PARMAHAN NA MADEAR 1 OKTOBER
PASTI DAPOTAN HALUAHON
“Halani dapot nasiam tujuan ni haporsayaon nasiam, ai ma haluahon ni tonduy nasiam.”
1 Petrus 1:9
Bani sada panorang mardalan do au hu Medan naik kareta api. I lambungku sada inang,
ilobeihu dua Bapa. Songon na gati tarjadi, age pe lang marsitandaan, ipungkah hanami ma
parsahapan. Dob honsi marbuali, piga-piga dokah, na botoh ma paboa hatolusi sidea, aima
halak Kristen. Sada bapa manungkun: Ai pasti do dapotan haluahon halak na porsaya bani
Jesus Kristus? Jadi ningku ma dompak bapa ai: Ham sandiri ma lobei mambalosi sungkunsungkunmu
ai! Nini: Anggo manurut pandapotku, lang na botoh atap na pasti do dapotan
haluahon, dapotni ijai ma, halani songon au, bahat ape dousangku.
Na dua halak nari ibagas kereta api, sonai do homa pandapotni. Anjaha anggo na
sungkun buei halak Kristen, bahat do na marpandapot sonai. Anggo ukuran atap syarat-syarat
haluahon ai ma pambahenan na madear gabe ragu do hita, gariada lang saud dapotan. Halani
sintong do pardousa hita haganup.
Tapi haluahon ai sedo horjanta, horja ni Tuhan Jesus bani hayu parsilang i Golgata,
marhiteihon hamateian-Ni. Anjaha aha na ihorjahon Tuhan Jesus sempurna do, lang pala be
hita ragu. Na porlu ai ma porsaya. Porsaya do ham paboa Jesus do na paluahkon ham,
manobus ham, mangkorjahon haluahon ai bamu? Anggo porsaya do ham, pasti dapotan
haluahon. Halani ai hata ni Naibata sadari on: Dapot nasiam tujuan ni haporsayaon nasiam, ai
ma haluahon ni tonduy nasiam.
Tonggo: Ham Naibata ibagas Jesus Kristus, tarima kasih ma Bamu, halani domma hape
ihorjahon Ham sandiri haluahonnami. Sai ulang be hanami ragu-ragu, tapi
porsaya ma, ai Ham do haluahon ni tonduynami. Amen.
HALELUYA NO. 142:4
4. Haporsayai ma Hata in, Age gok dousa uhurmin,
ai in do haluahon. maluah do bahenon-Niin.
Arapkon Tuhan Jesus in, Tongon, tongon,
Daroh-Ni in ma jolom. maluah baenon-Niin.
PARMAHAN NA MADEAR 2 OKTOBER
MANGGOLUH BANI NAIBATA
“Sonai ma hira nasiam diri nasiam: Matei bani dousa, tapi manggoluh bani Naibata ibagas
Kristus Jesus.”
Rom 6:11
Dob na tangar ayat na i atas in, mintor adong do soal ibagas uhur diri: Sonaha do na
matei ibagas dousa? Dousa ai ma sada hal na mambahen jolma hona uhum. Pardong ni dousa
ai ma marhitei panlanggaron bani Titah ampa Hata ni Naibata, halani ai roh ma uhuman
humbani Naibata, ai ma hamateian sadokah ni dokahni.
Sonaha ma dalan ase maluah hunjai? Ihatahon use bani kalimat na paduahon bani ayat
na i atas in: “Tapi manggoluh bani Naibata ibagas Kristus Jesus.” Ase boi hita maluah humbani
uhuman ai, ra ma hita rap matei pakon Tuhan Jesus ibagas dousanta. Akuhon hita ma ibagas
uhurta, halani dousangku do ase itaron Jesus hamateian ai, ase dihut au marhapansingon
halani daroh-Ni na pansing in.
Ai Tuhanta seng dong dousa-Ni, pansing do Ia. Tapi mase manaron Ia songon
pardousa? Ai ma halani holong ni atei-Ni hubani na sihol maluah humbani dousa. Halani ai do
ase ihatahon humbani hayu parsilang: Ham Bapa sasap Ham ma dousa ni sidea ai, ai lang
ibotoh sidea na binahen ni in. Sonai homa bani Pandidion Napansing ai, marhiteihon
pandidion ai ihira hita ma dirinta matei ibagas dousa tapi salpu ai margoluh na baru ma hita
ibagas goran ni Kristus Jesus. Tapi adong do persyaratanni: Ulang be inunut mardousa, tapi
ihagoluhkon ma panghopkopon ni Tuhan Jesus, ai pe ase boi manggoluh bani Naibata.
Manggoluh bani Naibata ai ma sijalo idop ni uhur ibagas goran ni Kristus Jesus.
Tonggo: Ham Tuhan Naibata, tarimakasih ma Bamu halani ibere Ham do goluh na baru
bannami, marhitei na ipamatei Ham hanami ibagas dousa, tapi ipagoluh Ham
hanami ibagas Kristus Jesus. Amen.
HALELUYA NO. 230:1-2
1. Sai ijalo Jesus in 2. Idop ni uhur-Ni in
do pardousa na tariluh. pinarbagah ni Hata-Ni,
Ambilankon Hata in Ampa hagoluhan in
bai ganup halak na kahou. sadokah i lambung-Ni.
Ase haganup na roh Haganupan na roh in
ipagoluh Jesus do. ipagoluh Jesus in.
PARMAHAN NA MADEAR 3 OKTOBER
URASONKU DO SIDEA
“Urason-Ku do sidea humbani haganup hajahaton ni sidea, na binahen ni sidea dompak Ahu,
anjaha sasapon-Ku do haganup panlanggaron ni sidea ampa panlawanon ni sidea na dompak
Ahu.”
Jeremia 33:8
Malas do uhur manangar hata ni Naibata, ai ma songon ayat na i atas in. Tapi ise na
botul marmalas ni uhur humbani na manangar ai? Ai ma na dob manandai hajahatonni, na
dob mangidah bahatni panlanggaronni, anjaha siholan ia bani hatuahon gabe marubah
humbani hajahatonni ai
Bani sada huta adong ma sada halak na marbaju silopak, anjaha i sangkotkon do baju
ai. Anggo laho borhat ia hu tiga ibuat ma baju ai humbani sangkotan ai, janah dob mulak ia
isangkotkon use i sangkotanni songon na biasa. Sonai ma tong somal ibahen. Dear do tong
ididah rupani, lang sadar ia irumah ai marhullot do tong timus ni apuy tiap-tiap marapi. Dobni
longkot ma timus ni apuy ai bani baju ai nanget-nanget, gabe roh gergerni ma baju ai. Bani
sada panorang laho ma ia hubani sada tukang dobi iarahkon hasomanni, gabe iidah ma ijai na
songon kaen ni bajuni ai, lopak tumang rupani. Tarsonggot ma ia, nini ibagas uhurni, na dob
tapparapuyon do hape bajungkon. Pusok ma uhurni, ai lang mampan be sabun hunjai. Dobni
maila ma ia mamakei bajuni ai anggo laho hu tiga atap anggo ididah hasoman ia mamakei baju
ai.
Domma ihatahon Naibata “Urason-Ku do sidea,” tapi anggo lang na idah aha do
siurason-Ni ai humbandiri, lang marguna hata ai bandiri. Tapi anggo gati roh diri hubani ianan
na mapansing, hu parmingguan, partonggoan atap partumpuan ni halak Kristen, ra na idah ma
habutakon pakon hajahaton diri. Dobni ra ma hita ipapasing hata pakon idop ni uhur Jahowa
marhitei Jesus Kristus, ase marhapansingon hita.
Tonggo: Ham Tuhan Naibata tarimakasih ma isombahkon hanami hu Bamu, halani
iparsinta uhur-Mu do sihol mangurasi ampa papansingkon hanami humbani
hajahatonnami. Pargogohi Ham ma hanami laho mangkagoluhkon pangurasionMu
ai. Amen.
HALELUYA NO. 149:1-2
1. Ham Sipagoluh au 2. Gogoh ni daroh in,
parayak Ham au on. patorang bangku on!
Sai ulang Ham mandaoh Tonduy, Pargoluh in,
humbagas uhurhon. manogu au tongtong!
Roh Sipagoluh roh tongon, Roh Sipagoluh, roh tongon,
baen Ham au anak-Mu tongon; baen Ham au anak-Mu tongon;
Bani daroh-Mu usah au, Bani daroh-Mu usah au,
putih songon bunga ma au. putih songon bunga ma au.
Putih tongon, putih tongon, Putih tongon, putih tongon,
bani daroh-Mu usah au, bani daroh-Mu usah au,
putih songon bunga ma au. putih songon bunga ma au.
PARMAHAN NA MADEAR 4 OKTOBER
DOMMA IPAPANSING
“Anjaha sisonai ai do nasiam deba lobei. Tapi domma nasiam iburihi, domma ipapansing,
domma ipintori marhitei goran ni Tuhan Jesus Kristus ampa marhitei Tonduy ni Naibata.”
1 Korint 6:11
I lobei ni ayat on buei do igorani Apostel Paulus parlahou ni na so porsaya ai ma
habutakon ni uhur, parbangkison, hasipajuh begu-beguon, paruhur haut, parmabukon,
panipuon pakon na manrisai na legan. Anjaha ihatahon Apostel ai: Seng sitean Harajaon ni
Naibata halak sisonai ai. Tapi ihatahon use bani ayatta on: Sisonai do nasiam ijia deba. Anggo
ihatahon sonai maksudni ai kuria ai na roh do ai humbani na so mananda Naibata. Usih do ai
songon hita na i Simalungun, Kristen na roh humbani parbegu.
Aha do sibahenon ase boi maluah humbani parlahou na so madear na nigoran nongkan
ai? Humbani dirinta lang tarpaluah hita dirinta, tapi domma roh Kristus Jesus hu dunia on,
patalarhon habutakonta ai, ipaidahkon hubanta dousanta ai, gabe ididah hita ma jangin ni
dousa ai. Anggo domma ididah hita jangin ni dousa ai pakon kejamni, roh ma hita hubani
Tuhan Jesus ibagas unduk ni uhur mangakuhon: Pardousa do au. Dob ai boi ma ahapkononta,
domma iburihi daroh-Ni na pansing ai hita. Domma ipapansing hita humbani haganup
habutakonta ampa hajahatonta. Dob ai ipasorap ma Tonduy-Ni hubanta, ase totap hita
marhapansingon, anjaha magigi ma hita mangulaki parlahou sapari, horja hagolapan na so
harosuh ni Naibata.
Ai marhite Tonduy Napansing do hansa ase boi ihorjahon jolma hapansingon na
hinarosuhkon ni Naibata, anjaha anggo tarhorjahon hita ai bani goluhta on idop ni uhur ni
Naibata do ai hubanta. Ai ma hataridahanni na dob ipapansing hita marhitei idop ni uhur-Ni
ibagas Jesus Kristus.
Tonggo: Ham Tuhan Jesus, paidahkon Ham ma humbannami sagala horja na lepak na
dob ibahen hanami, ase marhitei gogoh na hum Bamu boi itadingkon hanami in.
Paahapkon Ham ma bannami na dob ipapansing Ham do hanami humbani
dousanami. Amen.
HALELUYA NO. 130:4-5
4. Domma mogap ganup dousanta 5. Halani ai unobkononku
bai darohni Tuhanta in. do au bai paridian in.
Ai anggo porsaya do hita Hupasasapkon ma dousangku
seng bulih hona uhum in. bai Jesus Sipagoluh in.
Ibaen hata ni daroh in Anggo manolsol diri au
na mangkahui jolma in. bai Jesuskin tongtong au lao.
PARMAHAN NA MADEAR 5 OKTOBER
HUAJARI PE HO
“Huajari anjaha Hupodahi pe ho pasal dalan sidalananmu, Huparmaloi anjaha iiring-iring
pangkawah-Ku pe ho.”
