hu hasonangan,
au on, o Jesus Tuhankin.
Humbani ganup horja larangan,
sai sirang Ham au on hunjin.
Ija ma jumpah hagoluhan,
na so ibere Ham, o Tuhan,
marhitei-hitei daroh-Mu?
Sai tong paunduk Ham uhurhu,
ulang be dong sura-surangku,
Na so talup bai uhur-Mu.
2.Ham o Rajangku, ulang lopas
Lao ganggang hum Bamu au on;
Patoguh Ham janah pahoras
bai parhuanon-Mu au on;
Ija ma jumpah hatuahon
i darat ni na pinindahan ni
holong-Mu hubangku on?
Hubotoh halani hata-Mu,
sai hot igolom in uhurhu,
sai hasonangankin do Ham.
PARMAHAN NA MADEAR 25 JULI
SAI PUJIONKU DO NAIBATA
“Sai pujionku do Ham, ai Ham do sibahen ai… sai baritahonku do goran-Mu halani
hadearonni, ilobei ni halak na niidopan-Mu.”
Psalmen 52:11
Anggo ibasa hita haganup Psalm 52 ayat parpudi ma teks on, janah gambaran na
taridah ibagas ai ma malas ni uhur pakon puji-pujian ni si Daud hubani Naibata. Dob
tarpilih Raja Daud gantih ni Raja Saul, soluk do uhur hajahaton ibagas uhur ni Raja Saul,
tapi anggo Raja Daud iahapkon do idop ni uhur pakon holong pamilihon ai.
Halani ai do ase nini: Sai pujionku do Naibata, sai baritahononku do goran-Ni.
Artini ai marpadan do Raja Daud, totap ia mamuji pakon mambaritahon goranni ni
Naibata sedo pitah marhitei hata tumang, tapi marhitei parlahouni ari-ari. Buktini
jumpah hita bani ayat 10 on mangkatakon: “Anggo ahu songon hayu na ratah do i rumah
panumbahan, martenger ni uhur do ahu ronsi sadokah ni dokahni.”
Naha do pamujianta dompak Tuhan in? Sihol ma ulang marhitei hata tumang tapi
ahapkon hita ma idop ni uhur pakon dear layak ni Naibata bani goluhta. Anggo ibere
angkula na jorgit, ibere tambah pambotoh, tarlobih anggo ipakei Tuhan in hita gabe
parhorja-Ni, talup ma pujionta Tuhan in. Bahat do jolma halani bayakni ia lambin roh
bueini kesibukanni gabe lupa mamuji Naibata, lang adong panorangni mambaritahon
goran ni Naibata. Sai ulang ma marhitei na itambahi Naibata pasu-pasu-Ni hubanta gabe
lupa hita mambaritahon dear layak ni Tuhan in.
Ase usihi ma songon Raja Daud ai ra mambahen padan ilobei -lobei ni Tuhan in:
“Sai pujionku do Naibata anjaha sai baritahononku do goran-Ni sadokah goluhku.”
Tonggo: O Tuhan puji-pujian pakon tarima kasih ma Bamu, sibahen hadearon bani
goluhku. Ajari Ham ma ahu mamuji goran-Mu marhitei hata pakon
pambahenan sadokah goluhku. Amen.
HALELUYA NO. 5:1+6
1. Hupuji holong ni atei-Mu,
O Tuhan Jesus Rajangkin.
Bamu huondoshon tonduyhu,
ai do na pinindo-Mu in.
Huhalupahon ma diringku
mamingkir holong ni atei-Mu.
6. O Jesus, goran-Mu uhirhon,
bagas torang bai uhurhon;
Ase tarsurat ilobeihu
holongni atei-Mu tongtong;
Hatangku ampa parlahouhu,
ningon ipuji do goran-Mu.
PARMAHAN NA MADEAR 26 JULI
PARUHUR DOMDOM
“Barang ise na mardomdom bani hasomanni, sibunuh jolma do ai, anjaha ibotoh nasiam
do, na so marianan totap hagoluhan na sadokah ni dokahni bani sagala sibunuh jolma.”
1 Johannes 3:15
Halak paruhur domdom ipausih do doshon sibunuh jolma. Bani Titah paonomkon
ilarang do mamunuh. Marhitei hata on ra mintor tubuh sungkun-sungkun ibagas uhurta
sandiri, das na dob ongga do ahu mamunuh nani? Maksudni sedo pitah marhitei alat atap
pisou, tapi marhitei na mardomdom dompak hasoman do. Porini das sonai pangahapta,
tontu hunjai ma tandaonta holong ni Naibata, ai ipagoluh ope hita, lang mintor ibalashon
hauhuron na jahat ai. Halani ai lang talup be idomdomi hita hasoman, porini sonaha sahali
pe banggalni salah ni hasoman ai. Ingat ma sedo hakta mambalashon, hak ni Naibata do.
Ra homa sonon; porini lang be mintor mambalas hita, mardear-dear do hita
idahon, tapi dong sihol ni uhur ibagas, marosuh roh bajanni namin panjaloan ni hasoman
ai, targolong ope hita hubani na maruhur domdom ai. Lang marosuh maju hasoman atap
maningkat. Parsimburuon hotop mangkorhon uhur domdom. Songon si Kain halani
simburu bani anggini si Abel, halani ijalo Naibata galanganni, ibunuh si Abel. (1 Musa 4:
8) Sonai Raja Saul halani ipabangkit si Daud gabe panggatih sogam uhurni, simburu ia
sihol bunuhhonni si Daud.
Sonaha do dobni paruhur domdom? Bulinsah, lang sonang uhurni, gok ibagas biar
mangkorhon lang marsaor pakon hasoman. Ase hita halak Kristen sipadaohonta do uhur
domdom humbagas uhurta, gantihkon hita bani uhur holong ase marhasonangan uhurta,
mardamei dompak haganup jolma, gabe marianan ma banta hagoluhan na sadokah ni
dokahni.
Tonggo: Ham Tuhan bere Ham ma uhur holong marianan ibagas dirinami, ase
mardamei hanami pakon haganup pakon haganup hasomannami. Amen.
HALELUYA NO. 259:1+4
1.Gati marhoru diri,
ibahen jolma in.
Na manlioti diri,
paruhur daging in.
Na manlioti diri,
paruhur daging in.
4.Sipilih hagoluhan,
usihi ma tongtong;
Ase hu hasonangan,
odor ma hita on.
Ase hu hasonangan,
odor ma hita on.
PARMAHAN NA MADEAR 27 JULI
HASABARON
“Ipartuah hita do halak na sabar. Ibogei nasiam do hasabaron ni si Job, anjaha iidah
nasiam do sonaha dobni ibahen Tuhan in, ai parontou ni uhur banggal do Tuhan in anjaha
paridop ni uhur.”
Jakobus 5:11
Pasal halak na sabar pakon hasabaron do itarsingati bani ayat on. Dong do
pangarusion na lepak pasal halak na sabar pakon pasal hasabaron, aima anggo sonon
iartihon ai: sabar manjalo atap aha pe songon sada nasib na so bulih lawanon. Gabe passip
tumang (berpangku tangan) seng dong be atap aha pe aktifitas, “soh tumang anjaha
igantungkon haganupan hubani nasib.” Seng sisabaron sonai ai na hinahatahonni bani
ayat on, tapi hasabaran na mangajamkon haporsayaon pakon pangarapon do. Bani halak
na sabar dong do tenger ni uhur, na boi do ia maluah humbani paruntolon atap humbani
na manindihi dirini atap pangahapni. Halani ai lang gabe soh tumang ia; lang gabe
mandolei. Tongtong do dong aktifitasni. Manaron do ia ibagas haporsayaon pakon
pangarapan. Tahan do ia maruntol ibagas hasusahanni ai. Seng italuhon paruntulon in ia,
tapi ipindo hagogohon humbani Naibata ase tahan ia bani pangarapan bani, na boi
manroti anjaha na boi talu do hasunsahan ai. Barang ise na tahan das hu ujung, ai do na
maluah. (Mateus 24:13)
Songon usihan ihatahon si Jakobus do hasabaron si Job. Sonaha pe paruntolon ni
si Job, seng dong magou haporsayaonni: lang mandolei ia ibagas sitaronon ai.
Artini halak na sabar pakon hasabaron bani halak Kristen, ai marhorja pakon
bergerak do, golgol mangkorjahon na madear. (Rom 2:7) Humbani barita ai ibagas naidah
do: Job 42:10: …… dua lompit ma ganda ipasuang Naibata humbani si Job sagala na bani
hinan.
Job 42:12:…… Dob ai Ipasu-pasu Jahowa ma si Job lobih humbani mungkah ni ai. Na sabar
anjaha na monang humbani paruntolanni, tahan das humbani ujungni, ai
do paluahkonni. (Mateus 10:22)
Tonggo: Domma monang Ham Tuhan Jesus mantaluhon paruntolon, sitaronon-Mu
in. Pargogohi Ham ma hanami Tuhan, ase dihut hanami marpangarapan na
manggoluh ronsi bois ni goluhnami. Amen.
HALELUYA NO. 271:2-3
2.Naibatangku Hasomanku
‘ge marsitaronon au;
Ia do tongtong Bapangku,
Hinaholongan-Ni au;
Sai tenger ma uhurhin,
Naibata hasomankin
sadokah-dokahni in.
3.Naibatangku hasomanku
seng na bungbang au ijin;
Sai tongtong hagoluhanku
idopni uhur-Ni in;
Sai tenger ma uhurhin,
Naibata hasomankin
sadokah dokah in.
PARMAHAN NA MADEAR 28 JULI
JALO HAM MA SORTALI IN
“Domma sirsir ilobeihu sortali hapintoron in, sibereon ni Tuhan, panguhum na pintor in
bangku bani ari-ari si magira; tapi seng pitah bangku, bani haganup do na mangkasiholi
partalarni ai.”
2 Timoteus 4:8
Umum ni lang adong parlumbaan, janah lang adong parrupei anggo adong sibagi-
bagionkon. Halani ai marjuang do siparlumba in ibagas usaha na sonaha pe iparpalai do
ase dapotan, monang, parrupei ia.
Si Paulus seng marosuh hasomani sahaporsayaon ai ma si Timoteus pakon halak
si irikkon Kristus lang paruppei bani na sihol niondoshonni Tuhan sortali hapintoron in.
Halani ai ipagolpa ase setiap panorang mambohali diri bani aturan-aturan na humbani
Tuhan, sekaligus ningon dong keyakinan bahwa hita parsimada pasal na dob pinasirsir ni
Tuhan in.
Domu hujai nini Apostel Paulus sadokah manggoluh ope hita idunia on, dalankon
hita ma sagala tugas pakon tanggungjawab ibagas na sintong-sintong, sadear-dearni,
jujur janah na totap maronjolan bani hatani Tuhan, janah selaku na mangkaporsayai
Kristus bani goluhni Tuhan lang paturuton-Ni jolma in sandirian laho manlahoi lahoanni,
tapi iparmudu-mudu, iparorot ihasomani do tongtong. Porini adong jumpah hita
hambatan-hambatan, arbong-arbong i tongah-tongahni perjuanganta, lang mintor lintun
hita manadingkon aha na ihadapi hita, malahan semakin ipabador, ipahombar hita do
goluhta on hubani Tuhan in, ramot ibahen hita haporsayaon in.
Tuhan Jesus maha adil, jujur, janah pasti do haganup na dob ihatahon. Halak
nasirsir mangindahi do bereon ni sortali hagoluhan na so ra melus ro sadokahni dokahni.
Seng ra Ia mamberehon na so patut bani sasada halak, tapi Ia jujur sadokah ni goluh-Ni
hu bani na ra marusaha, na marjuang, na mangkasiholi, na monang ibagas haporsayaon
do ibere Tuhan sortali hapintoron, sortali hagoluhan, seng humbani halak siparakal-akal
siparayoh iondoshon mahkota ai. Hita haganupan maningon ganup do halak na porsaya
in manjalo sortali in, na dob sirsir ilobeita, ulang gabe hita lang paruppei pasal ai age
domma sirsir ilobeita.
Tonggo: Tuhan roh ma Ham hutongah-tongah nami laho mampargogohi mangurupi
bani na manjalo sortali hagoluhan na hum Bamu. Amen.
HALELUYA NO. 379:1+3
1. Tuhan Jesus roh Bamu, jalo ma
ulang tulak Tuhan in jalo ma.
Jongjong do Tuhanta in
manghartuki uhurmin,
ningon saud hata-Niin, jalo ma
3.Pasu-pasu hubamu jalo ma,
Jesus sipaluah Ham, jalo ma.
Jongjong do Tuhanta in
mangartuki uhurmin,
Ningon saud hata-Niin, jalo ma
PARMAHAN NA MADEAR 29 JULI
PARPINTOR PARROHKON MALAS NI UHUR
“Pangarapan ni halak parpintor parroh malas ni uhur, tapi na lang do paima-ima ni halak
parjahat.”
