PARMAHAN NA MADEAR 1 NOVEMBER
LANG MAILA
“Ai seng huhailahon ambilan na madear in, ai hagogohon ni Naibata do in paluahkon sagala na
porsaya, halak Jahudi parlobei, dob ai halak Gorik.”
Rom 1:16
Hata ni Naibata sedo siponopkononkon, atap bani panorang tertentu pakeion. Hata ni
Naibata sihagoluhkononkon, siambilanhononkon do. Naibata mangkasomani hita bani ganup
panorang, ianan, pakon situasi. Pangkasomani ni Naibata lang ibatasi ruang atap pe tempat.
Ayat na i atas in patugahkon na lang maila Apostel Paulus mangambilankon ambilan na
madear in, ai hagogohon ni Naibata do in paluahkon halak na porsaya, pasadahon ganup
bangsa. Lang adong be perbedaan warna kulit, kasta, morga pakon lang iponopkon tapi
ihamalaskon. Setiap sikap ni goluhni gabe ambilan pasal Kristus simada kuasa. Lang maila na
mararti do ai homa lang mamorluhon diri sandiri hansa halani ambilan na madear in
mangharosuhkon hasadaon, parsaoran ase gabe sada hulanan. Lang maila na mararti do ai ma
nomor sadahon hata ni Naibata bani goluhni, sedo adat, tradisi atap hasomalan.
Naha do hita bani panorang on! Atap na iponopkon hita do ambilan na madear in bani
ha-Kristenonta, iponopkon hita bani dirinta tumang? Atap na maila do hita marsaksi? Kristus
totap do mangkasomani hita bani goluhta, sonai ma homa hita ase totap setia
mangkagoluhkon hata-Ni. Sedo Kristen part timer (martorap-torap) hita. Kristus do na
paluahkon ganup hita ronsi bangsa, gabe marhasadaon, lang dong be bolat-bolat. Saksi ni
Kristus ai ma na maringgas, lang maila mangambilankon ambilan na madear in. Ai lang
sihailaonkon ai, tapi sihamalashonon do.
Tonggo: Ham Tuhan Naibatanami, pargogohi Ham ma hanami mangambilankon hata-Mu
in bani ganup panorang hu sab tanoh on. Amen.
HALELUYA NO. 496:1-2
1. Idilo Tuhan Naibatanta,
haganup kuria-Ni in.
Ase manjalo haluahon,
ni Kristus in.
Tangihon ma dilo-dilo-Ni,
pateleng ham ma pinggolmu.
Ulang manosal holi dobni,
ujungni panorangmu.
2. Sai jalo ma ganup hata-Ni,
sai buhai ham ma uhurmu.
Sonai homa ‘ge sinondang-Ni,
in ma baen gabe suluhmu.
Tangihon ma dilo-dilo-Ni,
pateleng ham ma pinggolmu.
Ulang manosal holi dobni,
bai ujungni panorangmu.
PARMAHAN NA MADEAR 2 NOVEMBER
HABAYAKON
“Ai na dob bayak do nasiam ibagas Ia pasal haganup, ibagas ganup hata in ampa bani ganup
pangarusion, halani hasaksian pasal Jesus domma totap bani nasiam.”
1 Korint 1:5-6
Songon pangkasiholi ni jolma bani hamonangan, sonai do homa age pasal habayakon.
Ganup do jolma sihol bayak. Janah sonaha ase das hubani tujuan “bayak” sai adong do homa
na mamakei cara na lang halal, umpamani: Korupsi, manipu pakon nalegan asal ma jumpah
habayakon ai. Dong do homa na marhatengeran bani habayakon ai goluhni. Ingat ham na
bayak na oto bani Lukas 12. Sasintongni ija halak mangayak-ayak habayakon ai, marhitei dalan
na lang jujur, ijai ma ia sasintongni gabe roh miskinni. Na miskin hinan do hita halani dousa,
tapi halani Jesus Kristus na manobus hita, gabe bayak hita.
Porlu tangkas botohonta, age pe bayak hita, gok artanta, lang boi ai gabe jaminan ni
goluhta, ai arta sisonai ai lang totap, na ra masik, iharat ngit-ngit do ai. Sedo mangkatahon lang
porlu bayak; porlu do ai, ai Tuhanta pe na bayak do, tapi gabe miskin do halani miskinta, ase
gabe tarangkat hita, bayak i lobei-Ni (2 Korint 8:9). Ulang ma namin halani mangayak
habayakon atap arta, lupa bani na hinatahon ni Apostel Paulus bani ayat na i atas in. Na
manjalo Jesus Kristus ai do bayak, na monang do si Job dob ai dapotsi ma ulih bani
hamonanganni.
Malas do uhur ni Apostel Paulus mangidah halak Korint na marsijoloman bani arta na
totap ai. Ai ma Jesus Kristus na totap, sonai nantuari, sonai sadari on, sonai ronsi sadokah ni
dokahni. Lang mubah-ubah age sonaha doras ni logou pakon gilumbang na roh mandorab
parau ni sidea. Halani na totap ai ijolom sidea, lang sangsi atap bumbang be sidea bani
goluhni.
Na manjolom hata ni Naibata ai do halak na bayak, habayakon na manontong, na lang
ra salpu, janah marhiteihon ni habayakon na lang ra salpu on, tambahkonon-Ni ma na legan ai.
Tonggo: Ajari Ham ma hanami Tuhan ase parlobei ipindahi hanami habayakon na totap
ai bani goluhnami, janah patotap Ham ma haporsayaonnami hu Bamu. Amen.
HALELUYA NO. 124:2-3
2. Huja ma marguna be in,
age pe marnah ringgit au?
Ibabou hasusurankin
:,: Ham Jesus artangku,
hujai do siholhu,
sonang uhurhin.
3. Ganup huondoshon Bamu,
ai Ham do ompungni hinan.
Tongtong huondoshon Bamu
:,: ai Ham do, o Jesus,
sihopkop ganupan,
gok Bamu au on.
PARMAHAN NA MADEAR 3 NOVEMBER
POLTIK
“Ulang ma ra nasiam rampason pasal upah hamonangan nasiam marhitei halak.”
Kolosse 2:18
Monang, on do na manggoki uhur ni jolma. Ganup jolma do marmalas ni uhur halani
monang ia. Monang bani ujian, monang bani pertandingan, monang bani parlajouan.
Haganupan on mangkorhon malas ni uhur. Tapi porlu idahonta, halani sura-sura pasal
hamonangan on, bahat do na mamakei jalan belakang, lang jujur, lang tiba prosedur be,
pokokni asal ma monang. Lang persoalan atap dalan na sonaha pe ipakei. Sasintongni
hamonangan sisonon hadobanni tarjumpah, terdapot do. Pakon pondok goranon ma on
hataluan.
Aha do halani ase iparsinta jolma hamonangan? Balos ni on, ai ma halani dong ulihni.
Monang bani ujian sikolah dapotan ijazah. Monang bani pertandingan olah raga dapotan piala
atap hadiah.
Tontu ase boi monang tiba dalanni halak na laho ujian mambohali diri ma lobei
marhitei na pongkut marlajar, na martanding marhitei latihan na serius. Ase monang bani
parlajouan maningon totap do mangindo gogoh bani Tuhanta. Monang do si Job dob ai dapotsi
ma ulih bani hamonanganni. Dr. Martin Luther mangkatahon ase boi hita maluah pitah halani
idop ni uhur ni Tuhan do hansa, sibere-bere ni Naibata. Sibere-bere ni Naibata do ase monang
hita, janah domma ipamonang hita marhitei na ibere Anak-Ni Tuhan Jesus Kristus
manghopkop hita, janah parrupei ma hita bani hagoluhan na sadokah ni dokahni. Domma
dapot ham ijazah hamonangan ai?
Dong do na mangkatahon sonon: “Lobih sulit mampartahankon dari pada merebut.”
Anggo domma banta hamonangan ai, poltik ma jolom hita, ulang marpindah tempat be.
Partahankon hita ma ai marhitei na manghagoluhkon hata-Ni. Anggo poltik do ijolom hita
upah hamonangan ai, seng tarrampas halak, lang be marpindah tangan. Songon bani
pertandingan anggo sada regu mandapot juara piga-piga hali, gabe sidea ma totap simada
piala ai.
Tonggo: Tarima kasih ma Tuhan na mambere hamonangan bannami, janah pargogohi
Ham ma hanami ase boi poltik ijolom hanami hamonangan ai. Amen.
HALELUYA NO. 116:6-7
6. Na monang in do ningon gabe tiang.
Ibagas rumah ni Naibatangkin;
I rumah in tongtong ia marian,
manjujung goran-Ni Jahowa in.
Uhirhonon-Ku hujin goran-Ku,
sijujungonni i Surga in,
sijujungonni i Surga in.
7. Na monang in do hundul rapkon Ahu.
I atas hotak na i Surga in;
Saporti Au i lambung ni Bapang-ku,
marrupei do bai hasonangan in;
Ai na marsaran bai hasonangan,
ganup na monang, na bujur in
ganup na monang, na bujur in
PARMAHAN NA MADEAR 4 NOVEMBER
PAKEI MA PANORANG
“Maningon horjahonon-Ku do horja ni na marsuruh Ahu, sadokah siang ari; ai rohkonsi
borngin, seng tarbahen atap ise pe marhorja.”
Somal do ibogei hita istilah sikon: “Situasi kondisi.” Gati do jolma homa mambahen
alasan halani situasi pakon kondisi do na gabe pangolati. Tapi anggo bani hata ni Naibata lang
tarjalo, lang marlaku istilah on, halani bani surat ni si Paulus hubani si Timoteus bani 2
Timoteus 4:2 mangkatahon, manokanhon ase bani ganup panorang do ambilankonon hata ni
Naibata.
Bani ganup horja na idalankon Tuhan Jesus Kristus martujuan laho patalarhon
hadirion pakon harajaon ni Naibata ampa haluahon ni hita jolma. Sonai homa do hubanta
jolma tinompa ni Naibata tarbatas do umurta, anggo ilopas Tuhanta das hubani 80 tahun.
(Psalm 90:10) Janah goluhta pe lang tartontuhon hita piga dokah manggoluh. Pakon hata na
legan “Lang ibotoh hita dai ni lompah patar.” Ai do homa ase lang tarjalo hita hata ni
namaposo na mangkatahon “Nasiam ma lobei, hanami holi pe dob matua,” anggo iarahkon
sidea hu partumpuan. Domu hujin iidah hita ma sonaha porluni mandalankon horja na
madear pakon mambagi panorangta na iharosuhkon Tuhanta.
Ase boi ma hagoluhkon hita semboyan ni Parguru Saksi ni Kristus na mangkatahon:
“Anggo marsahapi hita pakon hasoman ibagas 5 (lima) menit, baritahon hita ma pasal horja ni
Tuhan Jesus Kristus.”
Sada hawajiban pakon tanggung jawab do banta anggota kuria ni Tuhanta lang pitah
parhorjani mangambilankon hata ni Naibata. Lang pitah hubani na padaskon hata ni Naibata
hansa na gabe ambilan, tapi dihut do homa pangabak, pambahenan na madear romban hubani
harosuh ni Tuhan. Andohar ma marhiteihon ni ai tartogu janah tartonduy uhurni laho masuk
pakon marhorja ibagas harajaon ni Tuhanta. Tontu adong bei do panorangni boi ihorjahon hita
pakon idalankon hita hawajibanta bani horja na iondoshon Tuhan hubanta. Halani porini
adong pe sihol ni uhurta laho marhorja, mambaen na madear, jumpah do holi bani sada
panorang lang tarhorjahon be. Ase sanggah boi, sanggah adong panorang, adong tenaga,
adong modalta, horjahon hita ma aha na boi tardalankon pakon tarhorjahon hita domu hubani
na dob iondoshon Tuhanta hubanta.
Tonggo: Ham Tuhan Jesus simada horja in na gabe panondang ni goluh nami. Ham ma
Tuhan na mambere hasirsiron pakon haringgason laho mandalankon horja,
pambahenan na madear na romban bani harosuh-Mu sanggah adong ope
panorang bannami. Amen.
HALELUYA NO. 488:2-3
2. Pesta bolon marpariama,
na mangirikkon Tuhanta in.
In ma da na ringgas marhorja,
mangambilankon Hata-Ni in.
Sai marmegah, mangolobkon,
Goran-Ni Tuhanta in.
Parsimada bai haluahon,
idop ni uhur tumang do in.
3. Pesta bolon marpariama,
ganup na bujur maruhur in.
In ma da na ringgas marhorja,
manuan holong bai jolma in.
Sai marmegah, mangolobkon,
Goran-Ni Tuhanta in.
Parsimada bai haluahon,
idop ni uhur tumang do in.
Johannes 9:4
PARMAHAN NA MADEAR 5 NOVEMBER
BIAR MANGIDAH JESUS
“Ulang ma pala mabiar hanima mangidah sibunuh daging, na so boi mamunuh tonduy, tapi na
markuasa mangagou angkula pakon tonduy hu naraka, ai do sihabiarannima.”
Mateus 10:28
Tugas marsaksi bani pangidangion, ai ma sada bagian humbani tolu tugas Gereja.
Ibagas na mandalankon pangidangion hita pasal hata ni Naibata bagei do tantangan-tantangan
sihadapanta. Ai do ase ipangindo banta hasirsiron pakon tanggung jawab marhitei
haporsayaon. Sipata ra do gabe i porsou agama ni, haporsayaonni halani tugas, horja
kedudukan na sihol sijumpahkononni. Taridah do ai sipata bani na malamar sada-sada horja
ibagas pemerintahan, lang pitah agama pakon haporsayaonni iporsou tapi dihut do age goran,
marga, sonai age umur martukar.
Bani panorang hasipelebeguon tangkas torang do ibotoh hita ompungta na parlobei
mabiar do bani hayu banggal, parsinumbahan pakon na legan. Mabiar do sidea bani jadijadian
ni Naibata janah ai do isombah sidea, iarapkon sidea do boi ai mambere malas ni uhur pakon
pasu-pasu bani horja, goluh ni sidea. Sonaha do nani bani panorang on adong ope nani na
mabiar bani jadi-jadian ni Naibata janah marsombah hubani? Mangindo tuah humbani na
manggoluh pakon na dob matei?
Goran Kristen ai, pitah goran do hansa nani bani parugamaonta? Aha do arti pakon
pangkadodong mangkagoluhkon goran Kristen ai? Kristen mararti pangikut ni Kristus ai ma
na sadalan, hasoman sahorja ni Tuhan in mambahen Kristus gabe hagoluhan, sipujion,
sihaporsayaon, pangarapan, haporusanta janah sihabiaranta, halani marhiteihon janah ibagas
Kristus do hansa adong haluahon ampa hagoluhan sisadokah ni dokahni. Tontuhon hita ma
sonari ise do sihabiaranta janah konsekwen ma hita bani haputusan ai, ase ulang hata ampa
pangakuan hansa lang adong hataridahanni.
Tonggo: Ham Tuhan Naibata Bapanami, ibagas goran ni Anak-Mu Jesus Kristus sai bere
Ham ma bennami Tonduy-Mu Napansing in mangajari, marmaloi hanami ase
margogoh janah sirsir hanami tongtong laho pararatkon Hata-Mu, ase Ham ma
hansa sihabiarannami ibagas hadirionnami. Amen.
HALELUYA NO. 138:3-4
3. Gok pe habiar tanoh on, laho
mandorab hita. Ulang mabiar hita
on, ai ningon monang hita. Age
manggila pe, sibolis banta bei, seng
habiaran be; Ai ‘ge sahata pe, kuh
do manaluhonsi.
4. Ai Hata ni Jahowa in na dong
tarkahuasi; Tuhanta do sijaga in,
ambah ni jabolon-Ni. Hosahta, arta
pe, na dong in banta pe, iayob
munsuh in, uhurni ma hujin,
Tuhanta hasomanta!
PARMAHAN NA MADEAR 6 NOVEMBER
MARHIOUHON KRISTUS
“Ai haganup nasiam, na tardidi hubagas Kristus, Kristus do iparhiouhon nasiam.”
Galatia 3:27
Pandidion ai ma sada horja Napansing hubanta jolma pardousa. Halani marhitei
pandidion ai ma sada kesempatan, dalan ija hita boi masuk, terdaftar gabe anak, boru atap pe
warga ni Harajaon ni Naibata. Marhitei pandidion ai gabe matei do hita ibagas dousa janah
manggoluh ibagas Tuhan, mararti halak na dob tardidi ibagas goran ni Naibata Bapa, Anak
pakon Tonduy Napansing, domma tongon ia sada ampa na dob mamparhiouhon Kristus.
Pakeian, hiou ai ma sada contoh na nyata na igambarhon banta bani goluhta on, halani
siap ari do hita mamakei pakeianta. Marhiouhon Kristus ai ma dihut ambil bagian ibagas
Kristus, sada pakon Kristus, marhajongjongon, marhadirion ibagas pakon marhiteihon
Kristus. Hasadaon pakon Kristus boi ialami hita ibagas hataridahanni marhitei haporsayaonta
bani Kristus. (2 Korint 1:7)
Domu hujon boi ma jaloonta hata ni Naibata bani Markus 16: 16 na mangkatahon: “Na
porsaya janah tardidi dapotan haluahon tapi na so porsaya hona uhum do.” Bani panorang
pandidion ai do ijalo hita, iparhiouhon hita Kristus ai. Na gabe sungkun-sungkun banta sonari,
sonaha ijaga ham do haborsihon ni hadirionmu bahasa na dob iparhiouhon ham Kristus?
Ipakei ham do bani goluhmu hiou Kristus ai atap na itanggali ham do? Patuduhkon hita ma
tanda biar pakon hataridahan ni na dob iparhiouhon hita Kristus ai bani goluhta i tongahtongah
ni keluarganta, kuria ni Tuhan, masyarakat pakon negara bani ganup panorang.
Maningon ma sintong-sintong hita mangkagoluhkon ha-Kristenonta marhitei na dob tardidi
hita ibagas Kristus na marhiouhon Kristus humbani unduk pakon toruh ni uhurta.
Tonggo: Ham Tuhan Jesus sipaluah hanami! Pagolpa, ajari Ham hanami tongtong ase
bani ganup goluhnami ipataridahkon hanami tanda ni na dob iparhiouhon
hanami Ham janah ihorjahon hanami harosuh ni uhur-Mu. Amen.
HALELUYA NO. 208:2+4
2. Ai sonaha pakeianku
marayakkon Naibata?
Unduk, toruh ni uhurhu
ai do hiou na tama.
Anggo domma dong sonin,
boi ma au bai Tuhankin.
4. Pasaud Ham ma pangajaran
na nidok ni Hata-Mu;
Ham patoguh parpadanan
bai ganup na roh Bamu.
Sai totap urupi Ham
na martonggo dompak Ham
PARMAHAN NA MADEAR 7 NOVEMBER
BASAR
“Habasaron nasiam ai, sihol ma talar ai bani haganup halak! Dohor do Tuhan in.”
Pilippi 4:5
Bagei do dalanni tene mambahen basar. Anggo adong ma ididah dalan hauntungan
mintor ipabasar-basar do dirini. Halani ai ra do marhitei habasaron ai gabe hasomanni, janah
adong do homa habasaron na lang pala manguntungkon bani dirini sandiri tapi lang pala
manguntungkon bani hasoman homa, ai ma habasaran ibagas hata na sumsam. Pada umumni
na basar pasal hata na sumsam on ma halak na so tangkas manandai Naibata pakon
parmabuk-mabuk.
Marhitei habasaran buei tumang do pangkorhonni bani dirinta. Ra marhitei habasaron
marosuh hasoman mangidah hita, lambin itandai halak hita, pindah-pindah hasoman anggo
lang roh hita bani tumpuan, siholan hasoman anggo dokah ma lang pajumpah, tapi ra do homa
marhitei habasaron ai gabe hagigi ni hasoman use hita.
Anggo sonai habasaron na sonaha do na ipangindo ayat on na sihol talar bani ganup
halak? Ai ma habasaron na adong i Kuria Pilippi ai. Basar, rosuh sidea mansahapkon hatani
Naibata i tongah-tongah ni sidea, basar ibagas hasintongan, pansing, habasaron ai lang adong
sipinsangon ni halak. Habasaron na sonon do na porlu talar bani ganup halak, ase marhitei
habasaronta ai dapotan haluahon homa hasomanta. Hita pe maruntung ibagas habasaronta ai.
Halani marhitei habasaronta na ibagas hasintongan domma sekaligus na beraksi, marambilan
hita ijai. Jadi domma idalankon hita sada parhara tugas na binere ni Tuhanta in banta marhitei
habasaronta ai.
Bani ujungni ayat in itokankon si Paulus use, dohor do Tuhan in. Ase ihusiphon itangar
Tuhan ibotoh hita bahasa haganup na nisahapkonta, age na ihusipkon i tangar Tuhan do ai.
Ase haganup hata na lang iharosuhkon Naibata ulang ma isahapkon ai bani halak, ihusipkon
pe ulang halani dalan hu hamagouan do ai. Tapi pasal hata na sintong, na pansing, patalar hita
ma bani ganup halak, halani anggo lang ipatahar hita hata na pansing ai bani halak, mardousa
do homa hita ijai, halani lang ra hita bersaksi, atap manaksihon hasintongan in. Ai do
mambahen pala ipagolpa si Paulus hita pasal habasaron. Basar ibagas hasintangon ase dihut
hasomanta maluah halani habasaronta.
Tonggo: Ham Tuhan, gati do lepak hanami mamakei habasaronnami, halani ai mangelek
ma hanami hu Bamu, ase habasaron-Mu ai ma pasogop Ham bannami ase
tongtong pansing habasaronnami. Amen.
HALELUYA NO. 250:5+7
5. Habasaron, hadameion,
na roh humbai Jesus in;
Goki uhur pakon tonduy,
ulang mosor in hunjin.
7. Halaniin, Ham Naibatangku,
sai pagomos uhurhin;
Ase ondos au hu lambung
ni ganup na monang in.
PARMAHAN NA MADEAR 8 NOVEMBER
HAONDOSAN NI GOLUH
“Iidah Ham do ai tene, itatap Ham do halojaon pakon hasunsahan laho manangani ai. Bamu do
marondos halak na galek, Ham do panolong bani halak na tading maetek.”
Psalmen 10:14
Anggo ipardiatei hita ayat on, mintor dapot hita do kesimpulanni, bahasa ayat on
marupahon pengakuan humbani sahalak na dob mananda pakon mangkaporsayai Naibata.
Halak na lang mananda Naibata lang ra tubuh pengakuan na sonai ai humbani hauhuronni.
Halani ra do anggo panorang bayak, ai mando iahapkon si jagoan, ai ma ninuhurni na gabe
panungkunan, artini ai mando iahapkon sumber ni goluhni, lang ra ia mangondoshon goluhni
bani Naibata.
Haganup isi ni dunia on Naibata do simadasi, age hita pakon na adong banta, halani ai
Naibata sandiri do na manangani, na mangatur ai. Anggo sonai aha do sipangunsagahkononta,
ai dong gatni gogohta paganjang ari-ari ni goluhta marhitei sinadonganta? Ise do Naibata
bamu, anjaha ise do ham? Marhiteihon ni sungkun-sungkun on tontu gabe adong do tubuh
ibagas uhurta laho patangkashon panandaionta pasal dirinta. Sadokah lang itandai hita
dirinta, sadokah ni ai ma homa lang itandai hita Naibata. Anjaha sadokah lang tandai hita
Naibata, sadokah ni ai homa lang ra hita mangondoshon goluhta bani Naibata, halani lang
mungkin ra hita marondos bani na lang itandai hita.
Bani ayat on tangkas ihatahon: “Itatap Ham do halojaon pakon hasunsahan laho
manangani ai.” Hunjon boi tangkas itandai hita Naibata, Ia na manangani janah mangatur,
berarti Ia do hape simada kuasa, simada hagogohon, simada harajaon, anjaha gabe tangkas
homa itandai hita dirinta, na galek do hape hita, na doyuk na lang margogoh age mambahen
pasal aha pe. Anggo sonai hape, idop ni uhur mando siaraphononta, sielekhononta marhitei
pembahenan na madear, parlahou na madear, lang pitah sahap tumang madear.
Domma itandai hita Naibata anjaha domma itandai hita dirinta, anggo sonai ondoshon
hita ma dirinta bani Naibata. Ia ma na manolong hita bani goluhta ari-ari sadokah i tanoh on
hita, sonai homa age pasal goluh na sihol roh ase dihut hita parsimada marhitei idop ni uhur
ni Naibata.
Tonggo: Ham Bapanami na i Nagori Atas, simada gogoh pakon simada kuasa, lambin
pataridahkon Ham ma gogoh-Mu bani goluhnami, ase lambin itandai hanami
hagalekonnami, janah ra hanami mangondoshon goluhnami Bamu. Amen.
HALELUYA NO. 249:2+4
2. Ganup binere-Mu in,
tonduy pakon angkulangku.
Hosah ampa gogohkin
ronsi haganup artangku;
Huondoskon in Bamu
seng paosoronku in.
4. Sai hujolom Jesuskin
ase boi das au hu Surga.
Ase saud huidah in,
na huarap na saindokah;
Malas uhurhin ijin,
bani Jesus Tuhankin.
PARMAHAN NA MADEAR 9 NOVEMBER
SIMBILI MA!
“Anjaha simbili nasiam ma sagala masam ni na masambor.”
1 Tessalonika 5:22
Porini adong na boritan martambar bani dokter, lobei i pareksa do ai, lanjar dob
ipareksa ibere ma tambar na gabe hitei pamalum naborit ai. Bani panorang mambere tambar
dokter atap pe hasomanni ai, mintor ipatugah do aha pantang-pantangni. Maningon sijagaon
ni na boritan ai do ai. Porini lang i patugah dokter aha pantang-pantangni nongkan, mintor
sungkunonni na manjalo tambar ai do homa aha pantang ni. Ai ma halani porlu ni uhurni
malum humbani naborit ai. Dob ipatugah pantang ni naborit ai maningon totap do ia
mardingat pakon padaohkon diri humbani pantang nongkan. Artini lang ipangan. Age pe
domma i patugah pantangni naborit ai, tontu lang boi mangkorhon hamalumon, age buei i
pangan tambarni. Ase maningon totap do isimbili pantang nokkan, ase boi mangkorhon
hamalumon tambar pinakei ni ai.
Sonai do nasiam hasoman, age i tongah-tongah ni Kristen buei tumang do pantangpantang
na maningon isimbili hita. Umpamani: Manangko, marbangkis, uhur subil, domdom,
latei pakon na legan. Pakon hata na legan boi hatahononta, pantang ni halak Kristen ai ma:
“Mangkorjahon horja na lang iharosuhkon Naibata.” On ma na maningon isimbili hita ibagas
goluhta ari-ari.
Age pe ihatahon hita Naibata parholong, paridop ni uhur, ulang lupa hita bahasa
Naibata panringis do bani halak na so mangkorjahon parentahNi. Halani ai maningon totap do
hita mardingat pakon manimbili hagigi ni Naibata. Tontu lang das hita hubani hagolapan.
Ase marhitei ayat on iigilhon hubanta haganupan ase ulang ilajou-lajou hita laho
mangankon pantang ai, anjaha isurahon pe ulang, halani uhur gelah sihol mangkorjahon
domma tarpangan pantang ai. Naibata ididah do ronsi hubagas uhurta.
Tonggo: Ham Naibata, bere Ham bannami hagogohon laho manimbili haganup na lang
iharosuhkon Ham ase talup anjaha parsimada hanami bani haluahon na binereMu.
Amen.
HALELUYA NO. 257:1+3
1. Sai martuah do marnunut,
halak na porsaya in.
In ma halak na dob surut,
humbai pardousaon in.
Na so ra be mangirikkon,
tahini parjahat in.
Na so ra be sahundulan,
ampa pangapasi in.
3. Talu do bai paruhuman,
halak sipargeduk in;
Jongjong do bai hasangapon,
na pintor maruhur in;
Si pargeduk seng na bulih,
roh hu hagoluhan in;
Hamagouan do rupeini,
sonang do parpintor in.
PARMAHAN NAMADEAR 10 NOVEMBER
SOL MALUAH HAM?
“Marhasoman biar pakon gobir ma haporluhon nasiam haluahon nasiam.”
Pilippi 2:12
Mamungkah humbani na madabuh jolma na parlobei hubagas dousa, aima si Adam
pakon si Hawa, hatahonon domma ibagas tawanan ni sibolis goluh ni jolma on. Halak na
ibagas tawanan domma pasti lang bebas be goluhni atap hatahonon ibagas sitaronon ma ia.
Halani ai lang adong halak na marosuh ibagas tawanan atap ibagas sandera. Ganup jolma do
marosuh maluah humbani tawanan. Tapi anggo halak na ibagas tawanan, lang adong gogohni
laho paluahkon dirini, halani ai porini adong humbani sada negara na hona sandera rakyatni,
mintor pemerintah ni negara ai mando mancari jalan laho paluahkon rakyat ni na hona
sandera nongkan. Tapi age pe bertindak pemerintah ni negarani, laho paluahkon sandera ai,
anggo porini adong huntongah-tongah ni sidea na lang ra mangihutkon pembebasan ai, tontu
soh do ia ijai totap gabe tawanan. Halani ai maningon ra do homa mambalosi dilo-dilo pakon
manjalo pangurupion ni pemerintah ni negara ai.
Sonai do homa age hita na dob itawan, isandera pembajakanni bani jolma na parlobei,
lang adong be gogohta laho paluahkon dirinta humbani tawanan ni sibolis. Tapi halani holong
ni uhur Naibata na i Nagori Atas mangidah hita, gabe martindak do Ia mambere Anak-Ni aima
Tuhan Jesus Kristus na gabe dalan haluahonta. Age pe iberehon Naibata Anak-Ni dalan
haluahonta, anggo lang ra hita mambalosi dilo-dilo pakon manjalo pengurupion ni Naibata,
tontu totap do hita ibagas gomgoman ni sibolis. Halani ai, ase maluah ham, maningon
haporluhon ham do homa manjalo haluahon ai marhitei na mandalankon pakon mambalosi
dilo-dilo ampa manjalo pangurupion ni Naibata ibagas Tuhan Yesus Kristus.
Marhasoman biar pakon gobir ma haporluhon ham haluahon ai, artini: Maningon
adong ahap biar bamu anggo lang rap ham pakon Naibata. Maningon adong ahap biar bamu
laho manangar hata ni Naibata. Marhitei na adong biar na sonai ai ibagas uhurmu, tontu
ibalosi ham do dilo-dilo pakon ijalo ham do pangurupion ni Naibata marhitei hataridahan na
mangkorjahon horja na iharosuhkon Naibata ham sadokah goluhmu.
Tonggo: Sol maluah do namin hanami haganup ale Tuhan, tapi halani hagalekon pakon
haotoonnami, ra lang itangar hanami dilo-diloMu. Halani ai totap ma paingat
ham hanami pasal haluahonnami, tarimakasih ma Bamu. Amen.
HALELUYA NO. 266:1+4
1. Sai hutuju hagoluhan, na pasonang
au. Hagogohi lao hu surga, ronsi
ondos au. Abat husimbili do, hata
on hudingat do: Sai nunuti
mangindahi, hasonangan ni.
4. Seng margogoh au manlawan,
ganup dousangkin, togu Ham ma au
hu surga, bai na sonang in. Sai
paingat Ham tongtong Hata-Mu bai
uhurhon! Pujionku ma goran-Mu
sadokahni in.
PARMAHAN NA MADEAR 11 NOVEMBER
HASANGAPON MA BANI NAIBATA
“Paluahon ni Tuhan in do ahu humbani haganup hajahaton, anjaha pamasukon-Ni ahu
hubagas Harajaon-Ni na i Nagori Atas ai. Bani ma hasangapon ronsi sadokah ni dokahni.
Amen.”
2 Timoteus 4:18
Si Saulus, ai ma goran ni sahalak na sambor tumang hauhuronni dompak halak Kristen.
Ipangindo do surat kuasa humbani Sintua ni Malim, laho mangarsik-arsik pakon mambunuh
halak na mangirikkon Naibata. Santorap sanggah borhat ia pakon kawan-kawanni hu
Damaskus, sanggah itongah dalan donok huta ai, ijumpahkon Tuhan Yesus ma ia marhitei
sinalsal na roh hun Nagori Atas, na mambahen golap pangidahni, pitung seng tarbahensi
mambahen age aha sadokah lang ipamalum Tuhan Jesus ia humbani naboritni ai. Hunjai nari
mubah ma uhurni anjaha goranni pe mubah ma: Saulus gabe Paulus.
On ma na nihatahon ni si Paulus bani si Timoteus pakon hubanta bani panorang on:
“Paluahon ni Tuhan in do ahu humbani haganup hajahaton.” Iambati Tuhan Jesus ia, laho
mangkorjahon hauhuran na sambor ai marhitei na pajumpah ia pakon Tuhan Jesus.
Domma ongga ham pajumpah pakon Tuhan Jesus? Aha do Nini bamu? Anggo domma
ongga ham pajumpah pakon Tuhan Jesus pasti do ihatahon bamu: Padaoh ham ma uhur subil,
latei, pangoto-otoon. Tapi bani parjumpahan nasiam ai, ra do lang ope iahapkon ham na
pajumpah ham pakon Tuhan Jesus, halani lang songon na bani pingkiranmu ai parroh-Ni,
halani bagei dalan ni Tuhan Jesus laho manjumpahkon hita, tapi, anggo sora-Ni pakon tonduyNi
sarupa do bani ganup panorang.
Dob adong hamubahon ni uhur ai bani si Paulus, lang be hasangapon ni dirini sandiri
ihaporluhon tapi hasangapon ni Naibata do, halani domma iidah harajaon ni Naibata na
sangap, anjaha pamasukon-Ni do hubagas harajaon-Ni ai halak na pasangapkon-Si.
Bani goluhta on tene, ra bueinan ope hita na mamorluhon sangapni sandiri. Dapot hita
do tongon hasangapon ai, tapi hasangapon parsatongkinan do ai hansa. Sonaha do ase dihut
hita dapotan hasangapon sisadokah ni dokahni ai? Jalo hita ma pangambation ni Tuhan Jesus
bani goluhta na laho mangkorjahon hajahaton, ase adong hamubahon ni uhur banta, anjaha
gabe mamorluhon hasangapon ni Naibata ma hita bani goluhta.
Marsangap ma Naibata marhitei parsahapta, pambahenanta, pangabakta, pamberenta, ase
pasangapon-Ni use hita, marhitei parsimada hita bani harajaon-Ni.
Tonggo: Ham Naibata, togu Ham ma hanami ase ulang mangkorjahon na jahat hanami.
Paluah Ham ma hanami humbani hajahaton nami, ase sanggup hanami
pasangapkon goran-Mu. Amen.
HALELUYA NO. 202:3
3. Sai hormat ma parlahouhu dompak bohi-Mu ijin.
Suruh Ham ma bai uhurhu, Tonduy-Mu Napansing in.
Ase sai tongtong torsa tonggo ‘pa dodingku da
PARMAHAN NA MADEAR 12 NOVEMBER
ARTI SILANG NI KRISTUS
“Ai haotoon do pasal silang in bani halak na laho magou, tapi hagogohon ni Naibata do in
banta, na jumpahan haluahon.”
1 Korint 1:18
Ayat on ai ma na tinongos ni Apostel Paulus hu Kuria Korintus. Apostel Paulus bani teks
on mambere pangajarion pasal arti silang ni Kristus ai ma puncak ni holong ni atei ni Naibata
bani ganup jolma na martenger ni uhur hu Bani.
Dong do dua golongan pandapot bani ayat na i atas in:
1. Jolma na laho hu hamagouan, haotoon do bani silang in. Janah Kristus na dob tarsilang,
pangarusionni hinorhon ni hagalekon ni Kristus do.
Tartangkap Ia halani lang markuasa paluahkon diri-Ni, gabe iporsan ma silang in.
2. Marhitei silang ipataridahkon do hagogohon ni Naibata ase dapotan haluahon na
mangkaporsayai-Si halani italuhon do sorod ni hamateian. Janah silang parrohkon
goluh na marhapansingon atap goluh na baru.
Ase marhitei Kristus na dob tarsilang in do hansa boi jolma in jumpahan haluahon. Ase
sedo haotoon pasal silang, tapi hagogohan ni Naibata do pataridahkon holong-Ni bani jolma.
Halani ai silang ni Kristus, horja ni Naibata na pajongjongkon hasasapan ni dousa ni jolma na
lang boi dapot jolma in marhitei hadirionni. Ase haganup jolma do iharosuhkon Naibata
mandapot haluahon, na bayak, na masombuh, na i kota, i huta pe. Hansa na gabe syaratni ai
ma haporsayaon.
Halak Gorik mangandalhon hapandeian laho manangkasi pasal silang ni Kristus. Akibatni
gabe haotoon bani sidea pasal silang in, janah lang be mangkorhon haluahon. Ase haporsayai
hita ma Kristus na dob manghopkop hita jolma marhitei silang-Ni i Dolog Golgata, halani
haporsayaon do na gabe modal bani haluahonta songon na ihatahon Martin Luther: “Sola fide”
artini pitah marhitei haporsayaon do.
Tonggo: Ham Bapanami na marianan i Nagori Atas, parholong ni atei banggal do Ham.
Pala ibere Ham Anak-Mu Jesus Kristus tarsilang gabe haluahonnami. Gati lang
iarusi hanami pasal silang-Mu, halani ai mangindo hanami hu Bamu ase bere
Ham pangarusion bannami mangahapkon panghopkop-Mu na gabe
haluahonnami. Amen.
HALELUYA NO. 357:2-3
2. Malum ganup naboritmu
ibaen silang-Niin,
Tuhan in na hona
uhum gantihmin.
3. Sai pingkiri ma holong-Ni
na banggal do in,
iberehon do hosah-Ni
tobusmin.
PARMAHAN NA MADEAR 13 NOVEMBER
HAGOGOHON PAKON KUASA NI NAIBATA
“Na so tarbahen bani jolma, tarbahen Naibata do.”
Lukas 18:27
Ihatahon par Ilmu Bumi pakon Ilmu Alam ia dunia on helmong do janah marputar
manginggoti mataniari. Sonai homa bulan marputar manginggoti dunia on sapuluh dua hali
ibagas na satahun.
Anggo na uhuri ganupan in, na lang marhitei na igerakkan ni mesin janah lang ongga
homa na tangar planit-planit in marsilanggaran. Tongon ma na hinatahon ni ayat na ibabou in:
“Naso tarbahen jolma tarbehen Naibata do.”
Sonai do homa panompaon ni Naibata bani dunia on pakon isi ni. Ipasirsir do na porlu
lobei bani jolma dob ai pe ase itompa si Adam pakon si Hawa laho manrajai na jinadihon-Ni.
Hape marhiteihon panlanggaron ni sidea bani Titah ni Naibata gabe mardousa sidea. Akibat ni
dousa das bani panorang on, sirang ma jolma in humbani Naibata, janah lang be tarpaluah
jolma in dirini humbani gomgoman ni sibolis. Tapi marhiteihon holong ni Naibata mando boi
maluah. Seng boi halani hadirionta sandiri. Halani ai ingat hita ma pambahenan ni Kristus
hubani hita jolma, janah roh ma hita hu Bani. Ibagas Ia do boi hita dapotan haluahon. (Mateus
11, 28)
Anggo marhiteihon horja ni jolma in sandiri seng boi manaluhon sorod ni hamateian.
Pitah marhitei pambahenan ni Tuhanta mando ase mungkin hita marhasonangan. Ase na
imaksud ni Tuhan Jesus Kristus: “Na so tarbahen bani jolma tarbahen Naibata do” ai ma
pangangkatan ni jolma in humbani kuasa ni sibolis. Ase jalo hita ma idop ni uhur ai ibagas
haporsayaon janah marhiteihon ni ai ibere Tuhanta do Tonduy Napansing laho mampargogohi
hita janah mambere habotohon pasal rusia ni Naibata.
Tonggo: Ham Tuhan Naibata Bapanami! Aha pe lang tarbahen hanami halani dousanami.
Tarimakasih ma Bamu na dob mambahen haluahon bannami marhitei Jesus
Kristus. Ham Tuhan pargogohi Ham ma hanami mananda janah
manghaporsayai hagogohon na binahen-Mu laho manghopkop hanami. Amen.
HALELUYA NO. 6:4+8
4. Ai Ham do na margogoh in,
sitompa haganup;
Ham do na pagoluhkon in,
marmuduhon ganup.
8. O Naibata, Ham do bayak,
sibere hanai on;
Ai Ham do na tongtong layak,
manumpak jolma on.
PARMAHAN NA MADEAR 14 NOVEMBER
TOTAP IBAGAS PANGARAPAN
“Anjaha pangarapan ai seng parroh habadoran, ai domma iuseihon hubagas uhurta holong ni
uhur ni Naibata marhitei Tonduy Napansing, na binere-Ni banta.”
Rom 5:5
Pangarapan ai ma mambahen kegairahan hidup bani hita jolma, laho mangkorjahon
horja siganup ari, misalni: marjuma, martiga-tiga, markantor, atap marsikolah pe. Janah anggo
lang adong niahapkon imbalanni mungkin lang marsemangat hita marhorja age horja na
ijahanin pe. Ase pangarapan porlu tumang.
Sonai ma pangarapan na binaen ni Naibata marhitei Jesus Kristus na dob
pajongjongkon haluahon ni ganup jolma. Lang marhitei pambahenan ni jolma na madear ase
ipajongjong haluahon ai tapi marhitei panghopkop-Ni. Ase ipajongjong Naibata pe haluahon
bani jolma marhitei holong-Ni tumang do. Ayat na i atas on ai ma surat ni Apostel Paulus hu
Kuria Rom paingatkon totap ibagas pangarapan janah sekaligus mambere pangajarion paboa
Naibata domma manongos Tonduy Napansing laho marhorja, mampargogohi ronsi
pasintongkon uhurta laho patotapkon pangarapan ai. Janah bani ayat on ipatugah do, ai
pangarapan ai lang pabadorhon songon pangarapan na gati banta masa i dunia on. Halani aha
do ase ihatahon Apostel Paulus pangarapan ai lang pabadorhon? Ai ma halani domma
ipataridahkon holong-Ni marhitei silang ni Kristus janah holong-Ni mardalan ope nuan
marhitei Tonduy Napansing. Ase sijagaonni hita halak Kristen do pangarapan ai, songon na
tarsurat bani Rom 12:12, “Marmalas ni uhur ma nasiam mangarap, sabar bani hamarsikon,
gol-gol bani tonggo.”
Ai anggo lang ipataridahkon hita bani goluhta ayat na i atas in, lang dapot hita songon
na sinuratkon ai ma surga hasonangan na dob ipasirsir Tuhanta hubani ganup na
mangarapkon-Si. Halani ai buha hita ma uhurta ibagas pangarapan ai ase ibere Tuhanta
Tonduy Napansing laho mampargogohi hita. Ase manggoluh hita songon goluh ni na
marpangarapan bani haluahon na pinajongjong ni Jesus Kristus. Janah pasirsir hita ma uhurta
laho manjalo holong ni atei ni Naibata.
Tonggo: Ham Tuhan Naibata Bapanami, sai pargogohi Ham ma hanami marpangarapan
hu Bamu marhitei Tonduy-Mu na mapansing, ase boi hanami totap ibagas Ham
anjaha boi pataridahkon na dob ipajongjong Ham haluahon bannami. Amen.
HALELUYA NO. 258:3-4
3. Sura-sura ni uhurta,
pangarapan na talup.
Ronsi ganup pingkiranta,
bai Tuhanta in ganup;
Sai pararat ma Hata-Ni,
bai na so porsaya in.
Atap ra ope mardamei,
ganup na mangengkar in.
4. Anggo tenger tong uhurmu,
bai Tuhanta Jesus in.
Sai na sonang janah saud,
ganup sura-suramin;
Ham tongtong arahkonon-Ni,
ase saud hu surga in;
Haganupan na dong Bani,
dihut ham manean in.
PARMAHAN NA MADEAR 15 NOVEMBER
SABAR PAIMAHON NA NIARAPΚΟΝ
“Tapi, anggo mangarap do hita bani na so ni idah ope, sabar ma hita paimahonsi.”
Rom 8:25
Goluh ha-Kristenon ai ma goluh na marpangarapan. Mangarap do hita paima-imahon
pasu-pasu ni Tuhan hubanta bani goluh sadokah i dunia on anjaha na lobih siharganan ope
banta ai ma mangarap bani haluahon na sadokah ni dokahni ai. Ijon ihatahon mangarap bani
na so ni idah ope. Sintong do ai, halani anggo domma na idah seng siarapkonon be ai.
Domu hubani ayat sadari on, ihatahon do bani ayat na i lobeini (23): “Ambah ni ai age
hita, na dob manjalo limbuah ni Tonduy in, marhoih do ibagas uhurta, paimahon haanakonta
ase maluah pamatangta.” Sihol bahenon ni Tuhan Naibata hape au, ham gabe anak pakon
boru-Ni. Kedudukan ni anak ai ma marhak manjalo arta ni orangtuani. Usih hujai ma
haganupan halak na porsaya in sihol bereon ni Tuhan Naibata arta-Ni na i Nagori Atas gabe
hak ni anak-Ni na dob monang ibagas na mandalankon na sinuruh ni Bapa in. Antigan ma ai?
Boi ma ijalo ham ai arian on atap borngin on?
Ra tene songon na tarolos ham atap sihol podas ma jaloonmu ninuhurmu “Hak na gabe
ahli waris ni Harajaon ni Naibata” ai. Ulang ham tarudu. Sabar ma hita paimahonsi. Tapi ibagas
na paimahon ai ham, ingat ham da; sedo na otomatis asal na terdaftar goranta bani register
Kuria atap tertulis bani Kartu Penduduk Agama Kristen, mintor dapot ma halak ai holi tapi
maningon taridah do bani pangabak, parlahou artini hasabaron ai. Sabar paimahon na so ni
idah ope artini lang mintor podas bosan, putus asa. Misalni: Gati hita marhitei tonggo
mangindo hubani Tuhan Naibata ase ibere ma namin pasu-pasu-Ni, ase marhasil horjanta ariari.
Tapi halani lang mintor toktok daup (ijin ipindo, ijin ibere) mintor mandolei hita; ninta:
“Lang ibalosi Tuhan tonggongku.”
Soal haporluan bodari sogod on ope sonai ma ninta. Samintolah ma use pasal goluh si
sadokah ni dokahni ai? Halani ai ulang ma hita mintor manrampas. Sipindoonta do homa
hubani Tuhan ase ibere banta hasabaron paimahon na so ni idahta ai ope sonari.
Tonggo: Bapanami na i Surga, bere Ham ma hubennami hasabaron paimahon haganupan
sibere-bere-Mu sadokah goluhnami. Amen.
HALELUYA NO. 294:1+3
1. Naha ma hita ia dob marujung,
paruntolonta i dunia on.
Dob honsi lang be hita on mangusung
na borat in i atas tanoh on?
Lao misir hita hu Nagori Atas,
dob na tadingkon orbuk tanoh in;
Bai na dohor na tatap hasonangan,
na pinarsinta ni uhurta in.
3. Naha ma hita, anggo na irikkon,
panogu-nogu ni Tuhanta in?
Ai seng be dong na boi mangambat hita,
humbai rupeita na i Surga in;
Bai na lihar pangkawah ni matanta,
mangidah Jesus, Sipagoluh in,
Na sangap in, na manghunduli hotak,
manggomgom haganup ianan in.
PARMAHAN NA MADEAR 16 NOVEMBER
SIMADA HITA
“Tapi totap do onjolan na humbani Naibata na toguh in, anj aha hata on ma surat ni lakni:
Itanda Tuhan in do halak, na la simadasi; anjaha: Barang ise na mandilo goran ni Tuhan in,
maningon sirang ma ia humbani hajahaton.”
Onjolan na humbani Naibata do na totap anjaha na toguh. On do na talup siakuhononta
anjaha sipakeionta. Sada halak na lang marhatotapan janah na mugar-ugar onjolan ni
hauhuronni lang tarbaen lang maseda do hadobanni. Bani halak Kristen lang dong onjolan na
legan sobali Naibata. Ai ma ase anggo porini porlu ope ninuhurmu bahenonmu use onjolan na
legan ibagas goluh on, isara ni partahanan ni badan, ajimat, tangkal, sepe na tongon ai porsaya
bani Tuhan Naibata.
Materai ni onjolan ai, ai ma hata na mangkatahon: Itanda Tuhan in do halak na Ia
simadasi; anjaha barang ise na mandilo goran ni Tuhan in, maningon sirang ma ia humbani
hajahaton. Santorap, mangindo apuy do sahalak parana hubani partua. Roh partua on
iberehon lotingni. Isantikhon parana on ma. Sahali, dua hali, patoluhalihon, lalap lang gara.
Seng dear gatni lotingmu on bapa tua, nai ma nini. Ija ma tongon, nini partua ai. Isantikhon ma
asok……gara. Roh nini parana on itandai loting on do gak ni simadasi. Pakon pondok, itandai
simada loting ai do rusia ni loting ni ai. Lobih hunjai ope na hinatahon ni ayat on, anggo
ihatahon: Itanda Tuhan in do halak na Ia simadasi. Ulang antara angkulanta, haganup rusiamu
ibotoh Tuhan. Gariada tene, Ia do na manompa hita. Naibata do simada hita. Anggo sonai do
bahen ham ma harosuh ni simada hita ai.
Jolma maningon mamihak ma Ia tongtong ganup panorang, tiap kesempatan, tiap
situasi hampit Naibata. Isirangkon ma dirini humbani hajahaton, halani seng adong kamus ni
hajahaton masuk bani gomgomanni Naibata. Imbangta do hajahaton ai. Aha do hajahaton? Ai
ma keadaan na manghagigihon na hinarosuhkon ni Naibata. Hunja do parrohni? Sedo pitah na
hundarat ni dirinta harohan ni hajahaton ai. Ingat ham ge hata ni dodingta ai: “Dirimin do
munsuhnima pakon sipangagou in.” Na parlobei do hape hubani dirinta on ia roh. Halani ai
jaga ham ma dirimu.
Tonggo: Gati do tongon maronjolan bani na legan hanami bani goluhnami. Halani ai
2 Timoteus 2:19
ibagas toruh ni uhur sonari manrogop do hanami hu Bamu mangakuhon
hasalahannami in. Hunjon hujanan sai Bamu mando hanami maronjolan, ai Ham
do onjolan na totap anjaha na toguh. Amen.
HALELUYA NO. 96:1+5
1. Seng au ompung ni ahu
hubere diringkon,
bai Tuhan in Rajangku
sigomgom tanoh on.
Ai bai diri ni Jesus au
ididah Naibatangku
na pasonangkon au.
5. Sai on do ongononku;
“Seng au ompung ni au”
Sai Jesus jolomonku
paima ondos au;
Seng lupa au bai Jesus in
ronsi rotap hosahku,
sai sonang au ijin.
PARMAHAN NA MADEAR 17 NOVEMBER
MULAK RAТАН
“Mulak ratah do ai siap sogod, banggal do habonaran-Mu.”
Tangis-tangis 3:23
Buei do hasoman mangkatahon panorang sogod ai ma tang sisodapan ibagas na sadari
saborngin. Dob puho diri hun podoman laho hu darat, na idah segar haganup suan-suanan,
manuk-manuk pe mandodingi, sondang ni mataniari na jenges songon na mambere
kegairahan bani haganup pangisi ni tanoh on. Namur sogod-sogod pakon udara pagi buei
ipakei hasoman gabe tambar na boi pasehatkon angkula pakon patorangkon pingkiran.
Hape lobih hunjai na hinatohon ni ayat on hubanta. Idop ni uhur pakon holong ni atei
ni Naibata mulak ratah siap sogod. Artini, ijin imasuki hita sada ari na bayu domma taon, sirsir
idop ni uhur pakon holong ni atei ni Naibata menyambut hita. Sirsir idop ni uhur pakon
holong ni atei ni Naibata mangkatahon: Selamat pagi hubanta siap sogod. Naha do panjalonta
bani ai? Marhitei ai tangkas hubanta haganupan ari in ari na madear do banta. Siap sogod do
jaloonta idop ni uhur pakon holong ni atei ni Naibata.
Ibagas na berjuang hita memenuhi haporluan ni goluh on, gati do songon na jut
pangahapta hinorhon ni kesulitan. Lang sai tong marhasil horja ni tanganta. Akibatni putus
asa, mandolei hita. Ayat on ma gabe tambarta menghadapi ai. Mulak ratah idop ni uhur ni
Tuhan hubanta siap sogod.
Marhitei ayat on ma idahonta habanggalon ni habonaron ni Naibata. Haganupan jolma
manjalo sibere-bere ni Naibata siap arian bani goluhni. Lang ongga salah Naibata bani sagala
pambahenan-Ni, jadi atap sonaha pe na ialami hita age sadari on, haganupan ai sedo na so
ibagas botoh ni Tuhan. Ari na madear do tong ibere Tuhan hubanta. Ulang isolsoli hita Naibata
anggo hita do na salah pakei bani ari na binere ni Tuhan in hubanta.
Tonggo: Bahen Ham ma Tuhan boi hanami dihut dapotan idop ni uhur pakon holong ni
atei-Mu siap sogod, ase marhiteihon ni ai margogoh anjaha marmalas ni uhur
hanami tongtong mandalani ari-ari ni goluhnami. Amen.
HALELUYA NO. 160:2+4
2. Ganup sogod ningon do
Jesus diloonmu,
ase itumpaki ho
bai silahoanmu;
Ai arian borngin pe,
sai hasomanan-Ni,
dousamin ganupan pe,
sai taluonkon-Ni.
4. Huondoshon ma tongon
haganup langkahku,
bai Tuhanku, na tongtong
ibagas uhurhu.
Atap aha pe hubaen,
Ham huunsagahkon.
Saud ma bahen Ham Tuhan
haganupan. Amen!
PARMAHAN NA MADEAR 18 NOVEMBER
SONARI PAKON MAGIRA
“Anggo sonari, mangkawah do hita songon bani sormin, samak hansa, tapi use padumpar bohi
ma. Mardeba-deba do panandaionku nuan, tapi anggo use gok ma panandaionku, songon na
dob tinandani ahu.”
Pajumpah ma sada halak Kristen pakon hasomanni na baru masuk Kristen. Nini: Naha
do tuduhonkon haporsayaon ai dahkam? Balosni: Lang haganup tarpatorang ai ambia. Lang
tarpajojor haganupan, tapi jelas do dong ai. Atap sonaha haporsayaonku, lang tarpatorang au
ai haganupan. Jadi anggo sonai do hape balosmu, samak do hansa haporsayaon ai! Nini use
patangkashon. Seng sonai ambia. Porini pe sonai do hansa na boi huhatahon bam tapi anggo
isini bahat ope ai ibagas. Tapi huulakkon use mangkatahon hubamu, anggo haporsayaon ai
seng na tarpatugah ai haganupan ibagas sahap tumang. Halani anggo haporsayaon ai, ai ma
atok ni uhur bani na so taridah pakon na niarapkon.
Memang anggo bani goluhta sonari on ope hita marianan pitah sonai ope
pangkawahonta bani na sihol masa magira ai. Pas songon hita na marsormin. Tapi anggo
padumpar bohi ma magira, talar ma haganupan. Mardeba-deba do panandaionta anggo nuan,
tapi anggo use gok ma panandaionta, songon na dob tinanda-Ni hita. Jadi anggo sonari
pardalanan ni goluhta on ibagas haporsayaon do, lape ibagas na mangidah. Paima das hita
bani ujung ni pardalanan ai samak anjaha mardeba-deba ope panandaionta. Panorang
padumpar bohi pakon gok ni panandaion ai magira do ai jumpah. Tapi seng mararti sungkup
ma pitah soh-soh hita paimahon. Ijon ma porlu haporsayaonta ai marhorja. Sibere-bere ni
Naibata do haporsayaon ai halani holong ni uhur-Ni. Halani ai do ase margoran Ia, parmulaan
pakon ujung ni haporsayaon.
Jadi sonari ibagas haporsayaonta maningon tangkas ma panandaionta bani Tuhan. Dob
tangkas panadaionta hubani Tuhan marhiteihon ni ai ma gabe tongtong hita marhaposan hu
Bani. Dob ai taridah ma ibagas goluhta pambalosian na pitah hubani Tuhan Naibata. Halani ai
porluhon hita ma ase harosuh ni Naibata hita sonari.
Ai maningon talar do hita haganupan i lobei ni paruhuman ni Kristus ase ijalo hita bei
domu hubani na hinorjahonta.
Tonggo: Samak do hansa pangidah nami tongon Tuhan anggo sonari. Mardeba-deba
nuan panandaionnami. Halani ai ielekkon hanami hu Bamu ibagas na
mangajamkon idop ni uhur-Mu ase ipadas Ham hanami bani panandaion na gok
Bamu magira. Amen.
HALELUYA NO. 7:8-9
8. Sai layak-Mu do pujionku
sadokah na manggoluh au;
Sai goran-Mu pasangaponku
sadokah na marhosah au;
Ronsi rotap ni hosahkin,
sai pujionku Ham ijin.
9. Sai jalo ma, ale Tuhanku,
pamujingkon na hurang in;
Paima das au on hu surga,
ianan na gok dear in;
Marlaksa hali ma ijin,
dodingkononku Tuhankin.
1 Korint 13:12
PARMAHAN NA MADEAR 19 NOVEMBER
DOMMA DAS HAGOLUHAN SISADOKAH NI DOKAHNI BAMU
“Na sintong tumang do na Huhatahon on bani nasiam: Barang ise na manangihon hatang-Ku
anjaha porsaya bani na marsuruh Ahu, domma das bani hagoluhan na sadokah ni dokahni;
seng pala be ia hu paruhuman, domma mandipar ia humbani hamateian hu hagoluhan.”
Dob ipamalum Tuhan Jesus sada halak na boritan i Bethesda sanggah ari Sabat tubuh
do parlawanon humbani halak Jahudi. Ipindahi halak Jahudi ma dalan laho mamunsuhi Tuhan
Jesus halani pamalumhon na boritan Ia bani ari Sabat anjaha na igoran Jesus homa Naibata
Bapani, anjaha ipados diri-Ni pakon Naibata.
Tapi age pe sonai pambahenan ni halak Jahudi, anggo Tuhan Jesus itorushon do tong
horja-Ni. Ipatorang Jesus do hubani sidea bahasa na binahen-Ni ai, ai ma halani parsuruh ni
Naibata Bani. Aha pe lang tarhorjahon Anak in anggo humbani diri-Ni sandiri, pitah na ni
idahni humbani Naibata do ihorjahon. Ai aha na hinorjahon ni Bapa in, ai do homa na
ihorjahon Anak in. ljon taridah hasadaon ni Jesus pakon Naibata Bapa in, ai do homa na
ihorjahon Anak in. ljon taridah hasadaon ni Jesus pakon Naibata Bapa. Jadi sintong tumang do
na hinatahon ni ayat on, age hubanta bani panorang on, barang ise na manangihon hata ni
Tuhan Jesus anjaha porsaya bani na marsuruh-Si, domma das bani hagoluhan na sadokah ni
dokahni; seng pala be ia hu paruhuman, domma mandipar ia humbani hamateian hu
hagoluhan. Mase? Halani songon pamuhoi ni Bapa in bani na matei, laho pagoluhkon sidea,
sonai do Anak in, ipagoluh do atap ise na sihol pagoluhon-Ni. Ai seng dong na iuhumi Bapa in,
tapi domma iondoshon haganup panguhumon in bani Anak in.
Jadi dua sungkun-sungkun na banggal, na maningon sibalosanta marhitei ayat sadari
on. Parlobei: Ihatahon ham do hata ni Tuhan Jesus? Paduahon: Porsaya do ham bani na
marsuruh-Si?
Ulang use dihut hita songon halak Jahudi ai, na so manangihon Tuhan Jesus pakon na
so porsaya bahasa Tuhan Naibata do na marsuruh-Si roh hu dunia on. Lobih hunjai ope tene,
sihol bunuhon ni sidea use Jesus. Artini itulak sidea Naibata. Lang sidea ra manangihon hata ni
Tuhan Jesus pakon mangkaporsayai Tuhan Naibata na marsuruh-Si.
Sonari porlu homa tangkas hubanta, sibar ja ma panangihononta bani hata ni Tuhan
Jesus, anjaha sibar ja pangkaporsayaita bani Tuhan Naibata. Ipadankon Jesus do hagoluhan na
sadokah ni dokahni hubani halak na manangihon hata-Ni pakon mangkaporsayai Tuhan
Naibata.
Tonggo: Ham Tuhan Jesus, ipadas Ham do hubennami hata hagoluhan na humbani
Naibata Bapa in. Tarimakasih ma Bamu. Ajari Ham ma hanami tongtong
manangihon Hata-Mu anjaha mangkaporsayai Naibata Bapa in. Amen.
HALELUYA NO. 223:1-2
1. Domma das bani hita on
hata hagoluhan;
Na pasonang sai tongtong
uhur pardousaon.
Anggo jinaloni in gabe na porsaya.
Bai Tuhanta Jesus in,
na mangusir dousa.
2. Halaniin na puji ma
goran ni Tuhanta;
Sai pasangap Naibata,
pamalas uhurta,
Mamestahon ari on, ari pardingatan
Bai layak-Ni na tongtong,
lang marparsaranan.
Johannes 5: 24
PARMAHAN NA MADEAR 20 NOVEMBER
MANGARAP BANI NAIBΑΤΑ
“Ai do ase loja hita janah maruntol, halani mangarap hita bani Naibata na manggoluh in,
Sipaluah bani haganup jolma, tarlobih bani na porsaya.”
Marbagei-bagei do na parrohkon halojaon pakon paruntolon bani goluh on, tarlobih ma
halojaon pakon paruntolon ni pingkiran. Bani situasi na sonon ma anggo lang adong tenger ni
uhur pakon pangarapanta na margantung bani Tuhan Naibata na manggoluh in, ijai ma bahat
jolma mandolei pakon putus asa, halani lang adong be hasohan ni pingkiran janah domma
magou pegangan ni hidupni. Tarlobih ma anggo masalahni na roh humbani kebutuhan ari-ari,
humbani parhorjaan, usaha, jabatan, keluarga, parniombahan pakon hatadinganta iahapkon
humbani hasoman jolma. Tarlobih ma halak menghadapi masa-masa hasunsahan. Ingat ham
ma: “Pingkiran na tegang marpangkorhon do papondokkon umur ni jolma.”
Halani on ma roh Tuhanta marsahap hubanta marhitei Apostel Paulus mamuhoi pakon
mandasari goluhta, mambere sijoloman ni goluhta ganup panorang ase ipasomal-somal hita
marbohalhon Hatani Naibata na maronjolan bani tenger ni uhur pakon pangarapan na
manggoluh bani idop ni uhur ni Naibata. Ai do na boi paluahkon hita humbani halojaon pakon
paruntolon mandompakkon haganup masalah ni goluhta.
Hatengeran do hata in anjaha talup jaloon ni ganup jolma na porsaya nini Apostel
Paulus, janah Raja Daud mangkatahon: “Parhanalom ma Jahowa, pagomos anjaha patoguh ma
uhurmu” (Psalm. 27:14). Mararti tenger ni uhur pakon pangarapan na manggoluh ibagas
haporsayaon na toguh, marhitei bohal Hata ni Naibata jumpah hita do gogoh pakon haluahon
na humbani Naibata bani haganup situasi ni goluhta.
Naha, tatap ham tongkin dompak goluh na dob binontasmu pakon ragam ni hajolmaon
pakon paruntolon na dob ibolus ham, patut ma akuhononmu: “Naibata na manggoluh in do na
paluahkon ahu, patorsalah goluhku das bani panorang on.” Janah patut na hupadankon
dompak Tuhanku: Tongtong ma ahu mangarap bani Tuhanku janah hupanalom ma Ia na
patorsahon goluhku janah huhaposi panogu-noguon-Ni.
Tonggo: Ham Tuhan Naibata marhitei Anak-Mu Jesus Kristus, ajari Ham ma ahu marhitei
1 Timoteus 4:10
Tonduy-Mu, ase tongtong huparhanalom janah huhatengerhon Ham do na
patorsahon pakon paluahkon ahu. Amen.
HALELUYA NO. 327:1+4
1. Marpangunsandeian bani Tuhan in,
Puji sai pasangap ma goran-Ni in
Monang halani hata-Ni Tuhan in
Mangarapkon parpadanan in
Sai mangarap
Bani padanni Tuhanta Jesus Kristus
Sai mangarap
Ma hita bai partobusan-Ni in
4. O hasoman anggo sihol ham sonang
Ingat ma padan ni Tuhan in tongtong
Aima jolomanmu tenger uhurmin
Das bani parrohni Tuhan in
Sai mangarap
Bani padanni Tuhanta Jesus Kristus
Sai mangarap
Ma hita bai partobusan-Ni in
PARMAHAN NA MADEAR 21 ΝΟVΕΜBER
ULANG LANG MARBUAH HAM
“Hasomanta pe iguruhon ma mampongkutkon horja na madear, laho mansarihon na porlu
pakeion, ase ulang lang marbuah sidea.”
Titus 3:14
Somal do bani jolma na sohsoh, horjani bahatan ma marangan-angan, janah anggo
martambah hasomanni bahatan ma patubuh-tubuh dousa pakon manopa-nopa sahap na
hurang dear janah ujungni manranai hasoman jolma. Ai do ase ihatahon sada parambilan:
Bahat do jolma lang pala hundul bani sada fakultas domma tammat “SARJANA NONANG.”
Mararti, pangabak pakon sifat na songon on halakni ai ma na hurang panarihononni bani
dirini pakon hasomanni jolma. Janah sebalikni homa, jolma na individualistis, na pitah
mamingkirhon horjani na lang parduli bani hasomanni jolma dihut do homa pangabak na
songon on na so adong panarihonon bani hasoman jolma. Ibagas situasi na dua pahara on ma
marsahap Tuhanta hubanta nini: Guruhon ma mampongkuthon horja na madear na
marbuahkon uhur na manarihon na porlu pakeion hudirinta pakon bani hasoman jolma.
Ibagas na mangguruhon horja na madear, domma iguruhon hita padaohkon humbani
dirinta sifat na manopa-nopa hasedaon, hasamboron dompak hasomanni jolma. Marhitei na
iguruhon hita mambahen horja na madear, domma ipungkah hita mansarihon aha na madear
dompak hasomanta jolma marhitei holong. Ai do ase ihatahon Tuhan Jesus bani ambilan i atas
dolog: Aha sihol bahenon ni halak na madear hubam, ai ma bahen dompak hasomanmu jolma.
Raja Salomo mangkatahon: Marguru ma ho, janah pardiatei, paruhurhon ma goluh ni
porkis na rap mansarihon hasomanni marhitei horja na madear (Podah 6:6-8). Janah Apostel
Paulus mangkatahon: Nasiam sanina, ulang ma marnaloja nasiam mambahen na madear.
Mararti, mangguruhon horja na madear lang iambati janah ibatasi suku, golongan, pangkat
sinadongan pakon tingkatan ni goluh pakon adatta. Anggo sonai, patut bani panorang on
renunghononta janah sungkunhononta dirinta: Aha do na dob huhorjahon na madear ibagas
na pongkut ni uhur na boi marbuahkon na madear na manarihon hasomanku jolma? Antong
parayak hita ma ase adong buah ni hapintoron i bani goluhta mangkorjahon hadameion ase
ulang lang marbuah hita.
Tonggo: Ham Tuhan Naibata, pargogohi Ham ma hanami marhitei Tonduy-Mu, ase dihut
hanami mangkorjahon na madear marbuahkon na hombar hubani harosuh-Mu.
Amen.
HALELUYA NO. 160:1-2
1. Rapkon Tuhan Jesus in
pungkah lahoanmu.
Ningon bani Tuhan in
tong pangguruanmu.
Jesus baen hasomanmin,
puho ampa modom,
dogei ma bokas-Ni in,
Tuhanmin panalom.
2. Ganup sogod ningon do
Jesus diloonmu,
ase itumpaki ho
bai silahoanmu;
Ai arian borngin pe,
sai hasomanan-Ni
dousamin ganupan pe,
sai taluonkon-Ni.
PARMAHAN NA MADEAR 22 NOVEMBER
HAGOLUHAN SISADOKAH NI DOKAHNI
“Na dob talar hagoluhan in, anjaha domma iidah hanami in, gabe isaksihon anjaha ibaritahon
hanami bani nasiam hagoluhan na sadokah ni dokahni in, na dob adong hinan i lobei ni Bapa
in anjaha ipatalar do bannami.”
1 Johannes 1:2
Age ija taridah do tanda-tanda ni hagoluhan. Hayu pakon bunga-bunga martubuhan.
Manuk-manuk pakon lanog na igoran serangga marhabangan. Bagei-bagei ni pinahan pakon
jolma na manggoluh, marsahapi atap manangihon, mardalan atap modom, marhusor atap
jongjong pe. Ganup manggoluh. Jengesni in tene mangidah tanda-tanda ni hagoluhan age ija.
Tapi rombang ibotoh hita do goluh sisonai ai lang dokah. Piga dokah ma sada bunga boi
mangerbang? Sonai age sada manuk-manuk? Atap jolma pe? Anggo domma dong umurmu 40
tahun, tontu maningon iparhirahon ham ma na dob mardalan goluhmu satongah, siotikan.
Goluh i dunia on pondok do.
Domu hubani ayat na binogeita nongkan dapot hita do sada barita pasal goluh na so ra
bois na so ra marujung. Roh do goluh sisadokah ni dokahni on hubanta ibagas diri ni Jesus
Kristus. Marhiteihon-Si iidah do Tuhan Naibata na totap ronsi sadokah ni dokahni. I Nagori
Atas do Jesus rup pakon Naibata, tapi roh do Ia janah talar bani jolma i dunia on. Si Johannes
ma sada na dob mambogei, mangidah janah mananda-Si. Domma ipatugah si Johannes banta
pasal-Si ase itanda janah porsaya hita Bani.
Marhitei na porsaya botul hita bani Jesus Kristus, gabe parsimada do hita bani
hagoluhan na sadokah ni dokahni na binere-Ni. Janah goluhta bani panorang on pe marubah
ma humbani goluh na so marhatontuan gabe goluh na totap janah ia roh pe hamateian lang be
sihabiaran. Ai labah hubani goluh na sintong, na sangap janah na totap pakon Jesus Kristus
mando hamateian ai.
Tonggo: Ham Tuhan Jesus bahen Ham ma ahu gok tarimakasih halani goluh na hujalo i
tanoh on tarlobih halani na dob itanda hanami Ham marhitei haporsayaon.
Tolong Ham ma ahu ase ulang mabiar ahu bani hamateian, halani porsaya do
ahu, na laho rup do ahu pakon Ham i Surga ronsi sadokah ni dokahni. Amen.
HALELUYA NO. 134:1-2
1. Ambit lang Ham rupei hu,
ale Jesus,
jaha daroh-Mu mangkahui ahu,
mintor huja ma ahu na mardousa
marhaporusan?
2. Ai seng be dong na songon Ham,
Tuhanku,
na palunggarhon pusok ni uhurhu;
Sahalak Ham do sipasonang au,
hagoluhanku.
PARMAHAN NA MADEAR 23 NOVEMBER
BAPA NA SENG RA MUBAH
“Haganupan sibere-bere na madear, anjaha haganup silayak-layak na gokan dear, ai ma na roh
hun datas, humbani Bapa ni na lihar; seng ra mubah la anjaha seng dong na golap Bani halani
partukaran.”
Jakobus 1:17
Ra dong banta bapa na bujur na dob mangkaholongi janah manrajai hita. Hotop ma hita
laho janah marbuali pakonsi, janah bagei do ipindo hita hubani. Tapi bani sada-sada panorang
tingki iporluhon hita pangurupion lang dong gunani laho hita hubani bapanta ai, halani lang
ijai ia tudu, atap sanggah sibuk ia, marah, loja atap halani boritan. Atap halani bapanta ai
domma matua janah manurut pandapotta lang boi iarusi be hita. Atap halani domma ia matei,
lang binotoh huja ia laho, janah lang boi hita marsuhutan bani.
Sabujur-bujur ni bapa na i dunia on lang sempurna tapi ra mubah, janah bani ujungni
matei do ia. Tapi adong do sada Bapa na seng ra mubah. Ia ma Bapa na i Nagori Atas. Ipagolpa
do hita, age pe domma itompa panondang na i Nagori Atas, lang ra mubah Ia. Marhitei Naibata
lang adong arian pakon borngin, milas atap borgoh. Lang sipata donok atap daoh Ia humbanta.
Lang anjai tarbuang Ia atap gabe halinoh na daoh. Lang Ia mubah janah lang boi iubah.
Bani ganup panorang boi do ipadonok hita dirinta bani Bapa na i Nagori Atas ai. Lang
adong panorang age sadihari na lang dear hita martonggo Bani. Ia lang ongga mubah. Hum
Bani do ganup harohan ni na madear pakon sibere-bere na lainan. Domma buei iahapkon hita
pasu-pasu-Ni bani goluhta on, bahat ma sihatarimakasihononta. Ganup na dong banta, roh
humbani Bapa na i Nagori Atas na so ra mubah in. Totap do Ia mangkaholongi hita, agepe lang
patut namin, ai galek, miskin janah pardousa do hita. Jadi sagala na binere atap na tinongos ni
Bapa martujuan bani hadearonta. Ai ibotoh hita do, haganup do manumpak hubani na madear
bani sagala na marholong ni uhur bani Naibata (Rom. 8:28). Dear ni in, ai dong Bapa na sonin
banta.
Tonggo: Ham Bapanami na i Nagori Atas, tarimakasih ma bani haganup hinadear pakon
sibere-bere-Mu bannami. Tarimakasih ma Bamu halani na dop ipadankon Ham
na so tadingkonon-Mu janah paturuton-Mu hanami. Tarimakasih ma Bamu, ai
boi do roh hanami Bamu bani ganup panorang. Ipindo hanami on marhitei Jesus
Kristus Tuhannami. Amen.
HALELUYA NO. 480:1+3
1. Bapa, parholong bangku on,
na manramotkon goluhkon.
Age ija pe au tongtong, ijaga Ham.
3. Bapa, ondingi au tongtong.
humbai pangagou na rongom.
Ham hatundalan na sintong, manjaga
au.
PARMAHAN NA MADEAR 24 ΝΟVEMBER
HOLONG DOMPAK NAIΒΑΤΑ
“Ai on do holong ni uhur bani Naibata, anggo idalankon hita Titah-Ni, anjaha seng borat TitahNi
in.”
1 Johannes 5:3
Haganupan na margoran janah na mangakuhon jolma ia maningon do botoh
martarimakasih. Ungkapan na i atas in porlu idingat hita bani goluhta ase boi ididah hita
sonaha do hajongjonganta na margoran “jolma,” tarlobih hita ai ma “halak Kristen.” Bani adat
ni hajolmaon pe, anggo adong do sahalak na lang mambotoh martarimakasih gabe tarpunjung
do ia bani masyarakat, samintolah ma homa bani Naibata?
Pareksa hita ma goluhta ronsi panorang on, adong do iahapkon hita idop ni uhur ni
Naibata banta? Anggo botul-botul hita jujur mambalosi pasti haganup mangkatahon “adong.”
Halani ai anggo sonai do balosta tontu patut ma hita martarimakasih hubani Naibata na dob
manumpaki goluhta tarlobih domma ipaluah hita, domma itobus hita humbani hamagouanta
marhitei anak-Ni Jesus Kristus. Aha do halani ase ipaluah Tuhan hita? Ai ma halani holong-Ni,
lang halani hagogohonta atap pe hapentaranta tapi pitah halani holong do. Tuhanta Jesus
Kristus ra manaron na borat in, marhitei na matei Ia manghopkop hita ai ma halani holong-Ni
mangidah hita jolma. Patut hita martarimakasih hu Bani ai ma marhiteihon na ra hita homa
mangkaholongi Naibata, ai ma marhiteihon na idalankon hita Titah-Ni. Aha do isi ni Titah? Ai
ma harosuhni Naibata. Mandalankon Titah artini mandalankon harosuhni Naibata. Anjaha
seng borat ai, halani aha? Ai ma halani anggo ihorjahon hita Titah na parlobei in ai ma
manghaporsayai Tuhan domma otomatis hita boi manghorjahon Titah na legan ai, ai ma
mangkaholongi Tuhan Naibata, sonai homa mangkaholongi hasoman jolma. Porsaya hubani
Jesus artini marondos, martenger ni uhur hubani Jesus Kristus, artini homa mambahen Jesus
gabe hasomanta ibagas na mangkorjahon Titah in. Jadi anggo Jesus do hasomanta haganup
Titah ni boi idalankon hita.
Halani ai hita na dob ipaluah Tuhan Jesus Kristus, pataridahkon hita ma paboa na
holong do uhurta mangidah Tuhan in, ai ma marhitei na ra hita manghorjahon Titah-Ni; janah
haganup Titah in seng na borat in idalankon anggo porsaya hita, ampa mambahen Tuhanta
gabe hasomanta laho mandalankon ai.
Tonggo: Tuhan, pargogohi Ham ma hanami, ibagas na mangkaholongi Ham, marhitei na
mangkorjahon Titah-Mu. Amen.
HALELUYA NO. 242:1+5
1. Ham Tuhan Jesus, Raja ni ganupan,
tubuh humbai Bapa in;
Haholonganku, sisombahonku,
sahalak Ham do Tuhankin.
5. Jesus Tuhanku, ningon Ham do bangku,
gabe rupeihin tongtong;
‘Ge pe manggoluh, ‘ge pe lao matei,
sai Ham simada au tongtong.
PARMAHAN NA MADAR 25 NOVEMBER
HAMUBAHON NI UHUR
“Ai marosuh do uhur-Hu nani mangidah hamateian ni parjahat, nini Tuhan Jahowa, ai lang
marosuh do uhur-Hu bani parmulak ni parjahat in humbani dalanni ase manggoluh ia?”
Hesekiel 18:23
Hesekiel, in ma sada nabi humbani piga-piga nabi na adong bani Padan Nabasaia. Ipilih
Naibata do ia gabe jabolon-Ni bani panorang ni Raja Joyakin. Rup ampakon Bangsa Israel dihut
do nabi on tarbuang hu habuangan Babel. Bahat do sitaronon ni bangsa ai sanggah i
habuangan. Agepe sonai anggo hatani Naibata maningon do ipadas Nabi Hesekiel. Lang boi ia
taruyun songon Bangsa Israel na dob manundalhon Naibata. Lang boi ia gobir ge pe mara na
roh bani songon duri tatada na manlioti.
Aha do thema ni ambilan ni Nabi Hesekiel bani bangsa na i habuangan ai? In ma
hamubahon ni uhur. Ai age pe marsik bangsa ai i habuangan sedo tinuntun Naibata ai.
Tartaban janah tarbuang sidea halani na so itangihon do Hata ni Naibata. Halani ai, dalan ase
maluah in ma paubahkon uhur. Ai lang marosuh Naibata mangidah hamateian ni parjahat.
Tongon ganup jolma maningon matei do. Halak na bonar age parjahat. Tapi ulang ma
namin hamateian ai roh bani sada-sada halak sanggah hapongkutanni ia manggoluh ibagas
dousa atap lang parduli bani Hata ni Naibata. Anggo sompat ope ibogei hita dilo-dilo ni
Naibata ase paubahkon uhur, ai ma tandani na holong ope atei-Ni banta.
Sadihari do hita paubahkon uhur? Lang pitah sanombas bani parmasukta gabe halak
Kristen. Atap bani panorang na tertentu ija terjadi perubahan na banggal masa bani dirinta.
Tapi paubahkon uhur pamasaonta do ai layur bani ari-ari ni goluh on. Ase tambah ari roh
sintongni pargoluhanta i lobei ni Naibata. Roh dearni ganup, janah lambin gok idalankon hita
hata-Ni, das bani na marujung goluhta.
Tonggo: Ham Bapanami paridop ni uhur. Iharosuhkon Ham do ase ipaubah parjahat
uhurni, sonai age hanami. Ase lambin roh sintongni ilobei-Mu. Urupi Ham ma
hanami marhitei Tonduy Napansing ase tarpaubah hanami uhurnami romban
bani harosuh ni uhur-Mu. Amen.
HALELUYA NO. 300:1-2
1. Paubah ham uhurmu bapa,
porsaya sirahanan!
porsaya bani Jesus bapa
‘se dapot hasonangan!
Banggal do,
banggal holong ni Tuhanta bapa,
mambere hasonangan.
2. Paubah ham uhurmu inang,
‘se dihut ham maluah!
Porsaya bani Jesus, inang
‘se dihut ham martuah!
Banggal do,
banggal ringis ni Tuhanta inang,
bai na so ra marubah.
PARMAHAN NA MADEAR 26 ΝΟVΕMBER
SIHOL JUMPAH HAM NA PININDO NI UHURMU?
“Anggo marianan hanima ibagas Ahu, anjaha marianan hatang-Ku ibagas hanima, Ahu
bannima, jumpah hanima do barang aha pe ipindo uhurnima.”
Johannes 15:7
Porlu tumang uhur ni jolma jumpah na pinindoni. Ipatuduh limbaga on do porlu ni
uhur ai: Pinta-pinta sori mandapot, sonin iparsinta sonin ma dapot. Sihol jumpah ham na
pinindo ni uhurmu? Tuhan Jesus manjanjihon: “Jumpah hanima do barang aha pe ipindo
uhurnima.” Topat do janji ai. Tapi adong persyaratan ase jumpah na jinanjihon-Ni ai, ai ma:
Ningon totap hita marianan ibagas Ia janah hata-Ni ibagas hita.
Anggo Tuhan Jesus sandiri sirsir do tong marianan ibagas hita. Jaminan ni hasirsironNi
ai ma Tonduy Napansing na binere-Ni ai banta. Marhitei na manangar hata ni marhorja
Tonduy ai ibagas hita. Ase anggo sirsir tong uhurta imasuki Hata ni Naibata, totap ope Kristus
marianan ibagas hita. Hansa hita hotop lang marianan ibagas Kristus. Irotap hita pardomuanta
pakon Tuhan Jesus, lang marosuh hita bani Hata-Ni, ihorjahon hita hagigi-Ni. Hinorhon ni ai Ia
pe lang marianan be ibagas hita. Porlu do tong Tuhanta marianan ibagas hita, tapi hita lang ra
iianhon Tuhanta marhitei Hata-Ni ai. Ase targantung banta mando. Ra do Ia tong sadokah ra
hita. Anggo totap hita marianan bani Tuhanta, jumpah hita barang aha pe ipindo uhurta. Lang
mararti haganup pinindonta ibalosi Tuhanta. Ibalosi do pangindoanta anggo domu ai bani
harosuh-Ni bahen hadearonta. Tontu gati tumang iahap hita lang jumpah na pinindoanta, lang
marbalos tonggonta. Mase? Halani pitah iarapkon hita hasil na taridah bani goluh on. Hape
adong siporlunan ai ma ase hot hita bani pangarapan ai. Janah dingat hita homa, gari na porlu
bani goluhta sonari pandeinan do Ia mangatur ai. Ase anggo martonggo hita dearan ma ingat
hita homa hata ni Jesus ai: Lang harosuh-Ku, harosuh-Mu ma na saud.
Hita sonari dohor bani Ujung Tahun Kuria (ari pardingatan bani na dob matei). Ulang
itonggohon hita ase ijalo Naibata Tonduy ni halak na dob matei ai. Ai tonggo na sonai pe seng
tarbalosi-Si.
Tonggo: Pargogohi Ham ahu Tuhan totap marianan ibagas Ham. Janah ajari Ham homa
parombankon pangindoanhu hubani harosuh ni uhur-Mu. Amen.
HALELUYA NO. 207:4
4 . Sai tangihon Ham, o Tuhan,
anggo roh martonggo hanai on Bamu.
Pasu-pasu marlobihan,
Bereonkon-Mu bai na roh hu Bamu.
Hasomani Ham hanami,
ase hot bai parpadanan
Ase ondos hanai on
bai hagoluhan.
PARMAHAN NA MADEAR 27 NOVEMBER
PORSAYA DO HAM DONG PARPUHOON?
“Sedo Naibata ni na matei Ia, Naibata ni na manggoluh do. Kahou tumang do nasiam.”
Markus 12:27
Balos ni Jesus do on ijia hu bani golongan Sadukei sanggah isungkun sidea Ia pasal
parpuhoon humbani na matei. Sidea sandiri sabotulni lang porsaya adong parpuhoon. Halani
ai bani balosni Tuhanta tangkas iidah hita 2 pahara:
1. Itekanhon Jesus age marhitei 2 Musa 3:6 ai na adong do parpuhoon ni na matei. Ijai
ihatahon Naibata: Ahu do Naibata ni si Abraham, si Isak pakon si Jakob. Age pe domma
matei sidea ai tapi tong do pardingat ni Naibata bani na pinilih-Ni ai. Naibata na
manongtong in do manghatahon ai. Tuhan Jesus sandiri manghatahon, manggoluh do
na porsaya bani age pe domma matei ia. Johannes 11:25. Ase hatahononta ma, lang
magou-magou sonin halak na porsaya na dob matei in. Anggo hita ibagas Tuhanta
sadokah goluh on, idingat do hita age pe dob matei hita. Janah papuhoon-Ni do hita use
jaloonta hagoluhan na manongtong ai. Manggoluh barang matei tong do bani Tuhan in
hita. Hataon patotap pangarapanta pasal parpuhoon ai janah padaoh biar dompak
hamateian in. Naibata na papuhohon Tuhan Jesus, na marmuduhon goluhta sonari,
idingat do hita age matei janah papuhoon-Ni songon Anak-Ni in.
2. Halani parpuhoon ai do ase mararti ha-Kristenonta. Anggo lang halani ai seng dong
ubahni hita pakon halak na so porsaya. Dingat hita hata ni Apostel Paulus: Anggo bani
goluh on do hansa hita mangarap bani Kristus, hita ma sisombuhan humbani sagala na
manggoluh. Ase halani parpuhoon hasangapon ai do ase ipaihut-ihut hita Tuhan Jesus
Kristus. Anggo mardingat hita bani sidea na dob parlobei in janah idingat hita homa
parmateita, ingat hita ma homa parpuhoon ni na porsaya. Ihata Jesus do na so
manghaporsayai parpuhoon ai. Igolongkon hubani halak na kahou. Tarmasuk na kahou
ma hita anggo lang porsaya hita adong parpuhoon.
Tonggo: Ham Tuhan Naibata, patotap Ham ma uhurhu bani parpuhoon ni sagala na
porsaya, ase dihut ahu ipapuho hu hasangapon songon Anak-Mu in. Amen.
HALELUYA NO. 71:3
3. Ho panorang parpuhoon,
sonaha nani ahaponkon
ni uhur bai panorangmin?
Seng otik malas ni uhur
bai parontian ni na sambor,
age ganup na sahit in.
O Jesus togu ma,
hanai bai Naibata,
bai na sonang.
O Rajangkin, Bamu ma au,
hu lambung-Mu ma ondos au.
PARMAHAN NA MADEAR 28 NOVEMBER
MANGGOLUH BAI PANDILOON NI TUHAN
“Parlahouhon nasiam ma na talup, domu hubani pandiloon na dob das bani nasiam!”
Epesus 4:1
Ganup do hita mambotoh pasal si Abraham na i goran bapa ni halak na porsaya in. Idilo
Naibata do ia bungkas hun tanoh hatubuhanni misir hubani tanoh na legan ase ijai ia
marianan. Hansi adong perbedaanni na parah tumang ai ma pasal pargoluhan ni si Abraham
na maningon gok pakon hasintongan ampa hapintoron sonai ge na maningon manggoluh ia
gabe halak sipambalosi, na marpangarapan, janah marhaporsayaon hubani Naibata. Haganup
halak Kristen ai ma na dob idilo Tuhan in hubagas Harajaon-Ni i dunia on. Idilo humbani goluh
hasaparion, hagolapan. Goluh na marhabutakon hubani goluh na baru, goluh haliharon, ampa
hasintongan. Ase sipambalosi, na marpangarapan janah na marhaporsayaon hita hubani
Naibata ibagas Jesus Kristus Tuhanta in. Marmasam-masam do parlahou ni jolma bani goluhni
i dunia on. Marondolan bani rosuh-rosuh ni sidea, manggoluh laho mansuhuni sura-surani
sandiri. Marguru bani uhurni do parlahou ni sidea bani goluhni usih songon pinahan na lang
marparmahan atap pe anak ni dayok na lang marindung na maruhur-uhur bai hansa.
Pandiloonni Tuhan in banta pasuhihon janah paleganhon hita hubani pargoluhan ni
dunia on age pe hita marianan i dunia on ope. Ai ma halani dong do patokan banta pasal
sonaha hita suman marparlahou bani goluh on. Ibagas ai ma hita na maningon talar, taridah
suhi janah legan hansi hita marsaor ope pakon bagei-bagei ni jolma na adong i lambungta i
dunia on. Hasadaonta pakon Tuhan ibagas pandiloon-Ni banta ihagoluhkon hita bani parlahou
dompak hasoman jolma i dunia on.
Ase dilo-dilo ni Tuhan in do na itangihon, na ibalosi janah na ihorjahon hita ijai. Holong
ni atei ampa idop ni uhur ni Tuhan do ai banta. Bagei-bagei do na masa ihadapi hita bani
panorang on, bani goluhta siganup ari. Na masa humbani dirinta, na roh humbani keluarganta,
na masa i hutanta, i negaranta ampa i dunia on. Buei humbani na masa in boi parrohkon biar
banta, holsoh ampa pandoleian na boi mambobai hita hu hasedaon, hamagouan ampa
hamateian. Boi do hita maluah humbani haganupan in asal ma hot janah totap hita
marsijoloman bani pandiloon ni Tuhan in banta, asal ma hita manggoluh ibagas dilo-dilo ni
Tuhan marhitei na mambalosi hata ampa mandalankon harosuh ni Tuhan in ibagas
haporsayaon. Ai haluahon ampa hagoluhan do ulih ni ganup halak na ra mambalosi dilo-dilo ni
Tuhan in bani goluhni.
Tonggo: Ham Tuhan Naibata Bapanami. Domma tongon idilo Ham hanami. Halani ai sai
bahen Ham ma hanami boi mangkagoluhkon pandiloon-Mu in bani goluhnami
ari-ari ibagas haporsayaon ase ia manggoluh barang matei pe hanami tongtong
ibagas goran-Mu. Amen.
HALELUYA NO. 503:1-2
1. Gok bai malas ni uhur do au,
mamuji Ham Tuhanku.
Ai ipanalom Ham hape au,
marhorja bai pohon-Mu.
Megah, megah uhurhon,
mangkorjahon parentahMu.
Boi au dirgas nuan on,
Ham do na mamasu-masu.
2. Ham do na boi mambaen au talup,
hatengeran bai horja.
Ase torsa horjangku ganup,
Ham do na mardimata.
Megah, megah uhurhon,
mangkorjahon parentahMu.
Boi au dirgas nuan on,
Ham do na mamasu-masu.
PARMAHAN NA MADEAR 29 NOVEMBER
PASANGAP MA KRISTUS IBAGAS GOLUHMU
“Ai in do huhasiholhon, anjaha mangarap ahu seng anjai tarmela ahu ibagas atap aha pe, tapi
marhasoman hinsah ni uhur, songon na saindokah age sonari, maningon marsangap Kristus
marhitei angkulangku, marhitei goluhku barang parmateihu.”
Pilippi 1:20
Marbagei-bagei do sihol ni uhur ni jolma i tanoh on romban hubani aha na binotohni
ampa aha na adong bani. Sonai do Apostel Paulus bani goluhni. Domma ibotoh janah i
haporsayai Kristus, janah domma marsimada ia bani Kristus Jesus Tuhan in. Halani ai sihol
tumang uhurni ase marsangap Tuhan in ibagas goluhni ge sadihari pe. Sanggah jorgit ge
sanggah boritan pe. Sanggah i rumah ge sanggah tartutup ampa ronsi na matei pe. Ai ma
halani domma tangkas ibotoh si Paulus tarlobih marhitei haporsayaonni, anggo ia domma
marsimada bani Kristus Jesus na dob tarsilang i Dolog Golgata.
Sonai ma sasintongni age hubanta pe. Sihol ma adong siparpala-palaonta, janah na
gabe targetta homa. Domma ibotoh janah i haporsayai hita Jesus Kristus do Tuhan banta janah
domma marsimada hita bani arta na tang siharganan in. Ai ma haluahon ampa hagoluhan na
pinasirsir-Ni, marhitei partobuson ampa panghopkopon-Ni banta. Ia na dob matei tarsilang i
Dolog Golgata manggalangkon daging ampa daroh-Ni bahen tobusta na maluah janah
manggoluh hita marhitei idop ampa holong ni atei-Ni.
Pori manggoluh pe hita maribu-ribu tahun i dunia on janah torus manorus mambahen
na madear bani Tuhanta, daoh humbani sungkup ope na hira humbani hinaharga ni
panghopkopon ni Tuhan Jesus na dob banta bei. Ase anggo iparpala-palai hita janah itargetkon
hita maningon tongtong pasangapkon Tuhan in bai goluh parsatongkinan na i dunia on,
mararti na sonai ai do patut goluh ni halak na dob porsaya janah na dob marsimada bani
Kristus Jesus Tuhan. Na sapatutni ope hansa ai hape. Ai ma ase ihatahon Tuhan Jesus hubanta
homa: ia pori pe domma tarolobkon hita ganup lahoan in, juak-juak na so margagan ope hita.
Marbagei-bagei do na tarbahen hita, anjaha marmasam-masam homa tarlahoi hita
hombar hubani na dong banta, marhitei pasu-pasu ni Tuhanta. Haganupan ai targetkon hita
ma laho marpala-pala ase mangahap janah marmulia Tuhan in ibagas goluhta, songon na
hinatahon ni Apostel Paulus: “Ai pe, atap na mangan atap na minum nasiam atap aha pe
ihorjahon nasiam, bahen nasiam ma haganupan ai pasangapkon Naibata.” Ai do tongon na
patut sibahenonta bani goluhta hubani Jesus Tuhanta in.
Tonggo: Paruhuri janah pargogohi Ham ma hanami Tuhan, mamakeihon goluhnami, ia
ija mangaha pe hanami, gabe hasangapon ampa hamuliaon ni goran-Mu ma ai.
Ibagas Jesus Kristus Tuhannami maidop ma uhur-Mu balosi Ham ma
pangindoannami. Amen.
HALELUYA NO. 251:4
4. Manggoluh ‘ge matei bai Jesus do au, sai Ia haporusankin;
Hata-Ni tumang do na manogu au, hatengeran ni uhur do in.
Sonang do, sonang do, ipasonang tongtong uhurhon.
PARMAHAN NA MADEAR 30 NOVEMBER
BANGGAL ANJAHA HALONGANGAN
“Banggal anjaha halongangan do sagala horja-Mu, Ham Tuhan Naibata sigomgom haganup;
pintor anjaha sintong do sagala dalan-Mu, Ham Raja ni sagala bangsa.”
Pangungkabon 15: 3
Na so ongga ididah mata janah na so ongga itangar pinggol ope, ai do ipataridahkon
janah ipabogeihon Tuhan in bani si Johannes ibagas Pangungkabon on. Tarhatahon parlobei ni
na masa magira ai ope on tene, roh ope sibanggalhonon ni on, na sihol pataridahonkon ni
Tuhan Jesus in bani na porsaya Bani.
“Banggal anjaha halongangan” nini doding ni na dob monang i Nagori Atas itangar si
Johannes. On ma na songon puncak ni Pangungkabon ni si Johannes, na mangidah
habanggalan pakon halongangan na binahen in. Magou ma homa age sangsi ni uhur pori
adong hinan, anggo domma naidah hinabanggal pakon hinajombut ni na binahen ni Tuhan in.
Pangakuan ni na dob monang in do on, na so boi larangan ni atap ise pe sidea lao
mandodingkon ai. Porlu pareksa hita haporsayaonta age bani panorang on, atap domma dihut
hita sintong-sintong mangakuhon hinabanggal ni horja ni Tuhanta i tongah-tongah atap ibagas
dirinta sandiri.
Halongangan do iahapkon ham horja ni Tuhan in na manogu ham das hubani na
mangkaporsayai Tuhan Jesus? Halongangan do iahapkon hita na das hita hubani na manjalo
pandidion, Horja Banggal Napansing ronsi na boi hita manangar Hata-Ni? Halak na porsaya in
ihira do na banggal janah halongangan horja ni Tuhanta anggo tambah bilangan ni na porsaya,
na mananda haluahon na binobahon ni Tuhan in marhitei ambilan na madear in age panorang
on. Halani ai lang marnaloja atap marnabosan na porsaya in mamuji janah mandodingkon
pambahenan ni Tuhan in!
Das ma homa hita nuan bani ujung ni tahun parkuriaon, lao masukonta ma minggu
Advent patut bilanganta sagala pambahenan ni Tuhanta hubanta sandiri, ase ididah hita
habanggalon ni horjani Tuhanta, janah ase botohonta buei ni halongangan na binahen ni
Tuhanta ibagas goluhta on. Marhiteihon ni ai ma boi hita mandodingkon hinabanggal pakon
halongangan na binahen ni Tuhanta, tanda ni tarimakasihta.
Tonggo: Banggal anjaha halongangan do sagala horja-Mu Tuhan, age das hubani
panorang on, ai dihut do hanami homa itogu janah ipaluah Ham. Tarimakasih
ma Bamu Tuhan! Amen.
HALELUYA NO. 189:6-7
6. Sonin pe na madear in,
na jenges in i tanoh in,
sonaha ma magira
na madear in i Surga in?
In ma pingkiri, uhurhin,
hujin ma ho palongkot,
hujin ma ho palongkot.
7. In ma tongon, sai sol hujin
pintorhononku tonduyhin,
hu lobei ni Tuhanku.
ljin mandoding-doding au,
ijin marhasangapon au
mamuji Naibatangku,
mamuji Naibatangku.