Psalmen 32:8
Usih do songon na mardalan na madaoh pardalanan ni goluhta i tanoh on, sipata ra do
songon na ngayotan, sipata ra do salah jalan, lepak sirpang na dalani pakon na legan. Bani
panorang sisonai ai homa hotop buei tenaga sukarela menjadi guru pangajari bandiri, tapi isi
ni pangajaran ni ai, lang marisi haluahon. Lang dong ijai hatuahon ni na niajaranni ai. Anggo
sonai ise do panungkunan, anggo porini dong na lepak atap paruntolon i tongah dalan, bani
goluh on? Porlu lobei ingatonta, laho huja do hita on? Halani anggo laho hu juma do diri, na
mambotoh soal juma do na sungkun, ase dapot balos na sintong diri pasal ai. Sonai ma homa
anggo laho hu surga do diri, tontu hata ni Naibata do panungkunan pasal ai. Hata ni Naibata na
dob ginuruhon, atap na dob tinangar, dob na balosi pe ai, na botoh na iajari Naibata diri bani
sidalanan ari-ari.
Anjaha anggo lang dong na mahol ibagas goluh on, sipata lang na ahapkon pangiringiring
ni pangkawah ni Naibata hubanta. Tapi ulang ma hita mambahen mahol sidalananta.
Tapi anggo na roh hundarat do sitarononta ai pos ma uhurta Naibata do manramotkon hita ijai.
Bani sada kota na ramei dong ma ijai sirpang opat. Dalan na banggal do ai, halani ai
buei do ijai na mamontas tarlobih ma ai motor pakon na legan. Roh ma sada halak na so ongga
mamontas hunjai, gabe gobir ma ia, halani seksuk ni na marsilaosan bani sirpang ai. Tapi
ikawahkon ma hu pinggir ni dalan ai, ididah ma ijai tolu halak Polisi lalu lintas. Dob ididah ai
tenang ma ia, ai dong do hape na manramotkon au nini uhurni. Sonai do hita na i dunia on,
mardalan bani sirpang na bolag anjaha buei do ijai na masa. Tapi pos ma uhurta dong do na
manramotkon hita ai ma Naibata Bapa pakon Naibata Anak ampa Tonduy Napansing.
Tonggo: Ham Tuhan Naibata Bapa pakon Tuhan Jesus ampa Tonduy Napansing, ajari
Ham ma hanami mandalani goluhnami ari- ari ase das hanami hu Bamu. Amen.
HALELUYA NO. 48:1-2
1. Naibata hasomanmin, 2. Naibata hasomanmin!
lao mangkorjahon horjamu. Anggo rapkon Naibata do,
Ia do pangajamanmu, seng tarbahen ho be kahou,
sai patoruh uhurmin. sai torang do langkahmin.
Naibata hasomanmin! Naibata hasomanmin!
Naibata hasomanmin! Naibata hasomanmin!
PARMAHAN NA MADEAR 6 OKTOBER
PARJUANGAN
“Marsijoloman bani hata hagoluhan in, bahen puji-pujian bangku bani ari ni Kristus, paboa na
so soya parlumbaonku anjaha sedo na so marguna halojaonku.”
Pilippi 2:16
Sahali sanggah marlajar hanami i luar negeri, na jalo do surat humbani keluarga i
Indonesia on mangkatahon sonon: “…. age pe sonai pabulat ham ma uhurmu, torus ma
berjuang, sabou do sitarononnami na daoh humbamu martahun-tahun asal ma sukses
studimu.” Tertegun do diri mambasa ai, apalagi mambayangkon sonaha situasi ni keluarga na
daoh humbani bapa.
Usih hujai do homa boi idahonta bani teksta on, ai ma pangindoan pakon pangarapan
ni si Paulus bani kuria Pilippi ai. Lang soya sitarononni, pardakdak, iarsik-arsik, tartutup
pakon na legan, anggo sirsir do kuria ai manghagoluhkon Hata ni Naibata na dob ipadas bani
sidea. Tontu boi hatahononta, lobih sonai do Tuhanta homa asal ma sirsir na hinopkopni in
manghagoluhkon haluahonni.
Teks on ai ma sada bagian humbani ojur-ojur ni si Paulus hubani Kuria Pilippi ase hot
sidea mengkagoluhkon ha-Kristenonni. Ai ma marhitei parlahou na pitah, ulang
marsipakulah-kulah, ase totap marsinondang itongah-tongah ni dunia na golap ai, janah na
gabe bohal bani sidea mandalankon ai, ai ma marsijoloman bani Hata ni Naibata! Anggo isobut
marsijoloman, tontu lang be passip tumang ai, tapi domma pataridahkon “Keaktipan” ibagas
na manjolom Hata ni Naibata. Misalni, anggo inaiki hita sada kenderaan na doras pardalanni,
ningon do poltik panjolomta ase ulang madabuh hita. Atap sada halak perenang na mamakei
pelampung ningon do hot panjolomni, ase ulang talu atap harom ia.
Sonai do homa kuria ni Tuhanta ningon poltik marsijoloman bani Hata ni Naibata ase
boi marsaksi i dunia on. Ningon marsinondang sidea i tongah-tongah ni dunia na golap on!
Anggo boi ma sonai, gabe malas ni uhur ampa puji-pujian do ai bani si Paulus na pala manaron
halani sidea. Tontu lobih sonai ma age Tuhanta na pala manaron, matei manghopkop hita.
Lang soya sitaronon-Ni, janah gabe malas ni uhur do ai anggo sirsir hita
mangkagoluhkon pakon manaksihon Hata-Ni bani ganup situasinta.
Tonggo: Hata-Mu ma Tuhan sijoloman bennami mangkagoluhkon haluahon in, ase ulang
soya sitaronon-Mu manghopkop hanami. Amen.
HALELUYA NO. 205:4+6
4. Hata hagoluhan do nuan 6. In nuan onjolan na totap
iboan Parambilan in. manahan sadokahni in.
Na lampot tangaron, in do In hajongjonganku,
iberehkon bai uhurta in. in pangajamanku hagoluhankin.
Ipodahi hita on Sai totap ma gogohkin
ihatahon bei do hita mangirikkon bai Hata-Ni,
paubah uhurta. lao pasaud rosuh-Ni.
PARMAHAN NA MADEAR 7 OKTOBER
HALUAHON PAKON PANDILOON
“Ai ipaluah anjaha idilo do hita marhitei pandiloon na mapansing, sedo halani pambahenanta,
tapi mangihutkon sura-sura ampa idop ni uhur-Ni do, na binere-Ni banta ibagas Kristus Jesus,
humbani mulani nari.”
2 Timoteus 1:9
Hamerdekaon pakon pandiloon ai ma dua pahara na lang tarsirang bani ganup warga
negara ni sada-sada bangsa. Na so merdeka tardilo do, laho ma mardekahon negarani, tapi na
dop merdeka pe torus do manramotkon negarani. Janah on do siporlunan, tardilo do laho
mewujudkon isi atap cita-cita ni kemerdekaan ai, ai ma kehidupan na adil janah makmur.
Ibagas Harajaon ni Naibata pe hal on do homa na porlu. Haluahon pakon pandiloon
lang tarpisah ai humbani goluh ni na porsaya in. Songon na tangkas iondolhon si Paulus
hubani si Timoteus bani teks on. Peristiwa na banggal anjaha bersejarah do haluahon ai,
bahkan idop ni Naibata do ai bani jolma. Halani ai patut hargahononta ai. Janah na dob
ipaluah, tardilo do ase aktip mangidangi, marsaksi ibagas kuria in.
Si Timoteus ai ma juak-juak ni Naibata na mangidangi i kuria-kuria i Asia na etek pakon
sekitarni. Na poso-poso ia, sada halak na bujur anjaha na ringgas, susian hinaholongan ni si
Paulus. Tapi halani buei ni persoalan-persoalan i kuria in, sonai homa bani panorang ai daoh
do ia humbani si Paulus gabe galek do ia ibagas pengidangionni. Halani ai ipagolpa si Paulus
do ai pasal haluahon na ilayak-layakkon Naibata, tarlobih bani pandiloon in. Anggo idingat
anjaha ihagoluhkon si Timoteus do ai, margogoh do ia mandompakkon haganup na masa ai.
On do homa ipindo hata on age humbanta. Marhitei na masa bani goluhta, hotop do
hita lupa bani haluahonta. Hotop do lang ihargahon hita haluahon in anjaha hotop do hita lupa
bani idop ni uhur ni Naibata na paluahkon hita. Lobih hunjai homa, hita na dob ipaluah tardilo
do homa laho pasaudkon isi ni haluahon ai. Tardilo laho mangidangi ase dihut halak na legan
manjalo haluahon ai. Janah haluahon pakon pandiloon ai idop ni uhur ni Naibata do ai bani
jolma pardousa in. Pandiloon na mapansing do ai janah ai do sura-sura ni Naibata, ase ganup
na dob ipaluah in sirsir mandalankon pandiloon in ibagas pangidangion, hasaksian pakon
goluhni. Ase sungkun-sungkun hubanta, sonaha ma hasirsironta mandalankon dilo-dilo ni
Naibata tanda ni na ipaluah hita?
Tonggo: Tongtong ma paahapkon Ham bennami o Tuhan, haluahon na dob binere-Mu in,
anjaha pargogohi Ham ma hanami mandalankon dilo-dilo-Mu laho pasaudkon
rosuh-Mu. Amen.
HALELUYA NO. 494:1+3
1. Roh ma ham idilo Jesus, 3. Sai tangihon ma Hata-Ni,
bani pesta malas uhur, in ma baen goluh-ni tonduy
ipasirsir do banta pargoluhon. Ase ulang jiris itongah dalan,
sipanganon sonai ‘ge parhiouon. lanjar himong manrarat gabe tonjan.
Roh ma ham idilo Jesus. sai tangihon ma hata ni.
PARMAHAN NA MADEAR 8 OKTOBER
TOTAP IBAGAS HOLONG NI KRISTUS
“Ise manirang hita humbani holong ni uhur ni Kristus? Hamarsikon do atap hasosakan,
parburuon do atap lohei, hatalanjangon do atap mara atap podang do?”
Rom 8:35
Bani ganup panorang iperhadapkon do jolma bani pilihan antara na madear pakon na
masambor, na jenges pakon na lang jenges, na pintor pakon na so pintor, na positip pakon na
negatip. Janah lang pitah ai, na dua hal na iatas in, hotop gabe dua kekuatan na saling
bertentangan anjaha marusaha manarik jolma in hubani pihakni bei.
Ibagas ha-Kristenon pe, iperhadapkon do hita bani pilihan antara na madear pakon na
masambor, rosuh ni Naibata pakon rosuh ni dunia on Tarlobih bani situasi Jemaat Rom, aktuil
botul do masalah on. Songon na icatat ahli-ahli sejarah, bani panorang ni Kaisar Nero pakon
Domitianus mamarentah ijai, buei tumang sitaronon ni halak Kristen ibagas pardagingon
pakon partonduyon. Buei halak Kristen na korban halani haporsayaonni, janah adong do homa
na murtad na so tahan bani sitaronon ai. “Gabe Kristen bani panorang ai.” nini ahli sejarah
“ningon barani mempertaruhkan hosah. Pangarsik-arsikon, pangayak-ayakon, tekanantekanan
das hubani pamunuhon ialami halak Kristen in, tapi age pe sonai lang tarambati
dunia on pardalan ni Harajaon ni Naibata. Sintong ma hata ni Bapak Gereja mula-mula ai:
“Darah orang martir adalah benih dari Gereja.”
“Ise manirang hita humbani holong ni Kristus?” nini si Paulus, mararti lang pitah
sungkun-sungkun, sekaligus gabe pernyataan. Na so hasirangan be na porsaya in hunjai. Age
pe marhitei hamarsikon, hasosakan, lohei, hatalanjangan pakon podang. Boi sonai halani na
porsaya in domma gok marondos bani Tuhanta janah mangahapkon arganan do Jesus ase
haganup na adongi tanoh on. Janah Kristus na dob monang in do na gabe jaminan untuk ai.
Sungkun-sungkun sonari banta, sadar do hita bani ganup ancaman na sihol parsedahon
haporsayaonta? Sintong do na lang tarsilang na masa i tanoh on be pardomuanta pakon Tuhan
in? Bani ganup panorang ni goluhta ise do na monang, sura-sura ni Naibata do atap sura-sura
ni dunia on?
Tonggo: Pargogohi Ham ma hanami Tuhan mangkamonangkon rasuh-Mu i dunia on.
Tonduy-Mu ma pasaudkon in bani goluhnami, ai holong-Mu do na totap ronsi
sadokah ni dokahni. Amen.
HALELUYA NO. 102:3
3 Atap aha pe na masa, Ai Sadokah au manggoluh
malas uhur, pusok pe, ‘ge dob bois bohalhon
Jolomanku na mangharga Ningon Ham, o Sipagoluh.
na marholong atei pe; Pujionku sai tongtong
PAMBAHENAN NI NAIΒΑΤΑ
PARMAHAN NA MADEAR 9 OKTOBER
“Anjaha on do Titah-Ni, ase porsaya hita bani goran ni Anak-Ni Jesus Kristus, anjaha
marsihaholongan hita, songon na dob tinonahkon-Ni ai banta.”
Sada goran ibagas goluh ari-ari banggal do artini, anggo itanda hita goran ni sada halak,
bahat pasalni na boi iarusi hita. Goran ai patandahon hubanta, marga aha ia. Goran ni ai lang
be goran na asing banta.
Sanggah idilo Naibata si Musa i halimisan laho paluahkon bangsa-Ni hun Masir,
isungkun si Musa ma goran-Ni. Jadi ibalosi Naibata: “AHU ADONG na AHU ADONG.” (2 Musa 3:
14) Ipatandahon ma diri-Ni marhitei halongangan ai; maluah ma bangsa-Ni. Apostel Johannes
mandilohon hubanta, ase porsaya hita bani goran ni Anak ni Naibata, ai ma Jesus Kristus.
Humbani goran-Ni on domma ibotoh hita, parholong atei do Ia janah halayakon do hadirionNi.
Maridop ni uhur do Naibata mangidah pambahenan ni jolma na so ra mulak hu Bani.
Janah isuruh do Anak-Ni in hu dunia on, mambahen hubungan use hubani jolma manisia.
Panaronon, hamateian pakon parpuhoon-Ni ai ma hadirion pangungkabon ni Naibata. Janah
domma ibotoh hita, Naibata ni Naibata na layak in do ompungan ni hita jolma manisia. Tapi
pambahenan ni Naibata na layak in manuntut sada balos hubanta. Ipangindo do ase ipatalar
hita holong ni atei-Ni ai bani goluhta ganup ari, janah ase manggoluh hita mardomu hubani na
dob jinalonta hum-Bani: “Marsihaholongan ma hita!” Urah iluarhon, tapi borat idalankon bani
situasinta bei. Tangkas ibotoh hita, paboa hotop iparnalang hita goran ni Naibata, gabe sangsi
ma hasoman jolma mangidah hita, ai lang be sadalan hatanta pakon pambahenanta
Paruhurhon hita ma holong ni atei ni Naibata sadari on, ai ma marhitei na hinatahon ni
Apostel Paulus bani 1 Korint 13: “Na sabar do haholongon in anjaha basar, seng subil
haholongan in, seng mangunsagah….” Pakon pondok: Ipindahi do tongtong na madear bani
hasoman jolma!
Marhitei ayat sadari on iarahkon Naibata do hita use, ase ganup ari mardingat hita bani
pambahenan-Ni ai dompak hita jolma. Ai hunjai do ijalo hita gogoh pakon pangurupion
mambalosi Titah-Ni ai.
Tonggo: Ham Bapanami, pabagas Ham ma pangarusion pasal pambahenan-Mu dompak
hanami jolma bani uhurnami marsada-sada, ase lambin tangkas itandai hanami
goran-Mu na pinatalar-Mu marhitei Anak-Mu Jesus. Ambukkon Ham ma
humbagas uhurnami ganup na so mardomu hubani idop ni uhur-Mu, ase gabe
parhiteian bani holong ni atei-Mu hanami dompak hasomannami sadarion.
Amen.
HALELUYA NO. 126:4-5
4 O Tuhan, sai na puji ma goran-Mu 5. Jahowa, sai pasabou Ham uhurhu,
ai ipagoluh Ham do hanai on! mangkamalashon na binahen-Mu.
Tandaon nami ma pambahenan-Mu Ajari au, patorang Ham langkahku,
dob ipalihar Ham panonggor on. lao mangayaki Ham hu surga-Mu.
O Naibata, holong ma uhur-Mu, Sai ulang lopas Ham be kahou au,
manogu hanai na ngalutan on. pasorap Tonduy-Mu bai uhurhon.
Holong ma atei-Mu bannami on, Mangiring-iring au i tanoh on,
‘se ondos hu Bamu bahenon-Mu. ronsi na ondos au hu lambung-Mu.
1 Johannes 3:2
PARMAHAN NA MADEAR 10 OKTOBER
HINSAH NI UHUR
“Ai pe, ulang ma ambukkon nasiam hinsah ni uhurnasiam, ai banggal do upah balas ni in!”
Heber 10:35
Bahat keluarga na marsitaronon halani ai lang adong be hinsah ni uhur bani sidea laho
marsiarusan. Bapa pakon inang kecewa mangidah niombahni hotop mangindahi dalan sandiri
do sidea. Kecewa homa niombahni, halani na so sirsir orangtuani ai mambalosi pangindoanni.
Pangkorhonni ai roh dokahni maseda hubungan ni sidea, jadi magou ma hinsah ni uhur.
Marsibuat dalanni bei ma sidea. Sasintongni humbani goluh siganup ari iidah hita do
hinaharga ni hinsah ni uhur laho pajongjongkon parsaoran na totap.
Hubani halak Kristen na i tongah dalan laho manuju tujuan na pinarbagah ni Naibata
ihatahon panuratni Surat Heber do golpa-golpa on: “Ulang ma ambungkon nasiam hinsah ni
uhurnasiam!”
Hinan domma ipataridahkon Naibata holong ni atei -Ni hubani Bangsa Israel, Ia do
mardalan i lobei ni sidea, arian marhitei hombun na jongjong mambobahon sidea i dalan ai,
borngin marhitei apuy na jongjong bahen suluh bani sidea. Tapi age pe bahat tanda ni idop ni
uhur ni Naibata na dob ijalo sidea, urah galek sidea manghaporsayai Hata-Ni ai janah magou
homa hinsah ni uhur. Mangkawah sidea bani sitaronon hansa, janah daoh use Naibata
iahapkon sidea.
Humbani pardalanan ni bangsa Israel iidah hita halojaon hinorhon ni na so marhinsah
ni uhur dompak Naibata. Tapi tarimakasih ma, seng marnaloja Naibata atap ngayotan
pataridahkon holong ni atei-Ni dompak sidea! Tongtong marhinsah ni uhur do Ia laho
pabagashon haporsayaon ni sidea.
Das bani panorang on totap do idop ni uhur ni Naibata. Halani ai atap aha pe na masa,
poltik ma jolom hita haporsayaon na dob ondos banta. Martuah do halak na mambahen Jesus
arihanni.
Tonggo: Tuhan Naibata, itandai Ham do hanami. Hotop usih hanami songon arung-arung
na meol-eol do ibahen pangombus ni logou. Paingat Ham ma hanami bani
holong ni atei-Mu na banggal in, ase hinsah uhurnami, ai Ham do simada
hanami. Amen.
HALELUYA NO. 207:3-4
3 Sai martuah ganup hita, 4. Sai tangihon Ham, o Tuhan,
na mambahen Jesus arihanni in. anggo roh martonggo hanai on Bamu
Ambit sai tongtong ra hita, Pasu-pasu marlobihan,
martenger ni uhur bai Tuhanta in. bereonkon-Mu bai na roh hu Bamu.
Ham, o Jesus, sai patoguh Hasomani Ham hanami,
hanai na i parporangan. Ase hot bai parpadanan,
Ase jumpah bai ujungni hamonangan. Ase ondos hanai on bai hagoluhan.
PARMAHAN NA MADEAR 11 OKTOBER
BALOSTA
“Sihol ma marhitei horja na madear pasipon nasiam haotoon ni halak na hurang uhur.”
1 Petrus 2:15
Anggo haotoon ni halak na hurang uhur ibalosi hita homa marhitei hata atap
pambahenan na patuduhkon hurang ni uhur, tarjadi ma partinggilan, hageoron, habadoran
pakon borit ni uhur songon apuy na pajumpah pakon minak, gara ma! Marhitei sikapta sonon
lang moru haotoon ni halak na hurang uhur, tapi lambin bagasni do, lambin hengkengni. Jalan
keluar humbani persoalan lang dapot. Anggo ibalosi hita marhitei hata na dear ra lang boi
tarjalosi.
Anggo sonai sonaha do sikap humbanta na iharosuhkon Naibata marimbang halak na
hurang uhur?
Naibata mangkarosuhkon ase haotoonni ai ipasip hita. Tahan emosi, jangan terpancing.
Sip ma hita, tapi lang sip na manadingkon, lang sip na manundalhon, tapi sip na
marpambahenan, ai ma marhitei horja na madear. Hahonaonni tarlobih hubani halak na
hurang uhur ai. Horja na madear, ai ma balosta mangimbangi haotoonni, anjaha ai ma homa
ambilanta mangimbang hurang ni uhurni.
Songon bapa na mangajari anakni na hurang marpambotoh marhitei sada contoh atap
pambahenan na madear, sonai ma sihorjahononta mangimbang haotoon ni halak na hurang
uhur, anjaha andohar marhitei ai dapotsi parlajaran humbani haotooni na mangkorhon
hamubahon.
Horja na madear, ai ma ambilan tang sijengesan!
Tonggo: Ham Tuhan Naibata, lang adong gogohnami anjaha lang tuk uhurnami
mangkorjahon na madear marhitei dirinami. Pargogohi Ham hanami ase
marhitei horja na madear in lambin marsangap goran-Mu. Amen.
HALELUYA NO. 234:1+4
1. Marigat langit ni langitan 4. Sai Ham ma tong simada ahu,
ibahen holong ni uhur-Mu. sadokah au i tanoh on;
Bannami ganup na boritan, Sai tong dear ma parlahouhu,
patalar Ham ma holong-Mu! pasangap goran-Mu tongtong.
Ididah jolma haganupan Binahen-Mu sai usihanku,
pangisi ni dunia on: mangkaholongi jolma in.
Ai roh do Ham tongon, o Tuhan, Galangkononku ma diringku,
manghopkop ganup jolma on. lao mangusihi Tuhankin.
PARMAHAN NA MADEAR 12 OKTOBER
TANDAI TUHANMU!
“Nini sidea ma bani puang-puang ai: Seng be halani hatamai mambahen porsaya hanami.
Domma itangar hanami sandiri, anjaha ibotoh hanami, Ia do tongon sipaluah dunia on.”
Johannes 4:42
Biri-biri na madear ai ma biri-biri na tangkas manandai parmahanni, sonaha rupani,
pardalanni pakon sorani. Lang pala ajaran biri-biri na madear mananda parmahanni halani
domma dokah iparorot pakon ijagai parmahan ai.
Domma dokah hita ibagas hulanan ni Tuhan Jesus. Parmahan Na Madear in. Domma
dokah hita iparmahani, iparorot ibagas goluhta ari-ari. Domma itandai ham sora-Ni, holong-Ni
pakon sonaha panghopkop-Ni?
Ulang ma panandaionta bani Tuhan Jesus songon panandaion ni buei halak bani
Presiden na marhitei surat kabar pakon televisi hansa. Tapi marpanandaion ma hita hu bani
halani adong hubungan pribadi, halani ongga adong kontak atap urusan pribadi hu bani.
Ulang ma itandai hita Tuhan Jesus songon sipaluah hansa, tapi sipaluah ham, sipaluah
hita. Ulang ma itandai hita Tuhan Jesus songon sipanghopkop hansa, tapi sipanghopkop hita.
Ulang ma Tuhan Jesus itandai hita ibagas ambilan pakon hasaksian ni jolma hansa, tapi itandai
hita ibagas goluhta ari-ari songon sada halak na dob marpambahenan. Ase porlu do banta
mangkawah use hu pudi, bani panorang na dob lopus, anjaha marpanungkun hita pasal aha
ma na dob ibahen Tuhan Jesus hubanta. Holong pakon panghopkop, ai do na dob ijalo hita, rup
atap marsada-sada. Hunjon ma hita boi mangkatahon: Domma itangar hanami, domma ibotoh
hanami anjaha domma iahapkon hanami, …. Ia do tongon sipaluah dunia on, onjolan ni sagala
pangarapan na adong banta.
Tonggo: Ham Tuhan Jesus, ajari Ham hanami, ase lambin itandai hanami sonaha
pangkaholongi-Mu hubennami, anjaha marhitei ai lambin ibotoh hanami
martarimakasih hubani Bapa na marsuruh Ham. Amen.
HALELUYA NO. 248:4-5
4. Na kahou au anjaha pitung, 5. Tarima kasih ma uhurhu,
ase lang hutandai Ham; Bamu na manondangi au;
Boratan au ibaen huusung Hupuji Ham, ale Tuhanku,
ganup dousangku dompak Ham; itodoh Ham hapeni au;
Nuan pe hutandai ma, Megah ma tonduyhin nuan,
Ham arta na harga. dob hutandai Ham.
PARMAHAN NA MADEAR 13 OKTOBER
TORUH NI UHUR
“Sada ma uhur nasiam samah nasiam; Ulang ma hagijangon ai pingkiri nasiam, tapi hatoruhon
ma parayak; Ulang ma na pandei nasiam iagan uhur nasiam.”
Rom 12:16
Sonon do sapari sada hasomalan bani sada huta: Dob salosei sidea marpariama na
madear, ija bahat, banggal janah tobu ma buah-buahan na ipatumpu sidea humbani kobunni,
ipuji sidea bei ma dirini i kode: marhiteihon hata na sonon: Hasil ni horjangku sandiri do
anggo buah-buahan na mantin on. Tapi anggo pariama na hurang dear, artini otik, etek janah
asam ma buah-buahanni, legan do na ihatahon i kode, nini Tuhan Naibata do na paturut ma
sonai hansa hasil ni pariama sahali on. Hotop usih hujai do sifat ni uhurta homa. Haganup
hamajuon, hapandeion, arta pakon buei hal-hal na legan, ihira hita songon hasil ni horjanta
sandiri. Tapi hun segi na legan salahta sandiri lang ra hita mangakui. Anjaha hasosakan boi
mangkorhon sangsi ni uhur dompak hinadear ni panogu-noguon ni Naibata banta.
Paubah hita ma hauhuronta dompak Naibata. Torih hita ma sibere-bere-Ni ibagas
haganup na madear. Anjaha torih hita ma salah ni jolma, tarlobih salahta sandiri, na
mangkorhon buei ni hasunsahan banta pakon bani halak na legan. Toruh ni uhur na sintong
boi iguruhon hita humbani Tuhan Jesus Kristus. Ia na patoruh diri-Ni manghopkop hita. Uhur
na gok hatarimakasihon dompak-Si do na boi mamboban hita hubani toruh ni uhur na sintong,
na mangidah hasadaon pakon haganup jolma na hinaholongan ni Tuhanta. Toruh ni uhur
sisonai ai mangurupi hita bani goluhta ari-ari i rumah tangga sonai age i tongah ni kuria, atap i
masyarakat.
Tonggo: Ham Tuhan Jesus, togu Ham ma uhurnami hubani toruh ni uhur na hum Bamu.
Ase iguruhon hanami toruh ni uhur na hinarosuhkon-Mu janah ase dapot
hanami hasadaon i tongah- tongahnami. Amen.
HALELUYA NO. 107:1-2
1. Irikkon nasiam ma Au, 2. Au do palihar dalanmin,
sonai nini Tuhanta. na dompak hagoluhan;
Sai parnalang ma dirimu, Ai seng be kahou langkahmin,
Hatang-Ku ma lah harga. daoh pakon hamagouan.
Sai mambur bahen lah ganup, Au parhiteian na bujur,
parlahoumin na so talup. bai hasonangan na botul.
PARMAHAN NA MADEAR 14 OKTOBER
PANGARAPAN SISADA-SADA IN
“Ise ma hanima, na mangasup paganjang ari-arini age saasta gelah marhitei na holsohan?”
Mateus 6:27
Bani piga-piga rumah sakit na modern boi do igantih jantung ni na boritan marhi tei
jantung na gogoh, na ibuat dokter humbani bangkei ni halak na baru matei. Ase lobih maju do
ilmu kedokteran bani panorang on marimbang bani panorang ni Tuhan Jesus ijia. Tambahni ai
rata-rata lobih panjang do umur ni jolma age i daerahta on bani panorang on, marimbang
saratus tahun na salpu Halani panjagaon bani kesehatan, obat na modern pakon ilmu
kedokteran na modern. Ase banggal do arti ni ilmu pengetahuan terhadap kesehatan. Anggo
sonai, atap hurang sintong do hata ni Tuhan Jesus na i atas tanoh on, bani panorang na
modern?
Sabalikni do, marhitei buei ni porang, terorisme, bom atom, pakon sinjata modern na
legan na adong, bencana alam, kecelakaan lalu lintas pakon humbani buei hal -hal na legan na
so binotoh, na so boi do aman goluhta marhiteihon usaha-usaha ni hita jolma. Hapandeion
pakon holsoh ni uhur pe lang sanggup laho paganjang umur. Anggo bois hasabaron ni Naibata
atap anggo ipaturut Naibata mardalan domdom ni uhur pakon hajahaton ni jolma atap anggo
domma itontuhon Naibata ujung ni goluh ni sada jolma, lang boi be marganjang umur ai.
Halani ai sada do hansa na porlu ai ma tenger ni uhur pakon pangarapan bani Tuhanta, na boi
mangurupi hita tarlobih bani panorang na modern on, ase ulang pala mabiar hita tongtong.
Tonggo: Ham Tuhan Naibata, haotoon na banggal do ai, mangunsagahkon hamajuon atap
hagogohon ni hanami jolma sandiri. Ulang paturut Ham hanami kahou, tapi
ramotkon Ham ma hanami pakon dunia on, halani Ham tumang hansa na
sanggup laho paluah hanami humbani hamagouan. Amen.
HALELUYA NO. 240:1-2
1. Jahowa pangajamankin, 2. Ai hatundalan na botul
pangapoh bai uhurhu; do Ham, o Naibatangku;
Na patorangkon dalankin, Ai Ham do na tongtong bujur
sonang ibaen langkahku. mambahen hagoluhanku;
Sonang tongtong, Ham na gogoh,
bai uhurhon, sai saud do,
ibahen Naibatangku, sininta- Mu, o Tuhan,
Titah-Ni harosuhku. torsa do haganupan.
PARMAHAN NA MADEAR 15 OKTOBER
MANGINDAHI TUHAN
“Ai sonon do hata ni Jahowa bani ginompar ni Israel: Pindahi Ahu, ase manggoluh hanima.”
Amos 5:4
Aha do na porlu bani goluhta? Buei do balos, na ijalo hita humbani halak na legan. Ra
buei do homa balos ni uhurta sandiri bani sungkun-sungkun on. Hamardekaon pakon
hamajuon do na porlu, duit pakon arta, sipanganon, pakon siinumon, keamanan pakon
keadaan na taratur, hasoman na madear pakon damei. Tontu boi ipaganjang hita buei balos
sisonai ai bani sungkun- sungkun nongkan ai. Bani panorang ni Nabi Amos ijia ringgas do
halak Israel, laho mamestahon pesta-pesta bani bagei-bagei ianan. Haganupan ai porlu do
iahapkon ase boi manggoluh sidea. Icampur sidea do bani acara-acara hadaulaton ni sidea,
ugama ni bangsa-bangsa simbalok pakon haporsayaon, pambalosi bani Naibata sisada-sada in.
Manurut pingkiran ni sidea, hurang lengkap ope ugama ni sidea ai, gepe iihutkon sidea
hata ni Naibata. Hurang torang janah hurang lengkap iahapkon sidea hata ni Naibata. Tapi
sadalan hubani pandapot ni Naibata sandiri, torang tumang do pambahenan-Ni pakon HataNi,
ase boi jumpah kuria-Ni in dalan hu Bani janah hubani hagoluhan in. Ai pandeinan sidea
marimbang Naibata? Tontu lang. Ase pindahi hita ma Tuhanta janah pindo hita ma panonggor
na torang hum Bani. Ase boi ibedahon hita na penting pakon na hurang penting sonai age na
marbahaya bani goluhta. Ase dapot hita hagoluhan in humbani sumberni sandiri, artini
humbani Tuhanta.
Tonggo: Ham Tuhan Naibata! Marhiteihon hasabaron pakon holong ni atei -Mu talar do
bannami Anak-Mu Jesus Kristus. Togu Ham ma hanami, ase ipindahi hanami
Ham janah ipaima-ima hanami hagoluhan in hum Bamu, lang humbani parkuasa
atap humbani jolma na legan atap humbani hagogohon pakon hapandeionnami
sandiri! Amen.
HALELUYA NO. 127:1-2
1. Jahowa Siparmahan au, 2. Itogu au bai na lihou,
aha pe lang hurang ni. bah tubuh hagoluhan.
Na sambor pe sai ipalao, Ibaen do tonduyhin siou,
do humbai pinahan-Ni. bai dalan hasonangan.
Tudu ibaen na lambut in, Sonang do uhurhon tongtong,
Lao pagoluhkon tonduyhin, sadokah au i tanoh on,
ibaen holong atei-Ni. pasangapkon goran-Ni.
PARMAHAN NA MADEAR 16 OKTOBER
ISARIHON NAIBATA DO TONGTONG GOLUHTA
“Ulang ma mata duiton parlahou nasiam, hasonangkon nasiam ma na adong; Ai Ia sandiri na
mangkatahon: Sabonar na so tadingkonon-Ku do ho, sabonar na so paturuton-Ku do ho!”
Heber 13:5
Bani panorang on buei do na lambin meningkat i negaranta, i kota age i huta-huta. Boi
hatahononta bayak do jolma sonari marimbang paima merdeka hita. Ibagas na mardalan
hamajuon-hamajuon in haganup, meningkat do homa panonggor ni hita jolma.
Ipagolpa bani ayat na iatas in: “Ulang ma mata duiton parlahou nasiam” Topat tumang
do homa golpa-golpa on hubanta, halani buei hita na mata duiton bani panorang on. Gerger do
mata mangidah duit, nini umpasa ni Simalungun. Sasintongni sedo mata ai na mubah gabe
gerger, tapi parlahou ai do. Gabe ibuati jolma do lobih humbani parbagiananni, roh uhurni
manangko, korupsi, mangoto-otoi hasoman pakon na legan. Dob ai jajat ma na hurang, itorihi
ma dalan-dalan mansari duit, buei ma tongon jolma na sompong bayak, tarsonggot ma homa
halak mangidah. Halani aha do ase mata duiton jolma?
1. Lang ihasonangkon na adong bani ai, maimpol tong mangidah na adong bani halak.
2. Lupa hita na adong banta ai ma na humbani Naibata.
3. Hurang martarimakasih bani ganup pasu-pasu ni Naibata.
4. Sihol jolma in mansarihon goluhni, gabe lupa bani bagah-bagah ni Naibata na mangkatahon:
“Sabonar na so tadingkonon-Ku do ho, sabonar na so paturuton-Ku do ho!”
Patut do martarimakasih hita anjaha martenger ni uhur bani Tuhanta, ai isarihon do
goluhta. Porini buei atap otik na adong bamu, sada panorang ipangindo Tuhanta do
pertanggungjawabanta pasal ai. Halani ai pangkei ma hita mampargunahon na adong banta
ase marsangap goran ni Tuhan. Nini bani Mateus 6:33. “Parlobei ma pindahi hanima Harajaon
ni Naibata ampa hapintoranni, dob ai tambahkonon-Ni do ganupan ai bannima.”
Tonggo: Ham Jesus Tuhannami, urupi Ham ma hanami. Ai gati do hanami tartolsu ibahen
habayakon na i dunia on. Moru homa holongnami bani hasomannami sonai
tenger ni uhur hu Bamu. Ajari Ham hanami marhitei Tonduy-Mu, ase martenger
ni uhur Bamu hanami bani goluh on. Amen.
