PA BAPA
05 Juli 2026 (5 Set. Trinitatis)
Nas : Jesaya 43:8-21
Tema : Gabe saksi ni Kristus
Tujuan : Ase Bapa patalarhon goluhni gabe saksi ni Kristus
Pengantar
Buku Jesaya i tulis bani panorang bangsa Israel tarbuang i Babel bani panorang abad pa – 6 SM. Sanggah na ibagas habuangan ai ma Jesaya roh mambere pangarapan ase ulang mandolei tapi totap mangarap bani padan haluahon na humbani Naibata. Bani panorang ai homa, buei do bangsa-bangsa na legan na manombah naibata-naibata na legan. Ijon ma homa Jesaya paingatkon pasal hajongjongan ni sidea selaku bangsa ni Naibata. Ulang terpengaruh bani bangsa-bangsa na legan.
Israel aima bangsa na pinilih ni Naibata, idilo gabe saksi pasal habanggalon ni Naibata. Bani Jesaya 43 on, Naibata mangapohi bangsa-Ni marhitei padan, ai paluahon-Ni do bangsa-Ni humbani munsuh-munsuh ni sidea. Agepe manaron sidea tongkin, tapi paroroton-Ni do sidea, ai harga tumang do sidea ilobei-lobei ni Naibata. Ipangindo Naibata do homa sidea ase gabe saksi-Ni, paboa lang adong Naibata na legan na boi paluahkon sidea. Jahowa do Sipaluah. Iojur do homa bangsa na tarbuang ai ase marpangarapan bani dalan na baru na sihol bahenon ni Naibata hubani sidea. Ai bahenon ni Naibata ma dalan i halimisan, age pe lang iboan bangsa ai galangan pardearan tapi totap do Naibata setia bani padan-Ni.
Naibata mandilo bangsa-Ni na pitung hansi pe dong matani, anjaha na nengel hansi pe adong pinggolni. Artini: agepe bangsa ai pitung anjaha nengel (secara rohani) tapi totap do ipilih Naibata gabe saksi-Ni. Sidea idilo laho manakasihon, paboa seng adong na boi paluahkon sidea sobali jahowa Naibata. Idilo laho patalarhon hasintongan pakon kuasa-Ni, pataridahkon goluh sebagai bangsa ni Naibata. Ijon boi gabe parlajaran hubanta anggo Naibata lang mamilih halak na sempurna, halani Ia do na ‘menyempurnahon’ halak na pinilih-Ni. Gabe saksi aima gabe saksi na manggoluh, lang pitah mambotoh hatani Naibata. Tapi patalarhon goluhni selaku halak na pinilih domu hubani harosuh ni Naibata.
paingatkon bangsa Israel, paboa seng dong naibata na legan, sedo halani gogoh ni sidea gabe boi sidea maluah hun Babel. Tapi pitah halani kuasa ni Naibata do. Usih songon Naibata paluahkon halak Israel hun Masir. Artini Naibata totap do marhorja bani sejarah ni bangsa-Ni. Lang dong kuasa na legan lobih humbani kuasa ni Naibata. Ai haganup bangsa-bangsa na legan maningon roh manowod do hu-Bani. (9)
Ulang ipadingat-dingat na parlobei ondi sedo mararti ase manlupahon sejarah. Tapi ulang lalab soh bani na masa hinan, sitaronon, kegagalan tapi ase mangkawah hu lobei halani Naibata sihol mambahen na baru. Janah domma martumboran nuan (19). Halani ai, haporsayaonta maningon do torus manuju hubani na gokan dear. Lang soh. Ai gati do na so ibagas pingkiranta ai do jaloonta. Banggal do kuasa ni Naibata. Na so mungkin nini hita, tapi mungkin do bani Naibata.
Naibata do mambere bah i halimisan pakon mambahen pasar i halimisan. Hinorhon ni ai gabe dihut do binatang-binatang pasangaphon Naibata. Artini: Naibata sanggup mangubah/ pasuangkon kondisi na parah tumang gabe hadearaon. Domu hujin na gabe tujuan ni goluhta aima pasangaphon Naibata marhitei na mambaritahon hamuliaon-Ni – gabe saksi ni Naibata (21).
Marhitei bahan PA on, Bapa/ seksi Bapa idilo do ase gabe saksi ni Naibata. Pataridahkon hasaksian i tongah-tongah ni keluarga. Jadi sedo pitah mansari goluh tapi dihut do homa gabe saksi ibagas partonduyon. Bapa na gok tanggungjawab bani rumah tanggani, na buei mandompakkon hamaholan pasari-sari goluh bani rumah tangga. Marhitei nas PA on domma ipabotohkon anggo Naibata marhorja do bani kondisi-kondisi na parngit sidompakononta. Janah margogoh do Naibata laho patorsahon haganup ai. Ase pangarapan na sonin ma na mampargogohi parbapaon ibagas na mandalankon tanggung jawab selaku kapala rumah tangga.
Domu hujai, tadingkon hita ma hasomalan-hasomalan na lang marguna janah manatap hulobei marhasoman pangarapan. Ase taridah ma rumahtangga na binobahonta gabe rumah tangga Kristen na manondangkon holong ni Tuhanta Jesus Kristus. Age pe lang gokan dear hita, tapi Naibata sir-sir do mamakei hita mamboan keluarganta bei gabe hasaksian bani halak na legan. Pasangap hita ma Naibata marhitei goluhta, ai hujai do hita tardilo.
Diskusi:
