Renungan Mingguan Bapa GKPS, 16 Maret 2025 (Reminiscere)

Renungan Mingguan Bapa GKPS, 16 Maret 2025 (Reminiscere)

Nas      : Kejadian 50:22-26

Doding: Haleluya No. 133:1-4

Tema   : Allah bekerja di masa sulit

Tujuan : Agar kaum bapa lebih memahami bahwa Allah tetap bekerja di masa-masa sulit

MARHORJA DO NAIBATA BANI MASA SULIT

Horas ma hubani nasiam seksi bapa GKPS!

Pangarapannami, horas-horas hita ganup itumpaki Tuhan Naibata.

Kuria ni Tuhan na hinaholongan ibagas goranni Tuhan Jesus Kristus Raja ni Gareja, ra gati do itangar hita pargoluhan on marputar songon roda ni padati. Kadang hampit toruh kadang hampit datas. Sonai ma roda ai marputar, ai do ase boi das padati ai hubani tujuanni, halani parputarni rodani. Sonai ma homa goluh on, pagantih soluk do na manis age na mapaet na ibolus hita bani goluh on, janah dinamika ni pardalanan ni goluh ai do na mambahen hita das hubani tujuan aima manghagoluhkon rosuh ni Naibata bani goluhta age bani panorang na manis age bani panorang na mapaet dai ni goluhta. Janah ujungni, jumpah Tuhan hita setia hubani ronsi ujung ni goluhta irik ihorjahon hita parentah-Ni janah ibaritahon hita hata-Ni marhitei sahap age parlahouta hubani sabuei-buei ni halak na jumpah hita.

Kuria ni Tuhan, Josep aima salah sada humbani anak ni si Jakob (si Israel). Ia mamolus pardalananni goluh na manis age na mapaet. Ia aima anak haholongan ni bapa ni, boi sobuton, lobih do perhatianni bapa ni hubani marimbang hubani sanina-saninani. Holongan do uhurni si Israel hubani si Josep halani si Josep tubuh bani panorang hatuaonni ( 1 Musa 37:3). Halani ai, gabe simburu ma sanina-sanina ni ai bani, janah singkat cerita, ijual sanina-sanina ni ai ma ia hubani partiga-tiga halak Midian lanjar iboan hu Masir. I Masir, paet ni goluh na idageini lape salpu. Ia ifitnah parinangon ni si Potipar janah singkat cerita gabe ipamasuk ma ia hubagas tutupan. Hape lang na lang parduli Tuhan Naibata hubani, marpanatap do Tuhan janah marhorja do Tuhan i balik layar, mambahen ia marpambotoh manorhai (mengartikan) nipi, janah aima na mamboan ia hu lobei ni Parao janah gabe orang kepercayaan ni Parao. Bagei do masa sulit na idompakkon di Josep. Tapi, ibagas masa sulit ai, totap do ia marparlahou na hinarosuhkon ni Jahowa, irik hujai ibere Naibata do idop ni uhur-Ni bani, na mambahen ia gabe orang kepercayaan ni Parao janah aima homa dalanni laho paluahkon keluarga ni (Bapa ni pakon sanina-sanina ni, ronsi keluarga ni sanina-saninani ai) na bani panorang ai tading i tanoh Kanaan. I Kanaan age Masir masa do logou na mambahen lang marproduksi juma. Tapi i Masir, halani domma iartihon si Josep nipi ni Parao, ai mambahen sidea memiliki persiapan mandompakkon na masa ai, na mambahen i Masir lang masa lohei, tapi anggo i Kanaan lang dong sipanganon. Ijon pe ididah hita do sonaha Tuhan manramotkon Masir halani si Josep, janah sonaha Tuhan manramotkon si Jakob riap pakon keluarga ni, halani si Josep do homa. Misir do sanina-sanina ni si Josep hu Masir mangindahi sipanganon, lanjar ijai ma sidea jumpah. Isaksihon si Josep do bahasa na mapaet na nidageini age marhitei maksud jahat humbani sanina-sanina ni, ipakei Tuhan do ai laho manramotkon goluhni sidea haganupan (45:5). Itonun Naibata do pengalaman pahit age maksud jahat ni sanina-sanina ni ai bahen hadearon bani goluh ni si Josep sonai age keluarga besarni. Aima pandeini Naibata menyusun janah menggerakkan pargoluhan ni si Josep ase marhiteihonsi tarsarihon bangsa-Ni. Pengalaman ni goluhni si Josep namin mambahen hita mangidah horja ni Naibata na torus adong age bani panorang na sulit. Songon na sinobut ni Apostel Paulus hubani kuria Roma, bani Rom 8:28: “Ai ibotoh hita do, haganup do manumpak hubani na madear bani sagala na marholong ni uhur bani Naibata, na nidilo-Ni hun bani sura-sura-Ni hinan”. Ibagas holong ronsi pandei ni Naibata, na sonaha pe ragam ni goluh na ialami hita, boi do ibahen-Ni ai manumpak hubani na madear. Iojur hata ni Naibata on do hita ase mangidah hubagas goluhta bei, pori mapaet atap sulit pe iahap hita goluhta nuan on, dingat hita ma holong ampa pandei ni Naibata, ubahonni do goluhta gabe manis. Sura-sura ni Naibata aima mambahen goluhta bermakna janah gok ibagas malas ni uhur. Sura-sura ni Naibata aima sura-sura hadearon sedo hamagouan (Jer. 29:11).  Maningon toguh do keyakinan ai ijolom hita tarlobihma tingki suram pangahapta, atap madokah tu ma sulit goluhta iahap hita. Yakin ma hita, Tuhan marhorja do, na penting torus hita marusaha ibagas dalan na tinotapkon Tuhan. Bani panorang na tinontuhon-Ni sandiri, ididah hita ma bukti parrorot ni Tuhan bani goluhta. Maningon yakin do hita pasal ai.