HALELUYA NO. 6:8+15
8. Naibata, Ham do bayak, 15. Paturut Naibata gelah
sibere hanai on; patorsa langkahmin;
Ai Ham do na tongtong layak, Ase tongtong sonang ho lah,
manumpak jolma on. timbul ‘pa tuahmin.
PARMAHAN NA MADEAR 17 OKTOBER
ULANG MABIAR!
“Tapi nini ma dompak sidea: Ahu do on, ulang hanima mabiar.”
Johannes 6:20
Malas tumang uhur ni simbuei pakon susian ni Tuhan Jesus dob bosur mangan sidea na
5.000 halak ai, marhitei tanda halongangan na binahenni Jesus. Dob ai misir bei ma sidea.
Sanggah na marparau susian ai, roh ma logou na doras pakon gilumbang na banggal
mandorab parau ni sidea, sosak anjaha mabiar tumang do susian ai. Igogohi sidea do manlugai
gendo das namin hu labuhan ase ulang marbahaya sidea i tongah-tongah ni tao ai. Sompong,
taridah ma Jesus mardalan i atas tao ai manjumpahkon parau ni sidea, tapi lambin mabiar do
sidea, nini uhurni homa, begu do na roh ai. Jadi nini Jesus hubani sidea: Ahu do on, ulang
hanima mabiar.
Sonai do akibat ni uhur biar bani jolma, ra do gabe lepak panandaion bani Tuhan in.
Age bani panorang on, buei tumang do logou na doras pakon gilumbang na banggal na
tongtong mandorab goluhta i dunia on. Umpamani: Sitaronon, hasunsahan, naborit,
hamarsikon sonai age pangangguran ni niombah, perampokan, pembajakan, perkosaan,
parsalisihan, pamunuhan, porang pakon na legan. Ganupan in hotop manosak goluhta. Gati
homa iparpala-palai hita jongjong do Tuhan Jesus i lambungta laho mangurupi hita. Tapi
halani golap ni hauhuronta, gabe lepak panandaionta bani Tuhanta, iagan hita homa atap begu
ni aha deba na roh.
Ahu do on, nini Tuhan Jesus hubanta age sadari on. Anggo Tuhanta do hasomanta, seng
dong habiaranta i dunia on. Ai nini do bani Mateus 28:20: Tonggor ma, sai hasomanan-Ku do
hanima ganup ari, ronsi roh ujung ni dunia on.
Tonggo: Ham Jesus Tuhannami, pargogoh na so tarimbang. Jolma na galek do hanami,
hotop mabiar hanami mandompakkon gilumbang na mandorab goluhnami.
Ungkap Ham ma mata ni haporsayaonnami ase tangkas itandai hanami Ham
pakon panghopkopon-Mu. Sai gok Bamu ma tongtong goluhnami arian pakon
borngin. Amen.
HALELUYA NO. 311:3-4
3 Ham pangajaman, 4. Seng au mabiar,
bani goluhkon, ai dohor Bamu,
bai parlajouan, parngit pe goluh,
Ham hujolom tong. lang borat be in.
Seng jumpah ahu, ‘Ge hamateian,
songon Ham Tuhan, lang marsorod be,
arian borngin Tuhanku na dob
rap au pakon Ham. puho rapkon au.
PARMAHAN NA MADEAR 18 OKTOBER
IJALO JESUS DO GANUP NA ROH HUBANI
“Haganup na binere ni Bapa in Bangku, in do na roh Bangku, anjaha seng anjai pabalion-Ku na
roh hu Bangku.”
Johannes 6:37
Podas do tarkabar barita pasal tonda halongangan na binahen ni Tuhan Jesus, ai ma na
ibere mangan 5000 halak. Gabe marrohan do jolma laho mangindahi-Si. Deba ma ai sihol
mangindahi tanda halongangan deba tagih bani roti na mantin. Na legan roh ibagas
pangarapan paboa Jesus laho pajongjongkon sada organisasi sosial na baru. Ase tarjamin
sipanganon ni sidea age lang marhorja. Memang halani gati masa hasunsahan gabe hotopan
soal-soal pardagingon do ipingkiri sidea. Tapi ipatorang Tuhan Jesus do tujuan ni parroh-Ni hu
dunia on, sedo pitah mambere sipanganon tapi paluahkon jolma humbani dousani do.
Diatei tupa do hatahononta hubani Bapa na i Nagori Atas ai, halani isuruh do Anak
haholongan-Ni roh hu dunia on. Marhitei ayat na i atas in tangkas do iarusi hita, paboa ham
age ahu, domma iondoshon Bapa na i Nagori Atas ai hubani Tuhan Jesus ase Ia paluahkon hita.
Ase, idop ni uhur ni Naibata do hubanta na isuruh Anak-Ni gabe jolma. Seng pala mabiar hita.
Tapi gati do hita marsidalian roh hubani Jesus, tarlobih bani panorang Horja Banggal
Napansing. “Nasiam ma lobei, nasiam na so mardousa in, parpudi ma au, lang talup ope au,
banggal tumang dousangku, sanggah manggila do nuan Tuhan bangku,” sonai do hotop
iluarhon hita.
Age sonaha banggal ni dousanta, asal ma ra hita roh hubani Tuhan Jesus, ijalo do hita.
Seng ongga itulak Tuhan in na roh hu Bani. Ulang dousanta, hahuranganta ai gabe ambatambat
banta laho roh hubani Tuhan Jesus.
Tonggo: Ham Jesus Kristus Tuhannami. Ididah Ham do aha na manggoki uhurnami
marsada-sada. Buei do na manundati hanami roh hu Bamu, marhitei bagei-bagei
ni na masa na manrahut uhurnami i dunia on. Roh do hanami hu Bamu marhitei
uhur na gok dousa. Papansing Ham hanami marhitei daroh-Mu. Tarima kasih ma
Bamu Tuhan. Amen.
HALELUYA NO. 147:3+6
3 On pe Bamu 6. Padaoh Ham
naman au roh, na jahat in,
sai ulang tulak ahu; papansing Ham uhurhu.
Pahombun Ham, Sihol unduk
o Naibata, do au Bamu,
parringis-Mu hubangku. sai Hata-Mu do bangku.
PARMAHAN NA MADEAR 19 OKTOBER
HAPUTUSAN MANGIRIKKON JAHOWA
“Dob ai nini bangsa ai ma mambalosi: Daoh ma ai humbannami, anggo mintor
tadingkononnami Jahowa, laho mambalosi naibata na legan.”
Josua 24:16
Domma martahun-tahun si Josua mambobahon bangsa Israel, hun Tanoh Mesir das hu
Tanoh Kanaan. Matua ma homa angkulani, ibotoh do na laho salpu ma panorangni i dunia on.
Ididah homa sonaha cara marpingkir ni Bangsa Israel ai. Pitah sanggah dear do goluh ni sidea,
sanggah monang hun parporangan atap maluah humbani parmaraan, ijai do sidea mandoding
janah manortor patuduhkon malas ni uhur bani pangurupi ni Naibata.
Anggo dong panorang na parngit, lohei, hasunsahan, mintor podas do bangsa ai
manundalhon Naibata. Ipauli sidea naibata gana-ganaan bahen sisombahon ni sidea. On ma na
ihabiari si Josua, ase ibahen rapat bolon patumpuhon pangituai -pangituai ni bangsa pakon
bangsa ai, laho mambahen sada haputusan na tontu. Ai ma, mamilih Naibata Jahowa atap
naibata na legan; sukarela lang paksaan.
Sadar do bangsa ai bani panlanggaronni pakon bani dear ni panogu-nogu ni Naibata
bani sidea. Saud ma adong haputusan pakon pangakuan ni bangsa ai, nini: Seng anjai
tadingkononnami Naibata Jahowa ibagas goluhnami. Hita pe kuria bani panorang on, bapa,
inang, namaposo, porlu do ganup panorang mambahen haputusan atap ise siihutkononta
ibagas goluhta on. Ibotoh hita, pardear layak do Jahowa. Tapi mase buei halak Kristen na
mulak hubani hasaparion mangkaporsayai datu, sisombah-sombahon, nasib pakon legan?
Buei homa na gabe Kristen goran, Kristen pandidion, Kristen Natal. Atap Kristen pitah bani
malas ni uhur. Dong homa satongah ni uhurni bani Naibata, satongah nari ipakei bani horja
hagolapan. Gati hita mardua Tuhan ibagas goluhta. Seng sonai na pinangindo ni Tuhanta, tapi
pambalosion na gok janah na so mubah-ubah do. Seng dong sisombahon na legan sobali Ia.
Songon pangakuan ni si Josua ai ma age pangakuanta: “Tapi anggo ahu pakon hasomanku
sarumah, Jahowa do sibalosannami.” (Josua 24:15)
Tonggo: Ham Jahowa, patotap Ham ma uhurnami mangkaporsayai Ham ibagas
goluhnami. Buei do tongon panlanggaronnami. Gati do hanami marnaibata na
legan ibagas goluhnami, marhitei na martenger ni uhur hubani hagogohon na
adong i dunia on. Marpadan do hanami seng anjai tadingkononnami Ham, ai
Ham do Naibata na manggoluh na patut balosannami. Sai gok Bamu ma daging
ampa tonduynami. Amen.
HALELUYA NO. 249:1
1. Seng tadingkononku Ham,
ale Jesus Sipagoluh.
Sai irikkononku Ham,
sadokahni au manggoluh.
Ham do hagoluhankin,
seng tadingkononku in.
PARMAHAN NA MADEAR 20 OKTOBER
MARMALAS NI UHUR MA
“Mambogei ai marmalas ni uhur ma parbegu anjaha ipuji sidea ma Hata ni Tuhan in, gabe
porsaya ma na dob tinontuhon hinan hu hagoluhan sisadokah ni dokahni.”
Lahoan ni Apostel 13:48
Sada malas ni uhur do ai anggo boi ope hita mambogei Hata ni Naibata bani goluhta on.
Halani dong do holi panorang seng tarbahen hita mambogei Hata ni Naibata, age sihol uhurta.
Sonai ma na tarjadi bani panorang Apostel Paulus pakon si Barnabas marambilan, buei
do halak na roh. Deba ma ai halani Jahudi pakon halak na roh humbani sipajuh begu-begu.
Anggo halak Jahudi irehei janah marsimburu do hubani Apostel ai age hubani Hata ni Naibata;
hape anggo bani parbegu begu ambilan malas ni uhur do ai.
Tontu roh sungkun-sungkun: Mase malas uhur ni parbegu, janah iusir halak Jahudi
Apostel hun huta ai? Halani iambilankon Apostel ai pasal hasasapan ni dousa ronsi haluahon
marhitei panghopkopon ni Tuhan Jesus. Ninuhur Jahudi: Sungkup ma marhitei aturan na
binahen ni si Musa dalan hu haluahon.
Sonai ma gati hita on, gabe songon halak Jahudi na mamorluhon aturan, age pe lang
marhaporsayaon bani Jesus na sirsir matei laho manghopkop hita. Hape na lobih porlu ai ma
marhaporsayaon bani Jesus janah mangkorjahon hata-Ni domu hubani na dob niaturhon-Ni.
Atap hata na legan: Marhorja ma hita domu hubani na dob niaturhon ni Jesus Kristus. Ai horja
na taratur ai do deba na hinarosuhkon-Ni.
Sonaha nani, domma malas uhurta halani Tuhanta? Atap malas uhur halani jenges
horjanta, boi idalankon hita aturan pakon na legan? Anggo sonai do mambahen malas uhurta
tontu lang honsi dear horjanta, pusok ma uhurta. Horja mando na pamalas uhur sedo Tuhan
be.
Marhitei ambilan on ipatugah hubanta ase Tuhanta ma na gabe malas ni uhurta, age
marhorja hita ronsi na mambogei hata-Ni. Age ibagas na jenges horja, keadaanta ningon
Tuhanta do sipuji-pujionta. Ai Ia do na boi mambahen malas uhurta bani goluh on. Jesus do na
boi manasap dousanta ronsi pasirsirhon hagoluhan banta.