Podah 10:28
Ise ma halak na mangindahi hapintoron, ai ma na mangayaki horja na madear,
halani hapintoron in ai ma hasintongan pakon habonaron, harosuhni Naibata. Jenges do
na mangindahi hapintoran ai janah jumpahsi, tapi jenges ope na mangkorjahon ampa na
mampartahankon ai das hubani ujungni. Mase na mangkorjahon ai sijengesan? Halani
marjuang parpintor ai ibagas pangarapan, dong siarapkononni hasil ni ai ipudi , ai malas
ni uhur. Ia malas ni uhur on ai ma buah-buah ni hapintoran, hasintongan pakon
habonaron.
Daoh do perbedaan ni malas ni uhur na roh humbani hapintoron, habonaron,
pakon hasintongan marimbang ai sedo hasil ni pangarapan ai pakon hasil ni haporsayaon.
Halani ai malas ni uhur ni sidea ai pe na lang do pinaima-imani, artini kosong atap lang
dong isini. Ase porini pe banggal malas ni uhur ni parjahat iidah hita, marolob-olob sidea
halani banggal ni hasil ni panipuonni, tapi manjujung nomor nol besar do sidea ai sadokah
i tanoh on, atap na piga-piga dokah goluhni janah sipaima-imaonni ai ma uhuman ni
horjani, ai ma partangisan pakon patungos-ngoson sadokahni dokah ni na inagori toruh.
Bani ari peruhuman ni ai ihatahon ni Raja ai ma, laho ma nasiam bani apuy na so ra miloh.!
Tapi bani halak parpintor naparrohkon malas ni uhur ibagas pangarapan pakon
haporsayaon sidea on do na manrupei malas ni uhur na gok age humbani sonari, age
mariluh iluh ia mamboban bonih, tapi marolob-olob bani panorang sabion. Ase
pangarapan ai maningon margogoh ibagas dirini sidea mangkaporsayai bagas-bagah na
niarapkonni, janah panonggor ni Tuhan in do totap dompak sidea, mangurupi sidea ase
totap tongtong monang manaluhkon hagalekon on. Amen.
Tonggo: Ham Bapanami paridop ni uhur na tarlobih marhitei Anak-Mu Tuhan Jesus
Kristus Tuhannami. Na mangindo do hanami hu Bamu, ase ipargogohi Ham
ma hanami marmalas ni uhur ibagas hagalekon pakon paruntolon sanggah
i dunia hagolapon on. Amen.
HALELUYA NO. 26:1+5
1.Malas ma uhurnima,
na pintor uhurhin.
Domma roh Rajanima,
mamboban tuah in.
Seng marparantam in
anggo bani parroh-Ni;
Nai pe tuk do gogoh-Ni,
padaoh dorunta in
5.Ho, na pusokan uhur
i atas tanoh on.
Ibaen dursat ni uhur
na idunia on;
Sai misir nasiam
padurgak ulunima.
Ai habayakonnima
do Jesus na roh bam.
PARMAHAN NA MADEAR 30 JULI
ULANG HAM KAHOU
“Nasiam hinaholongan, ulang ma haganup Tonduy haporsayai nasiam, tapi uji nasiam ma
tonduy in, atap na humbani Naibata do in, ai domma buei nabi sipakulah-kulah roh hu
dunia on.”
1 Johannes 4:1
Haganup siparjualan mangkatahon barangni si jengesan.
Maksud ijai ase marosuh hita ijai janah iboli hita. Tontu anggo hita sipamboli iteliti hita
do ai, jenges do tongon, tahan dokah ipakei, janah buei ope penelitian na legan domu
hubani harosuhta ai, jenges do dilo-dilo ni nabi sipakulah-kulah ase iirikkon hita ia.
Pandei do ia mamakei hajengeson ni dunia on, ase marosuh hita bani. Tapi pareksa
ham, tonduy na sonaha do in, janah na hunja. Ingat ham homa hamagouan do ujungni
pardalanan na mangirikkonsi, ai terbatas do kuasa pakon hagogohonni. Tapi halak na
binoban ni Tonduy ni Naibata, hu hasonangan do dobni, martuah do halak na
mangirikkon-Si. Hagogohon na dua on do na sai mangirik-irik hita sadokah manggoluh i
dunia on. Naibata sitompa hita janah na mamasu-masu hita, Ia do na boi pasonangkon
hita. Tonduy ni nabi sipakulah-kulah na roh hun dunia on na igoran sibolis, na
mangkahouhon hita janah mamboban hu hamagouan.
Pareksa ham, uji ham, na ija do on sasintongni, hagogohon ni na ija do on na tahan
ronsi sadokahni-dokahni, ase porlu tulimat janah hati-hati. Domma tangkas janah ibotoh
hita aha na madear, aha na majenges humbani Tuhanta in. Lang targoran hita buei ni pasupasu,
marhitei Jesus Kristus. Ipaluah do hita humbani gomgoman ni dousa. Anggo sonai
Ia ma porsayai hita, ulang taruyun hubani husip ni sibolis age sonaha jenges ni pe, sedo
humbani Naibatanta ai, munsuh na maningon taluonkonta do ai. Ulang ham kahou.
Tongon maruntol do hita manlawan horja ni nabi sipakulah-kulah ai, janah sipata
lang itandai hita tangkas tumang ni horjani. Halani ai pindo hita hapentaran humbani
Naibata marhitei tonggo pakon elek-elek ase ipatotap pakon panandaionta hu Bani.
Pardomuanta pakon Naibata, ai do patotapkon haporsayaon.
Tonggo: Ham Tuhan patotap Ham ma panandaion pakon haporsayaonku hu Bamu,
ase ulang kahou ahu. Amen.
HALELUYA NO. 120:4-5
4.Uji ma, uji ma,
sion uji tonduy in,
na tongtong na mangojur-ojur
ho mambahen dousa in.
sai suhutkon bai Tuhan-Mu!
na pintor atap geduk pe in
uji ma, uji ma.
5.Torus baen, torus baen,
Sion torus uhurmu.
Mamingkiri hasonangan
binahenni Naibata.
Sai simbili hamagouan,
Sion sai timbangi dalanmin.
Torus baen, uhurmin.
PARMAHAN NA MADEAR 31 JULI
SIHOL HAM SANGAP?
“Ham Bapa, pasangap Ham ma goran Mu! Dob ai roh ma sora hun Nagori Atas: Domma
Hupasangap lanjar pasangapkon-Ku do use.”
Johannes 12:28
Domma tarbayang bani Jesus, sitaronon na parngit.
Sihol boluson-Ni ma, matei bani hayu parsilang laho manghopkop hita jolma pardousa. Ai
do tujuan ni parroh-Ni hu dunia on.
Halani ai martonggo do Ia hubani Bapa-Ni na i Nagori Atas ai, ase ipargogohi Ia
mamorsan sitaronon ai ma sekaligus mangondoshon diri-Ni. Ujungni lang mabiar Ia
mandompakkon sitaronon ai, ai domma ipargogohi Bapa-Ni Ia. Jadi domma ipasangap
Tuhan Jesus Bapani na i Nagori Atas ai, marhitei na dob isaloseihon horja na niondoshon
ni Naibata hu Bani i dunia on. Pambalosi do Jesus bani Naibata. Parlobei do Jesus
pasangapkon Bapa-Ni dob ai pe ase ipasangap Naibata Ia.
Hita halak Kristen anakni Naibata marhitei Jesus sihopkop hita, ganup do hita
marsura-sura ase sangap i dunia on, sonai age i Nagori Atas, sura-sura na jenges do ai.
Tapi domma ipasangap ham Naibata ibagas goluhmu ari-ari marhitei horjamu pakon
pambalosionmu bani Hata-Ni? Marsangap do goran ni Naibata anggo roh bamu sitaronon,
hasunsahan age malas ni uhur pe? Anggo lape, pungkah hita ma janah panorangni ma, ai
lang dokah be panorang paridop ni uhuran in, ai laho roh ma Tuhanta in.
Gogoh na humbani Naibata do pasanggupkon hita laho pasangapkon goran-Ni
ibagas haganupan situasi ni goluhta idunia on. Halani ai martonggo ma hita hu Bani, janah
mangondoshon goluhta, ase iurupi hita pasangapkon goran-Ni.
Jadi anggo sihol do ham sangap, pasangap ham ma Bapa na i Nagori Atas ai simada
hasangapon in.
Tonggo: Ham Tuhan pargogohi Ham ma ahu pasangapkon goran-Mu ibagas goluhku
ari-ari sadokah i dunia on. Amen.
HALELUYA NO. 187:2+5
2.Ibahen Ham do pardearan,
salosei dousa in ganup;
in do mangkorhon haluahon
bani parjahat haganup.
Ai pe tarimakasih ma,
au on Bamu, o Naibata.
5. ‘Ge hagoluhan, hamateian,
borit ‘ge na parngit in;
seng boi be in baen parsirangan
ni holong-Mu hubangku in.
Marhitei hitei Jesus in,
Bujur do uhur-Mu ijin.