Ase bani panorang paima marujung goluh ni si Josep, marsaksi do ia pasal keyakinanni. Sonaha Naibata mambuktihon parorotni Tuhan na saindokah, sonai ma homa Naibata marorot ginomparni Israel. Nini do bani ayat 24: “ … sai tataponni Naibata do nasiam magira, anjaha arahkonon-Ni do nasiam luar hun tanoh on hu tanoh na dob binulawankon-Ni hubani si Abraham, si Isak pakon si Jakob.” Sai tatapon ni Naibata do sidea magira. Keyakinan on do na itransfer hubani sidea age hubanta nuan on, sai tataponni Jahowa do hita magira. Sasintongni, bani ari-ari na dob salpu in, age nuan on itatap Naibata do tong hita. Lang ongga itadingkon Naibata hita. Anggo songon na itadingkon Naibata pangahapta, totap ma hita setia hu-Bani, ai na tingki marhorja do Ia nuan, songon sahalak panlobur pirak, sonai ma Ia manlobur hita ase tahan uji janah semakin murni (Ps. 66:10). Paima hita ma Tuhan marhorja, tapi irik horjahon hita na gabe parbagiananta. Parbagiananta aima setia bani proses. Parbagiananni bapa aima setia manghaholongi, mansarihon, manghopkop keluargani, irik setia manghorjahon rosuh ni Tuhan. Ibagas haporsayaon, paturut ma Tuhan manghorjahon parbagianan-Ni. Bani na paimahon ai, marmalas ni uhur ma hita mangarap, sabar bani hamarsikon janah golgol ma hita martonggo (Rom 12:12). Ibagas hasabaron ma hita iproses Naibata, bereonni do na porlu banta bani panorangni janah domu hubani hasangapon-Ni.

Yakin botul do si Josep bani panatapni Naibata hubani ginompar ni Israel magira. Halani keyakinanni ai, isuruhni do sidea mamboan holi-holini hun Masir sanggah parluar ni sidea hunjai (ayt. 26). Ase hunjon iparlajari hita do bahasa keyakinan iman itu harus ditransfer. Sonai do homa seksi Bapa, aha na iyakini hita, secara sadar atau tidak sadar ai do na itransfer hita hubani niombah age keluarganta. Anggo ragu do hita, keraguan do na itrasfer hita, sonai sebalikni, anggo yakin do hita, keyakinan do na itransfer hita. Sai lambim yakin ma hita bahasa Naibata marhorja bani masa sulit. Amen.