Tonggo: Ham Tuhan Naibata Bapanami, Ham do na boi mambere malas ni uhur bennami.
Ham do homa na manasap dousanami ronsi mambere hagoluhan bennami.
Tarimakasih ma Bamu, ai Ham do na mambahen dihut hanami parsimada bani
hagoluhan sisadokah ni dokahni. Amen.
HALELUYA NO. 132:2+4
2. Tarima kasih ma 4. Isuruh Anak-Mu
Bamu, o Naibata hubangku Tonduy-Mu
parlayak Ham! na hum Bamu,
Sibahen dalan in manogu tonduyhin
marhitei Jesus in hu hasonangan in,
hu Surga in. na puji Ham.
PARMAHAN NA MADEAR 21 OKTOBER
HAROSUH NI NAIBATA
“On do harosuh ni Naibata, ase pansing ma nasiam, ase daoh ma nasiam humbani panriahriahon.”
1 Tessalonika 4:3
Podah ai ma hata na marpardomuan bani ganup tingkah laku. Sedo pitah hata na luar
na sinobut podah, tapi dihut do bani na mangkorjahon isi ni podah ai. Sonai do Jesus
mamodahi ganup susian-Ni. Artini ganup na pinodahkon-Ni ai ma ganup na ihorjahon Jesus.
Ase anggo Jesus mamodahi, boi ididah susian-Ni isi ni podah ai marhitei goluh-Ni sandiri.
Ijon ipatugah, ipodahkon Jesus pasal harosuh ni Naibata. Ai ma ase pansing hita. Ai do
homa na ipatugah Apostel Paulus hubanta. Sedo mintor luar hata on. Tapi parlobei ipatugah
do sonaha na patut bani goluh on. I lobei ni teks on isobut ope sonon: ipangindo anjaha
ipodahi hanami ma nasiam. Tontu hapansingonta ai ma halani Jesus. Sedo anggo halani
usahanta. Halani anggo hita gok dousa do haganup. Ase boi hita pansing ningon do homa
ihagoluhkon hita hapansingon na humbani Naibata.
Mangkagoluhkon hapansingon sedo na mararti ai itadingkon hita dunia on. Gabe
hatahononta ma use: Seng tarbahen pansing i dunia on, i surga pe holi hapansingon na isobut
ijon ai ma: age i dunia on ope hita totap ma hita manggoluh ibagas harosuh ni Naibata, lang
ibagas harosuh ni dunia on. Halani harosuh dunia on ai ma horja ibagas hagolapan.
Halani ija marianan harosuh ni Naibata ijai ma homa jumpah hita hapansingon ai,
janah daoh ma harosuh ni dunia on. Domma ipatugah Naibata hubanta pasal harosuh ni uhur Ni.
Naha sirsir do hita manggoluh ibagas harosuh ni Naibata sonari, atap sonaha pe situasi ni
goluhta? Atap marpanorang do hita manjalo panghopkop ni Tuhan Jesus, sirsir homa hita
mandalankon harosuh ni Naibata; ijai do lambin itandai hita idop ni uhur-Ni.
Tonggo: Ham Naibata nami, urupi Ham ma hanami ase tongtong hanami manggoluh
ibagas harosuh ni uhur-Mu bani haganup keadaan ni goluh nami. Ase lambin
tarhamalashon hanami goluh panorang on. Amen.
HALELUYA NO. 148:2+4
2 Pardousa na banggal do au, 4. O, Jesus sai tangihon on,
pansing do anggo Ham; padaoh Ham jahatkin;
Sai bai na dorsa laho au Pansing ma baen Ham uhurhon,
bai na jahat naman. ase sai sonang in.
PARMAHAN NA MADEAR 22 OKTOBER
DAMEI NI KRISTUS
“Anjaha damei ni Kristus ma manrajai ibagas uhur nasiam, ai hujin do nasiam tardilo gabe
sada angkula. Gabe sipartarima kasih ma nasiam.”
Kolosse 3:15
Nini sada halak: Sonai buei ni jolma sonai do homa buei ni uhurni. Tontu adong do
hasintongan ni pandapot sisonon. Porini bani halak na marsanina i kuria age das hubani
masyarakat pe hotop taridah piga-piga pandapot bani sada pahara. Age pe namin dobni
terlaksana do rencana ai, tapi domma ipungkah marhitei na bagei do pandapot pasal pahara
ai.
Hasadaon ni pingkiran, uhur ningon do parlobei damei ni Kristus manrajai uhurta.
Baru pe boi terlaksana rencana na dob isahapkon hita. Halani sadokah lang damei ni Kristus
manrajai uhurta, domma lang tarsuhuni hita pangindoanni uhurta. Ai haganup dunia on sihol
do banta ai ma anggo uhur i sungkun hita. Hape anggo lang dong tarrajai uhur marhitei damei
ni Kristus, tontu gabe uhur-uhurta mando banta, gati lang tarjalo hasoman age hita. Sonai
homa sebalikni, hasoman hubanta.
Marhitei sisada uhur do boi hita isobut sisada angkula. Halani songon sada angkula
marhorja marhitei na iatur ni sada uhur na humbagas angkula, sonai ma hita anggo domma
marianan damei ni Kristus bani hita marsada sada tontu domma gabe sada hita, sada ibagas
harosuh ni Tuhanta.
Hadameion ai roh humbani Naibata marhitei panghopkop ni Jesus Kristus. Ai ma idop
ní uhur-Ni hubanta. Halani ai do homa ase iojur Apostel Paulus hita tongtong manggoluh na
martarimakasih. Pataridahkon hita ma ai marhitei ganup aktivitas ni goluhta, ase songon na
sinobut ni Apostel Paulus: Sedo ahu na manggoluh in nuan, tapi domma Kristus manggoluh
ibagas ahu.
Sonaha do nani hita on. Domma damei ni Kristus na manrajai hita? Atap domma gabe
sisada angkula hita on? Marhitei na sirsir do hita mandalankon harosuh ni Tuhan mambahen
marianan damei ni Kristus ibagas hita. Ase roh ma hita hubani Tuhan ibagas goluh na
martarimakasih, ai idop do uhur-Ni mangidah hita.
Tonggo: Ham Tuhan Jesus, urupi Ham na hanami ase tongtong sada hanami marhitei
damei-Mu marianan ibagas uhurnami marsada-sada. Ase ibotoh hanami
manggoluh na martarimakasih hunjon hujanan. Amen.
HALELUYA NO. 497:1+2
1. Holong ni Jesus 2. Riap ma hita sauhur
manggomgom ganup Kuria, martangkap tangan,
na patotapkon hasadaonta in. ibagas damei na humbai Tuhan in.
Damei-Ni in ma manrahut paruhuranta. Marpangarapan tongtong bai horja ni Tuhan
idop uhur-Ni batar-batarta in. hataridahan ni hasintongan-Nin.
Damei-Ni in ma manrahut paruhuranta. Marpangarapan tongtong bai horja ni Tuhan,
idop uhur-Ni batar-batarta in. hataridahan ni hasintongan-Nin.
PARMAHAN NA MADEAR 23 OKTOBER
TAHAN BANI PARLAJOUAN
“Martuah ma halak na tahan bani parlajouan, ai dob monang bani parlajouan ai, jaloonni ma
sortali hagoluhan, na dob pinarbagah ni Naibata bani na marholong ni uhur Bani.”
Jakobus 1:12
Urah tumang luar sahap humbanta panorang on anggo ibagas hasunsahan atap pusok
ni uhut hita: “Parlajouan humbani Tuhan ma on.” Hape ra do ai halani ibalosi hita hisap-hisap
ni dagingta atap halani lang manggoluh ibagas harosuh ni Tuhan hita. Atap hata na legan:
Sibolis do na manlajou hita, atap na sintong do ibalosi hita Tuhanta. Ai nini Jakobus 1: 13:
“Ulang ma adong na mangkatahon, sanggah na tarlajou ia: na tarlajou do ahu humbani
Naibata.”
Memang ra do roh sungkun-sungkun humbagas uhurta sonon: Mase ma ihatahon
Apostel Jakobus tahan bani parlajouan, anggo seng dong parlajouan na bani pasal parlajouan
na imaksudhon ni si Jakobus ijon. Halani dua masam do na tongtong mangiankon hadirionta ai
malas ni uhur atap pusok ni uhur. Lang ongga rap dapot bani sada panorang on ibagas
hadirion ni sada-sada halak. Tapi na margantih-gantih do on.
Halani na ijahani pe ai sonari bani hadirionta boi ai padaohkon hita atap dalanta laho
manundalhon Naibata. Tapi boi do dalan laho parapatkon hadirionta hubani Naibata. Gabe boi
do ai parlajouan banta. Tergantung hubani pamakeita do ai. Naha boi dope na masa ai ipakei
hita manandai holong ni atei ni Tuhanta hubanta? Nini Pangungkabon ai: Sai bujur ma ho
ronsi matei, dob ai berehonon-Ku ma hubam sortali hagoluhan in.
Ase habujuron mamakei haganup ibagas harosuh ni Naibata, mambahen na ibotoh hita
na dob monang hita. Habujuron na marisi haporsayaon bahasa haganupan in ai ma idop ni
uhur ni Tuhan, sedo marhitei gogohta sandiri. Termasuk hamonanganta ai, ai ma idop ni uhur
ni Tuhanta hubanta, marhitei panghopkopon ni Tuhanta Jesus Kristus. Ia do na pasirsirhon
ronsi na mambagahkon ai hubanta. Ase pakei hita idop ni uhur Tuhanta laho manjalo
hamonangan ronsi sortali hagoluhan. Kawahkon hita ma sitaronon ni Jesus na dob manaluhon
sitarononta.
Tonggo: Tuhan, sai pargogohi Ham ma ahu bani goluhku. Pitah pangurupion-Mu
mambahen hutandai holong ni atei-Mu na banggal in, ase ulang madabuh ahu,
tapi ase monang ma ahu halani pangkasomanion-Mu bani goluhku, na gabe
hasangapon-Mu ma in janah na parapatkon hadirionhu hu Bamu. Amen.
HALELUYA NO. 392:1+4
1. Na mardalan do ganupan 4. Malas uhur ni na monang
na porsaya in. na tahan ijin.
Lao marayak hasusuran, Ai dapotsi hagoluhan
in ma surga in. Jesus, sadokah ni in.
Jesus, sai bobahon ma, Jesus, Jesus, sai bobahon ma,
ulang sonto bai horbangan, ulang sonto bai horbangan,
ge sompit pe in. ge sompit pe in.
PARMAHAN NA MADEAR 24 OKTOBER
HAPORSAYAON IBAGAS JESUS KRISTUS
“Lajou nasiam ma diri nasiam, atap na ibagas haporsayaon do nasiam, pareksa nasima ma diri
nasiam. Ai na so ibotoh nasian do bani diri nasiam, paboa na ibagas nasiam do Jesus Kristus ?
Anggo lang, na so talup ma nasiam.”
2 Korint 13:5
Lang ganup jolma sirsir manlajou dirini. Tapi anggo na hundarat manlajou dirini
mintor ra ma berontak ia, atap gabe roh sungkun-sungkun sandiri: Mase sonon ahu. Padahal
manlajou diri sandiri sada hal na maharga do ai. Halani marhiteihon ni ai do hita manandai
dirinta i lobei ni hasoman tarlobih i lobei ni Tuhanta. Memang manandai diri, on ma horja na
mahol. Halani sadokah lape na tandai diri, sipata ra do tarbador diri; janah sadokah ai do
homa hurang giat hita mangkorjahon horjanta, ronsi lang sintong parsaoranta. Lobih ni ai ope
lang tarhamalashon hita keadaanta.
On ma homa na ipagolpa Apostel Paulus hubani Kuria Korintus, ase itandai dirini
sandiri. Halani marhitei na so manandai diri do mungkahni tarjadi pamihak-mihakon i kuria
ai. Dong hampit Paulus, Kepas, Apollos. Hape haganupan hita on ai ma hampit Jesus. Ai Jesus
do na padashon ronsi na paluahkon hita. Domu hujon ma namin hita manggoluh, artini
manggoluh ibagas haporsayaon ibagas Jesus Kristus.
Sonai ma homa hita halak Kristen, na mangirikkon Jesus. Porsaya do hita bahasa ganup
goluhta iramotkon Jesus. Naha nani sintong do ihagoluhkon hita pangakuanta ai? Pasal on ma
sihol pareksaonta dirinta marhitei ambilan on, ase halak na talup hita. Talup bani panluar,
talup bani parlahou.
Halani marhitei na ilajou ronsi ipareksa hita dirinta boi lambin itandai hita ase na
tongon hita. Bahasa aha pe lang tarbahen hita anggo lang Tuhan mambere gogoh ronsi
mamasu-masu horjanta. Lang boi sonang ronsi marmalas ni uhur hita anggo lang halani
Tuhan manlayak-layakkon ai hubanta. Ase marhitei na manandai diri roh ma hita hubani
Tuhanta, ase lambin ihaporsayai hita paboa Tuhan Jesus do na marianan i tongah-tongahta.
Tonggo: Ham Bapanami, urupi Ham ma hanami manandai dirinami. Ase lambin
ihaporsayai hanami paboa Ham do na manramotkon ronsi na paluahkon
hanami, gabe halak na talup hanami i lobei-Mu age i lobei ni hasoman jolma.
Amen.
HALELUYA NO. 124:1+5
1. O Tuhan, pareksa Ham au 5. Ipuji uhurhu do tong
sondangi uhurhu tangkas. Ham Jesus, hasomanku tong;
Ai seng dong margogoh be au! Gogohku Ham mando tongon.
:,: Bamu au paringgas, :,: Sai gok ma uhurhu,
Bamu au padonok, mamuji goran-Mu,
Bamu mando au. hupuji bujur.
PADANTA
PARMAHAN NA MADEAR 25 OKTOBER
“Dob ai ibuat ma Pustaha Parpadanan ai, ibasahon ma ai i lobeini bangsa ai, jadi nini sidea ma:
Ganup na hinatahon ni Jahowa, sai na bahenonnami anjaha tangihononnami do.”
2 Musa 24:7
Bangsa Israel ipimpin si Musa luar humbani parjabolonan i Tanoh Masir. Buei do
halongangan na ibahen Naibata i Tanoh Masir, ase maluah Bangsa Israel humbani
gomgomanni Raja Farao. Itogu-togu do sidea manlopusi tanoh halimisan ronsi na mandipar
Laut Sigerger. Lang adong be na hurang na ibahen ni Naibata dompak sidea.
Nabi Musa rup pakon pambobai-pambobai ni Bangsa Israel: Aron, Abihu, Nadab ampa
sipitu puluh halak pangintuai ni Israel, mangarahkon bangsa ai mambahen parpadanan. Nabi
Musa mambuat Pustaha Parpadanan, ase marpadan bangsa ai i lobei ni Naibata, ase ulang
marnaibata na legan sidea songon sipajuh begu-begu. Ase ulang taruyun sidea hu bani
hasomalan ni sipajuh begu-begu. Ase bangsa ai mambahen “Kebulatan Tekad” i lobeini
Naibata.
Halak Kristen pe gati do marjanji sanggah kebaktian i Gereja. Umpamani sanggah
panorang pandidion niombah, sanggah upacara perkawinan, sanggah Horja Banggal
Napansing ronsi das hubani sanggah manjalo tohonan atap pe acara pelantikan i Gereja. Gati
do na idah, lang adong uhur biar bani jolma in laho marpadan i lobeini Naibata sanggah
kebaktian i Gereja. Hapeni panorang marpadan ai ibahen sanggah panorang kebaktian i
Gereja, mase bahat jolma in mangosei bani Padan (ingkar janji) i lobeini Naibata. Age pe
tongon lang taridah Naibata secara langsung bani kebaktian ai, lang songon si Musa na boi
langsung pajumpah pakon Naibata i Dolok Sinai, tapi ihaporsayai hita do bahasa Naibata hadir
do ibagas Tonduy.
Haru marpadan dompak hasoman jolma maningon do sintong ibalosi selaku halak na
dob dewasa, samintolah na marpadan pakon Naibata. Maningon biaran do hita marpadan i
lobeini Naibata ase i lobeini haganup jolma i dunia on. Ulang mangosei padan i lobeini
Naibata, age pe Ia lang boi iidah hita secara langsung. Naibata lang ongga lupa bani padan-Ni,
ibalosi do padan-Ni hubani si Abraham ronsi hubani ginomparni ibagas panorang marriburibu
tahun. Bangsa ni Naibata totap do mardingat anjaha mambalosi padanni i lobeini Naibata
Jahowa age pe na na masa i dunia on.
Tonggo: Tuhan ajari Ham ma hanami mambalosi hata-Mu ibagas gokni uhur pakon
pingkirannami, domu hubani padannami i lobei-Mu. Amen.
HALELUYA NO. 448:1-2
1. Mantin ni in do hape, padanni Tuhan Jesus, 2. Sai jalo ham Tuhan in, na gabe Siparmahan,
pamalas uhur tene, bai ganup na tinobus. baen hatengeran do in ronsi na ondos padan.
Dear tumang padan-Nin, na gabe sijoloman, Seng habiaran be in pori aha na masa,
patoguh uhur do in, bai na marpangarapan. ai seng ijin ujungniin goluh ni na porsaya
Sai hagoluhkon ma in baen rudang hajengeson, Sai hagoluhkon ma in baen rudang hajengeson
ase sonang ham ijin gok Tonduy hasintongan. ase sonang ham ijin gok Tonduy hasintongan
Hinalayak-Ni do in pasirsir haluahon, Hinalayak-Ni do in pasirsir haluahon,
janah damei uhurmin jumpahan hagoluhan. janah damei uhurmin jumpahan hagoluhan.
PARMAHAN NA MADEAR 26 OKTOBER
ULANG SURUT HARINGGASON
“Ulang ma surut ringgas ni uhur nasiam, hinsah ma ibagas tonduy, sirsir ma mambalosi Tuhan
in!”
Rom 12:11
Ipalumba Apostel Paulus do kuria na i Rom ase ganup mamareksai uhurni. Ise ma na
surut ringgas ni uhurni, hinsah ni tonduyni, sirsir ni uhurni mambalosi Tuhan in pakon na
legan. Anggo surut sondang ni suluh roh ma na golap mangisi. Ase maningon tongtong do
pondang suluhta, marsinalsal ibagas na golap. Iarahkon Apostel ai do na tolu bagian ni
hauhuron ai, hinsah, ringgas pakon sirsir, hubani sada tujuan na maharga tumang do boi
mamboban hu hagoluhan sonari pakon magira, ai ma laho mambalosi Tuhan in.
Dalan hu haliharon ni hauhuron ai ma mambalosi Tuhan in. Halani Tuhan do sumber ni
haringgason pakon hasirsiron marhasoman bagah-bagah hubani halak na ra mangkorjahon.
Dingatonta do bagah-bagah ni Tuhan in: Anggo parroh-Ku bani nasiam ai ma ase bayak nasiam
bani haganup. Boi ma iarusi hita ise-ise ma halakni na ringgas bani lahoanni, hinsah tonduy,
sirsir loja pakon na legan janah halak na sonai bahat do jaloanni pasu-pasu humbani Naibata.
Isuruh Raja Salomo do halak na marayoh ase marguru bani porkis.
Ibere Naibata do banta panorang laho marhorja, janah ipasu-pasu ase manjadi
horjanta. Buei do halak na mangkatahon hurang horjani. Lang marosuh Naibata mangidah
halak na sohsoh. Naibata sandiri das bani sonari tongtong do marhorja. Bangsa ni Naibata pe
bangsa siparhorja do ai. Tapi dong do homa na papeletkon arti ni horja on. Horja ai do ibahen
use mangambatsi laho mambalosi Tuhan in, sampai dong use na marnaibatahon horjani. Ai
ma na surut haringgason mambalosi Tuhan in dobni magou ma ia pakon arta ni ai. Ase balosi
hita ma Tuhan in humbani ringgas, hinsah pakon sirsir ni uhurta.
Tonggo: Ham Bapanami, pakon Ham Tuhan Jesus ampa Ham Tonduy Napansing!
Pargogohi Ham ma hanami ase ulang moru holong ni uhurnami songon holong
mula-mula na itandai hanami Ham, tapi tambah maringgas, hinsah pakon
hasirsironnami mambalosi Ham. Amen.
HALELUYA NO. 466:1-2
1. Ringgas hita marhorja, 2 Horjahon ma rosuh-Ni,
ase torsa marhasonangan ase dapotan pasu-pasu
goluhta on. horjamu in.
Sirsir do tong Tuhanta, Manggargar na sinari,
mambere gogoh lao marhorja janah tongtong
hubanta on. ihasomani Tuhanta in.
:,:Naima da tongon, :,:Naima da tongon,
amen sai saud ma sonin. amen sai saud ma sonin
PARMAHAN NA MADEAR 27 OKTOBER
TITAH HOLONG NI ATEI
“Ia tujuan ni Titah in, in ma holong na roh humbani uhur na borsih ampa panggora ni uhur na
madear ampa haporsayaon na pitah.”
1 Timoteus 1:5
Paima ibere Naibata Titah bani halak Israel, parlobei ipaluah do sidea humbani
panjajahan Masir. Naibata sandiri do hansa na boi paluahkon sidea humbani panjajah na
gogoh in. Dob maluah sidea, ai pe ase ibere Naibata Titah bani halak Israel.
Sada syarat laho marsaor pakon Naibata na mapansing ai, ai ma hapansingon ni
hauhuron, na roh humbani uhur na borsih. Syarat na paduahon, maningon tubuh panggora ni
uhur na madear bani ganup na dob ipaluah. Dob sonai baru pe boi tubuh haporsayaon na
pitah dompak Naibata.
Si Timoteus ai ma haondosan ni surat ni Apostel Paulus on. Gabe golpa-golpa do on
hubani sandiri ase ijaga hapansingon ni ambilan na madear na sihol ambilankononni. Hita
sandiri pe domma ijalo hita bei Titah na humbani Naibata. Ia isi ni Titah in na parlobei ai ma:
Mangkaholongi Naibata, dob ai pakon ujung ni Titah in. Ia sandiri Jesus Kristus do manggoki
isi Titah ni pakon ujung ni Titah in. Ia sandiri mambere hubanta Titah na baru, nini do: Titah
na baru Hubere bannima, ai ma ase marsihaholongan hanima samah hanima. Songon holong
ni uhur-Hu bannima, sonai ma hanima marsihaholongan. (Johannes 13:34)
Dong do na so borsih panggora ni uhurni, halani uhurni pe lang borsih. Aha do na boi
paborsih hauhuron? Nini Tuhan Jesus: Domma borsih hanima halani Hata in na Huhatahon
bannima. Tapi sonai pe hotop do ipamatei hita panggora ni uhurta na borsih ai, lang saud
ihorjahon hita. Hape namin anggo ihorjahon hita panggora ni uhur na borsih ai, mangurupi
ma ai ase dapot haporsayaon na pitah. Janah haporsayaon na pitah ai totap do marhasoman
horja.
Tonggo: Ham Bapanami, urupi Ham ma hanami manangar pakon marimbagashon ampa
mangkorjahon hata-Mu. Amen.
HALELUYA NO. 207:2-3
2. Sai ajari Ham hanami, 3. Sai martuah ganup hita,
na tongtong ibagas haotoon in. na mambahen Jesus arihanni in.
Sai porsaya ma hanami, Ambit sai tongtong ra hita
Ham tumang do hagoluhannami in. martenger ni uhur bai Tuhanta in.
Roh dokahni, roh dohorni, Ham, o Jesus, sai patoguh
Uhur-Mu bai uhurnami, hanai na i parporangan.
Sai sadalan pakon Hata-Mu hanami. Ase jumpah bai ujungni hamonangan.
PARMAHAN NA MADEAR 28 OKTOBER
MARGOGOH IBAGAS TUHAN
“Ambahni ai, lambin margogoh ma nasiam ibagas Tuhan in ampa ibagas gogoh ni kuasa-Ni in.”
Epesus 6:10
Na ipindohon Apostel Paulus do Kuria Epesus ase margogoh ibagas Tuhan in, ampa
ibagas kuasa-Ni. Aha do halani ase ipindohon sidea maningon margogoh ibagas Tuhan in?
Halani on do: Dong do munsuh na gogoh tumang na so tartaluhon marhitei gogohni sandiri. Ai
ma siparkuasa na i awang-awang sigomgom dunia hagolapan, tonduy hajahaton na so
tarimbang marhitei gogoh ni parangkulaon atap sinjata na humbani habotohon ni hajolmaon
porini sonaha kekuatanni, songon bom atom, bom nuklir pakon na legan. Lang boi talu
hajahaton ni tonduy-tonduy ai. Sabalikni do songon na lambin monang do ia mamakei sinjata
ni manusia. Tonduy-tonduy hajahaton in do tene na mamakei haganup laho parsedahon jolma.
Halani ai do ase isuruh Apostel Paulus Kuria Epesus ase ipakei sidea sinjata na humbani
Tuhan. Aha ma sinjata na humbani Tuhan? Ai ma sinjata partonduyon. Tonduy na humbani
Naibata do boi manaluhon tonduy na humbani hagolapan in, ai ma setan-setan na markuasa i
awang-awang. Majangin tumang do hajahaton ni setan-setan in. Seng dong pagoluhkon pakon
padameihon hita samah hita. Seng boi padameihon hita pakon Naibata simada hita, tapi na
paingorhon hita do dompak Naibata.
I tongah-tongah ni parporangan na hebat do hita sadokah i dunia on. Songon tentera ni
Kristus hita maningon jongjong totap marsinjatahon sinjata na humbani Naibata ase dapot
hita hamonangan bani ujungni. Tentera i parporangan lang boi putus hubungan hubani
markas besar. Jadi markas besarta ai ma bani dolog batu. Ijai do ipajongjong Tuhan Jesus
kuria-Ni na so tartaluhon horbangan ni nagori toruh. Halani ai maningon totap hubunganta
bei bani Tuhan Jesus Kristus na dob marhamonangan manlawan rajani hagolapan in.
Pakei nasiam ma pakeian sinjata na humbani Naibata, ase boi tahan nasiam dompak
akal-akal ni sibolis in.
Tonggo: Ham Tuhan Jesus Kristus, Ham do ulunami na dob marhamonangan manlawan
munsuh sibolis in. Dihut ma hanami ganup pamonang Ham. Marhitei sinjata na
hum Bamu ai ma hata-Mu na dob iberehkon Ham bennami bahen sinjatanami.
Amen.
HALELUYA NO. 114:3-4
3. Seng dong tarpangajamkon 4. Taronkon rahanan da,
pargogoh diri da. iparsahitan in.
Ai seng dong in margagan Podas do in marpunsa
anggo bai Naibata. ibaen Tuhanta in.
Ai sihol bereon-Ni Ibere do gogohmu
do bam sinjata-Niin; hubam manaron in;
Ai seng tarbaen lang talu Ibaen ma ho gamot-Ni
munsuhmu baenon-Niin bai Harajaon-Niin.
PARMAHAN NA MADEAR 29 OKTOBER
ISE DO NA TOTAP?
“Ia Jesus Kristus totap do, sonai nantuari, sonai do sadari on, lanjar sonai do ronsi sadokah ni
dokahni.”
Heber 13:8
Ganup do hita mangidah pakon mangahapkon na marubah-ubah do sagala na masa
anjaha doras do parubahan in. Tarlobih bani negara-negara na hinatahon negara yang sedang
berkembang songon hita on. Cepat do parubahan ai. Age pe bani negara na dob maju
mardalan do parubahan ai. Tapi ulang pala longang uhurta sonai do torus das hubani ujung ni
sagala ari. Ase domma sifat ni na tinompa in maningon marubah-ubah. Pitah Sipanompa in do
hansa na so marubah, na totap humbani mula ni mulani ronsi sadokah ni dokahni. Jadi
maningon mulak hubani na manompa do na tinompani in. Haganup towod maningon
manombah janah haganup pamangan marhatongonkon Jesus Kristus do Tuhan bahen
hasangapon ni Naibata Bapa i Nagori Atas.
Jadi sonaha ma sikapta bani panorang on sebagai halak Kristen. Ganup ari do
ayubkononta dousanta hubani daroh ni Tuhanta na dob madurus in. Ase borsih hita halani
hasasapan ni dousanta, janah manggoluh i lobei ni Naibata na mapansing ai. On ma
sihorjahonon ni haporsayaonta ibagas pangurupion ni Tonduy Napansing. Ai haporsayaon
lang mintor gok dear humbani mulani hita porsaya, tapi berkembang do ai, halani humbani
haporsayaon do tubuh haporsayaon, ase lambin matoras haporsayaonta dompak Tuhanta.
Tujuanni lambin taridah ma buah-buah ni haporsayaon i tongah-tongahta ganup ari na gabe
hasangapon bani Tuhanta.
Bani pargilumbangon ni dunia pakon parhalisungsung ni logou bolon laho mandorab
solunta maningon tonggoronta ma alatan na totap ai, in ma Jesus Kristus na dob mambere
padan hubanta: “Sai hasomanan-Ku do hanima ganup ari paima marujung dunia on.”
Maningon dong homa pandang situjuon na totap banta bani pardalananta ase ulang kahou
hita i tongah dalan na marluhik-luhik on. Jadi totap ma hita bani padanta dompak Tuhan,
songon Ia na totap mandalankon padan-Ni dompak na hinaholongan-Ni.
Tonggo: Ham Tuhan Jesus Kristus Tuhannami, Ham do Tuhan na totap. Urupi Ham ma
hanami marhitei Tonduy-Mu ase totap boi idalankon hanami padannami, ase
marsangap Ham marhitei horjanami. Amen.
HALELUYA NO. 135:2+6
2. Simole-ole songon sanggar 6. O Jesus, huan-huannami,
hasoman na i tanoh on; sai tangkap tangannami on.
Tongtong do Jesus na tarsulur, Tongtong rajai ma uhurnami,
Huan-Ni pe jonam tongtong. hu surga boan hanai on.
Ai pe baen hita Jesus in Ijin ma tong parsaoran in
tongtong huan-huanta in. sadokah ni dokahni in.
PARMAHAN NA MADEAR 30 OKTOBER
SORTALI HAGOLUHAN
“Ulang habiarhon sagala sitaronon, na sihol roh bamu. Tonggor ma, dabuhon ni sibolis ma
atap piga nasiam hubagas tutupan, ase iuji nasiam anjaha marsik ma nasiam sapuluh ari
dokahni. Sai bujur ma ham ronsi matei, dob ai berehonon-Ku ma bamu sortali hagoluhan ai.”
Pangungkabon 2:10
Haporsayaon na tahan uji ai do na dapotan hamonangan. Boi do idahonta bani Bibelta
piga-piga parhaporsayaon na tahan uji. Si Abraham na totap mambalosi Naibata bani goluhni.
Si Job na totap marhatengeran bani Naibata age pe sonai banggal ni sitaronon, parlajouan na
roh mandorabsi. Monang si Job. Na monang, ai ma na bujur ronsi matei bani ma sortali
hagoluhan. Ipaingat hata on do hu banta ase ulang mabiar mandompakkon sitaronon na sihol
roh. Bujur mangkagoluhkon Hata-Ni bani haganup pardalanan ni goluhta, lang ra ipengaruhi
situasi, lingkungan, lang marnombas-nombas. Bani panorang malas ni uhur, pusok ni uhur
totap adong pardomuan atap kontak dompak Tuhanta. Bujur ronsi matei na mararti do ai roh
hu parmingguan lang martorap-torap, seng pitah sanggah pandidion, atap Natal pakon Tahun
Baru. Bujur ronsi matei mararti do ai sedo Kristen terdaftar hansa.
Nini na marpambotoh: “Goluh on ai ma perjuangan janah dunia on ai ma arena
pergumulan.” Songon si Jakob berjuang, janah margumul i bagas goluhni halani ancaman na
roh humbani saninani si Esau. Janah hadobanni margumul ia pakon Naibata. Lang mabiar si
Jakob margumul, janah hadobanni monang ia. Sadokahni on mabiar ia mangidah saninani si
Esau tapi halani iurupi janah ipabayu Naibata ia magou ma biar ai. Janah ase boi monang bani
perjuangan, pargumulan ai ma totap mangadongkon hubungan pakon Tuhanta, janah dapotsi
ma sortali hagoluhan. Sihol monang ham bani ujian ni goluhmu? Ingat ham na monang do
hansa jumpahan sortali hagoluhan.
Tonggo: Ham Tuhan Naibata marhitei Jesus Kristus Tuhannami, urupi Ham ma hanami
bani goluhnami ase ulang mabiar hanami. Porsaya do hanami Ham do hansa na
boi pamonang hanami. Amen.
HALELUYA NO. 179:1+4
1. Ise do ganup sidea 4. Na mandoding do sidea
i lambung ni Naibata; pasangapkon Jesus in;
Marsortali do hudidah Na tangkas ijin ididah
marsinalsal do homa. sintong ni Hata-Ni in.
Ganup do mandoding bei Na pinarbagah-Ni in,
Sai riap mamuji bei. ondos do ganupan in.
PARMAHAN NA MADEAR 31 OKTOBER
MARTARIMAKASIH
“Dingat nasiam ma na mambobahon nasiam, na mangkatahon hata ni Naibata bani nasiam;
ujung ni pardalanan ni sidea ma tonggor nasiam, anjaha tiru nasiam ma haporsayaon ni sidea.”
Nini pepatah: Panas hari lupa kacang akan kulitnya. Tontu bingkas ni pepatah on pe
halani na adong do na lang mambotoh mangatahon tarimakasih. Bani panorang on pe dong do
na “lupa kacang akan kulitnya.” Martambah-tambah pasu-pasu bani goluhni, tapi ai do use
padaohkonsi humbani Naibata. Ibere Naibata panorang idop ni uhur banta, tapi gati ipakei
hita panorang idop ni uhur ai domu hubani na lang hinarosuhkon-Ni, atap goranon ma ai na
salah pakei bani pasu-pasu. Dob madear ia, lang itandai be hasoman na manogusi hinan.
Patut do manghatahon tarimakasih hita tongtong bani goluhta bani Naibata marhitei
idop ni uhur na ijalo hita bani ganup panorang. Martarimakasih bani Naibata halani holong ni
atei-Ni das hubanta Ambilan Na Madear. Golap hinan do hita Simalungun tapi dob honsi das
Ambilan Na Madear in lihar ma panonggorta. Hinan sedo bangsa ni Naibata hita, sonari
bangsa-Ni ma. (1 Petrus 2:10) Setiap tanggal 31 Oktober tontu taringat do hita hubani tokoh
reformasi Dr. Martin Luther na mangadongkon pambaharuan i tongah-tongah ni kuria. Na
barani manaksihon hasintongan bani na hurang sintong.
Marhiteihon ni reformasi on ipaingat homa hita ase dihut ipabayu hita dirinta. Na sirsir
pabayuhon hauhuronni, pakon goluhni ai do na margoluh na baru songon na hinarosuhkon ni
Tuhanta. Haporsayaon do na gabe bohal atap gogoh banta. Ningon barani do hita
pataridahkon hasintongan, tanda ni na dob dewasa haporsayaonta. Patut ma hita
mangkatahon tarimakasih bani Tuhanta bani idop ni uhur-Ni na ijalo hita mardapot-dapot.
Tonggo: Ajari Ham ma hanami Tuhan tongtong martarimakasih Bamu, sonai age
mamakei pasu-pasu-Mu in. Patoguh Ham ma haporsayaonnami. Amen.
HALELUYA NO. 132:2-3
2. Tarima kasih ma 3. Andohar ma holong
Bamu, o Naibata, ateihu, sai tongtong
parlayak Ham! bujur Bamu.
Sibahen dalan in Age huja pe au
marhitei Jesus in sai hasomani au,
hu Surga in. sonang tumang.
Heber 13:7
